728x90 AdSpace

Hot
Menu
Zon-ol na Donate

Latest News

PASTOR’ TANU TECIPANNA (True Story). A gelh - Pastor PL Thlenga

PASTOR’ TANU TECIPANNA (True Story)
A Gelh - Pastor PL Thlenga
AIIAS. Pilippines

Khangno te aw, na khangno na uh zangsiam in lungdam un... Thuhilhna 11:9.

Unau li lak ah a neu pen leh kei bek numei ka hih man in, ka innkuanpih te in hong ngekbawl mah mah uh hi. Ka pa pen Pastor a hih man in, ka theih bat sun pan zong mun tuam tuam ah 5 vei bang ka ki suan kawi kawi ngei uh hi. Ka innkuan un ki lem leh ki-it mah mah ka hih manun, ka sanggam pasal te in zong lawm dang tawh kikhawl khol lo in, ka unau teng un ka kikhawl den uh hi. Nitak sim in innkuan kikhop ka nei uh a, tua tak ah ka pa in kei pen la hong tangsak (solo) sak in ka U John in guiter hong tum sak a, kua dang ngailo in ka innkuan un ka gualnuam thei mah mah uh hi.

Tan 10 ka kah kum ciang kei zong ka pumpi hong gol ta in, hi mah leh ka ute in kei pen naupang khat bangin hong ngekbawl mah mah lai uh hi. Sang pan ka ciah sim in, ka nu in bawngnawi leh cake lim mah mah hong bawl sak dena, a ka uJohn in ka homework (eng-sa) hong bawl pih a, ka u lak a a upen in a nasep hong man ciangin ka inn geia munzaang khat ah ak-kha(badminton) hong kimawl pih hi. Tua a hih man in, ka nuntakna bel lungnopna leh nopsakna tawh kidim hi. Sang ah lawmte tawh kikhawl mah leng inn lam ah a hih leh lawm dang tawh a kikhawl ngeilo phial ka hi hi. Tan 10 zong hoih takin ka ong a, ka u pen in a lopna party zong hong bawl sak hi. Tan 11 ka sin to a, hih kum pen ka nuntakna pumpi ka khuai (ki sia sak) kum a hi hi.

Tan 11 ah ko lawm a ki tuam kholh pian mi 3 ka om uh a, ko teng thum pen ka ki it mah mah uh hi. A hih hangin ka lawm gel in, Zatang nek zongsatna hoihlo nei uh a hih man in nuam ka sa het kei hi. Ka lawmte in kei zong ne ding leh sin dingin hong kut hangin, ka nu leh ka pa ka mitkha ah luai den a hih manin, ka zang ngam vet kei a, ka nial den den hi. Ka sang gei kiu khat a sumbuk khat om a, tua sumbuk ah nitak sim in ka lawm gel tawh ka lut pak thei zel uh hi. Sai ngak pa pen uJerry ki ci in,ko sang a u kum thum bang uzaw, tangval melhoih duangcing mah mah khat hi a, UJerry in ka lawmnu kiang ah, kei pen melhoih ong sak na thu leh hong ngaihthu na hilh den den hi. Ka zak tungin lamdang zong sa lo hi mah leng sangtuak simin tua sai ah baang den ka hih man un, uJerry pen lawmkhat bangin ka maingap to to hi. Ka lungsim sung ah ki tamkholh loh ding hoih ka sa a, a hih hangin ka kimuh nawh luat man in tua zong khen ding haksa ka sa hi.

Tua bangin uJerry tawh kikhawl mah leng tua thu pen ka innkuan pih te ka hilh ngam vet kei hi. Ka ute in hong thei leh ki nungaksak ci in hong tai ding cih ka thei hi. Ka ute in lawmngaih a neih uh ciangin ka nu leh pa kiang ah hilh pah pah uh a, kei ka hih leh naupang no khat bangin hong ngaihsun uh a hih manin lawmngaih nei dingin hong ngaihsun vetlo uh hi. A hih hangi, ki nungak sak pian ta ka hih man in nidang bang a ki naungek sak leh nuak khawng pen ka khel pian pian ta hi.
Ka Tan 11, laivuanpi ( final-exam) khit uh ciangin ka lawmte in an nekkhop party ding hong gel uh a, Innkuan annek khopna vai lo buang hih bang a lawmgual tawh an tuam nek khop leh party neih pen ka nei ngei nai kei hi. Ka pa kiang ah khuan ka ngen a, ka nu in hong awi khollo hi mah leh ka pa in hong awi lel a hih manin lungdam takin ka pai hi.

Ka lawmnu Merry te inn ah ka pai khawm uh a, uJerry zong hong pai hi. Nuam ka sa mah mah uh hi. Nitak lam ciang in ka lawmte in hih sang gualnuamzawk na dingin zu tawm tek dawn ni hong ci uh hi. Pastor innkuan pan in a khangkhia Pastor tanu ka hih mah bangin tu dong ka kam sung ah zu takkhat beek tum nailo a hih man in dawnlo dingin ka nial zo hi. A hih hangin uJerry in ‘tua bangin zu na dawn theih keileh, hi beek na dawn in’ ci-in beer tawh kibang khat hai dim khat hongpia a, kei zong ka lungsim in, “ hih bel phamawh sam ken teh, zu hilo a hih ciang” ci in a vekpi in ka dawn hi. A hih hangin tua zong ka lungsim sung ah kisuanna lianpi a om hi.

Ka lawmte a hih leh nuamsa lua in lam ziah ziah mah uh leh, ka hih ngei lo party a hih manin nuam sakna ka nei thei kei hi. A sawtlo in ka lu hong vai miaimuai lai sawn sawn in, ka mit khuamuhna hong gial sem sem in, ka ci ka sa teng hong hik a, ka lung hong am pian pian ta hi. Khua phawk ka kineih hang in ka theih cian mel a om kei hi. Tua bang a ka om ciangin, uJerry in lupna lam ah hong lut pih a, tua lupna ah kuamah om lo hi. Ka lawm dangte zong a mau khom in zukham khin lua a hih manin kua mah a kidon zo omlo cih a theih ciangin uJerry in ka puan teng hong suah khiat sak hi. Ka puan hong suah sak cih zong ka thei a a hih hang in uJerry khawlsak dingin tha tang leh aw mah mah ka neinawn kei hi. Ka lungsim sung ah ,” uJerry aw, hih bang hoih lo hi, ut lo hi ingh,Pasian in zong deih lo hi, hehpihna tawh hong khoih peuh mah ken” ka ci ci a, a hih hangin ka tha leh ka aw mah mah suak zo lo a hih manin, ka kho zo kei hi. A lungkim zah dong hong ompih a, a hih hangin nuam sakna themno khat zong ka nei kei hi. Ka mitkha ah ka nu leh pate mel bek bek luai den a, ka khitui zong hong luang ngelh ngelh hi. uJerry in bel ka taksa pen a ma nopsak nang in a utbang in hong bawl a, tawl lua ka hih manin ka ihmu suak a, tua zawh nai thum khit khawng ciang ka khanglo hi. Ka pumpi siangtho nawnlo cih ka theih ciang in ka leitung kisia zah in ka lungsim zong hong namah mah hi.

Zan 12 khit ciangin inn lam zuan in ka ciah hi. Ka nu leh pa leh ka unaute lungnuam loding cih zong ka thei a, ka upmawh bangin, inn sung ah ka nu leh ka pa leh ka sanggamte in hong na ngak uh hi. Keizong bang mah thusia omlo bangin ka lunggimna teng sel in maitai takin inn sung tum mah leng ka pa in bel hong theisiam pian hi. Ka pa in, “ Boih aw, hong ciah hak sicia, ka lung uh nuam theilo in hong zong dingin na ki thawi thawi hi ve ungh” hong ci,,ka tung a thupiang teng ka pa in thei leh bangzah takin a lungsim a na diam’ ci in ka ngaihsun hi.

“ uJerry aw, hong it tak tak lo hi teh mate, ken ka hih leh na thu zong nial ngeilo in ka u te khat bang in hong zahtak leh hong ngai mah mah in a, a hih hangin nang bel gualnopna leh taksa nopna ding bek in, zu hong kham sakin na deih bangin hong bawl zawzen maw” ci in ka lungsim in ka ngaih sun sun hi. Ka pa in, “guai aw, zan sawt ta ahih man in, ken thungetna hong nei ningin lum phot ni” ci in thunget khit ciang ka lum uh hi. Tua zan a kipan in lungnopna leh maitaina ka nei ngei nawn kei hi. Lungnopna leh maitaina khem peuh vasa bangin ka kiang pan in a lengmang dan in ka kinei hi. 
Ka tangthu pen hih ciang tawh a khawl thei hi leng ut lua ing, tua hi leh ka nuntakna a patna pan kipan kik in Pasian deihna bang in kizang in ka nuntakna lungnopna ngah kik mah ding hiveng, a hih hang ka tangthu pen a sia lam a kipan ding hi bek mawk. Ka laivuan ongsazian( exam result) hong suak in ka lai ka ong(pass) a, tawm bang ka lung hong nuam zaw deuh hi. Tua ni a kipan in ka sang lawmte leh uJerry zong ka khawl nawn vet kei hi. Ka Ute kiang ah ka hun a tam thei pen pen ka zang a, ka nu laphuak te a aw bawl in, ka unau un ka sa uh a, ka lungsim ana mah mah zong hong phatuam zaw deuh hi.

Sangkhak pi (Summer) hong bei in, Tan 12 kah dingin ka kipan kik ta a, sang ah lawm neih zong ka sawm nawn kei hi. A kilawm sak na in lawm bel ka khawl teei sam hi. A hih hangin khat vei vei ciangin ka tha hong zaw thei in, zan ka ih mut ciangin ka khuasik peuh hong suak thei mawk hi. Tawm tawm in ka khuh kheuh kheuh den a, khat vei vei ka sung pai thei zel hi. ka om nuam khol kei mah leh ka innkuan pihte ka hilh kei hi. Tua bangin hun hong pai to to a, damlohna neng neng ka neih pian pian man in ka pa in Siavuan kiang ah kilak dingin hong sawl a hih manin, ka uJohn tawh siavuan kiang ah kilak dingin ka pai uh hi. Siavuan pa in zong kician takin hong vel in, ka sisan zong datkhuaikhan( laboratory) a sittel ding in hong la a, zatui pawl khat zong hong pia hi.

Nitak lam ciangin ka uJohn tawh a ka sisan result la ding in ka pai kik uh hi. Zato siamah khat in a khan khat sung ah kei bek hong pai pih a, tua tak ah papi a zah tak huai mah mah nih in hong na ngak uh hi. Siamah nu zong ka gei ah hong tu a, thu tampi hong dong in, thukhel no no tampi hong dong lai sawn sawn uh hi. Papi khat zaw in, “ TU LAITAK IN HIV(Postive) BANG HI KHA LETEH BANG CIH DING NA HIAM?” cih dotna hong dong vat a, ka dawn dan ding zong ka thei kei hi. Tua dotna hong dot khit ciang in, ka maitang ah hong en in, “ Boih aw, na sisan sung ah HIV lungno ka mu uh hi” hong cih mawk ciang bangzah tak in ka mangbang mawk a hiam!!!! Um zo keng, tel khial hi nuteh, kei sisan hi kenteh.. cih sawm mah leng ka aw zong a suak zo kei a, ka geia zato siamah nu in hong hehnepna kammal zong ka za nawn mel kei hi. “ Pute aw hi thei kei, khial kha hi nuteh .. hih bang hi thei lo ding hi,,, ka cih kawm in “ uJerry aw, hih thu in bang hi mawk a hia???? Ka lungsim in ka ci ci hi. Ka lungkham lua in ka lung-am ciai ciai in bang mah ka phawk kei hi.

Khanglo in khua ka phawk ciangin, ka inn sung ka room a ka lupna tung ah ka na lum hi. Zan sawtta a hih manin, ka naipi ging tik tik te zong ki za hi. Ka kim ka paam ka khuadak leh, kanu ka pa, ka u John, Matthew, ka upen teng thum zong ka lupna gei ah kimkot in na tu uh a, a lu uh kun tek in kidik kawm in na tu tingteng uh hi. Ka nu pen nak kah lua cih zong a maisuah pan in ka thei siam a, na ka sa mah mah hi. Ka khuaphawk khanlawh lam ka pa in hong theih ciangin kei lam zuan in a tutphah hong neih phei a, ka pa pen ka kihta lua hi. A tanu neihsun a suan mah mah in HIV+ natna nei mawk,, ci in lingkawm mitsi kawm a kaki ngaih sut laitak, ka liangpan damtak in hong pom a, “ Boihno aw, lamdang mahsi maw, bang hangin hih bang natna ka tanu tung hong tung thei a hiam, kamsia mah si hang maw” ci in aw ling kawm a a tamlawhna zong ka bilkha ah a bei thei mah mah kei hi. Ka U John lam ka et leh nak kah lua kisa in a mitsan in khitui laam kawm in hong en,, kei zong en ngam nawnlo in kanu lam nga kik inka kah kawm in ka nu ka pom cip a la innkuan un tawlkhat ka kap uh hi.

Tua bang in kei zong maizum khual nawnlo in ka innkuan pih te kiangah uJerry hong bawl dan teng ka gen hi. Ka u John in uJerry pen Palikte kiang ah thubawla mat sak ding hoih a sak thu hong gen in, ka u te gel in zong thukim uh uh. A hih hangin ka Pa in, “ Hi lo e, thukkik na pen eite sep ding hi lo in Pasian khut sung ah koih zaw ding hi hang, Pasian in hoih a sak bangin thukhen ta hen” aw dam tak in hong ci hi. Aw.. pa aw, na tanu hi ding in kilawm kei mah sing maw, nu aw kum 17 bek pha pan hi veng, khat vei bek bek kidawm lo a ka tat khialh man bek in kei a si ding maw nu..UJohn aw, na lawmte kiang ah nong pai pih a, hih ka naunu hi ci a na angtan mah mah, tun bel hong tonpih nuam lo in hong zumpih zaw mah niteh maw,,ute aw…

Ka innkuan nopna khem peuh thakhat thu a paihkhiat hong bang a, ka ute thum zong a lungsim uh na mah mah a, ka nu lah akah tawp thei lo..ka pa a hih leh thunget hong hahkat san a,,”Topa aw katanu dam sak in,, damsak theihloh a neilo Pasaian hilo na hiam.. Topa,, ka tanu damsak in”.. ci ka pa in..Kei zong ih mu thei ngei nawnlo,, ka lungkhamna leh ka mangsia teng in hong buai sak sem sem..Zing lam nai khat pawl in ka khua-ul in hong buak in maiphiat ki siansuah ding a bathroom lam ka pail eh.. ka pate room lam ah mei na vaak lai in kei zong damtak in pai in ka et sim leh, ka pa pen tawlet lam nga in a khitui na nul nul in, kong vang a dak hongmuh ciangin, ki ip zolo in lei ah ka tusuk kawm khasia tak in ka kap a, ka pa in hong kawi a, “ Boihno aw, na haksatna tuak pen nang a ding in puak haksa mah si in teh maw” ci in hongkawi in ka pata un ka kap uh hi. Ka lungsim sung ah, awww Paaw, kei a dingin hoih mah si teh maw ka ci ci hi. Ka pata kah aw uh ka ute in zong hong za a hih manin innkuan inhong tho uh a, ka u John in “ Boih aw, kap nawn kei in, na khempeuh a hih thei Pasian nei hang, misi nangawn a tho sak pa in hong dam sak ding hi, tun zong na mel hoihna leh na taksa kiam vet lo hi” ci in hong hehnem hi. Ka pa zong a khitui hong nul in, ka pata teng un thungetna ka nei khawm uh hi.. tua zan in ka pa in ka nu tawh a kikal uh ah hong lumsak in ka khamuang mah mah hi. Lungkham khakun a om ding ka innkuan pihte in ahun hong pia vet lo in , ka pa leh ka U John in hong vak khiat pih in lungkiat lohna dingin hong hanthawn den hi. A hih hangin ka lungsim sung a a beimang theilo thu khat pen, dam dam in ka taksa kiam kiam dinga, a tawpna ah ka sih ciangin, “ a sihna a hang= AIDS ‘ cih laimal ka konguh ah kisuang lai ding hi mawk a .. aw cih ka ngaihsun den hi…

KHAT VEI GAMTAT KHIALH LEH NUNTAKNA ZATKHIALH BANGZAH TAK IN POI A HIAM…A hih hangin, ka nu leh pate leh ka ute hong itna leh hong thungetsakna hangin Khazih sung ah nutakna thak ngah khin ka hih man in ka lungkim hi. Hih ka taksa a sithei ah bang bang a tung ta zongin Topa sungah ka lungdam den ding hi ka cih theih man in Topa minthang ta hen.. Haleluijah..ka sepkhialh thaman pen ka taksa in thuak ding a, a hih hangin sihna nangawn a sih khit hun a hi tawntung khua vak hun ciangin AIDS natna lungnote in a nek theih loh pumpi taksa thak ka nei ta ding a, mite lak ah ki suang hetlo in hong Tanpa gei ah ka om ta ding hi. Satan hang a ka thum ka tau nate ka Honpa tanpa tung ah ka hilh ding a, Amah in ka biang a mittui khem peuh pen hong nulsiang sak ta ding hi. Aw tua hun ding ngaklah mah sing maw… Keima khialhna hang a ka nu, ka pa leh ka ute lunggim singimna khempeuh leh a lungkhamna khitui teng zong lungdamna luankhi hong suak ta ding hi.. Ka nu, ka pa ka ute aw tua hun ciang in na lungsim uh ka nasak ngei nawn kei ding hi cih kam kongciam khol ing..Mangpha..aw..ute, nute pate aw….

(He thu a at L. Holifax in hih thu pen personal in hon khak a hi hi. A ma kiang pan in share phalna ka ngen a, a tunga minte pen min tak tak hilo phuahtawm hi in, a thu pen bel thangthu maan(True Sotry) tak tak hi cih kong za sak sawn hi. Hih thu a simte khempeuh lungsim sung ah nungta den in, a diak in Khangnote lungsim hong ki lamdang sak thangthu a hih na ding ka thunget bulpi a hi hi..

***********************************
Source : 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: PASTOR’ TANU TECIPANNA (True Story). A gelh - Pastor PL Thlenga Description: Rating: 5 Reviewed By: Cinpu Zomi
Scroll to Top