728x90 AdSpace

Hot
Menu
Zon-ol na Donate

Latest News

Suangpi Mualsuang (Laibu). Khen Khat Na SUANGPIMI PIANNA THU. A gelh - Sing Khaw Khai

Suangpi Mualsuang (Laibu).
Khen Khat Na
SUANGPIMI PIANNA THU
A gelh - Sing Khaw Khai

Van leh Lei Pianna Thu.
1.         Pasian in Van leh lei Piangsak hi ci-in Tapidawte Laisiangtho sungah ki gelh hi. Tu ni dong nate thu thei mipilte lakah, Lei leh Van koici piang cil hiam cih a gen thei a gen ngam kua mah om nai lo hi. Laisiangtho sungah, a nuai a bangin ki gelh hi.

“ A kipat cilin Pasian in Vantung leh Leitung a piangsak hi.….Tuipi tung tengah khuamialna om a, tua tui tungah Pasian huih nung hi.

Pasian in khuavak om ta hen ci hi. Tua ciangin khuavak om pah hi. Pasian in khuavak hoih hi ci in mu hi. Pasian in khuamial panin khuavak khen khia hi. Pasian in tuite laizang ah van kuumpi om hen la, tua van kuumpi in tui le tui ki khen sak hen ci hi. Pasian in van kuumpi bawl a, van kuumpi tunga om tuite le van kuumpi nuai a om tuite khen hi. Pasian in Vantung nuai a om tuite mun khatah kikhawm hen la, lei keu ki dawk hen ci hi,. Tua mah bangin piang pah hi.

Kawlgam Leitangh Pianna Thu

2.         Leitung, Ni’ them khat ki ci:
Nate thu thei mipil ten, leitung pian cilna thu a kan uh ciangin Leitung pen, Ni pan a leengkhia Ni’ them khat hi ci uh hi. Hih leitung pian zawh hun a nung kan uh ciangin, kum awn 4500 sangin moi zaw lo ding hi ci-in um uh hi. Tua hun pan ki panin, Leitung leitangh tangthu ki gen hi.

3.         Kum awn 1000 hun thu. 
Hih simleitung a pian phetin Kawlgam leitangh zong na piang pah hi. Kawlgam leitangh thu a ki kan ciangin, tu maa kum awn 1000 dong ki kan thei hi. Tua hun in, tu hun Shan gam mualzang taampi pen, lei lu lam pan tu hun myitkyina dong bangh lei taw lam pan tu hun kaya gamm dong bangh nisuahna lam pan, tuhun Tanluan gun ii nisuahna lam dong bangh ni tumna lam pan tu hun Shan gam mong dong bangh dingin a zai leitung khat na om hi in ki um hi. Kawlgam laizang mun pawl leh Irrawady gunpi te thu pawl ki thei cian lo hi. Tua hun in nuntakna nei ganhing pawl om nai hiam om cih ki cian theih lo hi. Kum awn 700 pan 800 pawl hun sungin leitung pumpi ki lawh ki ngawk gawpna khat hong om a, tua huhau in lei maitang hong ki kai to in, mual tang te hong piang ma sa hih tuak hi.

4.          Kum awn 600 pan 280 hun thu.
Kum awn 500 hun pawlin, Kawlgam leitangh maitang teng, Tuipitui nuai ah kia in om hi ki ci hi. Shan gam mualzang taam tungah tui dai a, tui kulh a tuam tuam ki dawk zo hi. Tua khit kum awn 400 hun ding ciangin, simlei buppi in tuipi sung lam panin meimualpi khat nase takin hong puakkham a, tua tawh ki zom in kawlgam ah zong meimual puakkham a, tua pan in meimual buantuite leh Haak, Sikkang, Sik, lei sung sum a tuam tuam hong piang hi. Kum awn 425 pan 405 ki-kal hunin, leitung gam mun dangte ah, tui sung ganhing leh ngasa nam pawl hong piang khin hi. Tua bang in tuipi in leitung khempeuh a tuamcip hun pen, kum awn 20 sung hun bang sawt hi. Tua bang in, leitung buppi tui in a tuamcip hun sung mahin, leitangh buppi hong ki ngawk gawpna khat hong om leuleu in, tua hu hau in, Shan tuipi nuai a leitanghte hong ki dawk in, mualtang leh mualkuam te in hong ki kai ton hi. Kum awn 405 hun in, Shan gam pen leitung leimaitang mahin om a, mual te zong lei lu lam panin lei taw lamah kikhungin a om hun laitak mahin, lei maitang teng kia suk leu leu in, tuipi in tum kik hi. Tua Shan gam leimaitang teng Kawlgam leimaitang teng zong tawh tui in tuamcip hi. Tua bangin kum awn 170 hun sung ding om cip hi. Tu hun Sen gam sung, Yunan gam mong panin leitaw lamah tu hun Beih (Tavoy) khua dong leh nisuahna lam gun khempeuh tawh tuipi in tuam a, tuikulh atuamtuam dawk lai bek hi.

5.         Kum awn 280 pan 63 hun thu.   
Kum awn 280 khit ciangin Kawlgam ah mualte hong piang piang ta hi. Shan gam a leikaang suang te pawl tuipi tungah hong dawk a, mualkuam guamkuam te hong piang hi. Hi hun sungin leitung mun dang te ah vasa lian pipi te om khin a, tua te pen leitangh tung ah gamtakhin ta hi. Kum awn 135 hun in leitangh maitang kikhel na dingin leitangh ki lawh kingawk gawp na khat hong om a, tua panin  leitung muallian te hong piang hi. Tua hu hau in Alpine mualpi le kawlgam nitum na lam mualtang te pawl hong piang hi. Leitung mual a tuamtuam a piangsak, tua kikhel na tawh ki zom in, Kawlgam sungah zong mual thak pawl hong piangin, a laizang lamah mun niam leiniam pawl hong piang hi. Alpine mualpi pianna tua zinliing pen nasia lua ahih manin leimaitang ki kai ton gawp a, tua hu hau in Kawlgam sungah tu hun a suangmanpha khuk te hong piang hi.

6.         Kum awn 63 pan 1 hun thu:  
Kum awn 40 bangh ciangin Kawlgam sung leitangh tungah singkung lopa po-in gamtaak tupi suak khin hi. Pakkokku mangpi ki-uk na gamsung khawngah Awlee leh a dang nungzang guh nei ganhingte hong om khin hi. Kum awn 15 bangh ciangin Himalia mualpi apiangsak zinliingpi khat hong om leuleu a, tua hu hau in Himalia mualpi hong piang khia in, Kawlgam le Assam gam te hong ki khen a, tu hun kawlgam leitangh lim hong piang khia hi. Tua zin pi a lin maa hunin, tu hun gunkhawm gam teng pen gammang tupi lak hi. Tua zinpi hong lin ciangin leitangh maitang teng hong ki songloi in, tua gammang tupi te, lei nuai ah hong ki vuk cip hi. Tua panin tu hun Irrawady gunpi, Chindwin gunpi te, hong piangin tua gunpi te in lei lu lam panin leimai hong ne hong eu in, khang lamah hong luang ta hi. tua leitanghmai ki kaih ton na hu hau in, tu hun kawlpi kuam ah, bualpi khat hong piang ta hi. Meitei gun leh Miita gunte hong ki tuntuah in zinliing pi hu hau a hong piang khia tu hun gunkhawm mualdungpi hong nawtnawt in a sawt ciangin tua bualtui lipi hong kang in kawlpi gamah leidumkom hong piang hi. Tu hun Kawlgam leitangh maitang gamlim pen tu maa kum awn 15 hun a hong piang bangh bangh a hihi.

7.         Lei tangh lim pian zawh hun:
Kum awn 15 hun in, tuhun kawlgam leitang maipuak mel hong piang hi. Tua bang in hong pianna ah, tha khat thu in, tom kha vei sung in hong piangvat hilo hi.  Hi hun sung in tuhun Shan gam ah , a lai zang pan in tui in nene in, mun khatkhat ah leitang hong ki vukvuk in, dumkom, bual, mualpum leh mual pang pawl hong piangpiang hi. Tua hun a kipan in kawlgam  sung a tuite tuitaw lam ah luang in kiamsuksuk aa, tudong in kiam niloh lai hi. Kum awn 14 hun in kawlgam sungah nawipia ganhing liante, Saiha paak, sakol, lawi, bawng leh sanangte piang in, a hon a hon in, gamta khinta hi. Kawlgam laizang leh kawlgam khung lamah tua bang ganhingte omna sul kimu hi.

8.         Thuamluak hun thu:
Hi bangin sim leitang maitanglim hongpian khit ciang in mualtang mualdawnte, tui khal leh vuk khal te’n hong tuam hunkhat hong om leuleu hi. Hih hun pen gamthu ah thuamluak hun ki ci hi. Hih thuamluak hun pen tuma hun kum awn 1 pan in tuhun dong hi. Hih hunsung in kawlgam leitang tung ah singkung lopa po in gammang tupi suak in Sai, sanang a tuamtuam lawi leh bawngte in gamtatna nei khin zo uh hi. Bual tui sungah sumkuang leh awle pawl om khin hi. Mualtang mualbote pan in, kum sim in guahtui in taii a, munniamna dumkom nate ah tunpih in, lei niamna kivuk in, munzang tampite hong piangpiang hi. Tua hun sung mah in kawlgam ah miteng in kawlgam mihing khang tangthute hong kipan ta hi.

Kawlgam khang taak mite thu:
9.         Kawlgam khuasat cilna:
Himalia mualpi a piangsak tua zinpi linna huhau in, tuhun a leitang maitang lim hong piang aa, tua a ki pan in lui leh gunte in leinel leh buantuite hong taai in lei niamna mun ah hong nganga aa, tua bang in zangleite hong piang hi cih thu i at khin hi. Tua bang a hong kivuhna leiniamnamun ah tu in leidawl dawl 5 dong kivuk khin zo hi.Izuadi gun pang Sale leh Chauk khuate ah tuabang leidawlte kimu hi. Tua leidawl a dawl nuai nung ah mihing teenna sulte kimu hi. Tua hih manin tua leidawl a dawl nuainung hun in tua munah mihing na teeng khin uh hi cih kimu thei hi. Tuhun Magwe, Chauk, Sale, NyaungU, Pakokko,Sintkun,Vwadawchaung, Minbu, Yenanchaung, Sichopin leh Pakan khuate ah tuabang khangtaak mite tenna sul a tuamtuam kimu hi. Tua gunpang leidawl a dawl nuainung a tengte pen kawlgam sung a khuasat masa penpente kawlgam khangtaak mite ahi uh hi. Tua bang in khuasat in ateen sung hun khat hun ciang in, tua khua kisia in tua mun leitang tungah leinel leh buantuite hong kikhol leuleu in leidawl adawi 2 na hong piang hi. Tua bangin a dawl 3 na, a dawl 4 na, a dawl 5na dong in hongpiang hi.

10.       Kawlgam minam khang simna:
Izuadi gunpang suk a teeng tua tanglai khangtaak mite nazat pawl a ki et ciang in leitung mundang gamdang tang khualuite pan a kimu nazatte tawh ki lamdang lo hi kici hi. Khangtangthu kan mipil ten leitung mite khangtangthu a Kankan uh ciang in Uhzawpah gamah (Europe) Nian da tal (Neanderthal) kici mipa guhsia en in tua guhsia neipa pen tanglai khangtaak mipawl hiding hi ci in um uh hi. Tua khit ah Sengam ah zong tanglai khangtaakte mite guhsia khat mu leuleu uh a, tua guhsia neipa Peking a mipa (Peking man) ki ci min pia uh hi. Leitaw lam Java gam ah zong tua bang khangtaak mite guhsia kimu hi. Leitung khangtaak mite lak ah Uzawpah mipa (Neanderthal) a muh cil un a ham penpen ding in ngaihsun uh hi. Tua mipa khang pen tul 300 bang a, haamding in seh uh hi. Peking a mipa a muh leuleu uh ciang in tua mipa pen Neanderthal sang in kum tul 400 bang haamzaw ding hi ci in seh kik leuleu uh hi. Kawlgam khangtaak mite guhsia a et uh ciang in tusa a a haam penpen ding a a seh uh Peking a mipa sang in a haamzaw kei zong in ki ngual hamdang ding hi ci uh hi. Tua thute i ngaihsut ciang in kawlgam khuasat tuikhuat masate pen kum tul 700 bang peuhmah pha khin ding hi cih up huai hi. Tua bang in kawlgam ah tuma kum tul 800 pan 700 kikal hun sung in khua kisaat hi cihding ahihi.

11.       Kawlgam khangtaak mite behnam.
Tu hun kawlgam sung minam a tuamtuamte pen kawlgam leilu lam aa, Mongolia minam i suante hi ci in kiciamteh hi. Tu hun kawlgam minamte kawlgam ah hong lutma hun pek in  Kawlgam ah khua kisaat in minam pawl khatte na teeng khin uh hi ci in ki um hi. Tua minamte pen kawlgam leh Asia nisuahna khanglam dong in na ki zelh khin zo uh hi ci in tangthu kan mipil pawl khat in um uhhi. Tua minamte pen tuhun Africa gam minam Negroid kici Negrute hi in, tuhun kawlgam minamte hongtun uh ciang in tuate tawh asi uh hong ki ngawm hiding hiam , ahih kei leh tua hong nungtun minamten bengkhia hiding hiam? Khat hiding hi ci in ki um hi.

Tuhun kawlgam minamte thu:
12.       Kawlgam mite: 
Tuhun in kawlgam sungah minam atuamtuam ki teeng hi, Tuate pen pianna pulepa khangin kanleng kawlgam a mi leh pemta ci in nam 2 in kikhen thei hi. Pemta pawl pen, Kum 1824 zawh hunsung kawlgam ah hong lal minam pawl hi. Tuate  pawl pen a tampen in Sen leh Kala mite ahi uh hi. Kawlgam mi pawl pen tuhun in kawl kam in taingzintha kici hi. Tuate pen Kaya, Kachin, Kayian, Chin, Bamaa, Mon, Zakhaing, Shan cih minam tuamtuamte hi uh hi. Hih kawlgam minam kawlgam a mipawl pen kawlgam saklam pan piang Mongulia minampi suanlehkhakte hi ci in kiciamteh hi.

13.       Kawlgam mite pianna:  
Kawlgam mite pianna thu tawh kisai in tangthu kanten up mawhna a tuamtuam nei uh hi. Tawlanzi kawngcil in a nuai abang in na ciing hi. “ Kawlgam sung a  om kawlgam a mite pen Asia gam Alai zang mualtampi lam pan in leitaw lamah damdam in hong kikhin uh hi ci in, tangthu kanten um mawh hi. A hun a kumte a kician in a ki gelh theih kei hang in, Mongo minampi sung pan in minam pawl khatte Asia taih a laizang lam Sengam i nitumna lam a  om Zanzi leh Huhanhu gunpi nihte gun naak a mualzang tampi pan in hongpiang in, hong busa uh aa, ni suahna lam  a om Sen mite a thuaklah uh ciang in leitaw lam ah hong tolh suksuk uh hi ci in ki um hi.

14.       Kawlgam mite sul:  
Kawlgam mite pawl pen kawlgam leilu lam pan in a bawng abawng in kawlgam sungah hong lutsuk uh hi. Kawlgam minamte behnam tawh kisai in tawlanzi kawngsi in a nuai abang in na ciamteh hi. Mongu nampi suan kawlgam a mite pen anuai abang in pawl 3 in hong kikhen in honglut uh hi.
(1)        Mon khmer pawl,
(2)        Tibe to/Burman pawl,
(3)        Tai Chinese pawl.

15.       Kawlgam a minamte honglut hun:
Kawlgam khangtaak mite khuasat hun pen tuma kum tul 800 pan 700 pawl hi in ki um hi. Tua khuasat cilna khuate kimuhna leidawl a dawl nuai nung hun hi pah hi. Tua leidawl dawl 5 te dawl khat leh dawl khat kum bangzah taktak sawt hiam cih thu ki kan zo nailo hi. Tua leidawlte anuai lam pan in atung a lam simtoh a dawl 4 na ah mihing teenna lim kimu lo hi. Tua a hih man in tua  adawl 4 na hun, hunkhat sung in kawlgam zanglei ah tui khang in zanglei mite mualtung gamte ah lalto hi in ki um hi. Mualtung gam pan in suanghawm leihawm sung peuh ah na teeng uh hi in ki um hi. Tua bang in a na teenna uh Khulte tuhun in kimu kawikawi hi.  Tua khul pan a kimu a na zatte a ki et ciang in tuma kum 18000 pan 7000 hiding in kiseh hi. Zanglei ah zong leidawl a dawl 5 na ah khangluite tenna sul kimu kik hi. Tua ahih man in tua zanglei dawl a dawl 5 hun leh Khul hun ki ngual hi. Tua hi a tuhun kawlgam a mite pen tua khul hunin kawlgam sungah hong teeng khin uh hi cih ki lang hi.

Chin Minamte thu:
16.       Mihing khull pan.  
Tedim Zomite in, “Ei teng khawlkhawm a tuam om lo, khull aa pian-in ki lel le’ng, tun sung khat a piang hi ngeii ngeii ee,” ci-in mihing te pian cilna thu na ciing suk hi. Zomite’n lai ki neilo a hih manin khangthu tangthu te kam tawh na ki vai kha suk uh a, khull hun ciang na ciamteh thei uh hi. Leitung mihing pianna thu tawh ki sai in, genna leh theih na a tuam tuam na om hi. Tapidaw te Laisiang tho sungah Pasian in leitung mihing dingin Adaan leh Evuah te nupa na piang sak a, tua panin leitungah mihing cii hong om pan hi na ci hi. Darwin ki ci nate thu thei mipil pa’n kuang sung khat ah tui guak koih le hang, tua tui hong sawt ciangin tua tui sung panin ganhing lungno hong piang hi. Tua bang lim tawh hih leitung ah nuntak na hong piang hi. Tua nuntakna nei ganhing te pumpi lim le meel pen, a hun a hun in, a khang a khang in hong ki laih hong ki khel to to hi. (Gentehna in Tangngol panin Simbeng suak in  tangtawm panin Muthi piang hi a ki cih bangin) tua bang in a dawl dawl in hong ki khel to a, Zawngkuh pi-ah tua panin mihing ah hong piang hi ci hi. Tuhun in mipil pawl khat te’n, vantung aksi nate tungah mihing dang om in, tua te khat peuh hih leitungah hong hawh in, hih leitung a ganhing khat peuh tawh hong om khawm in, mihing ki piang hi ding hi ci-in, ngaihsun uh hi. Ih pu ih pa te’n ahih leh khull sung a teen hun thu na ciamteh lai uh a, mihingte khull pan ki piang hi ci-in na ciamteh uh hi.

17.       Tedim Zomite’ khull:  
Zomi tangthu ciing te lakah, ciapteh a tuam tuam na om sak uh hi. Pu Thang Tuan in Tedim mite Kawlpi gam pan khamtungah ih lal toh cilin tuhun Saizang gam sung khull ah ki tung masa hi. Tua panin ciimnuai ki saat pan hi na ci hi. Khuangsai zomite in nidang lai in, tuhun Sagaing Division sung Salingyi ah zomite a teen lai tak in, nikhat Pu Song thu sabeng in a vak leh sakuh khat mu in tua sakuh a zuih zuih leh khull khat ah na tum hi, tua khull sung a zuih suak leh a lang khat lam ah na vang suak hi. Tua panin khua a dak leh gamzuat khua saat na dinga a hoih mah mah mun khat mu a, tua gamah khuasaat dingin Salingyi pan hong lal uh hi ci-in ciamteh uh hi. Pu Gin Za Tuang in nidang lai in zomite Tibet gam a teen lai in khull ah na teeng uh a, tua khull pen mihing te pianna mun in hong ki vaikha suksuk hi na ci hi.

18.       Chin minam te pianna:  
Kawlgam  a minam te pianna thu ih gensa mah bangin Chin minamte zong Mongo minampi’ suan te hi ki ci hi. Tawlanzi kawnsil in a nuai a bangin Chin minamte pianna tawh kisai in, na ciamteh hi.

Tua Tibeto / Burman minampi sung panin a nuai a bang in mun thum ki suah in leitaw lamah hong tolh suk suk uh hi.
(1)        Chin/ Kachin pawl
(2)        Mianmaa leh taanglai mianmaa
(3)        Lolo/huhso pawl.

19.       Chin minamte hong lut na sul:.
Kawlgam a minamte Kawlgam ah hong lut ma pek hun in namkhat le namkhat tull ki khen khin ta uh a hih mah bangin, kawlgamah hong lut suk na uh ah sul a tuam tuam nei uh hi. Tua Tibeto/Burman beh nampi sung panin Chin le Kachin te behta in munkhat lamkhat zui in hong lut uh hi. Chin minamte kawlgam sung hong tun na uh sullampi tawh ki sai in, ciaptehna a tuam tuam na om hi. Pu Thang Tuan ciaptehna ah Zomi te’n Izuadi gundung zui in hong pai uh a, Tagaung khuapi ah hong teeng masa uh hi. Tua panin pawlkhat saklamah paito in Chinduan gam sungah hong teeng uh hi. Tua panin pawlkhat in Chinduan gunpang nitumna lamgal zuito in Kawlpi khua hong tung uh hi na ci hi. Pu Gin Za Tuang in zomite pawl Chinduan gundung zui in hong lal suk uh a, khuakhen (gunkhawm) pan tuhun kawlgam sungah hong kikhen uh hi na ci hi. Khuangsai te’n a nuai a bang in na ciamteh hi.

           Taang lai kum 5000 hun-in, Tibet gam ah minam kim ki teeng khawm hi. Tua minam te lakah Naksau leh Naktom ci in minam nam nih om in, tua minam nih te ki do uh a, Naktom minam te’n zo hi. Tua Naktom minam te pen Chin, Kachin, Naga leh kate te hi. Naksau minam pawl gaal-lel in, nitumna lam ah tai uh hi. Naktom minamte zong tua mun ah om nuam nawn lo in, Guntawbing (Gunpi tun na bul) en dingin hong lal uh hi. Hong lal lai in Kachin te mapi a, lampi ah vasa khat na om a, tua vasa pen gamla pi leeng lo in nai no no ah tu hi. Mapi a pai Kachin te’n tua vasa nung zui in, na pai pai a asawt ciangin Chin le Kachin khat le khat ki pha sam uh hi. Lampi ah naktang kungkhat na ki sat tan a, tua nahtang dawnngek na sau khin a muh ciangin chin te’n Kachin te nung zui nawn lo in lam tuam sat in pai uh hi. Naktom minamte pai in Saramedih mualtang tung uh hi. Tua mun ah teen na ding a hoih khull tampi om a, tua ah Naga pawl in khuasaat in teeng pah uh hi. Kate le Chin pawl paisuak a, zangtampi khat ah tung uh hi. Tua zaang taampi ah kaikuang leh Toktol peuh a tawp kawm in Kate pawl om in tuah teeng suak uh hi. Tua zangtampi pen Phaipi zangtampi ahi hi. Chin pawl a hih leh Guntawbing en dingin pai suak uh hi. Nitumna lam mualdung tawn in Bengala tuipi dongin pai uh hi. Tua Bangala tuipi tawh a ki tal sik uh ciangin, a sul lam khamtung gam lam ah kikhawm in, khamtung gam mun khat pan pawlkhat te nitum na lamah pai-a, tuate pawl pen lusei mite a hi hi. A dang te nisuahna lamah tuak suk in pai-a, tu hun pakokku gamsung tung uh hi. Tua panin Izuadi gunpi kantan zo nawn lo uh a, tua mun ah khua saat in teeng uh hi. Tua khua pen Pa Khup Khua saat hi a, Pakhupkho ki ci hi. Tuhun in pakhupkho pan in pakokku ki ci hi. Pa khup kho pan in tu maa kum 1000 hun ciangin, Chin mite ki theh thang uh a, Song Thu, Song Za, Za Hang, te’n ma-kai in Chinduan gun ni tumna lam galah hong lal to uh hi. Gam sung munkhat pa’n, Saikhaat khat man uh a, tua mun ah khuasaat in teeng uh hi. Tua khuasaat khua min pen, Sai lianpi matna khua ‘Sailianpi’ khua ki ci a, tuhun in Salingyi ki ci hi. Tua pan Kawlpi gamah hong lal to uh hi.

Chin minam pawl hong lal na sul tawh ki sai in, Tawlanzi kawnsil in a nuai a bang in na ciamteh hi. “Tua Chin/Kachin pawlin Tanluan le Biamah Putra gunpi te kikal a vuk tawh ki tuam mualdung te akan tan zawh na dingin, hamsa ahih manin, nitumna lamah ki hei in, Assam gam lam pan Kawlgam sung ah hong lut uh hi. Tua pawlte lak pan in Chinmi te hong lut masa a, Chinduan gun naak pan ki pan, Bengala tuipi dong a hong kikhung suk nitumna lam mualtang tungteng hong tutphah suk uh hi. Tua zawh kum tampi khit ciangin Zingphaw ki ci Kachin minam te, tua Chin minamte, sul teng mah tawn in hong lut uh a, hong tun hun in a khang lam mualtang tung tengah Chin le Chin minam te’n, na tutphah khin uh ki mu hi. “(Chin le Kachin te, Kawlgam ah a lut lai un, Chinte maa kai hi ci in Kachin te’n ciamteh zaw uh hi).

20.       Chin minamte hong lut hun:
Chin minam te kawlgam ah hong lut hun tawh kisai in zong ciaptehna a tuam tuam na om hi. Pu Gin Za Tuang ciamtehna ah zomite Tibet gam pan Tuikaangdung (Chindwin gun) zui in hong lal suk uh a, AD 850 hun in Chinduan gamsung ah hong teng khin uh hi ci hi. Pu Thang Tuan in zomite Tagaung khuapi ah hong teng masa uh hi ci hi. Tagaung khuapi hun BC 600 pawl hun hi in ki seh hi. Lansian party te ‘bawl’ Kawlgam Nainganzi Tangthu bu-ah, nidanglai tu hun Zakhaing gamsung ah kawlgam a minam pawl na teng uh a, tua te lakah Chin minam pawl zong na ki hel hi. Tua thu te pen nidang zawma, khawma te laibu te sungah ki mu hi, ci hi. Tua ahih ciangin, Chin minam te pen, Zeisu suahma hun in, Kawlgam sungah hong tung khin uh hi cih kimu hi.

Zo Minam Thu:
21.        Chin minam min; 
Tedimkam tawh Zomi ki ci minam min pen, tuhun in ‘Chin’ ki ci in, Kawlgam a Mi pawl lakah nam khat a hihi. Mikang kumpi in, Kawlgam minamteng, ukkhat hong suah in, a mun mun ah, ki-ukna tuam tuam hong pia hi. Tua ciangin gammin a kipan minam minte dongin a kip a kho in lai tawh hong ciamteh hi. Zingphaw minam te Kachin ci in, a teen na mualtung gamteng zong ‘Kachin Hills’ ci hi. Naga gam ‘Naga Hills’ ci in, Zomite gam zong ‘Chin Hills’ ci hi. Tua a kipan in zomite min pen Chin ki ci in, Kawlgam a minam te min khat in hong ki zang ta hi.

22.       Chin minam te. 
1948 kum, Khamtung gam Upadi (1948, Chin Special Division ACT) sungah, Chin a ki ci minam sungah, Kuki, Lushei, Naga, leh Khamtung gamsung, gampi veeng a teeng Chin mite hi ci in ki at hi. Kum 1948 sung mahin tua Upadi ki puahpha kik a, tua ah, chin minam te pen Khamtung gamsung teng minam te hi ci kik hi. Hih Upadi pen, Upadi banga, a kizat theih na dingin tua bang in khel kik hi leh ki lawm hi. Bang hang hiam cih leh, Upadi te pen, Khangtangthu bu ahih loh man hi. Tua tham lo-in, Naga, Kuki, Lusei, cih minam te’n Chin min pen amau minam min dingin deih lo uh hi. Tu hun in, chin ki ci minamte lakah, Hill-Chin leh Plain-Chin cih nam nih om hi. Tua te’n Chin cih nammin pen, amau minnam min dingun deih mawh lo uh hi.

23.       Thet minam te:  
Tuhun in, kawlgam sungah, ‘Thet’ cih minam min ki za nawn lo hi. Tangthu kan te’n, tu hun a Chin minamte pawl ni dang hun, Thet minam pawl hi ci uh hi. Tu hun in Phaungpin gam Pinlebu khuapi gamah kadu, kanan cih minam pawl khat om a, tua te pen, Thet minamte hi cihna kiza hi. Tu hun Thayetmyo pen, nidang in Asho mite (Plain-chin) khuasaat khua hi a, ’Thetyat’ Thet minamte om na mun panin Thayetmyo hong suak hi a ki cih na zong kiza hi. Tu hun dong in tua khuapi ah, Asho mite teeng lai uh hi. Kawlpi gamsung a, a teeng masa te lakah, Thet minam min zong ki hel hi.

24.       Chin le Thet:  
Tuhun in, kawl gam sungah, nidang taangkhuapi te ki nung muhmuh hi. Tua khuapi te pen, nidang lai Thet ki ci, tu hun Chin ih cih minam pawl te hi ci nuam uh hi. Ahih hang in ‘Chin le Thet’ te pen, tu hun in Chin le Zomi a ki cih na bang tak tak a hi ding diam?. Lungei neih huai thu khat hong suak hi. Zomi nam te kawlgam sungah hong lutna uh sul tawh ki sai in, genna le ciaptehna tuam tuam na om hi. Pawlkhat in, Izuadi gundung zui suk hi ci-in, pawlkhat inl, Chin duan gundung zui suk hi ci uh hi. Hih thu ih et ciangin, tanglai Zonampi sung pan Chin le Thet ci in, beh nam nih na om in, Thet pawl in, Izuadi gundung na zui in, Chin pawl in, Chin duan gundung na zui uh hi mawh lo ding hi. Tua minam te pen, namkhat suan te a hih mah bangin, a ngeina uh, a meel a sa uh ki bang a, midang te’n a muh uh ciangin, minam khat in na sim uh a, nammin kilawh na Thet a thei khin sa ten, Thet na ci in, Chin min a thei sa ten Chin na ci uh hi thei hi.

25.       Chin min pianna:  
Chin cih minam min pen, koi ci bang in hong piang khia a hi ding hiam ci in, kikan ciat a, upmawhna a tuam tuam ki gen ciat hi. A uphuai akip a kho in, kua mah in a gen theihloh uh ciangin, kawlmite hong piak min hi ding hi ci uh hi. AD 1200 maa hunin, tu hun khamtung gam (Chin State) a teeng minamte, Chin ci in hong lo khin uh hi. Mianmar Suaisungcian Laibupi a tuai 2, laimaal 389 na ah, a nuai-a bangin ki at hi.

“kawlgam nitum na lam a om, Indiagam Pakistan gam te tawh, aki gizawng na mun ah, Chin minam te gamkhat in teeng a, tua minam te pen, Assam kam tawh ahi-a , Bengali kam tawh ahi zongin, ‘Kuhki’ ki ci hi. Nidang lai Pagan khuapi hun, mualsuang te tungah, Kawlgam nitum na lam mual tung a, teng te, ‘Chin” ci in kigelh hi. Izuadi gunpi hiang a lian pen zong Chinduan a hih kei leh, Khalinduan kici hi ci in kigelh hi.

Khuangsaite khang tangthu ah ni dang lai in i pu i pate, tuhun Pakoku khuapi ah ateen lai un kawl mite nupa kop khat hongpai aa, kawl le zo hong kimu masa hi. Tua pan in zomi ten kawlte Kawl ci in, kawlten zomite Chin hongci uh hi naci hi. Pu Gin Za Tuang in ahih leh  hibang in na ciamteh hi.

Nidang lai in sengam ah Chin kumpi gam le Zo kumpi na om hi. Zo (Jo) dynasty ( Zo innpi pen) BC 2027 pan 256 dong hi in Zo kumpi gam Chin Empire pen BC 221 pan 207 dong hi. Hih kumpi 2 hun sung in mi pawl khat na lal uh aa. Kawlgam sunglam na zuan uh hi. Tua bang a apai na peuh uh ah nidang lai lai a a lal cil hun aa, kumpi ki-ukna min na pua uh in tua kumpi ki-ukna, chin a hi a zo ahi zong in minam min in na zang suak uh hi.

26.       ZO MIN: 
Chin cih minam min pen tuhun in khamtunggam leh kawlgam sung a om zo minamteng in a mau nampi min ding in zang uh hi. A hihhang in tua minamte in amunmun ah amau le amau kilawhna atuamtuam nei ciat uh hi. Tedim leh Tonzang khuapi gam mite in amau le amau zo ki ci uh hi. Falam, Haka, Thanhlang, Matupi khuapi gam mite in amau leh amau Lai ki ci uh hi. Kanpetlet gam leh mindat gam miten amau leh amau Cho kici in Paletwa gam mite in Khami kici uh hi. Zanglei gam zo miten amau leh amau Acho kici uh hi. Hunkhat lai in tuhun Yaw gam ah zomite na teeng ngei uh ahih man in, tua gam zang teng pen Zo pan Jaw kici in Jaw pan Yaw kici hi ci in ki gen hi. Lusei mite sungah a minam lungsim uh hong khanlawh ciang in amau leh amau Mizo hong kici uh hi. Naga minamte lak ah zong a minam lungsim hong khantoh ciang in amau leh amau Phizo kici uh hi. Hi thute ih ngaihsut ciang in Thet, Chin, Naga, Kuki, Lusei, cih minam tuamtuamte pen Zo minampi suante hi in, Tibet gam hun pek in beh nammin atuamtuam pua in kawlgam sungah hong lal uh ahi kha ding hiam? Cih nop huai hi. Lai at siam U Theih Pe Myint in Zo tawh kisai in hibang in na at hi. “Chin minamte in Chin ci aa, ki lawhna min pen thupi lak in anial tengtawng se kei uh hang in Chin minam pawlte min masa pen Zomi a hihi.”  Khamtung gamah tapidaw hongkhan ciang in khamtung gambup kilawhna min ding in Zomi cih min na teel in “Zomi Baptist Conventon na kici hi.

ZOMI TE LE KAWLPI GAM
27.       Yazagyo khuapi. 
Tuhun kawlpi khua leilu lamah nidang lai in khuapi khat kiphut ngei a, a min Yazagyo kici hi. Tua khuapi pen tanglai Buddha khanhun sung in India mi ukpi khat peuh in nasaat hi ding hi. Bang hang hiam cih leh tua khuamin leh khua uk mite minte ah India minam min leh India minamte ngeina limte kimu hi. Yazagyo min pen Buddha teenna mun” Rajagriha” khuamin kipuasak hih tuak hi. Kawlpi khua kiang a, Webula mual min zong, Palih tangthu Wepulo leh tu hun a, Bipula minte kipia ahih kul hi. Tua khuapi ukpite min sazian aki gualh na-ah, India minamte minbang min pawl tampi tak a ki ngualh khit ciang in Shan minamte min in zom pan hi. Tua khuapi saatpa min kithei nawnlo hi.Tua khuapi hun in kawlpi gamah Shan, Kantu,Kanzet, Thet, Ingye minam pawl teeng uhhi kici hi. Tua khuapi hun pen BC 210 hun mapek khawng hih tuak hi. Zo minamte Kawlpi ah hong tun ma in Shanmi leh Lusei mite tengkhawm khinzo hi ci in hatlang beh khang tangthu ah kiciamteh hi.  Tua hi a, tua lusei mite pen kawl miten Thet mite na ci uh hihtuak hi.

28.       Bunglung khua, Zomi khuasaat:  
Kawlpi gamah mi hong teencil lai in luseite zong na teng uh hi. Luseiten khampat ah khuasat in na min thang hi. Zomi dangte pen luseite nungah hong tung in hongteng uhhi. Zomite kawlpi gamah hongteencilna mun pen Bunglung khua hi ci in hatlangte khang tangthu ah kiciamteh hi.

29.       Zomite kawlpi gam teenhun: 
Chin kici zomi pawl Tibet gam pan in honglal suk in Chindwin gam sungah hunkhat sung hong busa uh hi. Tua bang in Chindwin gamah hong teen hun sung in ni suahna lam pan, Shan mite hongkhang in Chindwin gam sungah hong ngualzo hih tuak hi. Tua ciang in zomi pawl kawlpi gam dong in honglal phi uh hihtuak hi. AD 416 kum in Yazagyo khuapi ah Shan miteen hausa ukpi za hong len khin uh hi. Kawlpi gamah zomi leh shan mite a teen khop hun sung in Manipur ten hongsim suk zel hi kici hi. AD 850 hun pawl in Zomi pawlte Tuikang dung zui in tengsuksuk uh a, gunkhawm, kawlpi, Kale kabaw gamsung tengah a teng uh hi ci in Pu Gin Za Tuang in na gen hi. Tua hi a, kawlpi ah Zomite AD 400 leh 800 kikal hun in hong tung hi leh kilawm hi.

30.       Kawlpi gam ki ukna:  
Kawlpi gam ki ukna thu lai tawh a kiciamtehna mun na om hi. Yazagyo khuapi ah Shan mite ukpi in amaan hun, AD 416 kum in ukpipa Komonda Raja tapa Saw Kan Twe leh Mohyin khuapi Kata gam ukpipa tanu hong kiteeng uh aa, tua aki pan in Kawlpi gam Yazagyo khuapi leh Kata gam Mohyin khuapi 2 si leh sa tawh hong kizom in, Yazagyo innpi hong hat in, hong minthang hi. AD 639 kum in Manipur ten Yazgyo khuapi hong sim in susia a, tua khuapi min mah pua in Teinnyin ah kituah hi. Tua hun sung mah in Yazagyo innpi Mohyin innpi, Pakan innpite hong kizawl uh a, Yazagyo khuapi hong khauh semsem hi.

31.       Kawlpi gam khuapi kawlpi ah:  
Tua bang in kawlpi gamah ukpi ngina hong om ding Manipur in deihlo in khatvei hong sim leuleu hi. Tua ciang in kawlpi gam khuapi pen Yazagyo pan in tuhun Kawlpi khuamun ah ki tuah hi. AD 967 kum in kituahzo in ki um hi. Kum AD 1085 pan 1160 sung Pakan kumpipa Alaungsithu pen Kawlpi innpi ah hawh ngei hi kici hi. Tua bang in Pakan kumpi leh Kawlpi innpite hong ki zawl hun sung in kawlpi innpi lian in hong minthang hi. Tua hun sung in Leitang  ee-kah 234 sung khuapi munding in kulhpi tawh akip tak in hong ki uumzo ta hi. Tua hun dong kawlpi gam pen Mohnyin leh Mogaung khuapite mah bang in Kumpi gam khat in ki uk hi. Kum 1364 ciang in Kawlgam ah Ava khua honglian in hongkhang hi. Ava innpi pa Swa Saw Ke, hong lian in, hong minthan hun in Kawlpi innpi leh Mohnyin innpite 2 hong kisia uh aa, tua bang hun hoih hunpha ngah in Ava mangpa in Kawlpi leh Mohnyin innpite sim in Ava innpi ah TO kaisak hi. Tua aki pan Kawlpi gam pen Ava leh Manipurte khut nuai ah om kawikawi hi kici hi.

32.       Kawlpi gam Kawlgam tawh ki gawm:  
Mikang kumpiten Englang kumpi nu a ding in siahkhua a zonzon hun mah in Ava kumpipa in zong siah khua mah a zon hun ahihi. 1813 kum in Ava kumpi pan Manipur gam ukpi ding in Marjit Singh koih in Manipur gam Ava ah to kai sak hi.  1814 kum in Assam gamah Chandrakan ta Singh kici mipa in Kumpi za hong ngah hi. A hih hang in gamsung upate thukimlo in tuapa kumpi za pan khia kik uh hi. Chandrakan ta Singh in Ava kumpipa ko a, Ava kumpi in Mahabandula paisak in Chandrakanta singh Assam ukpi za pia in Ava ah To kaisak hi. Tua bangin Manipur gam leh Assam gamteng Ava kumpipa uk sungah a om hunmah in, India gam ah Mikang kumpite in, India gam nisuahna lamah England kumpi nu siahkhuate a khankhan hi. Mikang kumpi ten Assam ukpi leh Manipur ukpite han suah in, thauvui thautang pia in Ava innpi siah demsak hi. Tua Ava kumpipan galkap paisak in, a siahte kimpha sak hi. Tua ciang in Manipur ukpi Chandrakanta singh in, mikang kumpi beel aa, mikang kumpi in Chandrakanta singh mah ukpi in koih kaltang hi. Tua bang in Assam leh Manipur gamte huhau in Ava kumpi leh Mikang kumpi kikal ah kineihna leh kidemna hong om laitak in, kawlgam khanglam ah 1824 kum in mikang gal honglut in, kawl leh mikang kido masak gal hong om hi. Kum 1826 ciangin Kawl leh mikang kido na abei nading in, Yandabo sasuk meek uh hi. Tua sasuk ah Ava kawl kumpi in Assam siah ciahkik sak hi. Manipur gam pan Mahabandula hawlkhiat pa Ghumbeersing Manipur gam hongciah kik in a uk pi za adeih kik leh Ava kumpi in nawngkai sak lo ding hi cihthu zong tua sasuk ah kimeek hi. Ahih hang in India leh Kawlgam gi tawh kisai in tua sasuk ah kician in, kiciamna om tuanlo hi. Yandabo sasuk meek zawh ciang in India kumpi in Yandapo sasuk meek laitak aa, Ghumbeersigh i taanglai a, a Manipur gam teng , Manipur uk sungah kikoih leh hoih ding hi hong nungcih ciangin Kawlpi gamsung Khampat saksiahteng Manipur gamah kikoih a, tua ciang in, India leh Kawlgam gi pen Chindwin gundung hongsuak hi. Tua ciang in Kawl kumpi lungkim lo in hong om a, tua ciang in Kawlgam leh India gamgi vaihawm ding in India kumpi in, Captain Grant leh Lieutenant Pemberton te 2 sawl hi. Kawlgam leh India gamgi vai tawh kisai in sawtpi sung kinial kipauna tampi tak a om khit 1831 kum ciang in, India kumpi sawltakte leh Kawl kumpi sawltakte, Kindat khua ah kituah in, gamgi khen siangna laipi tawh Kale kabaw gam, kawlpi leh Tamu gamteng Kawl Kumpite pia in, kawlgam tawh kigawm sak hi. Tua hun in Khamtung gam pen, a ki uk zo nailo mun pawl in koihlai uh hi.

33.       Kawlpi gam a Zomite nuntak zia:  
Zomite kawlpi gam ah a ten lai in, inn 500 dong pha uh hi ki ci hi. Kawlpi gamah hausa kituh in, min le vang ki dem in, Shanmi le Kawlmi te kikal ah, buaina hong om tawn tung hi. Kawlpigam minam dangte tawh, Innpi ah Siahtung , Siahphei, tuktha, khaltha pia in, Kuli aanaa sem uh hi. Khua kulhpi bawlna ah, gammite aanaa tawh ki sem sak hi. Tua ah a kuan zo lo te, a khutmee a khemee peuh ki sattan sak in gimna a tuam tuam ki pia hi ki ci hi. Tua bang a, a ki tansak khutmee bek bek zong taangcilciang khat dim hi ki ci hi. Kawlpi gamah a teen lai un, kum sim in bawng khat ta tawh Langkui mualpi bia uh hi. Kawlpi gam a teeng Zomite sungah beh leh phung a tuam tuam piang khin a, Tedim mi, Falam mi, Khalkha mi pawl, cih bangin na om in tull zong ki khen khin uh hih tuak hi.

34.       Kawlpi gam pan Zomite ki khen:  
Kawlpi gam ah Zomite cii tawm in, gual lel hih tuak hi. Minam dang te Siahtung Siahpheei pia uh hi. Ava mangpa in kawlpi ah, Menzi khat koih a, tua pa in Zomite tungah, hehpihna a nei nuam kei hi ci-in, Pu Gin Za Tuang in na at hi. Tua bangin hamsat na a tuam tuam a thuak lah uh ciangin, khamtung gamah, kuamah bat pakpak zawh loh na ding mun zuan in khuasaat in na teeng uh hi. Tua bang a, a lal na ah, a beh beh, a bawng bawng in na lal uh hi.

ZO KHANGSIM NA THU:
35.       Zo suanh khang sim na:  
Kawlpi gam singunau khua, Pu Khup Za Thang in Zo khangthu tawh ki sai na kan in, Zo suanh khangsimna Laibu hong piang khia sak hi. Hi Khangsimna Khangtangthu bu pen, Tedim gamah, a masa bel Khangthu ciaptehna khat in hong piang hi. Hih Zo suanh Khangsimna pen, tua sangin a ki cing zaw, a man zaw, hong om ma tengin etkak ding, tukteh kak ding khat a hi hi.

36.       Zo khang:  
Zo cihna kammal tawh ki sai in, pawlkhat ih at khin zo hi. Zo suanh khangtangthu bu ciaptehna bang hi leh, Zo pen tumaa khang 26,27 pawl khangluimi khat hi. Pu Gin Za Tuang ciaptehna bangin, Zo pen tanglai Zo innpi pa hi leh, Zo khang pen kum bangzah pha zo ding hiam cih ki tuat zo lo ding hi. Zo leh Ciin Hill kikal ah, khangtampi ki mangngilh ding hi. Ahih kei leh Zo pen, Tedim te Pu a hi ding hiam? Ahih kei leh Zo pen zogam, hiam? Bang hang hiam cih leh Zomi pen leisang munsang a teeng mite cihna zong hi thei hi.

37.       Zo leh Lai:  
Tu hun in, Falam gamah Laizo ki ci khua khat om in, khalkha gamah Zokhua ki ci khua min nei khua khat mah om hi. Matupi gamah Zotung mi ki ci beh min khat zong na om hi. Tua a hih man in, Lai leh Zo kammal te pen, Saklam Khamtung gammi te tangkam khat hi cih ki tel hi. Lai pen Tedim in, Eite u le nau, sanggam suah pih te cih na hi in taang kam khat hi. Tua kammal pen kampau mawkmawk na ah ki zang nawn lo a, lakam ah kizang hi. Gentehna in Pu Thual Dai in “Vabang pilbel Laite vontawi aw- mel muhloh a, kulsin zalta ee. Sangsul kanbang’ Zinsul kanthei leng Lai tawh ciam in a kul ah lung e.” naci hi. Falam, Haka leh Tedim pawl nidang i kamzatte tu hun in, Tedimte lakam ahihi. Gentehna in Tedim miten kampau tawh “Leitual” pen lakam in “Sumtual” ci a, tua sumtual kammal pen Halkha miten “Leitual” a cihna kampau ahihi. Tua a hih ciang in, Lai pen pumin pamin hilo hi cih kimu khin hi. Zomite khamtung gamah honglalma hun, hunkhat lai in amau leh amau sungah deihna leh ngaihsutna kibat lohna khatpeuh om in, tua huhau in amau sungah pawl kikhenna om in nopawl kopawl cihna pan eipawl amaupawl cihna kam na om hi leh kilawm hi. Gentehna in, Romancatholic ngeina nial pawl, Protestant thu nial pawl cihbang hi. Tua bang in laimi cih min kilawhna hong piangkhia ahi kha ding hiam cih ngaihsut huai hi.

38.       Khamtungte Pu Ciin Hil:  
Pu Gin Za Tuang in zomi innkuan laibu ah anaui abang in na at hi. Mangkangte in khamtung a laakkhit phet in, khangluite kiangah kuami na hi uh hiam? ci in a dot uh ciang in Zomi ka hi uh hi naci aa, napu uh kuahiam acih uh ciang in, kapu uh Ciin Hil hi naci uhhi. Thullai khua Dr. Vum Kho Hau pa Rev. Za Khup in hibang in hong ngensawn theizel hi. Cope sangmang pa in ataktak in napu uh Ciin Hil hi hongci thei tawntung hi ci in hong gen hi. Hih tawh kisai in Dr.JH Cope ciamtehna a om hi.

“History of Chin hill goes back about twenty generation to a person called Chin Hill, their first ancestor which name bears his decendants as ‘Chin Hill’ and after the annexation, the British called the country’ Chin Hill’ and thei people chin” hibang in Pu Gin Za Tuang genna bang in khamtungte pen Ciin Hill ahihi. Ahi zong in Zomite khamtung gam a  lal hun, mikangte hongtun mapek in Zomite pen Chin na ki ci zo hi. Tua chin minpua in, tua chin mite teenna mualtung gamteng “Chin Hill” kici hizaw leh kilawm hi. A hih hangin chin hill suante Chin Hill min puasak in “ Chin” na ci uh zong hi thei hi.

*( Khamtung cih kammal pen Tibet gam min khat akipua hih tuak hi. Tibet gam pen khen 3 in kikhen aa, tua ah “Kham” cih gammin khat om hi. Tua gam mite pen gal leh sa lam ah thahat hi ci in, Tibet khang tangthu ah kiciamteh hi. Tua mah bang in Pu Gin Za Tuang gen ‘khuakhen’ a cih zong tua bang mah in khua a ‘chen’ gammin khat mah nei uh hi.)

CIIMNUAI KHUAPI KISATNA THU
39.       Ciimnuai khua Song Thu khuasaat: 
Kawlpi gam ukpite kuli aana athuakzawh nawnloh uh ciang in, zomiteng in kawlpi gam nusia in, khamtung gam ah na lal to uhhi. Khamtungah a lal lai un, Falam lam pawlte Song Za in Makai in, Halkha lam a pai pawl Za Hang in maikai  hi ci in, Khuangsaite khang tangthu ah kiciamteh hi. Kawlpi gam pan in mi 40 kiciam in Song Thu in Makai in, Ciimnuai khua na saat uh hi ci in Pu Thang Tuan in na gen hi. Song Thu in Makai in Ciimnuai khua na saat a hih man in,  Ciimnuai ah Saizang ah Songthu suante na hausa hi.

40.       Ciimnuai tunna suul: 
Kawlpi gam pan in khamtung ah a ki lal toh lai in, a zuihna uh suul lam tawh kisai in, ciamtehna atuamtuam na om hi. Pu Thang Tuan ciamtehna ah, Kawlgam pan tuingo dungzui in Thangmualpi kantan in Khul ah, tua pan in Ciimnuai khua na saat uh hi. Gualnamte ahih leh Meiitei gundung zuito in, bualkhua ah na tung masa uh hi. Falam leh Halkha mite pawl in, Meiitei gundung zui to in, Locom ah tung masa uh hi. Tua pan in Halkha pawl paisuak in,  Ramtro ah khuapi phut uh hi naci hi. Pu Gin Za Tuang in kawlzang kawlpi gam pan pawl khat in gundung zui to in, Locom ah busa masa a, tua pan in Falam leh Halkha gam sungteng ah kitheh uh hi. Pawl khat in nahtang li zui in, Ciimnuai ah naki busa uh hi, ci in na at hi. Falam mangpi H.N.C. Stevenson in, khamtung saklam gam mite pianna mun pen, tuhun Falam gamsung lumbang leh ngawngam sungteng hisak hi. Hatlangte Pu Sing On in,kawlpi pan in Laihan pimpih khua nasaat hi ci in Hatlangte khang tangthu ah kiciamteh hi.

41.       Ciimnuai khuasaat hun:  
Kawlpi gamah pute pate a teen sung in, kawlpi khua kulhpi kibawl hi cih kithei hi. Tua kulhpi bawlhun pen Pakan khuapi ah , Alaungsithu kumpipa khansung (AD 1085-1160) hi. Pakan innpi hongkiam in, Ava kumpi honglian in, AD 1368 pan 1401 sung in Kawlpi gam Ava innpi ah to kai hi. Tua hun sung in Ava mangpa in, Kawlpi gam minzite uksak hih tuak hi. Tua minzi pa aana thuakzolo in zomi teng khamtung lam ah na lal uh hi kici hi. Tua hih ciang in Ciimnuai khua saat hun pen AD 1400 pawl hi leh kilawm hi. Ahih hang in Pakan khuapi hun in, Zomite khamtung gamah a teen khit na thu, tua hun mualsuangte tung pan in kithei hi. Tua hi aa, Pakan khuapi ah Alaungsithu khanhun AD 1085-1160 sung hizaw leh kilawm zaw hi. Mikang hongtun kum in,Ciimnuai khang khang 12 phakhin hi kici hi.

42.       Tedim mite Ciimnuai a mi:  
Ih pu ih pa te in lai naneilo uh ahih man in, khang tangthute kam tawh hong kivaikha suk hi. Ciimnuai hun ciangbek na cingzo uh ahih man in, tuhun Tedim mite pen Ciimnuai pan i piang hi ci in, na gen uhhi. Ciimnuai khua ah khang 4 sung bang hongteen khit uh ciang in, mi hong pawlcingta uh hi. Tua ciang in a beh abeh in, abawng abawng in gamthak leithak zong in, Ciimnuai khuakiim khuapaam ah hong kitheh masa uh hi. Ciimnuai khang khang 4 na, Suantak in tuhun Saizang gam sihkhuk deek ah khua hongsat hi. Zo pawl in Baalzang Tedim tuinaak ah khua hongsat uh hi. Ciimnuai pan Paakzangkhua, Dimpi khua, Teizang khua, Vangteh botung, cih khuate hong saat uh aa, damdam in Tedim gam sungah hongki phalh uh hi. Tua ahih man in, tuhun Tedim mite pen Ciimnuai a mi i hihi.

43.       Behnam min pianna:  
Ciimnuai khua saat khit khang 4 hunsung in, Ciimnuai khuapeem, Ciimnuai khuakeh khuate hongpiang hi. Khuakhen pan kawlzang hunsung in Pumin pamin pua in behnam minpawl piangnuam leh piangkhin thei hi. Tuhun in Ciimnuai a mi Tedim mite sungah behmin 200 valbang om hi ci in kiciamteh hi. Tua behminte ah Pumin pamin a om mah bang in, teenna munlehgam min zong na om hi. Gentehna in Saizanggam, Sihzang khua ateenna uh min pua in, tua Suantak bawng pawl Sihzang kici hi. Pu Song Put minpua in, tua i suanteng in Songpute cihmin pua uh hi. Ciimnuai khua peem hun in ihpu ihpate lo zuan in, munkhat pan munkhat ah pai kawikawi in, a lo zuatna peuh a khua uh hi in, a lobukte a inn uh hipah hi. Ciimnuai khang 9 hun bang ciang in, a kip a kho in khua hong kiteng a, tua hun ciang in beh khat leh beh khat, khua khat a lianzaw a hauzaw hong kidem in, min leh vang hong zong ciat uh hi. Tua hun ciang in, nam neihna lungsim hong khang in, pu min pa min kilawhna pawl hong piang hi. Gentehna in, Kalzang ah Suante hongliat ciang in a pu Gen Zo min tawh hong ki min lawh pan uh hi. Dimpi ah naulak behmin a pian zawh pek ciang in El Thuam min tawh Elthuam suanteng hong ki minlawh pan uh hi. Kalzang phaipi ah, Hangsum hongliat ciang bek in Buansingte min hong kidawk in, Hangsum i tuu hong kici uh hi. Tua bang in behmin tuamtuam hongpiang a, tuate lak ah Suante, Naulak, Tomu, Buansing cih behminte hong kilang hi.

44.       Naulak, Suante, Tomu, Buansing kigawmna, Suangpi khua:  
Suante tuupa Pu Suan Kai in Phaipi pan Kalzang khua nasaat in suante min Suante beh na kipsak hi. Naulakte pute in, Dimpi khua nasaat in, El Thuam khansung in naulak min na kilo hi. Gen Zo tuu Muang Suak in, Kalzang pan Tomu min na ngah in a go a luumzo pa khat hongsuah ciang in, Kaih Thang i tuu kici in, Tomu khang na pan hi. Tua bang in naulak mi El Thuam i tuu Zong Tuang, Suante mi Gen Zo i tuu Lam Kip, Lam Tuang, Ngiak Tun, Tomu mi Kaih Thang i tuu Ngah Thang, Buansingmi Hang Sum i tuu San Hong hibang in na piang uh hi. Hih pasal 6 teng in pasal ci in, pumin pamin sial in, Suangpi khua naphut uh hi. Hih pasal teng in, Suangpi mi na piangsak hi. Hih pasal teng in amau leh amau in, Suangpi khua siam te in na piang uhhi. Tua bangin Naulak, Suante, Tomu, Buansing beh namteng kigawm in Suangpi a hihi. ( Hih Suangpi khuasaat tangthu pen Pu Thang Kam hong genna bang hi aa, tua ah Tomute Ngah Thang hi lo in, Dong Ngen hizaw hi. Ahih hang in khuatual phuisamna ah Hum Tawng khuasaat, Ngah Thang khuasaat kici hi.)

•           Khuakhen cih pen Pu Gin Za Tuang in, Gunkhawm hi ci in ciamteh hi. Tuhun in Tibet gam sungah tuabang gammin a omna kimu hi. Tua hi a, tua tangthu a khua khuamin gammin pawl pen Tibet gamsung khuamin leh gammin pawlzong hi thei hi.

•           Tanglai Chin kumpipa in Sengam sungah kulhpi khat bawl a, tua ah gammite khuatha aana tawh zang aa, gammite in ngimna tampi ngah hi, ci in Sengam tangthu ah kiciing hi. Tua Sengam Chin kumpi khanhun sungthu a ki gen zong hithei hi. Kawlpi khua pan Khamtung ah a na paitoh hun pen tua Alaungsithu khanhun sungmah hih tuak hi.


(Hih teng pen Suangpi Mualsuang laibu page1 pan 11 na sung hi.)

*************************************
Suangpi Mualsuang Laibu in Zomite ading a manpha mahmah Mualsuang ahihna tawh kizui in Zomi eLibrary / Laibusaal in, hanciam in a-ki teikik/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Suangpi Mualsuang (Laibu). Khen Khat Na SUANGPIMI PIANNA THU. A gelh - Sing Khaw Khai Description: Rating: 5 Reviewed By: Cinpu Zomi
Scroll to Top