728x90 AdSpace

Hot
Menu
Zon-ol na Donate

Latest News

LAISIM A MANPHATNA. Agelh - Hang Shing (or) Kham Lam Tuang(Zomi Times)

LAISIM A MANPHATNA 
Agelh - Hang Shing (or) Kham Lam Tuang(Zomi Times)
 02, June, 2016.

THUMASA
Atunga thulu pen Cinpu Zomi (Zomi eLibrary, www.laibusaal.com neipa) in gelhdinga, hongsawl thulupen "LAISIM I MANPHATNA" ahi hi. Hihthupen May17, 2016 khonga gelhdinga hongcial ahihi. Amah Ciinpu Zomi tung ah zong ka lungdamna kigen zolo hi. A hangin Online pan in mitampitak in simthei in, tampi mah in phattuam lawhpih ding in kalam en hi. Ka laigelh ahoihding deih kom,ka buaina lah tam Yangon ka paisuk hun May18, 2016 in paisuk ka hihmanin, Laibu etkak kician omlopi in konggelha, tua hangin laisimte ading in ka deihna tangtunlo ka hihmanin, ka lung hong nuamsak hetlo hi. Bang bang hita leh Paiteni nai in tuaa ding zong hong ngetthuah ahihman in,ama muanbangin aw ka cihkhitsa bang mah kasepsakloh Zomi tampitakte na semlo bangin kingaihsun ka hihman in ka hihtheihzahin,anuai a bangin konggelh hi. 

Lai leh Pau in gamgi anei kei (Rev. T. Jam Kho Thang B.A ,B.D, Med-USA, EBC-Lamka)
Hihthu tawh kisai I etciang in Thupil thupi mahmah khat ahihi. Lai leh Pau in gamgi neilo cihciang in,I Lai leh Pau in munkhempeuh ah gamgineilo in,tungthei suakta tak in kizang thei, Namdangte pau leh lai tawh zong ahunzui in kibbeh lapthei cih hong phawksak hi. Tua ahihmanin, Zolai leh Zopau khantohna ding in Lai simlo in omleng bangtan I Zolai leh Zopau kikhangto cih tello in itutmun ah phunphun zong kiom ding hi. Mihing namkhat ihih leh Lai leh Pau neilo omloin, Zomi te zong Lai leh Pau anei ihihi.Zosuante lakah zong ILai leh Pau hihpen hi I zatding khensatna a omlianloh hang in tua izat Tedimkam a bulpipen hiin, Zolai, Zopau bul ahihi. Mizoram ah Duhlianpau(Lusei/Hualngo) pau hipen hi. Myanmar gama om Zomite pau kilawhna leh Lai kizatkopna pen lamdangsalo in, a kicingzawzaw ki kawmtuahding ahihi. Falamte in Zato pen Sizung ciuha, tu in Media te  kithukim in, Zato cihding thukim uh hi. Hihbangte "Lai leh Pau in gamgi aneikei" cihte lak ah a khat ahihi.

Reading is to the mind , what exercise is to the body.(By Steele) 
Lasimna pen lungsim leh Pumpi tha khauhna dinga kisinna ding khat ahihi.
Laisimna penlungsim leh pumpia dingin thalakna hoihmah mah khat a hicih kitel mahmah hi.Lungsima hoihlo ngaihsutna hongom ciang in zong  laisimna,hehna zong laisimna,khasiatna zong laisimna mahtawh kibeisak thei hi.Laisiangtho simna in nuntakna lampi,kha lam khantohna hongpia cih itel hi.Tua ahih manin Laisim theihlohna in,Mitnei napi khuamulo mahbang hi acihmahbangin,tuhun in Mittaw tampi in khua amuhloh hangin laisimtheita hi.Zomi mittaw hilo laisimtheina pi laisimnuam lo itamman in,Zomi te khuatang nuntakna ah ki tuantual mahmah cih kimua,dah huai ka sa mahmah hi.Laisim hahkat ding thului,thuthakte theiding ,mailam kalsuanzia,namdangte khantohzia tel ding kisam hi.Tu hunciaang in Laisiamna lo tawh mimal nuntakna,innkuan nuntakna,minam leh Gambup khattohna om theilo hi.Tua hang mah in Media tuhun  gamkhanto nuamte in thupisak hi.Innkhat ah Laibu neih genloh laisim theina pi News Journal te asimngeilo Zomi innkuan tampi om ahihmanin,zawnna in zong hong nusialo hi.Vanman leh khuahun hanga haksatna tuahdingte zong laisimna tawh kigin kholh theih hi.

A. THE ORINGIN THE WORD  "LAI"
"LAI" cih kammal pen koipan pai cih I theihloh hangin Zomite in Savunlai nei nggeia,tuapenUi in tuah cih mangsak cih ahihmanin,  hih hun(BC-650-250) Sengam(China) I tunma penin "Lai" cih kammal Zosuante(Jo-Joseph minneu pan Zo min kingah) in neikhinding in ka lam en mahmah hi.Tuhun in Zosuante lak ah kammalbula zanglai Zomi(Tedim kampaute) bek in "Lai" kizanglai hi.Mizo in "Lehkha,Laimite in Ca/sa kawlkam zangta uh hi."Lai" cih kammal namdangte pau komlo in,anei azang ngiatte ihihmanin, Zomite Pasian tung ah lungdam ikohding ahihi.Lai cih kammal neingei ihihmanin,Lai neingei minamte,minampicingte ihihna kilang gige hi. Ahangin ah UNO in minam a ciamtehna ahzong Minamliankhat pen Lai leh Pau,Gam leh Lei mite tawh kibanglo aneituamte ci ahihman in Chin cihsangin Zomi te minampicing hizaw gige hi.

Nidang in Hualngote(Lusei suan-Zosuante) in zong amaupau in "Lai" cih kammal aneihna uh "Chhawnghoihkhua Middle School Golden Jubilee"ah hibangin kigelh hi.Sangnaupangte khuasung Hausate thupiak bang in Gango,Saman a omleh Satan pia,Sabaklian khat pia uh hi.Tuapen "Laizirsa" ci uh hi.Laisinsa cihna ahihi.Tu in"Lai" cih kammal neinapi banghangin Zomite laisim thadah ihiam?cih ka thudotna bulpi ahihi.

B.THE ZOMI CULTURE USAGE OF  "LAI"
"LAI” cih pen akigelhkhiate bek lai hilo cih mipilte hilhcianna a hihi.Tua mahbangin Zomite inzong Pu leh Pa khangpan in ciamtehna Symbolic zangin "Lai" na neingei uhhi.Inn kongkhak lutmaa,bangtuna Salu kisuante sa bangzahman cih ciamtehna hia,Lainamkhat ahihi.Na khatpeuh ciamtehna Khauzang khihbokte Lai namkhat ahihi.Innkongkhaka Dawithawha lutkeiun cihna Sawlbawk khaite Lai namkhat ahihi.Lolaia Pateh nahsawlkhuhte lakei in amumasa leh a neiom cihna hia,lai namkhat ahihi.Khua leh Vasa bumuhte Ciangkang tawh koksak /a omna singkung khautawhgak,singkung hong met cihte zong ciamtehna hia,lai namkhat ahihi.Lamka boma sawl kipaite zong  kei kalouhpan vaiciahta cihna hia,Lai namkhat ahihi.Khuamual a Suang kiphutte ah suang neubekbek phut a gol alian oma,tuate zong asa mat zah uh leh agal matzahuh ciamtehna hia,Lai namkhat mah ahihi.Lai mal a gelhtheihma un Sing leh Suang tung ah (Pictograpy) gallim,salim gelh uha,tuate zong Lai namkhat mah ahihi.Luangel khua Pu Vial Khaw Tuan in satampi manin,a samatsim in khaukhihbawkzela, tua zong Lai namkhat ahihi.Hih igente hunban ah Zolai,Mangla sanga sin khengvalto in Online(Computer-Internet) hun hita a,Printing News Laidala kihawm Thut kizaknate bek na inn ah nasim kei leh hauhna leh khantohna navengte,na meltheihte,thuthak theihna ahizong napha ngeikei ding hi.Lai nasimtheih leh Lai simsim in na lungnuam in,na hehna beiin,na tawldam ding hi. Na thutheihna in nang hong khamuan ding hi.

C.THE BEGINNING OF LEARNING AT SCHOOL  "LAI"
Zomite  in Sanglai ah Laisin kipat hun cih ahihi. Hih Sang inn ah Laisin hong kipatpih AMB Missionary te mah ahihi. Rev.Dr.J.H.Cope in Zolai sinbu 1910 pawla a bawl,1925 in Sanglai sinbu in kizangin Tanli ciang Zolai kisin hi. Sang inn ah laisinzolo leh Hausate ta hilote in nitaksang kihong hi. Nitak sang omlohnate ah Upate in Nungak leh Tangval khinsate lokuankhit,nitak annnekkhit in Meilah peuh vak in Zolai malgawm leh gelhdan ki hilh uha, Nisagin in siamzo uh ahihmanin,Nisagih lai kici hi. Pu Pau Cin Hau Laipen Zotuallai ciin,J.H.Cope bawlpen Mangtuallai kici hi.

Zogam(Chin Hills) ah J.H.Cope bawl1925 kuma kisinpen  A B C D E F G H I J K L M N O P Q R S T U V W X Y Z mal(20) bek pha hi.Zoram(Lusei Hills) ah 1897 khongpan in  England gam pan BBMS te Mr.J.H.Lorrain leh Mr.F.W.Savidge in Aizawl ah nasem in Lai bawlsak uhhi.A AW B CH D E F G NG H I J K L M N O P R S T  T U V Z mal (25) pha hi. Hih Mizoram pan Missionaryte in gamkek in Manipur ah Mission School hong uha,tua hangin Ciimnuaipan pusuaktektek ihih hangin I Laibul kibanglo in Tedim leh Paite bang hih lai hangin aw suah kibanglosak mahmah cih kimu hi.Tuni in Zosuante in Minam khat,Sanggam khat hihang cih tela,Minam it kisaktakpi ihih leh I simtheih laitebek hilo in,isanggaamte Lai leh Pau zong kisina,zatkhop,zattangding thupi hi.Lai sim theinapi a simtheilo utzaw maw?Asim thei kisinnuam zaw cih kka thudotna ahihi.Lai nasim theihnak leh a pau nasiamloh hangin simsim le cin a topna ah pausiam ding cihna ahihi.I Lai leh I Pau aw suah leh laimal bul kibatloh man in,I kigamlatlamtel in Nisim I News Paper hawmte Lamkate in Tonzang,Tedim,Kalaymyo etc ciang bang hawmzo in,Myanmara te in zong Singngat,Tonsim,Lamka ciang hawmzo in kumkhat sungbang kisimtuahsak peuh leng itellah ding omloa,tua itelkhit ciang in ki itna leh ki unauna kip ki neiding hi.Laisimna in Minampi cing hongpiangsak ding cih kei lametna  ahihi.

D. THE CAUSE OF READING POOR IS BARRIER TO DEVELOPE  AND BENIFIT
LAISIM thadahna  hangin, khantohna leh metna  khaktan hi cih a genuam ka hihi. Hihthutawh kisai in ah a thupi mahmah khat ahihi.Laisim theina  pi,Laisim nuamlo  ihihmanin, I thupi simloh hangin,I ngaihsut ngeiloh hangin, nisim  mimal nuntakna leh khuatang nuntakna ah sumna tampi tak om ahihlam  phawk huaia,tuate mi tamzaw in tello ahihmanin,hihbang supna nei mihing atamluatmanin, Minam leh Gambup khantohna leh  Metna ding akhaktan a higige hi.

Laisim icihna ah Priting News Journal,Book omin,Online electronic ah(Internet) ah New Journal leh Book etc in ki khen hi.Tuhun in  Nisim,Kalsim,Khasim,Kumsim etc cihbangin  Thukizakna leh Magazinete a ki hawmkhiat nazong  ikhantoh mahbangin,Online zong nakpi in khangto in Nisim hiloin,Munte,Hour sim in thuthak kiza hi.Tua ahihman in Laidal a kihawm a simnuamlote ading in,thuthak theihding leh laisimnna hanga khantohna ah mite a ban ahihding haksa mahmah hi.Ahangin Online ah nisim thuthak, Tuahsiatna, Tuahphatna, Vanzuakna, Kumpi lam thute, Tualsungthute etc kiza den ahihi.

Laisim nuamlo mitamlua a hihman in Media te leh Laigelhte,Laibu bawlte in suplawh hi.Tua Laisim uklote in Journal leh Laibute leilo ahihmanin,atate khantohna dingzong nakpi takin akhaktanlam theilo uh hi.Nuleh Pate in laisim hahkat leh laibu tampi kibawl in Zolai tawh simtheih laibu hoih tampi piang dng hi.Phone ah internet kikhong thei in Email,group email,website,Vibergroup,Facebook ,Massenger etc cihte ah thuthak ki khah manlang mahmah hi.I Lupna,Tutna pan mundanga om innkuanpih leh lawmte tawh kihotheihpen Nu leh Pate in sumbeisak cilai ihihmanin, thuthak theilo,bilbing,mittaw mah bangin,I nuntakna mite nungah iomding mah ahihi.Nupa Phone kidenkhapsak khong zong omlaia,Lawm ngaihte tawh ki nopmawhin Phone dengkham zong omveve uhhi.Tua ahihman in Laisimna leh thuthaktheihna tuhun Media khantohna zatsiam dingzong kisam mahmah hi.

Laisimnuam lo na hihman in,thuthak theilo,Vanman kiam,Sum khekna kiam napi theilo suplawh,Mite in tangko in lain gelhta leh Mipi lam leh Kumpi lam ngah leh hamphatnate theikhalo,a huntunciang buai,Gentehna in ZYA in Sisan hopna sem,ZYA te contact Phone theilo,Mawtaw khat sapkul,hun ki nawh na hang gimna,lung khamna nangmah in tuak cihbang te ahihi.Laisim hile cin Phone no nei in kuama huhloh in,nangmah in vankimzo ding na hihi.Khuanung theih thute hangin kinawhlua,Cycle bang tawh nawhtai,Bus tawh nuamtak paiding,Taxi sap kul ahihman in,sum lah bei,nuntakna lau huai dinmun nangawn ki omna pen mite in nisim thuthang azaksak laite sim nuamlo na hihman in na sumte tampi mawkbei,nakhantoh ding khaktan ahihi.Misi gal cihte zong ahun leh misi vuihun khong theilo na hihman in,nang ut hunpai na hihman hunlaplohman in,na maizumlawh hi.Khualzinna tawh kisai,Sanginn leh Office khat peuh tawh kisai laite min leh suahkum nanga leh na bawlthakte kittuak kituaklo cihte encian in simin,Vanleng,Meileng,Tembaw,Mawtaw etc tawh napaiding hun,na tunding hun ciamteh in,Na tuanna Taxi leh na kipatna mun zong a kima Lai kisuangte siminla,tel in.Na omna mun veng leh lampi na telding kilawm ahihi.Nasep ngetna Lai form te leh Zatolaite zong hoihtak encian in,Zatui leh Nektheih vante a kum bei leh beilo encian in.Hih bangin  mimal nuntakna ah supna tampithuak  a kigawmciangin,mihing tampite minambup thuakna bang hong hi mawk hi.Kumpi lam leh Kumpi nasemte inn,Mimal inn nap aiding ciang leh Lampi khat peuh ah bang lai (Signboard or Noticie/Caution) bang kigelh laisim thein a hihnak leh sim masa in nangading metna pan supna hongtunlo zaw ding hi.

E. READING HOBBY CAN DEVELOP YOUR LIFE
LAISIM ukna in nama nuntakna hongkhangtosak cih ahihi.Lasim ukvanglak in a tompen Laibu khat or Lai maikhat a sim kei leh ihmu theilo mitampi taka om hi.Tuate lak ah kei mah laigelhpa(Kham Lam Tuang) zong ka hihi.Lai sim uklote in a gending tamtheihlo hi.Lasim ukte bangmah Degree aneihloh hangin Degree ngah leh Degree ngahlo Laigelhsiamte laigelh tampi sim ahihmanun,tua atheihna un ama mimal nuntakna ah kimuanngamna leh hansanna pia in,athugenna leh a genthute mite in za in mimuan huai leh mite thudot suak mawk hi.Behtangthu( Ko Beh Hang Shing suante) mi ate leh Zotangthu,Kachin te tangthu,Myanmar tangthu te naksim mahmah ka hihman in tuabang thute tawh degree la ka hihloh hangin,ka gentheih tama,mipawlkhat in kei mipil hongsaa,ka laisimna tungtawn in a thei ka hibek hi.Tua ahihman in Mipilte in Mipil mahbangin hong hopih ahihman in Lai kasimsim ka kisik hetkei hi.Laisim sim ihihman in laibu bawl ding leh online a laigelhding zong tampi kitheipah hi.

    1.Zomite Laisim thahdah tamlua
Zomite laisim thadah lua ahihmanin,kei tawh kisai kei cih haulua uha,tua in ama mimal nuntakna leh innkuan,Kipawlna,Pawlpi,Party etc sung khantoh zahding khaktan ahihi.Kawlte apil isak leh laisim hahkat in Thukhun(Law) khong tel mahmah uha,Mi a sim mawhte khong laudeklo uh hi.Zomite bang mah theilohna,Mihai nam ihikeia,Laisim thadahnam ihihman in Hausa leh Upa,Kumpi leh Hongukte thuthu amang ihia,Thumang namhilozaw in,thu theihloh manin, thu mang ibatna hizawa,I telciang in theihloh manin,thumang bek hiin kisikna leh phunna,kipawlna sung buaina tawh kidim hi.Min nathuhma in naminthuhna ahang laite sim masa in,akhiatna leh anite,sumpha zah cihte simmasa teitei in,Lasim uklo vanglak in tua nangawn simnuamloin,min mawkthuh thei ihihi.Laisim thahdah Zomi a tamman in,News Journal,Magazine leh Laibudang kihawmte Mipi in lei lo ahihman in,Zomite in Laibu hoih tam kinei lo pah hi.Media nasepna zong thanem in,thuthak theikha lo in,Namdangte lak ah aziakai pen ihihi.NGO te Training piakna ah kah munmahmah Laibu leh sum ngahbek lawp in,laibu sunga kigelhthute asimngeilo tampi kiom hi.

    2.Papi, Nupi na hih leh Laisim in
Lasiangtho simin,Na sim theih kei leh CD,Audio,Vedeo etc a kikhumsate ngaihsawm hamtangin,tua mah bangin thuthak kigente kin in theihsawm ding hoih hi.Natate leh Na innkuangsung makaihsiam naut leh laisimna hahkat ding,tuate tawh na makaih ding ahihi.Kumpi lai hawm le Tualsung laihawmte na simna in na innkuansung ah phattuamna leh midangte sangin kilamdanna om ding hi.Kei Kalaymyo ah om ka hihman in Ka tunu Tawinu min in Zomi Times,Tongsang,ZYA,Zo Aw etc katan khin uha,Agent khat bangin Pawlpi ah ka hawmsak hi.Ka Innkuan sung ah laisim theiten sim in,meltheih atanzolote in zong sim uha,Lungsim leh Pumpi thanemnate thakhauhsak zong suaksak hi. 

   3.Pastor leh Pawlpi Makai khat na hih leh nikhat in Laimai 1o sim in,ciamteh in
Pawlpi khata Pastor sem khat in Lai asimnop kei leh mipite tung a gending beiding hi.Agenkhitsa a gengen Pastor pa Pawlpi mite in thugen siamlo ciin cimtak hi.Tute ann vak ahihmahbangin,Tute in zong ann a tuamtuam a duh hun om cihtel huai mahmah hi.Tualsung pawlpi dangte ah bangcih kimakaih,bangcih khantoh etc cihte Laisimlo khat in theilo ahihmanin,apawlpi mite ahansansan Pastor zong tomlo hi.Pawlpi upa in zong Pastorte mahbangin Laisiangtho sim hahkat ding,Thuthak tampi theihna te simding hoih mahmah hi.Pawlpi Upa laisim ngeilo atamciang in,Pawlpi thu kikupna ah mi dongtang,Migilo,Mi zuaphuak tang thei hi.Na Pawlpi namakaih siamna ding,acidamna ding in laisim hahkat ding kong hanthon hi.Kha pen Pasian hong piak hia,thutheibehna nama piak theih laisimna pan ahihi.

   4.Party Makai,Politic Leader khat, Minam Makai khat in Laisim ding
Hih igente ban ah Makai tuamtuamte in Laisim na hahkat kei leh na kim leh napama om makaidangte sang in thuthak theihakzaw ding na hihmanin,na mipite nakai bahdinga,atopna ah namiding beiding hi.Tua ahihman in Laisim hahkatbek hilo in,Laibu leipa,Laibu kaikhompa,Laibu haupa,Laigelhpa,Laibu bawlpa na suahding pen na hanciamding ahihi.Laisim hahkat khat in atheihthute minamveina tawh a laidal leh a laibua hawmkhiata mite ding ut mahmah ding cih kei muhna ahihi.Gen.Aung San in Union of Burma aphuhlaiin,Russia gam ki ukna laibu naksim mahmah hi.Topa Jesu in zong Moses thukham na limsim mahmah cih itel hi.Makai khat hibuang mipite leh makaidangte thu kikupcianga, mi thugen asangtheilote,mitawh kithutuaklote Laisim hahkatlo mite hi cih ka genngam hi.A hangin makaite gamtat luhekzia ding,kam kidopzia ding laibu ah kigelh ahihi man ahihi.

F.THUKHUPNA
Thukhupna leh Kamvai khakna ding in Zomite Laisimtheih,Mineikhempeuh anungta laitengin Lasim hahkattek ding kong vaikhak hi. Biakna leh Biak innlam nasemmi na hiha,Makai khat na hih leh Lasiangthobek hilo,Laibudangte simin,Midangte Ukna ahih le Kiukna lam tawh kisaithute laibu lei in sim,Minam veina hih leh Nangkua minam cihtel inla,Kuateng huamthei cihtel in,tuate na theihna ding in laisimin,Behthu ukna hih leh nangtheihbek hilo mite laibusimbehin etc..cih kong vaikhak nuam hi.Lasimna in namimal ah lungsim athahat khitciang in,nataksa thahat ding hi.Myanmar Budhist te Politic lam athuklutna in,Syadaw U Ohtama in Myanmar Suahtakna ding Mangkangte do cih ahihi.Zomite ithahatna ding in eisepnop leh I kalsuanpihthute tawh kizom thute simsim ding ahihi.

(Laigelhpa.. Zomi Times News Managing Editor & Zomi Post Reporter sem khat hi. Kuki-Chin-Zomi-Mizo thu Kawllai tawh gelh in, Zomi Tuiphum Sya Ngah Masate thu 2010 in gelh hi. Lai thu tampi mah gelh hi.)

Laigelhpa Hangshing in Zomi eLibrary / Laibusaal ading in Phalna hong piak ahi hi.

to:Cinpu Zomi <cinpuzomi@gmail.com>
date:Thu, Jun 2, 2016 at 3:49 AM
subject:LAISIM A MANPHATNA

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

Item Reviewed: LAISIM A MANPHATNA. Agelh - Hang Shing (or) Kham Lam Tuang(Zomi Times) Description: Rating: 5 Reviewed By: Cinpu Zomi
Scroll to Top