728x90 AdSpace

Hot
Menu
Zon-ol na Donate

Latest News

Makai Suakthei Mite. Agelh - Lian Muan Kim

Makai Suakthei Mite
Agelh - Lian Muan Kim

I gensa mah bangin makai sa-a suak oma, suaka makai zong om hi. Ahi zongin piangthak makai ahih le bel makaihna Khasiangtho letsong a ngahte hi phadiaka, bangbang hi-in kuakua hita leh Pasian in makai dinga a teelte a teel ahi hi. Mi khempeuh makai suak theilo hi. Mipil khempeuh le mihau khempeuh zong makai suak tuanlo-a, mi zawng khempeuh zong nungzui hi denkeei tuanlo hi. Tua ahih leh a bangcite makai suakthei-a, Pasian in a koi cite teel hiam.


Tanglai leitung makaite en le hang galhang galhatte, mipil misiamte, mi cithei mi nuamsate leh kumpinamte khawng ahi uh hi. Mizawngte' a ding, ngabengte' a ding leh mawhnei siahdongte' a dingin makai suahtheih na ding peuhmah lampi om lo hi.

Tua kawmkal pan Pasian in makai dingin a lau theia, zuau a khem thei Abraham na teel hi (Pian 12:13; 20:2). Ama mite' makai dingin thugen siamhetlo-a amah le amah a kimuang hetlo Mawsi na teel hi (Pai 4:10). Mawsi in ahehna hangin khat veivei seploh dingpi' teng peuh semthei sawnsawn hi (Pai 2:11-12; Gam 20:11-12). A tha khek dingin mite'n suang tawh a denlup sawm uh ahi Joshua na teel hi (Thuhilhkikna 31:1-8). Midiante tunga galzawhna dialkhai dingin a meidawi simtham ahi Gideon na teel hi (Thukhente 6:11ff). Siampi Eli zalaih dingin mi mawkmawk khat ahi Samuel na teel hi (Samuel masa 3). A thahat, a tunsang mahmah Sawlu zalaih dingin tuucing Davuih na teel hi (Samuel masa 16:1-13). Davuih zong mi' zi tawh a mawh lo hilo-a, mi that lo zong hi hetlo hi (Samuel nihna 11). Kamsang Elijah zong kamsang minthang khat ahih hangin meidawi hun nei-a lungkiagawp thei lai hi (Kumpite masa 19:3-10). A zalaih dingin Pasian in talkolh lokho Elisha na teel hi (Kumpite masa 19:19-21). Isaiah zong mawhnei, kamnin ahih hangin Pasian in na sam veve hi (Isaiah 6:5). Pasian in makai dingin Ama deih teng tel-a, a telte cingtaaksakin kisam a sakteng a hunhunin guan hi.

Zeisu Khazih leitungah a vak lai-in makai ding mi a teel ciangin a pil a siam Rabbi-te, laitei Scribe-te, Zadducee-te ahi zongin mihau minthangte, mite' muan le suante, kimawlsiamte, biakna makai siampite leh thukhamhilh sia Pharisee-te nateel masa hetlo hi. Banghang hiam cih leh tua mite pen Pasian' muhna ah muat mangkhin uh hi. Adoniram Judson in: Beelkhai sunga tui uih i sunbeh sangin beelkhai hawm dim leng hoihzaw, a cih pen i phawk pah lian thei hi.

Tua ahih manin Zeisu in mite' phawkkhakloh mite' theihkhakloh teng peuh, mi' nawlkhin pampaih teng peuh, ngabeng khawngte peuh leh mithupi hetlo teng peuh nateel sese hi. Tuate a tamzaw pen Galilee mite hi lailai uh hi. Tua hun lai-in Galilee mite pen mi nunniam, mi mawl, mi tawta phadiak leh pilna neilo-a a ciaptehte uh ahi hi. A tupna pen leitung lumlet ding, cih hi-a tuabanga a lumlet na dingin mi gina lo tawh a kibang thingtheng pawlkhat na teel sese hi. Beelkhai sunga Tui uih i sunbeh sangin Beelkhai hawm dim leng Hoih zaw. - Adoniram Judson 29 Upmawh huai hetlo na pi, tua a teelteng in leitung lumlet takpi uh hi (Nasemte 17:6). Na lianpi a sep na dingin mi mawkmawk pawlkhat teel hi. Banghang hiam cih leh amaute kiniamkhiat uha, ngaihsutna hoihlo tuamtuam te'n zong tua hunlai-a makai dangte' nit bangin ninsak nailo hi.

Zeisu in: Vangtung gamah a lianpen ahi nuam peuhmah in mi' ading nasep sin phot hen. Note lakah a masa pen a ut peuhmah in na sila uh hi ta hen … mi hing Tapa in mite nasemsak ding hilo-a, mite' na a sepsak ding leh mi tampite' a dingin nuntakna pia dinga hong pai ahi hi, ci hi. A cih mah bangin Zeisu in mite' a dingin a nuntakna pai takpi-a Pasian mai leh mite' maiah kiniamkhiat takpi hi. Tua bang mahin mi kiniamkhiatte le mi mawkmawkte piangthak makai suaksak nuam hi. Mi mawkmawkte tung pan Pasian minthan na dingin na a sep theih lam kilangsak nuam zaw hi. Mihingte thanemna ah Ama thahatna cingtak in kilang hi (Kawlentu nihna 12:9). Tua ahih manin mipite in hi Zeisu teel nungzui makaite a-et uh ciangin Pasian vangliatna muthei zaw uh hi. A nidanga mi mawkmawkte amuh kik uh ciangin leitung lumlette ahih lam uh, a phawk uh hi.

Thagumhat hang hilo, vangliatna hang zong hilo, Khatha bek tawh ma a kitut lam kitelthei semsem hi. Zeisu in tuni ciang dong mi mawkmawkte mah makai hoihte suaksak nuam lai hi. Mipil misiam tampi, mi thahat tampi kisam lo hi. Mipilte a maizumsak na dingin leitunga a haihuai nate na teel hi. A thahatte' a maizum sak nading in a hatlo nate na zang hi. Leitunga a kinawlkhin leh a kizahpih nate na teel hi … Pasian mai ah kuamah a kisaktheih loh nading ahi hi (Kawlentu masa 1:26-29). Tuni-a mipil minthang, laigelh kiva-a minthang, mihau minthang, kimawlsiama minthangte leh thugensiam, kampausiama Mi mawkmawkte tungpan Pasian in Ama minthan na ding Na a septheih lam Kilangsak nuam hi. 30 minthangte en le hang Pasian in Ama tuute makai dinga a teelte hi khollo hi. Tuate teel nuam le zong teel thei lua mahmah ta leh tuate teel masa lo-in mi mawkmawkte hong teel zaw sese hi.

Khat vei Assisi mi ahi Saint Francis kiangah mi khat hong pai-a: Banghangin nang, banghangin nang, hici thei na hiam, ci-in adot leh Francis in: Banghangin kei, kei bangci ka hia, ci-in nawh satakin dawngkik hi. Tua leh thudong pa in: Banghangin mi khempeuh in nang hong mu nuam hiam. Na thugen za nuamin na thu mang nuam uh hiam. Na mel lah hoih hetlo milmel, laitaan lah neilo, mipil mihau innkuan sung pan lah hilo, banghangin leitung in na nung hong zui nuam phial le kilawm hiam, ci in dong hi.

Francis in vangtung lam ento-in khukdin suka thudong pa lamah kiheiphei in: Nang thei nuam maw, ka hicih theihna hang pen Sangpen pa'n hong hicisak nuam ahih man hi. Pasian in mi hoih mi sia encik hi. A mit siangtho in mawhneite lakah kei sanga mawh zaw leh a gina lo zaw mu lo ahih manin a lamdang Ama ngimnate a tangtun nading in kei hongteel hi. Pasian in kei sanga man neilo zaw mi mu lo ahih manin mipil misaim-te' mai zum na dinga kei hong teel hi, ci-in dawngkik hi.

Hudson Taylor in zong Sengama Pasian na-sem ding mi a teel ciangin mipil misiamte, mihaute leh mi thupite nateel masa lo in Pasian nasem nuam taktak mi kiniamkhiatte nateel zaw ahih manin mi tampi takin lamdang sa mahmah uh hi. Kiniamkhiatna leh lungsim takpi tawh Ama na sem dinga kipankhiate Pasian in thupi sa hi.

Tua ahih manin Pasian in Ama mai-ah a kiniamkhiatte leh lungsim siangthote pen makai suaksak nuam hi, cih i thei hi. Tua ban-ah, makaihna pen Khasiangtho letsong nam khat mah ahih manin lungsim siangtho, lungsim kiniamkhiatte in Zeisu a sankhit uh ciangin hih letsong ngah thei uh hi. Hih letsong a ngah khempeuh in Khasiangtho makaihna nungzui-in punsak ding kisam hi. Kiniamkhiatna tawh Ama nasem dinga Kipante Pasian in Thupi sa hi. 31 Tua banga punsakna ah hih a nuai-a Sanders' gelhteng tawh kisittel ding thupi hi.
Ø Zongsatna hoihlo khatpeuh na phiat zo hiam. Midangte makaih na dingin nang le nang na kimakaih masak kul hi.
Ø Nate na deih bangin hong pianloh ciangin na kikemcing zo hiam. A kikemcing zolote kizahtaak lo-in thupi kisalo hi. Kitot kiselna peuh a om ciangin daitaka om theih ding zong kisam hi.
 Ø Nang le nangin ngaihsutna na nei tawm thei hiam. Na khat peuhpeuh na khensat nading pen nangmah in na ngaihsut kul hi. Midangte'n na lungsim hong khel ding pen nang' ngak ding hilo hi.
Ø Hong kigensiat ciangin na thuaksiam hiam. Na phattuam pih hiam. A kiniamkhiat mi in gensiatna khat peuhpeuh panin thu manpha tampi sin thei hi.
Ø Lungkiatnate lametna thakin na laih thei hiam.
Ø Midangte' panpih nopna, mite' zahtaakna le thupi-sim nate na ngah hiam.
Ø Thuneihna aana zat kullo-in midangte na thuhilh thei hiam.
Ø Kilemna na bawl thei hiam. Makai khat in mi kitawng mi kigalte lemtuahin kilemsak ding hi.
Ø Buaina haksatna kawmkal pan in mite'n hong muang veve hiam. Ø Mite'n amau thu le amau thu-a asep nop loh khat uh lungdam tak in na semsak zo hiam.
Ø Hong kilehdonate, hong kilangpannate dokik selo-in na puasiam hiam. Langpanna thuaklo makai omlo hi.
Ø Lawm zon nasiam hiam, na kemcing thei hiam. Makai sep-na ah gualzawhna pen lawm ginate' hang hi zaw hi.
Ø Mite' phatna leh pahtawina tung peuhah na kinga kha hiam. Hong kipaakta-in hong kipaakta takei leh lungkia lo-in ma na nawt veve hiam.
Ø Lenglate' mai khawngah suaktatakin na om thei hiam. Na tungsiahte' mai-ah na lau puppup hiam.
Ø Na mai-a thu hong gente in suaktatakin hong gen ngam uh hiam. Makai khat in mi hehpihin gualhuai ding hi.
Ø Deidan neiloin midang tuamtuam, mi namdang tuamtuamte na thupi sim hiam.
Ø Kammalzatna kidawm hiam. Bang ci bangin na kammal in midangte sukha ding cih ngaihsun kawmsa in na pau hiam.
Ø Kiptak le muanhuai tak in na ding hiam. Huihnunna peuhpeuha hawi duaiduai singkung' liim kibel ngam lo hi.
Ø Mite' mawhna na maisak zo hiam. Hong kiliamsakna liammate nang le nang in na tuunthei hiam.
Ø Nakhat peuhpeuh a hoihlamin na muthei hiam. A sia lama, muh tawntungna le makaihna pen ki-uitui lo hi.
Ø Tupna kician, ngimna kician na neih banah tua mitsuan gigesa-in na ma na zam hiam.
Ø Vaipuak ding khat peuhpeuh lungtaitakin na sang setset hiam. Ø Midangte' khialhna le thanemna pan pilna tampi na sinthei hiam.
Ø Midangte na ut banga zang lo-in amaute na khangtosak zaw hiam.
Ø Midangte' pai na ding gen ziauziau lo-in amaute na makaih zaw hiam.
Ø Midangte gensia lo-in na hanthawn zaw hiam.
Hih a tunga thute tawh kisittel in la, na kipuahphat huaina mun peuhpeuh kipuahpha pah in. Hih sittelna na zawh leh makai hoih suahtheih na dinga kisam tampite na nei khin hi.

Tua ban-ah, lungsim hoihlo, ngaihsutna hoihlo ahi zongin hong lehkaih thei ding a hoihlo khempeuh na suahkhiat ding kisam hi. Na thadah leh miksite etteh in la, tua thadahna paaikhia in. A meidawi mi na hih leh Topa muanna tawh han' ding kisin in. Gensiatna tuamtuamte hanga na hehnate zong paaikhia in. Guallehna a om ciangin paulap tuamtuam na neih leh nei nawn ke'n la, midangte na ngawh le zong ngawh nawn ke'n. Nang thulo thu a salo mi na hih leh kipuahpha in la, nangkiabeka nungta na hih loh lam kiphawk in. Midangte' ngaihsutna hoih nonote na ciin theih kei leh kipuahpha in. Midangte na neu-et khak leh nang zong hong kipimuh tuanlo lel ding hi. Khial ngei kei ning cih lungsim na neih leh na khialkhin hi. Thusim khat peuhpeuh na ipzawh kei leh makai dingin kipan vet ke'n. A tawpna ah, thungetna lo tawh kipan ke'n la Khasiangtho makaih na lo tawh makai dingin kithawi vet ke'n.

Tua ban-ah, mi tampite makai ding khatin ama innkuan a makaih masak kula, a ma innkuan makaih masa lo pi-in midangte makaih ding kipat huailo hi. Ama innkuan a makaih zolo khat in midangte bangci makaih zawh ding a hi hiam. Na hoih tampi a sep hangin a innkuanpihte vantung gam tun kei leh bang lawhtaak ding ahi hiam. Vaan zo kei-in makaih zo kei leh a sepding taktak teng pen a sem zolo ahi hi. A nungthuap ding om kei leh makai gualzo takpi a kici thei ding hiam. Makai khat a dingin nadang khempeuh leh midang khempeuh sangin a innkuan pihte thupi masa zaw hi.

Zakoh innkuan sungah buaina tampi piang hi. Siampi Eli innkuan sung en le hang a tapa te'n biakpiakna sa gugu uh hi. A laak ding zahval uh la-in sawk phapha uh a, Biakinn sunga pai mite zong Siangtho pen mun lutna mai khawngah mawhpih thopthop uh hi. Samuel tate'n zong golhguk ne uha, thumaan lo-in gamta uh hi. Pa hoih lo ahi Eli in kamsang siampi gina mahmah ahi Samuel pantah hi napi, pa hoihlo khat ih pattah ahih manin Samuel zong pa hoihlo khat hong suak hi. Davuih innkuan sung zong namsau kitalawi lo hi. Solomon' tapa in a gam phel 11 suahin aman phel khat bek ngah lailai hi. Zudah kumpite' Pasian kihtakna leh Pasian zahtakna pen a khang a khangin kizom zolo hi. Banghang hiam cih leh pawlkhat 34 te'n Pasian a theih uh hangin a tapate un theilo uh hi. Kihilh lo, kimakaih khollo uh hikha ding hi.

I gamsung khawdak le hang makai hoih mahmah pawlkhat in a innkuan uh ukzolo vetse uh hi. A kilem lo innkuan, zu ne sa ne innkuan leh Pasian thupi a sa mello innkuan peuh om thei hi. A mawhpaih le a khialsak nuam ihi kei hi. Nasep haulua mahmah uh ahih manin innkuan sung vaan man lo ban-ah innkuanpihte hun pia man lo uh ahih man hi zaw hi. Bangbang hita leh, piangthak makai khat ih sepding thupi pen in a mah ngiat leh a innkuan pihte a makaih ding ahi hi. Khamina, Pasian zahtaakna, pilna le gualzawhna pen innsung pan kipan hi.

Makai hoih tampi in a innkuan sunguh vaan zolo uh ahih manin a zumhuai le a lungkham huai simsim thu tampi piangthei hi. Hi bangin makai khat ih innsung ginalo thei ahih manin Pawlu in: Makai pa in ama innkuan sung vaan zo dinga, a tate in a thu mang ding uh hi. Mikhat peuh in ama innkuan a uk zawh kei leh Pasian pawlpi bangci uk zawh ding ahi hiam, na ci hi (Tim masa 3:4-5). Innkuan uk icih ciangin makaih zawhna leh thuneih zawhna a gen nuam zaw ihi hi. Tua ahih manin makai dinga Pasian teel mi, makaihna Khasiangtho letsong a pungsak mi in a mimal bek hilo-in a innkuan ukzo masa ding hi. Tua hi leh piangthak makai a suakkhin hipah hi. A tangzai zawk semsem ding bek a kisam lai hi lel hi.

Endnotes

1) Sudducee-te pen Pharisee-te sangin tawmzaw mah tase leh siampi nasep sem uh ahih manin kumpi vai ah thunei zaw uh hi. Upna peng nei uha, Mawsi thukham a kici Laisiangtho bu masa 5-teng lianbekmah um uh hi. Pasian in leitung pianma-a hong telkholhna, vangtung mi, kha ahi zongin a kisia theilo i kha nuntakna leh thawhkikna cihte um peuhmah lo uh hi. AD 70 a Jerusalem biakinnpi a kisuksiat a kipan Sudducee-te leh Pharisee-te beimang uh hi. Pharisee om lai sunsun in Pharisee cih min pua nawnlo uha, Rabbi cih min pua zaw uh hi.

2) Adoniram Judson pen August 9, 1788 kumin Malden, Massachusetts ah suaka Kawlgam ah tuiphum upna nei-a, lungdamna thugen masa pen leh Americate' missionary masa pen ahi hi. February 1812 kumin Ann Hasseltine (Nancy) tawh kiteng hi. Tua zawh kalnih khit ciang gammial nasem dingin hong kipankhia uh hi. Lamkalah Laisiangtho a sinbeh leh tui kiphum pen tui sunga phum teekteek ding hi, cih hong mukhia uh ahih manin Serampore-a William Carey tawh nasem khawm William Ward in tuiphumna pia hi. July 13, 1813 ni-in Yangon hongtung uh hi. 1819 ciangin Maung Naw kici kum 35 a pha khat Tapidaw hong suaka, 1822 ciangin piangthak mi 18 pha hi. 1826 kumin a zi Nancy si ahih manin 1834 kum ciangin Sarah Boardman tenpih hi. Sarah pen 1845 kumin a gam uah zato kilak dinga a ciahkik laitak un lamkalah si leuleu hi. 1846 kum ciangin Emily Chubbock kici laigelh siam khat hong tenpih leuleu hi. April 12, 1850 kumin tuipi tunga huihsiangtho dik dinga pai Judson in tuipi tung pan leitung nusia hi.

3) Saint Francis of Assisi pen September 26, 1181 in suaka October 3, 1226 in si hi. Roman Catholic pana khangkhia hi napi, a nung lam ciangin Franciscans kicite makai pipa hong suak hi. Tapidaw taangthu ah a khami pen khata kiciamteh hi-a, Italy mi hi-in zawnna ngauna leh a tuamtuamte'n Pasian na a sep ding khaktan zolo hi. 1212 kumin Syria gamah Pasian nasep kipan hi. Muslim-te pen muhdah ding hilo-a itna tawh zawh ding hi, ci viuveu hi. Syria ah vialnih bang a pai hangin mazang mello ahih manin 1219 kumin a thum veina pai leuleu-a tua petpet teh bel Egypt gam makai Sultan' mai nangawn ah Pasian thu genkha hi. Ama hangin mi tampi in Muslimte it uh hi.


4) Hudson Taylor pen China Inland Mission a phuankhia pa ahi hi. May 21, 1832 in Barnsley, England ah suaka, June 1849 in piangthak hi. September 19, 1853 in Sengam ah Pasian nasem dingin hong kuankhia hi. January 20, 1858 in Maria J. Dyer tawh kiteengin Pasian na semkhawm uh hi. Sengam ah kum 51 sung nasema, sangmang 800 tawh semkhawm hi. Sang 125 phuta, tua sangte panin mi 18,000 bang piangthak hi. Pasian nasepna phual 300 bang nei-a, sangmang nasemte banah sen mi 500 bang tawh semkhawm lai hi. June 3, 1905 in citak taka a na a sepsak Pa Pasian kiangah ciah hi. Tuni dongin amin kilolo lai-a, ama patsa Pasian nasepna zong tangzai takin kizom toto lai hi.

********************************************************************
Laigelhpa Lian Muan Kim in Zomi eLibrary / Laibusaal ading in phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Makai Suakthei Mite. Agelh - Lian Muan Kim Description: Rating: 5 Reviewed By: Cinpu Zomi
Scroll to Top