728x90 AdSpace

Hot
Menu
Zon-ol na Donate

Latest News

MAILAM LAI TAWH NASEP ZIA DING. Rev. Job Nang Khaw Thawng

MAILAM LAI TAWH NASEP ZIA DING
Rev.  Job Nang Khaw Thawng

Thumasa:
Ka damloh zawh 1990 kuma kipan lai tawh nasepna tawmtawmin ka sem toto a, kipawlna tuamtuam pan pahtakna, pahtawina laipi tampi ka ngah banah a diakdiakin April 19, 99 ni-in ZCLS pan le Oct 29, 06 ni-in Zolentaang (Japan) pan ‘Mimal khat laibu tambawl pen,’ cih pahtawina ka ngah ciangin ka lunglah dam mahmah in, ka khasiat lah suak mahmah hi.  Banghang hiam cih leh Tedim mite’n lai tawh nasem tek hileng, kei ciangciang in pahtawina ngah nai hetlo buang ding ing a, tu’n kei ciangciangin pahtawina ka ngah ciang, lai i sep hetlohna lam kilang ka sakluatna ahi hi.  Tua manin ka lungdamna le ka dahna kikim hi.

I. Bang hang Lai Tawh Nasem lo I Hiam?
1.  Itna veina lainatna taktak nei zo lo
I tu i tate adingin itna, lainatna taktak nei hile’ng lai tawh naseploh hithei lo hi.  I sih ciangin a nungta laite i nusiat theih gamh, van manpha tampite lak panin laibu mah amanpha pen, a topen pen ahi hi.  Van le nadangte kitot kiselna, kisialhna vive hi a, laibu hanga kitot kiselna om ngei nai lo hi. Zomite letsong lian i kipiak ciangin, blanket puanza, taubeelkang cih khawng hi-in mipilte letsong a kipiak teh laibu mah kipia uh hi.


Manglai thei khat in, ke’n Manglai thei ngawn ing ci-in tua Manglai pen Zolai suahsawm kei leh cik ciangin tua Manglai pen Zolai-in i simthei tam?  Kawllai thei khat mah in, ke’n Kawllai thei ngawn ing ci-in tua Kawllai pen Zolai suahsawm kei leh Kawllai theilote’n cik ciangin tua Zolaiin a simthei tam? Lai nasepna i cih pen ei’ theih nading ciang bek hi loin, ei’ theihzah a thei nailote kiangah hop sawnna, muhsak sawnna ahi hi.

Tua nasep nadingin itna taktak, veina taktak, lainatna taktak i neih kei leh a kisem zo ding hilo hi.  Mipil misiam tampitak in lai tawh na a seploh uh, a kinloh mawk uh pen khangsawn tu le tate it taktak zolo, vei taktak zolo uh hi, ka ci ngam hi.  “Sai a sih ciangin a ha nusia a, sahang a sih ciangin a vun nusia hi”, a kicih bangin i sih ciangin i tu i tate adingin nusiat neihkul buang hi. Singlamteh tungah i degree kithuap liang napi, laibu khat zong bawllo, article gina nangawn gelh nuamlo cih mawk pen i degree suan ngam huailo hi.  A zumhuai, a kekseu, a kizanglo degree suak mawk hi.

Tua ahih manin lai tawh nasem, thului taamkam gelhgelh cihte pen itna veina lainatna a nei taktakte hi-in, a semlote a veilo taktak mah ahi uh hi.  Article khat in bangzah man cih kituat theilo hi.  Na tuat sawm leh a laidal bek hi loin, a itna a veina tawh tuatbeh lai in.

2.  Supthuak, leibat lawhin nasem nuam lo.
Kawlte’n lai tawh nasepna pen “na” thum tawh a kisem hi, ci hi.  Deihsakna (apwem), uukna (0goem), supngamna (tepfem) ci uh hi.  Man mahmah ka sa hi.  Zomite ading deuhdeuhin nekval takval tawh kisem hi peuhmah lo hi.  A kizawnlawh a kileibat lawh tanghial hi.  Innkuan khat i zingmeh nitak meh Ks 200/ 300 ahih loh hun tamveipi om a, lai nasepna pen tulsawm tulza hi.

Zomi mipil lai-uuk, lai nasem mahmah khat in “Thawngno aw, lai nasep bel haksa mahmah in ahi zongin, nang le kei peuhmah in haksa ci ngei kei ni, i zawn leh zawnlawh ni, i sih leh sihlawh ni, ei’ tunga hong ding mi tampi om zo hi”, hong ci khiankhian hi. Hi taktak ka sa hi.  Ka lai nasepna teng tawh khamkhi, khutzungbulh lei ding hile’ng kualsawm val ka ngawngah ka ok zota ding hi.  Lai tawh na ka sep manin tulza tampi ka batlawh hun tamveipi om hi.  Ahi zongin, khamkhi zang khat awhding sangin, laibu hoih khat tawi ding ka ut zaw hi.  Na inn sungah bang manpha pen, vangil pen bang, hong kici leh laibu mah ka ci ding hi.

Zomi Lai Siangtho Sanga Siapi khat in a Golden Jubilee Laibu sungah “Ka mawtaw pen ka U tungah lungdamkohnain ka pia a, ko nupa’ gamh ding ahih leh ka laibu neih teng uh hi ding hi,” ci tanghial hi.  Mipil ahih zahin laibu manpha a sakna kilang mahmah hi.

Lai nasep pen lei kibalo theilo hi.  Sum kilomzatin kinen ngah hi.  Thakhatin kizanga damdamin kingah kik hi.  Sumlu kitam suak hi.  Mi khat in lai tawh nasepnaa sumzat pen “Hai dima om antang pen, lawnkhia, thehkhia a, tang khatkhat-a topkik, kholkik tawh kibang hi”, ci hi. Cithei leh cisiam ka sa lua mahmah hi. Kibang linlian mah hi.  A sazianin sumh loin meet a, a meet lam kimu loin sumbul kingah zolo zel hi.  Sup dinga kibawl hi lo, a meeta zuak hi napi, kikhol tuamzo loin, kinenngah luatna tawh a maimang suak zelmawk hi.

A sumtangin sumh i cih hangin, a thuin sumh loin kimeet hi.  Laibu khat’ man pen sum tawh kituat theilo hi.  A laibu sunga thu’ manphatna, a kinuntak pihna tawh kituat zaw hi.  Laibu khat a mawknain kimawk piak thei a, tampi taka hong lei zong om thei hi.  Tua manin laibuman kituat thei lo hi.

Tua manin Zomi lai uuk lai nasem peuhmah supthuak, leibatlawh hi, cih kimu kithei khin ahih manin, a ngaplo peuhmah in lai nasep sem zolo mah ding uh hi.  Lai uuk laikinte’n ahih leh supthuak a nasep zong nuamsa veve in, leibatlawh liang zong maitaii lawh, kipaklawh veve zen hi.  I bawlsa laibu khat i khut tawh tawi liuliau a, a sim khinsate’n “Na laibu bawl manpha lua, thupi lua, phattuam lawh ing” hong cih pen tehpih ding om lo lungdamna le kipahna taktak hi-in i gim i tawl, i sup i baina teng bei-in kimangngilh lian a, thathak kingahkik pah hi.  Zomi lai uuk lai nasem nuam teng a zawng, a cimawh deuh teng ahih sese minam bup hamsiatna hi.

II.  Lai Tawh Nasep Zia Ding
1.  Article gelhgelh mai ding
Lai tawh na i sepnop leh lai gelhgelh phot mai ding hi.  Gelhgelh lel ding hi.  Siam ke’ng cih kul nai lo hi.  Hoih ke’nteh cih kul nailo hi.  A siam lo khat in gelh ngeikei leh siam ngeilo ding hi.  Cimtaak het loin atat phot ding hi.  Laisiam a minthangte thakhata siam om lo hi.  I gei-ah laibu laidal, laikung a vom a san, a phiatna, a kicingin koih ding hi.  Kisap bangbang zat ziauziau theih hi ding hi.  Ballpen nuamlo, tuisuaklo cihte peuhmah omsak lo ding hi.

Gelhsa peuhmah hoih leh hoih takei leh enkik pahpah se lo ding hi.  Cimtaak loh hun teh enkik pan ding hi.  Khatvei gelhsa khatvei enkik le’ng puahnop khelnop om pahlian hi.  Tua pen khantohna hipah hi. Tamveipi enenin, gelh kikkik zo le’ng a hoih semsem ahi hi.  Khatvei gelh khatvei et bek tawh laibu kisuah ngeilo hi.  Leitungah vial 400 vei ki-en pha laibu om hi.

Hi thei hileh eimau’ gelh pen ei’man en loin midang khat ensak zo le'ng hoihzaw hi.  Ei’khialhna e'n kimu theilo hi.  Cimtaak a i sim teh awlmawhna tawm hi.  Kawlte’n “Kampau zakhat laimal khat,” ci ahih manin laimal khat pen thupi mahmah, lauhuai mahmah hi.  Tampi gelh le’ng i etkik the siam i kisak zong om in, siam i kisakloh zong hong om hi.  Lawmlawm aw... i kicih zong om in, hi bang cianga gelh thei higawp ing, i kicih zong hong om hi.

Tua manin lai tampitak gelhgelh phot ding hi.  Thupi- thupilo ci loin gelhgelh phot mai lel in.  Ka lungsim sungah bangmah hong suak kei ci-in na gelh kei leh hong suak ngeilo ding hi.  Gelhgelh phot le’ng hong suaksuak ding hi.  Naupaai loin nausuak theilo hi.  Inndei tuam i neih zawh leh hoih hi, i neih zawh kei leh a lemna mun en in, niangphan hawp kawm, cih khawngin gelh ding hi.  Hih munah lengla kideih pha lo hi. Gamlumna kilau hi.  Mun kawmbu sung khuavak ngahna, huih siangtho ngahna mun hoih se hi.  Soklek khawng muamkawm le’ng nuam hi.  Laibupi khat sunga gawm neinai sangin dal 40 bu tampi nei-in thulu khenin gelh le’ng a zonkik nuam pen hi.

2.  Laidal laibu leh ballpen vom den in.
Lai nasem lai uuk khat na hih nak leh laidal laikung, laibuno vom (kem) den ding hi.  Bang huna na lungsim sungah thumanpha hong suak ding kitheikhol lo hi. Motor tung tuan lai, annek lai, dailen lai, cihte nangawnin zong hong suak thei hi.  A suak laitak gelh loin denteh gelh ning na cih leh mangkik thei in, kitheikik zo nawnlo thei hi.  Khuak pen cassette khui bang hiin, a kipeipei hi a, suak zelin mitzel hi. Pawlkhat in thusuak ci ding hi.  Thusuak mawk hi loin, khuak nasepzia hi.  A suah laitak tawm ciamteh peuh leteh na theikik lel ding hi.

Bu 4000 bang a kihawmkhia ka Lungsim Limlang pen a tamzaw zansung tenga ka gelh hi.  Hih article mahmah zong September 29,‘06 nitaka hong kingen hi-in, a zingciang zingsang September 30,‘06 zingsang nai 2 (2:00 am) a ka gelh hi.  Gelh gelh le’ng hong suaksuak hi.  Nitak nai 8, 10, 11, zingsang nai 2, 4 khawngin hong suaknuam deuh hi.  Hih hong suah ciangin meivak abaihsa le vanzat ding akicing kiginkholh kul hi.

Tua banah a toma ciaptehna zong tampi nei ding hi.  Tedim=TD; Lai Siangtho= LST; Pawlpi= PP; Kha Siangtho= KST; Thuciam Lui= TL; Thuciam Thak= TT; cih bangin ciamteh in, sumbawlte’n zong Culcutta = C; Bombey=B; Dollar = laidal cih bangin zang uh hi.  Hih banga a toma ciaptehna in laigelhna hong manlangsak mahmah hi.  Mi’ thugen khat zong hong ciamtehsak zo hi. Etkik teh tellua lel i hih manin nuam mahmah hi.

Laigelh pen thupi le thupilo khenpah se lo ding hi.  Thupi na saklohte thupi nasak hong omkik dinga thupi nasakte thupi nasak loh hong omkik ding hi.  Thupi nasak lohte thupilo hituan lo a, na theihna na tuahkhakna in ban nailo, sukha nailo hizaw hi.  Na laibu lakna file lak phekleklek leteh na deih tampi omin, na deihloh tampi om ding hi.  A maikum teh pheklek kik leteh nadeihte na deih nawnloh, na deihlohte na deihkik hong om leuleu ding hi.  Tua manin kep gige ding thupi hi.  Na hawh, na ciahna, na vakna khempeuhah laidal laikung pua den in.

3.  Sum hong sik ding zongsiam in.
Na laigelh sate nihvei thumvei enkik inla, gelh kikkik leteh hong hoih semsem ding hi.  A thuluanzia, kammal zatzia, hong simnuam semsem ding hi.  Tua bangin na gelh sinsen khitteh hoih takin khenkhia inla, a bu a suah zawh nading hanciam in.

(i)            Sum le paai neite kiangah na deihna, a manphatna, a hoihna, gengen phot in.  Nang hoihsak zahin amau hoihsa lo thei hi.  A sum cil uh hi loin, hong muhpih khol lo, hong awlmawhpih khollo thei uh hi.  Tua bangin nih le thum kiangah gen leteh sum neite’n hong sik pak thei lel uh hi.  A bei ding zah, bu bawl ding zah, laimai phazah, laidal zat ding namte,... cihte a vekpi-in telkhitsa-in koih inla, hong dot ciangun dawng thei lianlian in.  Tua na huh ngetna sum pen letsong ding, piaksuak ding hisak pahpah ke’n. Na zuak ding leh sum ngahkik nading ahih manin, leitawi hisak in.  Khatvei hong letsongte’n nihvei hong letsong zolo a, khatvei hong leitawite’n nihvei thumvei hong leitawizo lua uh hi.  Sum ah citakin thumanin leitawi na siam bangin lohkik lamah zong citak mahmah in.  Laibu suah takpi inla, amau kisapzah letsong zo in.
(ii)           Computer service te, press neite tawh kimeltheih peuh leteh a batin zong na bawlbawl thei ding hi.  Sum le paai i neih kei leh a bat a bawltheih lam zong hanciam ding hi.  Bat a ngah ka hih teh ci-in zuak zawhloh ding zahin tam bawlpah ke’n.  Computer servicete, press sepna munah batbawl a, kipiakik nawn loh a lom a tangin om mawk hi. Kilawmlo mahmah hi.  Nang’ lai nasep midang supna hisak ke’n.  Amau hong hehpihna zahtak in, thuman peuhpeuh lecin na ma na zomzom thei ding hi.  Mi khatvei na khem zawh hangin kikhem suaksuak zolo ding hi.  Na khemsa mite’n cikmah hunin hong um hong muang nawnlo dinga, nang hangin midangte a batin na pia nawnlo lai ding uh hi.  Amau meltheih khempeuh in zong hong um nawnlo lai ding hi.  Laibu tampi ka bawl zawhna khat pen a bata ka bawltheihna le zuak saisai a, ka lohkik theih zelna khat zong ahi hi.  Amau zong nasep ngah suakin lungdam uh hi.  A diakin biakna lam kumpi lamte pen saziansit (audit) ma dong kingah thei mahmah hi.

Tua ahih manin, lai nasep i sep nai hetlohna, lai ii thupitna le mailam lai tawh nasepzia ding, laibu tampi bawlzawh nadingte tel a, i sep takpi nadingin deihsakna lianpi tawh kong hanthawn hi.  Hih ka laigelh pen pawlkhat in khauhsa kha ding hi.  Kammal kilawm khinlo zong om kha ding hi.  Lai i sep hetlohna ka muh teh khasiatna, lainat luatna tawh ka gelh zong ahi hi.  A diakdiakin nautaang ta dinga ka gelh hideuh hi.  A sim mimal kim tungah phattuamna, hanciamna, kipuahphatna om ciat tahen.

Notes:
- ZCLS (1999) pahtawina pen laipi khat, puanlaisan khat le dialpaak khu a, tukpaak tawh totsakna hi.
- Zolentaang pahtawina pen laipi khat le Ks 100,000/- hi.
- Zomi mipil khat in ka cih pen Prof. Dr. C. Thang Za Tuan hi.
- Biakna Lai Siangtho Sang, Siapi ka cih pen Rev. Dr. Do Sian Thang, (ZTC- Principal) hi.


Source :
ZOMI SIAMSIN MAGAZINE [ Vol 2, 2008 ]

Page 68-72.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MAILAM LAI TAWH NASEP ZIA DING. Rev. Job Nang Khaw Thawng Description: Rating: 5 Reviewed By: Cinpu Zomi
Scroll to Top