728x90 AdSpace

Hot
Menu
Zon-ol na Donate

Latest News

Minam Gampi Khat, Minpi Khat leh Paupi Khat. Gelh - Tg. Hangsai (Zoland)

Minam Gampi Khat,  Minpi Khat  leh  Paupi Khat.
Gelh - Tg. Hangsai (Zoland)
Photo Credit : Abraham Kim 

A beisa 2005 April ni 9 ni-in Internet panin dahna thu khat hong kizasak vat-a, mun tuamtuama om Zomite kilinglawng-in a takpi mah hiam ci-in a kisang zo lo zah dong dingin thu khat piang hi. Tua thu pen Internet-a Zomite’ kizopna pi khat ahi ZoNet pan ahi zongin CiimnuaiNet pan ahi zongin kizasak pah-a, leitung bupa Zo tate kiangah hun tomno sungin kizeel pahin dahpihna lai kikhak kigelh ziahziah hi. Tua thu in Zo minam leh Zolai tawh kisai a kin a uuk leh a hong makaihpi khat ahi Rev. Khup Za Go in India gam New Delhi khuapi ah mawtaw cycle in phukha-in hong nusiatna thu ahi hi.

Hong nusia Rev. Khup Za Go in a nun’taak sungin a lunggulh pen thu lianpi thum om-a, MINAM GAMPI KHAT, MINAM MINPI KHAT leh MINAM PAUPI KHAT cihte ahi hi.  I theihsa tek mah bangin Zomite’ teen’na gamte ah Minam min vai buaina (Identity Crisis), Pau zat taang ding neih lohna (Lack of Lingua Franca) leh gam tuamtuam-ah eima’ deihna om lopi-in hong kikhenkhapna thu ahi hi. Hih thute hangin tuni dongin i kisuknawt, i kitonawt den lai hi. I minamte teen’na tulai gam thum bangah kisuah-a, i minam min nam 4-5 bang pha hi. I minam Paupi ding nei zo nai loin ei tek mah ki-ultungsak nuam tek hi. Hih thu sung panin i Minam MINPI leh minam PAUPI tawh kisai kikum le’ng ka ci hi.


Tu laitaka Kawlgam-a ‘Chin’ a kici mite, India Mal-Suah (North East) lam Mizoram State-a ‘Mizo’ a kicite, Manipur-a ‘Thadou-Kuki’ a kici minamte leh Manipur gam sunga mualtung mi ‘Paite’, ‘Simte’, ‘Zou’, ‘Gangte’, ‘Vaiphei’, ‘Hmar’ leh a dangdangte in ei’ mun tekah minam min khat tek tawh mite’n hong thei uh hi. Bangladesh-a om Chittagong Hill Tracts te zong ei minamte mah-in i ciamteh hi. Hih minam teng in minam khat i hihna kisaang thei sim tek napi i minpi ding khat pen tu dong mah kinei zo nai lo hi. India Manipur gamke-a mualtung mi omte in i kigawm theih na’ngin min khat na na phuak uh a, CHIn-kuKI-MIzo = Chi-ki-mi na kici ngei uh hi. A lompi-a kipawlna ahih manin hih min hong thang (popular) zo taktak lo hi.

Mizoram i et ciangin Paite, Hmar, Lai (Pawi) leh Lusei cih minam pi zawdeuh na na teeng khawm uh-a, nidanga Sailo ukpite na na hatin Mangkang missionary-te in na na pan’pih uh ahih manin Duhlian (Lusei) pau leh lai na na kilimzat mahmah hi. Tangthu i et kik ciangin Mizoram-ah Khristian biakna thu na na tung masa ahih manin nun’taak-khuasakna (civilization) na na saang zaw-in politics lamah khua na mu masa zaw uh hi. Tua ahih manin nidanga Lushai munah Mizo cih kammal 1940s pawlin hong kizang pan ta hi. (April 6, 1946-in Mizo Union kiphuan, Dr. Vumson, Zo History. pg 245). ‘Lusei’ i cih kammal in ei teng hong huam kim zo kei ci-in MIZO cih kammal hong thangsak mahmah uh a, Mautam kialpi a tun’na hanga hong kipan MNF (Mizo National Front) October 22, 1961 ni-in hong kipan hi. Hih hun khawnga kipanin Kawlgam Vaigam-a om Lusei leh Lusei tawh a kisawh kha teng in Mizo cih kammal hong nak zat mahmah ta uh hi. Mizo cih pen i min diktak hi ci-in ‘Mizo’ a kicih nak leh angtang zo uh hi. Mizo sunga a kipap kha teng in Duhlian pau le ham hong nak zat mahmah uha, hih pau pen pau kitel baih leh a ngaih khat ahih manin a kuamahpeuh in hun tomno sungin kithei zo hi. Hih kam a zangte mahmah zong pau dang a zangte bang loin a pau uh it uh a, keem uh hi. Zo mi sunga paudang a zangte zong hih pau mah tawh ahi thei zahin hopih tangh.tangh-in Mizo pau telsak in hih Mizo pau a pau manun angtangsak zo lai uh hi. Tua hi-a, hun hong kikheel-in Mizo cih min leh kammal hong nak laan’ mahmah hi. Hih Mizo sungah Mizo phadiak mah hong om uha, Lusei = Mizo cih zah dongin hong toi tektek manin L. Keivom in  a laibu gelh ‘Zoram Khawvel’ a cihna sungah zong Mizo cih kammal zat dan kidop ding na na hanthawn ngei hi. (Zoram Khawvel, Pg. 33). Mizo pau pen a hong piangpiang ding hi pan hi. Mizo kam neuseek lua kei un, na na ci hi. Hih pen tulai-a ‘Zomi’ cih kammal a deih mahmah te in zong i kidop mahmah ding thu hong suak ta hi.

Tunung lamin Zomi/Chin-te sungah ‘Chin’ cih kammal pen Panglong Agreement a kibawl lai khawngin i pu  i pate in nialna om loin na kithutuak diamin ‘Chin’ cih dotna om loin na na zang uh hi, ci-in Zomi MP khat in lai gelh hi. Hih thu tawh kisai-in nial luat nading om lo hi. Kawlte’n hong piak masak, Mangkangte’n hong kipsak ‘Chin’ cih kammal pen ki-nial tanghtangh lo napi ei le ei kilawhna-a a zang Zo minam sungah tuni ciangdong om nai lo hi. (Thein Pe Myint, Chin Withayta Taing Thamaing Asa). Zomite i khua muh sawt nailo a, Tedim gam-a-te bang tuma kum 20 hun ciangciang Zomi, Zogam cihna munah Khamtungmi, Khamtunggam cih kammal na kilim zat mahmah lai hi. Tuma kum 40-50 sunga Tedim lai tawh kibawl laibute na en kik leuteh, tu-a i pu i pate khang ciang-ate na dong kik leucin  Khamtung mi = Chin ci-in na na tel, na na zang uh hi. Sangmang Rev. Dr. J. H.  Cope in tulai-a ‘Zomi’ i cihna mun ah ‘Khamtung’ mi na na zang cih, nidanga CHN = The Chin Hills News = ‘Tedim Kam Thu kizakna Lai’ te-ah kimu thei hi. (Theih ding: CHN pen 1919 October kha panin Rev. Dr. JH Cope in ama’ sum tawh na na thoh hi. Tedim Journal, No. 2, Pg. 37) Khuamu zaw deuhte leh sangnaupang kipawlnate magazine-te sungah bel ‘Zomi’, ‘Zomi Siamsin’ cih bangin na na zang panpan uh hi.

‘Zo’ kici kammal pen i teen’na mun, mualsang mualdawn-a i teen’ mana a kingah hi cihna a om teei hangin, mualsang mualdawn-a teeng leitunga minam dangte Zomi na kici ngei lo uh hi. I pian’na guipi Pu Zo pana hong kipan hi ding hi ci-in tangthu kan tampi takte in um uh hi. 1998 kuma Kawlgam sunga Zo minamte kikaikhawmin i pian’na i min bul taktak bang a hiam ci-a a kikan tak ciangin i min taktak pen Zo, Jo, Djo, Sho, Yaw, Yo, Ysou, Cho cih kammalte hong kigawm hi a, Yo, Yaw i cih khawng te zong Zo a kici kammal pana hong meng hi dingin ki-ummawh hi. Zanggam Zomi-Asho te in zong Sho, Asho pen ka minam min uh hi ci uh a, Mindat-Kanpalet gam-ate’n zong Cho hi ung ci-in hong pulak tak ciang-un i minam min Cho, Sho, Asho, Djo, Jo, Yo, Yaw cih pen hong kip semsem hi. (The Historical Facts and Culture of the Chins, in Burmese by Chin Historical Research Committee, Yangon, Feb 2001; Memoranda: ZRO: An Appeal, August 9, 1993)

1900 nunglam hih lam hun-a thupiang kiciamtehte en kik leeng, Chin State, Tedim khua-ah Zo Education Board (ZEB) pen 1945 kumin Tedim ah na kiphuan a, Rev. S. T. Hau Go leh mi masate in na pankhia uh hi. (Tedim No. 1 BEHS Golden Jubilee Commemorative Magazine-1998, Yangon, pg 59-68). 1953 kumin Rev. S. T. Hau Go in Zomi Baptist Convention cih Falam khuapi-ah hong phuat tak cianga kipanin lai thei leh thu theite in i minam min taktak ‘Zomi’ hi mawk veh e, ci-in Zomi cih kammal zat hong kipan ta hi. ‘Zomi Tangko’ thu kizakna lai, Zangkong khuapi-ah 1960-62 kumin ah na na hawmkhia uh hi. (Hong nusia Rev. Khup Za Go zong hih Zomi Tangko-ah editor seem ngei hi.) Rev. S. T. Hau Go in ‘Zomi’ ci-a hong na patsaksa pen Chin State-a Zomite in hun khat sung bangmah thei lo, ahih kei leh (thei napi’n a manphat lam thei nai lo-in) tawlpi khat i na zangzang hi. Hun khat tak ciangin FalamHakha lam sanggamte hong khangh-lou (wake-up) uh-a, ZOMI cih munah CHIN cih tawh laih sawmin Tuiphum Pawlpi ZBC sungah nakpi takin buaina na piangpiang ngei hi. Upa masate in Zomi cih khauh takin na na tanggup uh ahih manin tuni dong a kimangmang lai ahi hi. (Zogam Tuiphum Pawlpi Tangthu by Rev. Kam Khaw Thang, pg. 115-117). Tua bang ahih hangin i sanggamte ta tuan loin Zomi a kizat nading mun khempeuh ah Chin cih tawh laih theih zahin laih, zat theih zahin hong zang (popularize) leuleu uh hi. Gtn. CCOC, CACC, CCM, CCC, CNF. Kawlgam pen i theihsa tek mah bangin kumpi’ thukimpihna pen thupi mahmah-a, biakna thu lobuangah Zomi cih zat taktak ding pen hong hi thei taktak nai lo (kilegalize) nai lo ahih manin Kawlgam uk sungah “Chin hi kei ung”, va cih theih om lo zeel hi. Gamdang tungsate in bek ut-ut i kici zongin i kicihna, a kimang hi lel-a, hong kitheih leh theih loh bek hi lel ding hi.

Tedim-Tonzang gam-a piang Zomite (pawlkhat in Ciimnuaimi ci) in ‘Zomi’ cih pen tuhun tak ciangin kinak deih mahmah leeuleeu-a a, i min phuah khempeuh-ah ‘Zomi…’ hi khin ta lawmlawm hi. (“Zomi cih kammal in i lungsm hong sukha-a i duang hong zen hi” -- Prof. C. Thang Za Tuan) Hun khat lai-a i minam buppi huam dinga a kizang Zomi pen tu-in Tedim-Tonzang gam leh a kizoppih minam honkhat teng bek kihuamsak nuam/kha ta leeuleeu zeel kawi hi. A khatlam ta leeuleeu-ah i sanggam dangte in zong lah hong langbawlna lamin ‘Zomi’ pen hong deihpih khol lo lai (hong deihpih kilkel lo mai thei lai) uh hi. A kiphuaksa ZBC min nangawn zong a deihpen Tedim-Tonzang tate ZBC-ah ki-om nawn lo ahih manin cik ciang a min hong laih uh diam, cih etkhiat (watch) ding hi lel ta hi. Tedim-Tonzang tate sungah zong kielna om veve ahih manin ZBC min-a ‘Zomi’ munah ‘Chin’ ci-a a laih nuam-a thu sungsung zong ki-om lailai hi.

1970s leh 80s khawnga kipan G-group (kampau ah G- a zangte: gtn. Gam, Gun, Go; R-group te’n Ram, Run, Ro ci uh) sungah minam vai tawh kisai khan’lawhna hong om-a, Zomi National Congress pen January 28, 1972 in Lamka, Manipur gamke-ah kiphuan hi. 1988 gam hong buai nung ciangin G-group te in ZNC min zangh-in Kawlgam bup kiteelnaah hong lut uh-a, MP seat 2 hong ngah zo uh hi. Chin min tawh CNLD in MP seat 3 kingah hi. Mizogam Champhai-a kibawl First World Zomi Convention sung (May 19-21, 1988 sung)-in Mizogam Champhai-ah ZORO  hong kiphuan-a, 1993 kumin ZRO Kachin gam, Phapyan-ah hong kiphuankhia leuleu hi. Hihte i et tak ciangin Zogam nai-nganzi (politics) huih nun’ zia pen Zo-Zomi cih lamah hong kipat mah bangin Chin-CNF pen 1988 Kawlgam buai tak ciangin hong kipankhia hi a, tu laitakin Zomi a deih leh Chin a sihpih ngam pawl cih bangin Kawlgam-ah pawl nih kipha ngiitngeet hi. (Hih te ma-a CLA leh a dangdangte sut nawn dah ni.) G-group sunga a kihel veve, Manipur gam sunga sanggam Thado-te in ‘Kuki’ cih pen na na kiplet mahmah vilvel uh hi. A tunga i gen Zo minam teng pen Kuki sungah hong huamsak zeel uh hi.

Tulai takin Kawlgam sung TedimTonzang tate sungah ‘Zomi’ leh ‘Tedim’ cih pen a kikimin kizang ta leeuleeu-a, “Zomi deihte’n Tedim pen toi lua, khua khat bek huam hi” ci uh-a, Tedim zang nuamte’n “Zomi neuseek lua uh teh”  kici zeel hi. ZBC panin ZBCM hong meen’khiat-a kipanin Zomi deih ZBCM gimnam leh Tedim deihte kikaal kitel khialhna leh kammal vai-a kitheih-siam-lohna hong om kawmkawm hi.  Hih vai tawh kisai-in keima mimal muhna-ah ‘Zomi’ i cih pen i minam min, Chin tawh a kikim hi-a, Tedim i cih pen minam min hi loin khua min, kampau min hi bek hi ci-in ka ngaihsun hi. Nidang Mangkangte’ hong tun’ ma-in Tedim mi (Tiddim Chin) cih bang na om lo a, ki-ukna a nuam dingin Sukte, Sihzang leh Kamhau uk gam teng gawmin, Tedim subdivision sungah, hong uk Mangkangte in hong na gawmkhawm ahih manin tua gam sunga teeng mite a ciamteh ol dingin ‘Tiddim Chin’, a na ci hi lel hi. (2005 ZoNet sunga upate’ thu kikupnate siiksan kawmin). Falam Subdivision-a teengte pen ‘Falam Chin’, Kanpalet gam-ate ‘Kanpalet Chin’ cih hi ziau hi. (Hih munah, British-te pen i zatzatsa ‘Mangkangte’ cih suak lel ding hi. Tokaina-a tuat ding hi lo hi. Mikang = white man va ci leeng, European mi khempeuh mikang hi lel uh hi.) A taktakin Tedim mi a sit (diktak) cih om tuan lo-a, Tedim kampau (dialect) bek om hi. Tedim kampau pen nidang Tedim khualui-ah Zomi nam honkhat, Teizang, Saizang, Sihzang, Guite (Paite), Zou, Thado leh Vaiphei te a na teen’ khopna panin a hong piangkhia, kampau kigawmkhawm TEDIM KAM ahi hi. Tua ahih manin G-group teng bang Tedim kampau in hong khaikhawm thei ding hi. Leitung bup Zo kam tuamtuam lakah Tedim pau zang pen Lusei (Duhlian) pau a zang mite zom-in tam peen hi.

Pu L. Keivom khen bangin Zo minamte khen nih-in a khen hi ta leeng, Rgroup leh G-group cih bangin nih pha ding hi. (Zoram Khawvel, L. Keivom, pg. 33-34). Rgroup ah Laite/Pawite (Falam, Hakha Chin cia kiciamtehte), Lakher, Mara, Lusei, Ralte leh Hmar te cih bangin om ding a, kampau khat bang gawm sawm leeng Mizo (Lusei) pau thahat pen ding hi. A khat lam-ah G-group sung bang en kik leeng, Teizang, Saizang, Sihzang, Paite, Zou, Thado (Kuki), Vaiphei leh Vaigam-a Gangte, Simte, Thangkhal cihte kikoih khawm thei ding hi. Hih G-group-ah Paite/Tedim pau pen kithei kim peen-in ka um hi; bang hang hiam cih leh tanglai-in zong Tedim khua-ah i pu i pate na na teeng khawm ngei uh hi. I gensa mah bangin kampau nam khat Tedim pau cih khat na na piangkhiasak zo ngei uh hi.

Thu khupna dingin, Minam MINPI dingin ngaihsun kik leeuleeu leeng, Mizo cih kammal in R-group midangte deep khin zo veve ahih manin amau’ deih miZO leh Ggroup lam pana ZOmi gawm tuah leeng, ZO ah kigawm kik hun zong a hong tungtung ding hi ta-in ka ummawh hi. (ZORO) Minam PAUPI a hong pian na’ngin R-group a Lusei pau leh G-group a Paite/Tedim pau a thahat, a kizeel kim zo zawzaw hong hi dinga, tu dinmun-a et lian-in Lusei lai sin-in India gamah Master degree kisin thei ta-a, Kawlgam-ah Tan 2 ah zong kisin sak meel nawn lo ahih manin Tedim pau a itte’n bang seem ding i hiam cih lunggeel hun ding hi ta hi. Tua ahih manin G-group te in saklama Paite pau leh khanglam-a tulai Tedim kampaute bulphuhin i saan’ theih taang ding kampau khat i neihkhiat theih ding thupi mahmah hi. G-group teng in Tedim/Paite kam i phungvuh zawh kei leh, Lusei pau i zat loh phamawh hun hong tung thei ding hi. ( I zat nop pah leh lah a ready sa phial hi ta.) Bangbang ahi zongin Minam minpi khat leh Minam Paupi khat nei khin leeng, minam GAMPI khat zong Topa Jesu hong pai kik pak kei naak leh, i nei man/i neih hun hong tung lo ding hi cih, kuamah kiciam ngam saam lo ding hi.

[Hih lai, 15 MAY 05 WED ni-in kingah hi.]
 Source : 
Page  57  of  200

Vahui Magazine 2006

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Minam Gampi Khat, Minpi Khat leh Paupi Khat. Gelh - Tg. Hangsai (Zoland) Description: Rating: 5 Reviewed By: Cinpu Zomi
Scroll to Top