728x90 AdSpace

Hot
Menu
Zon-ol na Donate

Latest News

NLD Kumpi Thak le Mailam Masuan. Gelh - Pau Sian Lian

NLD Kumpi Thak le Mailam Masuan
Gelh - Pau Sian Lian


2015 kum beikuan petpet teh gambup huam kiteelna ah politic lam a kantelte, politic paizia a tuatsiamte upmawh ngam zahsang le Nationa League for Democracy (NLD) party mahmah in amau-le-amau a ki lamet ngam zah sangun a tamzaw-in mipite’ teelna hong ngah uhhi. Kiteelna-ah NLD party zat tangkona in “Kikhel hunta!” (Time to Change!) cih hi-in, a tua kammal limlim in zong mipite lungsim ong bun mahmah khin-a, kikhelna tampi mah hong piang to zenzen tahi. Hih thului ah a hihleh NLD in gam koicih bangin gam hong makaih ding-a, bangteng tuakkha theidiam cih kei mimal muhna kong sung dinghi.

NLD Party Zia

NLD party-in kiteelna pan gualzawh na lianpi hong ngah takteh gam tampi ki lungdam mahmah a, “Mipite makaih ding, mipite sungpan, mipite’ teel democracy kumpi taktak” ngahta hang-ei kici ngeingai tek hi. Nitumna lamte democracy cihpen suahtakna (freedom) le mihing thuneihna(human rights) ultungsak ki-ukna hi phadiak hi.  Ahi zongin kei mimal muhna ah NLD party in nitumna lamte(western gamte) zat democracy dan hong hi masa pah biangbuang khollo dinghi. Democracy kumpithak I cih NLD party limlimzong gamvai tuamtuam hangin party sung thu vaihawmna khat peuhpeuh-ah tungsiah thuthu (centralize) mahmah hi. Thu-le-la khensatna peuhpeuh ah a nuailam a mipite aw sang makai tungsiahte khensat bangbang ki zuizaw-in, party president Aung San Suu Kyi-in gamvai huihnunzia tawh kilawm kituak a sak dandan-in a khensat hi maihi. Adangte-in a semkhia hizaw a,  Aung San Suu Kyi pen mipil le mihoih khat ahih man-in kisiat muhloh bek a hihi. Tua ahih man-in NLD paary gam makaih term masa kum (2016-2021) sung kituak khathei ding pawlkhat kong kumnuam hi.

1.    Vai kitukalhna
NLD party makaih kumpi-in gammakaih na kipatzawh asawt lua lo hun khatteh vai pawlkhat a lum a let ongsuak thei dinghi. Banghang hiam cihleh NLD in gam vaihawm na lam-ah panmun taktak a ngah masak na hi-a a omsa makaihzia zong khel/laih/puahnuam lai uh ahih man-in hoih/sia zaw hiam cih I theihloh vai ki lumletna honkhat hongom thei dinghi. Tua bektham loh hun saupi NLD CEC te cih bangbang ngiat-in kal kituak takin suankhawm NLD te-in party khat cihciang sungah om nawnlo-in ki-ukna innpi (executive, legislative, judiciary) lamteng-ah le, Naypyidaw ah zum tutawh, state/division tuamtuam ah makai tawh kitheh thang ta uhhi. Tua ahih man-in ki-ukna lam a mapangte le party makai lamte(party leaders vs government policy makers) kikal ah zong thumin tak a kikupman hun ding hamsa ta dinghi.  Party makai Aung San Suu Kyi mahmah in zong vaipuak sah lua ta a, vai pawlkhat-ah buai khengkhang-in ong kitukalh mang kha thei dinguhhi.

Japan gamah zong hihdan kikhel vatna tuakkha ngei uhhi. Liberal Democratic party in kum 1950 lai pek a kipan Japan gam a uktoh ngelhngelh phialuh-hi a, 2009 kum taktak the mipite-in kikhelna kisam cihna tawh Democratic party of Japan (DPJ) panpih uhhi. DPJ in ki-ukna lam sem kha ngeingiat lo ahih manun, panmun lakzawh sawt lo-in a lum a let suak-in kum thum sungbek gam makaih kha uh-a prime minister thum veitak kikhek liang uhhi. Ngeina kician (system) khauhpai mahmah neisa Japan gam nangawn tuahsia thei uhhi. Myanmar gam-ah bel a siatzawk beh nading om nawnlo bilbel hi. NLD kumpi zong mipi deihna kiapah zatzat sam lo-in makaih na-ah suksia gawp veva samlo dinghi. Ahi zongin mipi lampan lah lamet khauh lua ahih man-in, omkhong lo-in na hanciam tak-in hong sem ding uh-a, zong khialh nemnumna hong tam lai dinghi. Na ong sep taktak uhleh Kawlte pauleng (pha-yu pha-ye) limlim kha thei ding uhhi.

2.    Kuan maban zom ding?
Thu nihna-ah hihbang NLD in makaih ki-ukna ah kitukalhna a omkawmkawm mah-in nidang pek-a kipan leitung mun tuamtuam pan Myanmar gamvai a vei, a kinte- theihnop mahmah Aung San Suu Kyi khit maban kuan zomding?  (beyond Aung San Suu Kyi) cih dotna tawh kisai dawnna ahi ciangkhat kimu khia thei (akl) ki mangsia khiat thei ta dinghi. NLD in kum 20 val Aung San Suu Kyi le NLD CEC tawmkhatte in a hoih pen dingin makaih sa uhhi-a, kumpi khat zahin sepkhiat ding tamlo ahih man-in vai sah lua naihiaulo in party mi lakpan mihoih, mimuanhuaite in zong sepkhiat theihnading hunhoih ngah kha nailo uhhi.

Tun a hih leh kumpi vaipuak lianpi ngahin semta uh ahih man-in NLD mi panmun ngahte sungpan mi muanhuai, kiva a siam taktakte hong ki langkhia toto lel dinghi. Siamna cihteh mipite ading veina nei-in kiva tak-in vaihawm sak theih nalah hi-a makai Aung San Suu Kyi maipha ngahzo-a NLD CECte tawh mapan khop theihna zong a hihi. Makaihna tawh kisai, suahpih makai siamna(born leader) le hanciam/sin tawm makai (made leader) cih kikhen phadiak hi. Aung San Suu Kyi pen born leader nam hi-a, tu laitak NLD in made leader honkhat neita uhhi. President U Htin Kyaw, Vice-president Pu Henry Van Thio te a kipan parliament speakers U Win Myint, U Man Win Than Khaing te pawlpen made leader cih theih hiphot hi a hlutdaw ah zong dim metmat uhhi. NLD in term khat hong makaih khitteh mailam a makai ding kimu khia thei tadingin ka lamen hi.

3.    Ngeina Thak
A thumna-ah thukonghonna ah gelhsa mah bangin NLD kumpi-in democracy zia-le-tong taktak sangin China kumpi zatdan ahi Confucianism lungsim puakpan piangkhia Meritocracy hong zangzaw ding uhhi. China kumpi le Communist party te pen Confucianism lungsim puakzia zang uh-a tua lungsim pen China, Japan, Korea le Singaporete-in vom mahmah uhhi. Confucinism tawh kisai ka laibu bawl “Bucing Khantohna le Picing Ki-ukna” ah ka gelhngei hi. Tom gen mahmah lehang mihing khat mun-le-za piakna ah ama neih-le-lam hauhna, ulian tanau neihna le thu dangdang en-loin a siamna, a gualzawhnate tungtawn-a panmun piakna (merits) hong kizang mahmah ta dinghi.

Laivuan na ngeina (exam system) zong kici-a, panmun khat peuhah kipum deihsakna tawh kipiakna hi nawnlo zaw-in a pil taktakte, siam taktakte bekin panmun limci hong ngah toto ta dinghi. Gentehna-in NLD in election a zawhkhitteh teelcing palai khempeuh khauhpai takin pattahna (intensive training) nei-uh a, laizong vuansak pah ngiatngiat uhhi. Tu laitak state/division ah prime minister le hlutdaw speaker sem dingte zong mipi makaihna, vaieelnapilna hilhsim khinkhian khin uhhi. Tua bang dan siamna/kivak na ultun makai kiteelna hong kizom toto lai kha dinghi. NLD party pan MP te zuihding thukhunte pawlkhat China kumpi le China Communist party te ziatawh ki zawitawn mahmah hi.

4.    Dek Siamna
NLD kumpi in sepmasak ding pulakna-ah gamsung daihna le kilemkikna (peace & reconciliation)  sem masa nung, ci-uh hi. A sawtlo-in zong Second Panglong (21 Century Panglong -NLD version) bawlsawm uhhi. Hih thupen NLD bek hilo USDP makaih hunlai pekin U Thein Sein in galkapte tawh a sepkhop nop mahmah khat uh hikhin-a Fedederal Democracy cih kammal bang minamdang(ethnic) tesang lo pahpah nuamzaw dep uhhi. Hong piang lua lel dinga, minam khempeuhte ading lungkim huai taktak mah dinghiam?, cihbel patauh huai veve hi. Kawl mite hamphat nading deihkaihna tawh kisuai thukhun zong hong piangkha thei mai dinghi. Bangbang ahi zongin, ciantak-in gen ngam khat-in, 2008 Constitution sang state/division kumpite-in thuneihna ngahbeh zaw hamtang in, nuamtuam zaw veve sam dinghi.

Federal ukna tawh kisai Federal pu (federalist) te-in a gen uhteh, federal pen gambup huam kumpi (union/central government) le gamkhat huam kumpi (state government) te kikal-ah ki kidek (bargain/ compromise) nahi, ci uhhi. Constitution tungtawn-a kimawlsiamna kici thei-a, van khat I deihleh tua van zuakte tawh kidek siamna tawh kibang hi. Tua ahih man-in Second Panglong Confederance kipat phet a kipan federal ki-ukna zia thak ah masuan teh thukhun zatsiam (van deksiam) mipilte kisap mahmah hun hong hi phadiak dinghi.


Mipite-in minam ai hamphatna I khahsuah nopkeh, policy geelsiam, ngaihsut siam, phutsiam, thu kalhkhiatsiam gamvai geelsiam mipilte kisam mahmah tading I hihi.Tua ahih man-in I maingat Federal Democracy ki makaihna zia thak-ah pilloh a pha mawh, siam loh a pianglo hun hong tung toto ta ding-a, pilna kician nei-a, I siam takpi nakleh Hlutdaw ah I tu-a tu ta keizongin nasep ding a-dim-a ha in hong omlel dinghi.  

**********************
Laigelh pa Pau Sian Lian in Zomi eLibrary / Laibusaal ading in phakna hong piak ahi hi.
date:Mon, May 2, 2016 at 9:06 AM

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: NLD Kumpi Thak le Mailam Masuan. Gelh - Pau Sian Lian Description: Rating: 5 Reviewed By: Cinpu Zomi
Scroll to Top