728x90 AdSpace

Hot
Menu
Zon-ol na Donate

Latest News

Eile-ei kitheihna (knowing ourselves). Agelh - T. Zokhai

Eile-ei kitheihna
(knowing ourselves)

T. Zokhai
(2015)

Thupatna
... na’ gaalte thei-a,
nangle-nang na-kitheihleh
khatbeek lelh neilo-in
kidona phual za-khat
na-zo dinghi,
(Sun Tzu).


Gaalte theihcian akisap zahkhat-in nangle-nang na-kitheihcian, keile-kei ka-kitheihcian, eile-ei I-kitheihcian nading mihing ngeina-maan khat’ ading-in naakpi-in athupi leh akisam thugui khat ahihi. Gaalte theihcianna leh eile-ei kitheihcianna athupiitzia-pen BC 500 kiim-a Seente lungngaihsiampi (Chinese philosopher) minthangpen khat ahi Sun Tzu’ gelhkhiat khenpi 13-tawh gaaldona’ ading lamzingte asuutcianna Dogaal Siamzil (The Art of War) laibu sung-ah lamdang sak-huai tak-in kisuut-hi. Tua laibu-pen 1772 kum-in French paukam-tawh kiletkhia-a, 1905 kum-in English-tawh akimciang kiletkhia-hi. 1910 ciang-in Lionel Giles-in English-tawh abuppi-in letkhiat-in hawmkhia-hi. Laigelh siampi tampi-in akhenkhen-in Sun Tzu’ thuluante letkhia uh-a, etdikna-zong tampi mah-in bawl uhhi.

Dogaal Siamzil-pen gaalpi kidona sung-a zatding siamsinna thuluan (theory) cihna hi-a, gaalte’ thahaatna, thaneemna, bang gaalvan namte nei-a, bang tepawl-ah kivakna nei, azawi-uh koilam, akibukna koilam, akidaalna-uh bang tepawl cih-a kipan kido pihding gaalte’ omzia khempeuh theihcianna-in ado ding-a akisa mite’ gualzawh nading thuguipi ahihtawh kituak-in tua gaal adoding mipawlte-in amau’ gaalvan neihzah, athahaatna, athaneemna, akimuanna-uh leh aki-muanlahna-uh, akivakna, asiamdeuhna-uh leh asiamloh deuhna-uh cihte-a kipan amau’ sungthu amau mah-in atheihcianna-pen gaalzawh nading thuguipi khat-mah ahihna guuicing tak-a suutna ahihi. Ahizong-in, hih laibuno sung-ah gaaldona-pen “Gaalvan leh thagum-a kidona ahilo, sahkhua-lungsimlamsang gaalvaái (socio- psychological warfare)”: sahkhualam lungsim-kampau-gamtat cihte khempeuh-ah zawhgawpding akisam thulehlate kahong bulphuh-hi.


Nang kua na-hihiam?
(Who are you?)


“Nang kua na-hihiam?” ahihkeileh “Kei kua ka-hihiam?” cih-pen akammal-in kitaang theih mahmah-a, athugui paizia-zong khangthak Zomi ataangpi-in athei-in I-kiseh uhhi. Kawlpau, Maangpau nangawn-tawh ciamnuih alsawhna-hiam, zukham suul-hiam cihbang-in kithaangzat mahmah-hi. Tua ahihman-in hih kammal “Nang/Kei kua na/ka-hihiam?” cihpen minam sung-ah athak hilo, thulamdang hilo, meeltheih khitsa kammal ahihi. Dawnna omzia-ah gentehna-in, “Kei-maw, Tg. Thawngzel, Pu Awnneng’ tapa, Gualnam vontawi, Zomi hi’ng-ei” cihciang dawnna-pen hih laibuno sung-a “Kua na/ka-hihiam?” cih thuluanzil dotna’ ading-in akicing dawnna hilo-hi. Atung-a dawnna tepawl-pen tong kisaang dotna leh dawnna hi-a, hih I-pulaak dotna-pen dawnding dotna ahilo, piicing lungngaihna  leh thu khingkhaina zangh-a mahni ki-etcianna/kisittelna kawk-hi.

“Nang kua na-hihiam?” cih dotna-pen hih laibuno’ deihna/ngiimna-tawh kizuui-in midang khat’ tung-ah dawnding, pulaak samsamding tepawl hilo-in, atung-a hongki pulaak khinsa, “Keimaw, .......” cihte-pen akisamlo hilo-a, ahizong-in tuate’ baan-ah, nangma’ lungsim sung-ah theihden leh phawkden ding-a akisam:

  • Na’ beh na’ phung na’ theihna-tawh kizuui-in tua beh sung-ah no innkuan’ dinmun, behlehphung thu-ah teektang-maw, khualtang-maw cih-a kipan behte’ hong etzia, muhzia, bawlzia leh nang’ kihelna, panmun laakna tanzil (level) bangciang-hiam cih na-theihtel kuul-hi.

  • Na’ beh na’ phung na’ theihna-tawh kizuui-in tua behte’ dinmun – khua sung-ah tua behte’ teektanna tanzil, khuanu khuapa upa vaaihawmna sung-ah tua behte’ kihelna tanzil, khuazaang buppi-in tua beh ahuampi-a amuhna leh abawlna tanzil: teektang ahihkeileh khualtang cihte-a kipan khuapihte’ muanna, muanlahna dinmun na-theihtel kuul-hi.
  • Na’ khua na’ tui na’ theihna-tawh kizuui-in na’ khua-pen Zogam buppi tuihual-ah bang dinmun, koici bang-a kiseh, kibawl, khuapi lungsim puakzia akizatna tanzil bangciang, Zogam huam-a sehna-ah na’ khua innlu bangzah, siamsinna saanginn leh khuapi hianglehkee (zato, sumbuuk, laibusaal, zinbuuk, huihlakkizopna, laikung laidal kicinzia, thupuak leh thuthang tuamtuamte, kimawlna tualpi leh talaap cbt) bangci dinmun-ah om, khuadangte-tawh akikimna, aniamzawkna, leh asaanzawkna bangteng mipi-in muthei, sehthei cbt.
  • Na’ khua na’ tui na’ theihna-tawh kizuui-in na’ khua a-omna mun-pen koi khuapiseh sung-ah om (Tedim, Tonzaang, Lamka, Thanlon, Singat cbt), tua na’ khua omna khuapiseh Khua-pen Zogam zil-a ateektang, abultang ahihkeileh khuata singtaang zawdeuh-a kiseh-maw cihte-a kipan khuapiseh tanzil na-theihtel kuul-hi. Tua na’ khua omna khuapiseh Khua-pen minam buppi zil-a vaaihawmna lam-ah teektangte-maw ahihkeileh khualtangte-maw cihte na’ muhna leh minam buppi’ muhnate na-theihtel kuul-hi.

Hih-pen Beh pan-a Minam gui kizopna munlehmual theihtelna hi-a, sahkhua dalkhenna (social stratification) ahihi. Sahkhua dalkhenna-pen Tumlam tualleenphung (Western society) tanzil-ah dalthum-in khen uh-a, “adal niamzaw (lower class), adal laaihawl (middle class) leh adal saangzaw (upper class) cih minvawh-in kansuutna nasiatak bawlkhin uhhi (Saunders, 1990). Sahkhualam thusinna limlim-ah sahkhua dalkhenna siamzil-pen naakpi-a athupi thugui khat ahihman-in sahkhuasiamzil (sociology) pupite’ thuluante naakpi-in kisin-a, khangthak sahkhuasiampite’ lak-ah adiak-in mipi athuzawh ahau, athahaat mipawlte’ kalsuanna anial thuluan tuamtuam aphutte’ lak-ah Christopher Doob (Doob, 2013), David Grusky (Grusky, 2011), Anthony Giddens (Giddens, 2013) cihte leitung buppi’ theih khangthak sahkhuasiampite ahi-uhhi.

Hih sahkhua dalkhenna thuluan paipi-pen atung-a hongki pulaak khinsa behlehphung, tualsung leh minam nuntaak khuasakzia-mah akibulphuh ahihman-in I’ behlehphung theihna, I’ khua I’ tui theihna, I’ kuam I’ khawk leh I’ minam theihna-pen eile-ei kitheihna thuguipite’ lak-ah gui-khat ahihi. Behlehphung, khualeh-tui, kuamlehgam leh minam theihna cihciang-in amin apuam theihna ciangbek hilo-in, na’ beh na-theihleh na’ behte’ ngeina – innsung baangkua vaaihawmzia, sunghlehpu, tuúlehmaak, teeklehmo, tanu haaitawi-a kipan tua beh sung-a akizangh paizia khempeuh theih akuul ahihi. Tuamahbang-in na’ khua-ah akizangh nuntaak khuasakzia, tawnzia, ngeina taangpi theih kuul-a, na’ kuam/khawk-ah akitaangzat ngeina tuamtuamte, na’ minam buppi-in azat ngeinate, na’ beh sung-a akizangh ngeina leh minam buppi’ zat ngeina akidanna leh akibatna bangteng, na’ minam buppi’ zat ngeina leh gambup adiak-in Kawlte ahihkeileh Vaaite’ zat ngeina-tawh akidanna leh akibatna cihte khempeuh aneng-atawng ahihloh hang-in ahoihkhomkhat theih peelmawh ding-a akisam ahihi. Pianzilmaan mihing khat’ ading-in hihte athupipen ahihpahloh hang-in athupi mahmahte’ lak-ah gui-khat ahihi. Ei’ teenna khua, ei’ veeng, ei’ kuam leh I’ gam zil-a aki-zanghtaang ngeina, gamtatluheek, zialehtongte ataangpi-a theihna-in sahkhua khangkhaanna phalammanawh khantohna’ ading mihing khat’ kisappente ahihi. Tua thu-omzia theihna-in mi-tawh kizopna-ah athupipen khat ahi gii-khunna (setting boundary) lam-ah khunsiamna, sehsiamna leh akilawmpen kizopna tawsawnna-ah naakpi-in hong zuunhoih thei-hi.

Malmatte
(References)

- Doob, C. (2013). Social Inequality and Social Stratification in US Society. New Jersey: Pearson Education Inc. ISBN: 978-0-205-79241-2.
Giddens, A. (2013). Sociology, (7th edn), Cambridge University Press.
- Grusky, D. B. (2011). "Theories of Stratification and Inequality". In Ritzer, George and J. Michael Ryan (eds.), The Concise Encyclopedia of Sociology. Wiley-Blackwell. pp. 622–624.
- Saunders, P. (1990). Social Class and Stratification. Routledge. ISBN: 978-0-415-04125-6.
- Sun Tzu translated and annotated by Giles, L. (2005). The Art of War by Sun Tzu – Special Edition. El Paso Norte Press. ISBN 0-9760726-9-6.

************************************

Lai gelh T. Zokhai in Zomi eLibrary/laibusaal ading in Phalna hong piak ngiat ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Eile-ei kitheihna (knowing ourselves). Agelh - T. Zokhai Description: Rating: 5 Reviewed By: Cinpu Zomi
Scroll to Top