728x90 AdSpace

Hot
Menu
Zon-ol na Donate

Latest News

Van gam pan laikhak. Agelh - Piang Ngaih Don

Van gam pan laikhak. 
Agelh - Piang Ngaih Don

Ih gam ah nuntak khuasakna haksa lua ahih man in, innkuan sung nuntakna anop zawk na ding lunggulhna tawh Singapore ah nasem dingin tuma kum khat lai pawlin na pai thei ing. Kei ngaihsutna leh sunmang ahih leh, ka sum ngah sunsun tawh innkuan pih teng, beh leh phung khua leh tui, pawlpi leh lawm leh gualte aa dingin phattuamna khat teitei pia khia ding cih hi masa hi. Sum tawmtawm in khol ding, inn lam ciah dingin nasep neu khat kipan ding cih zong lunggulh pipen khat mah ahi hi.

Gamdang sum thalawh aa ka pai nangin sum leitawi liang mahin ka vaihawm uh a, a tawpna taktak teh ong lem sam in lawptak kipak takin leh angtang takin ka pai thei hi. Ka it ka innkuan pihte in nusia in pai ding pen ka lung alen ngap mahmah hangin, kei thalawhsa tawh amau en zo ding cih ka ngaihsut ciangin ka lawp mahmah aa , zong ka angtang mahmah hi. Lunglen ding zong ka khualzo nawn kei mai hi.


Ut pen hilo, ahih hang in kei septheih dang om tuanlo phot ahih manin mi’ inn ah nasem in ka om hi. Nasep kakipat pan in Innteek te a baihtuak loh lam ka thei pah hi. Ka sep zawhloh ding nasep hong guan a, zingsang 4am bangin tho in zankim 12 bangteh lupna ka zuan pan hi. Tua pen nisim hi den in, nipi ni zong ong tawlnga saklo lai hi. An zong gina takin hong pia lo a, amau khamval peuh ong pia mawk uh hi. Amau an te nei theilo ka hih manin kei nektheih te huan dingin phalna ka nget hangin hong pialo sawnsawn lai uh hi. Nisim in ka gilkial den hi mai hi. Ong hopih dan pen, mihing in hong mu kei leh kilawm phial mawk kasa hi. Leitung ah mihau pente nasep zah phial nasep hong pia uh aa, mi hat pente sep zawhloh ding phial nasep hong pia uh hi. Hong om khongsak vetlo in, sep ding aom kei leh zong inn nawt, inn phiat in hongsawl niloh pongmawk uh hi. Hong hopih the apau tel thei kei leng bang hehlua kisa in hong ko gawpgawp uh a, hong haizan ding tawh kibang liang uh hi. A gei aa om na khat peuhpeuh tawh hongsat in ong deng ziauziau thei lai uh hi.

Ih gam ah sang hoihtak kahlo ka hih manin Mangpau leh nasep zia, gamtat lu hek zia bel a siamlo ka hih lam pen kei le kei ka kithei mahmah bilbel hi. Ahih hangin nasep hanciamna, cihtak kuhkal na leh thuakzawh hatna lam ah bel ka hihtheih zahin hanciamzo ka kisa lel hi. Khat veivei teh haksa kasa lua mahmah a, ahih hangin ka sepna hanga ka ngah ding ahi sum le paai te tawh ka innkuanpih te in, a lim a al na ne zo, a deihkhat peuh na lei zo ding cih ka ngaihsut khak teh ka tha hong dim kik in bangbang hileh thuak teta phot dingin ka na khensat veve hi. Ka mit pan in ka khitui ka luangsak ngamkei a, ka lungtang sungah bel ka khitui tatsat lo in tak keuhkeuh den mai hi.

Kha 6 khitteh ka paina hangin a sum bei teng pia khin dingin, inn lam sum khakzo ta ding, inn pua zong pusuak thei ta ding, pianpih Zomi u leh nau tawh hunnuam zang khawm ding, khatvei zong innkuan pihte ho kha nailo kahih manin ka pusuak masak ni bel ut tantan ki ho ding, Nu leh Pa te kiangah ah na duhduh na ne un maw ci ding, cih te ka gel kholkhol aa tua in katha ong khauhsak kik in thuakzawhna thathak hong pia hi. Ahih hangin kha  6 a cin teh, tua teng khat zong hong pianglo hi. Ka innteek ten hong vaksak lo, hong pusuak saklo in, sum zong bangmah hong pialo hi. Kei ngah dingteng ka gen leh “inn lam hong puak kik ding hi ung” ci in tua tawh kakam hongcip sak den uh hi. Bangmah lawh lo aa inn lam ciah ding pen ka lungnop zolo hi.

Sawtvei tak mah ka thuak keeikaai zawh sam hangin, hun ong sawt tohtoh teh ka pumpi mahmah in thuakzo nawnlo hikha hi ding hiven, lung-am in na tuk kha thei zel ing. Ka ci kasa zong limlangh sungah kaki et teh, na kiamgawp a na gawggawp ka hih lam kaki thei sansan hi. Tha neilo in ka puk zel aa, cina in zingsang thawh ding haksa ka sa mahmah ta mai hi. Hih bang hun ciangin, ka inntek te in Zato lak ding gel hetlo uh a, aki neih peuh hongsa mawk uh hi. Hong vua beh lai uh aa ngaplo pipi mah in nasem dingin na tho tantan ing. Kum khat bang hong cingta in, ka lungsim in a  zawh hangin ka ci ka sa in zo mahmah nawnlo hi ding hi ven, ka hu san damdam in hong bei hiaihiai ta mawk hi. Ken lah ka pumpi ka nungta sakkik thei kei aa, ka nusiat innkuan pihte kei hong muang ahi ka sanggam u leh nau teng na bangci nungta mawk ding? Hih ka thuak nate kua in na gen sawn kik mawk ding hiam ci in ka dah mahmah hi.Tua laitak in a vanglian ih biak Pasian in , a taklam khuttawh hong len aa, vangam ah hong ciah pih ta hi.

Bang hangin hih bang hatsakna ka thuakna pan hong honkhia lo aa, ka nusiat ka nu leh pa, ka sanggam u leh naute na bangci nuntak mawk ding hiam Topa aw ci in ka dong hi. Topa in itna mit tawh hong en in hong nuihsan aa “ lunghimawk kei in ka tanu aw, na thuak nate ka mu hi. Na nusiat na lunghih mawhna khempeuh kei mah in amau aa dingin ka geelsa om hi” ci in TV et bangin hong lak aa, ka lungdam lua ahih manin ka khitui a tak keuhkeuh hi. Ko innkuan aa dingin Pasian in ahoih pen hong gelsak ahihna ka tel ta hi. Ka it leh ngaihteng zong ni khat ni teh keikiangah damdam in hong pai ding ahihna zong ka tel mahmah aa, ka lungdam hong kicing ta ahihna , leitung ah ka nusiat hong it hong ngai khempeuh theih dingin zong ka lunggulh mahmah hi.

Pasian in hong hopih a, leitung aa na nusiat ahi hong it hong ngai na innkuanpih, na khuapih tuipih leh na mipih te tungah vaikhak nop na neih leh hong gen in ci ahih manin, hih anuai aa bangin vaikhak na kammal pawlkhat ka nei nuam mah hi.

1) Kei hangin hong buaipih khempeuh tungah ki lungdamna thu hong pulak masa nuam ing.Hih bang ngeina hoihte na zang suak den un maw, hih in minam pi te zia leh ngeina ahi hi.

2) Ih gam ih lei ah an khing khamlohna hangin, ei sangin a ci thei zaw sum hau zaw ahi gamdang ah sum thalawh in ka pai pen, kei ut man hi masa hetlo hi. Pianna nu leh pa , sanggam u le nau, tate khualna tawh ut lo pipi mah in apai hi ing. Hih bangin it leh ngaih tawh kikhen in gamdang ah sum thalawh a kul lo dingin tuni pan kipan in mimal kim in no maban ciat ah nasep cihtak kuhkal in na hanciam mahmah dih un. Tua hi leh ih gam hong paallun ding hi.

3) Gam makai, minam makai, pawlpi makai,biakna nasem te, ki pawlna tuamtuam makai khempeuh aw, gam khat minam khat a khantoh na dingin a kisam pen in hih kipawlna tengin deihsakna leh gina tak leh thuman thutak takin na sem in, a gam a minam a makaih nakleh tua gam a khangto ding ahihna thu na za kha ngei ing. Hih ka thuak hatsatna te na za un la, khang thaknte’ tungah hih bang hatsatna, simmawhna a thuak khak nawnloh na dingin ong hanciam dih un. Zomi sungah  kei thuakna pen a tawpna ahih zawh nangin ong hanciam dih un. Ih theih kak loh hangin kei mah bangin ih mipihte tampi takin a tuntun na leitung mun khempeuh ah simmawh bawlsiatna a thuak tampi tak om hi hang.

Gamvai, biakna vai aa thu thuk  pipi te bel thei keng, ahih hangin ko danin pilna sang neilo a haksa huh ding neilo mi tampi te na khualna un, ahoih ahih nak leh hong kipawl khawm dih un. Mipi te nuntakna aki sangkhai nang ahih nakleh no cih bek ci tentan lo in nasep khop ding, ahoih dingin ki vaihawm thu khat peuhpeuh ahih nak leh ki panpih liailiai ding, cih ih ngeina hoihte hong zangkik dih un. Angsung deihna bulphuh luatna te na nusia ta dih un. Biakinn sungah ah Pasian thu, ki itna thu, thuman thutak bekbek mah gen pipen in na nei dih un. Angsung hamphat nang, ki muhdahna, mi mudahna, kikhenna apiang sakthei thute pan in na kikem ta un. Pasian umte nuntak zia ding thute na kihilh un la, zong na zang pah dih un. Tua thute bek in gam leh minam hong khangto sak dinga, na khantoh khit uh teh, kei danin mi gam mi lei ah maimial zezen in nasep paikul nawnlo ding hi pah hi.

4) A tawpna kong vaikhak nop thu in, kei hangin kua mahmah na mudah na enkhial kei un. Gamkhat minam khat sungah mi hoih aom mah bangin mi hoihlo zong aom thei mah ahi hi. A hih hangin, no na hih uh leh na nopsak na cihtheih hun ciangin thu-um mite na hih mah bangun kei hongbawlsia te bangin na gamtat hetloh ding kong vaikhak nop pipen ahi hi. Itna bulphuh in Zogam Zolei, na khua na inn sung bel-in, sum zong paai zong in hongpai te tungah akilawm aki tuak in na gamtat dinguh lunggulh mahmah ing. Tua hi peuhleh, hih bangin haksatna ka thuak nate hangin kong nusiat ka it ka mipih khempeuh in kikhelna in nei ding na hih man un Pasian gelna hangin ka lungdam mahmah aa, ki thuakna zong man nei ka sa hi. Pasian deih ahi itna bulphuh in na kalsuan nak uh leh hauhna, pilna, khantohna in hong zui pah dinga ih gam ih lei hong nosuak den ding hi.

Laikhak ong gelhsak

Khup Lian Thang

Source :
from:Khup Lian Thang thangliank@gmail.com
to:"zominam@yahoogroups.com" <zominam@yahoogroups.com>,
"tongsan@googlegroups.com" <tongsan@googlegroups.com>,
zomidaily@googlegroups.com
cc:Cinpu Zomi <cinpuzomi@gmail.com>,
"zis97@yahoogroups.com" <ZIS97@yahoogroups.com>
date:Fri, Jul 29, 2016 at 2:06 PM
subject:Van gam pan laikhak – By Piang Ngaih Don
mailed-by:gmail.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Van gam pan laikhak. Agelh - Piang Ngaih Don Description: Rating: 5 Reviewed By: Cinpu Zomi
Scroll to Top