728x90 AdSpace

Hot
Menu
Zon-ol na Donate

Latest News

ZOMI OMNA PEUH AH ZYA OM DING. Rev. Thang Van Lian

ZOMI OMNA PEUH AH ZYA OM DING
Rev. Thang Van Lian 

“Zomi omna peuh-ah ZYA om ding a,
ZYA omna peuh ah Pasian’ lim le mel kilang ding hi…”          

            Kum 10 sung bang ZYA-Kalaymyo-te na hanciam tentanin gensiat kosiat thuak taleh sum le pai haksa taleh hun le neihsa sum le pai tampi beilawh taleh Zomi a khualna uh tawh tu-in kum 10 bang hong cing thei ta a, kum 10 hong cin ciangin kham le zangah ZYA thupitna kitel semsem ahih manin khua 40 val bangah tu-in ZYA ding ta a, Zomi omna khempeuh ah zong hong ding kim lai dingin i lamen hi.

A khangkhangin mun tuamtuam ah Pasian in minam nasem ding le gam makai ding na piangsak zel a, tua makaite pen a ut man uh hi loin Pasian’ teel mana sem ahi uh hi. Gtn. Moses, Gideon etc. Tulaitaka ZYA makaite zong tu khanghun adingin Pasian in a hong teelte ihi a, tua Pasian’ hong teelna pen pom thei pahin i tat, i heekzia ding zong phutawm kawmkawm, thungen kawmkawm leng Topa’n hong lak ding ahi hi.

Zosuan Tuailai Khawmpi le 914-ZOMI vai-a kipan tulai khuahun kiheek ziate i et ciangin khangno kipawlna limci khat neih ding pen Pasian in ei khanghun ah i liangko tunga hong suat vaipuak hi a, tangthu in hong kalh thu ahi hi. Tua ahih manin a beisa huna kham le zang lungsimte, biakna vai-a i ki-et theih lohnate, beh le phung khua le tui vai-a kituam-etnate paisanin ZYA sungah Zomi khangno khempeuh kigawm ding ahun hi ta ahi hi.


Zomi Khangno Kipawlna neih ding a thupitzia tunai-a upa thutheite’ hong gen pawlkhat a nuai-a bang ahi hi.

1. A beisa kum 10 sung bang Kawlpi bulphuhin ZYA a na dinna ah kisik het lo bek tham lo Zomi omna peuh ah ZYA om ding a thupit zia hong phawksak hi.
2. Zosuan Tuailai Khawmpi 2013 pan mipi’ lunggulh ahi Zomi omna peuh ah Zomi Khangno Kipawlna om zawh nading.
3. Zomi Khangno Kipawlna omsate tawsawnin gambup pan leitungbup level dong ah thu kizaktuahna le sepkhopna hoih a om theih nading. Gtn. Gamdang teng ah Zomi Youth Network kici om khin a, India gam ah ZYA kip mahmah khin le Myanmar sung mun 40 bang ah ZYA om khin, khualam ah khua min tawh kinei ciat hi.
4. Nopna dahna thute, gamsung gampua thupiang thukin khat peuhpeuh ah a hun lap-a kihuh kipanpih theih nadingin khangno kipawlna thahat khat neih loh phamawh hi. 
5. Zomite minam lian, minam picing suah nadingin minam, lai le ngeina puahin zun zawh nadingin khangnote in zong vaipuak lianpi nei hi.
6. Zomi Khangno Kipawlna min kibang khat neih zawh nading. Gtn. Zomi Youth Association, a tomin ZYA hi leh ZYA-Kalay, ZYA-Cikha, ZYA-Muizawl, ZYA-Yangon… cih bang hi ding.
7. A khuakhua-a khangno kipawlna omsate tungah gambup level ah ZYA min tawh kalsuan khawm dingin zotna lai khak ding ahih kei leh phak zawh tantan pai-in zawn ding.
8. 2014 sung pen kizot hun, constitution geelna hun le muhziate kikupnawina hun hi ding. Drafting committee/consultant zong  committee sungah koih/teel pah ding.
9. 2015 sangkhak sungin Zomi Khangno Khawmpi khat Tedim khuapi ah nei ding. Hih Khawmpi ah kipawlna min kipsakna le constitution draft kipsakna nei pah ding.
10. Zomi kici nuam lote hih khawmpi le kalsuanna ah pibawl nawn se lo phot ding. Ahi zongin ZYA a om manin a omsate’ neihsa lamsa le nasep silbawlnate beisak kul lo ding.  

            Thalak nadingin ei kiang nai ah Mizoram sunga Young Mizo Association (YMA) kici khangno kipawlna tawm en pak dih ni. 1935 kumin YMA phuan uh a, President, Vice President le Treasurer bang Missionary Mikangte hi-in Numei khat zong kihel hi. Secretary nih pen Mizo madawk biakna makaite ahi uh hi. Kum 2000 ciangciang member 250000 pha khin uh hi. Office staff 16 le research scholar 4 full-time nei uh hi. A nasepnate uh pawlkhat a nuai-a bang hi:
1. Picing Laisinna Phualpi (Adult Education Centers) Mizoram gambup ah hong uh a, India gambup ah literacy rate 96% dong a sangpen dinmun tung to hi.
2. Green Mizoram ci-in YMA in 1974 pan June kha simin singno suanin gam kem uh hi. Gam sungah gam kangsak lo uh hi.
3. Khua sungah inn lam zo lo, u le nau nei lo meigong daipamte’ inn lamsak uh hi. YMA min tawh mun le gam nei-in inn lam uh a, inn sap la loin mizawngte omsak uh hi.
4. Mizo ngeina le van le nate kemcing uh hi.
5. Cidam nading le kumpi hoih pian nading hanciam uh hi.
6. Laibusaal mun 250 val ah hongin mipite laisim dingin thapia uh hi.
7. Guihtheih khamtheih dalin khamcip uh a, hih hangin kumpi in zong Total Prohibition zang hi.
8. Mizoram sungah mipi zunbuk le awngbuk 2500 val lam uh hi.
9. Sports, Social, le Cultural activities ci-in mipite a lomloma kikaihkhopna kumsimin bawl uh hi.
10. Zawlbuk Ram ci-in gambup min tawh center pi khat le huan nopci khat Thingsulthliah ah bawl uh hi.
11. MP kiteelna ah mipite navak suahin Political Party tuamtuamte tawh kithuahkhawm uh a, Mizoram kumpi le makaipite tawh tukhawm, thu kikumkhawm uh hi.
12. YMA Chamchin Bu ci-in khasimin copy 10000 ta hawmkhia uh hi.
13. Mizawngte le mi cimawhte huh ding le panpih ding pen YMA min tawh hitaleh mimal limlim in lungtang ah vom tinten dingin kihanthawn zo uh hi. Nopna dahna ah mandatte bawl ding, hankhuk tawh ding cih bang sep ding khempeuh tavuan la khin  uh hi.
14. Media lam hanciamna tungtawnin tu-in Radio, TV/Cable TV cih bang tampi piang ta hi.
15. Press Inforamtion Bureau (PIB) ci-in Aizawl ah phungpi bawl uh a, India le leitungbup dong ah Media Forum/Conference-te ah kihel uh hi.

            ZYA i din manin mite galbawl ding, kituam lak ding cihna hi lo a, Zomi kici thei sensen teng hul siuseu-in ngaat taka Zomi min tawh lawngkhata ginzawh nading le kiimlepam adingin thupha suah zawh nading deihna ahi hi. Zomi omna peuh ah ZYA a om zawh nading hanciam ciat ni.

            ZYA i kicih kim theih lian nailoh hangin khua khempeuh phial ah khuamin tamin khangno kipawlna om khin zo hi. Tua in Zomite pen a kipawl thei lo hi loin khuamin bulphuhna pan minam min bulphuh a, leitung level ah i tai theih ding kal khat suan ding a kisam lai hi bek hi, cih hong phawksak hi.

            Zomite hai nawn lo ihih manin Zomi omna peuh ah ZYA om ding a, ZYA omna peuhah Pasian’ lim le mel kilang ding ahi hi. 
        


Source :
ZYA Tin Jubilee Magazine Laibu 2015

ZYA - Myanmar in Zomi eLibrary / Laibusaal ading in Phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMI OMNA PEUH AH ZYA OM DING. Rev. Thang Van Lian Description: Rating: 5 Reviewed By: Cinpu Zomi
Scroll to Top