728x90 AdSpace

Hot
Menu
Zon-ol na Donate

Latest News

Zomite’ Sumgum. Gelh - Rev Khup Za Go

Zomite’ Sumgum
Gelh - Rev Khup Za Go

(Chin Students’ Association Silver Jubilee Magazine (1956-81) sung pana kiteikhia) 

1901 kum pawlin Zomi khempeuh awn khat (1,000,000) pha ding hi ci-in Dr. G.E. Grierson in gen ngei hi. 1962 kuma Dr. G.E. Marrison in a tuatna panin India, Burma leh Bangaldesh gam sunga Zomite pen kigawm leh awn nih (2,000,000) sangin tam zaw tham ding hi ci-in gen leuleu hi. Hih gam 3 sunga om Zomite khempeuh tawh kisai thu kikum ni ci leeng i laimai in hong cin lo ding ahih ciangin tu-a Zomi gam (Chin Hills) sunga om Zomite tawh kisai kikum diak ni. 

Gam: 
Tai patle 13,902-a zai Zomi gam pen a pualam mite in Chin Hills ci uh hi. 1974 kum Zogam in state a ngah ciangin vaihawmna a nop zawk na’ngin Tedim, Tonzang, Falam, Haka, Thlantlang, Matupi, Mindatr, Paletwa leh Kanpetlet ci-in township kua kisuahin Township Officer khat ciatin uk hi. Haka khua ah Zo Zumpi om hi. 

Minam: 
Zogam, Zo lei, Zo thau cih kammal mah bangin Zomi pen minam min hi-a, a pua lam mite in Chin ci-in ciamteh pen uh hi. Minam min ahi Zomi min tawi-in 1945-46 kumin sang leh lai khantoh na’ngin Zo Education Board kici kipawlna Tedim ah kiphuan hi. 1947-48 kumin Rangoon University sangnaupangte in Zomi Sangnaupang Pawlpi cih phuanin kumcin laibu zong khen uh hi.

Haka, Falam, Tedim, Thado, Zo, Zotung, Kuki, Thlantlang, Matupi cih bangin Baptist Association 14 kipawlna Zomi Baptist Convention kici 1952-53 kumin kiphuan a, Falam khua ah Zomi Baptist Convention Zum leh Lai Siangtho sang Zomi Baptist Theological Seminary, leh Zomi Baptist Press omin, “Zomi Christian” kici kha sim thukizakna khat zong tu ma lamin kikhen ngei hi.

1960 pawlin Rangoon pan Zomi Magazine hong kikhenin—
Zomi-in ka suak hi,
Zomi-in ka nungta hi,
cih pen tua hun lai khangnote’ han la hi. Tua bangin mun khempeuhah Zomi ci-in i kilo kim ciat thei hi. 


Tangthu leh Ngeina: 
Kumpi Bayyinnaung khan 1551-1558 hun laiin Zomite in galhang gal siam cihna minphatna na ngah ngei zo uh hi. Zomite huhna tawh Kumpi Alaungpaya in 1700 kuma Syriam a kap lai-in Zomite in a thuman a citak mi ci-in min nei uh hi. 1884 kumin Zomite ngeina bu Customary Law of the Chin Tribes kici Maungtet Pyo in na bawl zo hi. Mikang kumpi hong khan ciangin i minam ngeina banga ki-uk theih na’ng Chin Hills Regulations, 1896 kici upadi hong bawlsak uh zong Lushai Hills, Naga Hills leh Arunachal Pradesh dongin kizang ngei hi. Kawlgam suahtakna ngah zawh ciangin Zogam pen Chin Special Division kici-in Chin Special Division Act, 1948 kici upadi tawh Zogam ki-uk hi. Mikang khan cianga Mangpi hong sem masa B.S. Carey leh H.N. Tuck in Zomi leh Zogam a muhna uh The Chin Hills (Vol. 1 & 2) leh The Chin Hills Gazetteer ci-a 1896 kuma kikhen laibute tu-in Tribal Research Institute, Aizawl panin kingah thei hi. Mikang kumpi-in hong nutsiat ding cianga Kawlgam leh mualtung gamte mailam ki-uk zia ding kikupna Panglong Conference ah Zogam tangmite in minam ngeina, pupa ngeinate zanga ki-uk ding thu a sun uh zong The Report of the Frontier Areas Committee of Enquiry kici laibu 1947 kuma Mikang kumpi in London leh Rangoon ah a khet uh laibu sungah tuang hi. Tu nai 1963 kumin American mi, F.K. Lehman in Zomite’ nuntakzia a muhna The Structure of Chin Society kici laibu khat bawl hi. 

Biakna: 
Tanglai Zomite in biakna dawi leh kau, sing leh suang bia uh hi. Mikang Mivom a kipan mualmi dangte khempeuh in zong a neih uh tua bang biakna pen Mikangpau-in Animism, Tribal Religion leh Primitive Religion a ci uh hi. 1888 kum pan kipan Tedim gam mi Pau Cin Hau kici in na khempeuh a bawlpa Pasian khat bek om hi ci-in dawi biakna phiatin Pasian biakna nam khat piangsak hi. Biakna bek hi loin lai zong piangsak ahih manin Laipian biakna zong kici hi. Agama piang a leisuak hi bang upna leh biakna pen lim takin kipuahin, phatakin kimakaih theih leh, Khristian biakna thumaan dong tunpih theih ding up huai hi ci-in 1932 kumin British & Foreign Bible Society in gen hi. Zogama Khristian makai sia leh upa tampite pen hih Zo biakna sung pan hong suakte ahi uh hi.
Sian Mang in tongdam hong khak e,
‘Zin tawh na khen in’ ci e. 
Pupa khana lung a gimna,
Sian in leen puan bang paai e
cih pen tu lai pau leh Pau Cin Hau pianthakna la hi. 

Lai: 
Zomite lai pen savun tungah ki-at a, uipi in tua savun a neksak ciangin mang suak hi ci-in tangthu kigen thei hi. Ahi zongin tangthu ahi lo a takpi mahin lai i nei hi. Tedim kamah ‘Lai’ kammal a om mah bangin Tedim gamah lai laimal zong na piang hi. I gensa bangin 1900 pawl in Pau Cin Hau in lai na bawl zo a, Zogam bek hi loin Lusei gam, Meitei gam dongdong na zeel hi.  Tua huna kipanin ni danga kam bek tawh a kigen sawn tangthu tangla leh biakna thute tua lai tawh kiciamteh thei pah a, patau kamtai pen laitai hong suak a, kelkong sialkong pial peuh leh a kiho thei nawn lo minam pen lai tawh kiho thei uh a, Galpi Masa hun sung bangin French gam dongdong ah lai kikhakna’n na zang zo uh hi.  1931 kumin hih lai tawh British & Foreign Bible Society in Mualtung Thuhilhna teng na khen ngei uh hi.  Pau Cin Hau bawl hih Zolai pen 1931 India gambup Kisimna Laibupi sungah tuang a, tua a kikhumna Laibupi pen India, Pakistan, Burma leh Bangladesh gam state leh district laibuli (library) minthang khempeuhah om ding hi.  Calcutta National Library ah zong om hi.  Zogamah Kawllai leh Mikanglai hong khantoh main-
“I bangkhem tua in hong ci
kawh tawh hawh ding
ciah tah pil tom duai hak
sau kawi pau.
Om tanglai pai mang thu la,
lung gin tel cin
Tung beel bawlpa lawhpa,”
cihte pen a mual a guam thawnin la sakin na sa khin zo uh hi.   

Pau: 
Zogamah Mikangte hong khan tuung pawlin kampau nam sawmli-le-nga bang pha hi. Tua pen a lamdang hi lo hi. Gam khat peuhpeuh pen a pil ma uh, kikawmna a haksat lai hunin pau kitel loin khaw khat beh khat, khawk khatin pau tuam a nei thei zel mah uh ahi hi. Mikangte nangawn tanglai-in kam tuam tuam pau uh hi. Zomite zong Mikangte hong khang, Pau Cin Hau thu leh Lai Siangtho Thu hong khang, Galpi masa lai-in Tedim gam mihing 1,000 France gam dong, (mi 10 bang London dong) va pai, Galpi Nihna in Zogam hong nawk, 1948 teh suahtakna kingahin, tua bangin gam mite in khua kimu panpan hi. 1952-53 kum Rangoon Zomi Sangnaupangte in kumcin laibu hong khet ciangun kilomkhat na’ngin tangkam a kulna kiphawk hi. Mualtung gam dangte mah bangin Zogam ah zong sang leh lai pen Missionaryte leh biakna makaite in hong bawlsak masa uh hi. Rev. J. H. Cope in hong bawlsak laibute 1925 kumin Zogam sungah kitawi hi. Falam pau tawh 1933 kumin Lungdamna Thu Laibu nonote kikhen a, 1951 ciangin Thuciam Thak bu kikhen hi. Lai Siangtho buppi pen a kikhet san laitak hi. Haka pau tawh 1920 pawlin Lungdamna Thu bute leh Sawltakte Tangthu bu kikhen a, Thuciam Thak pen 1940 pawlin kikhen hi. 1959 kumin Piancilna Paikhiatna kikhen a, 1979 kumin Lai Siangtho buppi kikhen hi. Tedim pau tawh kisai-in Rev. Cope 1910 kum Tedim hong tun ciangin Tedim pau kisin pahin, Tual Lai Sin Tawmna cih leh Mualtung Thuhilhna thute khen hi. 1915 kumin Mattiu bu khen a, Thuciam Thak pen 1932 kumin kikhen hi. 1964 kumin Late kikhen a, Lai Siangtho buppi pen June 12 ni, 1977 kumin kingah hi. 1954 kumin London University panin kampau thu kanin Prof. Henderson Tedim-ah hong pai a, Tiddim Chin kici laibu khat Oxford University Press-ah 1965 kumin a khen hi. Zogam buppi ah lai kigelh cilna kampau ahih mah bangin Tedim pau pen tu ciangin Zogam leh Kawlgam sung bekah hi loin India gam dongah kizang tang thei hi. 

Lai leh pau puah ding leitung bupah UNESCO in a thu bulphuh khat hi a, India Kumpi in University dongah zang sak thei a, Kawl Kumpi in gam bup kam ahi Kawlpau banah gamkete ah zong amau kam zat theih ding thu pia hi. 


Zomite khut sungah Pasian in sumgum tampi hong ap hi. Tuate Ama deihna tawh kituaka kep ding, puah ding, leh zat ding pen Zomite tavuan hi.

****************************************

Lai gelh pa Phamsa Rev Khup Za Go i tapa Pa Carey Suante in Zomi eLibrary /  Laibusaal ading in phalna hong piak ahi hi.

Source :
REV KHUP ZA GO’ GEN LEH GELH THUTE 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomite’ Sumgum. Gelh - Rev Khup Za Go Description: Rating: 5 Reviewed By: Cinpu Zomi
Scroll to Top