728x90 AdSpace

Hot
Menu
Zon-ol na Donate

Latest News

LAIBU BAWL A KISAPNA. Agelh - Khampu Hatzaw

LAIBU BAWL A KISAPNA
KHAMPU HATZAW 

A beisa kum za khat lai-a Tedim gam sunga Pasian thu hong puak missionary leh Zogam (Chin Hills) sungah Mikang kumpi in khasum sang loin kumpi sang khempeuh a uk sangmang (honorary inspector of schools) tawh a thuahsak J.H.Cope in Roman  laibul (alphabet) zangin lai hong bawlsak in, 1910  kumin Tual Lai Sintawmna bu hong bawlsak a, 1913 kum ciangin Laishim Bu hong bawlsak  khit, 1915 kum teh  Lungdamna Thu Mate hong khetsak leuleu hi. Tan 1 pan tan  4 dong sang laisimbu dingin  Gam Thu; Cidamna Thu leh Ganan bute zong 1920 kum pawl panin hong bawlsak toto in tuni dong a hun zui-in kipuahin kizang lai hi.1932 kum ciangin  Thuciam Thak Lai Siangtho hong khetsak leuleu a, 1977 kum ciangin Lai Siangtho buppi i nei ta hi. J.H.Cope in a kicianin Zolai atdan  hong bawlsak ciangin i paute lai-in kigelh in (reduced to writing) kisim thei ahih manin  theihna, teina, khanlawhna leh  khantohna lamah mazangzaw deuh pah hi hang. Tua pen ei a dingin khangthak hun pilna sinna (modern education ) a kipatna ahi hi.


Laibu bawl a kisapna i tel baihna dingin, leitungah sim theih  ding lai khat beek na om lo hi leh koi bangin i om zen ding hiam? Ngaihsuthuai mahmah hi. Lai na om lo hi leh i Lai Siangtho zong om  lo pah dinga, a sunga  thute zong  khat beek kithei kha lo pah ding cihna ahi hi.Tanglai leitunga mipil masa, a khangto masa Izipt-te, Greek-te, Roman-te pilna leh thumuhna thute kiphawkpih lo ding cihna hi pah hi. Lai a om zenzen leitung mi khempeuh’ kamphatna ahi hi.

Lai (literature) in mailam nuntakzia ding hong geelsakin, hong lawpsak a, minam khat, gam khat kalsuanzia ding  lam hong lak hi. Martin Luther in Wittenberg biakinnpi mai-ah a lai suanna hangin  leitungbup Khristian pawlpi kipuahphatna piangsak hi. Homer leh Sophecles’ laigelhte hangin tanglai Greek-te khanglo in  nakpi takin hong khangto  uh a, Thomas Hobbes (1588-1679) laigelh Leviathan leh John Locke (1632-1704) laibu An Essay Concerning Human Understanding hangin England gamah 1641 kumin Tual  Gal (Civil War) leh 1688 kumin Glorious Revolution-te a pianlawh hi. French Revolution a tun’ theihna dingin Voltair leh Russeau-te laigelhte in tha pia mahmah hi. Harriet Stowe’ laibu Uncle Tom’s Cabin in Abraham Lincoln’ lungsim heizo lua ahih manin  America gamah  mivom Negro sila innteengte in suahtakna ngah lawhin kideidannate beisak hi. India gamah zong missionary William Carey leh Raja Ram Mohan Roy laigelhte hangin India  mite ngeina hoih lo ahi numei naungek a suakciilte a kithahna (female infanticide) leh Sati kici a zite in a pasalte  sih ciangin a siluang tawh  a kihallup khawm ngeinate kiphiat hi.

Mikang kumpi in Zogam hong lak tak teh  Zogam (Chin Hills) ah mangpi a sem B.S.Carey leh H.N.Tuck-te in 1896 kumin The Chin Hills kici bu 2 a pha laibupi na gelh  zenzen kei leh Zomite pianna suul kanna ding, kua minam hi a, midangte in kua minam hi ong ci-a, i  khangthu tangthute koibang hiam, cih dong i thei kei ding hi. Hih banga hong ciamtehna  uh hang bekin midangte in hong phawk kha  ahi hi.Tua zomin, i pu i pate  kipatna leh i tangthu a kan hong nusia zo J.Gin Za Twang in 1973 kumin Zomi Innkuan Laibu khenin, K.A.Kap Za thang in Zo Suanh Khang Simna Laibu  kici 1974 kumin na khen leuleu a, ei a hong suang i pupite’ min leh puam leh si khat sa khat i  hihna a hong phawksak hi. Tua zomin, Mualpi khua mi  tuanthu khangthu a thei pu Thang Tuan in Khamtung Mite Tangthu kici Zomite tangthu a kicingin a khumna, khenkhia zo  nai loin khutgelh (manuscript) in a koih hangin tangthu kan khempeuh in siksan belin a nei hi.Tua bek hi lo, Zomi Christian Literature Society (ZCLS) in hun khat lai-in Zomite in a gelh Zopau laibu hoihpen leh manphapenin a teelkhiat , Sing Khaw Khai in 1981 kumin a peikhiat, laimai 400 a pha  Suangpi Mualsuang kici laibupi sungah, leitung piancil pan i pu i pate kipatkhiatna leh a suulnung, khua satna, khantohna, khangthu tangthute  banah i biakna ngeinate leh gamtat luhekzia, lokhawh singpuakzia, annek tuidawn zonzia, tual sung nuntak ngeina, sihna nopna-ah gamtat ngeinate leh vantung leitung  thute tawh kisai ngaihsutna leh i ngeina late a kicingpenin a kigelh banah, Minamdangte in ong theihpih ding ngimna tawh leitung bupa laibuli (library) minthang khempeuhah a kipuak  Mikang pau tawh Zo People And Their Culture kici laibupi khat zong 1995 kumin hong khen leuleu a  hih thului a  gelhpa in India gamah khenin a hawmkhia  (publish)  hi. Suangpi Mualsuang laibupi a bawlpa in a bawlna thu a ngimna a genna ah “…hih banga tangthute Tedim Zolai a kizat lai tengin  tu leh tate in a ciinciin dingin hih laibu kibawl hi” a ci ngiat hi.Ahih leh, hih bang teng tawh  i  lungkim ding hiam?

Tu-in Zo minam sung ciatciat ah zong Tedim kampaute pen a kuamah’ zakdah loh dingin a pawlcing pawl, neih leh lamh leh pilna siamna a ngah zong a kicing pawl ahih banah, leitung  gam tuamtuamah  zong a kithehthangpen pawl ahi hi. Sum zong pai zong leh pilna siamna sinin  USA, UK, Japan, Singapore, Korea, Thailand, Malaysia  leh Australia gamte ah ki-om kawikawi ta hi.Ahi zongin minam dinmun leh minam phaktan ciamtehna a thupipen in a laibu neihte ahi hi. Minam khangtote in laibu hoih, laibu minthang khempeuh amau pau tawh neih ding hanciam tek uh hi.Leitungbup a kizang pautaang ahi  English  panin English-Tedim Dictionary bu kician nangwn tuni dong i nei zo nai kei hi.Neih hun mahmah ta hi.Leitungbup a minthang William Shakespeare’ laibute amah’ gelh bang lianin a kitei bu khat beek i nei zo nai kei hi. Bible Concordance, Bible Commentary, Bible Dictionary a kipan a kisam bulpite khat beek  i nei zo nai kei hi. Mizote in kum khat a laibu bawlkhiat zah Tedim kam tawh laibu i neihcil pan tuni dong a kikhenkhia kikim thei dinga, i laibu neihzah hoh tawmzaw lai mai ding hi.Tua ahih manin laibu manpha leh thumanpha  bu a tuamtuam i bawlkhiat zawh ciangin  minam manpha, minam picing kisuak dinga, i pau zong pau manpha hong suak pan ding hi.Tua bangin leitung thugil lagilte khumna laibu laidal  kicing takin i  bawlkhiat  zawh mateng mite lakah minam lianin  kigen nuamin, a pil a hau, a siam a minthang minam hi ung, ci-in i otot hangin midangte ong muhna leh  etna panin  “ uum hawm beel hawm gin’ngaih” a cih bang lianin ong ki-en ding hi.I minam khangthu tangthu, i ngeina leh i biakna  banah i paunak leh thuciinte a kicing takin i khetkhiat zawh a,  hawmkhia zo in leitung bup a laibusaal (library) minnei tengah i koih zawh ciangin mi-in ong kimu pan bek ding hi.

Mi pawl khatte in, Tedim mite pen  laisim kithadah lua hi, ci thei miikmeek hi. A taktakin a kisim nuam lo, a kithadah hi mawk  loin a sim dingte theih nop, zaknop thu a kigelhna laibu a om  loh man na hi zawsop hi. I sim nop  nam laibu om peuh leh  kisim thanuam tek hi. Tu mahmahin zong lai sim thanuam lo i kisak lai takin a tul thei lo, i nisim nuntakna limlangh et bangin a hong kimusak Rev Job Nang Khaw Thawng’ Lungsim Limlangh bu khatna leh Evan. Langh Do Khup’ gelh Hauhna leh Khansauna Thusim laibute, Zomite nisim nuntakzia, innkuan kizopzia leh gamtat khawhekzia ding lam a hong lak  laibute ahih manin a kikhen masa bei pah ahih manin puahpha tuakin khen kikkik uh a, nisimin a deih a simnuam kibehlap hi, kici hi.Lai Siangtho leh Labute  sim loh a kikhen kikkik hih laibu gel bek hoh ahi mai tam?

Tua hi leh, koi bangin ma bung khawmin nasep kipan ding i hi hiam? Zomi sungah tu ciangciang  leitung pilna (secular) hi taleh, biakna vai  (religious) lamah hi ta leh Master  degree pan a tungsiah doctorate degree dong a ngah mipil misiam tampi ki-om ta hi. Tua bangin university khatpeuh in master degree panin a tungsiah degree a piakna  dingin a thusin lam tek uh tawh  kisai thu khatpeuh kansakin thesis/dissertation a gelhsak uh hi.Tua ahih manin sangpi khat, university khat peuhin a san theih  amau thukan ciat : Biakna, tangthu khangthu; science pilna, ganhing lam tawh kisai,lokhawh singpuak etc ei kamin ong gelh ciat le uh a kikhenkhia kim zo pah kei zongin a manuscript in na om khinkhian peuh  leh, amau nungah pilna a zong lai dingte in zong siksan thei pah ding hi. I mipil i misiam hih zah in amau sinsa thute  tawm tek ong gelh le uh  zong Zo kamin a degree ngah zahzah uh laibu a nei ding kihi zen! Minam khualna leh deihsakna tek tawh ong gelh ciat le uh minambup in kiphattuampih pelmawh ding hi.

University pan siamsin kipawlna min tawh  kumcin magazine kihawmte leh biakna vai leh leitung vai-ah  jubilee magazine kibawlte, biakna vai-ah Pawlpi tek khasim laihawmte i sim ciangin degree thuap tampi nei-in, kumpi sung leh biakna lamah panmun sangpipi a nei ulian i mi masate thu i sim kha zel hi. Amaute  a sih uh ciangin  a mipihte a hong  nusiat  ciamteh tham ding thu tampi na nei khollo uh hi. Ahi zongin laibu ta khat bek a na bawl ngeite pen a laibu sunga om thute a mipihte in phattuampih uh hi. Bangmah a gelh lo pa sangin laibu no tawh mualsuang a phutpa thupizaw hilo hiam? Bangmah a gelh lo degree tampi a ngahte a sih ciangin a lukhunga singlamteh zepna longal a mipihte a dingin kimanna  nei lo a suak hi.Ahi zongin amah theihna lai-a a gelhkhiapa in a sih nung sawtpi mi tungah thu gengen lai hi.Mipil misiam tampi in ong mualliam san  ta a, a han tunga singlamteh  ah a pilna za bek nusia hi.A  singlamteh muat leh kuan phawk nawn ding hiam? I siamsinna tawh kisai  pilna i ngahte i mite phattuampih dingin laibu khat peuhmah bawlkhiat sawm tek ni. A tunga kigen  laibu bawl masate kiciamteh den a, kiphawkphawk lai hi.

Laibu hoih khat in inn sung, sanginn sung, zum sung, nasepna mun, khualzin lai, mawtaw, meileng, vanleng sung a kipan ekbung sung nangawn ah mite thu a hilh hi.Laigelh pen’ pai ngei lohna mun nangawnah mite thu a hilh hi. A lungzuanga kap mi khat  zong va hehnemin, a lungdam khat zong va lungdampih hi. Tua ahih manin na tuahkhak, na  sinkhak leh na thuakkhak thu khatpeuh lai in gelhkhia in la, tua bang ding a om het kei phial leh zong minamdangte laibu na sim khak, na mipihte theih dingin hoih na sakpen  khat  Zolai tawh letkhia lecin na manpha khat a semkhia na hi pah hi.Laigelh siam keng na cih leh khat beek gelh nai lo na hih manin a siam nai lo na hi hi.Kisin leteh ong puahpih (edit) ding mi lai gelhgelh ngeite ong huh nuam om ding hi.

Gen kizomin, Chin Baptist Literature Board, India leh Zomi Christian Literature Society, Kalaymyo in October 8-10, 2003 Sung Moreh ah Literature Seminar a neih sungin Rev.Khup Za Go in a luikhiat Laibu Bawl A Manphatna  sung pan ama gelh bang lianin kong eukhia hi:

Tua ahih manin pilna siamna a neite in siit loin, sum le paai a neizaw  deuhte in zong hanciam lai-in Kawlgam Vaigam leh leitung gam  tuamtuam a om Zomi sanggam u le naute khempeuh in ‘Takkheh!’ ci-a tha i lak ding kisam hi. Kipawlna i phuat ding kisam hi. I kipawl siam ding kisam hi. Khantohna dingin khuamuhna kisam hi. Khuamuhna dingin lai kisam hi. Lai i bawlzawhna dingin a gel a sem  kisam hi. A khatna dingin sum kisam a, khetsate zuakna ding sai kisam hi. Lai sungah pilna om hi. Pilna a neite vanglian hi. Tuhun kum zalom sawmnih khat sungah namsau leh thauvui  thautang sangin laitui, laikung  leh laidal tawh gam kikeek zozaw a, lungsim galdona gamah kigualzo bek ding hi, cih tel ding kisam hi. Khanglui upate in thu tawh kinungta hi, na ci uh hi. I pu i pate panin thu tawh a nungta minam i hi hi. Mihingte nuntakna pen an le tui bek hi loa, Pasian kam panin a pusuak thu tawh kinungta hizaw hi. Mihing khat in khua a phawk theih tunga kipan  a bil tawh a zak thu leh a mit tawh a muh nate leh a khut leh khe leh a pumpi  mahmah tawh a sukkhak, a lawnkhak, a tuahkhak teng kigawm  pen tua mipa a dingin a ‘leitungbup’ hi kici hi. Tua ahih manin leitang a letna, a zaina kibang khat tunga i ten’ ciat  hangin, kha sawm a suak ciatciat ci-a min i sial hangin i thuzak, i na muh, i lawnkhak kikim lo ahih manin  i ‘leitung’ kikim lo hi. Bawng khekhap kuak tui vung sunga om ukengno khat in a omna pen penlepi zahin ngaihsun hi. Africa gama naupang khatin ama nu sanga anhuan siamzaw  leitungah nupi dang a om lam thei lo hi, kici hi. Tua ahih manin Zomi khat’ khuamuhna  leh Kawlmi  khat khuamuhna kikim lo hi. Kawlmi khat leh Mikangte khat in a khuamuhna kikim lo hi.I sangkahna, i laibu sim leh i thukizakna simna leh i khualzin gamvakna  tawh  kizui-in  ‘ei leitung tuam ciat’ a nei i hi hi. Tua  hi-a  Zomite zong a pil a siam minam, a khangto minam i suahna dingin i khuamuhna, i khuaphawkna  leh i thu theihna a tangzaina dingin laibu tampi i sim ding kisam hi. Laibu tampi i minam  in a sim nadingin  laibu tampi i bawl ding, i gelh ding,i hawm ding kisam hi.
Kum sawm val cina in, na sem thei loin lupna tung ngakin a om Sia S.T.Hau Go kiangah 1990 kum pawlin Rev. Dr.Gin Khan Khual Ph.D. va lengla-in a holimna uh tawh ka thului ka khup sawm hi. Thu tuamtuam a holim khit uh ciangin Sia Khual in, “ Pa Go aw, tu’n dam lian hi lecin bang na sem nuam pen hiam?” a cih leh, tawlpi khat a lungngaih khit ciangin, “Dam kik leng buang, Tedim pau-in Pasian thu leh khantohna ding  pilna a tuamtuam gelhin, laibu bawlbawl nuam tak ing ei,” ci ngeungeu bek hi, kici ngei hi. Sia S.T.Hau Go in laibu bawl a kisapzia, a manphatzia tel mahmah hi ding hi. Tua ahih manin a dam lai, a thahat, pilna siamna a nei, sum leh paai a nei khangthakte in bang i sem nuam pen hiam? Rev Job Nang Khaw Thawng bangin singkuang ahi lo, laikuang tawh a kivui nuam ngiat mi bangzah tak i om ding hiam? Ngaihsun pha ciat ni.Na mualsuang dingin laibu manpha khat bawlkhia in.Zogam ong kilamdang ngel ding hi.

( Hih thului pen Sia Khampu Hatzaw in Chin Baptist Literature Board, Manipur, Zomi Baptist Literature Board, Mizoram leh Zomi Christian Literature Society, Kalaymyo in a vaihawm Joint Literature Seminar, Champhai ah October 20-22, 2004  sunga a simkhiat ahi hi.)

************000000************

Laigelhpa Khampu Hatzaw in Zomi eLibrary/Laibusaal ading in Phalna hong piak ahi hi.

to:cinpuzomi@gmail.com
cc:khampuhatzaw <khampuhatzaw@rediffmail.com>
date:Fri, Jun 24, 2016 at 5:03 AM
subject:LAIBU BAWL A KISAPNA

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: LAIBU BAWL A KISAPNA. Agelh - Khampu Hatzaw Description: Rating: 5 Reviewed By: Cinpu Zomi
Scroll to Top