728x90 AdSpace

Hot
Menu
Zon-ol na Donate

Latest News

Zomi leh Naupang, Gelh - CS Dal

Zomi leh Naupang, 
Gelh - C.S. Dal (MSc Political Science; BSc (Hons) Economics)

"Vantung ki-ukna pen naupangte tawh a kibang mite-a' ding ahih manin, tua naupangte ka kiangah hong paipihsak un la, khaktan kei un," (Mt19:14).

Naupang pattahzia tawh kisai pen sangah hon ki hilhlo, i sinna lah om lo a hihman in I theihna tawm lua hi. Nulepa atam zaw in naupang pattahzia tawh kisai i theihloh man in, i tate apil, asiam, a migi di kim lai, a leh lamlam honsuak theihi. Amau khialhna hi lo, a neulai in hoihtak in i kepcing theih loh man hi zaw hi. Gamkhang to na mun ah om naupang te banghang in hon teizaw diak, pilzawdiak, siamzaw diak hiam cih i et ciangin, a neulai in, a ki kepcing zia leh a kipat tat dan a hoih a siam man uh hi. Apil sa, asiam sa, a hausa in a suak uh na hi tuan khollo uhhi.

Nupi te nau napaai sung in nek le dawn, gamtat luhek kidawp di thupi mahmah hi. A pha deuhin na suahhun a tun ma kha nih sung peuhmah kidawp huaihi. Tu hunsung in na lungsim puakzia a tamzaw tawh kizui in hongpiang di naungek zong a lungsim hon pua di hi. Lungnuam, lungtai in na om leh, na ta zong mi lungnuam, migi hon suak di aa, lungham in na phunphun leh na ta zong lungtom baih in migilo hong suak thei di hi. Tuibuk, za, khaini na tamzat leh nata pumpi cinglo, khuaza lo, mitmu lo, pau thei lo cih ban ah a khuak khanto na zong zia kai sak thei hi.


Honsuak naungek pen, nu nawizu mah pia leng natna tampi dalzo hi. A phadeuh in kha guk sung peuhmah piak hamtang di thupi hi. Nautawi dan a kipan, a khut khe te zong a hoih na di in, zutsak siamdi thupi hi. Kum khat bang hon pha in, hon teizawk deuhteh, mipil milian khat mah in ngaihsun in, mukpau kampau hoihte tawh paupih di thupi hi.

Naungek, naupang a kapciang in Dawi, Sikha, Zawhngeu, Ui cihbang tawh khem di hi lo hi. Naupang mawkkap omlo aa, gilkial maw, ihmut suakmaw, damlo maw khat hi di hi. Zawhngeu te, ui te a it theihna di in hilhdi hi zaw aa, Dawi leh Sikha te i muh ngei nai lo pi mataw. Kum nih kum thum pan in laisiangtho, naupang tangthu a hi zong, thu hoih tuamtuam gen pih zel di thupi hi. Kum thum a cin ciang in ABC a kipan i deihsak penpen hilh kipan thei ta hi. A neulai in na hilh dandan tawh hon khangkhia di cih phawk tawntung in.

A kumtawh a kituak lo, a kilawm lo, gamtat luhek, mukpau kampau akipan video, dvds te et sak lohpi thupi hi. Amuh na ah, za, tuibuk teepkei ni. Nupa kikal kikam tamna thu khat peuhpeuh i neihkhak teh, tate muhna ah i gen loh di thupi hi. A neulai in a lungsim sung ah launa, laitang natna a omloh di thupi mahmah hi. Thu hon man di deihna tawh, sat gawp lausak gawp te zong, lai nat na leh launa piangsak thei a, nidang teh itna leh zahtak na hon nei nawn lo di hi. Khut lum, cianglum te ki dawm ni. Galkap ki uk dan pen innsung ki uk na di in khauhpai lua thei hi.

Naupang nono thuthei nuam, naupang nono veihnam khau cihte pen zatdi in kilawm hetlo hi. Naupang te zong deidan kei ni. Pasian in mi khempeuh a kikim in hon bawl hi. A munmun leh a hunhun in zahtakna, pahtawina leh hanthotna te piaksiamdi kisam mahmah hi. Itna zong i lak theihzel di thupi hi. A theihnop thu te a tel di in gensiam ni. Thudawn lohna, olmawh lohna in lungsim neusak in, kimuan na kiamsak aa, a lungsim kisia sak thei hi. Nasep kuanloh ni te ah tate hunpia in hun i zatkhop theih di thupi mahmah hi. Innkuan ki itna khang sak in lungnop na honpia mahmah hi.

A thupi tampi omlai mah ta leh atawp na ah, itna leh zahtakna tawh khat leh khat kimuan na a om innkuan i hih theihna di hanciam kawmin innkuan sungpan, veng, pawlpi, khuapih, gampih a di in phattuamna a bawlthei mite i hihdi hanciam ni.

A. Naupang' Lungsim

A suakcil naungek in a lungsim ngaihsut akhantoh theih nang a mathu tawh bawl theilo a hih man in, nulepa te in damdam in pattah siam ding kisam hi. Kum thum kum li a phak uh ciangin thungaihsut theihna khuak (theory mind) hong lamto thei ta uh a, mi lungsim ngaihsut na, thuak na leh upna te hong telthei ta uhhi. Kum li a phak uhciang in, a khial leh aman hong theita uhhi. Lungsim puakzia leh gamtat zia te a tamzaw in pumpi cilehsa omzia (genes & biology) tawh kizui hi. Hehbaih na, lungduai na, zumbaih na leh hangsan na cih te pen pianpih cilesa tawh kizui hi ci in mipil ten gen uhhi. Tua ban ah khangkhiat na innsung, kim leh paam cih te in zong tampi tak in hong kikhel sak hi.

Naupang lungsim puakzia namnih in kimu thei hi. Pattah zia tungtawn in hong khang khia pianpih lungsim (attachment) leh theihnopna lungsim (exploratory) kici hi. Hoihtak in a kikem leh a kidon naupang lungsim sung ah lungmuan na om den a himan in, a hun, a tha te thukan na in hong zang siam aa, theihnopna lungsim zong hong khangto hi. Hi naubang te pen lungmuang (secured) mahmah uhhi. A lang khat ah, hoihtak in a kidon lo naupang lungsim sung ah lungmuan na om ngei lo hi. Lungmuan na a ngah theihna ding in kineih tawm in hanciam den a hihman in, pianpih lungsim, thungaih sut theihna lungsim khangtoh zia, hong ziakai hi. Tua a hih man in, bawltawm lungsim(secondary attachment) cih khat hong nei tohi.Hi bang naupang te pen a kikem khial naupang (maltreated children) hi in, lungsim patau (insecured) den uhhi.

B. A pantah khial Nulepa

Lungsim puakzia te neulai in ki pattah zia tawh kizui in tampi takin khangtoh hi. Tate a pantah khial pen atam zaw in nulepa te hizaw a, thudang nadang te hilo hi. Tua ahi ciangin, nulepa te dinmun pen hong thupi mahmah hi. Nulepa pawl khat te in tate satgawp, bawlsia gawp thei uhhi. A mauzong a utman hi sam lo hi. A mau tuakkhak hamsat na, gentheih na tungtawn in naupang te pattah thei uhhi. Khutlum, cianglum te zat banah inn khan sung khawng ah khakcip thei lai uhhi. Hibang ki ukna sung ah kitot, kibuan na peuh om thei zel aa, launa leh hehna piangsak in ki muanna omlo hi. Naupang te launa leh hehna tawh khangkhia ahih man in, agol uh ciangin lungtom in gilo (aggressive) thei uhhi.

Nulepa pawlkhat te leuleu tate in amau thu leh amau deihna te agen uh ciangin, lungham in a hehsuak thei uhhi. Tate tung ah itna, donna a piakding sang in amau leh amau kinawl khin in, lungsim khantoh nang bangmah sepsak lo uhhi. Tate in ki tangsap na, lung kham na khawng a gen uhciang in,"Buai veng aw. A kisam lo, a thupi lo pipi in nulepa te hong nawngkai sak kei un, tapil ten nulepa te lungkham na ding in bawllo uhhi," cih bang kammal te zangpha diak uhhi. Tate in nulepa maimuh nang leh paktat na ngah theih nang in hanciam uh aa, hamsat na, lung kham leh a kitang sap na te uh gen ngam lo in imcip thei uhhi. Gamtat hoih in gamta lengbek nulepa hong it ding hi cih lungsim tawh khangkhia uhhi. Hibang naupang te atam zaw in gam dai uh in, lung tang pha mahmah uh aa lainat na ding thu peuhmah ngaihsun ngamlo uhhi. Ahi zong in, a pianpih lungsim takpi tawh hilo in kineih tawm lungsim tawh khangkhia uhhi. A kinawl khin naupang (avoidant) kici hi.

Adang nulepa pawlkhat te in amau deihna leh kitangsap na bek tawh ki tuamcip uh aa, tate kinbawl lo in utbang in gamta sak leuleu thei uhhi. Tate deihna leh kisapna te telsiam dingin hanciam lo uhhi. Hi bang nulepa te lungsim sung ah minbang hong ci ngaihsut tam cih tawh lung himawh tawntung thei uhhi. Tua hi aa, tate deihna leh kitang sapna te hong don (respond) zolo uhhi. Tate in nulepa te donding leh itding a utna uh tawh, innsung ah van le na hong su koikoi in, hong gamlum thei mahmah uhhi. Gamtat phia mahmah uh aa, a hizong in nulepa te in bangdeih uhhiam cih na theihsawm tuan lo uhhi. A hanciam sunsun uhciang in, tate in nulepa te tungah lung muanna nei zo nawnlo uhhi. Nulepa te zong amau thanem na leh kitangsap na tawh lunghiang zel uh a, lungsim telcian na (assurance) pia zo tuan lo uh aa, hanciam suak ngamlo zel koikoi uhhi. Hi bang naupang te pen lungkim lohna tawh kidim den uh aa phengphia(ambivalent or hyperactivated) thei mahmah uhhi.

Pawl khat te leuleu in naupang te koici pattah ding cih a theihloh ban ah, lau thei uhhi. Hi bang nulepa te pen a mau neulai in lainatna leh khasiat na tawh a khangkhia te hi thei aa, a mau hun a tung ciangin a tate kepdan ding theilo uhhi. Adang pawlkhat te in ta masa a neih lai un kamsiat na tawh deih loh pen in hong nusia baih hi. Tua bang nulepa te in ta a neih ding leh a kep ding uh lau mahmah uhhi. "Tate piang kei ta hohle maw," cihbang in ngaihsun thei zel uhhi.

C. A pattah siam Nulepa

Nulepa siam te in tate lungsim khantoh nangin hanciam den uhhi. Tate lungsim sung ah lainat na, launa a omloh na ding in atawntung kidawm uhhi. Naupang te lungkim lo in hongkap, hongnuak uhciang in satgawp taigawp lo in, banghang lungnuam lo hiam ci in ngaihsun zaw uhhi. "En sin vua, hih tangvalno den in kapkap hi i cih leh nawi honteep takteh hon nuipah phiangphuang liangveh," cih bang kammal te zang uhhi. Apha deuh in, tate kitangsap hun, lungkham hun, leh lungkiat hun te ah a tawntung in telsiam tak in itna, huhna leh thapiak na te nei den uhhi. Nulepa leh tate kizopna ah khat leh khat ki itna, ki zahtakna leh ki muanna banah kitel siamna om den a hihman in, lungkim na leh lungnop na omhi. Hibang naupang te a lungkham, lung kiat hun a om hangin sauvei lo a, lungnuam lungkim baih mahmah uhhi. Hehna leh lainat na te kemcing lo in, maisak in mangngilh baih uhhi. Atam zaw in thu gualnuam uh a, kizop zia siam in lungsim hoih pua thei uhhi. Tua ban ah, thungaih sutna leh thumuh na te ah midang te sang in a huam in (objectively) mu thei zaw uhhi.

Atawpna ah, i ngaihsut khak loh kampau khat a hi kei leh gamtat na khat in mitam pi mailam nuntak na tampi tak hoih sak a hih kei leh kisia sak thei a hih lam phawk tek leng, mi tampi a ding in phattuam na tampi tak hong om thei ding hi.

********************************************************************************

Laigelpa C.S. Dal (MSc Political Science; BSc (Hons) Economics) in Zomi eLibrary / Laibusaal adong in phalna hong piak ahi hi.

Source :

TUESDAY, 23 JUNE 2009



Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi leh Naupang, Gelh - CS Dal Description: Rating: 5 Reviewed By: Cinpu Zomi
Scroll to Top