728x90 AdSpace

Hot
Menu
Zon-ol na Donate

Latest News

Tuhun Khangnote’ leh Pilna. Rev. Vungh Za Nang

Tuhun Khangnote’ leh Pilna
Rev. Vungh Za Nang
Agape Church, Taungdwingyi myo
Photo Credit : ithrivehere.com

Paunak 2:6 –Banghang hiam cih leh pilna apia pa in Topa hi aa, amah in pilna le siamna ahilh pa ahi hi.   

Tua ahih leh leitung ah Pasian  athei lo te zong honkhat mah na pil in, honkhat mah na hau ahih man in Pasian a telcian lo te ading in, hong lungmangsak mahmah ahih man in etkak ding thu pawlkhat hong gennuam ingh. Amasa in American gam Newyork khuapi aa minih nuntakna(tangthu) hong gen nuam ingh. Khat pen Jonathan Edwards hi aa, khatpen Mac.Ju ahi hi. Mac. Ju pen Pasian awlmawh khol lo in a tu a ta te zong Pasian kammal sungah panpih lo, lamlak lo hi.  Amau ut bang in gamta sak hi.   Tua hi a , Mac. Ju in tu leh ta 1026 bang aneih lak ah mi 300 bang pen kum 30 ta thongkia in 190 te a mau leh amau ki zuak hi. A dang 680 kiim pen zu ne sa ne in agam ading in kizangthei cih thadah , kumpi in amau aa dingin suplawh den hi. Sum tampi bei lawh hi.

Tua ahih leh Jonathan S.Wat thu enkik leng , aman tu le ta 929 nei in American gam ading in mi manpha , mi muanhuai vive suak mawk hi. A nu le pa in Paunak Laisiangtho te,Pasian kammal tungah nungta sak in Pasian bek munpia, thupi masa sak hi.  Jonathan S.Wat i tu leh ta lak pan 430 bang Rev.Pastor, pawlpi makai vive ahi hi. 86 in amau gam ading Bogyoke(General) leh sang siapi vive hi aa, 75 in a gam ading in laigelhsiam(writer) vive suak hi. 5 in senate(ki ukna lam ah makaipi) suak a, vice-president khat zong suak hi ci hi. 
                       

Hih thu te ih et ciang in tu laitak a apiang thu hi aa,a etteh huai mahmah thu zong ahi hi. Paunak 20:7sung ah “Mikhat thuman in ahoih in a nuntak leh, ama suan-le-khakte mi hampha ahi uh hi.” ci hi. Lai siangtho kammal  nungta takpi ahih man in Pasian kammal tangtung takpi cih i theih nading ahi hi. Pasian in leitung mite amau ut bang in gamta sak aa, amah zong in a muangte tung ama thupha-van thupha, lei thupha luangsak hi. Paunak 10:22 ah Pasian’ thupha in mite hausak aa, dahna, gimna tawh piakhawm lo hi, ci hi. Khangnote in Pasian(thugil) na theihtel ding uh kong lunggulhpih mahmah hi.                       

Tu hun internet, IT hun hi a hunte manlang mah mah aa, Pasian’ itna i tel kei, i neih kei leh i pilnate sawtkhom lo ding hihang. I ki kepsiam mahmah nading i lamkhialh loh nading Pasian Kha Siangtho  mapan pihna kisam mahmah hi.   Mipil pen a i theih Solomon kumpi pa in a sih madeuh in kammal nokhat leitung mite hong vaikhak hi. Thuhilhsia 12:1 na ah, “Na khangno laitak in nang hong piangsakpa phawk in”, ci hi. Pasian Kha Siangtho pilna a nei taktak pen amah bek ahi hi. Ei pilna bek i suan leh sawtkhom lo ding hihang. Tu hun ciang Pasian om kei a ci, hong bawlpa om kei aci mi aom kawmkal ah Pasian in  hong tel i hi aa, i hihna (Pasian ‘tate hihna) i tel mahmah ding kong deihsak hi.                       

American gam a mipil mahmah nih thu kikum lai ni. Khat pen in “Pasian-hongbawlpa om lo hi” ci hi. A khat zaw leuleu in Pasian muang mahmah, um mahmah hi. Amah pen Space le Rocket lam ah Scientist Dr. Bran a cih pa ahi hi. Dr.Bran in a lawmpa kiang Pasian aom lam, vantung le leitung Pasian bawlsa ahih lam  theisak nuam mahmah ahih man in, a inn ah asam hi.Thu gen kawmkawm in, tua laitak ama bawltawm  van(ni,kha,aksi dan )te a lawmpa lak hi. Tua a lawm Pasian om lo aci pa in, a van lak te lamdangsa mahmah in en en aa, siam taktak si cia a cih leh Dr.Bran in “ama thu a hongpiang tawm hi” ci in adawng kik hi.  A lawmpa zong hong heh mahmah in a hai hongsa na hiam ci in dawngkik pah a, Dr.Bran in zong leitung vantung mu gige, en gige na pi in hong bawlpa om lo a ci te pen ahai pen te hi lo ding hiam a cih leh a lawmpa amah leh amah hong ki ngaihsun kik in Pasian hong um thei hi ci hi. Ni le kha te etna ding khuaimei ki sam lai ding hiam cih phawksan hi. Pilna tawh ki sai tawm kikum lai dihni.

1. I.Q(intelligence quotient) - Leitung pilna pen ki deih mahmah in thupi kisa mahmah hi.

2. E.Q(emotional quotient) - I pil mahmah hang ei le ei i kikep siam kei leh i ma ki tun lo thei hi. Ki kem zolo thei i hih manin ki kepsiamna i ki samzaw kan hi.

3. S.Q(Spiritual quotient)  - Hih pen Kha Siangtho’ piak pilna hi in, Solomon kumpipa in tua bang pilna na nei hi. Kha Siangtho in mite thuhilh thei aa, ompih in thapia thei hi. Pasian Kha Siangtho in i tu, i ta te dong, leitung beidong in hong ompih den aa, ei te in amah i muan i suan i belh ding ki sam hi.Mite tung ah hong lamsang ding a, amah i muang, i up ding ki sam hi.

“i Ki KepSiam mahmah nading i lamKhialh loh nading paSian Kha Siangtho  mapan pihna KiSam mahmah hi”

              Tu laitak in i gam ah thu-umlo ten hai hong sa hong nenniam hang a hun hong tun ciang i nung hong zuihding hun hongtung ding hi.  Topa’ ading aki piakhia ,amah a muangte Pasian in a tu a ta dong in thupha hong piak ding lamtak i tel mahmah ding kisam hi. Kha Siangtho i khasiatsak loh ding thupi a, Pasian pen mipil te zong azang thei, mihaite zong azangthei Pasian ahi hi.                         

Rome gam pan Rome galkap Bogyoke Titus in Pasian pen  hongbawlpa ahih lam, Zeisu honpa ahih lam Pasian ‘hopihna za in tapidaw biakna pen  Rome gam i biakna in hong zang uh hi. Tuazawh hunkhat ciang in Kha Siangtho nasepna thupi masa sak non lo in, mipil laithei te bek Pasian nasem ding aa hongteel uh aa,Kha Siangtho nasepna tawh anungta pawlkhat Rome gam pan England gam ah hong tai in, England gam ah Kha Siangtho meikuang tawh gam thupha hong piang in ukzawhna thupha zong hong ngah uh hi. Rome kumpi in leitung kum313 bang uk in,England in kum100 kiim hong uk a, tua pan England gam inzong leitung pilna bek hong thupisak lua leuleu ahih manin Kha Siangtho mizat pawlkhat hong paikhia leuleu in American gam hong saat leuleu uh hi. A gam uh a satzawh tun 300khawng pha pan uh aa, kumpi Abraham Lincon in gam thukhunpi pen Laisiangtho sung aa om thu tampi tawh na bawl ahih manin tuciang dong ukzawhna, leitung hauhna, khanlawhna te amau gam pan hong piangkhia hi. Tuhun leitung en leng, Pasian a muangte, a it te Pasian in akamciam bangin thupha pia takpi hi. Tua hi aa nang le kei zong  hongbawlpa thei tel in, Kha Siangtho mapan pihna i muan i suan ding tha kong pia nuam hi.Pilna, ukzawhna, vangliatnate Topa kiang om a, amah na muan bang in nang tung ah hong tung ding hi.Na up ngam zahzah thupha na sang ding hi.Topa’n thupha hong pia kimciat ta hen. Amen.      
         

(Hih article pen Siapa in CVS kum 10 cin pawi ah hanthotna hongpiakna pen a ki at kik ahi hi.)

CVS - Magway in Zomi eLibrary / Laibusaal ading in phalna hong piak ahi hi.

Source :
Ciimnuai Vontawi Siamsin Kipawlna - Magway
Kum '10' Cin Magazine Laibu.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Tuhun Khangnote’ leh Pilna. Rev. Vungh Za Nang Description: Rating: 5 Reviewed By: Cinpu Zomi
Scroll to Top