728x90 AdSpace

Hot
Menu
Zon-ol na Donate

Latest News

LEITUNG A PRESBYTERIAN PAWLPI HONG PIANKHIATNA. Agelh - Rev. Thang Sian Kap

LEITUNG A PRESBYTERIAN PAWLPI HONG PIANKHIATNA
Agelh - Rev. Thang Sian Kap
Photo Credit : Sia Thang Van Lian

AD zabi 16 madiakin Khristian Pawlpi sungah Pope, Bishop, Presbyter, Deacon cihte dinmun kibat lohna hangin, Khristian pawlpite sungah kipuahphat nopna lungsim hong lian mah mah a, a sawt loin pawlpi puahphatna hong piang takpi hi.

John Calvin in zong pawlpi hong puahpha-in, Khristian pawlpi sungah a lian tuam om hoihsa lo in, Khristian pawlpi paizia ding a hong gelhkhia hi. Khristian pawlpi pen Presbyterte leh Pastor-te in keem ding hi. Khristian pawl sung vaihawmnate ah kumpi kihel lo ding hi. Doctrine leh biakna kimakaihnate ah, Bible (Lai Siangtho) bek kizang ding hi, ci-in na genkhia a, Geneva khuapi ah 1536 kumin tu a Presbyterian pawlpi paizia hong phuankhia hi. Tua kum pen Pawlpi Piankum, ci-in kiciamteh hi.

John Calvin puahphatnate John Knox leh mipil 5te in hoih takin sittel pha leuleu uh a, Scotland gamah John Knox makai in Prebyterian Pawlpi hong po hi. Tua puahphatna pen 1560 kumin Scotland kumpi (Scotish Parliament) in a gam sung makaih nadingin kipsak leuleu ahih manin, tuni dong Pawlpi kimakaihna bulpi a suak hi.

Scotland Kumpi in a kipsak Prebyterian pawlpi kimakaihna pen Andria (Andrew Melville) in a kicingzaw deuhin puahpha leuleu a, 1581 kum Kikhoppi ah kikipsak hi. Scotland gam pawlpi phutpa ahih manin, John Knox pen Andria Presbyterian Pawlpite PA ci-in kiciam teh hi.

AD 1647 kum ciangin pawlpi zong mun tampi ah hong omta ahih manin, Andria puahphat entel leuleu in a kulna munte puahpha lai in Westminister Assembly ah kikipsak hi.

Presbyterian pawlpi min pen a tungin Calvinistic Methodist cih hi a, Welsh gam in India saklam gamah pawlpi hong phuh ciangin, India gam sunga Calvinistic Methodistte in 1926 kumin Bangladesh-Syhlet khua a Synod Khawmpi panin a min uh laihin Presbyterian hong cih uh zui-in, tua a kipan Presbyteriante hong kici ta hi. Hih India gam pana kiphuak min mah leh zuihin 1933 kuma kipanin Welsh gam in zong Presbyterian pawlpi mah na kici ciat ta uh hi. A min a kilaih hangin a thu kilaih lo ahih manin bangmah buaina om loin, ol takin kizom to den thei hi.

Presbyterian Pawlpi pen leitunga pawl tuamtuamte lakah pawlpi gol khat hi a, a ngaihsut na uh zong zaisak kul hi. WCC leh Council for World Mission phuankhiate lakah zong a kihel uh hi. Leitung bup a Mission nasepna ah kizop khawm ding pen adeih pen khat uh ahi hi. Tua ahih manin a min thei lo mi pawlkhatte bangin Mission pawlte na ci pong uh hi.

KAWLGAM A PRESBYTERIAN PAWLPI HONG PIANKHIATNA
Kawlgam a Presbyterian pawlpi hong pona pen pawl dangte bang hi loin, gamdang pan hong kipuak missionaryte phuh hilo a, a gam mite phuh ahi hi. Galpi Nihna- Japan gal a hong tun ciangin, Kawlzang pana galtaite in Lusei gam a va beel uh hi. Lusei gama Presbyteriante kiangah Zogam sungah Pasian thu lama khua a mial lai ahih lam a va gen uh hi. Lusei gam a Presbyterian khangno pawl (YMA)te in a zak uh ciangin, Kawlgam huam Zogam sunga Pasian na sep dan ding hong ngaisun uh a, Chanchin Tha Dak (Gospel Mail) bawlin tua tawh mission va pai ding a khentat uh hi.

1946 kumin Missionary Singkuang 2 bawlin Aizawl Presbyterian Biakinnpi ah, tua singkuangte gel apna thupi takin nei in tua pan Zogam a lut pih dingin a hong kuankhia uh hi. Tua singkuang khat pen Lunglei lamdung zui-in lutpih ding leh, singkuang dang khat pen Tonsim lamdung zui-in lutpih dingin, nungak-tangval, nupi-papi, ahi thei zahzah a hong kuankhia uh hi. Lusei gam khua tuamtuamte nawkpih in, mite in a neih bangbang, a huh zawhna bangbang uh, tua singkuang sungah na khia uh hi.

Tua singkuang tuntun na ciangah kha khanlawhna a nasia mahmahin hong tunga, limna, laamna, linna, kamtuam paunate mite tungah a hong tung hi. Tua banga khua tuamtuam a nawk khit uh ciangin, Tonsim((Champhai) khua ah kituahin, Zogam sunga Falam leh Tedim gam sunga pawlpi makaite kiangah kamtai a sawl uh hi. Thupuak Singkuang kong lutpih ding uh hiam? ci-a a dotna a puak uh ciangin Tedim gam pawlpite in na niala, Falam gamah a lutpih uh hi. Falam gam a tun uh ciangin zong, Lusei gama khanlawhna a pian mah bangin, a tuntunna uah Lawkite Khristian hong suakin, Khristian a suaksate in pianthakna, limna, laamna, linna leh, kamtuam paunate hong ngah ve uh hi. Kilawp hon lua ahih manin, tuiso bang henhan keei hi, kici hi.

Tua limnate hangin Tuiphum pawlpi sungah buaina hong om ahih manin, Hualngo tangdung a om Satawm khua Baptist Convention(Kikhoppi) 1946 kumin tungsak uh a, Kikhoppi Chairman Pu Thang Dai in, “I Baptist pawlpi sung leh ei bial sungah pawlpi dangte nasem thei lo ding hi; limna, laamna, kamtuam paunate kisang lo hi,” ci-in a pulakl hi.

Baptist Pastor a sem Than Kap tungah limna hong lut a, Baptist makai dangte in a limna, a laamnate a khawl theihna dingin a genpihpih uh hi. Pastor Than Kap in, “Ka limna leh laamnate Pasian kiang pan hong kipia Kha Siangtho nasep hi a, mihingte dal zawh ding hi lo hi,” ci-in a dawng hi. A khoh zawh loh uh ciangin a Pastor nasepna panin a khawlsak uh hi.

Baptist pawlpite in limna thu a san loh uh ciangin, a piangthak mi pawlkhatte Baptist pawlpi panin hong paikhia in 1947-1955 kikal sung tengin Independent pawl a lut aw, Methodist pawl a lut aw, a hong om uh hi.

DIN LOH THEIH LOH
Independente pawlpi sunga omte in kha khanlawhna a ngahzia uh Presbyteriante paizia tawh saikaakkaak uh a, Presyteriante aa maansa zaw uh ahih manin, pawlpi phuat ding hong lunglut mahmah uh hi. 1956 February 5 (Sunday) ni zingin Falam gam sung Losau khua a Primary Sang Inn ah khua 12 kigawm palai pai mi 42 te in kikupna a nei uh hi. Presbyterian pawlpi phuh ding thukim na vote na pia uh hi. Tua ni pen  Kawlgam Presbyterian pawlpi kiphuh ni hong suak hi.

Tua muna vote a piate hih a nuai ate hi:

1.    Upa Phun Mang
2.    Rev. San Rawl
3.    Rev. Satin Zam
4.    Upa Za Thang
5.    Upa Lal Khuai
6.    Upa Kam Lal
7.    Upa Chin Khuai
8.    UpaTial Hnin
9.    Upa No Khual
10.  Upa Ngun Khar
11.  Upa Hrang Thleng
12.  Upa Khen Ceu
13.  Upa Tawk Kulh
14.  Upa Pak Kual
15.  Upa Zun Thuan Thang
16.  Upa Tial Sum
17.  Upa Satin Pum
18.  Rev. Tial Lung Thang
19.  Pu Hrang Kap
20.  Upa Bilh Thawl
21.  Upa Dal Pum
22.  Rev. Luan Cung Nung
23.  Rev. Than Kap
24.  Rev. Sawn Hlei Kulh
25.  Upa Long Cung Nung
26.  Pu Mang Sailo
27.  Upa Tuang Hnin
28.  Upa Cawn Kam
29.  Upa No Sum
30.  Upa Piang Cung Nung
31.  Upa Lian Tailo
32.  Pu Tha Ruang
33.  Pu Mang Khar
34.  Pu Kip Thio
35.  Pu Tei Kam
36.  Pu Zun Mung
37.  Upa Khuang Pum
38.  Upa Hnun Hlei Thang
39.  Upa Duh Ruang
40.  Upa Tlangkulh Mang
41.  Rev. Len Cung Nung
42.  …………?????

Kawlgam Presbyterian pawlpi a phuh tungun, pawlpi khua 12, inn 416 leh, mimal 2,029 pha uh a, sumpi Ks. 2,663.00 tawh a kipan uh hi.

Kawlzang ah Presbyterian Pawlpi Kiphuan
Khampat khua a Pu Van Hel leh. Pu Deng Thuamte makaihna in 1956 kumin mimal 70 tawh Presbyterian pawlpi Khampat khua ah na phuan uh a, Kawlzang ah a masa pen ahi hi.

Matupi Gam
1963 kum April kha in Matupi leh Valang khua ah Presbyterian pawlpi hong pokhia a, Matupi gam adingin a masa pen munte hipah hi.

Kawlgam a Presbyterian Headquarters Masa Pen
Kawlgam Presbyterian pawlpi hong din ciangin a zumpi masa pen Falam khua ah hi a, Makaipi pen Rev. Lalthanga hi a, 1962-1983 kum dong tua laiah kizom hi.

1984 kum ciangin Kawlgam Presbyterian pawlpi pen Synod 3 leh Special Area 1 khatin kikhen a, Hqs. dingin Tahan kizang hi. Synod munpite pen Matupi, Falam, Phai hi a, Tedim pen Special Area kihi sak hi. Hih Association thumte gawmna pen General Assembly kici hi. Tua General Assmebly Hqs. Address pen
The Presbyterian Church of Myanmar,
Office of the General Assembly,
Tahan, Kalemyo, ahi hi.

Tu laitakin General Assembly Makaipi pen Rev. L.R. Bawla, B.Th., B.R.E., M.Th., ahi hi. Kawlgam sunga Presbyterian mipum 25,497 kipha a, khua 178 ah ki-om hi. Tahan ah kitam pen hi.

Tedim Mite Laka Presbyterian a Hong Pona
Zomite laka Tedim gama Presbyterian a hong pona pen pawl dangte bangin missionary te hong puak hi loin, a gama tengsa mite phuh ahi hi. Tedim gam Presbyterian pawlpi hong po khiatna masa pen Fartlang khua hi a, a phuankhiate hih a nuai ate a hi uh hi.
1.    Pa Zel Ngin
2.    Pa Thuam Cin Thang
3.    Pa Zam Khaw Pau
4.    Rev. Thang Sian Kap-te ahi uh hi.

-       Mimal 45 tawh Pa Zel Ngin makaihna in a na phuankhia uh hi. Pawl kipsak ni May 1, 1963 ahi hi.

Fartlang khua pana Presbyterian pawlpi a hong kiphuatkhiatna tangthu pen hih bang ahi hi. Hih khua pen Lusei gamgi kiangah hi a, Pasian thu a theihnasate uh Presbyterian huzap vive ahi hi. Kawlgam sungah Presbyterian pawlpi a om leh om loh zong a thei nai lopi ahi uh hi. Pawlpi a phuh tungun kuamah tawh kizopna om lo napi, 1965 kum ciang Pastor Ngaih Khaw Gin leh, Pa Ngul Khaw Thangte in Tedim khua ah Presbyterian pawlpi hong phut ve uh ciangin, amau tawh hong kizom uh a, Tedim, Fartlang leh Kawlgam ate tawh kizopna hong nei toto uh hi.

Tonzang leh Tamu Gam
1972 kumin Tonzang gam ZBA-te lekah kithuhuallohna hong om a, mimal 200-te Presbyterian pawlpi sungah a hong lut uh ciangin, Tonzang gam leh Tamu gam sunga Zomite lakah Presbyterian pawlpi a kiphut hong suak hi. Amaute a makaih dingin ZBA sunga Pastor a semsa Pr. Suan Khaw Pau leh Huhsia Ngul Za Gin kizang to pah a, Tonzang gam leh Tamu gam keem a hong suak uh hi.

Inntuak Kum
Tedim gam mite pen Kawlzang Presbyterian khut nuaia om hi a , 1974 kumin Vaphei khua ah Presbyterian Khawmpi kinei a, tua lai panin inntuan ding a hong ngetna uh kipia hi. Tua hun a kipanin Tedim, Tonzang leh Tamu gam teng Presbyterian khat in kidingsak hi.
1984 kum March kha in Kawlgam Presbyterian pawlpi pen Synod 3 leh Special Area khat in hong kibawl ciangin, Tedim, Tonzang leh Tamu teng kigawm Special Area cih min in kikoih hi. A munpi uh Tedim Lawibual ahi hi.

The Presbyterian Church of Myanmar
Tedim Special Area Office
Lawibual. Tedim., Chin State ahi hi.

Special Area sungah mimal 904 om a, khua 16 pha hi. Pastor nih nei uh a, missionary 3 nei in zum lai-at khat a nei uh hi. Pawlpi mi a tamna pen khua Fartlang hi a, Special Area Makaipi Rev. Thang Sian Kap ahi hi.

Pawlpi Kimakaih Dan
Sum leh pai khempeuh Synod ah lut hi. Synod in Assembly ah mun 3 a khen mun 2 ap-in, mun 1 pen zang hi. Pawlpi sunga nasem khempeuhte khasum Assembly in pia hi. Pastor te, nasem tuamtuamte, Khawk leh Association aa hi loin, Assembly aa ahih manin, a hun sehsa om loin, a kul dan zui-in Assembly khawmpi ciangin a omna mun uh khinsak thei hi. Presbyterian sungah Pastor, Upa, thunei lian diak cih om lo a, vaihawm khawm, vote tang khat ciat nei a kikim ahi hi. Chairman in vote kitaihnate lo buangah vote neilo zaw hi. A sutuan theilo, thauhkhan theilo hi. Thu khat peuhpeuh a om leh, Local pen Khawk ah, Presbyterian ah, Synod ah, Assembly ah kipuak to deudeu a, Asembly in kum tawp Annual Meeting a neih ciangin kikhentat hi. Presbyterian sungah Committee leh Khawmpi in a thukhentatnate uh kuamah in phel thei lo hi.

Thu-umlote’ Kianga Nasep Dan
Assembly in Mission Board nei a, Pawlpite in gam miala dinga a sum muh khempeuh uh hih Board ah a ap uh hi. Board in missionary cialin gamthak ah a sawl hi. Mun tuamtuam ah Mission sang hong in Baby Home Nurse a nei uh hi. Gam miala om mite a khantoh theih nading peuhpeuh puankhui, letama leh a dangdangte a sinsak uh hi. Khua khat leh khat kikal a lei khawngte dawhsak in, Lai Siangtho, Labu leh. Pawlpi lai tuamtuamte amau pau in a neih thei nading uh a hanciamsak uh hi. Nikteen puansilh a kisamte a hawm zel uh hi.

Sum ngahna dingin pawlpite in Lungdam Bawm inn simah a koih uh a, PYF leh PWFte in gammial ading sum kum simin budget a bawlsak uh a, Gammial Sunday ci-in ni khat nei uh a, tua ni a a annek ding uh ne loin, gammial nasepna dingin a pia uh hi.

Kawlgama Presbyterian pawlpi’ Upna
Kawlgam a om Presbyteriante in Apostle leh Nicaea upna banah hih a nuai-a thute a nei uh hi.
1.    Lai Siangtho San Dan: Thuciam Lui leh Thuciam Thakte Pasian thuman hi a, hih tung bekah upna leh sepna tepna man pen hi, ci hi.
2.    Pasian: Pasian khat bek om a, Amah bek i biak ding hi, ci-in a um uh hi. Amah kha hi a, mun khempeuh leh na  khempeuh lak panin a tuam om ahi hi. A pilna, a hatna, a itna, a vangliatna, a sianthonna, a dikna, a hoihna leh, a omzia peuhmah mong nei loin a kip den ahi hi.
3.    Thumgawm Pasian: Pasian ah a nungta thum, Pa, Tapa, Kha Saingtho Pasian hi a, a thum un a kigawm Pasian khat bek suak a, vangliatna, sep theihna, a kikim pumkhat hi.
4.    Mihing Hong Kibawl Dan: Lei leh van leh a sunga om na khempeuhte a bawlpa Pasian in mihing pen ngaihsut theihna a nei, siangthona leh hoihna lamah Amah mah tawh kibang dinga ahong bawl hi a, mi khempeuh in pianna kibang unau khat ihi hi.
5.    Mawhna leh Jesu Khris Hong Gupkhiatna: Mihing in ama deihtelna tawh Pasian thukham a palsat hi. Siatna sungah tunga, a mong neilo itna a nei Pasian in Tapa khat bek a neihsun Topa Jesu pen amautea a honkhia dingin, leitungah a hongs awl hi.l Tuia Jesu pen mihingin hong piang a, Pasian leh Mihing ahi khawm hi. Mary sungah hong gai in, mihing mah hi napi in mawh bang het lo hi. Mawhneite etteh dingin thukham khempeuh zuih loh nei lo hi, Pasian thukham in anget khempeuh, mihing leh Pasian kilemkik theih nading deihna in sawlmang a, singlamteh tunga sihna dong in a hong kipia hi. A sih khit ciangin lei sungah kivui in, ni thum khit ciangin a thokik hi. Vanah kah toin Pasian ziat lamah a tu hi. Tua panin misite phong kik dingin leitungah hong pai kik ding hi.
6.    Kha Siangtho: Pa leh tapa kiang panin Kha Siangtho a hong pai hi. Mite in gupna a ngah theih nadingin Kha Siangtho ahuh hi. Pasian zahtakhuaizia, Jesu Khris a ithuaiziate mite in a theihtel nadingun a lungsim uh vaksak a, Honpa a san theih nadingun hansuahin a huh hi
7.    Thu-um Mite Thupha San: Mi khempeuhte in gupkhiatna i ngah theihna dingin Pasian in Topa Jesu Khrist a khawnkhongin a hong pia hi. Gumpa sangin, kisik a, Pasian deihna zui-in kiniamkhat a Jesu khekhap sikin a siangtho taka om dingin a hong deih hi. Tua hi leh gupkhiatna, mawhmaisakna, suahtakna, Pasian tate hihna, Kha Siangtho ompihna, sianthona, tawntung vangliatnate a ngah ding uh hi. Leitung a nuntak hun sung mahmah un zong, gupkhiatna ngah ahih lam uh a kitel theihna a nei ding uh hi, Kha Siangtho in na sem ahih lam thu leh la, thungetna leh sacrament te ah kimu hi.
8.    Sacraments: Jesu Khrist in hong baptaizna leh nitak an pen Sacraments dinga a bawl hi. Baptaizna pen Pa, Tapa, Kha Siangtho mina kibaptaizna ahi hi. Baptaizna i lak ciangin Khrist tawh kizopna, pianthakna, Kha Siangtho neihna leh ki-piaknate a om hi. Gumpa a Khrist a sangte leh a tate bek uh bapaiz ding hi.
Topa Nitak An pen Topa hong sihna phawk den nadinga khomun leh lenggahtui nekna ahi hi. Tua pen Khrist sihna hanga i ngah thuphate ciamtehna hi. Ama nasem dinga kipiakna in Topa tawh kizopna hi a, Ama hong paikik mateng bawl den ding ahi hi. Sacrament hanga phattuamna a kingahte pen a vanzatte hang hilo in, a bawlpa hang zong hi loin, Topa in thupa a piak man hizaw a, upna tawh a sang mite tungah Kha Siangtho in na sem hi.
9.    Thu-um Mi Khempeuhte Hih Ding: Thu-um mite in hih a nuai a thu bangin a om ding uh hi:
Pawlpi mi tawh kizom ding;
 sacrament leh na dangte hoih takin kem ding;
a thukhamte zui ding;
thungetna nei ding;
Nipi ni siangtho takin tang ding;
Pasian hong piakna tawh kizui-in Pasian ading pia kik ding;
Pasian thuhilhna ngai ding;
amau sung leh mi khempeuh tungah Jesu hoihna kilangsak ding;
leitung bup ah Topa gam zaisak ding;
vangliatna tawh Ama hong paikik ding ngak ding hi.
10.  Hun Nunung San Dan: Ni nunung ni ciangin misite hong thokik dinga, mi khempeuh in Topa Jesu’ thukhenna mai ah a ding ding uh hi. Leitung a nuntak lai uh a a gamtatna bangbang uh, a hoihna leh a hoih lohna zui-in thu kikhen ding hi. Thu-um lote leh migi lote in mawhsakna a thuak ding uh hi. Jesu Khrist a um bel mawhsakna tawh kipelhin mite muhin vangliatna a ngah ding uh hi.
11.  Gupna San Dan: Mihing dikna, hoihna leh, siamna tawh gupna kingah hi lo hi. Pasian hehpihna hanga Jesu Khrist upna bek tawh kingah a hizaw hi. Leitung, vantung leh na khempeuh in gupna a hong pia thei hi lo a, Jesu upna bek tawh gupna kingah thei hizaw hi.
12.  A tuamtuam: Presbyterian pawlpi sungah makai hi dingin mi piangthak bek hi ding hi. Pastor hi dingin zi khat bek a nei mi, zumsel mawhna a bawl lo mi, mawhna bawlna a om leh, tua hun pan kum 10 a cin mateng upa dingin ki-ordained lo hi. Baptaizna thu ah naupang no dongin kibaptaiz hi. Tuitheh ahi a, tuitaak ahi zongin kizang hi. Pa, Tapa, Kha Siangtho min tawh kibaptaiz hi. Limna, lamna, kamtuam pauna, pianthakna, khuang tumna, damsak theihna leh Kha Saingtho nasepna a tuamtuamte kisang kim hi.

a.    Khristian Pawlpi a San Dan: Pawl ah gupna om lo hi. Jesu upna bekah gupna om hi. Siampi tuam om lo hi. Thu-um khempeuhte’ biakpiakna kisang hi. Leitung Khristian khempeuh unau khat ihi hi.
b.    A tawntung Hun Ding Upna: Mite’ genna leh mite kanna bang sang loin, Lai Saingtho’ genna bang bek a sang uh hi.
c.     Tang Thunget: Presbyterian pawlpi in peel loin Kigin Ni in tang thungetna nei ding uh hi. Kikhop dangte ah zong chairman in kul a sak leh nei ding uh hi.

Kawlgam sunga Presbyterian Pawlpi Nasem Siate leh Mimal Sazian Lahna
1.    Ordained Pastor-te-                                  34
2.    Pro. Pastor-te-                                            5
3.    Missionary -                                              37
4.    Evangelist-                                                11
5.    Accountant-                                                4
6.    Women Worker-                                         2
7.    Youth Worker-                                            1
8.    Agape Clinic-                                              9
9.    Baby Hoem Nurse-                                     4
10.  Press Nasem-                                             4
11.  Office Assistant-                                         8
12.  Poen-                                                          4
Vekpi gawm mi-                      123

Hih a tunga teng nasem kip hi a, na sem kip a hi lo mission sang sia leh press nasem, Lai Siangtho Sang sia kim khat kisim nai lo hi.
13.  Pawlpi mimal-                                           25,497
14.  Inn-                                                               4,401
15.  Biakinn-                                                           137
16.  Upa ordained-                                                  243
17.  Tuiphumsa, kum 14 tung siah-                    12,201

Note: Presbyterian Pawlpi in full member a cihte uh tui kiphumsa (dan zawh kim), pawlpi sunga vote nei theite hi. Kum 14 pha ham tang ding hi.

Tuiphumna thu ah Presbyterian in naungaek suak tung nangawn tuiphum uh ahih manin, pawl mi khempeuh baptisma tangsa hi khin dingin kiseh hi.

Rev. Thang Sian Kap (Area Officer)


Source :
Zomi leh Biakna Laibu Laimai- 64-76

Zomi eLibrary / Laibusaal in Zomi Biakna Pawlpi tuamtuamte tangthu, a lunglutte ading deihsakna tawh aki tei/type kik ahi hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: LEITUNG A PRESBYTERIAN PAWLPI HONG PIANKHIATNA. Agelh - Rev. Thang Sian Kap Description: Rating: 5 Reviewed By: Cinpu Zomi
Scroll to Top