728x90 AdSpace

Hot
Menu
Zon-ol na Donate

Latest News

Khangluite’ Kidemna. Agelh - H. Gin En Cin

Khangluite’ Kidemna
Agelh -   H. Gin En Cin

Khangluite galmat, samat, minza aih, tangza aih, gawh le lup, neihle lam in na kidem uh hi. Gal le sa mante hita leh mimza tangza late hita leh a aih kei uh leh a maan lo a ai lohte tawh kikim sak uh hi. Tua hia aa, man takei leh mimatsa ahi zong in, ai aa lawm leh gual avakte minthang sak uh hi. Tua ahih ciang in:
   (a)  A kap a thang tazawm a, A ai aa thang ta zawm aw;
   (b)  A kap in zu leh sa lawh e, A ai lawi bang thang nah e.
naci uh hi. Tua hi aa, man aa a-ai ding mi haksa hi. Inn khatkhat ah samin nei te lu aki suan liapluap hang in, amau matsa hikim lo hi. Amau nekle dawn si-in sa bet ding asawm te sabet na ah akiman peuhpeuh tua a sawmpa mat suak hi. Tua hun ciang in gamsung kuan te inzong kei matsa hi cilo in, asawmpa matding in seh pah uh hi. Gal sawm tezong tua mahbang ahi hi.


Inn
Inn alian theithei neihding kidem uh aa, sihna nopna ah akicing ding acihna un, “ sa-khi no khat imat ciang aa kicing ding” ci-in agol theithei in nalam uh hi. Apa in inn gina alam zawh kei leh atapa in ahoihzaw alam ding hanciam hi. Akhuam pen sawtpi kimang ding in singgil ato theithei sui uh hi. Tua ban ah ei Zogam aa po-lo, guahtui lak aa ato pen, Dol innka dawhding na hanciam uh hi. Dol cialnih bang dawh aa, tuangdung innka cialnih tan apha Dol peekkhat adawh zo te Pasal gina in na ki ngaih sun uh hi. Tua bang aa adawh zo te naming thang sak uh hi. Tua bang aa dawh ding aa, a hanciam pasal khat in la phuak aa:
   (a)  Pa zua sausak khuambang laihna, Zanga pehsik gil bang;
   (b)  Von vang khualna’n ciin tawh ciam ing; Thangnen dolcial hual ing.
Naci hi. Tua zah in ipu te ipa te in tute,tate na khual uh aa, tuhun aa khang eite nangawn in amau dawhsa dol cial, amau lamsa innpi ibeel thei lai hi. Tuazah aa khang tampi manding a dawhzo ding na kidem uh hi. ( Dol cial khat lam-li).

Tui-um Beelsuan
Inn sung vanzat akicing theithei nei a, nophun dah-hun in kuama aa kawmlo a, a kicing neihding na hanciam uh hi. A diakdiak in sumgil ahi taubeel lamsang hahbawl uh hi. Tau bel khap 10, khap 9 pan khap 5 ciang bang a golgol in ciang ngitnget uh hi. Tua zong mimuh ding in pialkhang kiu khawng ah ciang se uh a, inn sung ilutnak leh amau hauhzia kiseh thei pah hi. Tua mah bang in zubeel zong agol pen saibeel pan in kau beeltung dong a golgol in gual ditdet uh hi. Tu leh hei zong tuamah bang in koih uh hi. Inn sung vanzat mi aa kawmpa hih sang in mi a kawmte hih ding na kidem uh hi. Tua ban ah beelte pen mo vanken, mo leina, henta kolpu a om leh tatna, vangil a kizang ahi hi.

Khi-awh Taubuh
Khanglui lai in vangil thupi a kingaihsun khat “khi” ahi hi. Khi lak-ah khibah hoih tak a kitat a kikmei hilhhial te a hoihpen a kigen ahi hi. (Khibah a masa in galleng khi kici-a a tang in bil ah a kibah ciang in “khibah” kici hi.) Tua ban ah simkhi le khi nautang tuamtuam ahi hi. Khibah le khi tampi a ok zote mi thupi in na ngaihsun uh hi. Tua ban-ah sumngo tau bun-in a niksing uh sumngo khawngten in a gak nak uh leh mi cithei a ki ngaihsun pah ahi hi. Tuaban ah Pasalte in khibah hoih khat neih teitei sawm uh hi. Tuapen pasalna lah zong hi a, gal sung ah a kuan uh ciang in galte in that a, a lu alak kei uh leh a innkuanpihte in alu va laksak inla a ngawng a khibah tangpah in, ci-a a cial nading uh ahi hi. Hih khite zong mo leina, mo ken, henta kolpu a om leh tatna, sal tatna le dongtuah ciang a zat vangil mah ahi hi.

Pasal’ Van
Pasal van ahi- thau, teipi, namsau le lum-te neihding na hanciam uh hi. Teipi le namsau mikim in na nei zo zawdiak aa, lum ahih leh pasal gal siamte in na nei uh hi. Thau pen sum nei gal le sa uukte in na nei zawdiak uh hi. Thau nei-te kipi et in ki zahtak a, muinam zong ne zawdiak uh ahih man-in ki-eng hi. ( Khangluite hunlai-a thau namnih na om a “ Angkilik” a cih uh England te bawl le “Holan”, acih uh Holland-te bawl hi a, a nih in siknang (sikduai) tawh kibawl ahi hi.) Tua khit I khantoh zawk ciang in thaumam, thau ka hong om ta hi. Kumpite in ei le ei kihut nading, innsa gilo, gamsa gilo pan a kidal nading in mi a pahtak te uh pahtawina in thau pia thei zel uh hi. Tua banga thau ngahpa in la phuak a:
   (a)  Zangkhen kawlciang ziata ka tawi, Ka min in zangtual ban
   (b)  Vaimang te’n pak bang hongtawi na, Tun aw, lia le tang bang
naci hi. Thau pen pasal picing khat ading in lawm hoih pen le vangil khat ahih man-in ipu ipa te in a neihzawh nading un na hanciam uh hi. A nei zote in ahoih theithei a nam tuamtuam lawng tampi neihding na kidem uh hi.

Tumtheih
Nop hun dah hun-in kua ma inn ah kawmkul lo-in tumtheih a kisam bangbang amau innsung pan a lak khiat ziau pen khangluite kidemna khat ahi hi. Tua ahih man-in pasal a kisa ngelte in zam a aw kihual a ngaih theithei, a aw luang theithei 3 bang, tua zamte aw tawh a aw kihual khuang hoih mahmah khat, sialki ngaihkhat, khuado hun le a tongte sih ciang a kitum dak bu, khuado ciang a tuate tawh kituah daktal hih teng neih ding hanciam uh hi. Khaudona mun ‘lawmte’ bang in hih teng a neih teitei ding uh hanciam uh hi.  ( Hih a tung a teng a neih uh leh tu hun a Stage show a om ciang a tum theih namkim a cing tawh kibang ahi hi,)

Hih inn le lo, tui-um belsuan, khi-awh taubuh, pasal van le tumtheih-te a neite a nuntak lai-in “Go” kici a pasal kisa theite in kisialhna in nei uh hi. Ahih zong in a sih khit uh ciang in tuate a neite sigam khin ahih man-in “Gamh” kici hi.

Lokhawh Singpuak
I pu ipa te sum muhna leitang pan a piang an lo buang omlo hi. Deih khatpeuh aneih uh ciang in an tawh khek uh hi. Beel khawng seng khawng lawh le ciang khawng a kilei uh ciang in an a dim tua zah ci-in a lei pen uh nateh uh hi. Tua hi a na khempeuh an tawh khek ding ahih man-in lo khawh na hanciam uh hi. Lo khawh kidem nading in aih zah ding ciangtan uh hi. Tang hileh seu 100( seu khat bung 3) ciangin ki-ai a tangza ai na ci uh hi. Vaimim ahih leh pasal puak khat bawk sawm, pasal puak 100 ( bawk 1000) khat-in ciang tan uh a mim za ai na ci uh hi.

Hih aki ciangtan zah pian nading in lo zapi khawh kul hi. Tua ahih man-in zang nsuah sim-in lo kuan uh a, ansing puak hun ding tuam omlo ahih man-in numeite in vailam sing pua in, pasalte in a tawn in pua-in vai ciah khawm uh hi. Nupa ki lungtuak nasem khawmte kumtui hoih kum in hau lo cih bang om ngei lo hi. Lo zapi kho khat in lui pan-a a-pat mual dong hial in la phuak a:
   (a)  Ka khua lui luang pan pan ing, Zolei mual ah hial ing;
   (b)  Zolei mual ah hial ing, Tangbem kul ah sia’ng,
naci hi. Mim aih tang aih ciang in lawi, sial, keel, vok a kipan kheli nei khat peuhpeuh in ki-ai thei hi. A ai-te neih tawh kizui-in ni nga ni guk sung bang ki-ai thei hi. Mim aih tang aih min selna-in zunung zong kici hi.

Samat Galmat
Saipi zangsial sawm a gamsung a gamvak nuam mahmah ahih man-in ulian uneu cih omlo in sa mat-in na kidem uh hi. Sa a mat peuhpeuh a lu-guh suang in sa lian sa neu a matzia uh tawh a pasalna uh kimu thei pah hi. Vom lu tampi a-om leh pasal hangsan ahih lam ki thei hi. Cinghpi lu, sail u, zangsial lu-te a om leh zanggam a sabet sawm zo, mihau khawhsa kham ahih lam kithei pah hi. Sa nautang lu a tam leh thau kap siam, ngalhat-sa betpih galbetpih ding a muanhuai ahih lam kimu thei pah hi. A mi in gina kei phial taleh mi kihtak sahang bang a man om leh kizahtak tuam pah a, amau zong kisa thei tuam uh hi. Sahang man khat in la naphuak a:
   (a)  Khua kim in siambang hong nuih zong, Kei aw milunno hi’ng;
   (b)  Kei aw milunno hi’ng, Kamkei na gial zil ing,
naci hi. Sa lian, sa minnei a mat uh ciang in ai uh a, a aih nak uh leh ciamtehna tuamtuam nei uh hi. Sahang amat leh dialsan, cinghpi amat leh dial vom, sai amat leh dial kang, mim za, tang za a aih leh nangpan kiphan tuate in na ciamteh uh hi. Taute a manpa a sih ciang in guahiangka dawn ah a mat zahzah khai-in hihte a manpa sita hi, cihna-in a kah tang un sih thaulot ciang in tuate lak tata kap se uh hi.

Tua ban ah ak giasawn ci-in akgia bekbek lukhu bangin phan uh a samat galmat ciamtehna in vaphual meipek, sakuh gia, mu khapek sawnsan cih bang in aknelmul lak-ah siat uh hi. Tua akgiasawn pan in zong samat galmat kithei pah hi. Akgiasawn lak ah galmat ciamtehna sawnsan ahi hi.

Samat nam teng simna-in ‘sanolh’ cih kammal khat nanei uh hi a, sa mante a sih, aki vui kuan ciang in sa kinolh hi. Sa nolhna ah bilpi-bual, saphu-phu, sazaw-zaw, sakhuh-suai, sazuk-zual, vom-buai, zangsial-sial, sai-sai, cinghpi- vuung, zangsial-sial, vaphual-phual, sennial-nial,saza-za hih bang in sa anolh uh cing in sa uh hi.

Gal mante in teipi bul tung le namsau paii bul ah sawnsan thuah uh hi. Tau bang kithuah teipi le namsau paii I muh leh galman hi, cih kithei pah ahih man-in sihna nopna ah Gal mante in teipi bul tung le namsau paii bul ah sawnsan thuah uh hi. Tua bang kithuah teipi le namsau paii imuh leh gal man hi, cih kithei pah ahih man-in sihna nopna ah namsau lek a, a lam uh ciang in namsau paii kuahkawm sese uh hi. Pasal kisa ngelte tau bang sawnsan kithuah neih ding na kidem uh hi.

Hih bang a galmat, samat aki demna uh ahang khat in: Gal man sa mante asih uh ciangin a gal mat-te uh kha sila in khawi ding uh a, a sa mat-te uh kha amai- ah hawl in pai ding hi ci-in sih khit na ngawn a kimang ding aa a ngaihsut uh ahi hi.

Gawh le Lup
Gawh le lup kideihna khat “Ton” ahi hi. Hih “Ton” cih kam mal pen tonkhawm, lungsim kihual khawm tawntung cihna ahi hi. Nupa te ki-it, ki ngai aa a kiten khit uhleh adam lai uh ahi a, asih khit ciang uh ahi zong in kuama zi, kuama pasal suak theilo ding, cihna khua hualkhawm bang aa kha hualkhawm na hi a, “Kha-hualna” zong kici hi. Hih kha hualna “ton” nupa khat in abawl khit the asi masa, asi nunung aom uhzong in vantung, leitung ah kuama zing ding pasal dang nei thei loding cih ki ciamna ahi hi. Gentehna in pasal tong sa khat a zi asih a zi dang a neih leh, asih ciang in tua a tongsa nupa te lumkhawm hilhial ding a, azi kik in amau khekhuantaw ah lemlo bek tum in lungzuang pi in omden ding hi, ci uh hi. Numei apasal tawh atong sa te zong apasal kik taumah bang hiding hi. Tua ahih man-in zi khat bek, pasal khat bek nei aa, kha hual ding na kidem uh hi.

Ton cihciang in sialtang sun “( sial khatbek aa tong ) in lah kitong thei, “ sialkop go” (sial nih a tong ) in lah kitong thei hi. Sialtang sun in sialkap go aa, sialtal asun kik zo te a sangpen kidem na a zo in ki ngaihsun hi. Tonna sial ago zahzah “song” kici sing ato theithei ( aki ngahzawh leh sial silgil ) abul ah a ka-khat dawh phei sak in, inntual laizang ah ki phut hi. Inn tual aa kiphut pen ton-na sialgawh simna hi a, sa gualgawh simna aki gawh zahzah sial kong gei-ah kiphut in lawisong kici hi. Tonna salu te innsung pi sung kawm tung ah kisuang hi.

Tau tonna song leh gua kui tung mahmah khat kiphut kawm aa, gua tung ah vaphual anntah ci-in ton na sau keuphel in kikhai hi. Song leh gua amuat dong nupa te ki-it na ciapteh na in kiphut khawm hi. Tua bang kiphut khawm song le gua po khawm la phuah uh a:
   (a)  Sumtual a phuigual lumzem aw, Mauki hon-na ka sa lawm aw;
   (b)  Mauki hon-na lah hilo a, Kawi tawh laukha kahualna hi.
   (a)  Kasum tual ah sumsing gil po aa, Simsing po aa, sawmsial in si aa,
   (b)  Kawi tawh laukha kahual na simsing gil aw, Tualmawh hen aw, Zogam tulpaan kai hen,
ci-in la naphuak ngeu ngeu uh hi. A ton uh ciang in hihla te sasa uh a, a tong te angtang mahmah uh hi. ( Tu hun a numei lam, pasal lam kithukim na tawh biakna ngeina kicing tak in kiteng aa, kiteng sak siapa in, “ Pasian gawmte mihing in khenkei ta hen,” ci-a thu a ngetsak tetawh akikim ahi hi.)

Ton Sagawh zai
Pansik ni-in lawi khat, vok tuk3 khat leh vokno khat hih teng nisuah tung in kigo pah hi. Tonna sial pen nitum kuan ciang in kigo pan hi. Khuamial khit zankim ma-in gawh khitna ci-in keel kigo hi. Hih gan te sungpan in sial le keel tulpipa in atulpi in sun aa tualo teng tanu sabawl te in go lel uh hi. A ni nih ni-in u le nau sagual gawh ( ton ciang aa sagawh pih in amau gawhpih bang in sa ava gawh te aton ciang in, aton pa in thuk kik hi.) ding a kikeng te pan-in apu te ahuan sak aki go aa, a ni thum ni ciang in behte aa khempeuh phaitam ah kigo hi. Tang aih tawh a thuah te in a nit hum ni-in tang aih na tawh go khawm pah uh hi. Ton kha adet ciang in, tonsianna-gawh khitna-in ak khat kigo hi. Tua nipen tonpi ni zah in ki thupi sim aa, “lampi” kilam hi. Hih bang aa u le nau tawh sagual kigawh diamdiam aa, a tong te migina mahmah in ki ngaihsun a ton ding hanciam uh hi.

Kideidan Na
A tongte in innka zawl li khung thei aa, atong lote in zawl thum bek khung thei uh hi. A tong sialtal sunte in munphiah tang 9 hen thei aa, sialkop go te in tang 11 hen thei in a tong lo te-in tang 7 bek hen thei hi. Atong te-in misi khuhna puanvom keng thei aa, sialkop go te in puanbu keng thei hi, atong lote in puan kang bek keng thei uh hi. A tong te in biso ( Bizang khutpi leh melai kilhcia-a ki gaktuam) hen thei aa, a tong lo te in hen thei lo hi. Dawipi thoih ciang in sialkop go te in dawi ann piak sabak 11 pia thei, sialtang sunte in bak 9, a tong lote in bak 7 bek pia thei hi. A tong te in innka tem thei aa, atong lote in tem thei lo hi. A tong te asih ciang in innka tung ah phekbuk lamthei aa, atong lote in lam thei lo uh hi. A tong te inn ah innsial la, gamsial la kisa thei aa, a tong lote inn ah la mawkmawk bek kisa hi. A tongte asih ciang in langkhet ni nitak ( sivui niding azan) azan-in kipu suah aa, a zan thapai in kilam in avui ni ding sun niloh in kilam hi. Atong lote avui kuan ciang bek in kipusuah a, nitak lam a “lampi” khat vei bek kilam hi. A tong te zingsang lam in lam pi khat vei nitak lam khat vei mah nihvei lam pi in kilam hi.

Sailkop Gote tungtuanna
Sialkop gote “lampi” ciang in mili in vaphual mei khatciat tot uh a, amau tot vaphual mei ciat tangpah uh hi. Sialkop go te asih ciang in lasak ding teng sakhin aa, sak lohding teng kikhitna saza a kinolh khit ciang in:
   ( a)  Go tuan ing e, go tuan ing, Sawm sial lian go tuan ing,
   (b)  Sai tuan ing e, siatuan ing, Ka lamtual sai tuan ing,
ci-in kisak beh lai hi. Gal amat uh leh hih go tuan la aki sak khit ciang in lasak dingteng asak khit hanlam zuat ding ciang in
   (a)  Kawtei bung leh na deih leh, Gal pa lian sial bang sun in,
   (b)  Nampai sawnsan nadeih leh, Dolai al bang va that in.
ci-in kisa aa tau khit ciang in kivui pan hi. Tau bang in la aki sak ciang in a go te athat a a tangthu a sih ni-in, ki pulak kik tawh kibang hi. Sialkop go te in si masa  asin, angawi, agilpi, a ekthup, atuap, a huai khat, a phuk-ka, a gilkha, taksih, satui hihte ciang khenei a hikeh kuang khe nei-in lui thei a tong lote in lui thei lo hi.

A tongte bek sialzu kitan thei hi. A tonglo te-in ahawh kei ngal leh a tonglo te-in sial-lu tang thei lo uh hi. Tua hun ciang in sa tampi man in a ai zong in tong a, azi tawh kha ahual khawm kei leh alawm agual lakuah maizum huai lai veve hi. Hih bang aa ki deidan na hang in gal le sa man napi a tong lo mikhat in sialzu tang lo ahih man-in la khat kiphauk aa:
   (a)  Sangdeih lal deih ka len lai-in, Gual tawh kim na bawl ing,
   (b)  Kawi tawh lungtup tual dong zun, Ningzu in daibang phel.
na ci hi. Tunna mun a sialzu tang ding a ki kaite angtang mahmah uh hi.

Ton tawh kisai-in sialtang sun a, tua khit teh sial kop go in, khatvei sialtang a sun kik zo nupa te a gina pen in ki ngaihsun aa, tuazom ah sialkop go te hi-in a thumna ah khatvei sialtang sun te ahi hi. Tua hi-a khanglui te a inn vua hawh leng a inntual vuah song kiphut in amau inn kuan gualtung a tuan na uh hong lakpah hi. Hih bang aa akhan lai-un a gawh alup, a thah a mat te-uh, mimza tangza a aih-te uh hang in amin thang bang un asih ciang un adam lai un agual tungtuan nate uh lah nading aki gelsa bang in ki gamta kik ahih man-in aton lai-ua ton zo apai khem peuh in asih ciang in gal uh a, a ton ni-uh leh asih ni-uh amin than na uh kibang hi. Tua ahih man-in sihciang in:
   (a)  Katot kuang aw, thangzawm aw e, Ka hankuang aw, thangzawm aw,
   (b)  Tonkuang leh hankuang thuah ta’ng e, Mual ii hen ah tang na e.
ci-in la phuak uh ahih lasa in hanlam ah kikha ngiamngiam hi.

I Pu I Pa te
Innkip lokip nei in tui-um belsuan, kicing nei a, khi-awh taubuh bun in pasal galvan  bucing tawh khua sa a, nop hun,dah hun in tumtheih kihual tum in, miza tangza ai khawm aa, pasal mat ding zah man in gawh leh lup asang pen hih zong aa nupa kihual khawm te “ ka tonkhuang aw, thangzawm aw, ka han kuang aw, thangzawm aw,” ci-a leitung hun a zang zote, tu hun aa mi nuamsa pen aki gente sang in pasal kicianzaw ahi hi.

Source :
Tedim BEHSBNo.1 Sangpi GOLDEN JUBILEE MAGAZINE 
Laimai 259-265 .

Zomi eLibrary/Laibusaal in Mipi ading deihsakna tawh atei/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Khangluite’ Kidemna. Agelh - H. Gin En Cin Description: Rating: 5 Reviewed By: Cinpu Zomi
Scroll to Top