728x90 AdSpace

Hot
Menu
Zon-ol na Donate

Latest News

Ka Nu (Notes on My Mother) Tg. Tung Za Pau

Ka Nu (Notes on My Mother)
Tg. Tung Za Pau

1. Gam 10 pan -a doctoral sang naupangte, sianu in thu khat dong hi. Pasian’ naseem na suah theih na’ng, kua in hong phungvuh (invest/influence) peen hiam? A dawn’nate uh khat bek ahihna a theih ciang, sianu in lamdang sa hi. “Tua bang ahih mawk leh kei pen ka tanu’ aading Nu Hoih ka hih nai lohna kiphawk ing. Ka tanu tawh ka kikholh hun tawm lua hi,” ci-hi.

2. Pasian’ itna thuk a kigen ciang in, “Nawi teep lai naungek, a Nu in manggilh thei ding hiam?” kici hi. Nau in nawi teep leh a Nu in nawi cancer ngah thei lo hi. Ta ngek’ aading Nu’ nawi mah zatui hoih (an lim) peen ahi hi. Ka Nu’ nawi ka kham-a, ka Nu’ ang-a ihmut mah nuam ka sa peen hi. Ka Nu in hong puain luai ah hong sial hi. Ka thawk ciang hong no-no in, a kam hai zan sa an hong muam hi. A nung-ah hong pua-in, hong laampih hi. Sun kaal zan kaal-in ka kiang-ah om den hi. Ka pian’ zia ding, ka neu-a kipan-in mu khol hi.

3. Africa gam-taak lak-ah nawi-ne lai naungek khat kikoih hi. Gamsate’ neek theih loh na’ng kikulh hi. A neek a dawn ding an leh tui kipia hi. Mi peuhmah kimusak lo hi. Kum sagih a phak ciang-in tua pa, pau thei lo-in ganhing bang-in om milmel lel hi. Nu leh Pa-te in kampau ding hong hilh-a, siate in nun’taak zia ding hong hilh hi. Nute in hong keem kei leh tu ni-in mihing suak lo-in, ganhing kihi lai ding hi. Paunak khat-ah naupang khat mi a suah na’ng khua zang bup pan’pih na kisam hi, ci-hi.

4. Lam pai kawm-in suang peuh sui kha le’ng, nasia leh “Ka pa” kici lo-in, “Na ei, Nu,” kici hi. Gilna sa-in tau le’ng, “Nu” mah kilo hi. Dam mawh-in lup mun tung-ah luilui le’ng “Na ei, Nu,” kici hi. Thu khat peuh i phawk ciang “Ka Nu om leh ut si ing e,” kici hi. Bang hangin Nu...Nu...Nu... ki lo hiam? 

5. Ka Nute unau giat pha-in, ka Nu, khualzin hat peen hi. Ka Nu in mi’ gam mi’ lei pha ahih manin, kampau zia, niik teen’ puansilh zia, zindo zia, tate kep zia siam phadiak hi. Muhna zai-in, thu khualna taanzaau hi. Ka Pa in a sungh teng leh a nuphal teng, Mualnuam pan Kawl zang tun’pih hi. Sa a gawh loh kuamah om lo hi. Neu lai-in pate in gan go leh kinuam peuhmah hi. Ak bang a kigawh ciang kilawp mahmah-in ka laamlaam mai hi. Kizawng lua ahih manin sameh kine mun lo hi. Sa kham niin mang hoih ka man zeel hi.

6. Ka Nu in lungsim siangtho nei-a, kampau sawi ngei lo hi. Thu dik gen, nuam sa-in, thu maan mah za nuam hi. Pasian itna leh maaisakna telcian ahih manin mite hehpih den hi. Pawlpi sungah kum tampi makai-in om-a, a tavuan zo den hi. Nu leh pate in Pasian’ thu tawh hong vaak-in biakinn lampi ngil hong totpih ahih manin tu ni dong-in tua lampi mah ka nun’taakna phung ahi hi. Biakna leh piakna kizom hi. Kutkai (Shan gam) ka om lai-un, ka Pa’ zato lup na’ng, ka Nu in sum leitawi ngah zo lo hi. Mite in “Tua na pa uh, a si ding peuh, bang sum leitawi zongzong na hiam?” cih san uh. Tg. Vung Nang in, a sum Ks. 600.00 (zaguk) zangsak hi. Pa Nang-te pension-a hong ciah ciang, ka Nu in sa gawh-a, bawng - la khat pia hi. Meeltheihte in ka nu mawhsak uh hi. Ka Nu in, “Hun khat lai-in mi si ding kimlai nun’taakna hong guan-te innkuan tungah ka lungdamna manggilh thei ding ka hi hiam?” ci-in dawng hi. Pastor-pa zingsang khat, inn thungetna nei hi. Ka Nu in, “Siapa, n’ong hawh theih kituak lian ei. Ka vokpi suak-in 9 pha hi. Na deih bel peen khat teel in” ci-hi. Siapa in sakhi vok mah teel pah hi. Ka Nu,  piakkhiatna ah cingh mahmah hi. Seh suah maanmaan pia hi. 

7. Zingsang tho baih-in thunget hun nuam khat a khit ciang bawinawi suuk-in, an huan kawm hi. A tate, a tute a thawh uh ciang an min sa-in om hi. Zing tho baihte nasep telh hi. Ozone dat lei pan pi 3 na-ah om ahih manin zatui a diik diik tawh kibang hi. Khua a vaak ciang ozone pen lei tawh kinai om nawn lo hi. Zing tho baihte cidam-in, a cidamte zing tho baih uh hi. 

8. Khuapihte, meeltheihte a dam loh uh ciangin nat veh-in pai den hi. An duh gil kialte an leh tui pia hi. Puan silk kisamte guan hi. A tate tute’ sang vai geelpih hi. Sang kah nai lo teng a pi uh tawh inn-ah ciak ngeeingaai uh hi. A pi inn-ah om kei leh kuamah kimu zo lo hi. Ka neu lai ka Nu’ zu-ning bawl a lim dan, tu dong ka phawk lai hi. Zu ning man tawh inn mun lei zo hi. 

9. 1965 kumin Tahan-ah pawl lut-in tuiphumna nei uh hi. Kum nih sung ka kikhawm uh hi. Ka Pa in zingsang innkuan kikhop hong patpih hi. Nu leh Pa-te’ thunget hat dan lamdang ka sa hi. A gingkhia-in thu ngen den uh hi. Ka Nu’ deih phat diak kammal khat om hi. “A tawn tung” cih hi. Tua pen Pasian’ attribute khat ahi hi. Pasian’ hihna nam khat hi. Mt. 1:21sung-a Emmanuel cih tawh kibang hi. Mt. 28:20-ah Topa Jesuh in “Leitung a bei dongin note tawh ka om tawntung ding hi,” a cihna zong hi pah hi. Pasian’ itna kisam tawntung hi. Mawhmaisakna nisim-in kisam tawntung hi. Kha Siangtho’ kepna leh lamlahna nisim-in kisam tawntung hi. Ka Nu’ thungetna ka muang mahmah hi. College ka kah ciang zong ka lai huan ding time-table ka khaak zeel-a, thungetna-ah hong phawk hi. College kum-in distiction 4 ka ngah hi. American scientist-te in sang naupang kum 11 kiim mi 400 research bawl uh-a, thungente’ tate, sang-ah mark hoih ngah zaw cih mu hi. Huan ankung e thu ngetsak le’ng gah siam zaw deuh hi. Ka Nu’ zia zui-in ko innkuan zong tate’ a ding thunget na zang thei ung.

10. Ka Pa lo giak-in, inn pan ka Nu kuan hi. Ko unau teng sang kah. Inn tawh kilh den hi. Sang khak peuh leh lo-ah na ka seem uh hi. Ka Nu in “Na Pa gim a hih ciang, sa meh leisak kul -a, ei inn-a-te bel anteh meh huan ni,” ci thei zeel hi. Sa ka puak ni, khat vei, ka Pa in “Inn-ah sa na ne uh hiam?” ci-in hong dong hi. Tua ni-in sa a lang inn-ah hong puasak kik hi. Nu leh Pa-te kitheih zia leh tate hong khualna lamdang ka sa hi. Nu leh Pa-te in a duh uh ne ngam lo liangin tate sang hong kahsak lam ka thei hi.

11. Ka tan sagih kum-in typhoid natna vei-in kha khat sung zato ka lum hi. Ci sa lua ahih manin zan nih khua phawk lo-in ka om hi. Khua ka phawk ciang ka Nu’ ang-ah ka om lam ka thei hi. Dam tak-in a khut heem khialkhial-a lui gei khat-ah ding-in lam sak lam khang ka en kawi kawi hi. Ka lung leeng mahmah hi. Ka nung pan ka Pa in aw neem tawh hong hopih hi. “Tu-a i omna koi lai hiam? ci-in ka Pa ka dong hi. Lo khawh kin mahmah laitak-in zato-ah kitawlnga pikpek hi. Nu leh Pa-te geel in zato-ah hong kepna in itna lian hong phawksak-a, ka nun’taakna-ah mualsuang khat-in po hi.

12. Khat vei, ka Nu in Tahan Bazaar-ah vai zuak-a hong sawl hi. Seeng bing dim pen pek thum-a hong zuaksak hi. Khua vak ma-in nupi khat in pek nih leh hamu-a deih hi. Pek thum ka ci teta hi. Khua hong vak ciang kuamah in hong dawp nawn lo uh hi. Ka vai khawngh zo lo ka hih manin inn kiu khat-ah ka bua-a, khut hawm sum hawm-in inn ka ciah hi. Thu piangte ka gen leh tua ni-a kipan vai hong zuaksak nawn lo hi. Ka maizum lam thei ahih manin hong hah sawl nawn lo hi. Tu bang-a ka nuta-un ka gen uh ciang nuih suak mahmah hi ung. 

13. Ka Nu pen a ci ngo, a tha dim, pi nga leh let mat nih sang-a, 150 lb gik hi. Tha hoih-a, tha dim den hi. Ka Pa’ hong nusiat laitakin ka Nu kum 35 bek pha hi. Meigong nih leh thum, inn-ah hong hawh thei uh hi. “Pasian aw, ka Nu in pasal nei kik mawk leh, ko unau bang cih mawk ding?” ka ci hi. Innkuan ka neih khit ciang khat vei ka Nu ka dot leh “Sawm kei bilbel ing” ci hi. Ka Nu in a tate hong it luat man-a, pasal nei kik lo ahih lam America-a mite’ om dan ka muh ciang ka thei saan hi.

14. Ka tan sawm kiat kum-in ka Nu zato-ah ka puak uh hi. Numei kepna-ah kei’n ka keem hi. “Pasian aw, ka Pa om nawn lo-in, ka Nu si mawk leh, ko unau bang cih ding?” ka ci leeuleeu hi. Ka Nu a dam ciang Munlai pan Kalemyo dong tai 4 bang pen khe tawh ngiat kum khat sung sang ka kah hi. Tua kum tan sawm ka on’ (aun’) ciang ka nuamna khauhpai mahmah hi.

15. Tedim sangpi-ah tan sawm ka kah kum-in nungak meel hoih khat ka mu hi. Pasian kiang ah ka zi ding in thu ka ngen hi. Ngai mahmah napi ing in, bangmah ka pulaak ngam kei hi. Ka nun’takna uh kikhaai lua ka sa hi. 1985 kum-in Bangalore-ah India Campus Crusade-ah trainning kah kawm leh na seem kawm-in ka om hi. Ka omna peuhpeuh-ah Zomite omna a kan den ka hih manin, khua sung-a sang teng ka baan hawh thei hi. Ni khat BBBC sport ni-in ka hawh leh ka lawm ngaih nu ka mu hi. Tui vot hai nih hong suah hi. Tedim sang ka kah ngei lam ka gen hi. Tua pan ka thunget hong tangtun’ na’ng ka hanciam leeuleeu hi. Thum vei bang a tuam-in an neek khopna ka nei hi. Sum nei lo zeel ka hih manin ka puan hoih peen ka pong (paung) hi. Sang a man ciang inn lam-ah hong ngak hi. Pune-ah B.D. kum khatna December sang khak sung-in inn ka ciah hi. 

16. Ka Nu kiang-ah zi hong pisak na’ng ka gen hi. “Zi na deih leh Tahan-a na Pu’ tanu teen’pih in,” hong ci hi. Tua ban-ah, “Vuandok, Mangpi-te’ inn-ah mo dong dingin kilawm lo hi hang. A tha ang mahmah uh zahtaak huai khin hi. Ei pen tagah khat hi lel hang,” ci hi. Ka Nu kiang-ah, “Kumpipa’ tanu zong a teen’pih ngam hi ing,” ka ci hi. Amah’n bel, “Hoih teei leh,’ hong cihsan hi. Ni thum sung khauhual kisutna ka nei hi. Zingsang khat ka Nu kiang-ah mo dot kul nawn lo hi. “Ka taaipih ding hi,” ka ci hi. Hong dawng vet lo hi. Zingsang ka thawh ma-in, meltheih honkhat tawh Tedim pai uh hi. Hong it luat manin ka khan sung-ah ka it peenpeen tawh ka teen’ theih na’ng, maizum ngam lo-in zi hong pisak hi. Ka zi leh ka tate geel ka Nu in it mahmah hi. Zomi Theological College-ah ka sep sungin ka Nu hong hawh thei zeel-in ka tate in, “Pi aw, ka pa’ neu lai thu, hong gen in,” ci-in tangthu dan-in gen thei zeel uh hi. A tapa hong it luat man-in a tute geel bang lim it phadiak hi. Ka zi in zong pian’na nu zah-in zeem zo, huai zo-in it den hi.

17. Ka Nu kiang-ah “Zingsang thawh pan zan dong, na na sep gim lo maw?” ka ci hi. “Ka tate’ aading hi peuh leh ka gim thei kei hi,” ciin hong dawng hi. Ka neu lai-in ka Nu a pil loa ka ngaihsut pen ka kum ham ciang, ka Nu pil lam ka thei pan hi. Kei’ aading-in pilna cih pen itna sung pan hong phulkhia hi lo hiam?

18. Khat veivei antang bung sung-ah buhtang mal khat zong a om loh lam om hi. Ka Nu in Munlai-a meeltheihte lak-ah buh huum taangh nih cih bang leitawi-in an ka su thei uh hi. Sum leitawi, an leitawi cih bel nei mun pian ung. Ahih hang kipuksi sam lo hi.

19. Neu lai-in an neek sang-in, bawlung suih ka kin zaw hi. An neek hun leh ka Nu in khua zang zaak-a hong sam au-au zeel hi. Kimawl leng lah nuam saan ka hih manin inn ki uan pah thei lo hi. A kimawl kimlai besan lei-a hong sawl hi. Ka lungsim-ah kimawl ding bek om hi. Besan lei ding-a pek nga lai dal khat tawi-a ka tai vingveng hi. Sai-ah tawi khai khin-in ka sum piak ding ciang ka khut sungah ka sum na om lo mawk hi. Lam gei khat-ah paai kha hi leng kilawm. Be lo sum lo tawh thung-ip hawm tawh inn ka ciah hi.

20. Nute tung bangci-in lungdam ko thei ding hiam? Bang hun-a koh ding hoih hiam? A kisap nate a manlang peen-a huh hoih hi. Nisim-a hopih thei, a hawh theite hampha uh hi. An duh gil kial-a om lo-in, kam nuam lo i pau khak loh ding kisam hi. Kumpi Nu bangin itna, zahtaakna, thupi bawlna leh thupha khat teeiteri lah den ding hoih peenpeen hi. Ha-ni kawm-a nawizu bang zah thu pha zong khang khat-a kiloh zo lo, ci-uh hi.

21. “Na Nu kua hiam?” hong kici leh laigual khat tawh ka dawng nuam hi. “Ka Nu pen neih sa kep siam mi (good stewardship) a hi hi.”. A pasal keem siam-in, tate tute keem siam-a, a neihsate zeek siam hi. Pasian’ gam leh unaute’ aading hawm diamdiam thei hi. Hun zat dan, sum zat dan, nate zat dan leh itna zat dan siam ka sa hi. Pasian’ mi zat mi muan’ huai ka suah theih na’ng Nu hoih hong pia Tung Sian Mang’ min sial bang lo ing e. Tu dong hong dampih lai hi. Ka Nu ka itna ka gengen leh ama’ hong itna thu vive hi zaw e. Ka omna mun Dayton, Ohio hong tung baih ding cih zong ka thungetna ahi hi. Ka laikung tawh ka Nu ka itna ka gelh hi. Nu aw, kong ngai lua hi! Cik ciang kimu thei ding hiam? Nute itna, lai tawh ki gelh kim zo lo hi.

Ka lungdam hi.
Tung Za Pau

Source :
[Hih lai, 06 AUG 05 SAT ni-in, kingah hi.]

Page  165  of  200
Vahui Magazine 2006

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Ka Nu (Notes on My Mother) Tg. Tung Za Pau Description: Rating: 5 Reviewed By: Cinpu Zomi
Scroll to Top