728x90 AdSpace

Hot
Menu
Zon-ol na Donate

Latest News

ZYA LE ZOMI KHANGNOTE SEP DING. Dr. Hau Za Cin, Ph.D (Chem) Phuitong Liim

ZYA LE ZOMI KHANGNOTE SEP DING
Dr. Hau Za Cin, Ph.D (Chem)
Phuitong Liim
 Dr. Hau Za Cin, Ph.D (Chem)  leh A angkawi ngaihno Cing Suante

            ‘Sep ding’ ci a mawhpuak kiguan pah zezen cih zong zaknop khol kei maw! Ahih hang a gah hong khum mahmah ding hi. Sep theih hun sawtlo a, sep theih zong kihaulo hi. I septheih themno khat in nuntakna tampi hoihsak thei ahih manin bel septaak hi. Tua ahih manin a semzo ding leh a semthei Zomi Khangnote kiangah ‘sem ding’ ci-in kong gelh hi. En suk pah ni.

            Makaite leh mipilte in mihing in ‘lunglutna gina’ khat teitei neih hamtang ding ci uh hi. Tua ‘lunglutna’ pen a hoih lama mite a khek thei nasep, gamtat hileh ci uh hi. Lunglutna khit ciangin mihingin ‘siamna, kivakna’ khat teitei neih ding ci uh hi; tua pen nekmuhna ding a kisam hi. An ne loin kinungta theilo hi. Tua ‘siamna, kivakna’ pan ‘siamnelna’ dong ah kilapsang ding hi ci uh hi. Tuate nei leng midangte nuntakna a hoih lamin kilamdangsak thei hi ci uh hi.

            Tua bang lungtang, siamna, siamnelna a nei dingin Zomi khangno khempeuh ka deihsak hi.

            Mi khempeuh a pian panin siamlam, hihtheih lam a neisa vive hi a, ahi zongin a neih lam uh a kitheilo tampi om thei ahih manin tuate phawksak ding a thupi khat hi. A phawk uh ciang kisin in siamna, hihtheihna khangsak ding uh hi. Tua pen makai leh kipawlna khempeuh mawhpuak, tavuan ahi hi.

            Khantohna dingin a hoih lam vive ngaihsut masak kul hi kici hi. A sia kawmlak pan a hoih muhtheih kisam hi. A sia lak ah a siatna bekbek mulo dingin a hoih thei ding, a hoihzaw diak pen muh theih ding kisam hi. Tua a hoih neu ciuciau pen tengkhia dingin khoi ding, puah ding, kem dingin zuun ding - tua hileh hong khangto in a hoihlo lak pan a hoih hong palh in a tawpna ah a hoih in hong zel ding hi. Tua banga a hoih, a pha a kipuah theih nadingin a kisam pawlkhat om hi.

           
1. Ngimna hoih khat nei ding hi.
            Zomi khangnote in Zomi khempeuh khantoh nading a ngim ding uh hoih hi. Khantoh nadingin a gimte huh kul, a cimawhte van kul, a haksate dinpih kul, a thuakte thuakpih kul, a hanciamte tawsawn kul, a ding zolote bankaih kul. Khuasung ah mipi theih ding thusia, thupha a om khempeuh manlang taka zaksak pah kul. Kidop ding, kidal ding a omleh manlang taka theihsak pah kul. Sep ding huh ding a omleh a sem ding, a huh ding mipi kizaksak pah kul. Tangzang a sep kul hi. Mite pahtak a ngah nadingin a tup, a ngim a gina kisam a, mite teltak a theihsak leh muhsak kisam hi. Mihing khuak in na khempeuh ciamteh zolo ahih manin mun khempeuh ah gen kawikawi, gen kikkik, hilh kikkik, hih kikkik kisam hi. Khatvei genna mikim in theipah, telpah, ciamteh suak cih bang om ngeilo hi.
           
2. Kilawmtatna bawl ding.
            Kihotheihna, kizopna, kilawmbawlna, kikholhna gina neih ding kisam hi. Mi nuntakna a puah dingin mi tawh kizop masak ding kisam hi. Mi tawh kizom dingin mite lungsim theih kul hi. Mite lunglut lam theih kul hi. Ei deihna leh mi deihna kibang denlo hi. Lunglut zong kibanglo hi. Kin leh sep ut zong kibanglo hi. Ahi zongin ngimna hoih khat neih khit ciang mite tua ngimna leh deihna theihsak kisam a, a theih khit uh ciangin sep khop kipan thei pan hi. Tua theihsakna dingin kikholh theih, kihotheih, tutkhop theih phot kisam hi.
           
3. Mi cimawhte a dinkik nading uh huh ding hi.
            Meigong tagahte, huh ding neilo, hon ding neilote a huh a panpih ding khuasung nungak tangval Zomi khangnote ahi hi. A manlanga kuankhia a seppih ding, zawhpih ding khangnote hi. Thaman lamen kei ni Pasian in hong theihpih ding hi. A tek khat, a cimawh khat, mikhual cina khat na huai na kep na khoi ciangin nang mimal thupha bek hi loin na minam thupha zong hi a, eite hong bawlpa muhna ah zong kilawm in guaksuak het lo ding hi. Tua nasep Zomi khangnote mawhpuak hi. Kisam keng ci kha ken, upate in, ‘Saipi amah bek lianlo hi’ kici hi; mi na kisap hun hong tung pelmawh ding hi. Mite a dinkik nading uh nasep thupisak ni, thupi sak bek hi loin i sepding ahi hi.
           
4. Gamtat hoih leh kilawm mite theisak in en zong zang ni.
            Zomi khangnote in khuasungah omdan kilawm, innsungah omdan kilawm, gamsung gampua ah omdan kilawm a lak dingte i hi hi. Kizep dan kilawm leh hoih, kampau dan kilawm leh hoih, kiho dan kilawm leh hoih a zang dingte i hi a, mite a zang thei dingin a pattah ding zong eite mah i hi hi. Pil gamtat ding, laisiam gamtat ding, kiniam khiat a mite hopih ding a kisinsak ding eite i hi hi. Siangtho nuntakna a lakkhia dingte i hi a, a siangtho in a gamta dingte zong i hi hi. Thudik thuman gen ding, a hoih a pha sem ding, khangsawnte theihsak ding nang leh kei tavuan hi.

5. Hanciamna nei dingin mite hanthawn ding.
            Khangno khat pen a sepzawh ding na tampi om hi. Khangno hun pen thahat penpen lai hi a, sem nuam in sem ngam peuhleh a zawhlah ding omlo hi. Khangno hun sauvei loin sawtlo kal in hong beipak ziau hi. Septheih hun sawtlo a, hanciam a sem dingin kihanthawn hun ahi hi. ZYA leh Zomi khangnote in mite hanciam ding leh a sep theih bangbang uh hanciama kuhkal a sem dingin a tawsawn, a thapiak ding ahi hi.
           
6. Pasian upna kip nei dingin kisinsak ding hi.
            Khangno hun pen Lai Siangtho in ‘tomcik hi’ ci ahih mah bangin tua hun tomcik pen zangsiam dingin hong hilh hi. Zangsiam kei leng kila kik theilo a, kisikna leh pawisakna tawh hun nunung kizang thei hi. Tua ahih manin lamdik totna dingin Pasian thei in amah upna leh muanna, siangtho nuntak neih nading, a hoih a pha sem nuam ding, mite ahuh nuam hi ding, a pahtawi nuam hi ding, a khual hi ding, a lungdampih nuam hi dingin a kisin ding ahi hi. A khangno laiin a kisin keileh a khangham ciangin a kisinnop hang ‘ui mei kawisa kawi veve’ cih bangin kikhek kik thei nawnlo kha ding hi. Tua manin Zomi khangno khat in a khangno lai mah pan Pasian zahtak in upna kip a neih ding, Pasian a phawk ding a kisam ahi hi.
           
7. Thanuamna a neih ding kisam hi.
            Zomi khangno khat in a sep ding a kipia, a sep dinga kilamen khat pen sawlsawl kul loin a sep pah nop ding thanuamna a neih kisam hi. Sawlsawl kul, kutkut kul, zolzol kullo in ‘sep ding om ei’ cih a kigen nak leh a diangkhia thei dingin Zomi khangno a lungtang a kizawh kul hi. Ama adingin a thanuam khat pen mite adingin seppih kulleh zong thanuam takin sem pah hi. Mite khualna nei khat in amah zong kikhual pah hi. Amah zong a kikhual zolo khatin midang khualna nei theilo hi. Zomi khangno khat in lawpna leh thanuamna kicing a neih ding, tua tawh a khantoh ding, a picin ding a thupi mahmah bek hi loin ‘a hiding ngiat’ ahi hi.
           
8. Ahihna kitheician mah ding hi.
            Khangno khat pen amah kua hi hiam cih a kitheihciat mahmah ding ahi hi. Ama hihna bang hi hiam cih a kitel kisam hi. Zomi ahihna a theih kisam hi. Numei ahihleh numei ahihna leh numei sep ding numei tavuan a theih kisam hi. Pasal ahihleh pasal ahihna leh pasal tavuan a theih kisam hi. Bang dinmun ah ding hi hiam cih a kitheih kisam hi. Bang sem thei in bang sem theilo hiam cih zong a kisam hi. Amah leh amah a kitel khangno khat mi picing a suak ding hi. Zomi khangno khempeuh in amah leh amah a kitel bek hi loin, a kitel nailo a omte zong lungduai tak, zahtak kawm takin a telsak ding, ahilh ding ahi hi. Ei leh ei i hihna kitel peuh leng i mailam lawpna leh lametna tawh kikalsuan zangzang thei pah hi.
           
9. Mailam nuam semsem ding hi cih phawk ding hi.
            Mailam lametna thupi zaw kan hi cih a phawk dingin Zomi khangno khempeuh in a theih ding kisam hi. Tuni sangin zingciang hoihzaw dinga, zingciang sangin thaiciang nopci zaw lai ding hi. Banghang hiam cih leh zingciang hoih nadingin tuni in na kisem a, thaiciang hoih nadingin tuni leh zingciangin na kisem hi. Semto in puahto in kalsuanto peuh lehang mailam nuam semsem ding hi. Tuni in i sepkei a, mailam hoih ding i lamet pong leh bel na tuaci tuanlo ding hi. Ahi zongin tuni in banghiam khat hih peuh lehang mailam nuam semsem ding hi. Tua manin tuni in a tu mawkmawk, a vak mawkmawk thei hi loin a sem tangtang dingte hi hang.
           
10. Pattah huai, etteh huaite a pattah, a etteh dingte hi hang.
            Zomi khangnote in khuasungah, vengsungah, a koi mun peuh ah nahoih sem, thudik, thuman, gamtat hoih, etteh tak a muh nakleh a pahtawi ding, a etteh ding ahi hi. A hoihzaw a hong bawl dingte etteh kei leng kua etteh ding? A hoih bawl theite eng ding hi hang. Thupi bawl ding hi hang. Lamsang in a kulleh amau kimakaih sak ding hi hang. Khantohna lampi hong tonpih bek hi loin hong ‘musak’ khinzo uh ahih manin!
           
11. Mi khempeuh in ‘hihi’ acih theih ding gamtatna,
      nasepna uangbawl ding hi hang.
            Mi pawlkhat bek in ‘hihi’ a cih ding ahih leh mikim huamlo cihna hi. Mipi a kuamah peuh in hih bel mi khempeuh in pakta inteh, mi khempeuh in noptuampih inteh, mi kuamah peuh in phasa inteh acihte lim sep semsem, uangbawl semsem ding ahi hi. Mi khempeuh lungdamna leh phasak ahih nakleh nang leh kei zong hong huam kha hi. Tua ahih manin nahoih sep cimtak kei ni.

            Tuni a na hih theihte zingcianga hih dingin siit kei inla, mi tampi lungdamna ding nasep theihleh zong mi tawmcik adingin siit kei in. Na nuntakna a manpha in na zat theih dingleh siit kei inla, nuntakna tampi neilo na hihlam phawk in. Mi khempeuh ading na manpha sem zo ciat dingin Topa in Zomi khangnote leh mikim thupha hong pia ta hen.

ZYA kum sawt taang bang dam hen.
Phuigua bang phungcing hen.
A banzal mi khempeuh lungmuanna, nopsakna, deihteng li bang cinna hi hen.

Zomi leh Zogam a zun, a lamsang, a paalsak hong hi denta hen.

********************************************

ZYA - Myanmar in Zomi eLibrary / Laibusaal ading in phalna hong piak ahi hi.

Source : 
ZYA Tin Jubilee Magazine Laibu (2005-2015)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZYA LE ZOMI KHANGNOTE SEP DING. Dr. Hau Za Cin, Ph.D (Chem) Phuitong Liim Description: Rating: 5 Reviewed By: Cinpu Zomi
Scroll to Top