728x90 AdSpace

Hot
Menu
Zon-ol na Donate

Latest News

ZOMI KHRISTIANTE MISSION SEPZIA LUNGNGAIHNA. Rev Lang Suan Thawn

                                  Zomi Khristiante Mission Sepzia Lungngaihna
Rev Lang Suan Thawn


Thuphatna:
Pasian in Zomite thupha hong piakna khat in mission lungtang a nei Khristiante ihihna ahi hi. Tua hang mahin mission sepna-ah I kipiak zawhzahin kipia-in, I pan zawhzahin kipang ciat ahih manin kilawhcing hi. Tuiphumte’n Zogam sungah CCOC min tawh 1983-1999 sung teng nasiatakin mission kisem hi. Kipawlna min, Pawlpi min le mimal min tuamtuam tawh zong septheih bangin mission a sem Zomite ihi hi. Hi bangin  misison sepna sungah sepdan le lungsim puakziate nam li[1] bangin khenin I gen dinga, tua khit ciang, Kawl Buddhistte lakah mission sepzia ding I kikum ding hi.

1. Khristian Gamgi Keekna (Christianization):
            Hi bang mission nasepna ah Khristian ahi nailote (biakna dangte), lungdamna thu hanga hong kikheel (or) hong piangthak hizawloin, biakna dang khat panin Khristian huang sungah lutpihna ahi hi. Gentehnain cileng, Buddhist khat in Buddha biakna sungah a om lai-a a zat ngeinate nusia-in, Khristian ngeinate zatna ahi hi. Phonggyi sang a paina panin Khristian biakinnah a pai ahi lel hi. A biakna min puak Buddhist pan Khristian ah kikheelna ahih mah bangin a biakna ngeina zong a kikheel ahi hi. A omna biakna huang kikheelna zong cih theih hi. Hih in biakna kikheelna (or) Khristian gamgi keekna bek hi a, kikheelna maan ahi pianthakna hilo hi. Khristian gam phuhna (Christendom) zong kici thei hi. Hih in puatham kikheelna bek hi-in, sunglam kikhelna omlo hi. Tua ahih manin hi banga mission sepna in a manlo nasep ahi hi. Matthai 23:15 sungah Topa Jesuh in Thukhamhilh siate leh Farisi miten, midangte tungah Jesuh sanglo pi-in amau zuih Jews (biakna) ngeina a zuimi asuah nangun, mission a sepna uh tawh kisai-in alauhuaizia na gen hi.


2. Biakna Kipawlna Gamgi Keekna (Denominization):                       
            Hi bang mission sepna in Khristian ahi nailote (or) ahisate amau (mission semte) biakna kipawlna (denomination) sung om mi suahsakna ahi hi. Atunga Khristian gamgi keekna tawh kibang dektak hi. Ahizongin hih sungah Khristian gamgi sangin biakna kipawlna gamgi bulphuhin neizaw hi. Gentehnain cileng, Tuiphumte in RCte/AGte Tuiphum kipawlna sungah a lut nangun mission sepna ahi hi. Hi bang a mission sepna in kipawlna khat leh khat kikalah kitelkhilhna, buaina piangsak a, kipumkhatna ding sangin kilemlohna leh kikhenthapna piangsakzaw hi.[2] Hi banga mission sepna in Pasian min paulap a, Pasian bulhphuhlo, biakna kipawlna bulphuh mission ahih manin a manlo nasep ahi hi.

3. Muhtheih Pawlpi (Church) Gamgi Keekna (Memberization):
            Hi bang mission nasepna in biakna kipawlna (denomination) kibatpih Khristiante, amah mission sempa/nu’ pawlpi mi suahsakna hi. Gentehnain cileng, Tuiphum missionary khat in Tuiphum veve, pawlpi dangte ama convention (or) association (or) pawlpi-ah a lut nanga, mission sepna ahi hi. Hi banga mission sepna in Jesuh sangin, pawlpi bulphuh mission ahih manin amanlo nasep ahi hi.  Hih in kha mangthang zonna hilo a, amanglo mi zonna hizaw hi.

            Hih a tunga mission nasepzia nam thumte i et ciangin, takna (quality) sangin tamna (quantity) kibulphuhzaw cih hong kilang hi. A sunglam sangin a puatham thupisakzaw hi. A taktakin cileng, Jesuh Khrih ii mission sepna sungah hih a tunga nam thumte kihello hi.  Jesuh Khrih in Pawlpi phutlo hi. Biakna kipawlna zong pankhialo hi. Jesuh Khrih in Khristian gam zong phut tuanlo hi. Pasian ukna gam phut bek hi. 

4. Pasian Ukna Gamgi Keekna:
            Hi banga mission sepna in mikhat sungah “kei” cih ki-ukna munah Khrih ki-uk sak a, mi thak suah nangin, Jesuh Khrih bulphuha nasepna ahi hi. Hih in missionaryte adingin gamgi keekna man leh a kikheelte adingin kikheelna man hi pan hi. Khrih ukna gamgi keekna hi-in leitungah Pasian ukna (the reign of God) khansakna ahi hi. Jesuh hong paina a hang bulpi in Pasian ukna gam a phut ding leh a keek ding ahi hi. Hih Pasian’ ukna gam in mun leh gam, leh leitung kiukna nam hilo-in, mihingte lungsim sungah Pasian’ deihna in uk a, Pasian’ deihna banga nuntakna ahi hi.[3]
           
Ngeina Kantan Mission-ah (Toward Cross-cultural Mission)

Zomite sungah Lungdamna Thu hong tunzawh kum za hong val ta hi. Zomi Khristiante in Zomite sungah mission sep a kipatzawh kum sawmgiat bang hong hi ta hi. 1999 kum pawl panin Zomi Khristiante mission pen ngeina kibatpih Zomite sung pan ngeina kibatpih loh mi namdangte sungah hong kihei ta hi. Tua ahihmanin Zomi Khristiante’n Kawl Buddhistte lakah bangci bangin mission sem ding cih pen a ngaihsuthuai thu hong hita hi.

1. Mi Le Mun Kheel Ding     
            89% bang Khristian min i puak hangin Zomite sungah mission sem nawnlo ding cihna hilo hi. Zomite sungah le Zogamah mission sep ding tampi omlai hi. Zomi ahilo, Khristian zong ahi nailo, a diakin Kawl sanggamte sungah mission sep ding hun hita[4] ahih manin sepzia ding pawlkhat i kikum nuam hi. Zomi Khristiante in Zomite sungah mission sepna panin Kawlte sungah na sem ding ihih manin i mission sepzia (strategy) zong i kheel kul ding hi. Banghang hiam cih leh i pai nading mite in mun le mual, ngeina, biakna, nuntak khuasakzia, thu ngiahsutzia cihte pen ei Zomite-a tawh a kibatlohna hang ahi hi.  

2. Lungsim Puakzia Kheel Ding     
            Mission sepzia kheel nadingin i lungsim puakzia I kheel masak ding kisam hi. Lungsim puakzia kikheelna in sepzia ding zong hong kikheelsak hi. Biakna dangte I muhzia kheel kul hi. Khristian biakna pen Khristiante adingin amanpen, ahoihpen ahih mah bangin, Buddha biakna zong Buddhistte adingin amanpen le ahoihpen mah na hi kawikawi hi. Hunthak (modern) hun lai-in amanpen, ahoihpen cih in hong huzap a, ahi zongin hunthak khit (post-modern) hunah amanpen, ahoihpen, tawntung, a kip cihte kikheelin, khat le khat a kizom (relative) in hong mu ta uh hi. Gentehna-in, Kawlpi a vanleng tualpi Bogyoke lampi ii koi lamah om cih dotna-ah dawnna man le manlo pen a dawngte omna le a maingatna mun kizopna tawh kisai hi. Lansone pan Tahan lam a maingatte adingin a vei lamah cih aman hi a, Tahan pan Lansone lam a maingatte adingin a taklamah cih aman ahi hi. Thuman (truth) khat tungah muhdan tuamtuam om thei a, a kitukalh thu nih zong aman tuak hi thei veve hi. Gtn: 2+2=4 man ahih teh 1+3=4 (or) 5-1=4 (or) 2x2=4 te khial hi cih pah theih hilo hi.

            Buddha biakna pen milim biakna (idol worship) i ci ziauziau hi. Khatvei kalawm Kawlte khat tungah, “Lawm aw, no Buddha biakna pen ko Khristiante’n milim biakna hong cih sak ve ung, ahi mah maw?” ci-a ka dot leh, “Ko (Buddha) milim (image) a bia hilo pi ung.  Tua muh theih milim tungtawna muhmawh thuman (truth) a bia a kizom hizaw ung” ci’n hong dawngkik hi. Tua mah bangin Khristiante’n zong muhtheih nate, muhmawh Pasian tawh i kizopna ah hong huh na namkhat (vehicle) banga i zat theih ding thupi hi. Tua ahih manin Buddha biakna tawh kisai-in Buddhistte’ muhdan, sandana i muhsak theih ding thupi a, ei upmawh banga thu khen loh ding kidop huai hi. Amaute Hell gamah i lawnsuk pahpah a, ei le ei Vantung gam nuamah i kipuakto hi.  Ataktakin cileng missionaryte nasep in thukhen (judge) ding hiloa, mite tungah itna lahkhiat ding hizaw hi.

            Hih a tunga thute i lungngaihkik ciangin ei amanpen, amau akhial; ei a theipen, amau a theilo cihbang lungsim tawh mission sep loh ding hong phawksak hi. Gualtung tuanna lungsim le midangte, biakna dangte neumuhna lungsim tawh mission sepziate khawl hunta hi. Khat le khat kithupi ngaihsut a, lungsim dinmun kikim takin kiholim-khopna, kikup-khopna (dialogue)[5] tawh mission i sep ding hun hita hi.

3. Numei maw Pasal?
            A beisa mission sepnate-ah numei tampitak kikhahkhia hi. Lawh cing uh hi. Ahi zongin ngeina kibatpihloh Kawlte lakah numei missionary i khah leh lawh cing lualo ding hi. A hang in Kawlte pen numei ukna makaihna nuai-ah om ding utlo uh hi. Numeite’ niik kiphona nuai-ah a paikhak nangawn uh a vang bei ci’n a umte ahi uh hi. A biakna uh zong pasal makaihna hizaw hi. Hi bangin I gen ciang, numeite thupilo, kizang theilo cihnopna hizawlo-a Lungdamna Thu a san theih zawk nading uh deihna hizaw hi. Numei le pasal kua thupizaw cihna hang hiloa, Kawl Buddhistte sung kizopna (communication) zia hang hizaw hi.

4. Lungdamna Thu Le Ngeina
            Lungdamna Thu le ngeina kikhen theilo hi. Lungdamna Thu a kiteltheih nadingin ngeina in huh hi. Tua hangin mite’ teltheih dingin Thu, mihing hong suakin, Judah ngeina tawh hong kituun/tuam hi. (Jn. 1:14)  Ngeina tawh a kituunlo Lungdamna Thu (naked gospel) omlo hi, kici hi. Lungdamna thu pen a tuntunna mun le mite’ ngeina tawh a hunhunin hong kituun hi. Gentehna in cileng Judah ngeina pan Greek ngeina, tua pan Nitumnalamte’ ngeina cih bangin ngeina tuamtuam tawh hong kituam toto hi. Lungdamna Thu pen kikheel ngeilo a, ahi zongin ngeina ahih leh a hun zui-in a kikheelkheel ahi hi. Tua ahih manin a kikheello Lungdamna Thu, a kikheel thei ngeina tawh a kituun ciang bekin tua ngeina a nei mite adingin tel theih thu hong hi pan hi. Tua ahih manin Lungdamna Thu (Gospel) ahi amu la a, ahawng ahi Khristian ngeinate suahkhiatsakin, amau (Kawl) ngeina (ahawng) tawh tua Lungdamna thu tuun a, genkhiat ding, piak ding hi pan hi.

Bekthamloin, Lungdamna Thu tawh a kilehbulhlo amau’ ngeina hoihte tawh zong Pasian Thu (Theology) i muhsak theih ding zong kisam hi. Tua hi leh hih Lungdamna thu in amau sungah hong nungta thei le hong midang suahlo ding a, a tel theih, a saan theih, a neek theih uh hong hi pan ding hi. Tua ahih manin missionaryte in a pai nading mun le mite ii biakna, ngeina, thungaihsutzia, khuasung gamsung ki-ukzia, nuntak-khuasakzia cihte theihtel ding thupi mahmah hi.

5. Missionary Le A Kimlepam
            Lungdamna Thu genkhiatna-ah tua Lungdamna Thu, Kawl ngeina tawh kituaka gen (contextualize) ding  a kisap mah bangin, a genkhia missionaryte zong a tunna mite ngeina tawh kituaka nuntaktheih ding kisam hi. Kampau, nek le dawn, silh le teen, omdan khawldante Kawl ngeina tawh kituaka nuntak theih ding thupi hi. Hi bang i cih ciang, Kawl phonggyi te banga lu meettol ding, phonggyi puan silh ding cihnopna hilo hi. Sen gam (China) ah a pai Jesuit missionary Matteo Ricci in tua bangin na hih ngei hi. Lawhcing hi. Ahi zong, tuhun Kawlgam adingin hong kitelkhial thei thu ahi hi.[6]

A kuankhia missionaryte adingin a sawlkhia, a khahkhia kipawlna in thungetna le sum le pai tawh hoihtaka panpih ding thupi hi. A nasep uh a lawhcin theih nangin mite neumuh loh ding kisam hi. Zogam ah hong pai missionaryte  a lawhcin mahmahna uh ahang khat in Zomite sangin amau, sumlepai neizaw, pilzaw uh ahih manin Zomite in hong pai missionaryte kineumuhlo hi. Tua hangin amau’ gen Thu pen Zomite in sangsiam pah uh hi. Sumlepai a kicing zihziah ding cihnopna hiloa, a kisapna uh ah zatkhop a neih ding cihnopna hi. Sum leitawi-in vakvak mawk leh a kimlepamte’n a thungente uh na thupisim lua nawnlo pah ding uh hi. Zomite in mission I sepna ah I thanem mahmahna khat hih mun hikha ding hi.

6. Khristian Khempeuh Missionary[7]
A mun a mual zui-a a kisawl, a kipaisak missionaryte dinmun ding tawh kisai-in a tungah I kikum khin hi. Ahi zongin, mission sepna tawh kisai-in Khristian khempeuh ii lungsim puakzia ding le nuntakzia ding tawm I gen nuam lai hi. Teel tuam a, a gamla-ah missionary khahkhiatna bek tawh hinawnloin, Khristian khempeuh missionary hi, cih lungtang tawh mission sep ding pen tuhun kum zalom 21 ii hong kalh thu ahi hi. Mission field zong zonzon kullo a, I omomna, I tuntunna, I nasepna mun pen I mission field hi pahpah ding hi.

Gen khiat thupi a, lah khiat zong thupi sem hi. Kam tawh gen ding bek hilo a, nuntakna mahmah zong tawh limpha lahkhiat a kul nasep ahi hi. Gamtatna tawh suahtakna (gupna) ngah nading a hanciam Kawl Buddhistte lakah I Khristian upna le gamtatna tawh teci hoih I suah ding hong kal hi. Tua ahih manin missionary (Khristian)te, ci bangin al-in (Mt. 5:13), khuavaak bangin taanga (Mt. 5:14), silngo bangin i kisawhsawhna munah a kizel (Mt. 13:33) ihih ding kisam hi.   
             
7. Lungdamna Thu In Kha, Lungsim Le Pumpi Ading    
            Mission sepna ah a kitaangko Lungdamna Thu in sih zawh hun (mailam) ading bek hilo a, leitung nuntak hun (tuhun) ading zong hi khawm hi. Tua ahih manin hih Lungdamna Thu in kha, lungsim le pumpi ading ahi hi. Zomi Khristiante’n kha thu bek a thupi-in I ngaihsun kha hi. Bek thamloin, kha thu pen mailam sihzawh ciang ading bekin I ngaihsun lai hi. Tua ahih manin, Zomi Khristiante in mailamah kha ading bek ahilo, lungsim le pumpi ading zong a huam mission I sep ding ahi hi. Lungdamna Thu taangkona (evangelism) pen mission sepna nam khat hipan a, mission hikhinlo hi. Zogamah hong pai I sangmang (missionary)te in zong kha, lungsim le pumpi adingin hong sem uh hi. Pumpi cidam nading, Zolai neih nading, laitan neih nading, khantoh nading cih bangin a tuamtuam hong hilh uh hi. Jesuh ii hongsep leh eite hong hilh mission zong Luka 4:18-19 sungah le a nasepna sungah kha, lungsim le pumpi ading ahihna kician takin kimu thei hi. Tua in (a) mizawngte tungah lungdamna thu, (b) salin a kiman, a kihencipte tungah suahtakna thu, (c) mittawte in khua a muhkik theih nading thu, leh (d) a kinenniamte suahtaksak nading thute ahi hi. 

8. Khat Pan Mibuppi Kikheelna Leh Daihna
            Mission sepna ah mimal kikheelna (personal conversion), mibuppi kikheelnate (social transformation) [8] le kimlepam piansak nate hotkhiatna (ecological salvation) kihel hi. Mimal khat a kikheelna pen ama tung bekah khawlloin, ama hangin midangte, a kimlepamte zong a kikheelsak ahih ding thupi hi. Hi banga kikheelna in mihingte’ mawhna hanga hong piang buainate ahi, Pasian le mihingte kikaal, mihing le mihingte kikaal, mihing le Pasian bawlsa nate (ganhing, singkung, leitang, etc.) kikaalah kilemna (shalom) a piangsakkik mission hi ding hi. Kammal dangin gen hi le’ng, gupkhiatna in mihingte ading bek hiloin Pasian’ piansak nate ading zong ahi hi. Hih in kum zalom 21 ii hong kalh, Lungdamna Thu (Gospel) hanga kikheelna (conversion) in pello-a a gahkhiat ding gupkhiatna (kilemna) thu ahi hi.

Thukhupna:
            A tunga mission sepzia I gente nampi thumin kitomlak thei hi. Tuate in: genkhiatna (word); sepkhiatna (deed); le hihna (being) ahi hi. Nasep lawh cing nadingin sepzia (strategy) thupi hi. Sepzia aman loh ciangin tha le ngal, sum le pai, hun le nai a bei zahin kilawhcing zolo thei hi. Ahi zongin mission i sepna ah a thupi mahmah ahi sepzia (strategy) tawh Kha Siangtho’ nasepna i ciangtan (limit) khak loh ding zong phawk huai hi.  





[1] Langh Suan Thawn, “Tulai Zomite Tuahkhak Thu Pawlkhat,” ZOMKA, Vol. 11, Hawm 58, February, 2006, 9.
          [2] Saya Enno, “Threefold Christian Mission,” Myitthataman, July, 2006, 30.
[3] Ibid., 37.
[4] Kawlte sungah mission a semsem Zomi Khristian pawlkhat kiom khin hi.
        [5] Dialogue ii a khiatna a tuamtuamin kikhia hi. Hih munah i gennop in Lungdamna Thu a tangko, a gente bek a pau hiloin, a zate zong a gente hihtheihna hi. Tua mah bangin a gente’n zong a lang khatte kiangpan sin (learn) theih nang hamphatna om hi. Dialogue bawlna-ah a langkhatte neumuhna omlo a, zahtakna tawh kikuppih hi. Dialogue bawlna tawh Lungdamna Thu a kikum bek hiloin, a genkhia zong kihi pah hi.
[6] Go Van Mung, “Gataam maw, ci?: Kum zalom 21 Khristiante’ mission sepdan ding,” in Langh Suan Thawn ed.,  Zomi leh Khristian Theology (Kalaymyo, Myanmar: ZACC, 2007) sim in.
[7] Jonathan (Oxford Centre for Missions, UK ah Ph D a sin lai, Filipino) in Kalaymyo Baptist Church ah 21 March, 2010 ni-a, a hunzatna ah a gen thu hi. “Missionary na hih kei leh mission field na hi hi,” ci lai hi. Rev Phun Hram Awi in Myitthataman (June, 2010) sungah “Hunthak khit Khristian Mission” cih thulu tawh a gelh thului sungah zong gen hi.
         [8] Saya Enno, “Threefold Christian Mission,” 37. 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMI KHRISTIANTE MISSION SEPZIA LUNGNGAIHNA. Rev Lang Suan Thawn Description: Rating: 5 Reviewed By: Cinpu Zomi
Scroll to Top