728x90 AdSpace

Hot
Menu
Zon-ol na Donate

Latest News

ABIGAIL. A innkuan ki suksiat nading pan a honkhia numei pil. Agelh - Rev. Dr. John Thang Hum (Ph.D) leh Dim Lun Zam

LAI SIANGTHO IN A CIAPTEH NUMEI PIL LEH THAHATTE 
ABIGAIL
A innkuan ki suksiat nading pan
a honkhia numei pil
1 Sam 25:3; 14-42; 27:3;30:5; 2 Sam 2:2; 2 Sam 3:3

 
Agelh -  Rev. Dr. John Thang Hum (Ph.D) leh Dim Lun Zam

                   Hih anuaia  ah i gen ding Abigail pen Lai Siangtho in a gen numei pil te lak ah khat ahihi.
      
            A pianna
       Abigail Maon sehnel gam pan hi a, a nu leh a pa, a innkuan pih dangte ki gen na omlo hi. A min pen “Pa’lungdam na” cihna hi.  Maon mun pen Engedi nisuahna khanglam tai 15 na pawl ah om hi. Amel hoih a thu ngaihsutdan siam leh numei kizen mahmah khat ahihi. Thu agen ciangin ki niamkhiat kammal zangin siang tak, awzol tak leh mite lungsim la thei dingin thu gen thei hi. A nu leh a pa, a inn kuanpihte thu ki genna om lo hi

Pasal neihna
       Abigail tua khua a mihau Nabal tawh kiteng hi. Hih hunlai in hauhna pen ganhing tampi neihna tawh kiteh hi. Nabal in Kalaoh tampi leh keel tulkhat, tuu tulkhat nei in tumul meet nasep leh zuak tawh nungta mi khat ahihi.Kalaoh pen sehnel gam tembaw kici a, khat bek in zong tampi man hi. Hauhna pen Pasian piak in ki ngaihsun a, ki angtan pih mahmah ahihi. Ahi zongin Isrel te sungah mihau tampi tak in thumanlo in zong a hau om a, Pasian phawkkik lo zong om hi.  Abigail in mihau khat tawh a ten khak manin lungnuam hiam, lunggim zaw hiam cih anuai ah i gen ding hi.


            Nabal hai na         
                   Hih a pasal Nabal pen mi lungtom khat, thu sau a ngaihsun khollo khat ahihi. Kumpi Saul pawl ahih zah khat in Pasian’ zia sangin mihing’ zia tawh kalsuan zaw pawl ahihi. A lungtom nam ahihna, a kiten ma in thei khin phial kha ding hi.

                   Hih hun sung pen Saul in David thah ding azon lai tak hi a, David leh a nungzuite gamlak leh suang kuahawm lakah a buk kawikawi hun ahihi. Tua hun sungin hih Nabal te omna zong nawk kha uh hi. Hih hun sungin David pawlte in Nabal ganhingte zong gilo-guta te luh nading pan huut sak hi. Hun khat ciangin Nabal tuumul met ding hong kuan hi. Hih thu David in a zak ciangin Nabal kiangah a mite sawl a, “ (Paisan pawi) bawl na ding a ganhingte ngen sak hi. Hih a kimisak Nabal in, “David na cih uh kuami hiam? Tulai a topa kiangpan a taaimang mi tampi om hi,”na cih san hithiat hi. Tua bang acih na pen Nabal in Saul mi khat ahih man hi.

                   David in hihthu a zakkik ciangin nak heh mahmah a, a galkapte mi 400 sawl in, Nabal avat maai ding gen hi. Tua thuteng Nabal nasemte khatin azi Abigail tungah vapuaksawn hi. Abigail in thakhatthu in anasemte sam in nektheih leh dawn ding tuamtuam tawh David va delh pah vingveng hi. Lampi ah David tawh a kituak ciangin, amai ah bok sukin nakpitak thumna nei in an leh tuilim apuakteng zong pia hi. Abigail in a pasal khialna teng thum-a, kei tungah hong tung zaw hen, ka topa aw, heh kei in, ka pasal hai lua hi, ci-in gen hi.                    .
             
            Nabal haina kigenna
                   Nabal min limlim pen ‘mihai’ cihna ahihi. Samuel 25: 3 na-ah, amathu hi bangin gen hi. ”A ki uk zolo mi leh a gamtatsia khat ahi hi. Ahauhna suangin, mi thusimlo, lungtom, pau phangphang zukham thei, ngawngkhuah khat ahihi,”. Saul nungzui khat ahih manin David haza in langpan in Pasian zahtaklo, leitung nopsakna bek ah kidiah cip mi ahihi.

                   Abigail in a pilna leh a teina tawh, a innkuan bup kithah nading pan in honkhia ahi. “Ka pasal mihai hi; amathu peuhmah thusim ken” ci-in gen hi. Mi pawlkhat in, ‘a pasal simmawh bawl si e, tua bangdan agen’, ci kha ding hi. Hinapi, khat na-ah, Abigail in thuman agen ding hun tungta hi. Kum tampi a thuak pen, tu tatak ciang tuak kha ngawngaw ahihmanin ip theih hinonlo hi. Hih hun pen thuman ipip hun hi nonlo in, genkhiat hun hi ta hi. Tua ban ah ahibang genna tawh a innkuan te hot khiat ding a thupi pen hun ahihi.

            Abigail sunglam leh pualam hoihna aneih te zangh
                   Abigail in a melhoihna bek hilo, kamsiamna, ki niamkhiatna leh a talen, khut siamna te zang hi. Kamsiam pong bek hilo in, kam pauzia ding teel hi Alungsim siangtho ahih manin na khatpeuh sep ding leh sep loh ding khen sat pahpah thei hi. Tua bek thamlo, David pen Pasian in a teel, Judah kumpi ding a kipsak pa ahihna zong gen hi. Tulai pau leeng kamsanna gen kholhna hi a Kha Siangtho kidimna lah khiatna khat hi.

                   Kumpi leh tungsiahte kimuh ding ciangin khuttawi (letsong) ken ding pen mipil te ngaihsut theih khat hi. Ahizong bang keng ding cih pen pilna khat ahi zel hi. Hi hun lianin David mai muhna ding sum leh paai, kham leh ngun te ki zang theilo ding cih thei hi. Lasa siamte kengin amai ah la vasak na in David buaina veng sak lo ding zong thei hi. David a gilkial ding a, a sinso ding, zekai leh hun laplo ding ahihna tel mahmah hi. Tua ahihman manlang takin nektheih dawntheih bawl mengmeng in nawhtai mahmah hi.

            Siatna ding pan suahtakna
                   David kiangah Abigail in ki niamkhiatna tawh a thumna hangin a hehna hong bei hi. Nabal leh a neihsa teng vatmai ding ngaihsutna nei nonlo hi. A tomin gen leeng, Abigail thumna hangin atung ding siatna khempeuh pan Nabal innkuan suakta hi.
                  
            Nabal sihna
                   Abigail in David tawh kimuhna pan a ciah ciangin, Nabal leh a inn ah om mite (nasemte) in pawi na bawl in zukham ankham in, lu mel, taw mel na phawklo uh hi. Abigail in a pasal zukham amuh ciangin thupiang teng bangmah gen lo hi. Hih pen Abigail pilna ahihi.

                   A zing sang kik, Nabal pengnawng na pan a tei ciangin thupiang teng agen leh, Nabal thakhatthu in lungam in pukvat hi. Zato lamte cih dan in lungtang natna ngah vat hi. Tua hun pan ki pan khua phawk nonlo in a nisawm ni in Nabal si hi.
           
            Davi’ zi a suahna
                   David in Nabal sihna leh thu piang teng atheih ciangin Abigail a hehpihtha suak a, a zi ahih ding gen sak hi. Abigail in zong khensat hak salo in David tawh  tawh ki teeng hi. Pasal nungta laipi a, pasal dang ngaihna pen mawhna hi a, pasal si khin a pasal  dang neihna pen mawhna hilo hi. Pasal thukham sungpan suakta khin hi, cih Paul in thukham khut nuai pan suahtakna tua bangin hong gen teh hi (Rom 7:3). Abigail in David tawh, tapa, Chileab nei hi (2 Samuel 3:3; I Khang 3:1).

                   Abigail in aneihsa teng tawh David khut sungah ap hiam? midang tungah pia hiam? cih mi pawl khat lung hi mawhna om hi. Atom in dawng leng, Abigail in aneihsa teng tawh, amah leh a innkuan (nasem) teng David tungah ki aap hi. Abigail in David tawh a kiten khit ciangin a lungnuam in thupha zong ngah zaw tak pi hi. David adingin aneihsa deih gawh a tenpih hilo ahih hang, thupha lianpi hong suak hi.

            Thukhupna
                   Tulai hun in numei khenkhatte in pualam hoihna nei napi, sunglamah mugilna neilo uh hi. Melhoihna zangh na pi un kuamah gum zolo uh hi. Melhoihna ciang lel in ama’ ading bek ki mang thei a, midangte phattuamna pia lo hi. Sunglam bugilna in midang te zong gum thei hi.

                   Paunak ah, “Numei pil in inn lam a, numei hai in ama khut tawh susia hi,” (14:4), ci hi. “Mipil in haksatna ding mukhol in pelh a, mihai in bing phut a, haksatna tuak hi,” (Pau 22:3). Abigial in pasal ding atel khialh hangin Pasian azahtakna leh a pilna zangin a innkuan siatna ding pan in honkhia hi. Hih pen tulai khangthak te (numei leh pasal) a kua ma peuhin theih huai mahmah thu ahihi.

            Dotna

1.    Abigail Pasian it mi khat ahihna bangci ki theih hiam?
2.    Abigail tungah bang ci nam hoihna teng ki mu hiam?
3.    Nabal haina bangci ki lat hiam?
4.    Abigail in bang hun ciangin a pasal haina pulak hiam?
5.    Nang Abigail hi le cin Nabal na tenpih ding hiam? Ahang gen in.
6.    Asia leh apha manlangtak khensat theihna ding bang kisam hiam?
7.    Kam nem in hehna mit sak thei hi, bang hang hiam? (Pau 15:1)
8.    Abigail in David bangci mi hi ding cih gen hiam?

Source :
LAI SIANGTHO IN A CIAPTEH NUMEI PIL LEH THAHATTE (Laibu).

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ABIGAIL. A innkuan ki suksiat nading pan a honkhia numei pil. Agelh - Rev. Dr. John Thang Hum (Ph.D) leh Dim Lun Zam Description: Rating: 5 Reviewed By: Cinpu Zomi
Scroll to Top