728x90 AdSpace

Hot
Menu
Zon-ol na Donate

Latest News

ZOMI TE DINMUN NAM THUM: Agelh - Sia Pau Khan Khai.

ZOMI TE DINMUN NAM THUM:
Agelh - Sia Pau Khan Khai.

THUMASA:
 Zomi te dinmun ilungngaih ciangin  inuntakna sungah dinmun nam thum anei ihihi. Ahun zui-in Topa in idinmun te ei ngaihsut sangin asangzaw leh ahoih zaw in honglam to den hi cih kimu thei hi. Asiapen dingin ingaihsut hun nangawn pen anungsang ciangin ahoih pen dinmun hongsuah toto Topa Pasian ahihi. I maban bing taktak ta ei icih hun ciangin kong thak hong kihong kiau kiau zel hi.

PU LEH PA TE DINMUN:
Ih pulehpa te hun lai in gal ai sa ai in, manlah mahmah  uh a, hamsia leh pausia te zangin dawi leh kau bia in nuntakna tualniam mahmah uh hi. Khua khat leh khuakhat kido in , beh khat leh beh khat kido in  gal leh sa in akinei den te ihihi. Mawhmaisak cihbang omlo in akisam bangin phu kila in akithat te ihihi. Anungta Pasian itna isungah hongom nailo ahih manin taksa tawh septheih teng asem khia isuak hi.Tua ahihmanin idinmun lui pawlkhat enkik pak ni:

1)    Tualthak te.
2)    Hamsia leh pausia zang te.
3)    Dawi leh kau singleh suang abia te.
4)    Mawhna kimai saklo in akithuk tektek te.
5)    Beh lungsim , khua lungsim bek athupi sak te.
6)    Ei mimal muhna ciang bek tawh akalsuan te.
7)    Gal  leh sa ai in , adah huai penpen mihing lu nangawn tungah  gualzawhna pawi akham te.


I pulehpa te dinmun sungah ahoih mahmah thu pawlkhat na om leuleu in tuate in:
                                          i.    Citak uh hi.
                                         ii.    Hangsan uh hi.
                                        iii.    Lungdam khawm thei uh hi.
                                       iv.    Khat leh khat kihuh nuam uh hi.
                                         v.    Dawi tung nangawn ah kum sim in ankuang lui uh hi.
Khanglui lai a thu hoih lote nusia in, ahoih omte I kepsiam ding thupi mahmah hi.

TULAI TAK I DINMUN :
Zomi te nuntakna sungah tulaitak idinmun pen  vasa bang hileh bu itom laitak, inn ilam laitak, aisa bang hileng kua itawh laitak hi in, ngaihsut ding atam mahmah laitak ahihi. I omna mun leh mual tek panin kipusuak ciat a, mundang mualdang ah  nuntak khuasak nading vaihawm in ipaikhiat laitak ahihi. Innlam aomte zong amau maban ding tek abuai mahmahlaitak ahihi. Ih foundation thakding igeel laitak ahih manin  ahamsat mahmah na hun zong omdinga, alem zawkdeuhna mun leh hun zong om ding  hi. Na khempeuh imuh tawm tam ahih manin  ngaihsutna zong kituah pak theihloh hun zong omdinghi.  Imuhdan kibang kimlo ahih manin ei muhdan danin zung ikhak laitak zong ahihi. Israel te bangin  munkip leh gamkip ineih theihna dingin ihanciam laitak hi a, ikihawm thawh ciat dinga, ahizongin asiam zaw leh  amusiangthei kuamah ki omtuan lo ding hi. Hih hunsungin  akipsa leh akhosa khat peuhpeuh ah kipawl pak , beel pak leng lemzaw in teh acizong omtham dinga,ahizongin  ihihna limtakin hih hun in idinpih kei leh denciangin hong zekai lua zel ding hi.  Mordekai  in Esther kiangh hihbang hun in bangmah hihlo in na omcip leh Judah mite suahtakna ding thu munkhat teitei pan hongpiang veve ding hi acih mahbangin denciangin Topa in amah a it eite adingin lampi honghonsak veve ding hi.

Tua ahihmanin tulaitak idinmun I etciangin akisam mahmah thu te anuai abangin gelh khia ni:
1.    I omna tek ah inuntakna hong lamto ding leh dinmun thak ah hongkha ding anungta Pasian mah zahtak in beelden ni.
2.    Khat leh khat kitelsiam in  tha kipia siam ciat ni.
3.    Makai te tungah muanna lianpi nei in, agah imuh masiah hawmthawhna kammal tam zat kei leng.
4.    Mawhna kimai sak in,  phu kilakna leh  tualthahna te nusia siang zo leng.
5.    I deih kei ta zongin , I utkei tazongin  I minam kipumkhat nading ahih leh  thapia in panpih sawm phot phot leng.
6.    Tangthu tuanthu ikan kan sangin  ikipum khat theihna ding thute hanciam in kalsuan pih zaw leng.
7.    Gualzawhna ngah khat aom teh lungdampih in, acimawh mite domto in kalsuan pih sawm leng.
8.    Ei kihelohna peuh asia leh ahoihlo dingin ngaihsutna nei kei phot phot leng.
9.    Midang te muhna ah akilem lo ibang phial zongin eisungah  lungsim gawmkhawmin  lawngkhat in luang thei leng.
10.  Ei ma inn mah lamlam phot leng , denteh itenna ding hongsuak ding hi.
11.  Midang te suktuahna leh  khenkhapna te telsiam in  ei leh ei mah kici tang tang thei leng.
12.  Apil te kiniam khiat in, mipi ten  pahtawi siam leng.
13.  Ahau ten itna hongnei in mipi ten pahtawi siam leng.
14.  Kammal tuamtuam paukhiatna hangin  imaban ding kitat sak kei leng.
15.  Kuam lungsim , khua lungsim leh beh lungsim te sangin Minam khat hihna lungsim ah dinmun kician neizo leng .
16.  Akisam munmun ah khaici hoih tuh siamciat leng.

Tu laitak idinmun pen limci leh manpha mahmah ahih manin  limtakin zangsiamleng. Leitung gam 35 sungah atungkhin Zomi te in  I omna gamtek panin Pasian leh agam mite itna leh pahtawina ngahkim ciat sawm leng.

ZOMI TE MAILAM DINMUN DING:
I nunglam sangin imailam saupi omzaw den hi, itheihsa sangin itheihloh tamzaw dena, ineihsa sangin ineihnailoh tamzaw denhi. Zomi te hongtung ding hun ah, Topa in zungkip hongkha sak tadinga, asel leh apalh hong kimu ta ding hi. Ih pu ipa te hunlai mah bangin khat guak inbangmah isem zonawn kei dinga, I minambup in ipankhop hun hong hita dinghi. Ingaihsutna te hong picing toto dinga, imuhna te hongsang toto dinga, ineihsa te hong thupi toto dinga, inasep zia zong hong khangto to dinghi. Tua ahih manin  mailam ah Zomi te dinmun ding pen anuai abangin muhkholhna tawh pulaak ni.

1.    Israel te Santuipi gei pan  alampi uh bing mahmah taleh  Mosi ciangkhut zangin amainawt zawh mah bangun Zomi te zong bangbang ahizongin imai hong kihong mahmah ding cih phawk ni.
2.    Miphak 4 te amailam uh bing mahmah taleh amainawt uh ciangin Hauhna  tampi angahkhak bangun kipumkhat in mainawt photphot leng  ei ading Topa in hongkoih sak khin zo hi.
3.    Makai te thapia siam ni, makai ten mipi te deihna hongtang tunsak zawhna dingun honghan ciam ding uh hi.
4.    I ngaihsutna tuamtuam te gawmkhawm in, kuamah tangpek lo in lawngkhat in luangkhawm photphot dih ni.
5.    Biakna nasem te leh  gamleh minam nasem te pen thu kikum khawm in ei lampi tek ah thak kipia siam ni.
6.    Ingahzawh nailoh thute ah lungkiat ngaihsut lo in ingah mateng in ngaksiam ni.
7.    Athupi zaw leh ahatzaw te pawl in aguallel zaw leh athanem zaw imite nusia kei ni. Mosi bang ni.
8.    Khat leh nih bekin nalian tampi semzolo ding ihihmanin  atam theithei kipawl in igam ilei adingin mapang khawm ni.
9.    Ei innkuan , ei unau , ei khua ,ei beh leh ei angsung ading bekin ngaihsun lo in , minam bup adingin thungen ciat ni.
10.  Mimal kitel siamlohna tawh  minam bup nasepna te nawngkai sak sawm kei ni.
11.  Apil zaw deuh te, anei zawdeuh te a zalian zawdeuh te zahtak siamin , amau zong  mi namdang te pahtawi ding bekbek hong ngaihsun lo in, agentheih pen hun ah, anusia theilo leh anusia ngeilo ding  amipih te  hongkhual nadingin honghan ciam ding uh hi.
12.  Kipawlna tamlua ci in phun phun lo in , nahoih isep khop theih ding hanciam ciat ni.
13.  Ei a phatnuamlua in midangte a gensia lua cihbangin omkei ni.
14.   Sumbawl ten zong  khangtampi kimang ding sumbawlna te itate nusiat sawm ni.
15.  Pilna sin ten zong  lamdawt tawnin  theihna omlo degree tampipi bek ngahsawm lo in, akizang thei dingin  nuntak sawm ni.
16.  Ei khialhna  aom leh kakhial cingam ni, midang te khialhna aom leh maisak zawh sawm ni.
17.  Den ciangin itangthu hong kikan ding ahih manin  isim kik ciangin isim nopdingin gelh sawmni.
18.  Topan  imuh nailoh, ineih nailoh, isan nailoh avangliatna thupha te hongsang sak ding hi. Cihtakna tawh ngaksiam ni, lungduaina tawh ngaksiamni.  Minam vai ah kikha siasak kei ni, ih mite zong neumuh leh zahpih kei ni, minam abawl Topa in hong muden ding hi.
19.  Ih veng naupang te sangin ei tate puahsawm zaw ni, ikisap hun the itate bekmah in hong puahkik ding uh hi.

Tua ahihmanin  hongtung ding hun Jacob in zungkha dinga Israel palh in dawnkhia dinghi acih mah bangin Zomi te zong hih Pasian kammal bangin inuntakna khempeuh Topan hong makaih henla, gualzawhna lianpipi hongmusak tahen.

Pasian in Zomi te adingin  Khuahun thak hongpia dinghi.
Thungetna tawh,

Pau Khan Khai.
Louisville,Kentucky
July 19,2016.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMI TE DINMUN NAM THUM: Agelh - Sia Pau Khan Khai. Description: Rating: 5 Reviewed By: Cinpu Zomi
Scroll to Top