728x90 AdSpace

Hot
Menu
Zon-ol na Donate

Latest News

SARAH leh Thukhensat khialhna hang anungsang thute. Sermon Series by Rev. Pau D. Lian D.MIN (Ph.D Student)

SARAH leh Thukhensat khialhna hang anungsang thute
Sermon Series by Rev. Pau D. Lian D.MIN (Ph.D Student)
Abraham, Sarah and Isaac

Paunak khatnazangei uhtam, “behind every great man is a great woman,” [pasal thupite numei thupi-inzui] ciha ommah bangin Sarah zong tuabang hipah hi. LST sung ih etciang Sarah akitheih phadeuhnapen numeite lakah na akilamdang sakkhat ahihi. Tua alamdang na-anuai ah gensuksuk ding hihang. Sarah a melhoih mahmah hi. Amin khiatna mahmahzong, “princess” kumpi nucihna hi. Sarah mahbangin alawmpa, Abraham zong Hebrew 11 na-ah upna lamah a-etteh huai pen in kiciam teh hi. Pasian in Sarah asapciangin apianna gamnusia in theihloh gam ah apaiding in sam hi. Ahangzong theilo hi. Theihngeiloh mitawh kimu/teng khawmding ahi hi. Pasian sapna “ahang” theikei mahleh thumangin zuipahhi.
Ihtheih ngeiloh na-ah pemta [refugee] in ih omciang bangteng ihlungsim sungaha om a?
Sarah pen anuntaksungin ten/omna kilaihtawntung hi ahangpen alawmpa, Abraham nungzui ahih man in ahihi. Nadangte sangin Sarah deihpenpen ahihleh, “ta” neihding hi. Tekta mahleh, a upnatawh kizui-in takhat ngah hi. Tua takhat tungpan van a aksi zahleh lei a sehnelzah suanleh khaak nei hi.

Laisiangtho sung tawh kituak in enciatciatni:
Sarah tangthu pen Piancil 12, pan hi a, Pasian in Abraham asap laitak ahi hi.
1.     Pasian in Abraham bangsem in ci ahia? Pian 12: 1 Topa in Abram kiangah, “Na gam, nabeh, le napa’ inn panin nang konglah ding gamah pai in” ci hi.


2.     Abraham, Pasian in bang kamciampia ahia? Pian 12:2-3 Thupha a ngah dingin minam lian khatin nang hong bawlin, thupha hongpia-in na min kong liansak ding hi. Nang thupha hongpiate thupha kapia dinga, nang hong samsiate ka samsia ding hi. Nang’ thupha ngah bangin thupha angah nadingun leitung midang khempeuh in hong gen ding uh hi, a ci hi.

3.     Abraham in bang sem ahia? Pian 12:4,5 Tua ciangin Topa gensa bangin Abraham pai a, pileh pudin munzahin upa mahleh uh, Sarahte nuntak nopna kipan pan hi. Gamdang ah pai-in tanei lolai himah leh mitampite pasuak sak hi. Pasian in pai-un ci-a asawlna mun atheih lohhangun, avan te uh guangin thumang takin pai uh hi.  Tai tulvalbang khetawh pai ahihman un Sarah in atawmpen 12 vei peuhmah puanbuklam ding hi.
Tuhun in mundang ihkisuan dingciang innkuan, lawm, pawlpi leh sangkahnate ihnutsiat dingpen haksa kisa mahmah hi. Aphawkhuai thukhatah, innkuan nuntakna pen muntung ah kinga’ hilozaw a, Zeisu tungah kinga hi cih hongphawksak hi. Sarah muntampi kituah kawikawi mahleh Pasian in nusiagen lo ahihman in mawhna bawlkha mahleh thupha piaveve hi.
4.     I Peter 3:1-6 na-ah Sarah pen zihoih etteh takin nagen hi. Adiakin 4 na-ah, “Pasian muhna ah a manpha mahmah ahi lungsim puakzia”, a tul theilo sunglam hoihna na bulphuh zaw un… Sarah zong tu-a bangmahin gamt a, a pasal Abraham thumangin Topa aw a ci hi. Sarah Canaan hongtun khitciang kialpi hongtung a, Egypt gam paidingin Abram tawh khensat uh hi. [Hih mun ah Pasian adotlam uh or Pasian sawlna omlo hi]

5.     Abraham in Sarah bangthu hilh ahia? Pian 12:13 Nangpen ka sanggam nu ci lehang, nangma hangin kei adingin thuhong hoihzaw ding a, nangma hangin ka suakta thei kha ding hi. Abraham muhna leh Pasian muhna akilam danna namu hiam? Abraham in azi, kasanggam hicileng khial kenteh acih hangin Pasian leh Faro mai-ah zuauthu gen hong hita hi.

6.     Abraham in Pasian bangci kheem ahia? Pian 12:15 Faro’ uliante in amah a muh uh ciangin Faro kiangah amah aphat [flattering] uh hi.

7.     Pasian in Sarah bangci dal ahia? Pian 12:17 “Ahih hangin Topa in Abram zi Sarai huhau in Faro le a innkuanpihte gimna lianpi thuaksak hi.” Pasalte pen zite adingin honghu hongdal ding ahihhangin hihhun laitak Sarai kuatung kinga ahia? Ih pasalte zong mihing mah ahihcianga khatveivei kicinlohna omthei hi cih nupite honglak hi. Ahih hang Pasian kicing hi. Pasian tungah Sarah ki-apna nasia mahmah ahihman in Pasian in alamdangpi in kem hi. Ahizong Sarai lungsim kipnai lianlo hi ahangpen ciing [taneilo] ahih man hi. Tanei nuam tanei theilo nupiten, Sarai bangci omding cihpen telmahmah ding hi. Pasian in minam liante’ nu/pa konghisak ding acih man ahihi. Paunak 30:15,16 Taciing numei kahna awsangin athuukzaw kahna omlo hi naci hi.

Upna  akiamvatna
Abram leh Sarai in tanei dingcih kammal Pasian kiangpan azak uhpen kum 10 bangcingta hi. Pasian kamciam atangtunma in lungduaizo nawnlo uh hi. Suan lehkhat acih na mun a Sarai in kei tektek nuding hilo  kaitam aw cih lungsim hong lut hi. Sarai ih etma in nangleh kei Pasian tungah hong kamciam ihngakzawh loh bangzah om hiam cih ki enpak ni? Sarah in Abram it mahmah a, taneih dingzong alungtup pi mah ahihi. Sarah in Topa tungah athungetzong phawk ngel ding hi. Abram in Pian 15:2 “Topa Pasian aw, bang hong pia dingna hi hiam? Ta nei loin ka omlai hi. Ka inn luah ding pa pen Damaska mi Eliezer ahi hi. Ta nongpia kei a, ka inn sunga asuak sila in keima gamh aluah ding hi ta hi aci hi. Upna hongneu ciang in na innkuan sung planning zong kilaih thei hi. Sarah in ngimna [planning] khat hong neikhia ta hi. Sarah mihoih mahmah hina pin nahoihkhat ahoihlo lampi tawh hong ngahsawm hi.

8.     Sarah in Abraham bang sepding acian[idea] pia ahia? Pian 16:2, “Sarai in Abram kiangah, “Tu in en in Topa in ka ta neih ding hong khaktan hi. Ka sila numei kiangah lum in. Ama sung panin keimah in ta a nei ding ka hikhat ding hi” aci hi.

9.     Hagar minam bang ahia? Pian 16:3, “Tua ahih ciangin, Kanaan leitangah Abram kum sawm aten khit ciangin Abram’ zi Sarai in Egypt mi a sila numei Hagar la-in a pasal Abram’ tungah zi-in a pia hi.” Hagar in Sarai te nupa Egypt apai navuah zuikhading hi. Egypt apai na uhpen Sarai te nupa khensat tawm hi a, Pasian geelna khatzong pa, kilkel lo hi. Pasian deihna lotawh thu ihkhensat ciang, alemlo nakhat peuhpeuh hongtung pahpah thei hi. Tua naneukhat-in buaina lianpi piangsak thei hi. Sarah ngimna [planning] pen aphuah tawm hizenzenlo hi. Hua pekpek, Abram Ur khuapek a omlai a’ tua mi tengeina khat, sila te’ tate hangin nu dinmun ngahna, ahi hi. Apoi mahmah thukhat ah, Sarai leh Abram tunga thupiang atunga ihgen tepen Pasian geelna hi lo hi. Eite zong ikidop mahmah dingkhat ah, Leitung cileh sadeih luatna hang ngimna te Pasian ngimna hi ihcih loding thupi mahmah hi.

10. Pian 16:1-2 na-ah’ Abram mawhna hangin nalianpi thumte in anungsang ah hongsu kha hi. Sarah in upzawh lohna khaici [seed] anuntakna ah hongpalh khiatna dingin munlasak hi. Sarah uplahna pen ahithei lua hi, banghang hiamcih leh tanei dingin upa luamahmah zo hi. Sarah hun hita leh tuhun inzong ama kumzahtawh tanei omnawn lo hi. Sarah in Pasian in amah ahuh sangin aman’ Pasian huh sawm hi. Pasian in hongpia ning cihpen ngakzo lo in Pasian piakding nau apiantheih nading in aman vai hawm hi.

11. Uplah na kilawh baihmahmah hi. Sarah uplah na agei a omte lawhpah lian hi. Sarah bangin uplah na naneihciang mikhat peuhpeuh in na uploh na hongbeh laphiam? Bang nacingaih sun a? Tua nu/pa in tuaci genzaw leh nacih a om hia? Midang upna neute nahuh/panpih ciang bangsinna nangah a?

12. Pasian Vangtungah hongtutsan in ih nasepte honghaksa sak aitam! Hilo hi. Aman eite hong it hi. Ahoih pen mah hongdeihsak hi. Matte 7:11 in bangci gen ahia? Note mihoih lo hinapi-in na tate uh tungah na hoih piak ding ngaihsun thei na hih uhleh vantungah a om na Pa un angen mite tungah na hoihte hong piazaw mahmah ding hi lo ahi hiam?
Sarah ngimna alehlo lampiang    
13. Buksungkhat a omkhawm te-adingin thusim cih omthei lo hi. Abraham leh Hagar in tanei hicihthu, thusim omthei lo hi. Hagar omzia [attitude] Sarai mai ah hongkilaih ta hi. Api mai ah Hagar in bangci a? Pian 16: 4 Amah in Hagar luppih a, Hagar gai hi. Amah agai lam akitheih ciangin kiphasakin atonu simmawh bawl hi.  Hagar amahleh amah, atonu sangin alianzaw in hongki muta hi. Abraham tawhta aneih man ahi hi.  Sarah in Hagar gai a-etciang hih in Abraham hauhnateng luahding aci kha ding hi. Abraham leh Hagar alupsak thu Sarai kisik ta hi. Sarah in Hagar asetsan dan manlo ahihman in, Hagar gamsungah hongtai khia-a, lungleng, lungmang leh lau-in a omlai tak Topa vantungmi in hongho pih hi.

14. Vantungmi in koi-ah paiding leh banghih dingin sawl ahia? Pian 16:9 Tua ciangin Topa vantung mi in ama kiangah, “Na tonu kiangah ciahkik inla, ama tungah ki-apin, aci hi.

15. Vantungmi in tua naupang mailam ding bangci gen ahia? Pian 16:10 Topa vantungmi in amakiangah “Na suanleh khakte nakpitakin tamsak ding ka hih manin amaute kisim zolo dinghi zong aci hi.

16. Hagar in tua naupang min kua phuak ahia? Pian 16:11-12, Tuaciang in Topa vantungmi in ama kiangah “En in, nau napaii a, tapa khat na nei ding hi. Ama minpen Ishmael na phuak ding hi. Banghang hiamcih leh Topa in nangma thuakna hong mu khin hi. Amah pen la azual nailo bangding a, amah in mikhempeuh langpangin mi khempeuh in amah langpang ding hi. Ama behte khempeuh a langpangin om ding hi,” aci hi…. Angaih suthuai khatah hihbang naukhat innsungah hongsuak ding in thupha hongpuakding sangin thusia hongkeng zaw leh bang ihcih tam? Abraham in asawtna ciang Hagar leh Ishmael paikhia sak hi. Pian 21:9-21… 10”Tua ahihciangn amah in Abraham kiangah, “Hih sila numei a tapa tawh lawnkhia in; banghang hiam cih leh sila numei tapa in ka tapa Isaac luah khawmthei lo ding uh hi,” aci hi.

17.  Sarah geelna hangin amahbek hilo in mitampitak khialsak hi.
Abraham
Hagar
Sarah
Ishmael
Isaac
Pasian kamciam tangtungta!
Kum 13 khit Pasian in akamciam khitciangin ta hongneih tuanloh uhciangin, anupa un Abraham leh Sarah teksemsem ta uh hi. Leitung pilna tawhci leng nausuah ding hithei nawnlo himah leh, Pasian in mikhempeuh in a-upnawnloh dong ngakse hi. Tuaciangin Isaac tapa hongsuak hi.

18. Pasian kammal Abraham tungah mithum in bang hong gen uh? Pian 18:10 Amaute khatin, “Tuzawh kha kua khitciangin kong paikik taktak dinga, na zi Sarah in tapa khat nei ding hi” aci hi. Sarah in amanung puanbuk kongah nangai hi.

19. Sarah tua thu [news] bangci zak? Pian 18:10-12, Tua ciangin Sarah amahmah nui in, “Kei ka teek khit, ka topa zong a teek khitin tua bang hi thei nawn ding ahi hiam? Aci hi… Tutaktak in Pasian in kamciam bek hinawn lo in tazong apiak ding hun hita hi. Amasa in athuzak natungtawn in Sarah nui hi. Anih un teek ahih man ahi hi.

20. Hong it Pasian, ihlungsim hongthei Pasian nei hi hang. Ahoih pen mah ei-ading in hongdeih sak hi. Pasian in angaihsut huai bangdot na dong ahiam? Pian 18:14Na khat peuhpeuh Topa adingin haksa lua ahi hiam? A kisehsa tuzawh khakua ciangin nang kiangah kongpai kikdinga, Sarah in tapa khat nei ding hi,” ci hi.

21. Sarah in muangzo takkei mahleh, upna mahtawh kalsuan veve hi. Mark 9:24 mipa tawh kibang hi. “Thakhatin naupang pa kiko a, “Ka um hi; ka upna akicin nadingin hong huh in,” aci hi…

22. Hebrew 11: ah upna bangci gen ahia? “Upna nei icih ciangin ihmuh theih nailo ilamette ngah takpi ding, ci-in muanna lungsim neihna ahihi.
23. Upna lotawh Pasian ihlungkim sakthei diam? Hebrew 11:6 “Upna lotawh kuamah in Pasian lungkimsak zolo hi.

24. Hebrew 11:11, Sarah upna bangci gen ahia? “Sarah ataneih theihding hun beikhin napi-in ama tungah thuciam pa zuau loding, ci-in Abraham in upna aneih nahang mahin Sarah gai-in ta anei ahi hi.” Sarah in Abraham tungah nakhempeuh kinga lo hi. Napasal, upate leh siate upna tawh bangmah kingah zolo cihna honglak hi. Sarah in ataneih ding aup zawhloh a anuih mahbang in, Isaac ata min inphuak uh a, “nui” cihna hi.

25. Banghangin Isaac ata minding in phuak ahia? Pian 18:12, 21:6 enkaak ni. Tua ahih ciangin Sarah amahmah nui-in “keei tateek khit, ka topa ateekkhitin tua bang hithei nawn ding ahi hiam?... Pasian in kei-ading in nuamin nuihzak nading hong bawlsak khin hi.” Sarah anuih masak pen a-uplohman hi a, anuih nunung pen alungdam na ahihi. Pasian in kum 37 sung Isaac nuntak na-amit tawh mu in nuntak pih hi.

[Nangzong akilam dangin in bawlin] Make a difference in your world
Thukhupna:
Pasian tungah kingak kawma sinna pen asepsangin agen in baihzaw hi. Upna hongkon lawh ahiman ahi hi. Sarah upna lian neinapi in mihing tungah kinga khazel hicih hongtheisak hi. Zuaukhem napan in kileh kikin thuman tawh Pasian hongzuat ciangin Pasian kamciam hongtang tungzopan hi. Upna lianneih na ii thupitna leh mihingtung ah kingakna hongthei sak hi. Sarah tangthu ihsim khitciang nangleh nangleh nang naphawk hiam? Tuadan in omngei, hihngei ing naci hiam? Koilam zaw ah na nuntakna tulaitak in om a? Pasian tungah maw ahihkei leh mihing tungah kinga maw?

Nanuntak na ah Pasian hongkamciam sa omcih theina pin, nangkhuasak ziate tawh akibatloh nate na mu hiam? Pasian thuhilh namah zui-in Filipi 4:6, “Thukhat peuhpeuh ah lunghimawh luakei unla, naki sap bangbang uh lungdam natawh Pasian kiangah nangenun.” Hihbang in azang theiding in Topa thupha hongpia hen!

Pasian umnumei khatna hihnatawh abeisa a na-upna in gualzawhna hongpiak lohhun namukha ngeihiam? Nisim nathuak haksatna te nazawh nadingin Pasian tungah kinga den in. Zani aa na-upna tawh tuni-in gualzolo ding hiteh, tuni a natuah haksatna pen tuni aa na-upna bekmah in honggualzawh pihding hi.

Sarah nuntakna in hongtheihsak na ah, ihkhialciangin hongmaisak zel Pasian ihneihna zong hongphawksak hi. I John 1:9

Sarah nuntakna pan nangah sinna te hangin nangzong akilamdangin na omna kiimleh pamah bangna sepsawm hiam? 

**********************************************************************************

Source :
from:jeffrey Pau Do Lian lianjeff@gmail.com
to:cinpuzomi@gmail.com
date:Tue, Jul 26, 2016 at 6:53 AM

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: SARAH leh Thukhensat khialhna hang anungsang thute. Sermon Series by Rev. Pau D. Lian D.MIN (Ph.D Student) Description: Rating: 5 Reviewed By: Cinpu Zomi
Scroll to Top