728x90 AdSpace

Hot
Menu
Zon-ol na Donate

Latest News

Gammite` Nopsakna Tehna GROSS NATIONAL HAPPINESS(GNH). A gelh - Pau Sian Lian

Gammite` Nopsakna Tehna
GROSS NATIONAL HAPPINESS(GNH)
A gelh - Pau Sian Lian

United Kingdomte’ Prime Minister David Cameroon in “Gammite’ ip sungah sum a lut theih nang bang cih ding, cih ciang bek ngaihsun lo-in amau lungtang ah nuamna i puak zawh nang zong ngaihsut huai hi”, ci-in na gen ngei hi.

France te Prime Minster a sem ngei Sarkozy in zong gamkhat khantohna i teh ciang gambup sum lutna ahi GDP, GNP bekbek zat kicing lo hi. Mipite’n nuam a sa uh hiam, a lung uh a tai hiam, cihte zong kinhuai hi, na ci hi. Mipil lam pan Nobel pahtawina a ngah Joseph Stiglitz le Amartya Sen cihte pen hih gammite’ nopsakna tehna ah kihel phadiak uh hi. Sumhau mahmah gamte-in lungkham, lungzinna tam nei lua uh ahih man-in hih thu lim gen mahmah ta-uh hi.

Hih GNH thu sakhi tuinek pan pan hile hang, Bhutan gam kumpi  King Jigme Singye Wangchuch in 1972 in a patkhiat ngaihsutna ahi hi.  Ama` deihna bulpi, GNH omna a hang bulpi in gammite` nuntak nopsakna taktak(quality of life) et nang hi-in, sum-le-pai bek tawh kiteh tha- paihna kicing salo hi. Sum-le-pai khantohna le lungsim cidamna a tonkhop keileh khantohna taktak hilo hi. Mihingte` nuntakna-ah thupi pen-in hauhna hi masa lo zaw-in cidam nopsakna hi zaw hi, cih ahi hi.


Adang deihna khat-ah hih GNH pen biakna (Kha mitna) tawh zong na ki zom hi. Bhutan gam phadiak pen Buddhist gamah a khauhpai pawl hi-in, biakna mi lehang lungnopna om hi, cih zong a lahnop man ahi hi. Zogam, Zomite zong a nungta Pasian um Chrisitan i hih man-in sum-le-pai lam-ah a zawng pente i hihhang, Pasian i -upna hangin nopsak lungnopna lam i khangto cih lunglut huai kasa mahmah hi. Lem leh bang Zogam ngiatah hih thu kantelna (research) sephuai kasa hi.

GNH tehna piciang sungah a thupi pen a ki-en thu 9 om hi. Tua teng zangin gam tuamtuam kiteh thei hi. GNH a piangsak tua khuam (9) te en dih ni.

1. Lungsim Cidamna (Psychological well-being)
Nuntakna vaite khempeuh ah lungkimna, nuntak limlim nopsak na, cih hingiat mai hi. Tangpi bup-in nuamsa in a lungnop nang uh thupi ahih man-in kumpite mahmah in zong mipite` lungnop nading policy ngiat geel-in sepsak huai hi. Myanmar President U Thein Sein in zong Kineihsiam Kipawlna (Myanmar Motion) te tawh a kimuhna khat-ah, gammite`n a lungnop nang uh no zong hong hanciam un ci-in, GNH kammal na zang ngei hi.

2. Hunzatna (Time Use)
Gammite`n a hunte uh bangci zat, cih thu hi. Nikhat nai 24 sung a zat uh hunte nop a sa mah uh hiam? Lungkim mah hiam?, cihna hi-in, thu dangkhat ah ei upmawh ahi ni bup na pumsep, sem tantan cih namte hilo leuleu hi. Sumlut nading nasep hun om kul a, lungnop nading zong hun lak veve kul hi. Gentehna, movie en, la ngai, lamsiau, kimawl, tuipek cihte zong sumlut a om loh zenzen hang a manpha mahmah hunzatna hi.

3. Veng-le-Pam tawh kizop kisawhna (Community Vitality)
Inn vengte, inn nuaite cih bang, veng-le-pam tawh kizopna-ah nuam a sa mah uh hiam? A kihawh, kiho tangtang uh hiam? Patauh huaina a tam lua hiam? Khat le khat kimuanna, kimaingapna, kipahpihna cihte en-in tehna ahi hi.

4. Ngeina tuamtuamte le Kithuakzawhna (Cultural Diversity and Resilience)
Suahpih paute mah kizang tangtang lai hiam?, cih a kipan pau-le-ham, ngeina tuamtuamte kepsiamna hi-in ngeina kibang lo, pau kilamdang, zia-le-tong tuamtuam omte om khawm liailiai theihna, khat-le-khat kilamdannate kithuakzawh siamna, kitel siamnate zong ki-en hi.  

5. Cidamna (Health)
Cidamna a ki-et teh, gammi bup cidamna dinmun, cidam kikepna zia cihte a kipan, mi bangzah khut cinglo khe cinglo, pumpi cinglo om-in, mipite a pumpi thaulua (obesity) cih bang om hiam cihte nangawn zong ki-en hi.  Tua bek thamlo, HIV a kipan natna lauhuai tuamtuam tawh kisai mipite` thutheihna zong ki-en in, cina kibawlna zato phazahte zong ki-en hi.

6. Sang pilna (Education)
Mipite pilna dinmun, siamna, theihna, kivakna, picinna, gammi hoih suahnate thupi hi. Mi bangzah laivuan ong, degree ngah cih ciang bek hilo-in, a sinsa lai-le-thute a zang thei kik takpi mah uh hiam? A kinuntak pih hiam? Tangpi ading phattuamna om hiam?, cihte ki-en hi.

7. Kim-le-Pam kepcingna le Nuntakkhopna (Ecological Diversity and Resilience)
Gamsung singkung lopa kepna, gamsa–le-ganhingte kepnate etcianna hi-in, tua singkung lopa kepna hangin khuahun hoihnate ki-en hi.

8. Nuntak Khuasakna Dinmun (Living Standard)
Nuntak khuasak na dinmun et teh, sum lut kicing tak-in neihna zong kihel pah hi. Mi khat-ai sumlut, innkuan khat-ai sumlut kicinnate le adang kisam thupi ahi omna inn-le-lo neihna, neek-le-dawn patauh lohna cihte a kipan, pawi tuamtuam kibawl teh kihel zo hiam?, puansilh nikten kisap teh leizo hiam? Inn kisia leh puakzo hiam?, cihte ki-en hi.

9. Ki-ukna Hoih (Good Governance)
Ki-ukna hoih etna ah kumpite` ukdan mipite` muhna kisitna hi-in, ukdan siamna, deihsakna, bun tak-in septheihna, kineih khemna omlo muanhuainate thupi mahmah hi. Tua bek thamlo, mihingte thu neihtheihna (human rights) om mah hiam?, ki-ukna ah a dawldawl a om uliante makaih siam mah hiam? Thusit zumte a thuman mah hiam? Gamtatsiatna (corruption) a uanglua hiam? Mipite kitangsap bulpite a kipia hiam?, cihte ki-en hi.


Reference:
Ura,K. (2008). Gross national happiness.
http://grossnationalhappiness.com/gnhindex/ intruductiionGNH.aspx
http://www.grossnationalhappiness.com/9-domains/psychological-well-being/
*****************************
Lai gelh pa Pau Sian Lian in Zomi eLibrary / Laibusaal ading in phalna hong piak ngiat ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Gammite` Nopsakna Tehna GROSS NATIONAL HAPPINESS(GNH). A gelh - Pau Sian Lian Description: Rating: 5 Reviewed By: Cinpu Zomi
Scroll to Top