728x90 AdSpace

Hot
Menu
Zon-ol na Donate

Latest News

ZOGAM APPLE. Agelh - Hang Za Nang

ZOGAM APPLE
Agelh - Hang Za Nang

Leitung mipil, a khangto masa ahi, Mangkang gam le nitumna lam Asia gamte ah, apple kung pen tanglai pek pan in kicing hi. Ahi zongin Kawlgam, Zogam hongtun sawtnai lo hi. A kicin ciat hangin, koilai munah, bang nam pawl hoih ding cih kuamah in natel lo uhhi. Ut na peuhpeuh ah kicing zelzul a, nuntakna taktak a suaksak zo omlo hi.

Ei Zogam ah kicing kawikawi a Limkhai le Buan gamte pan-in, a tampen piang hi. Kawlgam khuapite ah a tam khop mah kizuak zota hi. A khangtosa, gamdangte cin dan, kepdante kiban zo nailo ahi man-in, a gah zong I limci sak zo naikei hi. I gam veng Sente’ zong ipha zo naikei hi.


Kei pen, Limkhai mikhat kahih man-in, ko khua apple ciin kipatna thu tawm kongpulak nuam hi. Apple nam te amin kithei kim nailo ahih man-in Leilum apple, Leidawh apple le Kam Nang apple peuh kici mawk hi.

Leidawh apple (အစိမ္းသီး) te pen ko khua pan-in Baakzam nam kana ci uh aa, Tedim lokho zumpi pan hong et uh ciang in, Leidawh nam hong cihsak uh hi. Ki gam leitang min hong puasak ahih man-in, angtan huai kasa hi.
A ki ngahna thu

2nd Chin Rifles galkap sung a seem Sgt. Do Zam ( Buglar ) pengkul mutpapen, tuap natna ngah a, na kibawl hi. Cinate neek dingin, gamdang pan apple kivaikhak hihtuak hi. Sgt. Do Zam in ne mawkmawk lo-in, a ci na la a, leibeel sung ah a tuhleh a no po hi. Amah, khua lam ah ciah ciangin, a leibeel mahtawh pua a, Limkhai (Zongal) khua a huan sung ah cing hi. ( 1954-33 kumpawl). A gah hunciang in, gah teei napi, limci khol lo-in zuaktak lo hi.

Tua hun laitak, Limkhai ( Zongal) khua Tuiphum Tapidaw huh siapa Thang Tun in Leidawh-ah huanpi khat bawla, teng pah hi. Stg. Do Zam huan sung pan-in apple hiang a kipehsa pawlkhat la a, Leidawh ahuan ah a na suan khak le apple namte hoihna mun tawh kituak ahih man-in, a kung hoih in agah pha mahmah ahih man-in, alo ciing dim inin cing hi. ( 1958-64) kumpawl. 1965-70 kum kikal sungin innkuan nuntakna khom ding hongsuak a, khuapi lam ah tampi mah zuak theita uh hi.

Limkhai (Zongal) khuapen, tuipi pan asan na pi 4500-5000 kiimpawl hi a, apple kung ading in niam lai hihtuak hi. Leidawh mun pen pi 6000 tungsiah a na hih man-in, hoihzaw piangzaw cih a kitheih ciangin, khuazang in Zo lam neh teng nakpi tak-in kicing a, nuntakna in kinei hi. Hih Leidawh apple nam pen, Austria gam pan a kila hi a, a min zong Golden Butter hi ci-in thei kik uh hi. Ei Zogam ah tam a gah thei pen hi a, a kung golpi khat tung pan-in tawi 300 bang a kilo ngei hi.

Sgt. Do Zam La phuah:
(a) Pupa theih loh minthang tulsing, vangkhua tuang tut masa’nang e.
(b) Tangbang damna, Sianmang tulsing, lambang napak, tek ta vua.

1970 pan 1980 kum kikal sung, Limkhai le Buan gam pan-in tampitak tung thei ta ahih man-in, kipawlna (Co-operative Society) mun 2 ah kinei a, Yangon le khuapi dangte-ah kizuak sawn theita hi. Tua hi a nisim in I nuntakna, neek le dawn, silh le ten, inn le lo ading in, picin na hong piang zaw hi.

Bo Son Mang la phuah:
(a) Pupa theih loh tulsing pian dang, na gah lun, zata’n bawm e.
(b) Momnote’n tubang cing ding a, kum cin nuai pan, zata langlam, dawl ve cia.

Apple Nam
Leitung mun tuamtuam ah, apple nam pen, a tul a sim-in om kici hi. Ahih hang in, ei Zogam ah Japan apple, Kokzuku, Red delicious ( Ai- wa) Jawnatan, Golden Butter( Leidawh) a kici te, a lei deihna mun ah kisin kawikawi ahih manin, sepna( လက္ေတြ႕) tawh a kithei toto ahi hi. Lokho zum lam pan in, siate in zong, a cindan, a kepdan, zatui kapdan, hormone piakdan, eek-lei piakdan-te hong hilh uh ahih man-in, a limcit theihtheih nading, a cidam theihtheih nadingte kithei semsem ta hi.

Ai-Wa ( အိအအိုင်၀ါ ) Apple
Hih apple namte tamgam lam, lei nelna leinomna( အစိုဓာတ္)munte ah hoih thei a, kumsim, June 20 kim pawl in, tung thei tawntung hi. Anpal nam khat suak a, man pha mahmah ahih man-in manlang tak-in kizuak thei hi.

Lophei Kam Nang Apple
Hih apple-te pen, a san hoih mahmah nam khat hi a, manpha ahih man-in, a kizuak thei pawl suak hi. Tu laitak in, hih namte cin ding kihanciam ciat hi. A kicingsa a kideih lote at tan kik in, hih namtawh kipeh kikkik hi. Lo neipa khat tungah, a lawm khat in, “ Nang bang nam ciing na hiam?” ci-in adot leh “ Ken kumsim aki laihlaihte ka ciing hi.” ci-in na dawng a, nuihna in nei uh hi.

Ka Zi’ Hanciamna
Ka zi, Nu Hau Vung in, 1980 kum in “ Ka pasal in pension hong lak ciang in, kikhom khol lo ding ihih ciang in” ci-in apple lo khat zuan hi, 1990 kum-in kumcing pension kalak tawh kituak lian-in, apple kitung thei takpi hi. Kei service pension le political pension nam 2 te sangin min ka phat hi. Apple hangin, neek le dawn, silh le ten, inn le lo hong neisak ahih man-in, Tedim Lawibual ka inn Ba/3 pen apple min ahi Ai-Wa ka tamsak uh hi.

Kumpi tung pan Sum Leitawi Ki Ngah
Galkap kumpite tha hong piakna hangin, apple hanciam nuam peuhmahte acre 2 pan 5 dong bang bawlzawh nang-in, sum tam pipi hong kileitawisak thei ahih man-in, tangpi tangtate ki lungdam ciat hi.

Apple Tui (wine) le Jam zong Kibawl
Apple a pum a izuak ciang-in, khat veivei haksatna kituak thei ahih man-in, a hunhun in, a munmun ah, siate in training (သင်တန်း) hong pia uh a, apple pumpan a tui ( wine ), Jam ( Jelly) le adang neek theih a namnam in kipiangsak theita hi. Tuhun ciang-in apple tui pen sum suak zo ding in, ki zuak theita hi. Zu min pua lo buang ding in, a kuamapeuh in dawn theita uh hi. A bawl dan pen, a siam sate tungpan ahi zong in, lokho zum pan ahi zong in, kisin thei hi.

Apple Ciina Mun Sepna tawh Kithei
1) Tuipi pan a sanna pi 6000 le atungsiah munte mah hoih hi. ( Vuuk kiat theih na).
2) Huih theuna, mual neu le mual neu kikal, mun kuamthuk komsung ah khanto zaw hi.
3) Zingsang ni suak baih nitak nitum baihna mun deih hi.
4) Gammang tuupi lak tawh kinai, leinelna (အစိုဓာတ္ ) deihhi.
5) Lothak I lak ciangin, gamtaak mah deih hi.

Apple Gah sunga Om Datte
Apple gah minsa 100 gms kici phel khat sungah:
1. Calcium --------------- 10 mgm.
2. Phosphorus --------------- 14”
3. Iron --------------- 10”
4. Vit. A. --------------- 40 I.U.
5. Vit. E le Vit B complex 
Tawmtawm om hi.

Hih anuai-a natnate damsak hi.
1. Sitawm/ thazawm
2. Sung khak
3. Gilsan
4. Gilpi um-na
5. Lungtang-na
6. Luting-na 
7. Sikhang natna
8. Guh na/ tangna
9. Buk khuh
10. Kal-na
11. Mit thazaw
12. Ha hoihlo

Hih a tunga natnate damask/nop tuam zawk nading-in, a pum-in ahi zong in, a tui-in ahi zong in, akhom khat mah, nipi 3 pan kha khat a tawmpen-in zat kul hi.
A diakdiakin sitawm, numei nin pai gina theilo pawlte ading in hoih diak hi. Gilpina, sungnuamblote apple I nek ciang in ann zansak ahih man-in, I pumpi le I lungsim nuamsak hi.

Kidop ding
Apple gahte pen, tu hun ciangin, lungno nek theihloh nading, a muat baih loh nading in, gu anei zatui nam tuamtuam kikap ahih man-in, inek ma-in limtak silsiang a nulsiang ding kisam hi. Gil kial laitak in zong tampi nek hoihkhol lo hi. An nek khit ciang in, zatui zatdan a nek ding hoihpen hi.

Hanthotna 
Leisung pan in ngun le kham hong gah/hong piang hi, a kicih mah bang-in gam hoih, mun hoih a neite in ciinding hanciam huai hi.
□ Kung tampi pi ciin sangin, eima zawh khopzah ding khat ciing a, a limci I suahsak ding thupi zaw hi.
□ Puak nading olna, mawtaw lampi tawh kinai, mun kician omna munte ah cin hoih hi.
□ Singgah huan le gankhawina pan hauhnate kuamah in hong englo a kumpite’n zong hong pakta hi.
□ Sumbawl dangdangte sangin, sing gah huan ah I om ciang I lung hong nuamsak in ikhan zong hong sausak hi.
□ Gam hoih gam pha a neite aading in gamdang khawng a mite innteng ding a ipai sang in, I gam I puah ding ut huai zaw hi
□ Hanciam lehang, I thaman Pasian in hongpia ding hi. Lai Siangtho in zong na nasep-nate hang in lungdam in nane ding uh hi, hong ci hi.
□ Kawlte paunak pian khat ah, “ hanciam leng, pasian kisuak thei hi,” na ciliang hi. Pasian I suak kei zong in, I nuntakna nuam zaw ding cih kimu thei hi.
□ A lei lamte hi lo-in a zuaklamte I hih zawk ding  ut huai hanciam huai zaw hi.

Thukhupna 
Tanglai ipu ipa te in zong, I nuntakna a nop zawk nading le mi aa bek I deih gawhloh nang-in hih bang in la na phuak uh hi.
(a) Gal-ah taang pha e, a kua teng hiam aw, tukawl tawi zo leeng, ei ma taang hi e.
(b) Gal-ah sia ta e, a kua sial hiam aw, ei mah khawi zo leeng, ei ma sial hi e.

Source :
Tedim BEHS No.1 Sangpi GOLDEN JUBILEE MAGAZINE
laimai 271-274 

Zomi eLibrary / Laibusaal in aki tei/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOGAM APPLE. Agelh - Hang Za Nang Description: Rating: 5 Reviewed By: Cinpu Zomi
Scroll to Top