728x90 AdSpace

Hot
Menu
Zon-ol na Donate

Latest News

Zolai, Zopau vaaikupna. Thusung - T. Zokhai

Lawmlehgual, ulehnau teng-aw!!!
Zolai, Zopau vaaikupna:
Zokhai

Zolai-pen Zopau theih ciangbek-tawh akim/akicing hi peuhmah lo-hi. English apau thei khempeuh English siam kici theilo-hi. Kei mimal' Zopau cihpen Tedim Tonzaang Lamka kuam teng-ah kampheen lohsa-a tongkisaang theiteng agen kahihi.

Zopau: Zomi I-cih ciang-in Tedim Khua Hunlehmual (Context)-tawh kigen khaden-a, hihlaai-ah tua context aki-nusia ahihi. Hih kuampi thum teng-a mi atampen ataangpi' zat-pen Zopau ahihi. Kam leh Pau themcik khenpha kiik lehang: Kam-pen Awsuah bih-a genna hi-a, Pau-pen Paukam: Taangpi' zat kampau genna ahihlam kiplet masak theihding ahihi. Zokam = Zohaam hiding-a, Zopau = Zomi Paukam (Zomish or Zomi Language) hiding-hi.


Zopau-ah ataangpi guipi nih-in I-khen ding-hi.
Khatna:
Nisim kampau hi-a, Laizuunpaal (Grammar)-tawh kituak tak-a pau sese akuul khollo, khangthak lak-a athak kammal tuamtuam-tawh polhzau-a pauna cihte abulpi ahihi. Nulehpate leh tate kihona, zii leh pasal kihona, lawmlehgual kihona, teek leh mo kihona, sungh leh maak kihona, cbt hihte-ah alem bangbang-a kammal taangzatna khempeuh Nisim Kampau khawk-ah kiguang dinghi.
Nihna:
Thuciinte (Sayings), Paunaakte (Proverbs) leh Lakam (Poetic words) cihte khawk khat-ah kiguang khawm-a, thutheihna abehlap-nuam, abehlap-zo, akin akinlo, athei-nuam leh a-awlmawhlo cih dungzuui-in mikim' theihna kikimlo diimdiam-hi. Hihte-pen taangthu tuanthu pan-a hongpiang taangpi hizaw ahihman-in khua khatle-khat nangawn athuciin-uh, apaunaak-uh akidang, atuamciat honkhattek kinei thuah laai-hi.
Thuciinte bangpen khua leh kual zil-in akidang ahihkeileh neihtuam pawlkhat om-hi. Lpd: Laaitui Khua-a "Niing Khual' Lol" akici-pen khuadangte-in Niing Khual' lolzia theilo ahihman-in amau' ading phattuamna pia khollo; tua-tawh kibang-in Khuano kual pan-a Paunaak 1000 akigelh laibu sung-ah ko' khua' a thuciin khenkhat-tawh akisuun a-om mahbang-in akimang theilo, athu akitheilo honkhat om-hi.

Zolai-ah ataangpi khenpi 3-in I-veel dinghi.
Khatna:
Laimalpaa leh Laimalnu (Consonant & Vowel)-tawh awsuak bawl-a malgawmna (spelling) abulpi hong hi-a, hihpen nidang-a Kawlte-in (ah tounglong: အ.အ.အ) ci-a nitaak laisinna hong bawlsak pen uh-tawhzong akithei-zo laimal bulpite gelhzia simzia (reading and writing basic words) ahihi. Tua-tawh akikim veve Mah Sah Lah hun tawlkhat sungteng Danhlang pan Danh 4 ciang akisin: Zolai Sim Bu leh Namkim Bu akici-pen Zolai Zilciil Siamsinna (Zolai Primary Education) level ahihi. Hihciang-pen khuak-haat te-in sinloh inzong social interaction tungtawn-in theizo lel-hi.
Nihna:
Laimalte (Letters)-tawh mammal amalgam-thei, simthei, gelhthei ciang dinmun kheng-in, laimal zatzia, laimal gawmna-ah gawmding khending thuukkanna leh sepsinna, kammalte' maai-ah laimalpi leh laimalno zatziading cihte-a kipan khangkhaan siamsinna dungzuui-in Laizuunpaal (Grammar)-tawh kisai laimal, kammal, laigual, laikhil leh thuguui khenpite gualbaan tak-a zilzopna-pen Zolai Zillaai Siamsinna (Zolai Secondary Education) tanzil honghi ta-hi.
Hih hun-a, "pasian" acihleh "god" acihna mah-tawh akibang ahihlam zillaai level tebek-in thei-a, zilciil level te-in ahihleh phamawh salo thei-hi. Topa Pasian Zeisu cbt-pen topa pasian jesu cihdaan tepawl zilciil sung nangawn-a akiciante-in zangh nawnlo cihbang dinmun ahihi. Zillaai dinmun-ah Grammar bek-zong hi nawnlo-in akigelh thupaih/laipaih (article: mi masate-in "thuluui" acih-uh) khat simzia, akhialhna leh amaanna kalhkhiatzia, akhialhna-pen akician kuppihna (argument)., amaanna tawsawnna (support) bawlzia cihte kisin dinghi.
Thu kigaalgen khat I-gaalzaak maimai ciang-tawh pumnial cihte hongkiam ding-a, John Cope hong bawlsak LST nangawn amuhzong amu ngeilopi mi-nialnapeuh ci-a "Cope Topa' bawl peuhmah kheek loding,..." cihdaan mittaw sialmei let tepawl hongkiam dinghi. Zillaai dinmun ahihman-in Zolai Tan 4 akici denkeei dinmun pan-a kahlei kaankhiat tohna hi-a, academic vaai-mahmah tading-hi.
Thumna:
Hih dinmun-pen saang mahmah ta-hi. Zolai Tan 4 kampau-a zat ciang-tawh kamkum theih taktak hinawn lo-hi, banghanghiam cihleh -siamzil (-logy) level hita-a, Zolai gelhtheih, simtheih ciang-tawh hi-nawn peuhmah lo-hi. Simthei gelhthei ciang tepawl-in nana simsimzaw henla, kuppih keileh amah leh mipi' ading manpha zawtham-hi, banghanghiam cihleh laizuunpaalzil (grammatical) tak-in kigelh ding-a, neelzuunzil (academic) tak-in kigelhding, referencing akici malmatzia kicianding, thu anung ama kihual, zia-om (reasonable) mahmah, hitheineihna (posibility) kician tak-a lakkhia cihte-tawh kigelh ta-hi. (English khawng lailet [translate] ziau-a ama' theihtawm bang-a amawkgelh cihte guta hibek veen-ah reference kician leh paraphrasing kizen tak-a kigelh thute academic writing kici).
Hih dinmun-pen English te-in Tertiary acih-uh Zilsaang Siamsinna tanzil hi-a, mikim-in thei zolo, tel zolo-ding thumaan ahihi. Akhuak-uh'n baanlo ding-a, ei' khuak-in abatloh thulehla akigelh akigen ciang-in I-pumnial gawpleh "I' khuak' batlohlam ataangkoko" kihi zaw-a, azumhuai ahihi. Zolai Zilsaang dinmun-ah, adiak-in akigelh laite critique bawlna, kankhiatna, gelhkiikna, argument piakna, support paikna bek hilo-in, argument khatpeuhpeuh reference kician lah kuul, I-gelhzia mahmah-zong mi' kammal zatsate I-zat peuhmah-a reference I-koih keileh guta (crime akici thukhaamkalh tatsiatna) ahihi.
Zolai lamsang-ah ka' theihkhialh keileh Guta (Thief) tam mahmah-hi. Kammal hoihte mi' gelhsa, adiak-in namdangte' gelhsate laibu hongbawl hiat-hiat uh-a, reference kician koihlo-uh ahihman-in Zomi taangpite akheem-uh ahihi. Mipi-inzong tua laite namdang lai-tawh simkha ngeilo ahihman-in pil sa-mahmah uhhi. Pil-mah uhhi. Ne Win' pil mah-tawh kidang lo-hi. Tu khang-ah hihte beisakding nang leh kei' mawhpuak ahihi. Guta atam laaiteng, mizuau atam laaiteng, thuneihna leencipmi atam laaiteng tualsung mite khangto cihbang om ngeilo dinghi.
Atawpna ding-in, "Missionary John Cope' hong bawlsak Lai Siangtho bulphuh" cih thu-ah, ama' hongguat laimalte I-zat nungsang aki-bulphuh den ahihi. Zopau-pen Zolai-tawh I-gelh ciang-in ama' zatsa kammal bek-mah ci-mawk lehang ama' gelh lak-ah akihello kammal tam cihtak-in tam-hi. J. Cope-in LST agelh lehzong tua sung-ah anuai-a laimalte omlo dinghi:
Psychology, Sociology, Anthology, Scientist, -logy tawh akikhawlsak kammal khempeuh-a kipan Education, Economics, Poem, Prime Minister, Member of Parliament, Social Welfare, ....... hihteng bekbek gam khat kiukna' ading-a thupi mahmahte kihel loding-hi, na simkiik un. Atom leh akitel mahmah ding-a I-gelhpak bekbek hilaai-hi.
Hih-pen Zolai Siamsinna lamsang Danhlang pan Bachelor Degree ciang apaipi etpakna ahihi. Hih tungkaan-pen Doctor of Philo lam hito tading-hi. Kansuutna (research) kician bawl-a thuthak guuicing leh guuizia-om tak-a aki-hawmkhia lai thupite leh tua lai-in mipi' phattuam nading akhelkhiat zah-tawh kizuui-a PhD piakding honghi dinghi.

Zomi Pasian' Thupha!
Zokhai

Source :
Pu Zokhai Facebook
Lai gelh Pu Zokhai in Zomi eLibrary / Laibusaal ading in 4/19/2016 ni in phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zolai, Zopau vaaikupna. Thusung - T. Zokhai Description: Rating: 5 Reviewed By: Cinpu Zomi
Scroll to Top