728x90 AdSpace

Hot
Menu
Zon-ol na Donate

Latest News

Zogam aa Zomite ong makaih ding Pu Pau Lun Min Thang leh Pu Mang Hen Dal.

Dear Zomi u leh nau te aw,
Chin State, Myanmar

Ih ngaklah mahmah ahi Zogam ong makaih ding Thuzekpi te ong kipta in galkap khat simloh a vekin Zomi Zosuan vive hi .Chief Minister dingin Pu Lian Hluai ( Falam pan ) hi in, ei Tedim leh Tonzong lampan  mimal nih takin Minister mun 2  ngah ih hih manin , ih deih mahmah sam hangin i lam en ngam het kei aa, ahih hangin Pasian in ong pia ahih manin angah veve ih hi hi. Minister panmun 6 om hi in, khatpen galkap ( Kawlte ) ten a laksa ahih manin panmun 5 lek pan 2 angah hi hang cih theih hi.

Pu Pau Lun Min Thang 


Pu Pau Lun pen ZCD pan hi in Tonzang Township panin State MP ding dem in telcing hi. A khua pen Cikha hi in, tu laitak Yangan ah teng uh aa, nung deuhin a pianna Pa in tawntung mun ong zuatsan ta hi. Pa bang om lai leh angtang leh kipak mahmah ding hi. Tun zong aom na vangam panin a tapa gualzawhna hangin na lungdam mahmah ding hi cih theihsa hi. Pu Pau Lun in innkuanpih nei nailo in tangval melhoih mahmah khat zong hi lai hi.Pu Pau Lun in Ministry of Social Welfare ( Mimal nuntak khuasak khantohna, Cidamna lam, Pilna lam, biakna lam, ngeina lam )ong makaih ding hi in hih panmun in ahuam khak pen ong zai kik peuhmah hi. Tu lian laitak leh mailam sau veipi aa dingin aki sam penpen panmun hi in, ama sepsung in maban tampi ong matut zo ding hi ci in muanna I nei aa, ei mipi ten zong I sep theihna mun pan panpih ciat ding hi hang.

Pu Mang Hen Dal

Pu Mang Hen Dal pen Tedim Township, Suangdawh khua pan hi in kuama Party tang hi lo in, a pil a siam ahihna tawh apualam ( Independent ) pan in a ki tel hi. Kumpi nasem lui hi in, Kawlgam Ministry of Forestry ah zong Director panmun dong ngah hi. Tu aa a ngahthak panmun pen Ministry of Agriculture,Livestock, Forestry and Mining (  Lokhawh na, khawi leh vulhna, Gam sung om nate khempeuh leh leisung sumpiang te tawh kisai ) ong makaih in ong kemcing ong phungcing sak dingin panmun vaipuak a nei hita hi. A diakin nidang in ih lunghimawh pih ahi Gullu Mual vai bangpen ama sep theihna tawh na tampi kilamdang sak zo ding hi. Ih lung nuamzo pah hi.

Ih theihsa ciat mah bangin Zogam pen, tangthu kan siamten a kanna ciangah , kua mah in ong uk ngeilo bek tham lo in kua mah in amun alei iplah lualo hi. Mangkang kumpi in amau kumpi gam aliatsemsem na ding leh leitung ah a thu neihna a kip theihna dingin India leh Kawlgam, Sengam kikal aa om Zogam zong , mun thupi mahmah ( Geo-politics ) ahih manin Kawlgam 1885kum in alak khitteh Zogam hamsa pipi in 1896kum in ong la zo uh hi. Tua hun aa kipan in minam dangte khutsung aki tung pan hi in, tua masiah pen ei leh ei aki makaih diamdiamte ih hi hi.



Kawlte tawh suahtakna I lakkhawm khit ciangin Parliament Democracy tawh ki ukna ong kipan in tua aa kipan Zomite ei leh ei khatvei aki uk a ki makaih kik ong suak h. Tua lai in Zozum ahih leh Yangon ah om in , Makai u liante Yangon pan in gal uk hi. Tua dan paizia mipi aa dingin hoih maw hoihlo cih pen ngaihsut huai hi in tangthu etkik huai khat ahi hi. 1962 kum ciangin Galkap ten ong uk in, 1974- 1988kum dong galkap paizia makaihna mah ahi Party khatbek ki ukna,Kawlgam tawh aki tuak ding Socialism tawh ki ukna, or Galkap te thuneihna dan mah tawh a ki uk ihi hi. 1988-2010kum dong, Party ukna beisak leuleu in Galkap ukna lamah kileh kik hi hang. 2010 kum aa kipan in Galkap puansuah , galkap luite ukna hun ong hi leuleu hi. Amin in mipi tel tangmite aom tei hangin Galkap thuneihna, paizia mah tawh 2015kum dong aki kalsuan hi mawk hi.

2016kum pan kipan in bel, mipite tel tangmi taktak te in Kawlgam ong makaih dinguh ahih manin nak lungdam huai leh lawp huai mahmah hi. Hih bangdan pen Mangkangte ong lutma tuma kum 130 hun lai or Kawlgam Paliament democracy hun lai dan pianmah( tua sangin thu ki theihna biahzaw leh kilawp zaw ) ong hikik ahih manin, lungdam phadiak leh hih ciang tunna dingin ong makaih ong kem den ih biak Pasian tungah ih lungdam mahmah hi. Kawlgam pen leitung bup gamteng lakpan a zawng pen lam hi in, Kawlgam ah Zogam pen a zawngpen leh pilna lam aniam pen hi sawnsawn lai ihih manin, ong kahthat makaite in sepding vaipuak hau phadeuh leh na ong naksep phadeuh ong kul ding hi. Tua pen ei mipi ten telsiam in ih panpih theihna pan panpih in thapia in, tawsawn in, thungetna tawh panpih ding hi hang.

India lampan u leh naute aw, Pasian hehpihna tawh Zogam pen ei Zomite khutsung ah ong tungkik taktak ta ahih manin na lungmuang na kha muang un. Damdam in Zogam ah ih innteek semsem dinga, ei Zomite bekin innpi sepna hun Zogam a sawtlo in ong tung pelmawh ding hi. No aa dingin kongkhak kihong den aa, na ut hunhun in ong sungtum pusuak un. Na sanggam na beh na phung, na khuapih na tuipih te ong van zel unla, ko khanglam Zomiten zong , no kiangah ong hawhin thu leh lai vai hawm khawm, tukhawm khawlkhawm dih ni.Hih bangin hun kikhelna sungah ong Makai dingin Pasian ong telsak makaite khempeuh tungah ih biak Pasian pilna ciimna ong piaksak ta hen la, ei mipi te mahmah in zong , I makaite panpihin thapia in, ih kisap amau ong sepsak theih ding aom leh tawsawn in paikhop liailiai hun ta hi.
 
Lungdam
Khup Lian Thang

Lai gelh pa Khup Lian Thang leh a Angkawi.

***************************************************************************


from:Khup Lian Thang thangliank@gmail.com
to:"tongsan@googlegroups.com" <tongsan@googlegroups.com>,
"zominam@yahoogroups.com" <zominam@yahoogroups.com>
cc:cinpuzomi@gmail.com
date:Mon, Apr 11, 2016 at 11:55 AM
                            

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zogam aa Zomite ong makaih ding Pu Pau Lun Min Thang leh Pu Mang Hen Dal. Description: Rating: 5 Reviewed By: Cinpu Zomi
Scroll to Top