728x90 AdSpace

Hot
Menu
Zon-ol na Donate

Latest News

KHANGNO LEH POLITICS. Joshua Thang, Th. M

KHANGNO LEH POLITICS
Joshua Thang, Th. M

Thumasa: 
"Khangno & Politics" gelhthei, simthei dingin hunpha hong pia Topa tungah lungdam hang. 2015 March 5 Thurday 10:40AM in numbat thak 09796137275 in hong call a, Zingsol Magazinepan Peter En Lam Sum hi-ing ei, Tedim Post ah Zomi & Zogam a'ding Sunmang na laigelh nasim ung. Zingsol ah zong Khangno & Politics nong gelh thei diam hong ci a, e-mail tawh khak di'n hong gen bangun lungdam takin kong gelhsukpah ahihi.

I. KHANGNO: 
Khangno icih kuate hiam? Kum 10-18, 10-25; 10-35, 12-25; 12-18, 12-35, 12-45, kum sawmguk nuai khangno lungsim aneilaite, a ngaihsut bangbang a sepngam hun ci-in dawnna kibanglo tuamtuam om hi. Kum 18 nuaisiah khempeuh a huam Child Rights thukhunte No.1-pan-42, theih masak huai thukin om hi. Human Rights: HR omleuleu a, numei sungpan a suak khempeuh liangko kikim sehtan thukhun kaci mai hi. Political viewpoints tawh ki-enkik leng democracy iciapkhak zandeuh mah ahihmanin Zogam pen khangno dinmun, naupang leh nawn nelai dinmun tampi aki-helhzau ihihmanin mailam hun ding, thungenkawm in step mantak kalsuan thei peuh leng khantoh lam manawh ding hang a, a lam-ethuai maban limci tampi nei ihihmanin thalawphuai mahmah mawk hi. Pilsinna lamah specialize deuh hong nei un la, ih kisap diakpawl: Information, Law, Political Science, Computer Science, Setzung nei cihkhawng tawh hong palhkhia ve un. Gam-le-nam khantohna ding thuneihna a deih khangnote aw, "tuhun in limtak Sangkah hanciam masa un".

II. POLITICS: 
Politics icih bang hiam? Leitung ah gamkhen a tuamtuam politics kibanglo tampi tak om a, amau' gam tawh kituak dingin thukhun neiciat uhi. Democracy veve sungah Myanma Democracy omlai hi. Myanmar Constitution 2008 Chapter 15 apha thukhunte bangzah vei sim ngei ihia?  Bylaw & Constitution gelhsa tawh hong ki-uksuk ziau hi-a, deih ta leng, deih takeileng zuihloh phamawh hi. ‘Government Work is God's Work' cih paunak om hi. Ukna, thuneihna pen Pasian phalna omlo-in kiplo hi. Gam-le-nam puah nuam, khangto saknuam khangthakte aw, thuneihna limci na deih uh leh Pasian zahtakin, kipumkhatna ding hanciamna maban thupi in nei unla, Party Politics zong na siam nadingun hanciam un. Gam-le-nam huutzawhna dingin politics, politicians & political roadmap siamna kisampha hi hang. Pinlong thukimna bangin a kipaikik mateng peuhmah Zogam leh Zomi adingin Politics kisamdiak hi hang. Biakna lamteng pen 1910 pan J.H. Cope hong puak Vantung Gam Politics tawh na kilomzial niloh lai nung. Nai-ngan-zi kici Party Politics sungah vote khiatheilo ding pawl hong kicih sam hang' Nai-nganh-azi sungah kuamah kipengthei tuanlo, avot-asa thuakkhawm ding ihihmanin Politics kici pen mikim a'ding mah ahi hi.

III. KHANGNO LEH POLITICS STEPS:
A. Tui malte kigawmgawmin Tuipi piang: 
Mal khatkhatin a kia seuhseuh guahtuite hong kigawm gawm ciangin hawktui leh luituite hong suak a, tua tuite kigawmin lui neu pan lui lian suaksuk uhi.  Tua- bangin tui tuamtuam gunpi ah kituahin tuikhang kici a, tampi pha in thahat a, tua guntuite kigawmgawm in atawpna ah Tuipi suak hi.  Sanggamte aw, tuni ih nasep neucikte hong kitheihloh hang, a thupi vive ahihi. Banghang hiam cih leh tuabangte tampi hong kigawm ciangbekin a kikhangto thei ding cih phawk gige ni. Gam-le-nam khantohna ding ahihnakleh ih sepnate a neu, a lian ki deidanlo-in hanciam takin semciat leng, sepkhop dan siam ding kisin ciatin Gam-le-nam khantohna ding ahihleh mapangkhawm thei leng, Pasian' thupha sangthei baih ding hang a, Kumpi thupha ahi, gam sung budget tampi tak ngahin ih kipaak ding hi. Tuipi lian mahmah a pianna thusim pen tuimal neucikte kigawmna pan kipan hi-a, hamphatna lianpi ngahna dingin a neu pen khat hitaleh, meigong tagah, daipaamte khat peuh mapanna dongin a thupi vive ahi hi.

B.  Thumanna & Cihtakna: 
Hih pen a thupi mahmah dinmun hita a, Integrity Steps ka cimai hi. OT sung enkik leng, gam sungah David pen taisuk, taito-in a buk kawikawi hunlai mahin Pasian tung, a minam tung, Pasian nasemte tung ah khialkhalo ahihmanin a tawpna ah Pasian' geelna hun atundongin lampiallo-in "Thumanna leh Cihtakna leenkip tinten mawk ahihmanin Kumpipa dingin Sathau kinilh" ta hi. Tuailaite aw, Pasian in nangma tungah Kumpi Lukhu hong khuksaktheihna dingin na Lungsim ngaihsutnate limtak keem inla, David bangin khialhkhaklohna dingin Thumanna leh Cihtakna leenkip tinten zawdih in. Kumpi lukhu thupi khuktheihna ding pen pil vengvangna bek tawh kingah hilo, bucing kikepna kisam hi. Nang pen bang sathau hong kinilh hiam?  Ih Zogam khang tangthu a kikheel ding na ut uhiam? Bangci gelhsawm i hiam? Na teeltheilai uhi. Tuanpupate bangin Thumanna leh Cihtakna letkip  ih  sawm uhiam?

C.  Suangpi Suangneu in thek: 
Political point of view bek hilo-in ih Leitung nuntakna enkikciat- leng, "Suangpi Suangneu in thek" cih paunak a om mahbangin ih kithek ciat man bek mahin mimal kikip, Innkuan kip kisuakthei; U-le-nau sung kip, Nupa kaal sung kip; Lawm-le-gual kikaal leh veng sung kipthei ahihmanin khuakip leh gamkip akisuakthei ciat bek mah ahihi. Kuamah eimau' aa'ding bekin kinungtalo hi.


IV. KHANGNO LEH POLITICS A KHANGSAKTHEI LEH AKIAMSAKTHEITE

A.  Thangho leh Liando in zong Tangtang phel hawm: 
Zomite pen a ki-it diak, nek-le-dawn limci khat peuh neileng a nekhawm, a dawnkhawm diamdiam minam ihihi. Ei khangthak hun ah zong thuhoih thuphate phelhawm diamdiam ding hi-a, lawhcinna khat peuh ih ngahzawhna dingin a kipancilte panpih siam ding leh ih mai aa paisate upat bawlin thudot siam kisin ding ahihi. Ka lungnoplohna khat in tuhun khangno pawlkhat pen guihtheih khamtheih phelhawm diamdiam in siatna lamah kikhaamlo-in thakipia zawsop uhi. U Thawn Kham lasak bangin khangthakte aw, Itna ih phelhawm ding hi-a, guihtheih kham- theih pen phelhawmloh ding pawl ahihi. Zogam sungah zu a zatsiam Innkuante cihbang na mungei uhiam? A nungta Pasian abialo, pil-le-liat a thuah lakah zu genloh za zong a teplo namdangte mipil tampi om uhi. Hih lai kagelh sungin South India ah ka khualzinlai aa Ansai khat ah North East tangvalte ka phawkvat hi. Kha khat sung a nasep thaman dingun a Boss pa un Rs.4500 + tips 500 = Rs.5000 ciat hong piazel ci uhi. Ahizongin Kha $um saan ciangin "Tagah nawimuh" paunak tangtung sakzel ahihmanun a khasum saan uh beikham thei ci uhi. Boss pa in a theih ciangin lamdang hong sa mahmah cilel uhi. Banghang hiam cihleh a Boss pa un tuabang Ansai pen 5 bang nei a, nitak khat a sumlut Rs.100,000 val phaden hi mahlehzong zudawnlo, zateplo ahihbanah a summeet teng pen Bank tuamtuam ah khol den ahihna thusim genkhia hi. Boss pa bangin khantohna di'n sum-le-pai phelhawm leng, khamtheih leina di'n sumte phelkham kei leng! Ih Zogam a khantohna dingin phelhawm ding pawl leh phelhawmloh ding pawl tampi hong omlai ding hi.

B.  Makaih siamna leh Makaite nungzuih siamna: 
Mi pawlkhat pen ama' makaihna ahihkeinakleh midangte nasepna ah a hoihna, a lawhcinnate thusimsaklo sese om dihzen hi. Tuni tuabang dan lungsim aneite-in hunlapin kipuahphat sawm le-uh meetzaw hamtang ding uhi. Makaih siamna pen mikim hihthei- hloh hamphatna khat cileng kikhiallo ding hi. Nungzuih siamna bilbel pen mikim hihtheih hamphatna khat ahihmanin khantohna ding ahihnakleh ih thukituahpihloh khat in makai a sem zongin langpan sawmloh phot ding ahihi. Tuabang hun ah nang-le-nang pen na mihing hihna taktak hong theisak ding na sungtawng mi omzia na hihna na teltheih hun cileng zong kikhiallo ding hi. Hun khatlai-in na neumuh mahmah khat in makai hong sep hun ciangin muanlohna hang maw, thusimlohna hang maw, … bang khat peuh hangmaw, Muanzawh nailohna na neikha phial zongin ama' thanemna ding lampang ah dingse ke'n. Na panpih zawh kei ding leh gensia ke'n. Simmawhna kammalte kidop ding ahihi. Paunak khat ah Lui sing a pak hun a om mahbangin Mual sing a pak hun om, kici hi. Gam-le-nam a'dingin nasep hahkat khat peuh hong om ciang, ih Party akibatlohna hanglel-in amau' makaihnate pawl bel tuaci, tuaci, … tuate khawng cihbang mipite' zak di'n gensiatna kammal kidop ciat ding hi-a, makai picingte kidawm ciat uhi. Khantoh manawhnuamte a'dingin a thupi mahmah khat in makaihsiamna leh ih makaite nung vazuihsiamna a tonkhawm den ahi hi.

C.  Meimaponte kheuhkiklo-in Khuaizu/Sathau namtui nuhna: 
Khangno/Pasal cidam khempeuh in meimapon a nei ngei ciat ding uhi. Mihing a thanuamte amah-le-amah a kiliamsuah zong tawmlo uhi. Liamma khat peuh ah sisan a tawm atam phulkhia a, tuakhitciangin a satakin a khannelh hangin a ngei abat- kik mateng pen meimapon suakthei hi. Tua mun kikheuhkik leh sisan suakin meimapon pan meima suak a, meima a naisuah dong kizom thei hi. Tuabang a pianlohna dingin zatui, zatang tawh kibawl kul a, siangtho sakin zatui kinuh leh dambaih thei hi. Gamlak ganhingte cithakpi pehna hang hiam, sa pehna hang khatpeuh hiam a meimaponte uh thaksa-in khuatkhuat ahihmanun a tawpna ah gulut, natsuakin zawngkhal thei a, a sihlawh bang omthei hi. Abeisa hunlai ih thuakna meimaponte satakin meima akhannelh bangin khannelh saklel ding ahihi. Tua ih meimaponte kheuh kikkik selo-in a damsiangbaihtheihna di'n zatui, zaha, sathau, khuaizu cihte kinuh leng a ngeina bangkik thei hi. Gentehna khat: Nungak tan-gai meima bang hizenzen leh a meimaponte a damciang, etlawm kisa, skirt teengkik ngam in lawm-le-gual lakah nuamsa thei ding ahihi. Gam-le-nam khantoh ding ih deihtakpi leh a beisa hun aa meimaponte kheuhkikkiklo-in mawh kimaisakna tawh mainawt ding hi. Tuabangin a kalsuantheite mailam hun pen a taangpha, tung sunni bang ahi ding uhi.

Thukhupna: 
Leitung-le-Vantung thu a kantelte-in muhkhiat kibang khat nei uh-a, tua in Lei-le-Van pen tupna kician tawh kilamkhawm cih mukhia uhi. Khangthakte aw, Pasian' Gam a'dingin nasemte hitaleng, Leitung Politics ah na ih sem zong, bangbang bawl taleng Pasian in ih mailam ah geelna hoih a nei hi. Mailam hun a'ding ngiimna, tupna kician nei-in mainawt suakzawhna ding thungetna tawh ki-ap ding ahihi. Pasian tawh zingvai a hawmkhawm maban khatpeuhah gualzawh matutna om tawntung a, tua tawhtang pen Pasian' piak ahihmahbangin ngiimna-le-tupna kician tak tawh a kalsuanpihzote hangin mitampi a'dingin hamphatna, nopsakna, lungmuanna ngahlawhin Pasian' min leh a minam min a thangsakzo suak ding uhi. Election hongnai semsem a, "Khangno & Politics" muhdan mantak tawh a kalsuanthei Khangthak hun Gam-le-nam' lam-etna Zingsol hongsuah khitciangin tua Zing Nisuak thak tawh ih lungdamkhawm ding hi.

Source : 
Posted 25th February by ZOMI RESEARCH

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHANGNO LEH POLITICS. Joshua Thang, Th. M Description: Rating: 5 Reviewed By: Cinpu Zomi
Scroll to Top