728x90 AdSpace

Hot
Menu
Zon-ol na Donate

Latest News

Numei leh Leitung Hinkhua. Agelh - Rev. Dr. John Thang Hum

Numei leh Leitung Hinkhua
Agelh - Rev. Dr. John Thang Hum

Leitung mihing piang khempeuh lak ah pasal sang numei tamzaw hi. Kamsang Isiah in hihthu na gen khol a: Hunkhat ciangin, numei 7 in pasal khat kitaang ding uh a, “kote hong tenpih in, (amin bek in nazi hong hisak in), ko leh ko kivaak nuung, ci ding uh hi, ci hi (Isia 4:1)

Numei septheihna thupi mahmah a, numei lo in vai a piang tei hetlo ding tampi om hi. Society khat, pawlpi khat, zum nasepna, inn sung cih te ah numei omkei leh a hi theivei lo, anuam vetlo ding a hihi. Tua ding mah a piangsak PA in ana bawl na hihi. Hi napi pasal tawh lo in numei zong sem thei lo zel a ahihi. Khanglui ten bel “kel kii tum leh numei thu tawh ki laam lo” na ci hi. Hih pen numei te neubawlna hi pah lo in, amau thu bek in thu suak zolo cih dan hi zaw hi.


Numei pawl khat ten pilna, siamna aneih uh ciang kipha sak in pasal kisam lo ding in ngaihsun thei a, a tawpna lam a hun a khenval tak ciangin pasal hong zong hethat a, ahi zong ama ki tuahpih ding om nonlo ahih man a deih taktak loh khat ngah kha hi.
Anuai ah numei thahatna leh thanemna; bangci bangin a thahat na zangh ding; lawm bangci zon ding, a innsung bangci kep ding a tavuan, a thupitna midang ta ding leh PS kumpi gam a ding bangci zat ding cih te I gen nuam hi.

Amasa in numei te lungsim kitawphah zia gen ni.
Pasian in numei a bawl ciangin pasal khenuai a sathem lalo in, a pang pan a nakguh la hi, tua ahihman numei leh pasal za kikim hi, cih thuhilhna mopawi khawngah za thei zel hi hang. Hih pen tunai a kimu LST etcianna ah khiatzia manlo ahihna kimu hi. Hih nakguh pen Hebrew kam in “tsela” hi a, ‘nakguh’  hilo zaw in  “pasal van” cihna na hi zawhi.  Tua ahih man “nakguh” (rib) cih ding hilo a, “pasal’van” (limb, penis) cih ding hi, ci in tanglai a mite laigelh kan khia scholar ten mukhia uh hi.  http://www.haaretz.com/jewish/features/1.694338
Hih muhkhiatna pan numei pen pasal lungsim kisapna (psychological and biological needs) ding a Pasian bawl ahihna ki mu thei hi.

A thanemzaw lawm ahihi.
Peter in, ‘pasal te aw, nazi te uh no sangin a thanem zaw hi cih thei un’, ci hi. Bang cih nopna hiam?

Numei te thanemna tuamtuam om hi. A taangpi thu in pumpi thatang zatna ah pasal te sangin hatlo zaw hi. Tua ahihman in pasal gilo ten thahat thu suangin numei buan cih thu tampi I za hi. Tua ahih manin numei khat ahih nak leh kep leh huut (protection) kisam hi.

Anih na ah lungsim thanem hi.
Numeite tua dinga kibawl ahih man thanem in khembaih mahmah hi. Pawlkhat te in a tua cih lam kitheih tuak hetlo in ki tang muan thei hi. A thanem na uh koi ah kimu hiam cih leh, phatbawl in kamsiam (khemna) pia kha le cin lungdam baih mahmah a, khemna ahih lam thei khollo lel uh hi. Tua ahih man numei tampite pasal ten khem in, kamsiam, kamzol zangin zang ziauziua thei hi. Piteek te na ngawn pahtawi in, phat leng khin tunga a selsel a thangkhuai hong pia thei ki ci hi. Phatna, pawhtawina pen a kilawm ciang om a, a kisamlo leh amanlo pen banghiam khat lamet man-a zat, dawi mangpa ngain kawi zong hi thei lel hi.
Eve a puk na pen nikhat sung thu a piang hi hetlo ki mu thei hi. A khempa khatvei pai in, kamsiam zangh in, nihvei, thumvei pai kikkik in kamsiam piapia cih kimu hi. Paunak LST in khemna kam (flatering lip) pen kidop mahmah ding, pilvanna, kha khentel theihna neih ding hong gen hi. A dang khat in gen leng Eve in a pasal lo tawh ki lungmuang lua na hihi. Tulai in PS nsem numei pawlkhat te pasal paa lo, lawm dang paalo in pai vava se a, lauhuai mahmah hi, cih zong tel huai hi.

Makaih (pattah) kisam uh hi.
Taanglai in Jews mite lakah numei te innsung ki pattahna nasia tak a asep uh na hihi. Kamsang Huldah (Numei kamsang) in Jerusalem ah numei pattahna sang khat nei a, tua sang pan numei te PS zahtak nading, innsung nasep leh nuntakzia ding cih te khempeuh ki hilh ci in, Jew te tangthu ah om hi. Peter in khangham numei ten khangmoi numei a pattah ding, khangmoi ten khangham te tung pan sin hen, naci hi (Titus 2:3-4).

Tuhun teh nuntakzia te kilehbulh khin mang hi. Khangmoi te ki pattah ding utlo in, khangham te zong a pattah thei dingin dinmun ah na om lo hi. Khangmoi te in a etteh theih ding (role model) kisam a, tua bang ding mi haksa hi. Khangmoi te ahih leh cilehsa deihna khauhlua ahih man, kiging nai hetlo in pasal nei in, a pasal neih dan te uh zong khanglui ngeina leh biakna ngeina tawn lo in, living togther peuh na hi hi. Mual a dialpaak khim khempeuh nadelh thei hi. Pawlkhat bang lasa siam te gospel hong pai leh appointment na la thei lai hi. Hih pen ih ki bawl phat kik kei leh lau huai mahmah hi.

Khanglui ngeina ah, mo I neih ciangin a teek nu’n itsak a, pattah a hihi. Ta nih leh thum aneih dong inntuan ding kiphal lo hi. Ahang pen innsung ah teeknu, teekpa ten pattah in, makaihna nuai ah kiniam khiat ding deihna ahihi. Tu hun ciang hih bang dan kuamah ki ut lo a, ken, no sang theizaw ingh cih vive hi ta hi. Kipattahna om nonlo ahih man innkuan hoih hong om non lo hi.

Numei te thanemna a dang khat pen leitung ci leh sa, noptatna lam ah lang lek baih mahmah thei hi. Zomite ngeina ah pasal in sumzong in numei in innvai (naukep) leh a dang teng sem ahihi. Ahi zong tuhun teh sum kideih lua ahihman numei in zong sum zong, pasal in zong sum zong I hih man in naupang te in kepna, pattah na ngah nonlo in anuntakna uh hong kisia hi. A diakin US bangah naupang kem pen TV hi ta ahih man, hollywood minta, mintamee ten hong kep sak ahih man, hong khankhiat ciangin hollywood minta te bang hong suak ding uh na hi mai hi. PS in a tate Jesu tawh kibat ding hong deih hi.

Nupa in na kisem in, sum ki ngah tuak ahihman kuamah kizahtakna omnonlo hi. Tua ahih man innsung buaina, nupa kikhen lawhna na ngawn hong om hi. Sum deihluatna hangin nasep hun kituak lo in, khat in zan in sem, khat in sum in sem cih bang pan in nupa kipalgulhna hong piang hi. Leitung mi minthangte en leng, nu leh pa ki thutuakna pan khangte, PS kihta nu tawh khangto te a tamzaw na hihi.

A thanem na uh a dang khat leuleu ah, numeite pen lungsim sukkhakna tungah ding lua ahih man in nasem khial den hi. Nuntak koppih (pasal ding) a zon ciangin thukho, thukip (principle) tung tawn in zonglo a, lungsim thawhvatna (emmotion) tung tawn in zong uh hi. Tulaitak senpi pak ding cih tawh pasal nei uh hi. Pasal neih ding ciangin nu leh pa makaihna, pawlpi siate makaihna omlo ahih man in nungbuai den uh hi. By the way, pawlpi in pasal nei ding khat pen aneih ma in thum vei counseling bawl ding hoih hi. Amasa mimal khat ta, tua khit the anih tuak un, tua khit the anu te a pa te tawh cih dan te hoih penpen hi. Tua sungah a piangthei thukhempeuh (sex vai, sum leh paai vai, inkuan kizopna, inlaws) cihte ki gen hi. Tuhun teh hi bang dan te ki thupi simlo ahihman nungsang buaina piang den hi.

Sum zeekna lam ah thanem hi. Budget bawl theilo te pen sum bangzah lut ta leh abeina ki theilo in, a kisap zong nei zo ngei lo hi. Budget bawlna pen pilna hi a, PS deihna hi. Budget bawllo a, lungsim a deih teng khat lei suk gawpna pen haina hi. By the way, Pawlpi a it taktak sia ten pawlpi mite sumpi piak ding bek gen lo in, budget bawl dan ding zong hilh hi.
Numei kimkhat te in mite pahtaak ding utna tawh ama pumpi, a innsung zem uh hi.  Pawlkhat ten in bilbah, khutbuh, ngawng-awh manpha nono bulh nuam mahmah uh hi. A tatak tua dan uukte damiah kitaih nuam thei mahmah zaw hi. Paul in, numei te pualam kizepna thupi saklo in, sunglam mugilna a thupit sak ding gen hi (I Tim 2:9). Pawlkhat bangin adawn ding ahi lo, zuhang manpha mahmah khawng, pawlkhat ten lim manpha nono, pawlkhat ten tutphah leh TV tamman theithei khawng tawh innsung leh lengla khan zem uh hi. Van pawlkhat te kum 10 ciang a khatvei zong zat loh ding om thei hi. Hite pen mi’ hong muhna ah thupi hong sak ding utna hi thei a, nuntakna hong puahpha lua hi lo thei hi.
Inn sungah hong vaihawm thei in, sum zong hat pen (bread winner) bang hi leh a pasal tungah tungtuang nuam hi. Mi in a pasal sangin amah pahtawi leh ut zaw hi. Nantal ten hawh niai cih Neino ten hawh niai cih dan a ama’ min kilawh ding ut mahmah thei hi. Numei pil in bel a pasal sang miten a pahtak bawl zawk ding ut tuanlo hi. Hi zong thanem na khat hi thei hi.

Gelkholh sangin lungsim sung ompak tawh vaihawm thei hi. Shopping a pai uh ciangin laitawh gelh kholh om lo in, sai a tun teh gelkholh lo in hoih a sak peuh lei thei hi. Pawlkhat ten a tate birthday khawng avak na pan phawk vat ahih man, a lawmte sam hethat in an minsa lei in, a innkuan pih te tawh kikum khol hilo in birthday party hong hih hethat thei hi. Nupa vaihawm khopna omlo, ei san ciatin sum zeek leng sum kikhol ngeilo a, buaina piang thei hi. By the way, an huan lo in an minsa bekbek lei leng sum kikhol ngeilo hi.

 Innkuan thak focus nuamlo uh hi. Numei in pasal aneih ciangin lothak zong tawh kibang a, ama lo mah a khawh ding kisam hi. Buaina pawlkhat pen numei ten a nuasang lam buaipih lua hang ahihi. Inn sung neihsa, sum leh paai teng pasal thukimna lalo in nuasang lam te na piapai thei hi. Hi bangte pasal nih nei tawh ki bang hi. Nungsang lam te zong vaan lo ding hilo a, ahi zong eima inn sung kip hetlo a, tua cih pen taten thuak thei hi. Inn sungah sum zekna lawng nih in apai leh tua innkuan nuam ngei lo hi. Pasal in numei muang a sum a kep sak ding leh, zat na ding aom ciangin numei in pasal theih loh a, thukim na omlo a zat ding hi peuhmah lo hi. A zenzen a, tua bang sum zeek theilo a om leh numei sum kepsak ding hilo hi. Ahang pen amau thanem na ki thei lo hi. Tua ahih man pasal na neih a kipan nangma inn sung na focus ding kisam hi.

Thanemna dang khat leuleu ah, kamtam lua in, kampau ki-iip zolo a, gen ding leh gen loh ding khenthei lo ahih man buaina om thei hi. Pasla in kam 10 a pau ciangin, numei in kam mal 100 paukhin ci hi. Kamtam na ding mun a, numei te kam pau na ding munah a pau ciangin mavan na om hi. Tua ahih man paulo ding hilo a, siam ding thupi hi. Tua ahihman kampau na ah hih thu 5 teng phawk den kul hi. Bang pau ding (The whats), bangci pau ding (the hows), bang hun ciang pau ding (the whens), bangzah pau ding ( the how much), bangmun ah (the where) cih te tel kul  hi. Hite hoih tak tel leng kikhial hak zaw hi.
LST sungah Abigail (Nabal zi) in hih a tunga thupi nga teng azat theih man in a innkuan ki suksiatna ding pan in huu hi. Abigail pen numei pil khat in ki ciamteh hi. Abigail tangthu “LST sungah om numei te” cih sungah a cingtak in ka gelh hi.

Ngaihsut piak nopna
Numei te inn kuansung khantoh na ding a bulpi ahihi. Tua ahihman pilna ciimna kisam mahmah hi. Nidang lai in ih zomi sungah numei te pen mi ading hilel, amau tungpan I ngah ding om kei cih kingaihsun ahih man in pilna (sang lai) ki guan nuamlo hi. Tua ahih man lai sim theilo numei tam mahmah hi. Tuhun ciangin tua ngaihsutna kilum let a ngaihsutna man ki nei ta a, numei ten pilna a kisapna kitel in sang ki kah sak hi. Siapi Suan Khan Mang in, numei peuhmah tan 8 ciang peuhmah tung hamtang leh, zolai, kawllai ciang beek sim thei leh innkuan nuntakna zong nuam zaw tham ding ci ngei hi. Tuhun teh zomi numei te high school ban ah degree lianpipi nei ki om ta hi.

Ahi zongin lai ahih leh sim kisawm nai hetlo hi. Sang kah pen kumpi nasep ngah theih na ciang dingin kingaihsun a, sang I man teh lai kisim beh non peuhmah lo hi. Hi pen alau huai mahmah khat hi. Buaih khat I ngah khit hang simbeh, zon beh kei leng I theih sa teng hong bei baih mahmah hi. Pawlpi khat leh nih amau lunggulhna tawh ka vaan thei zel hi. Numei te thapiakna ding a kabawl laibu zong hong lei ngeigai uh a, sum ngah ka hih manin ka lungdam hi. Ahi zong kha thum, kha lii khit the, kua teng in na sim naivua cih ka dot ciang, mikhat in a khut hong laam bek hi. Simlo ahih man a sum uh paammaih kasa hi. Na sim nop kei uh leh hong pia kik mai ve vua cimanuih leh cihtak daan-a ka cih leh pawlkhat in hong tel khial nuam hi. Kadeihsak luatna a gen ka hihi. US bang i tun keei ta I hih hang I zon beh, I sin beh kei leh azian bek mah tawh kiom ding ahihi.

Numei khat ahih leh tate pattahna tawh kisai laibu, sum zat dan kihilhna lai bu, innkuan sung kipattah zia laibu, inn sung base aa, sum zon theihna (paunkhui, khauphan neng) sinna lai bu, anhuan sinna laibu, cidamna tawh kisai laibu cih te peuhmah simloh, theiloh phamawh ahihi. Tua ii tungah LST hilh thei dingin LST mahmah a sin tel ding kisam hi. Innsungah a tate a makaihna pen mission field a nasemsem ahihna a tel dign uh hi sam hi. Tate makaihna LST hilhna pen SS siamah te tungah ki tang ngak lo in, nu (numei in) inn sungpan a pat ding kisam hi.

Thukhupna ding in
I numei te khangtohna ding I huh huan kul ding hi. Numei te in thu hong thei in, hong ciim le uh I mapai na ding tampi om hi.

Numei khat na hih leh ki neuseek kei in. Ngimna leh tupna nei in. Na tate leitung makai lianpi hong suak theilo ding kuan ci thei hiam?

Athupi pen in Pasian zahtak, thumang, Pasian gam a ding kizangh kik thei tate I neih nang, nang numei tungah kinga hi. Tha hong pia nuam ingh. Lungkia ken, ngimna leh tupna nei in. Pasian muangin la navai teng ap in. 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

2 comments:

  1. a tunga link sung ah a gennop in nu meipen pasalte' na pan kibawl cih muhthakna pen diklo hi, cihna hizaw veh aw....

    ReplyDelete

Item Reviewed: Numei leh Leitung Hinkhua. Agelh - Rev. Dr. John Thang Hum Description: Rating: 5 Reviewed By: Cinpu Zomi
Scroll to Top