728x90 AdSpace

Hot
Menu
Zon-ol na Donate

Latest News

Zomi Cih Tawh Kisai Thu Tg. Cin Za Lian

Zomi Cih Tawh Kisai Thu
Tg. Cin Za Lian

Zomi cih tawh kisai kibuaipih mahmah-in, khat le khat kikal-ah zong kitel khialhna tampi om khin hi. Bangbang ahi zongin i kanna tawh kizui-in kilamdang mah leh, a kinaai peen-a i pom theih nading leh pumkhat i suah theihtheih na’ng-a, a vaihawm dingte hi zaw hang, ci-a i saan’ siam tek nadingin kong thum masa hi. Hih zong a maan peen hi kici ngam tuan lo dinga, Buanli khua kumzacin’ pawi-a thu kante’ kanna tungtawn-a muh dan hi. Thu kanpite’ muhna panin a maan thei peen dinga ngaihsutna hi phot ahih manin, a kician zaw leh a naai thei peen ding a omte kan beh lai dingin k’ong thuum hi.

Hih laibu a bawl masa thukante’ kanna tungtawnin, Zomi cih kammal a ciil-a kipan om pah hi ci-a lahkhiatna ding om pak lo ahih manin, “A omna i muh khak leh zong, i muhkhiatna, hoih taka i lah theih ding thupi mahmah hi. Ei Zomite’ tangthu leh khangthu kan tam zawte’ muh dan: Mongolia pan kipanin Tibet gam, Kawlgam leh India gam mualtung-a teeng minamte kihi hi.

Tibet gam pan gal leh sa haksatna hangin Mon-Khmer, Tai-Shan leh TibetoBurman ci-in minam lian thum-in kikhenna om hi. Mon-Khmer minamte in Salween gun leh Mekong gun dung zui-in Kawlgam na lut uh hi. A omsa Negrito leh Indonizi mite hawlkhia-in Irrawaddy, Sittang leh Salween gun kuam teng-ah na teeng uh hi. Mi hong pawlcin’na tawh kizui-in mun tuamtuamah kikhenin Thuwunna Bhummi (Thaton), Hanthawaddy (Okkalapa), Dagon, Bassein, Thanlyan (Syriam), Twante, Moulmein, Pegu leh Moketama (Martaban) khuapite na luah uh hi.


Mon-Khmer minamte Kawlgam sung a tun’ zawh a sawt lo-in Tibeto-Burman minamte Tibet gam nisuahna lam pan Bramaputra gun dung zui-in Kawlgam na lut uh hi. Kawlgam sungah Irrawaddy leh Talawaddy (Chindwin) gun dung zui-in hong paisuak uh-a, Takaung khua-ah na teeng uh hi. Tua huna kipan  Kawlgam-ah minam nih na teeng uh hi.

BC 100 kum pawlin China gam Yanyui gun khang lam-a teeng Tai-Shan mite in China kumpi ukna thuak zo lo-in, Shan gam tengah na teeng uh hi. AD 200 kum pawlin Asia gam pan Karen mite hong lalin Irrawaddy gun leh Salween gun kuam zanggam le mualtung teng na luah uh hi. [1]

Pyu, Kanyan, Tet Minam Kipat Khiatna
Kum za lom 7 leh 8 hun sungin, Takaung khua-a om Abiyaza in kumpi seem hi. A sih ciangin a tapa Kanyazagyi leh Kanyazange, kumpi za kituh-a, Kanyazange in ngah hi. Kanyazange a sih ciangin Duttabaung in seem-a, Takaung khua pan lalkhia-in Tayekhittaya khua sat hi. Duttabaung a sih ciangin Tamudaya in kumpi sem-a, gam leh lei makaih zo lo ahih manin AD 721 kum pawlin Tazikhitaza khua pan Pyu, Kanyan, leh Tet minam kikhenna om hi. Pyu-te Kawl mi, Kanyan-te Rakhaing mi, leh Tet minamte Chin (Zomi)-te kici hi. Pyu leh Kanyan-te hong kido manin Kanyan-te nitumna lam Thandwe (Sandoway) mualtungah na teeng uh hi. Pyu minam sungah amau leh amau hong kilem loh ciangin Pyu-te khen thum-in kikhen uh-a, khen khat in Diahben, leh khen khat in Tet mite beel-in, khen khat in Tayekhittaya khua puahpha uh hi.[2] 

Tet (Chin) Minamte khenpi thum-in kikhen
AD 721 kum pawl-a Tayekhittaya kisiatna hanga kikhenna pan Chin (Zomi)-te in mun leh gam zong dingin a sul masa uh gun dung hong zui kik uh hi. Khenpi nih-in kikhen uh ahih manin kipha kim zo lo uh hi. A pai masate Irrawaddy leh Chindwin gun kituahna mun a tun’ uh ciangin, a nunga hong pai a naute in sul a theih nading uh ci-in, nahtang kungte tem tawh sattan uh hi. Nahtang laingek dawn kikte a muh uh ciangin, “I ute pha zo nawn kei ni,” ci-in Bhamo gamtengah khua na sat uh hi. Tua mun-a teengte Tet suan leh khak Kachin mite kici hi. A ute phawkna-in tempaai a bawl uh ciangin a paai lang khat bek bawl uh hi. Inn a lam uh ciangin a ute’ tun’ nading ciin dei khat awngsak den uh hi.

 [3] A pai masate'n, Talawaddy gun na kantan-in Sagaing, Monywa, Pagan, NyaungOo khuate satin na teeng uh hi. Tua gam a teen’ sung-un Tet pan Chin ci-in kisam hi. Tua mun teng  “Chin-te’ phualpi” ci-in tudongin a mun a gam ciapteh theih dingin omlai hi. Tua hun-a kipan Talawaddy gun pen Chindwin gun ci-in kikheel hi.

Monywa khua kiang Sabani khua panin tai nih bang a gamlaatna munah Chin-te tual biakna bawlna suangpi pii sawm leh thum (13’) a saang khat tu dongin omlai-a, Kawlte in “Chin Phaya” (Chin god) ci uh hi. Zomite in “pasian phaya” ih cih zong hih mun pan piang kammal hi, ki ci hi. [4] 

Tet Minamte Ki-ukna
Tua hun in Kawlgam sungah Pyu (Mon) leh Tet (Chin) kumpite minthan’ hun kici hi. China kumpi gam vilte tawh sumbawlna lamah kizom uh hi. AD 750 ciangin China kumpipa Kolofeng in Pyu kumpi gam sim-in zo-a, Pyu kumpipa’ neihsa teng leh a galkap teng matsakin Kunming khua-ah ciahpih hi. Tua hun-in Tet (Chin)-te’ teen’na khua singkulh tawh ki-uum-in a laizangah kumpi inn kilam hi. Kumpi inn kimkot-ah singkhuam phutin Kham leh Ngun tawh kumpi inn zeem hi, kici hi.[5] 

Tet (Chin)-te Phualpi Pagan pan kikhenna
Pagan khua min in, Pugamah, Pigamah cih kammal pan hong piang hi. [6] AD 835 kumin Nancho kumpi in Tet kumpi Pagan simin na zo-a kham, ngun leh galkap 3000 matsak-in Irrawaddy gun dung-a om kham leh ngunte nangawn zongsak hi. Hih mun panin Tet-te kikhenthaang leeuleeu uh-a, pawlkhatte Irrawaddy gun dung zui-in Prome, Thayet, Aunglan, leh Minbu gam teng-ah na teeng uh hi. Tuate Plain-Chin/Asho-Chin/Salai-Chin kici hi. Pawlkhatte Kaladan gun dung zui-in na lal uh-a, Mindat, leh Kanpetlet gamah na teeng uh hi. Amaute Cho kici–in, Paletwa gam-a teengte Khumi kici uh hi.

Pawlkhatte Chindwin gun dung zui-in Meitei gun tawh kituahna mun a tun’ uh ciangin gal nan’ nading mun lem sa uh ahih manin, Khaman (Kale) leh Natchaung (Indin) kuam tengah AD 850 pawlin na teeng uh hi. A om lai pawlkhatte Chindwin gun dung zui toin Mawlaik saklam-ah na teeng uh hi. Tua mite tuhun ciangin Kuki (Tangkun) leh Naga (Phizo) minamte kici hi. Pawlkhatte Pagan, NyaungOo mun tengah lokho-in teeng uh hi.

Tet (Chin) mite a tun’tun’na munah amau leh amau ki-uk-in, Khanman (Kalay) a tun’ uh ciang a omsa Shan mite’ ukna sungah om ahih manun, Shante’ ngeina zui-in Langkui mual (Kalay-Natchaung kikaal) kum simin bawng khat tawh bia uh hi.

Hih bangin ei Zomite’ nun’taakna sungah gal leh sa kihtaakna hangin mun tuam gam tuam-ah kithehthaangin, kampau mukpaute kilamdan’na hong piang hi. Kampau mukpau kitheihpih nawn loin midang sadang bangin kikhenna hong piang hi. I teen’na mun leh gam zui-in minam tuamtuam, beh leh phung tuamtuam bangin kizopna hong haksa hi. Koi mun koi munah i om zongin i pian’na pupi na kilaih lo ding ahih manin unau hihna i phawk kik theih nading deihna tawh hih thu k’ong teelkhia hi. Tu hun ciangin kammal khat nangawn tawh kikhenna a piang thei thu ahih manin, kammal khat pan kilamdan’na lam, en lo-a, i kibatna lam bek mitsuan-a i neih theih na’ng-in Pasian in thupha hong pia ta hen.

Tulai Zomite’ Teen’na leh Minam Minte
Tedim, Tonzang gam sung teng-a omte in ZO, YO, YAO, ci-in kisam uh-a, ZOMI ci-in khat leh khat kisam uh hi.

Falam, Haka leh Thantlang gam sung teng-a omte in LAI, LAIZO cih kisapna pan LAIMI ci-in khat leh khat kisam uh hi.

Mindat, Kanpetlet gamsung tenga omte in CHO, CHOU, CHHAW, ci-in kisam uh hi. (Cho cih pen mualtung mi, Zomi tawh kibang hi).

Paletwa gamsung teng-a omte in, KHU, KHUMI, leh KHAMI ci-in kisam uh hi.

India gam, Mizo gam sung teng-a omte in MIZO ci-in nam khat bekin kisam uh hi.

India gam, Assam leh Manipur gam sung tenga omte in tuma in PAITE ci-in kisam uh-a, ahi zongin tu-in ZOMI ci-in a maan thu mu uh hi. Tua min mah tawh kisam ta uh hi.

Naga gam mual dung teng leh Mawlaik gam sunga omte in TANGKHUL na kici uh hi.

Matupi gam sung teng-a omte in, ZO leh LAI ci-in nam nih-in na kisam uh hi.

Zang gamsung om ahi Tayet, Thandway (Sandoway), Aunglan, Minbu, Taungdwingyi, Natmauk, Pyinmana khuapi–a teengte in, ASHO CHIN na kici uh hi.

India leh Kawlgam kikaal gamnawl khuate ahi Tamu, Homalin khua-a teengte pen Mikangte’n Zogam hong uk hun lai-un, KUKI ci-in sam uh-a, tu-in KUKI, KHUANGSAI leh THAHDO ci-in na kisam uh hi.

Zang gamsung om ahi Gangaw, Htilin, Saw, Ngape khua-a omte in, YAW, CHAW, KYAW leh SAW cih bangin min tuamtuam tawh na kisam uh hi.

Rakhaing gam sung teng-a omte in, KHAW, KYAW ci-in kisam uh hi.

AD.1300 kum kiim pawlin Pagan gam-a om mualsuang laite tungah a ki-at lai-ah, Kawlte’n Zomite pen CHIN, KHYANG leh CHYIN ciin hong sam uh hi.

Shan leh Kachin-te in, CHANG, KHANG ciin hong sam uh hi.

Kayin lah Rakhaing-te’n, KHAW ci-in hong sam uh hi.

Mon minamte’n, CHIENG, KHYENG ci-in hong sam uh hi.

Kachin leh Chin Unau hi hang
Ei Zomi a nei zawdeuhte in talap ahi-a, innka mong-ah ahi zongin, ‘kong buk’ ci-in tangvalte’ giahna ding inn neu khat kilam tuam hi. A deihna in, sanggam Kachinte hong pai cianga zin tun’ nading cihna hi. Sanggam Kachinte’n inn a lam uh ciangin inn sung dei no khat na tuam bawl leeuleeu uh hi. Tempaai a bawl uh ciangin langsam-in na bawl uh hi. Maykha leh Malikha gun kuam-a i kiman’suahna phawkna-in, a paai lang khat Zomite’ kep, na ci uh hi. I kimuh kik ciangin buptuah kik ding na ci se lai uh hi.

Ki-itna khitui
AD 2003 kum January kha sungin, Kawlgam buppi Tuiphum Pawlpite kum thumsim kikhopna (khawmpi) Kachin gam Myitkyina khua-ah nei uh hi. Tua khawmpi man ni nitaakin Kachin leh Chinte K.B.C. zumpi sungah “Ei unau kimuh tuamna leh holimna nei nuam hang,” ci-in om khawm uh hi. K.B.C. Chairman-pa’ thusunna-ah, “Tuma kum thum lai-in, no Zomite’n zaam khap kua khat n’ong piak pen uh lungdam hong thuk nuam ung,” ci-in thu sung-a, unau khat i hihna thute a gen khit uh ciangin Kachin tem, a paai lang khat nei lo-a a bawl uh, lungdam kohnain tempaai khat pia-in, “Tu-in a kimu kik hi hang. I tempaai a buptuah kik hi hang,” ci-in na gen uh hi. Tua pawi siim-a a pai Zomi palai taangmite leh sanggam Kachin-te a nakngek uh na-in khitui naptui tawh dim uh hi. “Mailamah i tu i tate Gospel i kipai tuak nading leh i ki-it seemseem nadingin i omna ciat pan hanciam tek ni,” ci-in kivaikhak uh hi.

Luika Tun’na
Ei Zomite i pian’khiatna pen pawlkhatte’n Laibung Laihan-ah kiteeng hi ciin a ciamteh pawlkhat ki-om hi. Tangthu limtak-a i kan ciangin ahihna thu leh la, innmun logam, lui, gun, mual, leh lo minte tung pan teci zon’ kul hi. Zomi a tamzaw in Ciimnuai, Geeltui, Kalzang khua thute kitam zaak mahmah-a, ahi zongin Luika khua thu kitam zaak nai lo hi. Luika khua in Gunkhawm pan Meitei gun dung zui-in hong kah to i pute’ khua sat masakna khua hi-in tua khua pen LUIKA khua kici hi. Luika khua-a a teen’ sung-un minam kikhenna om nai lo-in kum tampi na teeng khawm uh hi.

A theih huai leh a lipkhap huai khangthu khat
Luika khua inn 300 val bang pha dingin ki-ummawh hi. Luika khua-ah dawi biakna, tual biakna, pusa pasa biaknate a hunhun-in kizang den hi. Kumsim lopawi khit ciangin tual biakna kinei-a, ni khat zeh kitang hamtang hi. Tual bawl ni sim-in naupang khat ta mang den hi. Lamdang sa leh lauthawng tak-in om uh hi. Hih thu hangin mi tampi in “I khua mun hoih lo hi” ci-in mun tuamtuamah a bawng a bawngin na peemkhia uh hi.

Luika khua ngakte
Hih thu, Teizang unau pasal sagihte’ pian’khiatna thu, hi pha diak hi. Khua ngakte in, kum kik tual bawl hun ciangin khuasung upate sung pan a en sim ding, a cing ding kiseh uh hi. Tual pawipi laitak-in, tual gei suang kuahawm khat sung pan gulpi vom khat hong pusuak-a a naai-a om naupang khat manin a kuahawm sungah lutpih vinghvengh hi. Luika khua zaang-in vaihawmin thaang a siah uh leh gulpi vom khat hong awk pah hi. A khua zaangin gulpi vom kaikhia uh-a bei thei mahmah lo-in a hanciam tektek lai takun tua gulpi vom hong pau–a, “N’ong kaihkaih uh hangin hong kaikhia zo ngei kei nuteh; ka mei in van guh suang zawl baan-a, livei kawi hi,” ci hi. Tua ciangin khua mite in lei tawh kim-in sattan uh hi.

Khua mincim in vuk
Heh lua mahmah uh ahih manin gulpi vom sa, khua zaang inn phazah lian tumtan-in hawm uh hi. Tua hun lai-in Pu Dai Tawng si zo hi. A zi Pi Ciang Tuang leh a tapa Pu Jasuan [Za Suan -- editor] neu lai ahih manin gul matna-ah tha kuan lo uh hi. Gulsa a hawm khit uh ciangin a lutang hong vaal-in “Kua’n tang ding i hiam,” ci-in a kidot uh ciangin, amaute lak pan mi khat in, “Tha kuan lo Jasuan’ nu pia ni,” ci-in pia uh hi. Tua zanin Luika khua mite in gul ai-in zu le sa ne-in zanhak uh hi. Tua ni-in Pi Ciang Tuang in zin pawlkhat nei hi. A zinte’ aading taangman sih huan-a, a meh dingin gullu ui uh hi. Nitaak hong sawt pian ta-a, a zinte gilkial ding a khualna kawmin anneek hun lah sa ahih manin “Ka salu huan a min nai hiam.” ci-in siktul khat tawh a dawt leh a gullu pau-in, “Ka mittang n’ong sun kha deh.” ci hi.

Tua ciangin Pi Ciang Tuang in, “Hih peuhmah a sia hil hi ding hi,” ci-in suankhia pah-a kong pua lamah buakhia hi. Zan sawt ta ahih manin ahi thei bangin a zinte tawh an ne- in luum uh hi. A sawt vei lo-in aksia khat khuang-a, “Zin kha ve vua,” ci-in thum vei khuang hi.

Pi Ciang in, “Ka gullu huan lah pau-a, ak khuang in lah ‘Zin kha ve vua,’ ci-in khuang-a bang thu hi peuhmah ding hiam,” ciin lunghimawh hi. “Hih bang thu cikmah-in om ngei lo hi,” ci-in lunghimawh ahih manin a zinte phongin a khua nawl mualah a zinte kha hi. A zinte zong ciah suak pah vinghvengh uha, Pi Ciang Tuang in a tapa tawh inn lam zuan dinga a kithawi laitak-in, Luika khua min in cim-in a khua taw lamah tolh suk hi. Zu le sa ne-a a zanhak a khuapihte a vek-in si mang uh hi.

Baangzaang Khua Saatna thu
Tu laitaka Mualbeem gam-a khua mun lui Baangzaang akici pen tanglai AD 1235 kum pawlin Luika khua a kisiat zawh ciangin Pu Jasuan’ nu Pi Ciang Tuang in a khuasaatna mun hi, kici hi.[7]

Hih a tung-a thute a maan peen hi cih theih nadingin, evidence om tuan lo-a, tu-ma lai-a, a omsa thute mah et kaak-a kila ahih manin, khialhnate leh kipelhna a omte kitheih sak kawikawi ding thupi–in khan’tohna khat zong hi. A sim mi khempeuhte tungah minam khat hi hang, sung khat pan piangte hi hang cih i phawk thak kik zeel nadingin Pasian in thupha hong pia ta hen.

Ref :
[1]. G. E. Harvey gelh, Outline of Burmese History, 1947 kum leh Daw Thein geilh, Burmese History Laibu, 1947 kum-a kigelh sung pan kiteikhia hi.
[2]. Ibid,
[3].1978 kum-a kibawl, Kalzang Suante Beh Tangthu sung pan kila hi.
[4]. Falam gam kum 100 cin’na magazine laibu, laimai 232 pan kila sawn hi.
[5]. J. H.  Tun Thawng gelh, Zomite Takkhahna laibu pan kila hi.
[6]. U Ba Than: “Kyaungthone Myanma Yazawin” tangthu bu sung leh Dr. Neihsial Tual Cin, Ph. D., “Guite Kual-a Lutna” laimai 2 leh, AD 1044 kum-a Kawlte Khuapi Pagan pen i pu i pate’ phuahsa hi, ci-in a kigelhna laibu sung pan kiteikhia  hi.
[7]. Hih a tunga thute, Buanli khua kumza cin’ pawi 1995 kum-a kikaikhawm kum 2004 cianga kithoh, “Jasuan Beh Teizang Nam Sagihte Khang Tangthu” pan-a, kiteikhia sawn hi.

[Hih lai, 13 JUN 05 MON ni-in kingah hi.]

Source :
Page  63  of  200

Vahui Magazine 2006

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Cih Tawh Kisai Thu Tg. Cin Za Lian Description: Rating: 5 Reviewed By: Cinpu Zomi
Scroll to Top