728x90 AdSpace

Hot
Menu
Zon-ol na Donate

Latest News

Kimlepam Lainatna Thu (Ecology & Environment Concern). Agelh - Dr. Do Sian Thang

Kimlepam Lainatna Thu
Ecology & Environment Concern
Agelh - Dr. Do Sian Thang

Ecology: singkung,ganhing leh mihingte in Pasian’ inn vannuai leitung tengah akizop dimdiamna thu; the relation of plants and licing creatures to each other and to their environment.

Environment: mihing,ganhing leh singkung lopate a kizom dimdiamsak huih,tui,leitang a kipan, kimlepam thu; the natural world in which people,animals and plants live.

Eite in, ih zawl ahi, ihkim ihpam ih lainatna thu concern: ihlawm’tungah ih thumaan a kulna thu,lotheilo ahihna thu,khenthum suah in ihgen dinghi.

NB
Na sanglen sawmle saupi taiphot in:
One who would leap high must take a long run. Danish Proverb
1.    Lai Siangtho in hongsawlhi.
2.    Leitung mite’ kisap bulpi ahi hi.
3.    Zomite’ mawhpuak ahi hi.


Khatna: Lai Siangtho in hongsawl hi.
            Pasian in abawlsate khempeuh en a, hoihsa mahmah hi. Pian 1:31

            Khat veve hih bangin ihci theizel hi: Nikhat pan-in ni-nga dong kimlepam khatkhit khat a bawlzawh ciang-in hoih ci napi’n ni-guk ni mihing a bawlkhit ciang bek in hoih mahmah,ci hi. A taktakin cileng: mihing abawlkhit ciangin hoih cihna snagin a bawlsate khempeuh en-in hoihsa mahmah hi, cihna hizaw hi.

Zosuante in: mualkhawl masa teektang, ci uhhi. Lai Siangtho bang-in ihcih le, mihing sang in kimlepam zaw-in mualkhawl masa ahih man-in a teektang ding ahi hi. Kimlepam in mihing kullo-in amah le amah nungta theihi; mihing ahih leh kimlepam lo-in amah le amah nungta theilo hi; tua man-in a nunung bel-in akibawl hiding hi. Kimlepam tungah aki nga mihing te-in aki ngakna kimlepam kepding,puahding,zunding hi-a tua in ama’ mawhpuak mission ahi hi.

            Kimlepam a kemcing ding-in, Lai Siangtho in hongsawl hi.

            Topa Pasian in mipa la-in, Eden huan kho-in akem dingin akoih hi.Pian 2:15,

            Kimlepam kho-in akem dingin, Topa Pasian in,hongsawl hi, ut tulo thu ahi keihi.

            Topa Pasian in mipa thupia a, na utut in huansung singkung gah khenpeuh nane theiding hi. Ahih hangin apha le asia theihna singkung gah pen na ne keiding hi. Banghang hiam cihleh tua na nek ni-in nasi ding hi, aci hi.Pian 2:16,17

            Kimlepam tawh kizopna thu ah, puahding om aa pelhding zong a omhi.

            Anek khit phetun amau tegel in  khua phawk uh a, aguak tang in aomlam uh kithei uhhi. Amau te in thei tehte khui tuahin puansilh ding-in abawl uhhi.Pian 3.7

            A keploh kimlepam in amau lehkepkik bilbel zaw hi.

            Nekloh ding singgah nekna in kimlepam keplahna hi a,tua-in amau’ mawhna ahihi. Ei e leh? Amau’ hang-in,ahih keileh zong,amau bangin ihmawh hi. Khristian te-in kha khanlawhna thu ah Adam hang-in mimawh hihang, ci’n kinak hilh mahmah uhhi.Tuapen tunsa envelope  in kikemden hi; kihongkhia de-envelope kha-lo ahih man-in midik tampi a-nin kimlepam sungah ki gamtang den hi.

            Misiangtho kimkhatte’ tatna hangin kimlepam nin/sia hi:sing motpuakna,gam mot hawlna,nin-buak motpaihna le mot halna, setzung setvante’ meikhu carbon-, inn- ganhingte khahzauna,keplohna,gamsa benna le ngasa gu-denna, chemical eklei hang a leitang siatna, ctp. hihte hang-in midik kimkhatte in kimlepam a bawlsia uh hi. Tua hi-a piangthakte’ mawhpuak in kimlepam thaksuahsakna hipelmawh ding hi: mithak in leitang thaksak hi.

Leitang le minam kikhen theilo hi,ci’n Lai Siangtho in hong hilhcian hi, Pasian’ minam leh ama’ kimlepam tonkhawmden hi.

            Nangpen aki nusia azubah hong kici nawnlo ding a, na leitang pen Gamkhing shamamah kici nawn lo ding hi. Nangpen ama tungah ka lungkimna om Hephzibah hong kici ding a, na leitang pen a Kitenpih Beulah kici dinghi. Banghang hiam cihle nang tung ah Topa lungkim a,na leitang pen a kitenpih zi tawh kibangding hi.Isa 62:4

            Hih in anungta Pasian thu ahi hi. Pasian’ minam a kicite, Topa in Pasian hi, aci minam peuhmah; Pasian in kimlepam, gam le lei, a kemsakhi. Pasian’ minam in
ama’ gamlelei kemcing dingin mawhpuak anei hi.

            Jesuh in kina le lunghih mawhna thuhilh nading in van-a leng vasate(ganhing nam) leh gamlak-a om pakte(a kung nam) a nuntakzia ngaihsun dih un, hongci hi. Vasate’ thu in, khualzin mi ihhih na hong hilh hi. Pakte’thu in kimlepam akem azun akhantohpih dingte ihhihna thu hong hilhhi,ci-in ka umhi. Khristian te in Jesuh’dan ahi kimlepam khantohpih ding mawhpuak aneite ahi uhhi.

            Kei kahih leh tuute a nungta maimai bek hilo-in, nuntakna cingtaak a neihtheih nadingun a hongpai kahi hi. Joh 10:10

            Tua a geelthu pen, a hunhoih atun ciangin Khrih khutnuai-ah, vantung le leitung ah aom khempeuh gawmding ahi hi. Eph 1:10

            Labu54: Zeisu lungkim nailo dinghy, lei le van kikhat ma’n
            Jesus who died shall be satisfied,and earth and heav’n be one.

            Pasian in a Tapa zang in na khempeuh ama kiang-ah a kaihkik ding asehsa ahihi. Tua ahih man-in singlamteh tung ah a Tapa asihna hang-in amah tawh kilemkik theih nading hong omsak ahih man-in, leitung a hong tunkik ahihi. Kol 1:20.

Labu 79: Van leh lei lasak ngai
And Heav’n and nature sing
            Tua gunpang tuak ah nuntakna singkung po a, kha sim-in gah ahih man-in kumkhat sung-in sawm le nih vei agah hi. Atehte zong natna dam nading zatui-in kizang hi. Mang 22:2.
Khasim-in singgah ngahnang: sing gahkung nam12 mah cin/sakkul dingdan hi.

            Nekkhawm bawlna-ah Khristiante’zat anlum in Jesuh’pumpi; lenggahzu in Khrih’sisan, ci’n khiatna anei hi. anlum in Jesuh’ pumpi le ama’sisan in van thu,kha thu,muhtheihloh thutak ahi hi.Anlum le lenggah zu in leithu,kimlepam thu, muhtheih thu ahi hi. Lai Siangtho in van le lei ki khenlo ci ahih nungsang,kha thu ahi,a sa ne-a asi adawn thu-um mite in anlum le lenggah zu apianna leitang le kimlepam adan akem acingte ahi uhhi,cihna asuak hi.

[cf.a symbol points/participants…Paul Tillich]


Source :
Agelh- Do Sian Thang
Laibu min-Kim le Pam Lainatna
Laimai 1-4 sung

Sia Dr. Do Sian Thang in Zomi eLibrary/Laibusaal ading phalna hong piakna tawh kizui in aki teikik/type kik ahi hi.

                                                              

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Kimlepam Lainatna Thu (Ecology & Environment Concern). Agelh - Dr. Do Sian Thang Description: Rating: 5 Reviewed By: Cinpu Zomi
Scroll to Top