728x90 AdSpace

Hot
Menu
Zon-ol na Donate

Latest News

LAMKA KHUAPI LEH ZOMITE. Agelh - Kham Lam Tuang

LAMKA KHUAPI LEH ZOMITE
Agelh - Kham Lam Tuang

Thumasa-
Zosuante tenna khuapite lak ah Zomite tenna Lamka khuapipen Manipur gamah Imphal/Phaipi(Capital) khuapi lianpen ahihi.Mizoram ah Aizawl, Champhai, Lunglei etc..Myanmar gam ah Kawlpi-Kalaymyo,Tedim, Falam, Hakha ete.. hi-in Tozang Kamhau Ukpi pa Pu Hau Cin Khup tutna mun ahihi.Zomite Sak leh khang(Kawl gam,Vaigam etc) ah kikhen in, Ih om mah bangin ei leh ei ki ukna sangin mite ukna or kipawla uk khopna a hihi.Mizoram ahih leh full State/Federal State ngahin thuneihna sangpen tawh ki uk uh hi.Lamka khuapi pen Manipur state sung ah aom zenzen hangin Zomite tenna khuapi leh ko khuapi hicihzah dingin mihing Zomite tamna a hihmanin Zomite tangthu ah atheihhuai khuapi khat a hihi. Laisimmite leh tangthukante adingin deihsakna tawh  Internet-Website  leh laibu dangtte etkak in kong gelh hi.Pu L.Keivom(Pu Lalthamuang IFS gelh Zoram khuavel Vol.2,Aizawl, Lengchhawn Pringting,1997) pan etkak in atomin kong gelh hipi pen hi.Lamka khuapi leh Zomite kizop khak na, Meitei te (Meitei Leng/Ukpi/Kumpite) tung siah ih piangei mah hiam? cihzong ngaihsut huai hi.Zogam mah hiam? Meiteite gamsunga tenga mitamthu leh a kilaihtozel Constitution/Law siksanin Lamka khuapi Zosuante in atuhtuh i hiam?cih khong zong kan huai kasa mahmah hi.Namdangte adingin thupha bawl minamte ihiam? Midangte adingin galnam ihiam?cih zong ngaihsut huai mahmah ding hi.Ei ma ngahdinga kilawm angah i hihleh pankhop ding, I ngahloh dingpi ahihhang thagum hat leh thukhun ombang in ngahding ahih leh zong sepkhop ding ahihi.Ei leh Ei Politic Party or National Movement  sem kisa in,hah kat mahmah lengzong I sang gamte in Kuki mindingbek,Zomi mindingbek, Paite or Tedim minding bek hong cihkhak ding zong pilvan huai hi.A hang om ahih man in kong genngam hi.Kum 1965 a MNF/A(Mizo) Pu Laldenga makaih in Mizo nammin zang in State Government khat neih ding cih natangko hi.Lamka a om Zosuante tampi tak in napawl in(support) uh hi.Thahdo leh Hmar in sawtpi zui uha,tuni dong lawhtak neilo uhhi.CLA Pu Tun Kho Pum in sihlawh hi.Tu ni in Churachanpur khuapi min Lamka tawh laihding gelna pen thulianpikhat ahihi.Zomite khutsunga ompen Zomite thuneihna hia,Zomite tenna pen a gamnei masa leh a ukom cih i theihding thupi mahmah kasa hi.Israel mite galdo mitammuang in Lamka zaang ah Paite pauzang mitam imuan leh thu umlo mite khutsung ah I tungtheizaw lai ding hi.I Minam leh I Gama ding semte in"Ka Pasian leh Ka Minam metna ding"cih I Politic,Party, Nationalism hi tawntung ding in kong hanthawn hi.

Meitei Lengte(Meitei King) in mau ukna gammah uk in ahizongin Singtanggam ukkhalo uh hi.Tua bek hilo in India in Independent angahlaitak August15,1947 in zong Manipurgam India gamah kigelh khalo in 1949 kum in Meitei Kumpi nunungpenpa Maharaja Bodhachadra Singh in Shillong ah India Kumpi tawh thukimnalai "Treaty of Accession"kici amipihte dongselo in min vathuh ahihmanin tuaa kipan Manipur gam Zanglei lelh Singtangtam India gamsuak ahihi.Sumbang zah India Kumpi in pia cihzong kitheilo hi.Tuhun hileh a inn Lamka Nupite hiam?Phaipikhua Nupite hiam?in halsak taktak dinguh hi.Ki Ukna genna ah Meiteite atuamin kiuka,Zomi leh Singtangmite atuam in ki uk uhhi.Meite te gam ah singtanggamkihelkhalo cihnatawh kibang hi.Singtanggam hausate in Siah pia ngeiuh a hih leh Manipur gam Singtang gamzong Meitei gam cihna ahihi.

Hihthutawh kisaiin, Zomite khuasat tangthu leh Hausa sepna tangthu ah Meitei Lengpa kiangah gamngen in paiuh cihom zeuhzeuh ahihmanin Singtanglam kawitan Meiteite gam hiam?cih hongphawk kik sak thu ahihi.Kalaigelhte behlapl  leh thu kicinglo tampi omdinga,nong na ngaihsiam ding uh kong thum hi.

 A.CHURACHANPUR KHUAMIN NGAHNA
1.Ki ukna (Administration)
(a) Mangkang te Ukna Manipur gampen Leitungah Kumpi gam kizomsuakte lakah asaupen khat in kiciamteh hi.Hih kumpi gammin pen "Ningthouja Dynasty"33AD-1955 AD ciang hiin Kumpi tuamtuam 76 kilaih hi.Kumpi gam tangthu tawh kisai ah ei khongte vasim mawhgualding hilo dan hi.Bangzahtak in Meiteite tangthu ah akiphiattheilo siksanding Kumpi gamtangthu aomzongin Indian Constitution ah Schedule Tribes(Minority)minam tomte hamphat na(Principle Right) om ahihmanin Zomite hamphatna tampi tak guan hi.AD 33 kum (1st century) in Ningthouja kumpi gam KHABA BEH/NAM te in hong phut khia uhhi.Kumpi gam khuapi pen Imphal khuapi mah ahihi.

 Kangla khuapi ah a kumpi tokhom tutna hongphut masa uhhi.Imphal gun phaizangkimteng uk masa hi.Agam kekbeh zel in Luwang,Moirang,Khaba-Nganba, Awngom, Sarang-Leishang Them leh Khuman te tawh ukkhom hi.

Kum 33 AD pan amasapen Kumpi Nongda Lairen Pakhangba(33AD-154 AD) hi-in, anunungpen Kumpipa min Bodh Chandra Singh(1941-1955) ciang Kumpi 73 kilaih hia,Kumpi gamkhatding in leitungah akizompaisuak asaupen in kiciamteh hi.(Hih Kumpi gam icihciangin gentehna in-China bang Cho/Jo (Zhou) Dynasty Chin Dynasty bei, kipan cihbang ahizong,Myanmar bang Parliament Democracy, Revolution Council-Socialist,Junta –Marshall law, cihbang in ki ukna leh Kumpi gammin kilaih zel hi).Kumpi khanggui ki luahnamte a hi uh hi.

Ahangin ah Kumpipa tapa,tanute amin lawhdan aphuah uh ciangin atutte,atusawntehihna(title) piakding dan Ningthou Royal Family buai hiin "Major. Maxwell in na ciamteh hi.AD-1790-1891 kial khong in (8th Century ) Hihdhu biakna hong zuih uhciangin Hindhu Biaknate zatdan "Raj Kumara" or "Kumari" hongzang uhhi.

1824 Kum in Meitei Kumpi Gambhir Singh uksakin Kawlte in simin, Meiteite ukna Kabaw valley ciang laksak hi.Mangkangte kiang huhna ngenin Mangkangte in Kawlte  simin ahizongin Kabawvalley Kawltetungah pia sak zawsawwp hi.Kumsim in Meitei lengtung ah  Zangna domna(Companssation)Rs.6,370 ngah hi.Hih Mmeiteite gamtanna tunidong agamnuaimite uh alungkimlo in ngah kikding lamen uh ahiden uhhi.Hih huna kipan Asssam gam,Cachar a Mangkangomte damdam in hong kikhinsuk uh hi.Kum 1891 pan in Mangkang Kumpunugam (British-India) North East India State sagihte Assam Province khatin ki ciamtehin Manipur gam zong Mangkangte ukna nuai ah kiukta hi. Manipur gampen AD-1889 pan 1948 ciangAssam Governor khutnuai ah ukto uh hi.

(b) Meitei Kumpi(Leng/Reng) Nunungpenpa
Amin namthum neia(1.)Churachandra(2.) Churachad (3).Maha Raja Meidhingngu Churachandra Singh  ahihi. Kum 1886 in piangin,Kum 1891,September 22,in kumnga phapan in 18 kumpi tokhom(throne) ah tuta  hi.Kum 1907 pan in Kumpi taktak in kitangko ta hi.Ajmar College ah pilna sinhi.kum 1918 in "MahaRaja/Maharaja" title leh ''Nighted'' ngah in,Kum 1938  iin Sir Churachand Singh za ngah leuleuh hi.kum 1941 in si hi.Ama khit cianga Kumpi sempa Maharaja Budha Singh in kum 1941-1955 ciang sem hi.India in 1947 August 15 ni Independent angahlai in Manipur gam kihello hi.1949 in  Meittei Kumpipa (Lengpa) in thukim in India tawh Shillong ah minthuh (Treaty of Assesion) ahihmanin tunidong India gamnuai ah om ta hi.Hih  aminmai uha Raja akoihte uh Hindhu biakna a suahuh ciangin a zat uh ahihi.Myanmar in zong Maha,Raja,Kumar cihte limzatmahmah in Vaite mawksim mawh theihloh ahihnna kitel hi.


2.Khuamin-Churachanpur
(a) Suangpi khua Pu Semthong Hausa
Kum 1891 in zong Meitei Lengte/Kumpite mah in atunga igen mah bangin uk hi.Mangkangte in Zomite leh Meitei Hausate gamgi ah a buailohna ding galkido lohna dingin Hausa laipite ah gamgi kiciantak in gelhsak in hong uk hi.Tua mahbangin tulaitaka Lamka khuapi (Churachanpur) kici kimtengah Zomite tampi omnai lo ban ah Meiteite zong omnailo uhhi.Khualian khat hiin Sakllam ah Tuithapi(Khuga River),Khanglam ah Tuilalui,Nitumna llam ah Kawite lui,Nisuahna lam ah Paldaikhua om in tuapen Thado Haokipte gam hiin Suanpikhua Hausa Pu Semthong uknna nuai ah om hi.Suangpi khuapen tua Lamka khuapi khanglam  Singtang khua Km 3 gamla ah om hi Suangpi cihhia,Suangtungah Kapawlpi naphut in Jesu kammal bang phawk huai hi.Khuamin Suangpi ahihi.( Note-The western village of Suangpi( also known as Old Churachand or Mission Compound) further west. Thhe western village of Suangpi was originally a separate village,15 km west of Lamka village.The western frontier of Suangpi(Old Churachanpur) and the eastern frontier of Lamka had different origins until they recently merged).

(b).Suangpi khua ah Mangkang galkap Phualpi koih
1917-1919 kal Letung galpi masa in  France Labour Corps ah pai dingin Zou leh Thahdo te in nial in Mangkangte leh  do uh hi.Tua hangin Mangkang galkapte Suangpi khua ah Platoon khat koih in (Outpost) mun hongsuak hi. Tedim gam ah Sukte leh Sihzang in Mangkangte do in Thangmual(Fortwite) a Galkap phualpi Falam ah tuah uhhi.Thahdo leh Zo in Mangkangte do in Thahdo khua Suangpi ah Mangkang galkap phual kituah hi.Galdo na ah I metdan leh  isupdan kibanglo hi.Thahdo in galdoa,a khua ah galkapphual aom man in a khuamunmin kilaih kikvevea,tuni a Churachanpur ahihi.

(c) Suangpi khua SDO Central
Kum 1919 panin   Singtang gamkhua khempeuh Sub-Division thum in khenin Mangkangte in uk hi.Tua hunin Suangpi khua ah South Sub-Division Officer (SDO)Office koih uh hi.( By the Order of Sir Nicolas Beatson Bell,C.C of Assam,Suangpi(Songpi) Sub-Division was established on 16 October,1919,with It's Headquarters at Suangpi.An ICS Officer,BC Casper,was the first Sub Divisional Officer,B.C Casper,was the first Sub-Division Officer at Suangpi/Songpi).

Kum 1919 in France Labour Corps apaite hongciah kik in,1921 kum in SDO pa Major.Gasper in Sialkhat goin pawibawlpiha,Meitei Kumpi(Lengpa)Maha Raja Meidhingngu  Churachadra  Singh  zong vapai kha hi.Tuaa kipanin Meitei Lengpa mintamin Suangpi Sub-Division leh Suangpi khuazong Churachanpur in kilaihta hiciin tangkosak hi.Suangpi aciteitei peuhmah gilbem ah khumding cih tawh tangko khomsak hi.Meiteite gam ahihna kitel mahmah hi.

Suangpi khuamin Churachanpur ah alaihzawh uh kum-9 khitciangin Sadar Sub-Division tawh gawma ukkhopding in tuahkik uh hi.

(d) Suangpi SDO Office  Mission Central suak
1930 in  NEIGM-North  East India General Mission G S H.H. Coleman in anaseppih Dr.Grouzier tonpih in tua SDO huang Mission  Compund a zatding Meitei Lengpa kiang va ngenuh hi.Meitei Lenpa tanu adamloh tawh kituaka Doctor pa in bawldam hi.Meiteilengpa lungdamlua in Mission munpi zatdingin phalna pia hi.

1938kum in Lakhipur khua panin NEIGM Mission phual Churachanpur ah tuahto  uhhi. Missionary pa Coleman in hih Mission munpi ngakdingin Dr.Grouzieer koih in,amah Cachar gama Meiteite kiang ah Missionary mun khat hongin Mid -Mission ciin,Alipur Hosipital tudongin kici hi.Leitung galpi nihna lai in Japan galte hongtungin Saidang tangdung ah kinga uhhi.USA galkapte in Tuthaphai khang lamah galkap phualpi mun koih uhhi.Zato zong khat lampah uhhi.Churachanpur Civil Hospital kiphuhna  ahang leh aphut khia America te cileng kikhiallo ding hi.

3.New Churachandpur
Kum 1947 August 15 niin India in suahtakna ngahta hi.Tua ahihmanin Imphal a Manipur British Political Agent nunungpen G.P.Stewart New Zeland gam Nelson khua pan in hongpaipa zong British kumpinu  puankhai kila khiain India (Bharatnamta) puankhai kikhaitota ahihmanin agamuh aciahkulta hi. Hihmangkangpa pen Mizoram a Supertintendent asemlaka Laipilna sangpenpa Mr.W.L.Scott makpa ahihi.

1948 khitciangin ei leh ei kiukding hita ahihmanin Churachanpur nisuahnalam teng uknading munpi Churachanpur mahtel in Circle Officer Inn dinggel in Pearson Mangpa,President-Manipur State Durbar (PMSD)leh Special Officer Pu Thangkhopao Kipgen te in Churachanpur(Suangpi khuamun) ah leh kiksangin America te Hosipital munlui innte puaha Circle Office koihding khensat uha tuamun NEW CHURACHANPUR min  kiphuak leuleu hi.Asawtlo in kikukna kikhangsak in Circle Office munpen New Churachanpur kiciin,Suangpi khua NEIGM munpi Churachanpur kicipen OLD CHURACHANPUR MISSION COMPOUND kici hi.Atop ah NEW  leh OLD omnawnloin CHURACHANPUR  kici tahi. Suangpi (Old CCPur) pan a kituahna hang pen NEIG Mission Compound in munluah ahih man in ciin,ciamteh uh hi.

4.NEW LAMKA-Township Level
New Churachanpur hongdincil in ah Pu Thang Zam Gangte in Hill Town ah Hausa sem hi.Thangzam Road zong Lamka ah minneikhat om hi.Shri Paukhothang Guite in Hiangtam Lamka(Lamka tung) ah Hausa sem hi.PuZenhang Valte(Hmraminam Varte pan Tedimgam ah Valte kici) Bijang lobuk ah khuabawl in Hausa sem hi.

(a) Township Level
New Churachanpur hong piantungin Khua tuamtuam thum Pu Thangzam Gangte khua leh Hausa sepna HillTown,Pu Paukhothang Guite Khua leh Hausa sepna Hiangtam Lamka(Lamkatung), leh Pu Zenhang Valte Khua leh Hausa sepna Bijanglote kigawmkhom in Khuapikhat kiphut ahihi.Lamka om kei leh Churachanpur khuapi acingtheilo cihna ahihi.
Kum 1961 in Lamka Township dinmun ah kikoihto in Khuapisung huam(Notificatified Area) Km.6.5 azau hi.Kum 1970 panin Township Committee kitela Veng(ward) 12 in kikhenn,Vengkhat ah member-1 tek kitelkhia hi.Kumpi lamte mitel-2 tawh aavekun mi-14 (member-14) ahiuhhi.

(b) Municipality -Kum 1988 panin Municipality khuapi dinmun ah kilamsangto leuleuin,Kum 1990 panin Veng-16 in kikhenhi.

1.Tuibuang(District Headquater) 
2.Bijang leh Hmarveng 
3.Sielmatleh Zomi Colony
4.LowerLamka-I(ZenhangBazzar),
5.LowerLamka-II,
6.LowerLamka-III, 
7.NewLamka
8.Salemvent 
9.HillTown 
10.Mualveng 
11.UpperLamka 
12.Head Quaterveng 
13.Chienkonpang Phailian 
14.Buangmual 
15.Rengkaiveng 
16.Zovenginkikhenhi.
(Laigelhdangte in hong behlap ding in kong cial)

(c) Township Census Areas-
 Khuapisung (Census Township) huam mipi kisimna ah hihveng kigelhteng Tuibuong, Bijang, Sielmat,Zenhang Lamka,Rengkai,Luooa veng, Nehru marg,Salem veng, Hil Town, Upper Lamka,Chapel Line,Headquater veng,Chienkonpang, D Phailian,Bungmual,Pearson,Thingkangphai,Ngathal,Kawnpui,Mualkot,Gangpimual,Mission veng,Lhangmem,Gangte veng,Zenlangveng,Pangzawl leh Lanva veng veng -28 ah hihi.Ahizong in khuapi huama om Zomi Colony,Hmar veng, Simveng,Hiangzou veng leh Zouveng te a hihi.(Note- It has urban status according to the lates official recorded.On 11 July,2006 A.K. Sinha,Duputy Commissioner Cum-Chairman of Autonomous District Council,CCPur,declared some parts of the town as census Town).

B. MANIPUR STATE KI NGAHKHIT  MANIPUR SOUTH DISTRICT
Kum 1971 Manipur State in (Statehood) hong ngahciangin District -8 in kikhenin Sub-Divtion kici Lamka pen Manipur South Distrct (MSD)ah kilamto in,tuasung ah Sub-Divition Office (SDO) munnga in kikhenin 1.Churachanpur-Lamka 2.Henglep 3.Thanlon 4.Tipaimuk Road ahihi.MLA Constuency -6 neizo hi.

C.LAMKA –CHURACHANPUR DISTRICT LEVEL
Kum1969 in Churachapur pen  Manipur South District pan in Churachanpur District level in ki koih hi.( Govt of Manipur Secretariat Revenue Department Orde No.43/2/81-R(Pt) dated 15th July,1983 (Manipur Extra Ordinary Gazette No.174 dated 15th August,1983).Tuin Churachanpur District(2016) Sub-Division 5 in kikhena,Tipaimukh, Thanlon,Chura Chandpur, North Churachandpur, South Churachandpur, Churachandpur Town leh Singngat te  CCPur Sub-Division ah ki hel  hi.

D.KHUAPI SUNG KHANTOHNA
1.Lamka khua miphazah(Population)
Kum 1981 misimna(Census) ah mihing-20,769,Kum 1991 in 1,79,04 om in Pasal 90,565,Numei 85,478 Mihing pen 40000-45000 kala ah omdingin sehtheih hi.(L.Keivom,Zoramkovel Vol.-2). Kum 2001 a District bup miphazah vekpi 228,707, Numei leh Pasal kikhaihna(Sex ratio) Pasal 1,000 ah Numei 993 oma,Manipur state bup 978 in kikhaia,CCpur District  Numei,Pasal a tam kikhaihzia hoih zaw hi.Lamka khuapi sung(CCPur) bek ah mihing 50,000 omding in ki ngaihsun hi.(2001).

Mihing tammahmah a ingaihsuthangin Aizawl khuapi ah kum-10 sungin azahnih khang Kum1981 in 7,4493,Kum 1991 in 1,54,343 ahihi.

(Mizoram pen apunglua zong thukhat Aizawlkhuapi gamsung gampuapan tunbeh,Numei leh Pasal kitenglo taneitamna hangzong hipen ding etc Kham Lam Tuang muhna).

The population Developement of CCPur(Lamka )
Names          Status        Population      Population                 Population
                                         1991-03-01       2001-03-01                 2011-03-01
Manipur    State              1,837,149             2,293,896                  2,855,794
CCpur        District           176,184                227,905                     274,143
HillTown                                                                                         2,293
Rengkai                                                               4,403                   8,293
ZenHang                                                              7,408                  7,771
Total –Hill Town +Rengkai+Zenhang=18,357 peoples(2011)    Source- Census Commissioner Rand MC Nally-Delimalution Commission of India,2011)                    
                                                           
2.Biakna
Saptuampawlpi leh Biakinn tamna hi.Baptist Association bek zong 6 bang om hi.

3.Pilna Sanginn
Kum 1986-1987 kikal in MSD sung ah College-2 bek ompan in High  School(HSS)-47,Juniour H/S-75,P /S-450 om hi.Center Government Secondery School-Llapuithluai Foundation School is offered by CCPur District-Computer Sciense,Affiliated to Board of Secondery Education,Manipur(BSEM) school tampi om in, CBSE  affiliated -Jawahar Novodaya Vidhyalaya(Tuinom),St.Paul's Institute(New Lamka),and Rayburn Higher School(New Lamka) a hihi.

4.Minam Pau Tawh kizui khenna
Nidang in Lamka khuapi ah Kuki,Naga,Meitei bek in kiciamteh zaw deuh hi.Tu hun in Kuki,Zomi,Mizo groups ah Paite pau zang mimal tampen ahihi.Community ah Paite,Simte,Mizo,Hmar,Thahdo,Gangte,Tedim-Chin,Vaiphei,Zou etc om hi. Meitei te zong teng in,Manipur gammi hilo namdangte Nepalis,Biharis,Mlwaris leh Punjabis etc zong teng uh hi.

C.LAMKA KHUAMIN
1.PU ZEN HANG VALTE LEH ZEN HANG VENG
L.Keivom(PuLalthamuong)gelbangin kong gelhding hi.Tuithaphaia Lo bawla khuasatte lak ah minngahpen Pu ZenhangValte ahihi.

(a) Valte(Varte) Behthu-Zenhang Varte(Hmar) hiloin Valte beh ahihna hi bangin gen hi.Amau Zenhang Valte Pu leh Pate pen asanggamte uh Varte behdangte bangin Ciaului kanlo in, Chin Hills pan in Manipur gamtung pawl ahih uh hi.Api leh Pute uh tuma kum 400 laiin, Champhai(Tonsim) ah Ukpi(Lal) ahi uh hi.Pu Zamthattvung(Lawipa) kici Ukpi hunin Zote(Jote) tawh pangkhom in, Anal mite nawhkhia uh in tengkhom uh hi.Pu Zamthatvung(Hrangchal,Laitlang) in Zunung,Tong in, nasiatak in pawibawl hi.Ahih hangin Vartepa apawibawlna uah hehsak kha uha,Vartepa zong azanzan in atate Varkila leh Chonthanga tawh Lamzaangte khua(Guite Manlai) in vabel uh hi.Anungciangin a Uzaw Varkila pen apatawh asanggamte kiang  Mizoram zuanin Ciaukankik uhhi.Anauzaw Chonthang(Tonthang) in Lamzaangte  ziin nei ahihman in apate zuinuam nawnlo in tengsuak hi.Tuaa kipan in Pu Chonthang suante in Tedim(Paite) kamzang in Varte cinawnlo in Valte kici uh hi.Pu Zenhang zong kum 1905 a ChinHills a khuakhat Pangzaang khuaa piang Pu Chonthang suante lakah khat ahihi.Pu Zenhang pen Pangzaang pan in Kansau ah lal uhhi.1908 in apa Pu Kam Thuam leh pawlkhat  Manipur gam Tonglon  khua ah Pu Ginzathang tapa Pu Pumzakham khua ah tengkhom uh hi.Pu Zenhang in Pu Ginzathang-Hatzaw tanu Pi Manghencing kitenpih hi.Kum 1927 in Suangpi(Churachanpur)SDO Gasper Mangpa  kiang ah Peon (Sawltak) sem hi.Myanmar gam Valte behte Pu Chonthang suante ahihi.Varte cih akang ango cihna hia,Valte cih pen a Val,a kideihlo cihna tawh kibang hi.Abeh min uh abultak koizaw cih amau behneite kipsak hizaw ding hi.

(b). Khuathaksat-Bijang
Kum 1929 in kum 20 khong paikhit huna Pu Zenhang in  Pu Semthong gam angetna angahloh pen Kumpi lamte phalloh pen Tedim Road leh Tuithapi luikal agam aukpa Pu Semthong lahsita in, tuamun angahding kilamen a hihman in kumpitung(apu)ah ngenin ngah hi.Pu Zenhang in Khuakip satnuamlua kisa lodankhatin bawlphot in, Bijang lobuk ciphot hi.Kum 1930 in khuasatna dingphalna ngen in Bijang lobuk mah ci masa hi.Kum 1945 Galpi nihna beikhit Manipur Politic Agent (Bawrhsap) C.Gimson in Hausa hihna patta(Certificate of Reconization) pia ta hi.(Misc.Case No.398 of 1945-46).Tua hunin Bijang lobuk leh Lamka nuainung inn-21 khong bekpha pan hi.A hizong in amah Pu Zenghang sihma in,Inn leh lo hong kibehlap in Lower-Lamka,Lamka nuai khempeuh Inn-1000 val cingman hi. Pu Zenhang Valte khua hongsuak a hihman in amah Lamka nuainung khempeuh Hausapa hipah hi.1905-1984 in Churachanpur khuapisunga "ZenhangValte Bazar" athupipen leh aminthangpen ahihi.Meiteite in "Zenhang Lamkhai" ciuh hi.Lamka cihmin piankhiatna zong hipah hi.Churachanpur khuapisung ah Lamka pen khualianpen hia Lamkatung(Upper Lamka) leh Lamka nuai(Lower Lamka) in kikhen in Lamka nuainung khempeuh Pu Zenhang Valte ukna ahihi.

Minam leh gam itna lamah zong hahkatin panga Manipur Kala Academy minphatna ngah hi.

(d) Mualsuang Phawkdetna Phut
Kuama hihngeiloh Indiia Kumpi luite India nampa Mahatma Gandhi,India PM Jawaharal Nehru leh Topa Jesu te phawkdetna suang ZenHang Bazar ah phutin pawi bawla tuani in Sial-2 go in annvak hi.

(e) LAMKA bom pan LAMKA  khuamin
Police Station ah Mizoram State paina Tipaimuk Road,Chin State pana pai Tedim Road,Gun paina Sugnu Road leh Imphal paina Tedim Road te Churachanpur Imphal Road kicite omna, Lamlianpi LAMKA BOM (JUNCTION) ahihi.

Tedim(Paite) in Lamka,Lusei(Mizo) in Kawngthuam,Hmar in Lamthe orLamthuom,Meitei in Lamkhai ci hi.Mangkang te in Junction ci uh hi.Pherzawl Hmar lampaina khuakhat Lawibual khua akici om hi.Atungin "Lamka" cisamna pi "Lawibual"cinuam tamzaw ahihmanin damdamin "Lamka" ci dingbeiin Lawibual khuamin mah puasuak hi.Tua mahbangin Churachanpur zong "Lamka"cinuam pawl hongtamsemsem in Churachanpur sang in Lamka kicizaw hi.NewLamka cihbang om hi.

Pu L.Keivom in bel Kum 1999 in Aizawl  khuapi ah Veng-50 omhi.Tuate ng hiam?Ei Zosuante khuasatna min zangnuamveve ihih leh sungah Vengkhat minzang in Aizawl ci nawn kei leng ahithei mah ding hiam?Churachanpur zong a khuapisunga vengkhat Newlamka khuamin Churachanpur khuabup mintangin Lamka cileng a hizo di ZO KHUAPI or SUANGPI ci lelleng zong bang ciding hiam?cih ama ngaihsutna(Concept) gelhhi.(ZoramKhawvel Vol-2,Aizawl,LengchawnPress,2nd edit,1997p.129-154) Zomite in a Lamka khuapibup(CCPur) LAMKA Khuapi kicikhin in, ZOGAM  bang phutkhiazo leng cih lunggulh sunmang(Day dream) ahi hi. Ngaihsutna tuamtuam cihding hi.

2.GO CIN KHUP VENG
Kum 1957 Singkaiphai I cih leh tua Go Cin Khup veng kikal gamlakpi mah hilai hi.1931 kum im Pu Go Cin Khup  Sanglaihilh sia semin a Pensen khit ciangin gamleiin amamin tamin Go Cin Khup veng kici hi.

THUKHUP NA
Atunga thute I etciang in Zomi te in Lamka cihmin deih mahmah bekhiloin,New Lamka bang a omkhin ahihi.Zomi te bek Zosuante hi in,Paite kampaute Kammal zat bangbang mah Lamka cih hoihzaw maw?I vek a ki kumkhoma,Khuamin kician zaw lungkim penpen zatding maw cihzong ngaihsut huai thukhat ahihi.


(Written by Kham Lam Tuang –Zomi Times Weekly News ah Managing Editor, Zomi Post Reporter semlai hi. Email. tgtuang@gmail.com,+95933567674, +95262359806, Kalaymyo).

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

  1. Hiangtam Lamka saattu "Pu Paukhothang" hilou in Pu Phungkhothang hizaw diing hi.

    ReplyDelete

Item Reviewed: LAMKA KHUAPI LEH ZOMITE. Agelh - Kham Lam Tuang Description: Rating: 5 Reviewed By: Cinpu Zomi
Scroll to Top