728x90 AdSpace

Hot
Menu
Zon-ol na Donate

Latest News

Zomi Laigelh Siam Sia Dong Mung Tangthu Tomkim.

Zomi Laigelh Siam Sia Dong Mung Tangthu Tomkim.

Sia Dong Mung

Min : Dong Za Mung @ Dong Mung

Nuu leh Pa min Pa Dal Khan Sian leh Nu Sian Muan Cing (2000 kumin pham) & Nu Zam Ngaih Cing

Beh : Munluah

Pute Beh : Munluah

Status : Single / Tangval

Khua lui : Mauvom, Tonzang Chin State Myanmar

Pianpih sanggam u leh nau : 
Unau 3 pha in amah a u pen hi. Anaute in,
- Pa Kham Deih Piang+ zi le ta tawh Cikha ah teeng!
- Nu Cing Suan Lun+ pasal le tate tawh Mauvom ah teeng!

Biakna Pawlpi: 
A innkuanpihte AG ah om in amah tulaitak Agape Zomi Baptist Church-Yangon ah om hi.

Pianthakna Kum : 1995

Tui kiphumna : Tui kiphumna tawh kisai in kum 2001 kumin Mizoram Ngopa khua a Presbyterian Pawlpi ah tuithehna tawh a khatveina nei ngei hi. Kum 2010 ciangin Bangalore a sangkahna ah a Siapipa Rev. Dr. Frazer Sheik in tui phum hi.

Suahna leh Khan khiatna : 
- Mauvom ah suak, 
- Mauvom & Ngopa ah khangkhia, 

Teenna : Cikha, Tonzang Chin State, Myanmar

Pilsinna leh Sangkahna :
Leitung pilna lam : 
- Taan lang pan taan li- Basic Primary School-Mauvom(1990-1994)
- Taan nga pan taan kua- Basic Primary High School- Cikha(1995-1999)

Laisiangtho lam: 
Bachelor of Theology (B.Th) - Gospel For Asia Bible College(tun Biliever Church Biblical  Seminary)Yangon-Myanmar(2004-2008)Thesis- Analysis of  Systamatic Theology.

Bachelor of Divinity (B.D) - Bangalore Bible Institute & Seminary--Bangalore –India (2009-2010) Thesis: Kingdom of God.

Master of Divinity (M.Div) - New Life Theological Seminary-Coimbatore-India(2011-2012) (Academic Excellency Award tawh zo).

Master of Theology (M.Th) - Solid Rock Theological Seminary- Kerala-India (2012-2013) Thesis; Doctrine of Sanctification

A uk : Lasak, Langaih, Laisim le Laigelh.

Nasepna leh mapan na, kihelnate :
- Solid Rock Theological Seminary –Karela - lecturer (2012-2013)
- Word Bible Seminary-Yangon ah Acedamic Dean (2013-2014)

Tulaitak a nasepna te  :
- Bawmta Magazine ah editor (fulltime), 
- Rhapsody of Realities Monthly Magazine ah English- Tedim translor(Parttime), 
- Zingsol Monthly Journal ah Translation Editor, 
- Tongsan Media ah Columnist.

Tupna leh Ngimna : Lai nasep tawh Pasian gam ading le Zomi ading.

Laisiangtho bulphuh : 
Isaiah 41:10 leh Luke 1: 37 .

Mipilte  kammal hoih abul phuh: 
Winston Churchill
Never give up! Never give up! Never give up!

Ama Kammal bulphuh :
Thumanin citakin lungkia ngei kei peuh leng nikhat ni teitei ciang gualzawhna ngah limlim ding!

Zomi namte minam vai ah na muhna leh adeihsakna:
Zomite minam vai tawh I kinahvawh uh pen Galpi Masa lai pekpan ahi hi. Ahizong tuciangciang kipicing thei nai het kei! Eima Pasian hong siamna ahi Zomi cih tawh leitungah hong kitheih nadingin 2015 in 914 court numbet tawh Myanmar Census ah I kipholak thei uh hi. Lungdam huai ka sa mahmah ahi. Ahizong adahhuai khat ah ei Tedim kampauteng bek Zomi a kisa kha pawlkhat om a, Zomi hi loin Chin a kisa zong pawlkhat omom lai mawk hi. Zomite a tamzaw iteenna ahi Kawlgamah ukna limci om ngei hetlo ahih manin suakta takin vai ihawm thei kei uh a, kumpi nasem zaliante zong cihtakna le thumanna tawh kalsuan in tungsiahte muhkhialh khak ding mah lau, amau aituam ading mah lau uh ahih manin Zomi le Zogam hong puahzo nai hetlo uh hi.

Tuciangin Pasian hehpihna tawh Kawlgam zong Democracy daanin kikalsuan ciauciau ta a, Zomite sung mahmah ah zong MP honkhat I om ta hi.

Amaute’n Zomi le Zogam hong khantoh nadingin pilvang taka na hong sep dinguh thupi mahmah dingin ka mu hi.

Zogam pen singtang gam mual le guam tawh kidimna mun ahih manin neek le dawn zonna gina tak om nailo a, kum khat lokho in, lo pan a hong piang teng tawh kumkhat mah a kikalsuan ahi hi. Lokhawh bek hi loin neek zawnna lampi tuamtuam I kitheihsak ding lam ikilahsiam ding kisam hi.

Khua kim ah Mataw nuamtak in tung henla, khua kim ah tui neek limci nuamin om thei henla, khua kimah mei tangzihziah den zo leh khantohna hong kibehlap dingin ka lamen hi.
Tua banah lai sim le pilna lam mahmah kihanthawn tangtang leng, khua kimah laibusaal(Library) om thei leh lunggulh huai sa mahmah ing!

Zomite Lai lam leh Pilna lam a deihsakna :
Lai nasepna: Ei Zomite pen a kithutuak mawh mahmahte ihi uh-a, ei deihna ciat bek a bulphuh nuam le ei mi’n kidawk ding a deih ngiatte ihi uh hi. Tua ahih manin tuni ciang dongin lai I neih hangin I gelh daan kibang thei mahmah lo hi. Pawlpi zui le Editor zui in I laimal gawm daan, kaak daan le laigelh zia kilamdang toto hi. Ka deihsakna le ka vei mahmah thu khat ah.. Zolai zuun pawl ahi Zomi Christian Literature Society(ZCLS) le Zomi Literature Uplift Society(ZOLUS) te bang hong kipawl thei uh henla, Zolai gelh daan, Common Platform khat hong bawl khia le uh cih ka lunggulh hi. Tua hong bawlkhiat uh Zolai gelh daan le Zolai paizia pen mikim zat theih ding le mikim muh dingin booklet daan khat phialin Zomite omna munteng ah hong hawmkhia zo lai le uh, thakhat in mikim in I zat, I zuih zawh pahloh hangin damdamin kizui toto ding hi. Tua banah amaute in Zomi sunga laigelh uukte panpih theih nadingin lampi hong vaihawm uh henla, laibu hawmkhiat ding a neite sum le pai lama haksatna neite, hawmkhiat sak cih bangin vaihawm sak thei le uh hoih mahmah ding hi. Gentehna in Eimi sunga laibu thoh ding, hawmkhia ding peuhmah in amau theihpihna ngen masa ding, amau phalna ngah masa ding, tua amau phalna ngah laibu peuhmah pen Kawlgam kumpi phalna ngah hipah ding. Zomite omna khempeuh ah zuak theih nadingin vaihawm sak ding! Tua banga vaihawmsakna hangin tax/siah bel amau tungah laibu gelh/hawmkhia te’n khia ding cih daan hileh laigelh uukte le laibu hawmkhia te adingin nuntakna khat a nuam zaw kha tam maw?

Zomi Piltung tuang Madawkte lak pan etteh taak asak diak teng : 
1. Prof. C. Thang Za Tuan;
2. Dr. Do Suan Mung
3. Rev. Dr. Simon Pau Khan En

Gamdang na zin nasa Gamte: India

Mundang gamdang a painopna gam 3 te :
1. Israel, 
2. Vatican City, 
3. Norway

Leitung ah lasak siam nasak mi 3 te :
1. Akon, 
2. Bruno Mars, 
3. Taylor Swipf

Zomi sung ah lasak siam asak mi 3 te : 
1. Kamsen, 
2. Benjamin Lianpi, 
3. Cing San

Zomi sung ah laphuak siam asak mi 3 :
1. Lengtong Pauno, 
2. TS Khai, 3. TL Mungbawi

Zomi sung ah music siam asak mi 3 : 
1. Zen Lian(Lead), 
2. Cinpi (Bass),
3. Mungboih(Drum)

Zolai tawh aki bawl laibu a deih mahmah bu 3 te : 
1. Lungsim Limlang- Job Thawngno; 
2. Hauhna le Khansauna Thusim-Evan Do Khup; 
3. Piada pan Duputy Director General ah- Prof. C. Thang Za Tuan

Manglai lakpan laibu a deih penpen 3 te : 
1. Purpose Driven Life-Rick Warren; 
2. The  21st Irrefutable Law 0f Leadership- John C. Maxwell; 
3. Life without Limits-Nick Vujicic
(Hih atung aa teng pen naupang vaitawh aki bat zenzen hang in, khat leh khat i kipahtawina leh khangno ten akan theih ding etc.. deihna tawh ahihi.)

Na lai at tuamtuamte Article/Thuluui  bangzah, laibu bang zah bawl khin cih nonggen thei diam?
Laigelh bel ka neulai pan kipan a uuk ka hikha tam maw? Ka cihnopna ah taan nga khawng ka hih lai-in lawmte zawllai ding khawng ken gelhsak thei zel ing! Tua banah Sunday School ka kah ciangin ka lesson laibu tungah thu neng nono gelh thei zel ing. 

Kum 2000 ka nu hong nusiat ciangin laphuah khawng kipanin tua pan tawmtawm lungzuan dahnate laibu ah gelh ngei ing. 

2004 pan 2013 sung ka LST sangkahna pan la dawng 50 val khawng phuakkhia ing. Tuate bel sa khia ngei nailo. Topa’n lem a sak leh mailam ah album bawl sawm ing!

Ka Article gelh a nuntak kipat lian pen 2010 Bangalore ah ka om laitakin Bangalore a om eimite kalsim a ahawm theih zel laihawm sungah a masa pen “Nang cih vs Pasian cih” cih article gelh ing. Tua panin amau zong hong suak sak uha, tha hong lawp tuamin article dang zong thum vei livei khawng suaksak ngei ing.

Tuciang ciang Laihawm tuamtuam ah article ka gelh hong kisuaksak khempeuh pen 20 kim bang pha phial ta in lamen ing! 

Laibu lian bel bu nih bek hawmkhia zo pan ing!
“LAWHCINNA LAMPI” - October 2014 -Copies 500
“KITHEIHSIAMNA” – February 2016- Copies 1050
“NANG ADING BANG KIPAU?”- Hipen translation hi-in a sawt loin kihawm khia ding!


Laisimna i Manphatna :
Laisimna I manphatna pen Kawlte paunak khat a om “Pilna lai ah om” cih himai! Lai a sim zo mikhat pen a sim ngeilo mi khat sang thuthei zaw, ciim zaw hi. Lai a sim zo den Pastor khat le a sim zo ngeilo Pastor khat a thugen uh a zaknopzia kilamdang mahmah ding hi. Pasian sathau nilhna bel a tuam in emaw. Laisimna icihna hi. 
Pilna lai ah om a, pilna kham beelpi mihingte’n gu theilo hi. I theihlohte hong theisak dingin laisim kisam a, I tellohte hong telsak dingin laisim kisam hi. Hong pilvang sak dingin laisim kisam a, hong ciim sak dingin laisim kisam hi. 

Laisim pen midang khat tawh holimna tawh kibang hi-a, a laibu gelhpa tawh thu kikupna le ama ngaihsutna olno tak a ngah theih ziauna khat ahi hi. 

Pasian hong itna le ama geelna na theih semsem nading le na tel semsem nadingin ama hong hopihna Lai Siangtho na sim ding ahi hi.

Leitung ki-ukna upadi na theih nop leh tua thute tawh kizom laibute na sim ding ahi hi.
Na tupna, na sawmna, na geelna ah na tangtun theih nadingin lampi hong lak thei, tha hong guan thei laibu tampi om ahih manin lai sim tangtang in!

Lai sim lecin na pil zaw kan ding hi.
Laisim lecin na thei zaw kaan ding hi.
Lai sim lecin na tel zaw kaan ding hi.
Lai sim lecin na ciim zaw kan ding hi.

Mite simmawh neumuhna le pampaihnate na thuak nop kei a, na nuntakna ah lawhcinna na ngahnop leh laisim hahkat inla, na lai simna pan na ngah thuhoihte nuntak pih in!

Kizopna ding :
Dong Za Mung
NRC No. - 4/TAZANA(N)017282
Phone : +95-9963145191/ +95-9252679741
Email: dongmung@gmail.com
Facebook: Dong Mung

Akai khawm : Cinpu Zomi (Zomi eLibrary / Laibusaal)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Laigelh Siam Sia Dong Mung Tangthu Tomkim. Description: Rating: 5 Reviewed By: Cinpu Zomi
Scroll to Top