728x90 AdSpace

Hot
Menu
Zon-ol na Donate

Latest News

NUTE I PAHTAWI HI (Paunak 31:10-31), Agelh : Rev. Dr. Zam Khat Kham

NUTE I PAHTAWI HI
(Paunak 31:10-31)
Agelh ~ Rev. Dr. Zam Khat Kham


Thupatna
Tu kum adingin NUTE NI hong tung kik ta! Kum khat-a khatvei i pianna i nute i pahtawi theih ni hong tung kik ahih manin lungdamhuai mahmah hi. Tu laitak ka omna mun bang ah NUTE NI a hi a, PATE NI ahi zongin kibawl ngei keii lo mawk ahih manin innlam kingai mahmah hi. NUTE NI i cih America gam pan-a hong kipankhia hi, kici napi-in America gam mun tampite leh pawlpi tampite ah kibawl mel lo mawka innlam ngaihna khang mahmah hi.

I theihsa mahbangin NUTE NI I cih 1908 kum May kha ni 10 a Anna Jarvis in a pianna nu a phawkna leh a pahtawina tawh a patkhiat hi a, tua ni-a kikhawm nute ama’ nu in a deih penpen ahi “carnation” pak pia–in pahtawi hi. Tua banga nute pahtawi nadingin ni khat sehtuam-a nute phawkna leh pahtawina neih ding hoih kisa tek mahmah ahih manin a sawt lo-in mun tuamtuam ah kizanga 1914 kum Maykha ni 9 ni-in US Congress thukhensatna tawh President Woodrow Wilson in kum sim-in May kha nipi nihna ni peuhmah NUTE NI a a kizat nading tangko khia hi. Tua hun-a kipan-a kizang, ei kiang zong hong tunga, nasep hoih mahmah ahih manin i pawlpi ciat ah i zat ahi hi.


I Nute Thupi Takpi Lua!
I pianna nute i pahtawi ni-in i nute in hong nuntakpih lai zong ki-om dinga i it i ngaih mahmah i nute in hong nusiat khit zong i om kha ding hi. Bangbang ahi zongin nute lo a mihinga piang ki-om lo ahih manin i pianna nute phawkin pahtawi tek ni, ci-in hong zawn nuam ing.

Nute i cih bel Pasian in a tuam vilvel a hong piak ahi hi. American-te’ president minthang pen khat ahi Abraham Lincoln (February 12, 1809 – April 15, 1865) in a nu tawh kisai thu gen thei zel a, amah bang ci lehang, a nu in sihsan baih mahmah ahih manin a nu a phawkna leh a ngaihna lian mahmah hi. “Hih ciang ka tuna leh mailam-a ka hih nading khempeuh ka nu’ tung ah beii ka ba hi. Ka nu’ thungetnate ka phawk dena tuate in ka nuntak tawntung hong zui den hi. Ka nuntak tawntung ka bilkha ah luai den hi,” (All that I am or hope to be I owe to my angel mother. I remember my mother’s prayers and they have always followed me. They have clung to me all my life) ci-in kum 8 a phaka a nusia a nu’ tungah a lungdamna gen thei den hi. Nute’ manphatna thei lua ahih manin ,”A Pasianmi (godly) nu a neite peuhmah mizawng kici thei ngei lo ding hi,” na ci ngiat hi.

Amah bek hi lo-in a dang president-te in zong a nute uh a ngaihna uh leh a nute uh amaute’ adingin bangzah-in thupi, cih na gen tek uh hi. President masa pen George Washington (February 22, 1732 – December 14, 1799) bang in, “Ka muh ngei numei khempeuh lakah kei’ nu mah mel hoih pen.  Ka gualtungtuanna khempeuh ka nu’ tung pan-a ka ngah gamtat luhek, lungsim lam leh pumpi kipattahnate hang ahi hi” ci ngiat zen hi (My mother was the most beautiful woman I ever saw. All I am I owe to my mother. I attribute all my success in life to the moral, intellectual and physical education I received from her”). President sem ngei dang khat ahi John Quincy Adams (July 11, 1767 – February 23, 1848) in zong, “Ka hihna bangbang ka nu’ hong bawl bangbang hi mai ing,” (All that I am my mother made me) ci-in ama adingin a nu a thupi luatna na gen ngeungeu hi.

President sem ngei dang khat ahi William McKinley (January 29, 1843 – September 14, 1901) in a nu tawh kisai-in, “Vantung (Pasian) thupha hangin ka nu’ upna sung mah ah nuntak ding leh sih ding tumin Pasian lungdam nading ka tum den hi” ci ngiat hi (By the blessings of heaven I mean to live and die, please God, in the faith of my mother). Tua mahbangin president sem ngei khat mah ahi Ronald Reagan (February 6, 1911 – June 5, 2004) in, “Ka nu tung pan in thungetna a manphatna, tupna bangci bangin nei-in tuate tangtung takpi ding cih bangci banga um ding, cih thute ka sin hi.” ci-in na gen geni hi (From my mother I learned the value of prayer, how to have dreams and believe I could make them come true).

Hihte bel mi minthang pawlkhat in a nute uh tawh kisai a gennate uh i gen kikna hi lel a, amau bek hi peuhmah lo-in hih lai a gelhpa kei mahmah a kipan hih lai a sim mi khempeuh in zong hih bangmah-in i nute tawh kisai gen thei tek ding hi hang. Nute manpha lua a, nute hong pia Pasian tung ah i lungdam lua hi. Ei’ ading a hoihpen nu hong pia tek ahih manin Pasian’ tung ah lungdam i ko hi.

I Nute I Ngaih Manin I Ut Peuh Ban Gen Le’ng
Tuni pen i pianna nute i pahtawi ni ding hi a, i thuhilh mawkmawk ni ding hi lo hi. Thuhilh siapa ka hi phial zongin tuni-in ka nu thu ka hilh nading om lo a, ama’ hong thuhilhna tawh hih ciang a tung ka hih manin ka nu ka pahtawi ni ding hi beka, i nute i pahtawi ni ding hi bek hi, ci-in ka ngaihsun hi. Rome-te 13:7 ah, “Mi khempeuh tungah leii na bat bangin loh kik in. Phiangsiah piak ding na bat leh phiangsiah pia in; siah piak ding ahih leh siah pia in; zahtakna piak ding ahih leh zahtakna, pahtawina piak ding ahih leh pahtawina pia in,” ci-in Laisiangtho in hong hilh hi. Thunei kumpite tawh kizopna thu a gen ahih hangin zahtakna leh pahtawina piak dinga a kilawm lua mahmah i nute zahtakna leh pahtawina pia tek ni, ci-in kong hanthawn nuam hi.

Nute bel thupisa lua mahmah semsem mawk ing. Mangkangte in paunak khat nei uh a, leitung minam tuamtuamte’ paunakte en kawikawi lehang zong, hih paunak tawh kibang paunak na nei tek uh hi. “Nauluai a veii khut in leitung uk hi” (The hand that  rocks the cradle rules the world) cih ahi hi.  Thuhilh siam pastor khat in, “Nauluai a veii khut in leitung uk mah a, ahi zongin tua luai sunga nau a ihmut theih nadinga luai a veiiveii khut pen a ihmut a cim ngei het lo mi khat tawh kizom giigeii hi, cih i mangngilh loh ding thupi hi, ci sezen-a hi lua mahmah hi. A thaman uh a kisehsak ngei het lo nute zan bangzah ihmut kipelh-in a tate uh itna tawh khiim-in kem uh, cih i phawkkhak loh hun peuh om mai leh a kilawm hun om zanzan hi. Ngaihsut huai mahmah!

Thugen siam mahmah khat in ahih theih nawn loh cianga a nu a ngaih luatna hih banga a gen ka za ngei hi.
§  Kum 4 ka phakin – Ka nu in na khempeuh/khatpeuh hih thei
§  Kum 8 ka phakin _ Ka nu in thu thei mahmah! Thei tham mai!
§  Kum 12 ka phakin – Ka nu in na khempeuh na thei khol sam kei e maw!
§  Kum 14 ka phakin – Ka nu in hih zong, hua zong, thei kei leuleu ei!
§  Kum 16 ka phak ciang –Nu e? Thadah peuhmah ei, thu thei kei den mahmah!
§  Kum 18 ka phak ciang –Ka nu bel ka thadah semsem, a kimanna mel om kei mai!
§  Kum 25 ka phak ciang –E, ka nu in hoh thei kha in teh!
§  Kum 35 ka phak ciang –Hih thu i khensat ma-in i nu dong phot dih ni e!
§  Kum 45 ka phak ciang –I nu om hi leh a bangci ngaihsut tam maw?
§  Kum 65 ka phak ciangin bel –Ka nu om lai henla hih thute kikum hiathiat thei zen leng ut mah si’ng maw!

Ute naute aw, nu i neih lai leh hih thute ngaihsun ni aw. I ngaih hangin hong om nawn loh hun; thu i kuppih nop mahmah hangin a om nawn loh hun uh a om takpi ding hi mawk! Nang kum bangzah pha? Koi mun ah na om a leh?

I gen nop bulpi bel i nute thupi lua a, i ngaih den hangin i ngaih deuh hun zong om lai hi, cih ahi hi. Tua ban-ah, Laisiangtho mahmah in zong nute pate pahtawi ding thupisak mahmah, mihingte leh Pasian kikal kizopna ah Pasian thupiak/thukham 4 te a piak khit ciangin a ngana ah, mihingte le mihingte kikal kizopna ah a thupipen, a masapenpen-in nu leh pa pahtawina, na pia hi (Paikhiatna 20 leh Ephet 6:1,2). Ephet sung bangah “kamciam tawh kipawl thupiak masapen hi” na ci tangial zen hi.

Nute Mah in Hong Len Zo Pen
Nute mah in innsung hong len zo, hong khui zo den hi. Nute a om teh innsung nuama, nute a om loh ciangin innsung dai hi.

I ngaihsun kha ngei diam thei ke’ng, Laisiangtho sung ah “NU” ci-a kitei Hebrew kammal pen “AME” hi a, “Ah-may” ci-in kisim hi. Kawlkam bang tawh hong kinai kik zawzen! A khiatna pen, Dr. James Strong, STD, LLD in a genna ah, “the bond of the family” a cihna hi a, ei Tedim pau-in cileng, “innsung a lencip/khuituah/gawmtuah nu” cihna hi mai ding hi (James Strong, The New Expanded  Exhaustive Concordance of the Bible, (Nashville: Thomas Nelson, 2010), 20, Hebrew and Aramaic Dictionary #517.  A khiatna pen “nate lenkip-a a thakhauhsak” a cihna hi hi. Innkuan sung ah pate’ dinmun i neusakna ahih loh hangin (bang neusak na mawk ding, ei zong pa khat hi ve hang maw!), nute pen innsung a khuituah, a lemtuah, a ki-itsak, ka kipumkhatsak, a len zo pen, a kem zo pen mah hi mawk uh hi.

Khatvei, Mangkang gam ah sang siamah khat in a sangnaupangte innlai (home work) khat pia hi, ci. “Laimal gawm khat kong dong ding hi. Hih maimal pen mal guk kigawm laimal khat ahi hi. Tua maimal a pau thei bang hi leh, “Kei pen ka min ‘M’ tawh kipan hi. Mal guk kigawl laimal khat ka hi hi. Kei ka omna peuh ah a ‘hup’ den khat ka hi hi” ci ding hi. Tua pen bang hiam, cih hong ngaihsun unla zingciang sang i kah kik ciangin hong gen un” ci hi. Naupangte a lang val in tua siamahnu gen nop pen “NU” (Mangkam-in ‘Mother”–M tawh kipan, mal guk pha) ci-in dawng lian uh hi. Siamahnu’ gen nop bel, “Sik-hup” (Magnet–M tawh kipan mal guk pha) hi zaw gige hi.

Hi takpi hi ve’n, nute in tate a ‘hup’ mah hi mawk hi ve’n. Innsung a khuituah, a khualumsuah, a ki-itsak, a nopsak i cih nute mah hi mawk hi ve’n maw, tua naupangte mawhsak het ke’ng, ngaihsun thei uh sa peuhmah zawsop ing.

Nute in tate a hoih deihsak lua mahmah den uh hi. Topa Zeisu leitung ah a vak lai-in James leh John-te unau in zong a nung na zui uh hi. A nungzuite lak nangawn ah zong na bul zawzen uh hi. Ni khat i Topa kiangah a nu uh a tate tawh hong pai-in, a mai ah khukdin suka, “Hih ka tate khat na taklam, khat na veilam ah na tutsak nading hong ngen ing,” ci geu mawk hi (Matt. 20:20-23). Nungzui dangte bang in a zak uh ciangin haza mahmah uh, ci lai hi (a neu 24 ah). A ngetna a ngah leh a ngah loh thu khat, tua banga a nget zong a kilawm mah hiam, hi lo hiam cih zong thu khat, bangbang ahi zongin a tate’ ading a hoih deihsak lua hi mawk hi! NU khat ahihna tawh ahi ding mah hi, ci ing. NU hi mawk hi ve’n maw!

NU dang khat leuleu in dawilut/dawiveii a tanu a dam nading i Topa kiangah na ngen leuleu hi. Tua nu pen Tyre lam, Sidon lam a paina-a a tuahkhak hi a, Phoenician kici Gentile numei khat na hi kha ciitciat hi. Bangzah-in a Gentile ta zongin NU hi mawk ahih manin a tanu it lua mahmah a, bangmah peuhmah in khaktan zo lo-in a tanu a dam nading na ngenkhia tentan hi. “Ui” bang na kici ta leh a tanu dam nading ahih nak leh “tate” sabuai tung pan-a kia “anneng kiate” nangawn luh thiamthiam ding haksa sa het lo hi. “NU” cih taaksa mahmah ing. NU taktak hi. Zahtakhuai mahmah hi. I Topa in bel a upna a muh teh lamdangsa mahmah-in pakta mahmah a, ke’n bel a upna bek zong hi lo-in a tanu a itna ka muh ciangin “NU” taktak ahi ve maw! ci-in pahtawina ka pia nuam lian hi!

NU i cih tua hi mawk! Leitung ah tehpih theih ding zong om mai ding ahi hiam, ci ing. A it zo den, a maisak zo den, a lungduai zo den, a thuak keiikaii zo den, a telsiam den nute hi mawk uh hi!

Nute in Ngawl Ngam Tangial Uh
Tate nek ding a deih luat manun nute in bangzah vei a gilvah-un zong an a nek loh mai hun uh om ding, cih ngaihsun kha ing. Zan-in ihmut nuam taka a ihmut loh bek uh hi lo-in, tate nek ding a deih luat manun ngawlngawl tangial mai uh hi.

Khatvei, sang khat ah siamah khat in naupangte a gawm, a dawh, a khansak, a hawm, cih mathematics (ganan) hilh hi. Naupang khat kiang ah, “En o, gentehna-in, na inn vuah na nu in tangmai pum khat na innkuan vua na nek dingun hong hawmsak ci hi maw. No innkuan mi bangzah pha?” ci-in dong hi. Naupang in, “Sagih, ka nu tawh, ka pa tawh, ko unau tawh, mi sagih pha ung ei, siamah” ci saisai nong hi. Siamanu in, “Tua ahih leh na nu in tua tangmai pen phel bangzah suah ding?” ci-a a dot leh, naupang in, “Phel guk” ci lianmawk hi.

A naupangin a gen nopna leh a ‘ganan” pai zia a tel lo hi’n teh, ci-in a siamanu in, “Hi lo e, no sagih pha hi veu cin maw, na nu in na vek vua dingin tua tangmai hong hawmsak leh phel bangzah suah ding?” ci-a a dot phatphat ciangin, “Phel guk ka ci ve, siama. Ka nu in, ‘Noteng in ne lel vo, ke’n ne khin ing, ke’n duh nawn ke’ng’ ci denin phel guk bek hong suahsak den,” ci mawk hi. NU mah ahi zel ve maw!

Paunak Laisiangtho In Hong Gen Nute
I thubulphuh Paunak Laisiangtho sunga i muh NU en dih ni. Amah zong a tate adingin a thupi lua mahmah NU hi a, a pasal adingin ZI HOIH a hih manin , “A tate dingto-in thupha ngah nu aw, ci uh hi; tua mahbangin a pasal in zong hih a, amah a phat hi. Numei tampite in na gina/thupi sem kha mah unteh, ahi zongin tua khempeuh na khup khin hi” ci uh hi. A nuai zek, a neu 31 ah, “A thalawhsa pahtaakman tua nu pia unla, a nasepte hangin khuapi kulh kongpi ah amah kiphat hen” ci tangial zen hi.

Hi thei hi leh, hun ngah hi-in i gen nopteng hih laidalte tung ah a ta ding hi leh, hih Paunak 31 buppi a banban-in sutsuk ngelhngelh lehang ut huai peuhmah hi. A hun leh a mun kicing lo ahih manin a tom-in thu thum i gen ding hi.

I. A KHUT IN SEM HI
Hih Paunak 31:10-31 sunga i muh a thupi mahmah numeinu pen suangmanpha sangin manpha zaw, ci hi (31:10). A pasal in muan cihtaka a muan, a muanhuai lua mahmah numei hi lai hi (31:11). Siatna peuhmah tun ngei lo-in thuhoih thupha bek tun den, ci hi (31:12). Tuateng a gen khit ciangin a thupi mahmah thu thum na gen hi.

A masapen-in, a khut in a sep ngiatna na gen hi. Zi hoih, nu hoih i cih pen a pasal leh a tate adingin gim zong tawl zong phawk lo a na a semsem numei hi mai hi.

Khatvei, hih America gam ah, tangvalno khat in nasep ngah thak nongzen a a lawmte kiangah kisial hi. “Zingsang nai 5:00 am a tho, tua teh breakfast (zingtung an) ne samsam” ci hi. A lawmte in “No innkuan sung ah tua hun a tho nang bek maw, kua zong tho lai ahia?” ci a a dot uh ciangin, “Hi lo e, ka nu zong tho e, kei’ an ding hong huansakin hong guansak, tua teh ka pa’ an ding zong huansakin guansak lai ei” ci hi.
“Na nitak an ding e leh?” a cih uh leh.  “Ka nu mah in na huan e” ci leuleu.

“Tua ahih leh na zing-an ding uh leh na sun an ding uh a bawl khit ciang na nu sun sungteng na lum hithiat ve maw, tua teh na nitak an ding uh na huan ve?” a cih uh leh, “Mawkmawk, hi lo e, ka inn uh na hah, ka naute na buaipih lai, tua teh inn ka tun ciang vua ka nek dinguh nitak an na huan leuleu” ci nong hi.

“Tua teh no bang hih?” “Ko maw? TV khawng en. Ka nu’n bel kuangteng sawp, puan zong sawp, puan zong taih lai, a lup hun dong man ngei mahmah kei ei” ci hi.

“Tua ahih leh no bel nitha ngah veu teh maw?” “Ngah e, kei leh ka pa in nitha ngah den”

“Na nu e? Ama’n a ngah hia?”

“Ka nu’ nitha maw? Ama’n ngah lo e! Ama’n na a sep keii loh pi!” ci.

NU in nitha ngah nading na sem lo ahih teh “na sem hi kei” a ci kha zenzen na om uh leh, na kam uh na cip lian un. Nute zah a na sem om ngei lo hi. Hih Paunak sung bang ah NU in na namkim sem hi, cih kimu hi.

– Puan khui hi,  a neu 13, 19, 22 “Tuumul tengin…a khut tawh sem hi.”

Van lei hi, a neu 14 “gamlapi pan an hong tunpih”

An huan hi, a neu 15 “ Khuavak nai lo-in tho a, a innkuan ading an vaihawm”

Huanbawl-in lokho hi, a neu 16 “leitang lei-a lenggui suan hi.”

A neu 15 ah “Khuavak ma-in tho a…an huan” ci hi.  A neu 18 ah “zan-in a meivak mit ngei lo” ci lai hi. Bang huntenga ihmu hi pial ding hiam!
Mangkangte in paunak khat nei uh a, “Man works from sun to sun, but a woman’s work is never done,” ci uh hi. “Pasalte nasep pen nisuah pan nitum hi a, numeite’ nasep pen ‘man ta ing ei,’ cih hun om ngei lo hi” a cihna hi.

A neu 27 ah “A innsung vai hawmin thadah lo hi” ci ngiatzen hi.

II. A KAM PAU HI
A neu 26 ah “Amah pilna tawh pau a, a leii tung ah thuhilhna muanhuai om hi” ci hi.

Methodist pawlpi a phuankhia pa John Wesley (28 June 1703 – 2 March 1791) Oxford University ah sang a kah lai-in, a sangkahpih sangnaupangte in zu a nek dan uh amuh ciangin um thei mahmah lo hi. (Tuhun khawnga khangnote’ nunek sanek khawngte mu leh bang a ci tam mataw!)

A nu Susanna Wesley (20 January 1669 – 23 July 1742) lai khak pah a, a nu’ kiangah a lungsimteng gen hi. A nu in zong a lai khak thuk kik pah a, “Kong it mahmah ka tapa aw, na lungsim hong zo ding pumpi’ deihna khat peuhpeuh mawhna hi pah hi, cih phawk gige in” ci-in thuhilh hi” (My dear son: remember that anything which increases the authority of the body over the mind is an evil thing).

Susanna Wesley bel NU kici laka zong NU gina phadeuh a kigen ahih manin thu manpha tampi gen lai dingin um ing. Tanu tapa 21 nei a, tuate laka a nungta khempeuh thuhilh ngiatngiat ahih manin John Wesley pen Pasian’ mizat thuhilhsia suaka, a naupa Charles Wesley pen Pasian’ mizat Pasian’ phatna la ngaih dawng 8000 valte a phuakpa suak hi. A phuah late tuni dongin i sasa lai hi. “Ngai un, Vantungmi’n La Sa,” “Hong It, Zeisu Topa Aw,” “Itna Siangtho, Itna Kicing,”cihte ama’ phuah ahi hi.

Pasian’ mizat dang khat, Dr. G. Campbell Morgan (9 December 1863 – 16 May 1945) pen tuni dongin Pasian thugen minthanga kiciamteh ahi hi. Thugen lagen siam ngiat hi. Tapa 4 nei a, vekun Pasian thugen vive suak kim sawnsawn uh hi. Khatvei a neu lai pian khatun a innkuan-un ankuang um khawm uh a, midang lengla zong pawlkhat om hi. Tua lenglate khat in, “No innkuan sung ah kua thugen siampen a?” ci a a dot leh, a tate khat in, “KA NU” (MOTHER) ci lian mawk hi.

A nu thugen/thuhilh a siampen hi takpi hi. A pa uh bangzah-in Pasian thuhilh a siam zongin a nu’ thuhilhna tawh a unautengun a khangkhia uh ahi hi. Kei zong ka tate in tua mah ci dingin ka um hi.

NUTE in a khut bekun sem lo uh a, a kam uh tawh genin thuhilh lai uh hi. I NUTE thugente man den sawnsawn hi. Bang hang ahi tam? Laitan education nei kei ta le uh a pil keiimawkna uh bang hang ahi tam? Tate a pantah dinga Pasian ngiat in pilna a piak hi a, leitung sanga kisin thei lo pilnate Pasian in a guat ngiat ahi hi.

Tua thu hang mahin, a neu 26 ah “Amah pilna tawh pau a, a leii tung ah thuhilhna muanhuai om hi” na ci ngiat hi.

A khut in sem-in a kam a pau bek hi lo-a,

III. A LUNGTANG AH ITNA OM HI
A neu 11-12 “A pasal in muang mahmah a, a manpha khat beek kisap nei ngei lo hi. A nutak sung tawntung thusia peuhah tun ngei lo a thuhoih vive tun den hi” ci ngiat hi. A pasal in muang mahmah a a it mahmah numei pen a pasal a it mahmah numei hi pah hi.

Mangkang gam ah kum 60 val a kiten khit ciang vua a zi in sihsan mi khat om hi. Tua pa in a zi’ hansuang tung ah, “Innkuan Sung Lungnuamsak/Lungdamsak Den Hi” (SHE ALWAYS MADE HOME HAPPY) ci hiam bek, ci hi.

A nuntak sung tawntung , a pasal tawh a hin khop sung tawntung a pasal in muanga thuhoih bek a vaihawm nu, thusia a tun ngei lo nu hi taktak ding hi.

Khatvei, naupang khat in a lup ding ciang a pi kiang ah pai-in “mangpha” va pia hi. A pi kiang ah, “Ka nu leh ka pa in inn nuai lengla khan ah lengla thupi mamah pawlkhat lengla do uh hi ngel in teh” ci kawm hi. A pi in, “”Hi mah in teh mataw! A peuhmah-in lengla thupi ahih lam nang bangci theih na hia?” ci a a dot leh, tua numeino in, “Lengla thupi hi mah lo dia, ngai ve, pi, ka pa in ciamnuih a gen sim-a ka nu na nui den hi ve’n” ci.

Tua nu pil lua kisa-a a pasal “vang” a pia thapai ahi zen ta ve! A nuihza kei phial ta leh zong a pasal’ ciamnuih a hih mawk teh, mi dangte a nui kei zongin amah a na nui keiizen dan hihtuak hi.

Innkuan sung ah nuihna aw a kizak leh NU pil khat om cihna hi mai a, i innsungte ah nuihna aw tampi i zak ding lunggulh huai peuhmah hi.  Itna om cihna hi mai hi.
A khut-in sem hi.
A kam-in pau hi.
A lungtang ah itna bek om hi.

THUKHUPNA
Tuni-in, “Thomas Edison thupi zaw maw, a nu thupi zaw?” ci-in hong kidong hi leh, Thomas Edision (February 11, 1847 – October 18, 1931) pen leitung ah a om ngei nai lo na tampi, phonograph, electric bulb, motion picture camera a kipan a thak tampi a bawlpa ahih manin, “Thomas A. Edison thupi zaw,” ci lian kha ding hi hang. Ahi zongin amah (Thomas Edison) dong hi lehang, “My mother was the making of me. She was so true, so sure of me; and I felt I had something to live for, someone I must not disappoint,” ci-in hong dawng ding hi. Ama’ kammal a kiciamteh ahi hi. A nu in inn ah lai a hilh ngiat hi a, a nu in a pattah ngiat ahi hi. A nu in muanbawl lua ahih manin a nu’ khasiat nading, lungnop loh ding peuhmah ut ngiat lo-in hanciam tentan-a a tawpna ah mi thupi pente khat suak takpi hi.

A neu lai-in a sangkahna pan a siapa/nu in, a nu a pate a lah ding  laikhak khat puasaka, “Na tapa uh hai lua hi. Ka cih nading uh thei vet kei ung” (Your child is dumb. We can’t do anything for him) cih lai ahi hi. A nu in tua lai thuk kik liana, “Ka tapa a tel lo hi zaw uh teh. Keima’n lai ka hilh ding hi” (You do not understand my boy. I will teach him myself), ci hi. A cih bangin hih takpi-a amah bang ciang suakto takpi cih leitung buppi in a theih ahi hi. A om ngei nai lo a kibawl thak van leh na nam 1093 te bawl theih nading US patent a nei pa hi zen hi. Germany, France leh UK gamte ah zong tampi nei lai, ci uh hi. A nu sawt nungta het lo citciat! Tuate thei kha lai leh nuam ngel ding hi ve’n. Angtang ngel ding hi ve’n!

Kua thupi zaw? Thomas Edison maw, a nu?

NUTE thupi lua hi. Tuni-in NUTE i pahtawi hi! Pasian in thupha hong piaksak hen!

(2013 Kum May kha 12 ni NUTE NI ading THUPHA PUAK sunga suahsak dinga ka gelh hi. ZKK)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: NUTE I PAHTAWI HI (Paunak 31:10-31), Agelh : Rev. Dr. Zam Khat Kham Description: Rating: 5 Reviewed By: Cinpu Zomi
Scroll to Top