728x90 AdSpace

Hot
Menu
Zon-ol na Donate

Latest News

Makai Leh Tupna Ngimna . Agelh - Lian Muan Kim

Makai Leh Tupna Ngimna
Agelh - Lian Muan Kim

Mihingte pen tupna ngimna a nei Pasian in tupna ngimna a nei dinga hong bawl ahi hi. Tua ahih manin tupna ngimna a neilo mi a nuntak thaman omlo-a sihna zah mah in dahhuai hi. Khatvei mikhat in Helen Adams Keller kiang ah: Mit khuamuh loh na sangin a poi zaw bang a om zen tam maw, acih vial leh Helen in: Hakgega sa-a khuamuh loh poi zaw hi, na ci ziau hi.

Tupna ngimna a neilo mi-in hakgega sa-a bang mah a mulo tawh kibang hi. Tupna ngimna kician om lo pi in na khat peuhpeuh kikhensat theilo, i hun zong kizangsiam theilo-a i khut sunga om na khat peuhpeuh zong kizeksiam theilo hi. Na tampi kisem nuam mah ta leh matut zawh kinei lo hi. Uuk tampi kinei-a siam kinei lo hi. Lawpna tampi kinei-a kicimtak baih hi. Huih nunna khempeuh ah kipuk duaiduai-a zungkip kikhalo hi. Mi khempeuh kilungkim sak nuam a, a tamzaw in hong hua thei hi.

Tupna Ngimna Neihkul
Tupna ngimna 
I neih kei leh Kikhangto theilo bek
hi lo in,
Kikiamsuk zaw hi.

Mipi a tam zaw in tupna ngimna a neih loh pen phadawm sa ing. Mipi khempeuh pen makai hi zenzen lo hi. Ahi zongin kipawlna tampi, pawlpi tampi leh innkuan tampite in  tupna ngimna i neih loh ciangin bel dahhuai sa ing. Innkuan khat ciat in nisim nek ding dawn ding kizong a, tua teng peuh tawh i hunte beibei hi. Kipawlna tuamtuam leh pawlpi tuamtuamte ah zong tupna ngimna kician om lo ahih manin a ngei mah ngeingei lel a, kum beibei ta leh kilamdanna om ngei mel lo hi. Khantohna om lo bek hi lo in kikiam suksuk lai hi. Tua ahih manin makaite in mipite itna leh veina takpi tawh mailam saupi khual a, mimal a ding bek hilo, mipi phat tuam na dingin tupna ngimna i neih theih ding kisam hi. 

Tua ban-ah, tupna ngimna pen a huampi in kinei thei meimai lo ahih manin ei tupna ciatciat i kiciat sak sitset ding thupi hi. Tua hi a, mimal a ding ahi zongin mipi a ding ahi zongin tupna ngimna na neih na ah tua tupna ngimna pen mipi-a hilo in nang aituam, nang bek ih neih ahih lam na phawk ding zong kisam hi. Banghang hiam cih leh, Pasian in nang hong sepsak nop pen nang mah in nasep ding hi a,  midangte tupna pen nanga hilo in, nang tupna zong midangte-a hi tuan lo hi. Tuampian vilvel ahih manin midangte kiangah na pulaak ciangin zong hong kizahko, hong kinuihsan thei lel kha ding hi. Phamawh kei, tum veve,  ngim veve in. Hong gualzawh pih ding Pasian hi.  

Tupna Ngimna Khat 
Sawltak Pawlu in bang hang in kum 30 val deuh sung in Zawmah gam khempeuh phial ah lungdamna thu taangko zo hiam. Tupna ngimna khat bek a neih hang ahi hi. Philippi 3: 13 ah Pawlu in,
Ka tha khempeuh tawh hih na khat bek ka tum hi; A beisa khempeuh mangngilh in kamai-a om na bek en in ma kazam hi.
ci–in tupna a neih lam kilang takin hong gen hi. Pawlu cih bangin tupna ngimna khat bek i neih ban-ah tua dong i tun mateng mazam a, i tai ding kisam hi. Pawlu in,
Tua kidemna kung dong mah mitsuan ni, Pasian in ei-a dinga hong koihsak na khempeuh a ngahnuamte aw,
ci-in hong zawnlai hi (Phil 3:15). Tupna kician nei-a tua bek mah i mitsuat gige ding leh tua Topa hong koihsak i sepding na khat i zawh ciangin Topa minthang na ding mah ihih sak ding thupi mahmah hi. 

Billy Graham Pasian nasep a kipat cil in tupna khat bek nei a, a lunglut huai na dang tampi om mah ta leh tuate tawh buailo in vakkawn sia sepna bek ah a lungsim pia a, tuabek mah sep in nei hi. Mite in vangtung gam lutna kongkhak a muh na ding uh pen ama tupna hi a, tua bek mah mitsuan gige in nasem hi.

A mel hoih in a tha zong hoih ahih manin Paramount Pictures Corporation in minta (kineihsiam pa) dingin kun uh hi. 1950 kum bei lamin NBC in na sep guan ding, kum khat dollar awn khat pia ding, ci in kun uh hi. Ahi zongin Billy in tuate nial hi. Cialpi a bawlna khat ah mikhat in dong a: Billy aw, hi banga khuapi sung khawngah cialpi na bawl pen sum le paai na deih man hiam, ci in dong hi. Tua leh Billy in a ipsung pan in laidal khat hong lakhia a: Hih laidal pen Hollywood pana hong kikhak hi. Sum tampitak tawh minta sem dinga hong sam uh hi. Sum deih hi leng sum zong ning, ci in dawngkik ziau hi. A tupna ahi Pasian nasep ding bek mah thupi sak a, sum le paai in puksak zo lo hi.

Sum deih hi leng
Sum zong ning…
- Billy Graham

1963 khit deuh in President Lyndon Johnson tawh tui pek khawm uh hi. Tua leh, Lyndon in Billy kiangah: Billy aw, tu-a ka president sep ka mankhit teh president sem dingin mekuang lui ve; kei hong pawlpih khempeuh, nang pawl dingin hong pia ning, ci hi. Ahi zongin Billy in: President pa aw, nang nasep sem thei kei mai ning, cih san hi. Tua leh President Lyndon in: Ka ciamnuihna hi lo ai ve Billy, America lumlet zo takpi ding nai ve, ci in dawngkik hi.

President Richard Nixon in zong Billy pen America tangmi ding leh cabinet ah ama ut bangbang a sem dingin zawn hi. 1952 pat lam in, Texas a mihau mahmah ahi H.L. Hunt in: Billy aw, president sem dingin mekuang na lui peuhmah leh dollar awn guk hong pia ding hing, ci in kam ciam lai hi. America President sep ding pen Pasian sawlna hi lo ahih manin Pasian thugenna leh kikholhkhopna tuam-tuamte lo ngal, gamsung vai tawh buai nuam lo hi.

Tupna ngimna a nei
Makai pen
Na dang tuamtuamte  Hangin
Hoi lo a, 
Ama tupna bek mah Mitsuan in
Tangtak in pai hi.

1966 kum bei kuan lam in Christian University pi khat a kipat na dingin kihanthawn hi. John D. MacArthur in: Billy aw, Christian University khat kipan in la, Graham University ci in. A leitang ding pen acre tul khat a pha Palm Beach Gardens hong pia ing. Kipatcil kum bel dollar awn sawm bei in cin, tua khit teh bel kum nga sung, kum khat in awn 3 ta bei in teh, kei man hong sik ning, ci hi. Tua kipan leh Yale leh Harvard University tawh liangko kikim a, a lam sawm ahi hi. Billy in tawlkhat a ngaihsut khit ciangin Pasian hong sapna hi kei, ci in nial leuleu hi. 

Billy in pilna thupi sa mah mah hi. Wheaton College khawng, Gordon-Conwell Divinity School khawng leh Fuller Theological Seminary khawng bang zong ahih theih zahzah in huh hi. Pilna thupi sa in Sang zong thupi sa hi. Ahi zongin ama tupna leh Pasian sapna ahi vakkawn sia sep ding bek mah ngaihsut in nei a, tua bek mah a tawp dong a tun na dingin han ciam zaw hi. Pasian sawlna tawh kituak a tupna ngimna nei ahih manin a dang tuamtuamte in nawngkai sak zo lo hi. Billy Graham Evangelistic Association mah hoihtak in zomto ahih manin amah tawh nasem khawm nuam mi tampitak hong om veve hi. Tua hiin, tupna ngimna a nei makai pen na dang tuamtuamte hangin hoi lo a, ama tupna bek mah mitsuan in tangtak in pai hi.

Tupna Ngimna bek tawh kikhangto
Tupna ngimna a neilo makai khat pen mite in zuihtak sa lo uh hi. Banghang hiam cih leh tua bang makai khat in tun nading mun kician neilo a huihlaka lengleng na khat peuh tawh kibang lel a hih man hi.

Tupna ngimna icih ciangin a om nailo khat muhkholh- na hi a, upna tawh kibang hi (Heb 11:1). Mipi 600,000 val in bang hangin Mawsi zui uh hiam cihleh Mawsi in a kimu theilo Pasian leh a kimu nailo Canaan gam a muhkholhna hang ahi hi. Elisha nasem pa in a umcih galkap honpite amuh laitak in Elisha in vantung galkap honte na mu hi (Kumpite Nihna 6:15-18). Tua hi-in tupna ngimna a nei, a kimu lo nate a mukhol mite bek mah zuihtak kisa hi.

Lai-atsiam Katherine Anne Porter in: mipi 50% in koi lam zuana pai cih theilo uh a, 40% in a pai nang mun uh a khensat theihloh laitak in 10% bek in koilai ah paiding cih a thei uh hi, ci-in gelh ngei hi. Mipi a tamzaw in tupna neilo uh ahih manin a tun na ding uh mun, a lak thei ding makai kisam uh hi. Tua ahih manin makai khat in mipite a ma tupna musak dinga, tua nungzui-in mipite a kalsuan pih theih pah ding kisam hi. Mipite pen a tunna ding mun uh muhsak ding thupi hi. Banghang hiam cih leh mite in a sinthu uh 89% pen muhna pan hi in, 10% pen zakna pan hi-a 1% pen lawnkhakna leh a nam zakna tuamtuam pan hi ci-in thungaihsun siamte'n gen uh hi.

Mite-in a sinthu uh 89% pen muhna pan ahih manin na paipih nading mun ahi, na tupna na ngimna mu sak lecin lawptakin hong zui ding uh hi. Hong zuih kei ua leh makai na kisak hang makai na hikei a, lampai mikhat na hilel hi. Tua ban-ah, mipite in na tupna, na ngimna mukhin napi hong zuihnop kei ua leh kisitphat mahmah kul ding hi.  Na tupna, na ngimna thupi mah hiam. Pasian minthan nading mah hiam. Mite phattuampih nading hiam. Nang angsung bek a zong na hiam. Khantoh na ding leh phat-tuam na ding omlo pi-in mite-in na nung hong zuilo ding uh hi. 

Tupna ngimna icih in upna tawh kibang hi icih mah bangin a kimu nailo na khat muhkholhna ahi hi. Tua hi-in tupna ngimna na neih ciangin zong mihingte lam pang pan a piang theilo phial ding tawh a kibat hangin tum veve in la, ngim veve in. Hong piang nailo, hong tangtung nailo ahih  ban-ah kua mah in a muhkholh loh hang maha tupna ngimna a kici hi zaw hi.

Khukdina, 
Thunget loh
A phamawh 
Tupna bek  neihtaka,
Tua bang tupna bek in
Pasian min thangsakin
Na nuntakna Hong kilamdangsak
ding hi.

Na Tupna Na Ngimna Lian Sak In 
 Tupna na neih ciangin a baih ziau ding na khatpeuh tum ken la, Pasian in a tuam zek in thupha hong piak kei leh ahi zo ngiatlo ding zaha a lian tupna thupi nei in. Khuk dinga thunget loh a phamawh tupna, na pilna leh na siamna tawh ahi zolo ding tupna, na neihsa na lamsa in a cin zawh loh ding tupna nei in. Tua bang tupna bek neihtaak a, tua bang tupna bek mah in Pasian minthang sak in mi tampi nuam tuam sak ding hi. Tua bang tupna bek mah in na nuntakna hong kilamdang sak dinga, Pasian tawh hong kinai zaw sak ding hi.
America makai pi ahi John Adams in 1774 kum in England kumpi khut sung pan suahtakna ngaha mi nam thak khata kipat ding, cih a gen laitak in ahi theilo phial ding tawh kibang hi. Ahi zongin tua zawh kum nih khit ciangin United States of America hong piangkhia hi.

England makai pi khat ahi William Wilberforce in 1789 kum in numei, pasal leh naupangte kilei a, sal a kikaihna bei sak ding, ci-in kum 8 sung tawntung a hamciam hangin kinial den hi. Ahi zongin tua tupna mah nei tentan in sal khawina peuhmah a bei na ding hanciam ahih manin ama sihma ni 4, 1833 kum in sal khempeuh in suahtakna ngah takpi hi.

College Siapi khangmoi simtham khat in: Kum 50 sungin mite van ah leengthei ta ding hi, acih leh Bishop khat in: Hai navet om kei, vantung mite bek leengthei hi, ci-in dawng hi. Tua Bishop pa min in Wright hi-a a tapa nihte min in Orville leh Wilbur hi a, Wright Unaute ahi uh hi. A muhna uh, a omna uh kibang mah tase leh a tupna uh kibang lo hi. A Pa in kileeng thei ken teh acih laitakin a tate-in kileeng thei ding cih muhkholhna leh tupna ngimna na nei uh hi.

John F. Kennedy in a thugenna khat ah: Kum 10 sung in Khapi tungah America-te tung ding hi, acih pen a haivai phial kampau ahi hi. Bangmah om nai takei leh zong tua bang tupna hong neihna tawh kizui-in a man amuh khak loh hangin America-te 1969 kum in Khapi tung hongtung takpi uh hi. Hihbang makai a neikhate hampha sa mahmah ing.  Makaipa in tupna ngimna nei a mipite'n zong lawptakin zuipah uh hi. Khapi tung tunding kitum vilvel kei leh a kitung tam! Huihlak ah lentheih na ding kitum vilvel kei leh vanleng a om tam! Tupna om kei leh tunna omlo ding hi.

Mi pawlkhatte pilna siamna nei napi uh tupna neilo uh ahih manin bang mah tangcing sem zolo uh hi. Pawlkhatte leuleu pil khollo, siam khollo napi tupna nei tentan uh ahih manin milian, mithupi leh makai hoih khawng hongsuak uh hi. Na khutsung ah bang om cih sangin namit in bang mu-a bang tum na hiam cih thupi zaw hi. 

Na khutsungah
Bang om cih sangin,
Na lungsungah
Bang tum cihpen in
Na nuntakna
Hongsek zaw
Ding hi.

Na Tupna Na Ngimna Bang Hiam 
 Nang tupna nang ngimna bang ahi hiam cih hong theihpih lo hing. Midangte in zong hong theihpih kei kha un teh. Na tupna lian sak in la, sang sak in. Bang mah lo panin van le lei a bawl Pasian muanna tawh na lianpi tum in. Ama minthan na ding bek mah tup in nei in la, thungetna tawh na lampi ding zong in. Khua dak khia in la, kalsuan in. Tua na tupna na tunna dinga kisam pilna, siamna leh sum le paai zongin la, na lawm ding tel in. Topa‘n tupna nei mite mah thupha pia hi.

Tupna nei-a kalsuante a tupna uh tung hi. A tun kei phial ua leh zong tupna neilote leh tupna nei napi tua banga kalsuan lote sangin gamla tung zaw veve uh hi. Na tupna na ngimna bang ahi hiam! 

Topan
Tupna nei mite mah
Thupha pia hi

A zenzen in tupna ngimna na neih nai kei leh neih sawm hamtang in. Nakpi tak in thungen in la, Laisiangtho sim in. Nang sep dinga hong koih sak pen bang ahi hiam, ci in dong in. Kei nong sap leh kong dawng kik dinga, a kiimcip thu lianpite kong gen ding hi, aci i Pa Pasian dong in la,  lungsim takpi tawh Amah zong in. Na mu taktak dinga, hong hopihna na za taktak ding hi.

Tua hi in, Pasian hong piak ahi na tupna na ngimna pen na nuntakna ah a hun hun in:   
    1)      Ngaihsun Kikkik In: Na thanem ciang ahi zongin na thakhauh ciang ahi zongin ngaih sun kikkik in. I guallelh ciangin kimangngilh thei a, i gualzawh ciang in zong kimangngilh thei veve hi. Lungkiat ciangin kimangngilh thei a, lungnop ciangin zong kimangngilh thei veve hi. Na khat peuhpeuh hangin i tupna i ngimna kimangngilh thei pahpah ahih manin ngaihsut kikkik ding thupi hi. Tua in, hong thahat sak den dinga, hong lawpsak in hong gualzo sak ding hi.
    2)      Mimal tungah Pulaak In: Gualzawhna khatkia bek in kingah zo lo ahih manin na tupna na ngimna pen mimal tungah na pulaak ding kisam hi. Na lawm na gual tungah ahi zongin na zi na ta tungah ahi zongin pulaak le cin hong pawlpih ding mi na ngah dinga, gualzawhna lam na manawh ding hi. Mimal tungah na pulaak ciangin na pulaak nate in aituam ngaihsut baih zaw uh a, hong pawlpih ding kician na nei ding hi.  
    3)      Mipi tungah Pulaak In: Mimal tungah na pulaak khit ciangin zong mipi tungah pulaak in la, pulaak kikkik in. Na pulaak masak in hong ki-awlmawh lo kha phial ding hi. Hong zahpih om dinga, hong hanthawn zong om veve ding hi. Ahi zongin na pulaak kikkik ciangin mite in na zaza ding uh a, hong vei pih ding uh hi. Mite in hong thei semsem ding uh a, thu hong ngetpih ding mi kibehlap in lungsim khatha leh sum le paai neih le lam tawh hong panpih ding zong hong om ding hi.  
Endnotes
    1)      Helen Adams Keller pen June 27, 1880 kum in Tuscumbia, Alabama, USA ah suaka, a suah zawh kha 19 a phak ciangin cina lua mahmah ahih manin tua-a kipan a mit leh a bil kizang thei nawnlo hi. Ahih hangin Manglai, French, Latin, German leh Greek laite siam mahmah hi.  Radcliffe College pan 1904 kum in matsang pi tak tawh ong hi. A paaktatte' gelh laibute a bu bupbup in lotngah hi. A piang bangbang a hoihlam in la thei ahih manin cidam lohna tampi kawmkal pan gualzawhna leh pahtawina tampi ngahin mi minthang mahmah khat hong suak hi. June 1, 1968 kum in Easton, Connecticut, USA ah si hi. A khan sungin leitung gam 39 ah khualzin a, America President-te ahi Grover Cleverland pan Lyndon B. Johnson ciang tawh kithei in mi minthang Alexander Graham Bell, Charlie Chaplin leh Mark Twain-te tawh zong kizawl hi.
    2)      Sawltak Pawlu pen Tarsus khua-a piang (Nasemte 9:11) Judah mi (22:3) hi-a Zawma gammi hihna zong a suahlim in nei hi. Hebia lai, Aramaic lai leh Greek lai siam hi (21:40). Greek mi thungaihsun pu Athenodorus a sih A.D 7 kum in Pawlu naupangno ahih manin Zeisu tawh kigual phial kha thei ding hi. Thuciamlui kum 4 sung sinin nal mahmah hi. Kum 10 a phak ciangin Mawsi thukhamte khiatzia leh letzia hong sin leuleu in Siapi Gamaliel khutnuai pan hong khang khia-a Pharisee hong suak hi. Kum 30 val a phak ciangin hong piangthak a (Nasemte 9), lungdamna thu taangko hong kipan hi. Thuciamthak sungah ama gelh bu 13 (a lian 87) om hi. Tuate sung ah Abiahang 21 vei, Isaac 3 vei hel hi. Nasemte leh a laikhakte sungah Mawsi 13 vei, Davuih 8 vei, Isaiah 6 vei leh Adan 7 vei hel hi. Khasiangtho in thu-um mite-a ding na a sepsak dan nam 26 ban-ah Laisiangtho thu, Pasian thu, Zeisu thu, Vantung mite' thu, Mihingte' thu, Mawhna thu, Gupkhiatna thu, Pawlpi thu leh Hongtung ding nate' thu a gen loh omlo hi. Dotna bekbek 250 nei hi.  Thu thupi mahmah 65 bang hoihtak hilhcian hi. Thu gentehna (khaici, ling, bawngnawi, tai kidem mi) tuamtuam pen 134 bang gen hi. Sawlna 390 vei nei hi.  Zawmah kumpi Nero in A.D 68 pawl in ngawngtan hi.
    3)      Billy Graham pen November 7, 1918 ni-in Charlotte, North Carolina ah suak hi. Mizawng innkuan pan khangkhia-a a minthang khollo Mordecai Ham thugenna tungtawn in piangthak hi. 1940 kum ciangin Wheaton College ah sangkah a, a zi ahi Sen gama zato sangmang minthang Dr. L Nelson Bell tanu Ruth tawh kimu kha in August 13, 1943 ni-in kiteeng uh hi. Tanu 3 leh tapa 2 nei uh hi. Billy pen 1949 kuma Los Angeles khua ah cialpi a bawlna panin hong minthang khia ahi hi. 1973 kumin Korea gam Soeul khuapi-a cialpi ah mi awn khat val in a thugen ngai uh-a munkhat a mipi kikhopna lak ah a tampen hi ding hi, kici hi. Pasian in nakzat mahmah ahih manin Pentekohte pawi ni-a kipan Pasian nasemte lakah mi a tam pen mai-a Pasian thu taangko khiapa hong suak hi.  Thu-um mite leh US president-te bek hilo gamdang kumpi tuamtuamte in zong thupi sa mahmah uh-a kum zalom 20 sunga mi thupi pen khatin ciamteh uh hi. 
    4)      Lyndon Baines Johnson pen August 27, 1908 kum in Johnson City, Texas ah suak hi. Disciples of Christ pawlpi pan a, khangkhia hi-a a zi Claudia Alta Taylor tawh ta 2 nei uh hi. 1961-1963 sungin US vice president a 27th na sem a 1963 kum mah in US president a 36th na suak in term 2 tak sem hi.  John F. Kenedy a kithah cianga President sem hi in Kenedy tupna khat ahi Khapi tung kah na ding tawh kisai zong nakpi tak in hanthawn hi. January 22, 1973 kum in lungtang natna tawh si hi.
    5)      Richard Milhous Nixon pen January 9, 1913 in suaka, 1940 kum in Thelma ―Pat‖ Ryan tawh kiteng in tanu nih nei hi. 1953-1961 ciangin US vice president a 36th na sem a, January 20, 1969 kum a kipan President a 37th na sem in term khat bek sem hi. USA tangthu ah Vice President nih vei a sep khitteh President sem dinga kitel amah bek om pan a, President sem kim lai, a tawp zong amah bek mah om hi. April 18, 1994 in si hi.
    6)      John Adams pen October 30, 1735 ni-in Quincy, Massachusetts ah suaka July 4, 1826 ni-in si hi. Unitarian pawlpi sungpan khangkhia in Laisiangtho sim zong thupi sak mahmah hi. A it a zi Abigail Smith tawh ta 5 nei uh hi.  1796 kum in US-te 2nd president suak hi. A tapa John Quincy Adam (1767-1848) pen US-te 6th president suak ahih manin tu ciangciang America tangthu ah pata-a president suak pen hite pata leh George H.W. Bush-te pata bek om pan hi.
    7)      William Wilberforce pen August 24, 1759 in Yorkshire ah suaka innkuan cithei khat pana khangkhia ahi hi. Kum 9 a phak in a pan sihsan ahih manin Londan-a a pa no kiangah sang kikahsak hi. Tua panin lungdamna thu za a, Pasian thusung ah nuamsa in lasak zong siam hi. Kum 21 a phak in Cambridge sang naupang ahih hang Member of Parliament (MP) suak hi. 1797 kum in Barbana A. Spooner tawh kimu a, a kimuh zawh uh nipi 5 khit ciang tenpih in kum 10 cin ma in nau 6 nei uh hi. July 29, 1833 ni-in si a, August 3 ni-in kumpi mi thupite kivuina Westminster Abbey ah kivui hi. 
    8)      Wright Unaute (Orville Wright August 19, 1871— January 30, 1948; Wilbur Wright April 16, 1867-May 30, 1912) pen vanleng bawl masapen-te ahi uh hi. Vanleng a bawl ma un Dayton khua Ohio ah bicycle bawl uh a, amau bicycle ding bawltawm ngiat lai uh hi. Tawl khat khit ciangin mun hoih zaw leh huihnun dan zong hoih zaw sa uh ahih manin Kitty Hawk khua ah hong kituah uh a vanleng bawl hong kipan uh hi. A bawlcil un sing vanleng hi in gih tuak simtham hi. Kitty Hawk khua North Carolina, USA ah December 17, 1903 kum in a vanleng bawl masak uh seconds 12 sung lenga pi 120 (37 m) leng zo hi. Hanciam mahmah uh ahih manin tua kum mah in Wright Company phuan uh a, vanleng hoih nono bawl in zuak ziahziah uh hi.

    9)      John F. Kennedy pen Ireland ah kial a tun cianga South Boston, USA ah a lal Irish mite' suan le khak ahi hi. May 29, 1917 in Brookline, Massachusett ah suaka RC pawlpi sungpan President ngah masa pen ahi hi. 1940 kum in Harvard pan sangman a, 1943 in tui galkap tum hi. Jacqueline Bouvier tawh September 12, 1953 in kiteeng uh a ta 3 nei uh hi. 1960 kum in USA te' president 35 na hong suak hi. November 22, 1963 kum in Dallas ah mawtaw tawh a pai laitak in thau tawh kisuamlum hi. America President lak ah a naupang pen khat leh a sibaih pen in kiciamteh hi. Arlington han ah March 14, 1967 in kivui hi. Hih a han pen innkuan han bang phial in a zi leh a tate nih tawh zong kivui hi. A sanggam khat ahi Robert F. Kenedy (New York Senator, 1968) leh a sanggam dang khat mah ahi Edward (Ted) Kenedy (Massachussets Senator, 2009) te zong hih han mah ah kivui uh hi.

Source :
Makaih Pilna

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Makai Leh Tupna Ngimna . Agelh - Lian Muan Kim Description: Rating: 5 Reviewed By: Cinpu Zomi
Scroll to Top