728x90 AdSpace

Hot
Menu
Zon-ol na Donate

Latest News

ZOMITE LEH NAINGNGAANZEE ( ZOMIS AND POLITICS ). Agelh - Pu Pau Za Mung

ZOMITE LEH NAINGNGAANZEE
( ZOMIS AND POLITICS )
Agelh - Pu Pau Za Mung

Thupatna
Leitungah Kawlgam in gam zawng bel leh a nangh belin ki ciamteh hi. Kawlgam sungaa State 7 leh Division 7 te lakah Zogam in azawng bel leh a nangh bel State in ki ciamteh leuleu hi. Tua ahih leh, Zogam in Leitung ah a zawng bel leh a nanghbel hithong hilo ih hi hiam? 

Hihbang aa ih hih lawmlawmna ahang ih gen ciangin, Zogam ih khua leikiat ahi mual leh guam vive a hihman leh na manpha a pianloh man ih ngawhaa, ei mihingte lampan ih ki sapna ngaihsut leh genkhak in ih nei ngeikei hi. Tuabang ih paulap na in  ahi mah ding hiam cih ih et ciangin,  Zogam  khua leikiat tawh aki bang veve ahi, Japan, Switzerland leh Singapore te bangin leitung ah ahau pen leh a nuamsa pente ana hih zel uh ciangin ih paulap in a maanloh lamtak ki telthei hi. Tua hiaa, Zomite khantoh lohna in thudang hang hi peuhmah lo, eimau mahmah ki sapna leh mawhpuak ahih lamtak ki cian mahmah hi.

Ih gam leh ih minam khantohna ding in sepdan leh zia lam tampi a om hangin, a muibunh bel leh a taangzai bel in Naingngaanzee   mah ahi hi.
Abeisa hun sungaa Zomite Naingngaanzee zuihdan in nam 6-bangin ki khenthei hi. 

Gam leh minam aa ding, luang kham’ aa sem.
Hihbang sepnate in Pu Thual Zen, Pu Tun Khua Pum leh Pu Luah Thawngte bangaa a nuntakna uh apiak zahdong takaa a sepna uh ahi hi.  Amau teng, a ciipsanh zahtakna
(Crimson Salute) hih ka lai-at na tawh ih pia hi. Tuciangin amau bangdante in, ki sangkhaat ta hi. A om nawnlo kiuhkeuh cihphial ding hi zaw hi. 

Min deih man( Mualsuang). 
1948-62 Parliamentary lai in Zogam tualsuak Ngaingngaanzee party khat in, a lungsim bangun minam aa ding semzo kisa taklo uh hi. Amakai te 4-* in minam aa ding taangzai takaa asep zawhna dingun, Pyemah aa Ngaingngaanzee Party lian a popna dinguh thusim aki kup uh ciangin, tua Party a phuangpa lah ahi, a makaipipa lah ahi pa in,…….....taisanlo ding taisan lo ding,….......peuhmah taisanlo ngeingei lo ding; ………in ka Mualsuang ding hi ci’n minsial kawmin diangto in tangnial (veto)   h i, kici hi. (Pu Son Cin Lian in ahong gen) 
NB: - * Tuate in,
          1.   U   Mang Tung Nung
        2.   “   Khen Za Mung 
          3.   “    P. Khup Za Cin
        4.   “    Son Cin Lian 
  
Aangsung( amau ankuang ) ding bek aa sepna.
MP te khat kiangah, tu in amau Bahoo dongtak aa va kahuh ahih manin, ih minam aa ding a thupi mahmah vaite ahi,
(i). Zogam sungaa Meiteite in a-uut adah uhaa ahong gamhtatna uh bangci phisian 
          sawwm cih aki dot leh,” tuabangte bel eibangte hih zawh ding hikei,” cih ahi zongin;
(ii). Sagaing Taing leh Zogam gamgi vai bangci phisian ding cih a ngaihsutna aki dot leuleu ciangin,” Tuabang agen masasa peuh a nasepna panin ki khawlsak pahpah veh aw,” cih thu  ahi  zongin; 
(iii). Amah hihbang dinmunaa a omna in, vanleng ticket aki ngahtheihna ciang hileh pha
zo saktuak, lungkim tuak lel aa, minam aa ding peuhmah hanciam sawwmlo, phuut sawwmlo,  a sepsawwm tuaklo ahihna;
(iv). A beisa aa ih aanaa ngah party aa ih Ngaingngaanzee semte ahih kei leh Zomi ulian a kici peuhmahte in, gam leh minamaa ding sep dingin ngaihsut in neikha ngeilo in,  your  obedient servant  a kici bang linnliann  ahi uh hi. A tungsiahte cihbangin a sembek, a citak inncing ui a kici bangin aki sawlbang bang sem bekin,  aki pia bangbang tuahlap lap,  nelap lap bekte   ahi uh hi.  

Kigal bawl, ki langpan(Feud) na tawh aa aki sepna.
1961- kum, Parliament  masa hunlai in Health Assistant(HA) a ngahbek hilo, zong ka kahkhin zo hi. Tua lai aa aana ngah Party aa MP khatin amau mi khat a piaknop manin, kei akah kimlai hong tawpsak in amau deihsak pa a kahsak hi.  1989- kumin tua ex- MP pa ka innuh ah hong pai in, hunkhat lai aa kei vai ahi, ka HA kahna pan in ahong tawpsak na tawh kisai  a sepna khial kisa ahihna hong gen(confess) in ka maisak na ding ahong thuum hi.

Amanh ahong genna ah, amah zong ama thu tawh gamta a hihlohna leh a minpua (figure head) bek ahihna;  Party sungaa makai 3-( amin uh hong gen )* te in alangte  uh kuateng phial ding, kuateng a nasepna uh panin tawpsak ding; kuateng zakia sak ding; kuateng thongkhia ding; kuateng piang(transfer) sak ding cih sazian aki pia hiaa, ama aa dingin zong ol hetlo ahihna hong gen hi. 
NB:- * Tua te in 
          1. P.  Khup Za Cin
          2. “   Kiam Yin  
          3. “Hrang Nawl (Khalkha)             
A pumdian.
Pawlkhat khatte in Naingngaanzee in bang cih tellopi aa a pumdian, a pum hanciam, a pum kipeek pawlkhat om thei leuleu hi. Gtn:- 1970- huam pawl dingin Shierra Lornne ah, Sgt. Doe In President a seplai in gamsungbeel(insurgent) pawlkhat in kumpi galkapte Camp khat la uh hi. Tua sungaa van omteng khempeuh la uhaa, tua vante lakah Computer pawlkhat zong ki hel hihtuak. 

Tua insurgentte in a Computer ngahte uh TV sa in TV en dingin Computer pumvel thapai uh hihtuak.  Tuabang thupiang a President pa in atheih ciangin, “Computer khawngte TV a sa laite in aanaa hong ngahin gam hong uk leuh ih gam bang suak ding,” ci in a tauu hiathiat bek hi, kici hi. Ei sung zong ah tuabangdan tampi tak ki omlai hi. 
                 
Sunmang( day-dream ) tawh sepna.
Piang, piangzo ngeilo ding cih ngaihsut in neilo in, amau uukna bang tawh gelgel pongaa a lungkim mahmah pawlkhat zong a omthei leuleu hi. 

A tungaa thute hangin, ih Zogamah gam leh minam itna takpi leh pilna siamna tawh Naingngaanzee ki semlo ahih manin, ih Zogam in tuaa ih dinmun ciangbangaa a omlai ahi hi. 

Zogam Naingngaanzee Taangthu 
Zomite in, kuamah kumpi leh gamdangte khutnuai ah ih om ngeikei aa, eimau ukpi leh hausa tawh Kam Hau Upadi zangin aki ukte ih hi hi. Tua hiaa, 1888-kum Mangkangte in Zogam ahong laaktoh zawhciangin, tuama aa ih ki ukna bangmah in ei leh ei hong ki uksak lel in, galvai savai cihbang thulian mahmahte bek amau alen hi. India gam leh Kawlgam Governor khat khutnuai ah hong ukkhawm hi. Kawlgam bel Deputy Governor Zangkungah kawihin hong uksak hi. Kawlgam tawh Deputy Governor pa khutnuai ah ahong uk hangin, Zogam bel 1896- kumaa aki bawl Chin Hills  Administration Acts tawh atuam in ahong uk ahi hi. 

1935- kum ciangin, Kawlgam in a beisa aa mahbangin India gam tawh ki gawmin (attachism) hong uk ding utzaw maw, tua hilo in Kawlgam in India gam panin ki khenkhia in Governor khat khutnuai ah atuamin hong uk ding (separatism) utzaw maw cih Kawlmi te ahong ki dot ciangin, mekhiatna tawh separatism tawh ahong uk ding ki utzaw ahih manin, tua aa ki panin Kawlgam atuamin Governor khat in ahong uk ahi hi. Tuabang aa Kawlgam India gam pan aki khen ciangin Zogam zong Kawlgam sungah ih ki helkha mikmek hi. Ahi zongin Frontier Area Administration tawh Zogam atuam in ahong uk ahi hi. 

Bochoh Aung Sann in Kawlgam suahtaakna ding Mangkangte tung pan anget ciang in, Mangkangte in aana tawh hong hih peuhmahlo, Kawlgam suahtaakna lakna ding sungah ki helnuam ki hel nuamlo eimau hong teelsak in hong dong teekteek hi. Tua na ngawn zong ih teelkhialh khak ding hong lung himawh sakin, Kawlgam suahtaakna sungah ki hel lehang mailam Zogam ih mailam bangci dingaa, ki helkei lehang bangci ding cihzah dongin hong lak lailai hi. 

Tuabang zawh ciang, Zogam in Kawlgam suahtaakna sungah ki helnuam ih hih zawh ciang nangawn ih Zogam mailam vai ding hong lung himawh saklua ahih man in, Maymyo Inquiry hong bawlsak in hong sittel lailai hi. Zomi taangmite in, ka cihsa mah uh khel ngeilo ding, “Ngal- tangh hapaak sa tumkik ngeilo,” ci’n amau khensatna mah tawh Zogamin Kawlgam suahtakna laakna sungah kiptak in ih ki helta hi. Hihin kuamah ngawhtheih ding hilo, eimau mailam ding eimau mahmah in teelin ih khensat ahi hi. Hih in Zomite in ih Naingngaanzee tawh kisai ih khialh masak penna ahi hi.

NB:-
Kawlgam suaktaakna sungah ki hello hi lehang, Mangkangte in ei aa ding Special  Administration   atuam in hong bawlsak dingaa, Mangkangte khutsungah tuciang  dong ki om in, amau hamphatnate a nopsak pih ding ih hi hi. 

Kawlgam in suahtaakna angah ciangin, mualtung mi namdangte in amau ngaihsut theihna tawh in State nana la pah uh hi. Ei Zomite in ih hih leh, ngaihsun thei nailo, deih thei nailo ih hih manin State nana lalo uh ahih manin, Chin Special Division in ana ding bek uh hi. Hih in Zomite in ih Ngaingngaanzee tawh kisai ih khialhna a nihvei na nana hi hi. 

NB:- Dr. Vum Khua Hau in a laiat na sung khatah,  “ State bel ka lakloh uh, ka ngetloh mah uh hi ,”   ci tangial  hi.

Tu in, Kawlgam sungah kiptakin ki helzo ih hih manin, mailam Zomite tawh ki sai vaikhat peuhpeuh ih deihna leh tupna ih neih leh, Kawlgam bup taangaa ading  ahi, Houses of Paliament ii thukim pihna lo tawh bangmah apiang zo leh a piangthei ding thu ahi nawnkei hi. Gtn: - Zogam in Federal State khat in ih dinnop leh, Houses of Upper and Lower Paliament thukim (consensus) leh phalna kisam hi. Zogam leh Zomi nam tawh kisai thupi thuliante in, hihte thulo peuhmah tawh a piangthei leh a piangzo ding ahi kei hi. 

Kawlgam in suahtaakna a ngahzawh phet in, Zogam tualsuak Party nih ahong piang hi. Tuate in
1. THUPHA VAIHAWM PAWL (THVP) hi’n, a zawdiakin hausa leh ukpi luiite makaih ahi hi. 
2. KHAMTUNG SUAHTAAK VAIHAWM PAWL (KSVP) hi in a zawdiakin nautaang aki cite makaih ahi hi. 

THVP in a nualam ciangin, Kawlgam aa Party lian ahi, PHAHSAHPAHLAH Party (AFPFL) pawlbawl hi. Tua AFPFL in pawl nih in ki tamh leuleu in, khat in TANSIANN PHAHSAHPAHLAH hi in Vuangyichoh U Nu in a makaih hi. Adang khat in TEYMEE PHAHSAHPAHLAH hi in, U Ba Shwe leh U Kyaw Nyein te in makaih uh hi. Ih Zogam zong ah tuabang dan mah in Party nih in a hong dinguh hi. 

KSVP pen, a nualam ciangin CHIN NATIONAL ORGANIZATION (CNO) in Khamtung gambup huamin ading hi. 

Khatvei, 1961- kumaa  aana ngah CNO Party Ex-MP Pu Son Cin Lian tawh 1989- kumin ka ki hoilim na khat uh ah, 1950 huam pawl- Parliamentary Democracy lai in, mee ki teelkuan ding ciangin, pawlzawn in aki awt kheokho na ah,  khat leh khat  propaganda tawh ki gensia in ki ko ki kaapin ki om ngeiingaii hi. Tua lakah ka neu thu mangngilh mawh khat in, “CNO bul neilo, zung neilo, Vaansamh bang,” kici hi. Tua thu tuciangin ka ngaihsut kikkik leh, hi kasa mahmah hi. Banghang hiam cih leh, tualai in CNO in Khamtung buppi, Township 6- huam hiaa, a vekpi in ngahmah leh zong MP 6- ding ahi hi. 

Tua MP 6- te in Hlutdaw ah mee 400- vallak ah bangmah peuhmah thu neihzawh na neilo, phulzolo, lutzo lo leh tuhzo lo uh hi.  Amau Zogamah a sepzawh belbel in, Dolsel permit ciang, thau license leh University Stipend Chin Special Division allotment  a ngah sunsun  sung panin amau piaknopte piak ciang cih simloh gam leh minam aa ding bangmah septheih leh sepzawh a neikei  uh hi. Tuabangin, a tung aa bangaa aki cihna uh Propaganda in man ka sasann hi ci’n ama ngaihsutna ka dot leh; U Lianta(Son Cin Lian) in zong ka Zogam Naingngaanzee muhdan maansa lua a hihna; amau zong tualai in a Ngaingngaanzee dinmun uh  in, Zogam leh Zomite phattuamna  apiak zawhloh lamtak teluh ahih manin,  mailam aa a kalsuan zia dinguh  tawh kisai amau CNO makai  4-( amin hong gen) teng Pyithaungsuh Yeihtha aa Pa Mang Tung Nungte innah zankimh in Closed-doors-Top Secret tak tawh in ki kumh uh ahihna;  tuabang aki kupna uh ah,  CNO in ih gam leh ih minam aa ding bangmah phattuamna hong piazolo ahih manin, ahong piazo ding  Pyemah aa Party liankhat pop ding  thu aki sunh leh Pa Mang Tung Nungin, taisanlo ding CNO taisan ngeingeilo ding, CNO ka Mualsuang ding hi ci’n minsialin diangto liangin  thalnial gawp a hihna; kuamah a nialngamlah omlo ahihna; Galkap kumpi in aana hong lalo uh bang  hileh CNO zong ki tamh ding ahihna hong gen hi. 

Tuhun ciangin hihbang CNO te pianzia leh dante Zomi Ngaingngaaanzee sepna ah theihhuai ka sa mahmah hi. 

1989- kumin Zomi National Congress(ZNC) Signboard suanna ah kei zong ka va zoo kha hi. Tua laitak ah, ZNC hawihna leh a deihnate  atuamtuam in a genna kei zong ka kuppih in ah; ZNC in tutawwm bek aa ka zak ahihlohna; 1986- pawl dingin Sia Kam Za Kap leh Rev. Luai Go Thang ka inn uh ah hong hawhin ZNC thu hong ngen ahihna;  ZNC in Leitungbup Zomi aki ci peuhmah  ahong gawmtuah leh ahong lamsang ding leh Zomite ki pawlna min ahihna;  ZNC zumpi dingin Pentagon lim la in dawlnga mah ki lam ding ahihna( a drawingin tubangin ka vansung ah a omlai ding hi); ZNC huang dingin Kawlpi khua geiah 500- acre leitang lei ding aki hihna; ZNC ii ngimna, tupna leh  gelnate taangzai takin hong gen ahihna;
Tuni aa ZNC Party minin, ih Zomi min ki helna ahih zahkhat in ngaih ngauu-ngauu, khum ngauungauu a hihna; ahi zongin tua amin ngaih bekin ih Zomite phattuamna hong pia zotakpi ding mah ahi hiam? CNO pianzia tawh enkaak aa ngaihsut huai ahihna;  CNO in Khamtung gambuppi ahuam  lai na ngawnin Zogam leh Zomite phattuamna hong piazolo ahih leh, tuni in ZNC in  Tedim leh Tonzaang Myonee 2- bek huam zobek ahih ciangin,  ih gam leh ih minamte ahong piakzawhloh dan ding ka kumh hi. 

ZNC upate lakah khat in; keima muhna in toisa lua ahihna;  ZNC in NLD tawh alliance bawl ding aki hihna;  NLD in muanhuai lua ahihnate tawh hong dawngkik hi. 

Ke’n ka dawnkikna ah, NLD in muanhuai mahmah mah a hihna; tuabang aa muanhuai ahih zahkhat in alliance bawlbek in a sungah ih lut zawhkei leh leengnaa ki tangh  veve dingaa,  mite khamhval leh mite kha-teh kia  te nangawn ih tuhngah na ding ollo ding  ahihna; ei aki pawlpihte bek ih hiaa, amau sung  mahmah ah amau ei sangaa a deihsak zawk a diill aa dill ding ahihna; a taktak ciangin kyawwtha ziantha( inner circle and outer circle ) hong khen veve dingaa; en! a khateh kia nangawn ih tuhngah zawh ding ollo ding ahihna; tua ahih ciangin alliance bangbek sangin NLD pawlmi in lutpah lel lehang hawihzaw ding a hihna tawh ka dawngkik hi.  

Phattuamna ahong pia zolo ding Partyte. 
Zomi or Chin min apua Party neuneute in Zogam phattuamna ahong pia zokei ding hi.  Pyema aa Party liante ih popzawh leh tuate in Zogam phattuamna ahong piazo bek ding hi. Tua ahih manin, Zogam phattuamna ahong piakzawh na dingin, Zomi or Chin minpua  Party neuneute in amau adin uh sangin, tua Party min tawh pawlhuai(organize) sak aa Pyemah Party liante ih pop ding bek ahi hi.

Pi Aung Sann Suu Kyi
Ih Pi Suu Kyi in, mihawih, mipha, mipil, miciim, mitei, misiam, mina vak, mi thumaan, mi pawlhuai ahih na bel kuamah a nialzawh ding thu ahi kei hi. Amah in Kawlgam bang thamtham cikei ning, Leitung buppi nangawn aa dingaa a iiplah huai mahmah mikhat ahi hi. Tuabang a hihna tawh kizui in, mi a tamzawte in amah tawh kisai ngaihsut khialna lian mahmah khat a nei uh hi. Tua in,  amah thong sung pan in a hong suahtak zawh ciangin ahi zongin, MP ahong ngah ciangin ahi zongin ama thu tawh na khempeuh a hihthei pah dandan ding,   a hihzo pah ziahziah ding aki sak na ahi hi.  

Tuabangaa aki ngaihsutna in, South Africa te Mr. Nelson Mandela; Zambabwe
(Rhodesia) te Mr. Robert Mugabe bangdan ding aki sak man ahi hi. Pi Suu Kyi in tuate tawh aki tehthei peuhmah ding thu ahi kei hi. Tuate in, amau thong akhia Dr. FW de Klerk ahi zongin, aana ngah kumpi semte tawh ahi zongin gamvai hawmkhop ding thukim aa thong pan aa aki suahtak sak ahi hi. 

Pi Suu Kyi in tuabang hi peuhmah lo, amah a ki paampaih aki nawlkhiin theihtheihna ding, hithei leh leh zong a nuntakna a maimang saknuam liang ding zahdong aa ahua; amah gawwtna ding, amah   a puaseh na ding ngaihsut theih tawpna tawh aki gel National Constitution   aki kipsak zawh ciangaa, akhut leh akhe te aki lehheen zawh ciangaa tai dingaa aki sawlbang in thong sung panin ahong ki khahkhia ahi hi. 

Tu leuleu ciangin, President Thein Sein in Reform bawl nuam ahih hangin, Kawlgam sungah amah in a thunei bel ahi keizel hi. 2008- National Consittution bangin ci lehang, ama tungah Chief of Staffs a omlai  hi.Tua bek thamloh amah a thukim pih aanaa ngah Party sungah MP bangzah taktak om ding cih aki theikei lai hi. Pi Suu Kyi in ahong deihsak leh ahong pawlhuaisak(organise) sak ciang  bangbek hi dingaa, ama thu tawh  hong tang piaktheih cih bang a omngei kei ding hi.

Pi Suu Kyi in nasep hong ki pan leh, National Constitution a lungsim bangin puahphat kik dingin a masa belbel in ahong hanciam ding hi.  Tua hiaa, mualtung kah ding bang hileh, a mualbul ah om aa, mual dawnlam a ento ciuu-ciauu bang ahi pan bek ahi hi. 

Party liante aki ci in, kuate hiam?
Kawlgam sungah Party lian ih cihin tulaitak bangdan ahih leh, NLD (National League for Democracy) leh USDP (United Solidarity Development Party) or Pye Khaing Phyo te gel ahi pen hi. 

NLD
NLD in, Pi Aung Sann Suu Kyi makaihna ahi hi. Tua Party min tawh 1990- kumin  Gambup ii mee 82% angah ngeisa hiaa, taangpi taangtate in a muan bekuh hilo, a it aa apum it mahmah uh ahi hi. Tua bek thamloh, Leitung buppi in zong, a maikaipi  nu hangin a muan leh a pahtak mahmah Party ahi hi. Tua ahih manin, NLD in aana ahong ngah leh, Leitung buppi in Kawlgam lam tuamtuam panin a huhnop lamtak bel, uploh theihloh ahi  hi.

Banghangin  gammite in NLD hihzahta in muang hiam cihleh, a makai nu  itna, ngaihnate bulphuh in, kumtampi galkapte bawlsiatna athuak na hangin, khasiat in  a khuangaih na uh tawh amuan manuh ahi hi.  Ei sehtheihna ciangah ci lehang,  suallo in NLD in ngah dingmah in ih lam en hi. Ahi zongin; 

USDP Party
Hih Party in tulai takaa aanaa ngah Party ahi hi. Tua hiaa, amau khut sungah gam ii hauhna teng khempeuh leh  aanaa  teng khempeuh  a om hi.  Amau lah, aanaa ngahna ii a limhna a ciamsa, anop na a theisate ahih manun,  gam ii hauhna leh aana teng khempeuh hong zangin aanaa a taisuah loh theihtheihna dingin a tha neihtenguh hong suukin hong hanciamin pawl hong huaii leh,  aanaa ngahkik zolo ding aki ci theituan  kei hi. 

Ahih hangin, ei ngaihsut theih tawpna ciang bangin ci lehang, NLD lammah in aanaa ngahzo ding lamin aleek zaw lai hi. 

Zomite in ih hih masak pen dingte.
Zogam bel, hih ding a tamlua aa gen ding zong hi vetlo,  sep leh bawl ding aki pan nailo ahi hi. Zogam khantohna ding aki sepna dingin  aki samh masa bulpi( Infrastructure )te ahi,  ih neektawwm ding aki cinh masak limhlimh na ding,  Sang, Zato, Lampi, Lei, Tui, Mei te ahi masa bel hi.

Atungaa Infrastructures te ih sep kawmkawm aa ih patpah ding vaite in, minam ki ciankhat ih hihna dingaa sep ding(So-cio-po-liti-cal factor)te  ahi hi. Hihte,  ei aa dingin a thu pit dan; Bochoh Aung Sann in Kawlgam Suahtakna ngahna ding a hanciam laitakin a MOTTO uh in; “Hlutlatzee zahsihzee dii,  Pa-tha-mah uu-saa-pee; Hlutlatzee zahsihzee dii,  Duhtizah uu-saa-pee; Hlutlatzee zahsihzee dii, Ta-tihzah uu-saa-pee – Independent is The First Priority; Independent is The Second Priority ;  Independent is The Third Priority ,” acih mahbangin, tu ni aa Zomite aa dingin zong anuai aa tengin, bangmah dang tawh ki tehthei lo, “ Pa-tha-uu-saa-pee;  Duhtihzah uu-saa-pee;  Ta-tihzah uu-saa-pee,”  te ahi uh hi.  

1. Zogam  Federal State ngahna ding.
Zogam, gamkhat aa din ding ( Sovereign Zogam ). 
Zomite Pasianin minam kician khat( mun leh gam, pau, lai leh ngeina ki ciantawh a omte)  in ahong bawlzawh buangin,  gamkhat aa ih din dingin, Zomi aki ci khempeuh ii deih thu ahi hi. Ahi zongin ih Zogam Naingngaanzee kalsuan khialh ciangin, Kawlgam aki cihna sungah ih ki helkhaak zenzen na hangin, tua bangaa ih hihna ding a ol nawnkei hi. Kawl kumpite in lah tuabang aa ih hihna ding ahong phal ngeingei kei ding hi.

Hong phallo ding ahih ciangin, Kawl kumpite lehdona(violentism)tawh hanciam ding ci lehang lah, ei sangaa a lungsim uh akip akho aa a thupi zaw pekpek;  apil zaw leh asiam zaw pekpek; ahau zaw leh alian zaw pekpek; agam alei uh ahawih zaw leh apha zaw pekpekte  nangawn in kum 60- val bang ana hanciam uh hangin,  tuciang dong a tupna uh aki galmuh nai palpallo lai ahih manin, ei aa dingin a lamet huai kilkello thu ahi hi. 

Apiang zo ngeilo ding thu ahi, Sovereign Zogam  ih hihna ding deih tahang ci in tumh leh ngimin hanciam in ih neihneih lai leh, tua in UTOPIAISM or SHANGRI-LAISM  aki cite ih hi dingaa, ih pumpi, ih lungsim leh ih kha, ih hunte a mawk beisak lel ih hiding hi. 

Zogam Federal State.
Ei aa dingin a piangthei dingin, Zogam Federal State ih hih ding thu ahi bek hi. Banghang hiam cih leh, Kawlgam Naingngaanzee ah, 1947-Union of Burma National Constitution in, “Independent ngahzawh kum 10 ciangin, State te in khantohna ah a lungsim uh a batkei uh leh Federal State ngenthei hi,” ci hi. 

1948- kumin Kawlgamin Independent ngahaa,  tuazawh kum 10- a cinzawh 1958- kum ciangin,  State dangdangte in khua phawklo in a omlai takin, State sung panaa apil, atei leh khua aphawk masa bel Shante in, Kawlgam in Independent  angah uh a lungsim bangsa zolo takpi in, Constitution sungaa a om bangin, Federal State ngen dingin aki thawi leh, U Nu kumpi in pia nuamlo  ahih manin, gam ii dan hawihsalo khalzawh ngaplo ahih manin, General Ne Win tawh naale-hmu(ki gulluuk) in, CARE-TAKER  GOVERNMENT ci pongin gam ii aanaa  la(tein)sak  hi.  

Hun masa , U Nu te hun laiin bel, hih Federalism aki ci aki  tello zong ahi kei ding hi. Ahi zongin, Revolutionary Council hunaa ki pan, hunthak Ngaingngaanzee ah, ulianpipi aa aki nei Bochoh or DG, MD te ciang dongin hih Federalism aki gen ciangin, Kawlgam panin ki khenkhia aa, kumpi dangkhat, gamtuam khat bangaa om ding, dingg ding dan bang vive in ki ngaihsun in aki gen tawntung  ka zangei hi. 

Tuabang aa Kawl kumpite Ngaingngaanzee  telkhialhna (mis-interpretation or mis-understanding) na hangin, ih hun in khang nih taang mah ahong sawt tuam  baanah,  gamsung bel ci aa ei leh ei ahong thah zong mulkim huai ding zahdongin atam hi. 

Tuhun tak ciangin, a dangdang te’n zong atel naikei phial ding ahi zongin , Pi Aung Sann Suh Kyi in Federalism tellua mai hi. Kawlgam Naingngaanzee ah, apa’ lungsim, tupna leh ngimna teng  atel sinhsenh aa, tuabang linnliann aa a taangtun sak ding zong alawp mahmah hi. 

Tua ahih manin, tutung ngawngaw buangin,  akhang akhangaa ih tup, ih ngim, ih  lunggulh leh  ih lamet tawntung, ih nget kei leh, Zomi aki cite aa dingin,  leitung abei leh a beizaw mai dingaa, Federal State ngah ding lametna bel a omnawn kilkel kei ding hi.
  
2. Zogam leh Sagaing Division gamgi  amaan( Mangkangte hong uklai aa) bangaa lakkikna ding.
Mangkangte in Chin (Khamtung) gam gamgi suang ahong phuhsakna in,  khamh ki patna liann pan hi peuhmah lo in, khamh ki patna mualbul panin tai 1/2/3/4/5 mun khatkhat bangah tai 10 ciangciang zaanggam zong ahuam ahi hi. 

Ih muhpak dingin,  Tedim panin Kawlpi pai lehang, tu laitak aa Zogam gamgi leh Sagaing Division gamgi in, Tai 9- ah aki phut hangin,  taangthu zong aki citham ding hi nailo, a theitel lai amu tellaite in, nidangin Khamtung gam leh Kawlpi gamgi in, Sing-unau (Chuhtungpin) hi,  ci uh hi. 

Kawlte in, Chin hong ci uh hi. Ei leh ei  Zomi ih kici hi. Ih gam pen, Zogam in ih ki gen ding kimlai, Zogam ki cilo in  Khamtung gam peuh ki cimai hihang.  Tuciangin, tua Khamtung gam ih kicih,  Kawlpi kuamaa Ngaingngaanzee a uuk leh Khamtung a cihna ii akhiatna a telmahmah  Kawlte pawlkhat nana om hiding hiam,  Zogam leh Sagaing Taing gamgi dingin, Khamtung mualbul teekteek ciang bangkhatin khia in la miikmeeek uh hi. 

Hunlui Parliamentary Democracy kumpi, 1948-62 lai in hihbangaa Zogam leh Sagaing Taing gamgi buaina ki gen ngeilo hi. U Ne Win kumpi ahong kah ciangin, tua’ thanem na leh ih Zogam Naingngaanze or aanaa nei, Zomi ulian aa aki neite thanemnate meetdawh meetlaakin,  Kawlpi huam aa Naingngaanzee uuk aa aki neite ii aw vaanna leh huzaap na hang tawhin, 
(a).  Zogam leh Kawlpi gamgi munkhat khatah,  Kawlte hong luutin gam ahong keekna hangin, Zomi pawlkhatte bang tawh thubuai uh ahih hangin, eimite in thalelh uhaa, a zaanglo uh a taandan, hunkhat lai aa  Tedim Vuandok a semngei, Zomi khat in tel mah mah ahih manin, khasiat lua leh nasalua ahih  manin,  agen kawmkawm bang in a kahpau liang hi.
(b).  Tua  Kawl Naingngaazee uukte in, Kawlpi  Township leh Sagaing Taing aa aanaa  nei te zolua uh ahih manin,   Bahoo te thu tawh cipongin, gamgi bang adeih deihna uh ah hong suanto to uhaa, tu tataktak ciangin, Tai-9 mualbul, zaang leh khamh cinh linnliann ah Sagaing Taing Sign Board hong suangta uh hi.  

Tuabang aa ahih nate  uh, a diakdiakin,  a haihan Sagaing Taing Council Chairman pa Thura Kyaw Swa hunlai bangin suuk phadeuh hi.  Aman lah haihan tawh hihgawp, tuabang ciangin ei aate in lah, nupi gal gen a cihbangin, Bahoo te thupiakna bang tawh aki cih semsem ciangin,  a thupai zia a tello lua ahi, ei aate in hai  kihtakin lau mahmah uh ahih manin,  aa’naa lo leh lau hetlo takin  hong    hihgawp  uh ahi hi. Bahoo te thupiak acih un, zuau bulom tanghpi ahi hi.  Constitutional Procedure bangin ci lehang, Taing ahih kei leh Township  khat leh khat gamgi thak phut ding ahih leh,  Taing leh Township concern’ mipite thukimna  bang hidingaa, tuabang tawh in Hlutdaw in  a confirm sak ding ahi hi.  Hlutdaw in Taing leh Townshipte thu kim na omlo in amau thu tawh in atung panin thu pia cihbang a omngei  kei ding hi. 
(c ). Tu in  Zogam leh Sagaing Taing gamgi in a kipsa aa a  omsa gegu kimlai  ahong ki guksak hiaa, Hlutdaw ah ko lehang, Court of Inquiry  Commission hong phot sak leh, tuate in aki sam bangin hong hihsak dinguh  ahi hi.

Ih Zogam  gamgi pen, tuciang dong pawlkhat a kiplai zong omlai ding hi. Mangkang te in aki sam bangin kiptak leh khotak tawh lim phatakaa a hihsa hiaa, a om nawnkei phial leh zong, map reference tawh kankik ziau aa, a thak phuhkik ding ahi hi.   

3.   Zogam ah Kawlte leh Meiteite aa kipan mi namdangte a-uut adah uh in, zahtak kihtak  neilo aa  ahong gamhtat , ahong  pheengtat uh a bei theihna ding.
Zomi a kicite lungsim puakzia( mind set )in, ei lo peuhpeuh, ih baangkua sung ahih leh, ih innkuanpihte  lo peuhpeuh;  ih khuasung ah ahih leh ih khuapihte lo peuhpeuh, Tedim ah ahih leh, ih Tedim mipihte lo peuhpeuh thupiit ngaihsut pah, zahtak bawlpah in ih kih taak bawlpah  hi. Ih tua cih banglo in, ei leh ei ih ki thupiit bawl, ki thupi simlohna tung tawn in, ki zahtak  bawllo,  ki kihtak bawllo in, ih ki thupisimh kei pah leuleu hi. 

Tuni’n, Meitei leh Kawlte aa kipan minamdang(maithak)te in, ih gam ih lei ah kihtak bei, zahtak bei in hong sungtum  pusuakin,  adeih nakuh leh,  hong sut,  hong laksak in ahong gamhtatna in, ih lungsim puakzia uh hong tellua mahmah uh ahih manaa ahong kihta kilkel  lohna  hang uh ahi hi. 

Hihbang  ih thaang-awkna( Dilemma) panin ih suahtak  theihna dingin, 
(a). Eimau mahmah ih ki puahphat zawh ciangaa midangte in hong zahtaakna leh  hong kihtaakna panin ahih kei leh;
(b). UN te ii maikaihna tawh aa aki phuan Human Right  Organization te ii hong huhna leh hong panpaihna tawh Kawl kumpite hong makaih in  ahi zongin, ih suakta theibek ding hi. 

A tungaa thu nihte lakah, ei leh ei ih ki puahzawh ciang cihin,  aki ciangtanh theilo ding zahdongin hong sawtlua ding ahih manin, vai kicianlo a muantak ding ahi kei hi. UN Human Right Organization te panpihna tawh kumpite hong makaih sak dingin a ol leh abaih belbel ding thu ahi hi. 
     
4. Zomite in Kawlgam suingah INNTEEK  DINMUN ( Ist: Class) ah ih om na ding. 
Kawlgam sungah innteek bullam( Ist: class  )ah ih om ding sangsikh in, leengnaa, peem
ta( 3rd: class)  bangin hong kibawl hi. Zomite  in, anuai aa thute hangin Kawlgam sungah innteekzaa a ngahsa ih hi hi.  
(a).  Bochoh Aung Sann in Kawlgam Suahtakna ngahna ding Mangkang kumpi tungah a nget ciangin,  Mangkangte in Zogam aa kipan Mualtungmite,  aki helloh in pialo  dingin, kall in nana deek bawl pah hi. 
(b).  Bochoh in, tua ahih leh ci’n, Mualtungmite thukimna angah theihtheihna dingin Pinlon Conference bawlin aki peipah biangbuangaa,  mualtung mite thukimpih theihtheihna dingin kamciam tuamtuam apiakna ah; 
        Kawlgamin Suahtakna angah ciangin,
( i   ).  Hamphatna aki ci peuhmah, Kawlte leh mualtungmite in aki bang, aki  kimhin noptuamna leh hamphatna ngah ding, Kawlte in peekkhat manh angah leh Zomite in  zong  peekkhat manh mah ( Burma ta-kyat, Zopmi( Chin) ta-kyat).
(ii ).    Kawlgamin Suahtakna a ngahzawh kum 10- sungin Mualtungmite in a khan tohna uh a lungsim uh a batkei leh, Federal  State tawh adin theihna ding ngenthei ding; cihbangaa kipan kamciam a piakciangin, Mualtungmite in zong a thukimna uh tawhaa Kawlgam Suahtakna aki ngah ahi hi.
(c ).  Kawlgamin Suahtakna a ngahzawh phetin, a ciiangciiang pan gamsung belin, kumpi te  aki lehdona ah, Kawl kumpi tapongte khutsung atung ding kimlai,  anuai  aa  bang in  Zomi galhangte in, asi anaai  bek hilo a nuntakna uh apiak dongin a honkhia uh hi.
( i  ).  Kazian tapongte hat mahmah uhaa,  Kawlgam mun tuamtuam a laakzawh baanuh ah, Kawlgam khuapi Zangkung alaak dektak laitakin,  Zomi  galhang te hotkhiatna hangin, a suakta hi. 
(ii  ).  1948- 90 ciangciang, Kawlgam sungaa tapong namtuam tuamte hat mahmah uhaa, Kawl kumpi in lelhtaakin aneih laitakun, Zomi  galhangte hangin, zawh kikna in nei in a suakta  uh hi.

Tuciangin, Kawlte in a tungaa ih hihnate  melhbawlin,  ei leengnaa, peemta bangin hong  bawllel uh hi.  Bangci bangci in ih hawih gen hangin, dii chin dii ahong kicih limhlimhin, mihing ginaa mihing ki cianaa ahong ki sehlohna dan kammal ahi hi. 

Hunkhat lai in Zomi galhangte  hangaa Kawlgam aki hotkhiat zawh banglo in, tuciangin, galkapbu ding gengenloh galkap nautaang ding nangawnin ahong ki saang nawnkei hi.  Kumpi nasepna ah hong ki nawlkhiin hong ki paampaih ta  hi.

Zogam state ih budget zong,  amau khatehkia bang, haaniibaal baangbang  lel  hong lot, hong paih lel bek uh hi. 

Akua akua in Ne Win hunlai ih cihcih hangin, tualai in ei mualtungmite hong  aang- vaan lai aa, ei aa dingin hunphat lai bangkhat in ki ngaihsun thei hi. Tuazawh nua ciangin, hong aangvaan gengenloh, Kawlgam sungaa mualtung mi aa kipan minam neu dangdangteng  hong melhbawl hong maimang sakna dingin,  Myanmar( Kawlte) aa ki pan minam tuamtuamte Burma aki cibel,   Burma cih kawih nawnlo  in, ih vekpi in Myanmar( Kawlte)  kici aa, tua khempeuh Buddist ih hihna dingin, 2008-National Constitution hong bawl ahi hi.  
A tungaa thu tawh kisai in, Kawlgam, Nyipyidaw aa World Economics  Forum ah, BBC makaihna tawh Daw Aung San Suu Kyi leh mipite World Debate aki bawlin, BBC Chief Journalist in, Burma leh Myanmar aki lamdanna a dotna ah, Pi Aung Sann Suu Kyi in, teltakin gen hi. Ih pi ii dawnkikna bel, mulkimh huai ding zah dongin  hong  hilua   mahmah hi. 

5.  Zogam leitangh  neih theihna( ownership tenure ) in Pyema( Burma Proper ) aa bangin, Free hold land,  Grant ( 90,60,30 ) ih neih theihna ding.  
Tuciangciang aa ih Zogam leitanghin, ih Sangmangte in thu ana mukhol uh ahih  manun, Missionary  huangteng 90- year grant tawh ana hih cih simloh  uh, adang teng khempeuh kawwm(land lease status) bekaa a omlai ahi hi. En! ih hihleh, kapu kapa  innmun,  logam ih cih kanhkanh ih cih laanlaan hangin  kum 10-  lease bek tawh  ahong kipia  lelbek hiaa, tua nangawn zong a uut hunhun  aa ahong ki laksak theilai  ahi  hi. 

Gtn:- Grant renew theihna ding , Mangpipa in thu anei hi.Phalaam aa ZBC   huang zong kuamah in donlo ahih manin 1980- huam pawl dingin a grant  validity abei ahi hi. A renew kik ciangin, Mangpipa in renew sak nuamlo  bangkhat ahi taam  maw,  tu in ZBC  huang khenkhat bang aki taan suak hi.

Source :
from:pzmung pzmung@singnet.com.sg
reply-to:zomidaily@googlegroups.com
to:tongsan@googlegroups.com
cc:zomi@yahoogroups.com,
khuanonet@googlegroups.com,
USAThuthang@googlegroups.com,
vaihunta@googlegroups.com,
atlanta-zomi-innkuan@googlegroups.com,
zomiinnkuanusa@googlegroups.com,
ZomiOK@yahoogroups.com,
zomicenter@yahoogroups.com,
zomidaily@googlegroups.com,
zozum@googlegroups.com,
zominam@yahoogroups.com,
tongsan@googlegroups.com
date:Sat, Jun 25, 2016 at 10:34 PM

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMITE LEH NAINGNGAANZEE ( ZOMIS AND POLITICS ). Agelh - Pu Pau Za Mung Description: Rating: 5 Reviewed By: Cinpu Zomi
Scroll to Top