728x90 AdSpace

Hot
Menu
Zon-ol na Donate

Latest News

Zomi Literature: Khiatna Tuamtuam A Nei "leh". Gelh - Rev. Pau Lian Mang, D.Theol.

Bang Hangin Hizahin “h” Hua I HHiam?
(Why “h” Is Much Hated as This?)
Gelh - Rev. Pau Lian Mang, D.Theol.


Tu ma kum bangzah hiamkhat pan Zolai gelhna ah “h” khiap ding hoih a sa mipil pawlkhat hong om hi. Tua hangin zong laigelhna ah “h” khiap ding hong hanciam uh a, gentehna-in a nuai-a bang hi:
            (1) ahih hangin            = ahi hangin                               
            (2) uh hi                      = uhi
            (3) leh                         = le

A kigen thu ka zak ngei ah tua banga “h” a khiapnopna uh a hangte lakah khat pen i Zolai ah “h” tam lua cih thu hi. (I thulu en bek lehang zong Zolai ah “h” bangzahin tam cih kimu thei pah hi). Tua “h-te” in laigual sausak, laimai tampi beisak ahih manin “h” khiaptheih zahzah khiam lehang laibu bawlna ah sumbei phatuam ding, cih ahi hi.
Mipih sapihte sumbei phatuam ding hong deihsakna uh thupi ka sa a, a hanciamna uh ciaptehtaak ka sa hi. Ahi zongin “h” khiap manin sumbei phatuam ding cih pen matlaptaak taktak lo hileh kilawm hi. Tawm beizaw ding himah leh kikhai vevua lua lo ding hi. Taktak ci lehang, tu hun laibu i bawl ciangin cil tentan theih hilo-in mi’ lunglut theihtheih ding leh a simdan a nuam theithei dingin a kisem a kibawl hizaw hi. A kul leh, laimal zong gol ding, laigual zong kihal ding, laidal laimaite lai tawh dim metmat lo ding, cih khawng a kithupi ngaihsutzaw hita hi.

Sum vai zong thukhat ci ni. Tua sangin Zolai gelhzia limtak etcianhuai hi. Zolai gelhna ah “h” pum huat theih hilo, tam lua tah ci-a pum hepkhiattheih zong hilo, a val-a kizang zong om lo, cih kimu thei hi. Tua thu tawmno khat i kikum nuam a, tu tungin “leh” vai i bulphuh ding hi.

Khiatna  Tuamtuam  A  Nei  Zolai  Kammal  “leh”

I pau ah “leh” pen khiatna tuamtuam a nei kammal khat hi. Lai tawh gelhkhiatna ah a theih-oltuam dingin a nuai-a bangin nam nih kikhen thei hi:
1.      “lehpi” leh “lehno”
2.      A nung a ma tawh gawmna

1. “lehpi” leh “lehno”

(a) “lehpi” cih ciangin “h” a kihel teekteek “leh” kammal pen hi. Manglai kammal “and” tawh a kikimna munte ah kizang hi (i zatsa tek hi). Thu/mi/na a kibanglo nih (nih sangin zong tamzaw thei) genna-in kizang hi.

gtn.      (1) Thangpi leh Khaino hong hawh uhhi.
(2) Sumbukte leh galkapte tukpeng kidem uhhi.
(3) Upna leh zuihna a tonkhop kul hi.
(4) Mihing, ganhing leh singkung lopa

genbehna:        Nambat 1na ah Thangpi leh Khaino ci-in mi nih om a, amau pen a kibang hilo, mi khat tuak ahi uhhi. 2na ah sumbukte leh galkapte zong a tuam tuak hi a, 3na leh 4na zong tua bang mah hi.

(b) “lehno” cih ciangin “h” kihello “le” kammal pen hi. Thu/mi/na nih a kopin genkhawm napi (“and” khiatna nei teei napi), a tuam tuak-a genna ahilo, a gennop khat bek ahite ah kizang hi.
gtn.      neih le lam             nat le sat                tha le ngal                   
            inn le lo                 zawn le ngau           nek le dawn                
khawi le vulh          gim le tawl               silh le ten

Hih kammalte, a kop-a genna zong kici thei ding a, i pau ah tampi om hi. Hih kamkopte ah “lehno” a zat-huaina thu a nuai-a bang hi:

gtn.      (1) neih le lam
-- “neih” a tuam, “lam” a tuam, nam nih genna hilo, neihsa lamsa a vek-in kigawm-a genna
(2) inn le lo
 -- “inn” leh “lo” a tuam tuak-a khenna hilo, neihsa lamsa mah genna (nuntak nading, kivak nadinga kitangsam
     vangilte genna)
 -- a tuam tuakin i gennop hun zong om thei ding a, gentehna-in “Inn leh lokikal ah lui khat om hi” cihna bang
    ah “inn” a tuam, “lo” a tuam, ahih manin “lehpi” zatnding ahi hi.
(3) nat le sat
 -- Cinatna, damlohna (natna satna) vai genna hi a, “nat” a tuam, “sat” a tuam hilo

genbehna:        Hihte nangawn ah “lehpi” mah zat ding hoih a sa zong om hi (ka theihkhak: Rev. Thang Cin Pau,
                       Pastor, Zomi Community Church, Columbus, Ohio, USA).

gtn.  inn leh lo, neih leh lam, nat leh sat, adg.
                       Tua lo, “lehno” a zangte lakah pawlkhat in a kizomin gelh (=gawm) uhhi (ka theihkhak: Sia Thang Nen
                       Pau, Editor, Zangkong Awging, FAG, Yangon).

gtn. neihlelam, innlelo, natlesat, adg.

2. A Nung A Ma tawh Gawmna
A tunga “lehpi” leh “lehno” nam nih sunga kihello (“and” vai ahilo) “leh” dang tampi om lai hi. Tuate lakah “lehpi” zatloh a phatmawhna mun pawlkhat om a, pawlkhat leuleu a simdan a oltuam nading cih lam-etna tawh “lehpi” leh “lehno” khel kawikawi-in zat-huai hi. Tua banah, “lehpi” ahi-a “lehno” ahi zongin Manglai gelhzia enkakin a nunga kammal akl a ma-a kammal tawh a gawmhuai pawlkhat om hi.

(a) “if” khiatna a nei “leh”
gtn.      (1) Pasian in hong it lo hileh bang i suak ding hiam?
(2) N’ong hawh ding leh hong theisak khol in.
(3) N’ong hawh ding uhleh ong theisak khol un.
(4) Hong pai thei leh hoih mah ding hi ve’n.
(5) Hong pai thei le-uh (= leh uh) hoih mah ding hi ve’n.
(6) Hong pai thei leteh (= leh teh) hoih mah ding hi ve’n.
(7) Hong pai thei lecin (= leh cin) hoih mah ding hi ve’n.
(8) Hong pai thei le-uhcin (= leh uhcin) hoih mah ding hi ve’n.
                                                            
(b) A hun kituak-a thupiangte genna “leh”
gtn.      (1) Annek khit teh vak dinga kithawi. Tua leh, guah hong zu hiau. (paukam: Tua le,
                  guah ong zu hiau)
            (2) Inn pan pusuah lian leh guahzu lian.

(c) “or” khiatna nei kammal a cin nadinga kizang “leh”
gtn.      “ahihkeileh” (tomlakna “akl”)
            (1) A vom ahihkeileh a kang, khatzawzaw teel in.
            (2) Nuntak zon nadingin summet bawl in. Ahihkeileh lo kho in.

(d) “ahilo lama hih/seem/piang” cih khiatna a nei “leh”
gtn.      (1) Thu ahi bangin gen lo-in lehgen hi.
            (2) Neino in a nik lehten kha hi.
            (3) A zo lua ding kimlai lehlelh zawsop.
genbehna:        Hih (d)na “leh” pen Manglai grammar “prefix” ciingin a nunga kammal tawh i gawm ahi hi.
gtn. lehbulh, lehngat, lehpai, lehtat, adg.)

(e) Din kik, thuk kik cih lamsang genna “leh”
gtn.      (1) bumleh – bum a thuak khat in mibum theite mah cialin bum a leh ciangin pha thei
            (2) zuleh – zubel sunga zutui a kiam ciangin dimh kik
            (3) khekleh – pawipi hun bei khit, a zingciang khatvei bawlbehna
            (4) kileh – tunna mun pan paisuak lo-in kipatkhiatna mun lam manawh kik
            (5) kinileh – khualzinna ah zan taam lo-in tua ni mahin a paikhiatna mun ciah kik

(f) Kamvuicing khupna-a kizang “leh” leh “le” (zattheih kawikawi)
gtn.      (1) Tu’n na thei ta hia leh? (Tu’n na thei ta hia le?)
(2) Hong pai ve leh (Hong pai ve le)

genbehna:        Nambat (2)na “Hong pai ve le” cihna ah “ve le” awsuah zui-in a khiatna nam nih suak thei hi.
-- Khatna ah, “Come, then” cih nam hi. Tua nangawn “leh” tawh ahihleh thupiakna akl kimaingapna gimnam deuh a, “le” tawh ahihleh a aw neemsuah neelsuahzaw deuh leh kilawm hi.
-- Nihna ah, “S/he does come” cih nam hi a, hong pai lam a theilo khat kiangah hong pai ahihlam genphatna dan hi. Tua nangawn, “leh” tawh hileh genphatna ciang bek hihtuak a, “le” tawh hileh (hong pai lam theihloh lawmlawm ci-a) hawmthawhna pian, akl (hong pai ka cih na uploh tu’n na thei hia ci-a) tungnung tuanna pian gimnam hi.
-- Hih, khatna leh nihna a khen-ol nadingin nihna-a “ve le” pen “vele” ci-ing gawm lehang hoihtuak hi

Thukhupna
            Zopau kicing mahmah hi. “leh” bek zong genkhop om hi. Tu-a i gen teng pen “kei’ zatzia” hi pan hi. Kei’ zatzia cih ciangin kei’ aa bek hong kimang hen cihna hilo a, khat bek’ muhna hi pan cih a gen nuam i hizaw hi. Muhzia zatzia a tuamtuam om kha thei ding a, tu-a pen kei’ theihsun, ka battan, kong sunkhiatna ahi hi.


Source : 
reply-to:zominam@yahoogroups.com
to:GZA Info <zomiglobal@gmail.com>,
Zonet Zomi <zomi@yahoogroups.com>,
"zominam@yahoogroups.com" <zominam@yahoogroups.com>,
Zomi Daily <zomidaily@gmail.com>
date:Wed, Apr 27, 2016 at 5:52 AM

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Literature: Khiatna Tuamtuam A Nei "leh". Gelh - Rev. Pau Lian Mang, D.Theol. Description: Rating: 5 Reviewed By: Cinpu Zomi
Scroll to Top