728x90 AdSpace

Hot
Menu
Zon-ol na Donate

Latest News

MIKHUASUAK. Agelh - GSPau

MIKHUASUAK
Agelh - GSPau

Mi khempeuh kikhuasuak nuam tek hi. I khuasuak theih nadingin a kisam thu pawlkhat om a, tuate sung panthu li khawng a tomin i gen ding hi.

1. Tupna Kician Nei Ding
Mipilpa khat in,"Mikhuasuaklo i cihte pen a hai man leh a zawn' man-a khuasuaklo uh na hilo a, tupna kician a neihloh man uh hi zaw hi," ci-in na gen hi. Mikhuasuak i cihte zong a pil teng leh a cithei bangkua sung pan a khangkhiate cihte na hi tuan peuhmah lo uh a, pil ta kei leh, haksa mah taleh, tupna kician a nei teltalte ahi uh hi. Mikangte in i tupna zah ii a lang bang bek kitung hi, na ci uh hi. Tua ahih leh tupna khat beek nei kei mawk le'ng koi ciang i tung mawk zen tam?

US President (16) na Abraham Lincoln(1809-1865) pen a kaamphat man peuh tawh US President a na suakkha mawkmawk, cih dan na hi peuhmah lo a, a neu tung mah-a kipan US President suah ding tuppi-in a neih ahi hi. Amah pen a nu bek tawh a khangkhia tagah khat hi a, a nuta-un singluang tawh a kilam bukno khat sungah teeng khilkhial uh hi. Ama' tup in,"Nikhat ni teh US President suak ding, US gam sungah sila beisak ding," cih ahi hi. Haksapi takin pilna sin hi. Pasian in a tupna tangtungsak takpi a, US President hong suak takpi hi.

US President (42) na Bill Clinton (1946b) zong mi khat peuh ii deihsak man peuh tawh US President a na suakkha mawkmawk cih bang hilo a, a neu tung mah panin a tup ngiat ahi hi. A tan sagih sin lai-in a sangah US President John.F.Kennedy te nupa va hawh uh a, sangnaupangte kiangah,"No zong nikhat ni teh President ding hi uh teh," ci-in hanthotna va pia uh hi. Tua hun-a kipan Clinton in US President suah ding tupin nei gige hi. A sang sung khawngah President ka suah teh ka thugen dan ding, ci-in kisin kholkhol hihtuak hi. Pasian in a tupna tangtungsak takpi a, US President hong suak takpi hi.

Leitung ah "Pasian' thu puakkhia sangmangte' pa" (Father of Modern Mission) a kici William Carey in,"Topa' ading na lianpi tum in la, Topa' kiang pan na lianpi mah lamen pah in," ci-in gen hi. Gammial ah kuankhia-in khuavak puak ding tupin nei hi. Amah pen laitan neilo khadap khui khat hi lel a, a khedapkhuina sai ah leitung gamlim khat khai-in, leitung bup a Pasian' thu a um nailote' adingin thungetsak den hi. Pasian in a tupna tangtungsak takpi a, India gamah sangmang hong seem takpi hi.

Mi khuasuak i cihte pen kaamphat man peuh tawh a khuasuak kha cih bang na hilo uh a,midangte' muhloh a mute, midangte' tuplo a tumte ahi uh hi. Biakna lamah ahi zongin, leitung thu-ah ahi zongin tupna kician neite bek mah na khuasuak uh hi. Mikhat in tupna a neih nak leh Pasian in nang gina kei teh, pil kei teh, siam kei teh, na ci hetlo a, ama' tup, a mau' lunggulhna bangin piangsak lel hi. Tua ahih manin Pasian muanna tawh tupna kician nei ni.

I tupna peuhpeuh zong Pasian' deihna tawh a kituak tupnahoih ahih ding zong kisam hi. Eima' ang sung hamphat nading ciang peuh hi lo-in, Pasian' minthan'na ngiat ding leh mi tampite' noptuam nading ahih ding zong kisam hi. Mi mindawk leh mi minthang suah ding peuh tum lo-in, mimanpha, migina, mithupi, Pasian' maipha ngah suah ding tum zaw ni.

2. Hanciam Ding
I tupna a tangtun' theih nadingin eimah mah in i hanciam kul hi. Khua-ul tampi luan'sak kul hi. Thadah tawh i tupna hong tangtung ngeilo ding hi. Mi tampite in tupna nei tei napi, tua a tupna uh a tangtun' theih nadingin bangmah hanciam nuamlo uh hi. Hanciam zong sawm beeklo lai uh hi. Hanciamna kihel lo tupna pen tupna hi lo a, sunmang matna ahi hi. Sunmang matmat pong lel tawh cikmah hunin kikhuasuak zo ngeilo ding hi.

Ei Zomite pen khutzep sa-in mihau a suak nuam, galkap tum lopi-in Colonel pension a ne nuam, hanciam kul lo-in a pilnuam te ihi hi. Pawlkhat bang lupsa-in "Dahpa khuang" tum ziauziau tawh i duh i deih teng in i kiang hong zuan naainaai ding ki-ut mawk hi. Pasian in tua dan dingin hong deihlo a, eima' hanciamna tungtawnin thaman hong pia hi.

Leitung ah tumging(Music Band) siampente in nai 10000 sung bang sun tawh zan tawh hanciamin a sin uh ciangin hih dinmun a tung thei pan uh ahi hi. Kimawlsiam i cihte zong kum tampi sung hanciamin a kisinsinte ahi uh hi. Tua mah bangin mi khat siavuan a suahtheih nadingin lai a kiat kei nak leh a tawm pen kum 18 sung bang hanciamin pilna a sin ciang bekin siavuan a suakzo pan ahi hi.


US gamah Abraham Lincoln suahni khatin tadensa sungah cartoon lim khat kisuai hi. Mualdawn khatah US kumpi inn(Whitehouse) om a, mualbul ah singluang tawh a kilam buknosia khat om hi. Tua innte gel kikalah kahlei khat kidawhto hi. Tua lim kisuai nuaiah,"Lawm aw, nang zong tu ni-in hih kahlei tungah na kah nop leh kah thei hi teh. Ahi zongin a dawn dong na tun' nadingin na khua-ul tampi a luan'kul hi," cih lai kigelh hi.

3. Kikhalna Nei Ding
Kawlte in " Kikhalna in mihing' manphatna hi ( pnf;urf;onf vl\wefbdkf;)" ci-in na gen uh a, "Kikhalna a om ciang bekin kikhangto pan ding hi ( pnf;urf;&dSrS wdk;wufrnf) ci-in zong na gen lai uh hi. Tua hi a, mikhuasuak khat i hihtheih nadingin kikhalna(pnf;urf;) neih ding zong kisam hi. Tupna sangpi i neikha phial zongin kikhalna i neih tuan kei leh kikhuasuakzo tuanlo veve ding hi.

Leitung ah Japante pen kikhalna a nei penin na kigen hi. Tua hang mahin Christian 1% bekbek a om kiukiauna Japan gam in Pasian' thupha ngahin, na khangto pah hi. "Leitung Bawhlung Kumpi" a kici Brazil mi Pele bang in zong bawhlung siam mahmah kawm leh kikhalna neih mahmah thuahkhawm ahih manin hih dinmun ciang a tungthei ahi hi. Tua banah Leitung ah mihau minthang ahi Ford Motor Company neipa Henry Ford (1863-1947), Kahpasik Company neipa Andrew Carnegie (1835-1919), mihau minthang Rocke Feller(1874-1960), leh tu laitak leitung ah mihaupen-a kigen Microsoft Company neipa Bill Gates(1955 b) te bang in kikhalna a neih man mahun hih dinmun ciang a tungthei uh ahi hi.
Zomi sungah zong a etteh taak, kikhalna a nei pawlkhat ki-om a, tuate sung pan pawlkhat i en ding hi. A masa penin Zomi gam makaipi khat ahi Col.Khen Za Moong bang kikhalna a neipha mahmah khat hi a, zu leh zatep cihte zang lo, paktat ngei lo, neek leh dawn zong kidawm, hun a zahtakpha mahmah khat zong ahi hi. A tangvalno lai bangin na paktat nuam bang hileh a meel hoihin, kimawl khawng zong siam ahih manin nungakte in na lamnaih mahmah uh hihtuak hi. Colonelpa in a genna ah,"Mihingte in maizum theihna (t&Sufw&m;) leh lautheihna (taMumufw&m;) cih kinei a, tua in hong keem hi," ci-in gen hi.

A nihna ah Zomi biakna makaipi khat ahi Rev. Dr. Do Suan Mung bang zong a neu tung mah-a kipan zu, zatep cihte na zang ngeilo banah kampau mukpau leh gamtat luheek cihte kidawm mahmah hi. A khangno lai bangin biakna sungah kinak hel mahmah hi. Ahi zongin laisim ding kipelhsak tuan lo a, nitak inn a tun' teh a lai sim veve ahih manin Outstanding (vl&nfcRef) bang na ngah veve hi. Zomite kia bek in hi lo-in, minamdangte nangawn in zong mihoih, migina, mimuanhuai khatin hong ciapteh sak uh hi.

A thumna ah Zomi kimawlsiam khat ahi Sia Thang Sian Khup @ armifjzL bang bawhlung siam mahmah kawm leh kikhalna neih thuahkhawm ahih manin na kipakta ciat a, University selected sung nangawnah na kihel kha hi. Tu-in Kimawlna lam (Sport Department) ah Assistant Director (vufaxmufnTefMum;a&;rª;) ciang bang hong tungto ta hi.

Tua ahih manin i khuasuah nop taktak leh kikhalna (pnf;urf;) neih ding hanciam ni.

4. Pasian' Maipha Zong Ni
Mihing lam pan bangzah takin tupna nei-in, hanciamin, kikhalna i nei phial zongin Pasian in hong panpih kei peuh leh kikhuasuakzo tuanlo veve ding hi. Tua ahih manin Pasian' maipha i zon' tangtang ding kisam hi. Mihing in geel a, Pasian in tangtungsak hi.(Pau 16:1) Pasian' maipha zong ding cih ciangin Pasian pen nambat khatna ah koih denin ama' deih bangin nungta, gamta ding, gam paizia zui lo ding, kim leh pam omzia zong zuilo ding, Lai Siangtho' hong hilhna bang zui zaw ding, cihna ahi hi. Hih pen zingsang khat sung khawng bek man'ding hi lo-in, khantawn man' ding ahi hi.

Abraham Lincoln in tupna kician a neih banah a tupna a tangtun' theih nadingin Pasian' maipha na zong ngiat hi. Nisim mahin Lai Siangtho sim denin, thu na ngen den hi. A neu tung pan mahin zu ne nuamlo hi. Tua ahih manin Pasian in a tupna tangtungsak a, US President na suak hi.

US mipil(Scientist) minthang Werner Von Braun (1912-1977) pen Pasian a zahtak, Pasian' maipha a zong den khat hi. US te' khapi tung kah nading rocket a bawl lai-in Pasian' phalna a om kei leh mihingte khapi tung kitung zo ngeilo ding, cih thei ahih manin khitui luangin khukdin a, Pasian kiangah huhna ngen hi. Pasian in a thungetna dawng ahih manin ama' bawl rocket tawh July 20,1969 ni-in US te khapi tungah va tung takpi uh hi.

Tu laitak leitung ah mihaupen-a kigen Bill Gates (1955b) bang in Pasian' maipha zong den a, Mate 5,6,7 sunga mual tung thuhilhna teng bang kamngah hihtuak hi. Amah pen van hoihlo sepna peuh tawh a hau na hi peuhmah lo hi. Pasian in leivui sung panin computer sunga kithuah Microsoft a kici vanneu khat musak hi. Tua pan Microsoft Company hong nei a, tua tawh hong hau ahi hi.

Tua ahih manin mikhuasuak i ut leh a masa-in tupna nei masa photphot ni. A nihna ah i tupna a tangtun' theih nadingin eimahmah in hanciam ni. A thumna ah kikhalna nei ni. A lina leh a tawpna ah Pasian' maipha zong ni.

*********************************************

Lai gelh pa Sia Gin Sian Pau @GSPau in Zomi eLibrary / Laibusaal ading in phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MIKHUASUAK. Agelh - GSPau Description: Rating: 5 Reviewed By: Cinpu Zomi
Scroll to Top