728x90 AdSpace

Hot
Menu
Zon-ol na Donate

Latest News

A Kidal Kholthei, Kam sung leh Ha Natna. Dr. Nang Khan Lian (B.D.S, UDM)

A Kidal Kholthei, Kam sung leh Ha Natna.
Dr. Nang Khan Lian (B.D.S, UDM)

 “Ha omkei leh natna omlo” ci’n kamsung le ha cidamna tawh kisai in thuciin khat om hi. Hi mah hi.Kamsung le Ha natnate a tamzawpen Hahangin apiang ahi hi. Tua hangin ha mah kimawh sakin kibotkhia pah hi. Ahih hangin Ha aom nawnloh ciangin an gawina lemlo, ankam lim nawnlo, kampau sianglo (kiteello), melsia tuamsak…cih bang siatlawhnate hong piang hi.

Hi bang siatlawhna te zong ha a om nawnloh hangin apiang hong hi leuleu hi. Sakhi tuinek in panni cileng ha anei leh azang pen ei mahmah i hi aa i awlmawh loh hang leh sianthona lam i kinlohna hang hi zaw aa, kuamah bawl loh ei maa bawl ahi hi. Tua hi aa Pasian hong piaksa haate pen adang bangmah tawh tehtheih ding hilo aa, a dam nading hoihtak kinbawl aa kepcing ding kisam hi.


Ha leh kamsung natnate pen a kipat tungin naalo ahih manin bangmah kithei lo hi. Ahihhangin a nat ciang in adang natnate tawh kibanglo in thuak hak mahmah aa, natna pen asuk mahmah ta zong ahi hi. Tua hi aa, nidang lai ahih leh hi bang danin ha anat ciangin botkhiat ding bek om hi. Ahi zongin tuhun ciang in pilna hun cih mah bangin pilna khantohna tawh kizui in bot kullo in ha a nasak, ha sung leh a zung sung aa om nuntakna nei  saneng(Pulp) lakhia in kibawl thei ta hi. Hih bang dan pen ha zung thoihna (root canal therapy, RCT) kici hi. Ahih hangin hibang a kibawl nading pen sumtam bei leh a kisam vante tammatna hangin i Zogam lam ah ki limzat zo nailo in ka um hi. Tua hi aa bangzah ta in pilna te khangin a kibawl thei phial zong in ah kidal kholhna kan in a hoihzaw thu omlo hi. Mikangte in “Kidal kholhna in kibawlna sangin hoihzaw hi” na ci uhi.

Tua hi aa kibawl man sum, hun leh i thuak ding natnate pen ngaihsun kawmin i khentat siam ding thupi hi. Anat ciang kibawl sangin a natma ki dalkhol thei leng ei aa dingin hamphatna tampi omzaw ahi hi.

Akimanggilh kha Hani
Bangzah ta in i kamsung ah ha heng (caries) a omloh hangin hani hoih kei leh zong haate kipkho lo leh mel siasak, om nuamsak lo hi. Pawlkhatte in kamsung ah aom ha bek mah thupi ngaihsut kha in hani pen ki awlmawh kha lo thei hi. Hani dam leh ha kipkho ding aa an zong hoihtak a kigawi thei ding ahi hi.

Hani natna (periodontal diseases) pen Kamsung leh Ha cidamna ah a limpian natna khat ahi hi. Siantho lohna hangmahin apiang ahi hi. Kamsung siantho lohna hangin habaal te hani le haphung te kikal ah hong kikhol in asawt ciangin suang bangin akhauh avom in hong kikhel hi. Tua pen hasuang (calculus) kici hi. 

Hani natna hangin ha khat le khat kikal aa om hani te kiasuk in ha vangsak hi. Hani kia ahih manin hazung te nangawn kidawk thei hi. A suuksiate ah ha ki liing ahih manin an hai theilo, sukha leng na lua ahih manin anne zolo,naaiphual, bawk  cihbang omthei hi.

Hih hanibaal te om na hangin khangno kipat hun (puberty), naupaai hun (pregnancy) leh sikhum zunkhum natna neite ah hani natna suksia  mahmah thei hi. Tua hi aa kidal kholh ding thupi mahmah hi. Hani natna hangin kum 65 tungsiah khanghamte in ahuampi in hatang tang 6 suplawh (neiloh lawh) uh hi ci’n “Kidalna leh Tangpi Ha cidamna lam pilnate” in a kantelna pan mukhia hi. Tua hi aa haheng omloh ding athupit mah bangin hani natna omloh nading zong athupi mahmah ahi hi.

Bang ci kidal ding?
A khumlua leh a manlua ante limnekna, fluoride kihel haza zatlohna, kamsung siantho lohna leh gamtat manlo (kuunza, zapi cihte zatna.) cihte i hih leh amanlang in i kikhel ding kisam hi. An khat peuhpeuh nekkhit ciang kamkhuah ding, kamsung sianthona thupisak ding, fluoride kihel haza te zangin nikhat atawmpen nihvei( ha nawtdan man tawh) ha nawtding, zongsat hoihlo te nusia ding.. cih bang tatdan hoih te kisin ding kisam hi. Kamsung leh hani cidamna dingin thaza (vit C, calcium..), mehteh mehgah te ne in. Man mai ah kizep kawmin zong kamsung leh ha te sitkawm in. Ha maitang leh hatang khat leh khat kikal ah avom neu ciuciau cihbangte aom hiam, annek khit leh tuidawn ciang ha zeknat thei hiam, hani tawh kisai in sitding thu in haphung le hani kikal ah habaal te aom hiam, kam a uih thei zelhiam, hani pan si aluang hiam, hani bawk ahih keileh sandup in om hiam cihte ei leh ei ki sittel theih ahi hi. Hi bangdan lim le mel te i muhleh Ha Siavuante kiang ah amanlang theipenin kilak ding thupi hi.

Hanawtna i batzawhloh ha maitang leh ha kikal te ah ha khau (dental floss) tawh siansuah in ki dalkhol thei hi. Hani na nuam hi ci aa na ki upmawh leh ci tuilum tawh kamkhuah in. Tuabek thamlo Chlorhexidine, menthol cih zatui kihel kamkhuahna tui te tawh zong kamkhuah leng hani natna pianna dingpan kiamsak tuam hi. Ahih hangin hani natna apiangsak hani baalte, hasuangte hepkhiat loh in hani natna pen damsiang cih om theilo hi.

Kamsung leh Ha natnate pen a kidalkhol thei ahih lam i thei hi. Tua hi aa hi thei leh atawmpen kumkhat khatvei Ha Siavuan te kiang ah kilak tangtangh in kivel ding kisam hi. Kuama aa hilo eima aa ahi i kamsung aom hate i khankum sung akipkho nading leh adam nading pen ei mimal khatciat i vaipuak ahi hi.

“Kidal kholhna in kibawl na sangin hoihzaw hi.”

:Kidalna leh tangpi ha cidamna pilna = Preventive and Community Dentistry:
“Bangzah ta in pilnate khangin a kibawl thei phial zong in ah kidal kholhna kan in a hoihzaw thu omlo hi”

“Neu Ha Hoih Leh”
Kawlte in “kipatna hoih leh anung ciang lungmuanna om” (အစေကာင္းမွ အေႏွာင္းေသခ်ာ) ci’n thucin khat na nei uh hi.

Mihing nuntakna kipat tung ahi nugil sungah i om aa kipan leitung ah i suahkhiat khit naupang hun pen mailam i nuntak nading i lim leh mel dingte tatzia te a kibawl hun ahi hi. Tua hi aa naupang hun pen sing hileh a kisuih laitak hun hi aa, beel hi leh beel lim a piantheih nading a kisek laitak ahi hi. Gamtat luhek, kampau zia le tong te leh cidamna lam ah aki makaihna bang zui in ateek dong apuasuak ding ahi hi.

Tua hi aa kamsung leh ha cidamna lam muhna pan leitung ah hong  piangkhiat ma leh hong piankhiat khit naupang khatin atuahkhak ding thute ka hih theihzah in hanciam in kong at ahi hi.

Nu gilsungah om hun
Nugil sungah aom lai nauno  pen ‘foetus’ kici hi. Naupaai hun sungin nu in cidamna leh tha om nading hahkat ding kisam hi. Hih hun sung aa nu i gamtatna bangin naunno in asia apha angah ding ahi hi. 

Nugil sung omlaitak nauno ha a susia thei tatkhialhna (3)te;
(i)            Naupaai zawh kha 5- 9 sung a nu in virus (ahih kei leh)lungnoneu khat peuhpeuh te hangin ngaplohna, damlohna aneih aa leh a sisan sung om calcium leh phosphorus ci (Metal + Phosphoric acid) te kiam in tua in nauno ha kilamzia thanemsak tuam leh kisiasak thei hi.
(ii)           Zatui pawlkhat zatna (gtn. Tetracycline, barbiturate..cihbangte) hangin nauno kamsung leh ha kilam zia siasak thei hi. Gtn. Tetracycline acih lungnoneu thatna za in nauno ha  lim le mel te kikhel sak hi. Lungdaihna ding leh ihmuhsuah nading aa a kizang ahi barbiturates zatui namte in nauno hong suah ciangin mukkaa leh dangkaa (cleft lip and palate)piangsak thei hi.
(iii)          Kha cinglo aa nausuahna hangin nauno ha te thanemsak in ha hengbaih hi.

A suaktung naungek (neonates)
Nugil pan hong suahni pan kha 1 dong pen ‘neonates’ kici hi. Nauno kamsung etsak in. Pawlkhatte maiha tangkhat po sa in suakthei hi. Hibang aom leh patau kei in. Lemmawhna omlo leh ki liing lo cihbang ahih leh hici koih lel in. Nunawi atawp ciang ahizong a kamsung ah kipet khakna meima liamna na muhleh Ha Siavuan te kiangah lakpah in. Mukkaa leh dangkaa  cihte aom leh nauno tha om nading kinpih in la Ha siavuante kiangah lakpah in. Naupang hunlai in kibawl leh hoihpen hi.

Naungek (Infant) hun 
Hih naungek hun i cih pen nugil pan hong suahkhit zawh kha 1 -12 ciang huam hi. Hih hun ah naupangha (deciduous teeth) te po nailo hi. Hih hun sungah naungek ngaplo, cisa lua leh kamsung hani te bawk ahih kei leh san, ciltui kaikai cihte aom leh Ha siavuante tawh kilak in. Hih hun ah zong Tetracycline zatui zatloh ding thupi hi. Hih hunpen naupang hate a po ding kithawi hun leh upa hate piangding a kipat hun ahi hi. Hih zatui hangin hate angei mel hilo in a naaipaak, lingmaw mel cih bangin kikhel thei hi. Naupang i kamsung siantho nading a nu in a hahkatpih ding kisam hi. Hih hun sung in naupang maiha tang 8 ( atung anuai)te  po ding kipan ta hi. Ha po khiatna munte leh apokhia nailo hani te siangtho sakding kisam hi.A nu in a khutme ah puansia them vial in zing le nitak lupma ta ciang naupang kamsung siangthosak ding kisam hi.. Nauno in nakhat amuh peuhpeuh a kamsung tun in tawp thei, le pet leh nopsa mahmah thei hi. Tua hi aa nauno aa ding alauhuai lo atawptheih ding, a pettheih ding vante zangsak in. Khutme tawp cihte ahih leh zong pongman mah hi aa, ahih hang a goldong zongsang kha thei hi.

Naupang hun masa (Early Childhood) Kum 1-4
Hih hun pen naupang khat aa ding a thupi mahmah hun akipan ta ahi hi. Hih hun sung ah naupang haate pen pokhia mangkhinta hi. Naupang ha apo khiat khitphet naupang kamsung sianthosak ding pen thupi mahmah hi. 

Kum 2 hong phakkhit ciangin hanawtna tawi sak ta in. Ahih hangin a nu in hanawtna tawh nawt pih a,hanawt zia ahilh ding kisam lai hi. Haza ahih leh betang cia (tawmno cik) bek zangsak in.

Kum 4 cindong khutme tawp, cinpet, leiphen cihte ahihlai leh kikhel nading hanciam in. Hih te ahih hun sawt semsem leh kamsung leh ha kilamzia siasak semsem cih ahi hi. Hih hun sungah naupang kamsung siantho nading pen nu tung ah vaipuak kinga mahmah hi.

Naupang kamgei ah meima neu om kawikawi (Herpes Stomatitis), ‘thrush’ kici te lei (tongue) tung leh kamsung a munmun ah a kangmel  abembem (moniliasis) in om kawikawi thei hi. Tua hi leh amanlang pen in Ha siavuante kiangah lakpah in.

Naupang ha hoihlohna hangin upa ha te pozia leh kilamziate siatlawh thei hi. Tua hi aa neulai in melhoih napi gol ciangin haphu, ha kithuap in mel etlawmsak lo tuamthei hi.

Naupang hun lai (Middle Childhood) kum 5-10
Naupang kum 5 na ah a maihate hong ki liingta hi. Anuihciangin a ha te kihal singsong (vang singsong) in omthei hi. Hihpen angeina ahi hi. Lunghimawh huai lo hi.

Kum 6 ciangin naupang hadong nihna nungah upa hapi masa hong pokhia ta hi. Hih upa hapi masa pen upa ha ahih lam nulepa ten kithei khalo thei hi. Hih hapi masa in khaguh leh maiguh kilamna ah thupi mahmah hi. Hate zong amau munciat ah a po nading huh hi. A zenzen in heng hi ci aa na muh/theih leh Ha siavuante tawh kilakpah in. 

Kum 10 na ah neu hate beidek ta hi. Upa maihate po kim khinta hi. Hih hun ah maitang guh atunglam leh lugulh khanna pen aman ding hita hi. Khutme tawpna, khutcin petna cihbang zongsat hoihlo te ahih nawnloh nading thupi hi.

Naupang hun nunung (Adolescense) kum 11 – 17
Kum 13 kiim hong phak ciangin hadong losiah upa hate pokim khinta hi. Maitang guhte  pen upa mel hong hita hi.


Hih hun ah kamsung siantho nading thupi semsem hi. Hormorne kici pumpi sung om dat kikhelna hangin hani bawknuam, na nuam sese hi. Tua hi aa hani natna pan kidal nadingin habaal (plaque) te hani leh haphung te ah omloh ding kisam hi. Hanawtna i batlohna mun ha khat leh khat kikal te ah ha khau (dental floss) zangin kisiangsak thei hi. Zatui kihel kamkhuahnate zong kizang thei hi. A thupi penpenin naupangin kamsung sianthona a kin ding ahi hi. Ha po dan manlo, ha kithuap, ha phu in melsiasak cih bang aom leh amanlang in Ha Siavuan te tawh kilak pah in. Naupang lai in kibawl leh hoihpen hi. Kum khat (2) vei, ahih zawh keileh atawmpen khatvei Ha siavuan te kiangah kivel tangtang ding thupi hi.

Gamtat hoihlo ahi kuunza, kuunpawng, zu, za cihte in kamsung le hanatna te lim piansak mahmah hi. Nulepa in khamtheih guihtheih te hoihlohna te gending leh a zatloh nading zolbawl ding kisam hi. Naupang hun nunung leh khangno hun kipat tung dingpen na khempeuh asinnop hun, atheihnop hun uh ahi hi.

 Neuha hoih leh Upa hate zong ahoih ding ahi hi. Upa hate hoihna hangin mel etlawm sak, anhaai dan, kampau dan mansak cihbang in hoihna hong pia hi. Neuha hoih kei leh Upa ha zong hoihlo aa naupang tung ah hatawh kisai lemlohna bekthamlo lungsim gimna nangawn piabeh thei hi.

Tua hi aa neuha hoih leh naupang mailam aa ding hoih bekthamlo, akim apam aa om mite aa ding etlawm na pia in nulepa zong lungnopsak hi. Tua ahih manin nule pa in naupang neuhate ahoih nading hanciampih ding kisam hi.

Ref; 
(i)           Dental therapeutic
(ii)          “Ha henglo neuha te” laibu by     Dr Molar
(iii)         Orthodontics textbook
(iv)         Periodontology textbook
(v)          Paediatric dentistry textbook

**********************************************************

Zomi eLibrary / Laibusaal ading in CVS - M in Phalna hong Piak ahi hi.

Source :
Ciimnuai Vontawi Siamsin, Magway

10th Anniversary Magazine, 2013

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A Kidal Kholthei, Kam sung leh Ha Natna. Dr. Nang Khan Lian (B.D.S, UDM) Description: Rating: 5 Reviewed By: Cinpu Zomi
Scroll to Top