728x90 AdSpace

Hot
Menu
Zon-ol na Donate

Latest News

Laisimna Pan Khantohna Ah… A gelh: Bob Tuangpi

Laisimna Pan Khantohna Ah…
A gelh: Bob Tuangpi

“Akhangto minamte in laisim uh a, laisim minamte khangto uh hi”( U Thant, Secretary-General of United Nations, 1961-1971)

         Leitungah thu-le-la khempeuh amanpha pilnate laibu sungah na kiciam teh hi. Khang tangthubu(history), nate’thu(sciences)leh thucin thutangte akhangkhangin laibu ah nidang tangtawn pek panin na kiciamteh hi. Akhangkhangin anungta mite in khangsawnte tungah agennop uh thute laibu sungah na ciamteh uh hi. Leitungah lai nei masa minamte khangto-in lai neilo minam dangte valhtum uh hi. Lai nei masa  minamte in kam tawh kikamkupna bek hilo, mundang mualdangah om midangte tawh kithuza thei uh ahih manin, agennop uh thute lai tawh na kizom uh ahih manin mihingte’ khantohna kipatna ahi thukizakna lampi tungtawnin pilna thuthakte na mumasa den uh ahih manin, leitungah lai nei minamte na khangto masa pah uh hi. Mihingte ganhingte bangin ngeina neilo, zumna neilo-in i-om gamtat lohna ding, ngeina, pilna tawh akilawm kituakin inuntak khuasak theih nadingin pilna tawh kimakaihziate kam tawh kithuhilhna bek tawh kicing zolo ahih manin lai tawh isin beh ikihilh sawm ciangin muibun zaw lai hi.  Anungta Pasian mahmah in ama bawlsa mite hong deihsak, hong gennop thu-le-la, pilna, hong itna thute ama kammal Laisiangthobu tungtawnin hong gen hi.


                    Laibu Sim Ding Teelsiam Kul Hi
         Leitungah asia apha kithuah den, kidemden ahih manin, mun khempeuh leh thu khempeuh, na khempeuh ah zong asia apha om den hi. Tua mah bangin, laibu zong nuntak khuasakna ah phattuamna le pilna hong guan tampi a om mah bangin siatna lam, lamkhial hong tunpih thei laibu hoihlo tampi tak mah om hi. Gamtat luheek hong palaangsak thei laibute leh minamdangte ngeina thuciin thutangte laisim mite ngaihsutna hong dep(psychological colonized) ngaihsutna hong paikhialsak thei laibu tampi tak zong om hi. Laibu hoihte isim ciangin inuntakna ah thutheihna(knowledge) le pilna ciimna(wisdom) hong guan-in nuntakna ah akilawm akituakin nuntak khuasak khantoh nading lam hong lak sia hoih penpen(best teacher) uh hi.

         Laibu nam tam lua mahmah hi. Sumlei sumzuakna tawh kisai laibu(economic books), gam thu tawh kisai laibu(political books), khangtangthu laibu(historical books), leitungah agualzo aminthangte tangthubu(autobiography) cih bangin nam tam lua mahmah hi. Hih bang laibute in pilna tam hong guan-in, imuh ngeiloh itun ngeilohna leitung mun tuamtuam thu le pilnate hong theisak uh hi. Tua bangah nisim thuthang, kalsim thuthang, khasim thusuakte( newspapers, news journal&magazine) te zong ahunzui thupiangte leitungah ikiim ipaam ah bang piang cihte hun tawh kizui-in phattuamna hong piate sim det loh apha mawh hun hita hi.

                        Laisimna Pan Thumuhna/Hamphatna
              I genteh pak dingin ah, sanggam Kawlte bang pen laisim hahkat mahmah mawk uh hi. Kawlgamah lai kician ana nei masa pawl uh ahih mah bang leh gambupah amau lai kizang ahih mah bangin gambupah muncitengah amau mah na madawk zaw veve pah uh hi. I kikhaih mahmah na khat ah, Kawl nupi lamgei ah van nengneng zuakte nangawnin nisim thuthang tuamtuamte leh laibu na sim den uh ahih manin tuni thupiang thuthangte thei pahpah uh aa, tuni gambup innpi(Myanmar parliament) ah thu kigen kikupnate nangawn, nupi papi in thei-a kikum pah tangtang uh hi. Kawl khangnote zong ei Zomi te sangin thu le la uukzaw uh aa, thupiangte kanin khantohna ding mah kikum tangtang uh hi. Sep luat ding om ta kei leh zingsang thobaih-in niangtui sai ah lawmta honkhat kikum uh aa thuthak tampi kihawmsawn den uh hi. Eimite tua dan hikhollo-in sep ding a om kei naak leh zingsang pen atamzaw kilumlum mawk hi(ong sukha pian e! he he).

                Ikiim ipaam aa minamdangte kalkhat khatvei cih bang khakhat le kumkhat cih bangin kimu khawmin alaibu sim tuamtuam le khantoh nading thu tuamtuamte nupi, papi, khangno cih bangin kikum den uh ahih manin tua bang ngeina anei mello Zomite sangin na khangtozaw pah uh aa, ei pen khuanung phawk den keii ihihmanin en thu itheih izak the hamphatna(opportunity) khempeuh midangte in na luakkhin pahpah uh hi.  Tua ahih manin lai sim tangtangin ahunzui-in khantohna hamphatnate ngaksiam leh muhsiam(wait &see) ding kisam pha mahmah ni!

                 Nisim Anneek Bangin Nisim Lasim Ni
                Sente’paunak ah kalkhat sung laisim kei leeng, kal khat sung anneekloh mah tawh kibang hi, na ci hi. Ipum ading akisam neek leh dawn tuamtuam ineek idawn mah bangin, ilungsim thaza, ikhuak tatna dingin laisimin, thu ngaihsut det kul hi. Laisimna panin thukhinkhai siamna(critical thinking) hong piang khia hi. Lai simsim mite thugen zaknop phadeuh pha aa, laisim ngei mellote thugen pen leitungthu ah ahi zongin, biakna thu ah ahizongin mipit huupzolo hi. Laibusaal leh laisimna thupi lua mahmah ahih manin, laitan sangpi nei mah ta kei leh laibu tuamtuam simsim mi tampi tak leitungah mi khuasak le lawhcing tampi tak leitung tangthu ah kimu khin hi. Laibusaal bang thupi kisa lua ahih manin, tangpi tangta pilna sinna sangpi(public university) ci’n min kivawh zawzen hi.

                Tua ahih manin pilna leh theihna khempeuh ii naakpi Pasian mahmah in zong ama pilna leh ama hong gennop thute leitung mihingte’tungah Laibu mah zangin thu hong gen ahih manin, pilnabu ahi laisimna thupisakin hahkat tangtang ni.Tua bang hileeng,Zomi te akhangto minam, alawhcing minam, apicing khuasuak minam isuak ding uh hi. Laisim minam, lai gelh minam, lai uuk minam, lai thupisak minam, isuah matengin avuicing khantohna kinei zolo ding ahih manin, lai mah sim tangtangin thu ngaihsun-in, thu tawh nungta ta ni cih deihsakna kong sungkhia hi.                     

*****************************************************

Lai gelh Bob Tuangpi in Zomi eLibrary / Laibusaal ading in phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Laisimna Pan Khantohna Ah… A gelh: Bob Tuangpi Description: Rating: 5 Reviewed By: Cinpu Zomi
Scroll to Top