728x90 AdSpace

Hot
Menu
Zon-ol na Donate

Latest News

ZOMI MIUZIK SIAMTE BANG IN SUSIA? Rev. Tuan Khan Mung (Sia Tuamung)

ZOMI MIUZIK SIAMTE BANG IN SUSIA?
Rev. Tuan Khan Mung (Sia Tuamung)
KSCM, Kalaymyo

[ZYA panin Secretary a sem Pa Kam Suan Mung (E Mung) in April 4 Nipi ni sunin phone message khat hong khak a, ‘ZYA min tawh magazine khat bawl nuam hang in nang zong music tawh kipawl article khat May kha beima-in nong gelh zo tam!, hong ci hi. Kei zong thakhatin message mah thukkik pahin, ‘Hong hanciam ning ei’ ka cih leh amah’n zong manlang takin “OK” ci-in hong thuk pah hi. ZYA pen thaneemna pawlkhat a om ding zongin Zomi Movement ah a mapang masa, pansan a la phadeuh kipawlna khat ahih manin Zomi hihna tawh ka angtanpih mahmah khat, le tha ka piak mahmah khat ahi hi. Hih ZYA magazine sungah tuilui gelhkha ka hih manin ka lungdam mahmah hi.]

THUPATNA
            2014 April 13-16 sung Kawlpi khua sunga Galkapte Tuibuahna pawi ah KSCM Miuzik Band tawh miuzik tumin ka om uh hi. April 14 nitak lam hunin miuzik tum-a ka om laitakun Khuppi, Falcon band-a Drum tumpa, hong pai-in amah’n zong hong huhin hong tumpih hi. Ka kiang a om papi khat in, “Zomi Miuzik siamte zu in susia mawk ei" hong ci huat laizang hi.

            Tua laitakin ka ngaihsutna-a a omom thu khat ama kiangah ka gen pah hi. Ka kihopih pa in bangci ngaihsut cih ka theihloh hangin ka lungsim bang hong zang pian dep hi. Tua thu in bang ahiam cihleh, “Hih Zomi Music siamte a susia pen zu maw? Ahih keileh zu lei nading a piate maw?” cih thu ahi hi. Tup tangtang ahih loh hangin Zomi Miuzik siamte a susia pen zu hi lo hi cih ka gennop thupi ahi hi.


2006 ZOPAAL MUSIC CONCERT
2006 November 2-4, nitak thum sung ZBCM huangpi sungah “ZOPAAL MUSIC CONCERT”  ci-in concert pawipi khat ZBCM Music Department makaihna tawh kibawl hi. Zomi khangthak lasak uukte in music vanhoihte tawh lasa ziahziah ding cih deihsakna mahmah hi phadeuh pen hi. Nitak masa November 2 ni-in khui sunga lakhum ngei nai lo mithak a om thei teng in lasa uh hi. Nitak nihna November 3 nitak ciangin milui, khui sunga a khum ngei, Radio sunga a sa ngei cihte pawl in lasa leuleu uh hi. A nitak thumna November 4 nitak ciangin mithak le milui kigawmin lasa leuleu uh hi.

            Hih nitak thum sung nuamtakin la a kisak theih nadingin Falcon Miuzik Band in hunletha, siamna sit loin hong huh uh hi. Ni 2 sung sunthapai-in lasa dingte a banbanin hong pai-in la leppih uh hi. Sun hun ciangin vaimiimcim nekpihin zatep le kuunpaung ciangciang hanciamin kipia hi.

            Concert kibawl ni hun zawh ciangin Falcon Keyboard tum ahi Sia Zam Cin pen ama cycle tawh ciah vingveng den hi. Deihpi, Zekhe le Khuppite pen a lawmte uh nih bangin cycle tawh hong dawn ciangin a ciahkhia thei pan uh ahi hi. Amau teng pen sum 5000 bang pia in, tualo a dangte pawlkhat tawh ko a makai zawdeuhte Kawlpi Lansong kiangah niangtui le nektheih tuamtuam ne dingin ka paisuk uh hi. Tua ka piak sum 5000 pen ka genkhiatloh hangin azi ata, a inn uh tut ding cih lungsim sangin, ‘A ciahkawmun a lawmte uh tawh dawn theih khatpeuh na dawn ding’ cih ngaihsutna ka nei giugiau ngel hi. Hihte a nuntakna uh kisia hen cih ngaihsutna lungsim ka nei het kei hi. Ka pakta mahmah-a, zong ka naute bang mahin ngaihsunin ka it mahmah hi. Hih hun ah mithak lasa peuhpeuh Ks. 2000/- le milui lasa peuhpeuh Ks. 5000/- ta ZBCM in hong piaksak hi. November 5 nitak lam ciangin a gim a tawl teng nitak an vakin music band-te Ks. 20,000/- ta tawh lungdamkohna kinei hi.

2007 ZOPAAL MUSIC CONCERT
2007 November 26-27 nitak nih sung mah A Nih veina Zopaal Music Concert pen ZBCM huangpi sung mah ah kinei leuleu hi. Hih hun ciangin milui mithak cih bang hi nawn loin a om thei teng kicialin la kisa ziahziah leuleu hi. Falcon Miuzik Band-te mah in a beisa kuma bang mahin hong huh uh hi. Sunthapai la a leppih khit uh ciangin inn ciat ah ciahin kisil an ne uh-a, hong paikik uh hi. ZBCM huang hong tun uh ciangin stage tung kah pahin guitar teng music van teng a aw lem-in tua teng a man uh ciangin hun kipan hi. La dawng khat khit dawng khat tumto ngelhngelh uh-a, hun laizang ah thugenna hun tawm kila-in tua khit ciangin tum ngelhngelh leuleu uh hi. Mipite in nuamsa lua-in lasa peuhpeuh sakpih uh a, tutsa, dinsa-in kivuang ngelngelin nuam sa thei mahmah uh hi.

            Nitak 2 sung hun man sialin nung kuma bang mahin music tumte Ks. 5000 ta pia-in a dang pawlkhat in niangtui le nektheih tuamtuam ka ne leuleu uh hi.

ZOMI KHANGTHAKTE’ NGAIHSUT DING THU:
            Hih Zopaal Miuzik Concert nihvei tungtang ah Zomi Khangthakte’n ngaihsuthuai ka sak mahmah khat om hi. Lasa siam masa zaw deuhdeuhte in sabaih a, ciahbaih ding bekbek hong ngenngen uh hi. Ataktakin Zomi Miuziksiamte lungsim puak ding pen mithakte sasakin hong man ciang bangun lasa masate in na dawnin ‘Siam peuhmah ciei. Hoihtak sathei ciei’, cih khawng na ci-in tha na pia leh uh ka utna ahi hi. Mithakte in mi masate tawh lasak ding pen lau pianpian mai uh hi. Kihta simsim uh hi. Tua hi a, lasa masate in lasa thak dingte tha pia-in hanthawn ding cih pen kei lunggulh le hoihsak ahi hi. Ahi zongin lasa siam tata, mi masa tata in sa pak a, ciahsan pah ding bek ngaihsutin kinei mawk hi. Tua bang hi lo ding hi. Miuziksiam Hihna (Musicianship) ah miuziksiam khatlekhat kizopna zong a thupi mahmah ahi hi.  Hih thu pen Zomi khangthak miuzik siamte lungsim puak ding ahi hi.

2008 ZOMI IDOL
            2008 December 27-28 ni 2 sung ZBCM huangpi sung mah ah ZOMI IDOL 2008 kibawl leuleu hi. Hih Zomi Idol 2008 huna zat ding music track-a kipan nitak 2 sung final kidemnate ah music kisam khempeuh Falcon Music Band-te mah in apat pan atawp dong hong huh leuleu uh hi. Final nitak ni ciangin Yangon panin Cinpi (Lazy Club), Mungmung (Keyboard) le lasa laphuak siam Sangpi le GMI siapi Rev. David Sumte zong Yangon panin hong pai uh hi.

            Final nitak November 28, kipat ding hunlian ciangin music tumte pawlkhat hong om het lo mawk uh hi. Mipi in kingak dimdem hi. Cinpi bangin, “U Mung ..., mawk peuhmah, bangcih mawk ding ...” ci-in nuamsa het lo hi. Sauvei lo ciangin hong tung uha hun kipan toin nuamtak mahin kizo thei hi. Amau pen tawmkhat a va sukek pak uh ahi hi. ZBCM huang pen biakna huang ahih manin tua sungah dawntheih khat peuhpeuh hong ken ding uh hoihsa lo uh ahih manin dawntheih omna a va zuanpak uh ahi hi. (Thupi uh ka sa hi). Mi tampi takin kilawm kisa het loin, ‘Lawmlawm’ a ci tawh, ‘Mailam ah kizang theinawn kei mawk un teh’ a ci tawh, ‘Zomi sungah a dawn thei lo music siam adang om lo hiam!’ a ci tawh kimau ngeingai hi. A dawn thei dinga a pantahtah pen a miuzik uuk uh ahi tam! ahih keileh a dawn theih nading khopkhop beka a cialcial makai lamte ahi zaw tam!

2011 ZOMI IDOL
            2011 Zomi Idol pen Tahan EFC Hall ah 2011 November 11 ni-in kibawl hi. Hih 2011 Zomi Idol hun ciangin zong miuzik track khuma kipanin Falcon Music Band-te mah in apat pan atawp dong hong huh uh-a, Zomi sungah miuzik band thak ahi Ever Smile Band-te in zong hong huh uh hi. Zingsang lam hun masa tengin Top 10 teng in lasa uh hi. Tua zawh ciangin tawlkhat kikhawlin an kine hi. Sun lam kipatkik ding ciangin Falcon Band panin bass Guitar tum Zekhe hong paikik nawn lo hi. Muanpi (Deihpi naupa) in bass hong tumsakin phadawm hi. Hih hun ciangin Tedim khuapi bulphuhin Ever Smile Music Band hong piangkhia a, amau zong 2011 Zomi Idol ading miuzik track khum le final kidem ni-in la pawlkhat hong tumsak uh hi. Hih hun ah Zekhe hong paikik man nawn lo dinga a paikhia mangsak pen mawh ahi tam! Tua bang dinmun a tun nading khop bekmah a pia ciauciau den keei makaite mawh ahi tam! (Ka kisuang mahmah hi. Ka diipngek na zeuhzeuh hi).

ZOMI LAKHUI BAWLTE
Nidangin Kalaymyo ah Zodi, Vulmawi music band cih om ngei hi. Zomite sung panin U Pum Dalte pawl zong om ngei hi. Tedim pansanin Lengtong Music band khat zong hong piang ngei hi. Tua huna lasa teng pen Lengtong min puasakin Lengtong Kam Khen, Lengtong Pauno, Lengtong Go Hau, cih bangin min nei suak zo uh hi. Tonzang panin 1982 pawlin Taangko Music band khat hong piang ngei hi. Hih music band-te  ahang hang tawh tuhun ciangin BAND min pua-in kimukha nawn lo hi. Tulaitakin Kalaymyo huam sungah Altar Music band, Tubal Music band le KSCM Music band ci-in khangthak band pawlkhat hong om hi. Ahi zongin Biakna pawlpi le Zomi nasepnate bek ah kihel uh a, thudang ladangte tawh kisawhkha lo uh hi.

            Ahun zui-in Zomi lasasiam tampi om hi. Biakna lamah Tatkhiatna lasa pawl hong omin AGAPE lasa pawl, SIHNA KI GO ZO lasa pawl khit ciangin DORCAS le TAANGKO lasa pawl hong kizomtoin EBENEZAR, SOWER SISTER, FAMILY GOSPEL cih bangin numei lasa pawlte zong hong kizom toto hi. Tuate in Biakna late bulphuhin lakhui (album) bawl toto uh hi. Mailam ah Zomi Miuziksiam tampi hong piang lai ding hi.

            Tua sungah AGAPE-te tawh ki-hunkhat pianin LENGTONG Album hong kibawlkhia hi. Pa Pum Kap, Dr. Zam Khen Thang-te a vaihawmpi in ka thei hi. Pahtawihuai mahmah uh hi. Bang hang hiam cihleh Zomi Miuzik Tangthu laimai thak a gelhte ahi uh hi. LENGTONGte in Itna le Ngaihna late, le gam le lei ngaihna late, nu le pa (parents) itna late hong sa deuh uh hi. DORCAS TEAM, SOWER SISTER, FAMILY GOSPEL cih bangin numei lasa groupte hong piangin Lengtongte ban zomin Itna Ngaihna la lamah THAWNKHAM hong kiphawkkhia hi. Tuate ban ah STEPHEN VOCAL BAND-te zong tuampian takin hong kitheikhia to hi. Tua ban Zomi lasa siam tampi hong piangkhia hi. Kapno, Kamsen, David Kham, Cingpi, Sannuam, ... te bek hi loin, Zomi Idol panin Thangta, Nutoih, Thawnpi, Cinpi, Niangpi, Maacin, Dim ... Kawlgam bup huamin Biakna laphuak le lasa minthang vangvang Siangpite hong piangto uh hi. Khangthak Zomi laphuaksiam le lasasiam tampi om hi. A vekpi phialin mi khateh dawl ciang kihi mai hi. Hih bang nasepna tawh a nuntakna a zong zo taktak kiom lo mai hi.

      Hih Zomi Miuziksiamte, Zomi Laphuaksiam le Lasasiamte nuntakna ciang dinmun a tun zawhlohna uh, le nuntak siava-in zukham ankham-a etneu simmawh a thuakna uh ‘ahang’ taktak bang hi ding hiam? Thu tuamtuam tampi omkha ding hi.

ZOMI MIUZIKSIAMTE A SUSIA?
            Zomi Miuziksiamte zu in susia loin zu lei nading khop bek a piapiate suksiat ahi hi.

            Khatvei lai-in Zogam pawlpi khat ah Cialpi kinei-in nuamtak kizo hi. La makai le Keyboard tum tegel pen Ks. 10,000/- piak ding haksa sa mahmah uh a, Cialpi bawl Siapa pen Ks. 600,000/- piak ding kithukim lian uh hi. Cialpi sungah mipi a kaikhawm pen la makai, lasate le miuziksiamte ahi hi. A Thu le A La tonkhawmsak leng nuntakna piang zo pan ding hi. Tua hangin Zomi Miuzik siamte in a inn a lo, a zi a ta kiang tut ding ngah zo lo ahih manin a ngah zawhzawh a lei uh hi mawk ding hi.

            Zomi Miuziksiamte a susia pen Makaite, Thuneite ihizaw kei mai tam maw!!!

ZOMI MIUZIKSIAMTE LE ZOMI MIUZIK KILAPTOH NADING:
1.   Zomite in Miuzik thupi sak ta ni.
      Nidangin singtawng khat tatin zanhakin la kisa zo hi. Khuang khat tumin kikhawm thei hi hang. Tuhun ciangin Keyboard khat beek loin kikhawm zo nawnlo hi hang. Biakna kumcin kikhoppi hunkhat peuh le gam le nam vai mipi kikaihkhopna  khat peuhah Miuziksiamte le miuzik vante kisam ta hi hang. Inn thunget kikhop bek zong thu genna ah mic kisam ta hi hang. Pawlpi inn tawm nono le kikhawm mimal tawm nono hi ta leng a ging ngaih theithei i zat hun ahi hi.

2.   Zomite in a mawkna le a tawm theithei in miuzik izatsawm nawn kei ding hi.
      Biakna lam kikhop khat peuhpeuh a om ciangin Miuzik van le Miuziksiamte i cial thei hi. Tua bang hun ciangin a hihtheih lai siah sum beilo, a mawkna in i cial nuam hi. A hihmawh luat leh Biakna vai hi buang hi ven ci in sum bei a tawm theithei ding i ut niloh hi. Namdangte ahihleh kideek tata khollo napi hangin, ei le ei ciangin kideek tata thei hi hang. Midang i piak sawm zahzah mah ei le ei kipiak sawm ta ni. Dawn pak khopna ding bek hilo-in inn le lo, zi le ta kiang tutkhop ding, zing-huan nitak-huan khop ding mah kipiak sawm ta ni. Ei a te mah en nuntak lawh sak ta ni. Tua hileh miuziksiamte in zong a ne a dawn zongin a nelo a dawnlo bangin hong siangtho ding uh-a, sum ngah theihtheih nading, a-inn maban a lo maban kisapnate mitsuan in hong nei ding uh-a, amau a cial ding le a kicialnop nadingin hong hanciam ding uh hi.

1985 Zomi Namni, Suanlek, Giasuante unau tawh Ygn Educational Center ah Sia Tua Mung.

ZYA-Myanmar in Zomi eLibrary / Laibusaal ading in phal na ahong piak ahi hi.

Source : 
ZYA Tin Jubilee Magazine (2005-2015) Laibu.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

2 comments:

  1. 1.ZOMI MIUZIK SIAMTE BANGIN SUSIA?
    "Zomi music siamte zu in susia loin zulei nadingkhopbek apiapia te'susiat ahihi."
    Asumpiate amawh maw? ahihkeileh azunete amawh?
    Sumpiate'susiat hikeiin adawnte amaulehamau akisusia ahiuh hi.
    Kitawmpiakin kitampiak taleh "zulei nadingaa kipia hilo hi." "Sumtamlo zeekthamcinglo" cihtawh zu asuahtepen naupanglungsim hi aa akhial ahiuh hi. Tawmin tamtaleh zusai lam manawhpih loin azi,ihta aptangtangleng eikia khuaphawkloliangaa ihhai sangin ih innkuanin ihphattuampih zawding hi.
    A sumpiate'n tam apiakzawhlohbel khialhsak nading om kasa kei hi.

    ReplyDelete
  2. Guai Thupi lua ei.Lungdam hang ei.Thu thak tuam2 za lai ding ih hihmanin lungdam

    ReplyDelete

Item Reviewed: ZOMI MIUZIK SIAMTE BANG IN SUSIA? Rev. Tuan Khan Mung (Sia Tuamung) Description: Rating: 5 Reviewed By: Cinpu Zomi
Scroll to Top