728x90 AdSpace

Hot
Menu
Zon-ol na Donate

Latest News

Tuunnu' Suunkhua Thupuak (Mother's Day Message). Gelh - Zokhai

Tuunnu' Suunkhua Thupuak (Mother's Day Message)
Gelh - Zokhai
Zo Khai' Tuun leh Zua.
Tuunnu’ Suunkhua” ci-a lakam-tawh kong’ pulaakna ahang-pen “Nute’ Ni” cihciang-in “Mothers’ Day” hiding, leitung-ah nu nih anei peuhmah om theilo, naubu khatbek ciat pan-a asuak vive., hih ni apankhia mite mahmah inzong “Nu’ Ni” ci-ngiat ahihteh cihthu, leh “Suunni” cilehang vaan-a khuavaak hongpia nii (sun)-acihna hizeel ahihman-in lakam-in ni(day – khuavaak hun sungtengsuunkhuakici-a, nii (sun – khuavaak leh lumna hongpia vaan-a agolpi-pen) suunni, zaangni, kici aihman-in “Mother’s Day” ading “Tuunnu’ Suunkhua” ahongzangh kahihi. Tua-tawh kizuui-in “Father’s Day” zong “Zuapa’ Suunkhua” honghi dinghi. Tuunnu’ min-tawh kipsak pahni.
Kinialna:
Tuunnu’ Suunkhua-tawh kisai kinialna leh kitukalhna omngei khin-a, taanglaai Greek te leh Romans te-in amau’ nusian biakna zuui-a abawl-uh Topa ZEISU’ hong suakma kum 250 laaipek-a abawl khitsa-uh hi-a, Church of England-in 1600 kiim-a kipan-in Abitlaai Nungak Mary pahtawina leh nute akipahtawi nading-in “Mothering Sunday” bawl uhhi. Biakna-in makaih ahihman-in Greek leh Roman biakna deihgawh-tawh hong kisuun-a, deihzah-in gamkeek zolo-in mun tampi lawh zolo-in kumzalom 19 sung-ah hong daai kiik-hi.
1872 ciang-in laigelhsiampi leh leeltongsiampi (writer & poet) Julia Ward Howe-in June kaalnihna Tuunnu’ Suunkhua-a akibawl nading US Gamukte’ kiang-ah hong pulaak masa-a, ama’ omna Boston-ahzong June kaalnihna sim-in Tuunnu’ Suunkhua-tawh kisai kimuhkhopna leh kamkum khopna naakpi-in zomto den-in, “Daihna” bulphuh numeite’ suunkhua mipi’ lungsim-ah hongthun-hi. Lungkia hetlo-in azop tantan hang-in 1880 nungsang hong daaikiik leuleu-hi.
Anunungpen “Tuunnu’ Suunkhua’ Tuunnu (Mother of Mother’s Day)”-pen US gammiAnna Jarvis hi-a, Tuunnu’ Suunkhua neihding alunggulhna leh akician lahthu/sil tampi gelh-in pawlpi biakinn tuamtuamte-ah hawm, upa vaaihawm phualte-ah puak kawikawi-in atawpna-ah 1914 May 8 ni-in, “May kaalnihna Nipi-pen Tuunnu’ Suunkhua” ahih nading US President Woodrow Wilson-in limkaai giap takpi-hi. Anna Jarvis hihzah-a athahaatna-pen ama’ pianna nu – Anna Marie Reeves Jarvis’ tawsawnna hi ciitciat laailaai-hi.
“Tuunnu’ kiang-ah itna lahna”-pen leitung mihing khempeuh-in hoih asalo om buanglo ahih-tawh kizuui-in leitung-a gamlian masa khang masa khempeuh phial-in “Tuunnu’ Suunkhua” bawl uh-a, kumzalom 21 peetpeet ciang-in Zomite-zong bukaan khia hong-om zeuhzeuh-tawh kituak-in “Nute’ Ni” kici lanlan-in ataangpi (vekpi ahihloh hang)-in kibawl-a, nute itna la, lai, leeltong cihte akipanpan I-hihi. Anna’ patkhiat-pen dawi biakna-tawh kizom hilo-a, biakna khat bulphuh-a kipan-zong hilo-in “Nu: Tuunnu” itna ngiat-tawh anu’ thu mang-a hong kipto ‘gualzawhna’ ahihman-in leitung azelhzo hikha dinghi.
Tuunnu’ Suunkhua-a gending leitung-ah aminthang leh alamdang nu-manpha tampihttp://www.livescience.com/14055-top-12-warrior-moms-history.html om-a, ahizong-in nang leh kei’ ading-in amanpha-lua, alamdang-lua omlo-hi. Nang’ ading-in na’ pianna na’ tuunnu bekmah na’ tuunnu hi-a, mite’ tuunnu bangzah-in thukhual-in, pil-in siam-in meelhoih taleh na’ tuunnu-pen na’ tuunnu ahihi. Hih kammal zah-a akhum kammal leitung-ah ka-muzo kei-hi.
Tuunnu Suunkhua-pen I’ pianna I’ nu-ciat I’ pahtawi theih hun hi-a, kuama’ hehtheih omlo, kizahpih maimai-theih omlo-in mikim’ ading nute phawkna laihoih, leeltong leh lahoih nonote na-khahkhiat theih hun ahihi. Zomi pupa ngeina-ah nulehpa khawng phat tangtang, ‘hong it-ing, hong ngai-ing’ cih tangtang tepawl zat kisiam lo-a, ngeina khat bang-in nana kineilo ahihman-in, ‘Nu-aw, na’ meel hoihlua, hong it lua-ing” cihding khawng haksa kisa mahmah-in kizahpih thei hihang. Pupa’ ngeina-ah kizanghlo ahihman-in a conservative diakte bang-in tuabang kipattahna-khawng thupi salo hihang.
Ka’ Tuunnu:
Khatveivei mi khatpeuh-in ama’ pianna Nu a-itna hongsuut ciang-in azahpih leh asim thadah-zong ki-om thei-a, ahizong-in thuhoihte ahoih-a ala-thei mite-in ama’ maailam phattuam nading-in mangthei ahihman-in gelhtaak sa-in ka’ pianna Tuunnu’ sinthu khaubang kongsuut nuam-hi. Ama’ min-pen Awi Khan Cing (Cingtom) hi-a, Pu Gualnam sungpan Pu Mitsuum suanmi ahihi. 1939 kum-in Zogam, Tedim Khuapiseh Laaitui Khua-ah suak-hi.
Ka’ Nu-pen meelhoih mahmah-a, Hualngo kual leh Lushei gam-a mi honkhat-in thei mahmah uhhi. 2000 kum-in Aizawl-a Lushei puteek pawlkhat-in, “Nang Laaitui na-hihleh Cingtom adam laai-hiam, na-thei kha-hiam?” hongci uh-a, “Ka’ Nu-hi. 1993 kum-in hong nusia khin” kacih ciang-in, “Cingtom, ta ding-in meelhoih keisicia” hongci uhhi. Tua puteekte ka’ Nu en ding-a Laaitui hongpai ngiat-uh cihi. Meelhoih mahmah napi-in kiniamkhiat mahmah-a, meelhoihna kiphatsakpih hetlo-hi.
Ka’ Nu leh ka’ Pa akiteen-a kipan-in mohoih ahihna kilangh sak-in, nasep haanciam mahmah, neeklehdawn kidawm mahmah, tua ziakmah-in gilpi natna angah ahihi. Nausuak dekdek, gil golpi nangawn-tawh simhlo kuan-in zolo kuan-a, suunsiah gina-zong kineilo, lokhomi kihi ahihman-in gilkial dangtaak naakpi-in thuakkha dinghi. Apasal-pen innluan ahihman-in innluah’ zii piicing ahih nading-in athukhualna leh athuakzawhna naakpi-in khangkhaan-hi. Saangkah hetlo-in, အ.အ.အ (အ သံုုးလံုုး) akici nitaak saang kah-in Zolai simthei-in tawmtawm gelhthei ciangbek ahihman-in tate lailam-ah deihsak mahmah-in hong tawsawn mahmah-hi.
Ka’ Pa-in Pasian’ Na hongsep ciang-in zinsuk zinto den-a, naute cinpih ngeilo, thamlo-in innvaai lovaai-ah ka’ Nu bekbek hongsuak-hi. Mi’ khawhcia ahihloh hang-in lokho-in, tua mah-tawh hongvaak ahihi. Ka’ Pa-in Pasian’ Na asep hang-in mite’ itna citpiak longal khasum peuhmah lalo ahihman-in ka’ Nu’ van naakpi-in gikding ahihlam anungciang-in akithei panpan ahihi. Pasian-in thupha pia ahihman-in lo neuno khat pan-in ante taksa-in, kumsim-in an kikham toto dinmun-ah ka’ Nu’ khutma alamdang ka-mu thei-hi. Lokhawh singpuak-pen nupi khempeuh lak-ah ahaatpen leh athasiallo penpen ding-in kaseh-hi, banghanghiam cihleh dam hetlo, gilpi natna-tawh cilgial phuulden kawmkawm-in asingpuak-pen kei leh ka’ nau-in ka-suanh zokei uhhi.
Pasal’ tung-ah akicing zahtaakna:
Hih-pen Zomi nupi khempeuh-in simleh ka-lunggulh ahihi. Ka’ Pa-pen Pasian’ Nasepna-ah khasum saanglo Evangelist ahihman-in innvaai lovaai khempeuh ka’ Nu-in hongvaan hi-a, tuapipi-mah ka’ Pa peuhmah maaipuam-tawh a-etlam ka-mu ngeikei-hi. Ka’ Pa-in asap naakleh ama’ omna pan-in “Hawi” cihsan-ziau ngeilo-in, “Bang-a, U?” acihleh agei tung lianlian-hi. (hih-pen thupi sa-in genzeel kahih man-in ka’ zii-zong ka-sap naakleh ka’gei hongtung lianlian-hi.). K a’ Nu-in ka’ Pa asap ciang-in “U” ci-in amin nangawn-tawh zomlo-hi, bangzah-in khum dinghiam! Ka’ Pa-inzong “Lawm” ci hiauhiau bek-a, amin-tawh asak ka-za ngeikei-hi.
Khasum saanglo-a thamang, hunbei-den ka’ Pa-pen ka’ Nu-in naakpi-in itna leh zahtaakna pia-a, apau peuhmah khatvei-beek aniallam ka-za ngeikei-hi. Maaipuam leulau-a ka’ Pa’ pau adawnlam peuhmah ka-thei hetkei-hi. Ka’ Pa-inzong awkhauh peuhmah-tawh ahopihlam ka-za ngeikei-a, khatvei mahmahzong hap ngeilo-hi. Ka’ Pa-in ahihleh ko unau-zong khatvei-beek hong hap ngeilo, kiuh leh saat cih peuhmah hongzangh ngeilo-hi. Ka’ Nu-in ka’ Pa khatvei-beek phunsan ngeilo, thamlo-in, leengla honghawhte, ka’ Pute-a kipan akuamapeuh’ tung nangawn-ah ka’ Pa ahawmthawhna cihbang kammal ka-za ngeikei-hi.
Ahitheiding-tawh akisut hang-in hi hetlo-hi. Pasian’ Naseem-a zinden, inn hongciah sunsunleh Lai Siangtho sim, Pasian’ thu, leitungthu, thu-kineihna cihte-a kipan thudong-a honghawh khempeuh tutpih, holimpih, ka’ Nu leh atate hun hongpia ngeilo hi-a, hihbang mi-pen “Pasian’ naseem I-citazong-in” ci-a apasal aphunsanlo zii-pen tawm mahmah ding-in ka-umhi. Phunsan lehzong “ahiding mahhi” cihtheih luat ding-in Sia Thang Khan Hau (paisa)-in, “Sia Vungh-aw, na’ tate hunpia in, hongkhan ciang-in kisiikding hiteh” acih ciang-in ka’ Pa-in, “Haupu-aw, tate pattah nading ka’ nupa-uh’n laisiamna neilo kahih man-uh’n ken Pasian’ thu gen-in ka’ tate Pasian’ hilh ding-a apia hizaw-ing” ci-hi. Ka’ Nu leh ka’ Pa asutuah-nuam cihbang hilo-in ka’ Pa-in azii atate hun hongpiak zekding deihsakna ahihi. Ka’ Nu ahihleh phunsanlo thamlo-in, nuihmaai-tawh a’pasal muakden-a, Nu lamdang mahmah ahihbang-in Zii lamdang mahmah ahihi.
Leiluum Sikha:
Tedim, Lawibual (BOC) Pa Hau (Pa Daal Kham leh Pa SuaDaalte’ pa) te’ kongbuuk-ah ka’ omlaai-uh 1977-79 sung-in ka’ Nu-pen “Ngalliam Tuunnu” ahihna tu-in hong pulaak khia-ing. Kei-pen kum 3 – 4 hi-in ka’ mitkha-ah honkhat luai laai-hi. Leiluum Sikha-pen numei khatbek genloh pasal nangawn honkhat alau mahmah-uh ahihi. Pa Hau te’ kongbuuk ka’ omna uhpen labuuk akici azawl pheiziau-a kilam hi-in innsung-zong kideiilo, pang4 ki-uum, atung siikkaang kikhuh cihciang hi-a, ahuan khang-ah peelthei I-cih pear kung lianpi po-hi.
Nitaak khat, sanggammeelmak (dusk) laaitak-in huan-ah ui honkhat-in naa-ziahziah ahihman-in baangkua kongbiang pan-in ka-etsukleh avom meumau agol mahmah khat peelthei kung tung-ah kingai-in tu-a, akiim-ah uite diang ziahziah-hi. “Nu, maa huan-ah..” kacihlianleh ka’ Nu hong leengphei-in ka’ baanbul-in hong mancip-in innsung-ah hongtuah phei-a, kong khaakcip saisai-hi. “Bang-a, Nu?” kacihleh, “Shiuuu” ci-in adaai ding-in honglak ziau-hi. Khuaziing pah-a, tua agol mahmahpen hongpai to-in innkuan-ah naak vanvan-hi. Ka’ Nu-in lupna-ah ka’ nau-tawh hongsial-in, khuukdin-in thungen-a, mei sumit-in “ihmu vuau, lau nading omkei” hongci-hi.
“Lau nading omkei” ci ahihteh alauhuai khatpeuh om hizaw khading ci-in ka-hak teeltaal-a, mi’ daih mahmah khitciang-in inntung siikkaang hong kisiikphei ziahziah-in siikkaang bangpen hong depsuk gawp-in ka-muhi. Ka’ Nu-in kei a-ihmu khin hongsa-a, amah thoto khiankhian-in khuukdin-in thungen leuleu-hi. Ka’ lungsim-ah, tho khiankhian-a etsimding bekbek ka-ngaihsun-a, ahizong-in ka’ Nu-in hongtaai dinglah ka-uut kei-hi. Ka’ Nu-in thu anget khitteh hongzawt thiamthiam-a, a-ihmu kineih kahih man-in khuisa-in amah tawlnga leuleu-hi. Adenmah ciang-in innnuai pan-in sual hong khawngto leuleu-a, ka’ lupna bang-uhpen liing liahlaih zomawk-hi. Ka’ Nu thoto khiankhian leuleu-in thungen-a, athunget man naailo-in hongdaai dide-in, sawtlo-in ka-ihmu thei-hi.
Aziingciang-in Anlangh pan-in ka’ Pa hongtung-a, Anlangh-a sanggamte-in itna citpiak-a amat akgual nih hongpua-hi. Ak puul laaitak ahihman-in ka’ Nu’ kiang-ah ka’ Pa-in, “Akpuul-in hongpha veveding, go lelni’ng-e,” ci ahihman-in ka’ Nu-in akgo-in agilpeeng hong emsak-a, ka’ naulah kum khat khawngbek ahihman-in keiguak-in akgilpeeng emkeu ka-neek ciilna ahihi. Banghanghiam cihleh khua-ah hileh ute-tawh tawmtek-a kihawm kahih man-uh’n akgilpeeng cindum ciacia khawngbek akine ahihi. “Ka’ Nu-in zaantaak-a thupiang ka’ Pa’ kiang-ah agen tammaw” ci-in ka-ngaakngaakleh tuni ciangdong gen naailo-hi. Khua-ah 1990 ciang-in gen kizom-in ka-genleh ka’ ute-in, “Nang kum 3 vaaldeuh khawngbek, na’ mang hikha dinghi” ci-a, ka’ Nu-in, “Amang hi hetkei, kuama’ kiang-ah ka-genloh hiven., Khai-in aphawkloh kon’ genloh tampi omlaai-e,” ci-in nuui hiuhiau-a, ka’ mitkha-ah zaanni, tuni leh ka’ sihni ciangdong mang ngei nawnlo dinghi.
Numei dang khatpeuh hileh, “hici, khaci, lau, khua-ah uutzaw,….” pauhlapding tamcihtak-a atam kimlaai, paulo phunlo-in apasal’ masuan-ah apasal alungnuamlo sakthei thu haksate nangawn paulamlo thamlo-in iimzo cihpen ka’ Nu-mahmah lamdang ka-sa ngaungau-a, “haangsan (brave)” ka-sa mahmah-hi. Tua ni-pen Leiluum Sikha munuam-a ka’ hah teeltaal manbek-a tua nitaak/zaan thupiang khatbek aphawkkha kahi zaw-a, kei leh ka’ Pa-in atheih khaakloh ka’ Nu-in Pasian aap-a a-iim khiinkhian Leiluum Sikha buaina tamveipi athuaklam anua ciang-in kithei saansaan-a, ka’ Nu-pen kei leh ka’ Pa leh ka’ sanggamte’ ading-in “Ngalliam” taktak-hi ci-in ka-kipsak seemseem-hi. Pasian upna bekbek-tawh Leiluum Sikha nangawn anangzo liimbelh Tuunno Ngalliam ahihi.
Myoma Sangaak:
Lawibual pan-in 1978 kumbei lam-in Tedim Khuukpi Veeng aciki Lasiam Pu En Lam Cin te’ inn khang-ah Tualzaang-a ka’ behte-uh Pu Zaam Pau te’ inn saap-in ka-kituahphei leuleu uh-a, tua laai-ah Pi Maan Cin te, Pu Son Cin Lian te, Boo Zelman te, Lasiam Pu Am Pau cihte-tawh ka-kiveeng uhhi. Ka’ Pa-pen angei-mah bang-in azinden hi-a, ka’ Nu-tawh, ka’ nau leh ka’ U Ciin-tawh koteng innpi khat sung-ah ka-om uhhi. Lokhawh nadinglah lem taktaklo, ka’ Nu-lah summeet bawlna lamsang van-khawng zuak siausiau-theinam hilo ahihman-in singpuak-peuh naseppi-a anei suak-a, ahizong-in Sia Haupu (Thang Khan Hau) te’ khanghuan Tuilehluan-ah lo huangsungcia phial khawngkhat ka-kho uhhi.
Khuukpi Veeng ka’ tunciil uh-a kipan veenglehpaam belhding meeltheih kician omlo thamlo-in, veeng naupangte-in naakpi-in hong simmawh uh-a, ka’ innsaap nangawn-uh suangtum-tawh hongdeeng zeel uhhi. Tui haksa ahihman-in khuukpi luui-ah beel kigual timtem-a, ka’ beel khawng-uh hong khuuksak zeel-uh ahihman-in beelkiilteng dep zihziah-hi. “Ta” I-neih takciang-in I’ tate hongki tuambawlsak kiukiau nangawn naakpi-in laaitang na mahmah ahihlam ka-veitheih takciang-in ka’ Nu alungtang bangzahtak-in naa-ding cih tu-in ka-theician seemseem-hi. Suaklu-peuh, thangkhuaipum-peuh tawi-in vaakkhia khale-ung hong kisut giap zeel-in, piakei le-uh hongvua giapzeel uhhi. Ka’ muhloh-in ka’ Tuunnu-in luankhi bangzahvei anuul zentam ci-panpan-ing.
Ni-khat Tuilehluan-ah ka’ Nu-tawh ka-kuan uhhi. Pa Haute’ lonawl taaksing tung-ah ngaltuun kaai khat mu-in Zongeina-tawh kituak-in amu masate-in naangkual-hiam lopateh hiam-tawh asing avialh naakleh kuamah dang-in tua khuai khoih theilo ahihi. Ka’ Nu-in lopa sauté bot-in tua taaksing phung-ah vial-hi. Zongeina khat honghilh nana-hi gige-hi. Kaal khat-khawng ciang-in (amin genkei ni-in, zong nana kisuang nawn hetkei unla) te-in ka’ Nu-tawh ka-kuan uhleh nana-haal uhhi. Ka’ Nu-in, “Hih khuai ko’ ciapteh masak hi-a, asing mahmah-zong Haupu te’ sing hiven, no abangci-a haalliang naivua?” acihleh “Nang-tawh bang kisai, ngaap nahihkeh paukawh” ci-ek mawk-hi. Ka’ Nu-in, “Aw, limtak nana-nei vualeh” ci-in lo-ah ka’ paisuk uhhi. Alungtang-ah bangzah tak-in avei-tam! Atapa naupangno’ khat maai-ah ‘simmawhna’ thuak, bangzah-in athangpaai zentam!!!
Ni-khat, Bawda Luui tung-a keenlak-ah singtom ding-in ka’ Nu-tawh ka-kuan uhhi. Ka’ Nu ahaangsan daan-pen tualaai-a ateeng Tedimte-in atom ngamloh keenlak-a singbulte ka’ Nu-in tom-a, kei leh ka’ nau (tua hun-in ka’ nau kum 3 vaalta) akhang-a luui-ah ka-vaakvaak uhleh sumkuang khat kamu uhhi. Nuamlua kisa-in mi’ hong muhloh khaakdingbang lau liang-in ka’ tawito laulau uh-a, anitaak ciang-in veeng tangvaalnote nih hongpai-in, “ka’ sumkuang-uh hongpia un” hongci-hi. Ka’ Nu hehpian-a, “No koi-ah na-mansak uhhiam?” acihleh, “Ko’ mansakna leh nang kisaikei, si-nuam nahihkei uhleh hongpia” cigiap lel-hi. Ka’ Nu-pen atate’ lungdam mahmahna khat khahsuah leuleu ahihman-in bangzah-in naa asatam! Ahizong-in, ama’ hehna akampau leh amaaitang-ah atate-in amuh khaakloh nading-in kikeem-in kimaaitaiisak veve-hi.
Hihte khempeuh ka’ Nu-in ka’ Pa’ kiang-ah ko daidai cihbang peuhmah ka-za ngei hetkei-hi. Lawmte khatpeuh’ ciamnuih khawng apasal’ tung-ah kihehsak gawp-a gen, khia, phun., naupangno kaalthu khawng apasal’ tung-ah action alaak hamtang dingkhawng-a khia puutsaat, cihbang numei za-in tam mahtaleh: Siamsinna anei kilkello, Kawlpau, Maangpau, Vaaipau athei vetlo, Guunkhawm khengsuk ngeilo, Ciauguun gaalkah ngeilo miimbang pianna ka’ Tuun Ngaih pian-indang-e, luan-in zau sa’ng-e.
Tuni dong ka’ khitui luanna:
Lawibual Veeng-a ka’ omlaai, kum 4 pha dektak hunlaai-in ka’ Nu naakpitak-in hong cina-a, ka’ Pa-lah khuadang-ah azin laaitak Dimpi Khua pan-in kaki-innluanpih te-uh Pu Cin Khua Thang’ zii (Pa Kaam Kheen’ Nu) hongpai-tawh kituak bilbel-in honghuh thei-hi. Amah-pen numei niinneihna lamsang dammawhna-tawh zato hongzuan ahihman-in agimnamsia sese-hi. Ka’ Nu taang zolo-in lupna tung-ah lum-a, Nu Ciang-in an hongluui ciang-in, “Nang uihteh, ka’ Nu’ piak-bek duh-ing” kaci sese-hi. Ka’ neulaai-in niinkih lamsang-ah akhonkheng phial-a akih khat kihi sese-hi. Nu Ciang-in, “Nu Cing-aw, hih-in nang’ piakbek duh sese-e” acih ciang-in, phun hetlo, pau hetlo-in mitsi zungzung-in lupna pan-in hong thoto-a, Nu Ciang’ kiangpan-in ankuang la-in hongpia-hi. Tua hun-in alimna leh amanphatna ka-theihloh hang-in tu-in tua an: leitung pan-a alimpen an ahihlam leh leitung pan-a amanphapen an ahihlam ka-theitel tahi.
Lamdang sa-ing, thuuk sa-ing, zaii sa-ing. Kam-tawh ka’ gensiang zawhloh/ theihlohlam tu-in tel panpan ta-ing. Hihbang Nu manpha na’ tate-uh na’ guannuam uhhiam? “Denteh agilkial peuhleh nelel vaak-e” cihding-in uuk-huai ka-sa mahmah ngaungau-hi. Ka’ Nu-in cilo-hi. Mite bang-in saangkah, laihilh, laisimpih cihte ama’ dinmun-tawh akituaklo ahihman-in saang hongkha ngeilo-hi, banghanghiam cihleh ka’ ute nungak tangvaal hita ahihman-in ka’ ute-in saanglam, lailam hong pantah zaw-a, ka’ Nu ahihleh asihciang dongtak-in a’ itna damtui kiamlo, buantui kihello, niinpa nahpa kihello itna damtui hongluan den-a, tuni leh leitung beidong luangden dinghi. Leitung-ah hun aneih nawnlohlam atel takciang-in, ka’ ute siamsinna danh-sawm akaanzo a-omloh naasa simsim ahitam, “Danh-10 nana-zo hamtang in” hongci-hi. Ama’ lungdeih tampi lak-ah nengno khatbek ahi danh-10 ka-zawh akitheih hun-in Shan Gamseh, Wongkang suangkhuuk-ah ka’ Tuunnu sial-in naubang ka’ kahna ka-ngilh zodiam!
Nu’ Thumanna Alawhtaak:
1992 kum-in lokhomi akihih baan-ah, ka’ Pa-zong Pasian’ Nasepna masuan azop zawh nawnloh sawtsimta, ko unaulah saangkah kim, tua kawm-in Mualnuam Taám kuampi khat saap-in lovaat-in ka’ unau-uh’n ka-giak uhhi. Nu-in lupna tung-ah akikhoi kimlaai hongmuang deksuai naailo ahihman-in, “No unau’ lovaat neulua dinghi, khatvei va-giak kiik un” hongci giap-hi. Ka’ upipa-zong thukhual mahmah khat hi-a, nial hetlo-in, “Pai vuauleh, kipan kiik ni-ei” ci-in ka’ kuankiik uhhi. Tangvaal thahaat laaitak vive kihi-a, lo-pen zaa mahmah-hi. Pasian-in thupha hongpia-a, vaaimiim bawk 800 (vaaimiin gaap 18 – 20 ciang-a bawk khat-a akikhih) leh akanhelh (suankaangpi-tawh kanghul-a akiphokeu vaaimiimtang) bung 60 hongla sak-hi. Ka’ theihzawh an ka’ hauhpen kum-uh honghi ziau-a, tua pan-in ka’ Nu-in themthem hong muangthei saam-hi.
Nu-in bangzahta-in tate pil kisa, haat kisa, siam kisa mahleh hongmuang baihlo, hong hawmthawh tawntung-in hong tawsawn tawntung-a tua-pen athuuk ITNA’ ziak ahihi. Ka’ Nu-in mi’ lak-ah hongphat kankan ngeiloh hang-in amit-heek bek-tawh hong pahtaakna ka-theitel lel-a, tua-in maaiam kum sawtpi’ ading ka’ thupha nana-hi denhi. Ka’ Nu-pen mi tampi-in “Meelhoih” ci-in aminzaak mahmah-uh ahihang-in kei bangpen nau akua-na (9th) kahih man-in kei’ theih ciangciang-ah meelhoih nawnlo-hi. Teekta guaita-a, thadim nawnlo-hi. Gilpi natna leh lungtang natna thuah ahihman-in amaaitang-ah silehsa dim hiilhial nawnlo-hi. Ahizong-in, anungak hunlaai-a “meelhoih” asa mahmah mite’ sang-in keimah-in ka’ Nu meelhoih kasakna lianzaw thamtham laai-hi.
Tumlam uplehsaanna (western perspective) bang-tawh ka-ngaihsut ciang-in ka’ Nu bangzah-in alungsim bangzah-in thahaat-hiam cihthu ka-phawkthak mahmah-hi. Tanu nihna-pen kum 12 kiim-in deihhuai mahmah laaitak hong nusia-a, tua zom-ah khat nausia sawnsawn-hi. Aliina ciang-in suaktuúng-in si leuleu-a, tuateng’ gau (impact) naakpi-a alian, akihaiicip theiding lungtang kitapna tuakto ngeekngeek mahtaleh Pasian Ummi ahihna nungta sakzo ahihman-in naakpi-in athupi numei lungtang cidam khat ahihi. Ngaihsutna acidam hang-in alungtang satak hong thazawm-a, natnateng hong kigawm ciang-in 1993 Jannury 15 ziingsang nai 6:15 hun-in Tawntung Tawldamna Munnuam hong zuatsan-hi.
Ka’ Tuunnu aduang-in paaibang ka-pom, mawngbang ka-kawi theilo zong-in, Tuunnu’n anbang hong itna, mubang hong ngaihna, lobang hong khualna guabang ka-hin sung-in sangsuulbang hongzuui dending hi-e. Zaalmang-a ka-muhciang nangawn-in laukha muang-in lungdeihpaal paakbang ka-tawi lawhhi. Simlei-a tui khempeuh akang zong-in Tuunnu’ itna damtui kang ngeilo ding-a,
Simlei-a huih khempeuh aveng zong-in Tuunnu’ mubang ngaihna huihkhidam laangden dinghi.
Tuunnu’ Vondeih,
Zokhai

Zokhai leh a Angkawi Ngaihno.

Zomi eLibrary / Laibusaal ading in hong piak ahi hi.

to:"Cinpu Zomi (www.cinpuzomi.com)" <cinpuzomi@gmail.com>
date:Fri, May 6, 2016 at 5:28 AM
subject:Tuunnu' Suunkhua (Mother's Day)
signed-by:rocketmail.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Tuunnu' Suunkhua Thupuak (Mother's Day Message). Gelh - Zokhai Description: Rating: 5 Reviewed By: Cinpu Zomi
Scroll to Top