728x90 AdSpace

Hot
Menu
Zon-ol na Donate

Latest News

ZIPIL. Agelh - GSPau

ZIPIL
Agelh - GSPau
 
Photo : Nu Mannote nuta teng...

1. A pasal' ukna mang hi

Numei' thuneihna bangkua sung leh pawlpi sung cikmah hunin nuam ngeilo hi. Bang hang hiam cih leh Pasian in numeite pen thunei lutang dingin a bawl hilo a, pasalte ahuh dingin a kibawl hi zaw hi.(Pian 2:18 ) Pasal' lutang in Khris ahih mah bangin zite' lutang in a pasal ahi hi. Tua ahih manin zite in na khempeuh ah a pasate ukna a man' ding uh ahi hi. (Efe 5:23,24) Hih pen ei' deihkaih gawp pong hi lo-in Pasian' kammal Lai Siangtho' gen thu ahi hi.


Khatvei England kumpinu Queen Victoria, a pasal Prince Albert tawh kikamtam kha uh ahih manin nuakin vakkhia vingveng hi. Hong ciah ciangin a pasal in kong na kalh hi. A zi in kongkhak a kiuh ciangin a pasal in theigigepi mahin,"Kua na hia," ci se hi. A ziin,"England kumpinu," ci-in dawngkik a, kong kihon' lo hi. A ngaih zawdeuhinhong kiu leuleu hi. A pasal in,"Kua na hia," a cih leuleu leh a zi in,"England kumpinu," mah cileuleu a, kong kihon' tuan nailo hi. Tawmvei sung hong dai phot a, a den teh a nakgin' mahmahin kongkhak hong kikiu leuleu hi. A pasal in,"Kua na hia,: ci leuleu hi. A zi in,"Keimah na zi hi ing ei, Albert aw," a cih ciangin kongkhak kihon' pan hi.

Zipil in a pasal sangin pilzaw, lian zaw-in kumpinu keek ahi phial zongin a pasal pen ama' lutang mah hisak veve hi. Thu khempeuh ah a pasal' ukna mang den hi.

2. Zipil in a maa khuat hi

Zopaunak ah, "Sumkuang in a lii khuat, numei in a maa khuat" cih khat om a, numei pen sumkuang tawh na genteh hi. Ganhingte pen tui sunga nungta ganhing leh leitunga nungta ganhing ci-in nampi nih pha hi. Sumkuang leuleu tui sung leh leitung ah nungta khawm thei lel hi. Ahi zongin sumkuangte in tuithukna lam vive manawhin a lii khuat zaw uh hi.

Numeite zong sumkuang dan linlian mah ahi hi. A pasal' innkuanpihte, a beh a phungte tawh ki-it, kilemin, maa a khuat nop leh ama' thu hi a, a nunglam vive a paksak nop thapai leh zong ama' thu ahi hi. Zipil in ahih leh a maa khuat den zaw hi. A manawh lamte'n a en zo a, a en zo kei phial zongin itbawl, ngaihbawl den hi. Zopaunak ah,"Numeipil in phung gawm," a cih dan ahi hi. Zihai in ahih leh a nunglam vive paksak den a, a manawhlamte thu-in sim khollo lel hi. A tawpna ah Zopaunak ah "Numeihai in phung khen" a cih dan hong hi thei peuhmah hi.

3. Zipil in a pasal telsiam hi

US President (42) na Bill Clinton numei tawh hong minsiat ciangin leitung bup in kitelsiam lo a, laihawm khempeuh ah mawhsakna vive kisuaksak zihziah hi. Ahi zongin a zi Hilary pen mipil mahmah khat nahi ahih manin ama'n a pasal na telsiam mahmah lel hi. A pasal bangzah takin a mawh phial zongin na maisak pha mahmah lel hi. Tua ahih manin leitung bup in a buaipih phial hang, amau' nupa kikalah buaina neukha beek om lo lel hi.

Zipil in a pasal telsiam den a, maisak den hi. A mawhsak genloh, a mawhna leh a ginatlohnate seelsak den zaw hi. Tua ahih manin midangte in telsiam kei phial taleh amau' nupa kitelsiam uh ahih manin amau nupa kikalah buaina om ngeilo hi.

4. Zipil in a pasal' thanemnate huh den hi

Abigail pen meelhoih leh tei a thuah numeipil khat hi a, a pasal Nabal leuleu pilloh leh kiphatsak a thuah khat ahi hi. David leh a mite in Nabal' tuute limtakin kepsakin, a tuucingte zong huh den uh hi. Tua hi napi David in Nabal tungah kamtai paisakin huhna a va nget ciangin Nabal in na pialo bek tham lo-in na ko gawp dikdek hi. David heh mahmah a, Nabalte innkuan thah sawm hi. Hih thu a zipil Abigail in a zak ciangin letsong tampi tak tawh David kiangah hong pai hi. A maiah hong boksuk a, a apasal' hai gamtatna hangin thumsak hi. Tua ciangin David in a lungsim hong kheelkik hi. Zipil Abigail in a pasal' thanemna huh a, a innkuan bup uh a sih nading panin honkhia hi.(1Sam 25)

Zipil in a pasal thungetna tawh huh den hi. A pasal' thanemnate kawk niloh lo zaw-in huh zaw hi. A siat nading panin keem a, a mindai nading panin zong dal den hi. A pasal' adingin amah vangikpi suak lo zaw-in, a pasal' vangikpite puakpih zaw, dawn zaw h

5. Zipil in a pasal vaang pia hi

Sarah in mi' lakah a pasal Abraham a sap ciangin "topa" ci-in vaang na piaksiam hi.(1Pet 3:6) Hih pen a pil man ahi hi. Zomi nupi pawlkhatte in mi' lak khawngah a pasalte uh pen "Ka mihingpa" khawng peuh kici thei hi. Pawlkhat leuleu in a pasal a zothawh gawpte zipil dan kisa kha dihzen hi. Hih pen i pillah man ahi hi.

Zipil in a pasal vaang pia den hi. Vai khat peuhpeuh ama' thu tawh khensatna pia pahpah lo a, ka pasal hong dong phot lai ning, ci tangtang den hi. Piakkhiatna khatpeuh a neih leh zong ama' min tawh paisak lo-in a pasal' min vive tawh paisak zaw den hi. A tate' mai khawngah a pasal hawmthawhna kamte genkhia ngeilo hi. Leenglate' mai khawngah a pasal thuhilhbawl, phunsan, gensia ngeilo hi. Uliante' zi bang ahih leh zumvai tawh hong hawh leenglaa khatpeuh a om hun ciang, Pastorte' zi bang ahih uh leh zong pawlpi vai tawh hong hawh leengla khatpeuh a om hun ciangin ama'n va kuppih daidai se lo a, a pasal tawh suakta takin kikumsak lel hi. A pasal tungah ngaihsut piaknop khatpeuh a neih leh zong amau gel guak a om hun teh damtakin gen hiathiat a, mi' lak khawngah genkhia zuahzuah lo uh hi.

6. Zipil in a pasal' tungah thuman hi

England gamah George kumpi a khan' lai-in khuapi-uk(Mayor) khat' ii zi pen a meel lah hoihin, zong khuaval pian hi. A pasal khualzin kal ta-in na zehphi thei pahpah hi. Ahi zongin a pasal' maiah bangmah a cilo dan khatin kineih siam a, a pasal lungkimsak zo veve hi. Khatvei a pasal in a khualzinna pan innlam thu zasak khol se lo-in hong bingciah ziau leh a lupna tungah a zi leh a Pastorpa na kino keei uh va tuakkha dihdih hi. Ama'n zong a cih nading thei paklo ahih manin sabuai tunga Pastorpa' Lai Siangthobu hong tawi-in veranda pan hong khuadak a, lam lianpi tunga pai mipite' tungah Pasian' thu gen hi. Mite in lamdang sa-in ahang a dot uh ciangin ama'n,"Pastorpa in kei' sep ding teng na seem ahih manin ken zong ama' sep ding teng a seem hi ing," ci-in dawngkik hi.

Zite pen a kilawm ciang khat kizep, kipuah ding kisam hi. Ahi zongin a hoih bek ciang khat om a, a val lua zong hong hoihlo leuleu hi. Zipil in kizeem, kipuah napi, khuaval lo hi. A pasal' tungah thuman cinten den hi. Mi' muhna leh a pasal' mai bek ah a thuman hi lo-in, mite' muhlohna leh a pasal' omloh hun ciangin zong thuman veve den hi.

7. Zipil in inn sung nuntakna khangto sak hi

Zipil in inn sung nuntakna khangto sak a, zihai in inn sung susia hi.(Pau 14:1)

Innkuan pawlkhat i et ciangin mo hong neih uh-a kipan a innkuan sung uh hong nuam a, a innkuan sung nuntakzia mahmah uh zong hong khangto hi. Nidang sangin hong neeklim zaw uh a, puanhoih, nikhoih zong hong silhzo zaw uh hi. Biakna lamah zong hong thahat zaw uh a, khat leh khat zong hong ki-it zaw uh hi. Nu leh pate mahmah zong hong lungnuam uh ahih manin hong cidamin, hong nosuak keei uh hi. Hih pen mopil, mohoih, zipil, zihoih a neih khak man uh ahi hi.

Innkuan pawlkhat leuleu mo hong neih uh-a kipan a inn sung uh hong kisia hi. A innkuan sung nuntakzia mahmah zong hong kiamsuk zaw hi. Nidang-a ki-it diamdiam pen mo a neih uh-a kipan hong kitawng uh hi. Innkuanin ankuang uumkhawm cihte hong om ngei nawn lo hi. Innluah ding kimlai inn hong tuan uh hi. Hih pen zihai,zihoihlo, mohai. mohoihlo neih khak man ahi hi.

*******************************************************

Sia GSPau in Zomi eLibrary / Laibusaal ading in Phalna hong piak ahi hi. 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZIPIL. Agelh - GSPau Description: Rating: 5 Reviewed By: Cinpu Zomi
Scroll to Top