728x90 AdSpace

Hot
Menu
Zon-ol na Donate

Latest News

Zuapa’ Suunkhua (Father’s Day). - T. Zokhai

Zuapa’ Suunkhua
(Father’s Day)
T. Zokhai
Photos : T. Zokhai Tuun leh Zua.
Zua : Sia Neng Khaw Vungh (Phamsa).

Thumaa:

Zuapa’ Suunkhua-pen Australia leh Gamdangte’ bawl hun kidanghi, banghanghiam cihleh June Kha-pen Australia-ah naakpi-a avot hun hi-a, picnic pai nading, kongpua pial nading naakpi-in haksa baan-ah Australian te’ neihsa tawlngakni (holiday) te-tawh kinaailua ahihman-in sumzuakna-ah sumsinpawl-in September Kha-in khiintoleh vankhotzia naakpi-a kikhaai-ding geelna-tawh September Nipi Masa kizangh-hi. *Father’s Day ahihman-in [te] zanghlo-in Pa’ Ni ahihkeileh “Zuapa’ Suunkhua” kahong zangh-hi, banghanghiam cihleh Ni (Day)-pen khuavaak leh khuaziin kikaal hi-a, lakam-in ‘Suunkhua’ akicihziak ahihi.


Zuapa’ Suunkhua Tongluan

Zuapa’ Suunkhua Tongluan thugui paizia atumdang khat-in kahong suut nuam-hi. Pa’ Ni sim-in pa muakna, pahtawina, phawkna leh phatna kisuut ciat-a, laigelh-siam kidemna mahmahbang-in siam-tawh siamlo-tawh kigelh ngeingai-hi, ahizong-in tu-a kong gelh-pen apaizia hong tumdang ding-hi, banghanghiam cihleh ka’ pa ka-phatphat hang-in mipi’ phattuampih taktakding tam khollo-a, ka’ pa’ tungtaang mipi’ saanna leh kei’ saanna kidang ding-a, kei’ ading apilpen, ahaatpen leh asiampen ahih zenzen hang-in nang’ ading-in bangmahlo-zong hithei lel-hi. Ka’ Pa ka-it mahmah-a, ka-muang mahmah-hi. Meelhoih sa mahmah-in, pil cihtak-in pil kasa-hi. Maanhi! Kei’ ading-in maan mahmah-hi.

2002 April 5 ni-a kipan-in Pasian-in ‘Pa’ dinmun hongpia-a, ‘Pa tutphah’-ah hongtu sak-hi. Keimah-in ‘Pa tutphah’ tung-ah ‘Pa’ hihna bucing leh piicing tak-tawh ‘Pa’ mawhpuakte ka-zozo takpi-hiam ci-in tuni-in 2002 kum leh tu-kikaal ka’ khualzinna tuanglam gaal-in ka-don kiik-hi. Pasian-in tapa masa Tg. Vungh Kim Siing hongpiak laaitak-in anu-in sihpih dektak-a, nai 17 sung genzawhloh natna thuak-in Yangon Sann Pyah Zatopi-ah ki-at-hi. Tua laaitak-in gaaltaai taktak-in Malaysia-ah ka-om laaitak hi-a, phone-zong kiho theilo (ki-tawta-simsim ahihman-in phone-nei lawmte’ kiang-ah ngen ngamlo, amaulah ‘na-hopih nuam-hia?’ hong cilo), bang acici tammaw ci-in Pasian hopihden cihciang-a aki-om ahihi.

Malaysia gaaltaai peemtate huhna phualpi-ah maaituahthudotna-pen 2002 February 18 ni-in Swedish: Elisabeth-tawh ka-nei kha-a, ka’ taangthu hongdot suksuk kawm-in, “Na’ ta masa’ suah-a nang omthei loding” ci-in akhitui hongluang kelhkelh-hi. Ka-kipasalsak mahmah hang-in ka’ awmpi bingcip-a, ka’ mittang-ah tuisik-tawh ahong luankhiat loh nading-in ka-iip tentan-hi, banghanghiam cihleh akineihthei namte ka’ hihlohman ahihi. Maailam vaaiding akician lametna omlo, bangtan sawtding kithei khollo, cikciang angkawi ngaih-tawh dawnbang tuahding kigen theilo dinmun-ah suun-in zaan-in lungnop omlo ahihman-in anini-in ka-hingkiam suksuk-a, thabei dikdek-in guhbek-tawh ka-omhi.

Gaaltaai bukna vaaisaina-a kampheen-a a-om Zohaam awkaih Sia Khuppi te’ belhna Kepong - Wangsa Permai: Pusat Revival Mission Church beel-in ka-om-a, tua laai-ah guitar tum-in biakpiakna la-makaih thei-in, Sia Khuppi leh Sia Pum Za Cin (tu-in anihtuak-uh’n Norway-ah teeng-uh) leh John Khai, Pa David Haang te-tawh biakinn-ah ka-om uhhi. Tua hunsung-in ka’ sanggampa Tg. Vungh Son Thang (tu-in Norway-ah teeng)-in nasep ngah-in khasum asaan masakpen lakpan-in sehsuah RM65 hongpia-a, ama’ muhna-ah ka’ khitui aluanloh hang-in lungdamna luankhi luang-hi. Bangmah kitaang theilo-in Senior Pastor David Koh-in khatveivei kei’ ading sum-peuh hong khonsak-a, akinaamtaak kahihi.

April Kha hongtun ciang-in diipkuatna leh patauhna lungziinna-pen kuama’ theihpih khollo-ih naakpi-in khang-a, ahizong-in Pasian’ thu bekmah lungngai-in lungsim acinat loh nading Lai Siangtho leh late-ah ka’ hun ka-zangh den-hi. Laikhaak-zong speed-post kizangh zolo ahihman-in kha-khat kiimkiim-mah sawt-hi. Nau-pen numeiding pasalding ki-ensak zolo ahihang-in pasal ahihding ka’ theihcian khitsa ahihi, banghanghiam cihleh Zomi khat ka’ hihna-tawh ka’ zaalmang-ah tempi hoih mahmah-khat hong kipia ahihman-in “ka’ ta masa pasal hiding” cih akician leh amuang kingkeng kahihi. Ahitazong-in thukizaakna ahaksat ziak-in nausuah naai tading thei gige, bangmah kiza lo-in ka-omhi.


Suun-khat, 2002 May 7 ni-in lawmte vaakkhia-mang uh-a, keiguakbek biakinn sung-ah laphuak-in guitar ka-tum ka-cim ciang-in innnuai tuaksuk-in mailbox ka-etleh,  “Siing Za Khai C/O Ps Chin, ..” ci-a akigelh Kawlgam lai-ip khat nana-om ahihman-in diip-hum kawmsa-in ka-la khiankhia-a, biakinn sung-ah luut-in lai-ip ka-pheen khiankhian-hi. Ngaihno’ thelnahleeng hi-a, “bangthu ahitam, nausuak lemmaw, dammaw, damlo-maw, pumpi kim-a suakmaw, kisapna nei-maw…” cih-a kipan dotna zatam-tawh damdam-in ka-sim suk-hi. Laikhil nihna-ah, “…cidam-in April 5 ni-in nau pasalno nei-hang,..” acih ka-sim phet-in azom simsuk zo nawnlo-in, ka’ lungdamna, nuamna leh khasiatna te-in ka’ lungtang tuihual bang-in hongtuum-a, naakpi-in ka-kap damdam-hi. Tapa hong kipia ahihman-in genzawhloh-in ka-lungdam mahmah-a, ngaihno nausuak nangawn agei-ah thapia ding-a om theilo ka’ hihna-in hong khasia-sak ahihman-in nuamna leh khasiatna luankhi akikim-in luang-hi.

‘Pa’ hita, ahizong-in ‘pa’ hihna-tawh meel kimu-a aanglaai paaibang pom theilo, sangbang kino theilo, tong kisaang theilo dinmun-ah a-om taang ka’ sinlaai-ah lunghihmawhna huihpi naakpi-in nung-a, khalauna-in tuihual bang-in hongvaat ngeekngeek-hi. Naseem thei-in phone khat kilei leh-a, sum-zong peek-khat peek-nih kikhaak beekleh ahiding telcian mahleng keimahmah si dekdek-in pumpi thazawngkhaal lua-in an nangawn ne zolo, HT Bawngnawi bekbek themthem-a adawn ‘pa’ ading-in naakpi-in laainat-huai dinmun-ah ka-om-hi. Sr Ps David Koh bang-in AIDS hong muangmawh-in Selayang Zatopi-ah sisan hong veelpih-a, ahizong-in natna lungno limlim kimu lo-in ka-gumthuak keeikaai-hi.

Thazawngkhaal-in sum thalawh peuhmah ka-neihloh hang-in ‘Pa’ ka-hihna kician tak-in ka-nungta sak-a, tangvaal gamtat khempeuh ka-nusia pahhi. Nungak tangvaal lamsang paaikhia ka-hih man-in khenkhatte bang-in hong hawmthawh leh hong gimneih simmai uhhi. Ka’ pate gual papite nangawn’ maai-ah papi ka’ hihna piicingtak-in lakgiap-zeel ka-hih man-in vuak nangawn thuakdek liang-in ka-omhi. ‘Pa’ ka’ hihna kiplet-in ka’ ziilehta’ kiang-ah ahuh apanpih ding-a ka’ om theihloh man-in Pasian’ khut-ah ka-aap tawntung-a, ziing-in nitaak-in Pasian hopihna-tawh ‘Pa’ ka’ hihna mawhpuak masuan zompah ciatciat-in, mite’ thuciin leh paunaak tepawl kei’ tung-ah hongtu (affect) ngei lo-hi.

Hun hongpai tozeel-in, themcik kaci hong nopzawk ciang-in ziilehta ngaihsun ngeungau mah-in nasep ka-kisin giap-hi, ahizong-in nitaak nihna takciang-in ka’ tha bei vingveng-a, ka’ khuukte liing-in, ka’ khua-ulneel suak-a, puuk ding-in ka-om ciang-in ka’ boss-pa gen-in ka-ciahhi. Piang vetlo-in, lem vetlo-hi. 2002 May 24 ni-in lawmpa-khat UNHCR paipih ding-in kisa-in passport-maan kizaihna pan-in hong kiman tadihdih-a, Gombak Lockup-ah, Lengeng Camp-ah, Tana Mera Camp-ah, Golok-ah, tua-ah kha-4 dektak sawt-in Kuala Lumpur ka-tung kiik-hi. Sum thalawh gen malak-ah matlehheen-teng kituak laailaai-a, angkawi ngaih leh ka’ vondeih’ ading khitui ahunhun-in luang den-hi.

Gamgi – Galok-ah ka’ omsung Pasian-in tha-thak hongguan ahihman-in kaci hongdam mahmah-a, October kha KL tungto-in UNHCR zuanpah, tua khitteh Ampang-a mawtaw silna khat-ah nasep ka-kipan thei-hi. Tua hun ciang-in Siemen mobile phone khat nei-in, angkawi ngaih-tawh tong kisaang thei-in nasep-zong honglem thei-a, angkawi leh vondeih Malaysia-ah sapding ka-kipanhi. 2003 March 15 ni-a kiho-ding, amau hongpai pahding ci-a tongciam kimlaai March 12 ni-in Immigration te-in hong buluak uhhi, banghanghiam cihleh ka’ boss-pa uh’n meisum leh tuisum pia nuamlo ahihman hi-a, kosong case bek hilo, criminal case hong puasak miikmeek-uh ahihman-in bangmah lawhtheih om nawnlo-hi.

Tua ni-a kipan angkawi ngaih-tawh tong kisaang thei nawnlo-in, “bangzahtak-in alung-uh khamding” cih veina-in asuun azaan-in ka’ lungtang ling bang-in hongdo den-a, tua kawm-in saat-nih leh kha-8 hongki tann sawnsawn-hi. Kajang Thong-ah ni-khiap teng khit kha-6 kia-in, saat-nih hong kisaat-a, tua nung-ah Semengyh Depot Camp-ah August 24 ni-in hong kipuak-hi. Tunciil lam-in bangmah kitaang theilo-a, October kha ciang-in lawmte’ huhna mah-tawh ka’ ngaihno-tawh meelmuhloh tong kisaang thei-in, ka’ vondeih-in, “Papa, moh puak,” acih ka-zaak ciang-in ka’ suang lungtang tuisuak-a, camp nunglam tuibuuk sung-ah naubang kap-in ka’ luankhi gialbang kia leuleu-hi.

Mite-in camp hongtun-uh ciang-in ataangpi UNHCR lunggulh peuhmah-in laidalpi ngahkim uh-a, kei ka-hihleh 2004 June kha-in John Yong hongpai-in, “na’ case hongki nolh-hi” hongci ngiau-hi. Ziilehta’ ading suunmang khempeuh leengmang-a, khentatna lianpi-in ka’ lungtang hongzo-hi. Thuakding, doding, phuding cih kiptak-in ka-pomhi. Phone pan-in ka’ angkawi ngaih leh ka’ vondeh thapia-in Pasian’ tung-ah kingakding bekbek thapia-in gaaldo ding-in ka-kipanhi. 2004 August kha ciang-in MSF (tu-a Dr Susheela’ makaih) Clinik hongpai-a, tua-ah ka-paitoh ciang-in amau’ lak-ah Alice Nor akci meelhoih mahmah numei khat-in, “Nang na’ sam leh na’ multe saulua, na-omzawh sawt inteh, I-kiho theidiam?” hongci-hi. Ka’ taangthu-teng hongdong-a, statement bawl ciatciat-hi.

Alice-pen journalist kician mahmah khat nana hi-a, Amnesty International London, SUHAKAM, SUARAM, Hong Kong based Human Rights Commission, UN Convention- Geneva contact teng hongpia-hi. Palikte-in hongmuh ciang-in hong khen guapguap uh-a, nitaak ciang-in camp sung-ah ka’ phone zat uhtawh hong hopih-in tua contact hongpiak teng-ah laigelh ziading honghilh-hi. Camp sung-ah malnutrition akici vitamin bei-a asi mi nih om khinzo-a, UN Clinik mu-nuam mahmah, ahihang-a akiphallo, gamgii ki-buang (kibua) ding uut mahmah, sumgolh neilo-a kiphallo cihkhawng-a kipan panpih kisam hong tam mahmah ahihman-in hihte panpihna-in ka’ zii ka’ tate’ thupha-ding mapanna ci-in kizo sinsen-in immigration uliante leh UNHCR uliante-tawh kimeeltheihding ka-haanciamhi.

Minampih leh namdang khenna, namdeiina peuhmah-tawh mapang lo-in Kawlgam-mivomte nangawn ka-panpih ciatciat-hi, banghanghiam cihleh cimawh huhna-pen Pasian’ deih ahihman-in ka’ ziilehta ka’ don zawhloh-tawh hihbeek seem ning-e ci-a, lungsiangtak-tawh akipan kahihi. Huhding tampi om-a, nasep ki-tatsat cih om ngeilo bilbel-hi. Gamukte leh UNHCR te’ tung-ah lungphona-a kipan acihtham simsim masotna pawlkhat makaih thei-in, Camp anlehtui nangawn alimcii mahmah-tawh hong laihsak dong-uh ka-gamtaang thei-hi. Hih nasep-tawh akisuun-mah apualam ka-tun ciang-inzong ka-seem paisuak-a, sum thalawh nawnlo-in thupha thalawh ka-zomsuak thei-hi. Nuam kasa mahmah-hi, banghanghiam cihleh keima’ thalawhsa sum-tawh ka’ zii ka’ ta’ vaai khempeuh lemzo dekloding, Pasian’ thupha bektawh lemding cih theician-a amapang ka-hihi.
‘Pa’ adang taangpite bang-in seplehbawlna, sum thalawh cihte-tawh mapanglo ka-hihlam hongthei mi khenkhat-in, “Zokhai te-khawng ziilehta nangawn sum khaaklo, naseemlo, thadah, miginalo” hongci uh-a, ahizong-in ka’ zii ka’ tate kei’ huhna sang-in Pasian-in huhleh muangzaw ka-hihman mah-in, ken mi huh-in ka’ zii ka’ tate Pasian ka-huh sak-hi. Hihpen ka’ Pa’ tung pan-a ka’ luahsuk gamh hoih mahmah khat-in kaseh-a, ka-lungdam zawsop-in mite’ siatgennate ka’ cillum-tawh ka-valh zo-hi. Pasian’ maaipha-mah zong-in Malaysia kipawlna pan-a citpiak hong kipia RM 5000, ka’ khan-a ka’ tawi-khaak sumtang atampen nangawn ka’ zii ka’ ta pia lo-in Ama’ Biakinn ding-in khuambul ka-phut laai-hi.

Ka’ tate’ ading-a ‘Pa’ hihna lamsang-ah midang-tawh tuni dongmah ka-kidang mahmah-a, tua kidanna-mah ka’ angtanna ahihi. Innlehlo deihlo ka-hi kei-a, mawtaw hoih nonote adeihlo ka-hi kei-hi, ahizong-in ka’ tate’ tung-ah ka’ piaktheih-pen itna-tawh siamsinna lam-ah pattahna leh keima’ neih thumaanthutak pomkipna, thumaan genna, zuau gending kihtaak theihna cihte ka’ deihsak zah-a aluah theih nading-uh’n innlehlo, mawtaw hoihte lunggulh ngamlo-in, sumlehpaai zonna lam-ah ka’ hun beisak lo-in, siamsinna ka’ hihzawh tantan sin ngiatngiat-in, tua pan-a ka’ ngah thutheihna leh thumuhnate leh Pasian’ thumaanna bulphuh-a tuateng amaute’ gamhluah ding-in ka’ koihsak, ka’ teelsak ahihi.

Thumaanna leh muanhuaina-pen ka’ tate’ gamh lianpen ding-in ka’ deihsakna lian ahihman-in English te’ lak-ah ateeng ka-hih zenzen hang-in English bang-a tate khahzau, a-uut bangbang bawlsak, adeih bangbang pia cihte ka-zangh kei-a, Pasian’ kammal bullet-in ‘ciangduai-tawh na’ ta hilh in, si loding-a, anua agah limci zawtham dinghi’ acih thu-mah kalsuanpih ka-hih man-in leengciil kum 14 apha khin nangawn akuulleh nuai-in, akuulleh ka-hap laai-hi. Ka’ deihsak thute angsung huaihamna-tawh pum thun-gawp tuanlo-in, a-uuk thute-ah ka-tawsawn theihzah-in ka-tawsawn den-a, mihau khenkhatte nangawn-in azuih zawhloh zah-in ka-haanciam pih-a, athu atheih nading-inzong ka-hilh den-hi.

Mite’ tate-tawh akitot ciang-in gum daidai lo-in, mi-tawh kitot limlim ka’ deihloh ahihlam atheih nading-in saat-in ka-thuhilh den-a, sepkhialh aneih ciang-in ateltheih nading-in saat-in ka-thuhilh den-hi. Hunkhat laai-in tua ka’ zia-khat athei-a hong susia-nuam khenkhatte-in atate’ suksiat silsia nangawn ka’ tapa’ hih bang-in hongheek zeel-a, anua ciang-in thei-cian ka-hih man-in ka’ tate hongki lehheek ciang-in ahongheek naupangte-tawh kician tak-in thu ka-hilhkhawm den-hi. Tua ahihman-in ka’ tate-in “tua-in tua hih…” hongci lehzong hoihtak-in dongcian-in ka-hilhcian den-hi. Zuaugenna leh seelsim, sepsim peuhmah ka’ huat mahmahna hilhden-in, akhantawn-a apelhsiang theih nading ka-haanthawn den-hi.

Deihsakna-tawh ka’ tate akhialhna honggen a-omleh ka’ lungdam beklo-in ka’ tate ka-hilh pah-a, sawimuhna-tawh ka’ tate akhial bang-a honggen a-om ciang-in ka-hehsuak mahmah-hi. Ka’ tate hongki pahtawi sak ciang-in ka-angtang mahmah-a, tuabang-a zuau ahilo ahihna maan-tawh aphat omleh tua aphat mite mahmah ka’ itna khang hanhan-hi. Hazaatna leh namdeiina-tawh hongki gensak ciang-in naa ka-sa mahmah-a, ami mahmah-zong ka’ itna akiam pahloh hang-in ka’ suahngalna kiam taktak-hi. Kei’ deihloh thute hong hilhsimsak omleh ka-hehsuak mahmah ding-a, kei’ deih thute hong tawsawnpih omleh ka-lungdam mahmah dinghi. Ama’ tate hilh lo-in, ka’ tate hilhding hongki taaklahlua a-om ciang-in ka-lungdam loding-a, deihsakna-tawh akhialhna honghilhsak omleh ka-lungdam dinghi.

Ka’ tate-in amau’ uukna lamzing khatpeuhpeuh-ah honglawhcin naakleh naakpi-in ka-lungdam ding-a, tuabang uukna lamzing-ah athahaat nading inzong ka’ hihtheihzah-in ka’ tawnsawn den dinghi. Amau’ uuk lohpi kei’ huaihamna ciangbek bulphuh-in akivakloh nate ka-hahsawl ngeikei ding-a, amau’ kivakna banghiam cihzong ka-sitcian tawntung dinghi, banghanghiam cihleh naupang laai-in I’ uukna nangawn banghiam cih kitel khollo-hi. Thumaan genna leh zuauthu pelhna, Khazihmi ngeina leh Zomi ngeina ahihleh a-uuk kei zong-in ka-hilh tawntung dinghi. Hih-in ‘Pa’ ka’ hihna ahaáng thupipen-in keima’ seh ahihi.


Zuapa’ Suunkhua’ ading-in ‘Pa’ hihna-tawh ka’ leel sinthu vondeih zata’n tubang ciinghen!

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zuapa’ Suunkhua (Father’s Day). - T. Zokhai Description: Rating: 5 Reviewed By: Cinpu Zomi
Scroll to Top