728x90 AdSpace

Hot
Menu
Zon-ol na Donate

Latest News

NA PA KUA. Rev Khoi Lam Thang

NA PA KUA
Rev Khoi Lam Thang
General Secretary, The Bible Society of Myanmar

Kum simin June kha nipi thumna pen “PATE' NI” in kiciamteh hi. Hih ni hong tun sim-in Pate zahtakna kipia a, Pate' thupina kigen den hi. Tua bangin Pate tawh kisai thute i gen hun in “NA PA KUA” cih thu kikum leeng ut ing.                                        
“PA” i cih kuate:
Pa i cih pen zinei, tanei, papi sate ahi hi. Ahi zongin, zi le ta nei khin napi “Pa” a cing zo lo pasal pawl khat om thei hi. Tua mah bangin zi le ta nei nai lo pi-in “Pa” lungsim a nei mi muanhuai tampi om thei hi. Zi na neih nai loh hangin a picing “Pa” lungsim neih sawm in. Tua bang mite Pa muanhuai suak uh hi.

Leitung khuahun in hong talkaih ahih manin, Zomi pate gamdang kipai henhan hi. Kum 10 phialphial zi le ta tawh kikhen in i om hi. Tua bangin innkuan tawh kikhen Pa tampi i om mah bangin, inn pan zin khia het lo napi zi le ta tawh a kigamla mahmah “PA” tampi om thei hi. Khatvei papi khat a khe siakmit hek in na sa mahmah hi. A zi-in nitak thapai, lup-hun dong mekmeksak hi. A zingciang a zi-in; “Papi, na khe i mekmek a noptuam na?” a cih leh a papi in, “A natna lam nong meksak nai lohpi” na cihsan hithiat hi.
Pastor nasepna tawh zin le vak siksanin ka manlah mahmah hun tuma kum 20 lai-in ka tanu u bel Niang Sian Lun kum  3 pha  hi. A nau kap, a khemna in nau-oih la khat phuak tawm a,
            “Nau aw kapkap kei aw
            Pa pa vak ee, nu nu om ee” ci hi.
Ka lungsim vakvak lo ahih manin ka tanu nau-oih la in tam veipi hong phawng kikkik hi. Hih bang tunte bulphuah in, “NA PA KUA? cih lungngai ni.                  
1. Na pa kua?
Pa nei lo mihing i om kei hi. Ahih hangin i pa neih dan kibang lo hi. Tua ahih manin Pate ni hong tun ciang,
            Pawl khat ading  angtanna
            Pawl khat ading  maizumna
            Pawl khat ading  lungmuanna
            Pawl khat ading  lunglenna a hi hi.
Leitung Pate bek i lamet tawpna hi leh a hehpihhuai mahmahte ihi ding hi. Leitung pianna i pate zong mihing mah ahi uh hi. Na thei hi, heh thei hi, tawl thei hi, lung tom thei hi.Ni khat ni ciang a si ding hi lai hi. Late 118:8 in,
             “Mite i muan sangin,     
            Pasian muan ding hoih zaw hi”ci hi
I pianna pate paihlet in vantunga PA muan sawm ni. Vantung Pasian’ hong itna leh hong hehpihna a khangkhang in kip hi. Nang tua Pasian PA in na muang nai hiaam?
Pasian thei lo, mawhna sungah a mangthang mawhnei eite’ adingin, Jesuh tatkhiatna hangin Pasian tate cihna i ngah thei hi. Kha Siangtho in Pasian pen, “Pa aw, Pa aw” hong ci sak hi. (Rom 8:14-17, Gal 4:5- 7). Pasian na pa hi a, nang Pasian’ tapa na hihna  Kha Siangtho’ kipsakna tawh na lungmuang nai hiam? Eite Pa taktak in Pasian ahi hi.
Topa Jesuh in nungzuite tungtawnin thunget zia ding hong hilhna ah, Pasian pen Pa aw ci-in hong samsak hi. Tua man in, “Vantunga om ko te’ Pa aw” i ci hi. Topa thungetna i nget ciangin Pasian pen ‘Pa’ taktak a kipsak ihi hi.  Nang na pa kua hiam? ‘Ka pa taktak Pasian hi’ a ci thei kim dingin Topa’n thupha hong pia ta hen!                          
2. A nihna Na Pa Kua:
Na tate in nang ‘Kua hi’ hong ci ding hiam? Na zi na tate in nang hong et ciangi bang mel a mu diam? Na ‘maipuak’ ah na ‘hihna’ tuang hi.
Khat vei Youth-Camp khatah zu nene, a gilo mahmah khangno khat hong kikhel hi. Siapa tawh thu hong kikumkum in lumgnopna ngah a, vantung gam thu khawng kikum uh hi. Khangnopa in   “Siapa! tua ahih leh, vangam-ah ka pa a om tam?” ci-in a dot leh, siapa in zong, “Om ee! Vangam-ah  it  teng ngaih teng kim ding a, nuam mahmah ding hi” na ci hi. Tangvalpa in zong, “Siapa, tua ahih leh kei vangam tung nuam keng, ka pa a om ding leh ut keng” ci hi. ‘PA’ hi napi tate in a kihtak om thei hi. Nang koi bang na hi hiam? Noah in lengngah zu a kham manin a tate pawlkhat in samsiatna ngah hi. Amah le amah kikem zo lo liang dingin na om lo hi leh, leitung mi khempeuhin thupha sang ding hi hang. Pa a ginat loh manin Tate’n gentheih a thuak ding Pasian in hong awi lo hi.
Khat vei papi khatin a zi a tate theih lohin zu dawn sim thei zel hi. Zingsang khat tho khiankhian in zu a va dawn leh, a tapa kum 7 pha pan a vak belbel  khat  a pa’ omna zu sai hong tung velval mawk hi. A pa in maizum le lamdangsak thuah in a tapa kiangah, “Hih lai-ah kua’n hong paipih puahmah a hia?” a cih leh a tapa in; “Pa aw, kua mah in hong paipih kei, na khekhap kong zuih leh hih lai hong tung hing” na ci hi. Pa picing lote a dingin,
             “Na hilhhilh teng na hilh loh;
               Na hilh loh teng na hilhhilh’’ hi thei hi.
Na tate in’maitang hong et ciang,
              Pasian a it mahmah Pa mel musak in.
             Thupha a piapia Pa musak in.
             Tate a lungmuangsak Pa musak in.
             A lungduai Pa musak in.
             Zuau gen lo Pa musak in.
            Tate a it mahmah Pa musak in.
Na tapa in na leisak zawh loh ding Mawtaw hoih mahmah khat hong ngen niloh leh na bangci dawn diam?
‘Pa’ khat in, “Tua bang thute ka zakna ah gen nawn ke’n. Lei zo kei ni. Sum nei khang! Nong ngetnget lai leh a na taw hong sat ding ka hi”, ci hi.
Adang ‘Pa’ khat in, “Tua bang pipi ei lei zawh ding hi lo pi, ahih hang deih takpi na hih leh Pasian kiangah ngen ni maw, i Pasian hau hi lo maw! Kisam a sak leh hong pia ding ai ve! Na khedap deih zong thu i nget leh Pasian in hong pia a, i leizo ve mate” ci hi.
“Pa aw,” ci a hong sap a pa, nang hangin, na tate in van a Pasian a muan lawh leh ‘Pa man pha’ na hi hi. Koi ci bang ‘Pa’ na hi hiam?           
3. A thumna NA PA KUA?
Pate hihna tate dinmun pan gen leuleu ni. Na pa pen lai thei lo, a zawng, a hawmthawh huai mahmah khat ahi phial zongin zahtak inla, thupi sim in. Amah na pianna ‘na pa’ ahi hi. Pasian in a tate tungah ‘thu nei’ dingin vang a piak ahi hi. Nu le pa’ thupha a luahte hampha mahmah uh a, nu le pa thupha a sanglote hamsia-in, lawhcinna nei ngei lo uh hi. Pate i thupi sim leh thupha in hong nung zuih pah liahliah dinga, Pate i simmawh leh gentheih liangvaihna in hong sulzuih ngekngek ding hi. Tua milim bia i cihte in paunak nei uh a, “Nu le pa khitui malkhat, taten zawn lawh khangkhat”, ci tanghial uh hi. Nu le pate khitui luangsak kei ni. Khasiasak kei ni. Lungdamsak ni. Lungkimsak ni.
Lawki dawi bia i cih pu le pate in, “Pusha” ci-in pu le pate kha a lung kimsak uh hi. I pu i pate-in  “nu le  pa’ awi loh nahlawh pek lo hi” ci-in na kithuhilh uh hi. ‘Nahlawh pek lo’ cih pen “Nuntakna ki-songsawilawi” cih na hi. Nu le pa na simmawh khak leh a cizet huai hamsiatna nang tungah hong tung ding hi. Paunak sungah “A nu le a pa a tek ciangin a samsia mi-in khuazing sunga meivak kisumit bang ding hi” ci hi. Khua zin zawh ciang meivak kisumit lailai leh nuntakna khua zingin vaisah mahmah ding hi. “A pa a simmawh mipa, A nu’ thu a mang nuam lo mipa, Va-ak in a mittang khelsakin, musane te-in a sa ne ding uh hi (Paunak 30:17). Lipkhap huai mahmah hi.
Milim bia i cih Buddhist-te in nu le pate pen pasian nam khat in bia uh hi. A nungta Pasian a biate in milim biate sangin i niam ding mai zum huai hi. Nu le pa zahtakna pen  “Nampi lungsim” ahi hi.
A nungta Pasian’ kammal Lai Siangtho ei a dingin kicing hi. Pu le pate paunak, milim biate paunak sangin zong kicing zaw hi. Muanhuai hi.Thu man hi. Paikhiatna 20 sunga thukham (10) thu Efesa 6  sungah kimukik thei hi. Nu le pa zahtakna in Pasian thupiak lian khai hi a, Khrisian ngeina hoih ahi hi. Khapna thu tawh kizom pai a, thu khempeuh hong hoihin na khansau ding hi. Nah lawh hong pek ding hi. Sepna peuhah lawh cing ding hi.
Tua a hih manin kum khat khat vei Pate’ ni a bawlte hi lo-in a khangkhang a thupha sang minamte, Pate a it, Pate a pahtawi tawntung minamte hi dingin Pasian in hong siam ta hen.
U te naute!
“Van tunga om kote’ pa aw, …” a ci thei ding in Kha Siangtho-in a thakin i lungsim ah hong hopih hen! Van a pa’ hangin a lungmuang thu um mite hih sawm ni. Pate in tate’ ading limpha suakin, Pasian kiang a tunpih Pate i suah na’ng thugen ni. Van thupha le lei thupha a kop-in i san nang pianna Pa tung pan thupha dawh siam ni. Na pa kua a hiam?

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: NA PA KUA. Rev Khoi Lam Thang Description: Rating: 5 Reviewed By: Cinpu Zomi
Scroll to Top