728x90 AdSpace

Hot
Menu
Zon-ol na Donate

Latest News

A Ithuai Thu Lamdang Muhthakna (Beautiful Surprise). Agelh - Pau Sian Lian

A Ithuai Thu Lamdang Muhthakna
(Beautiful Surprise)
Agelh - Pau Sian Lian

      Research i cih thugil kantelna a kibawlteh hih a ithuai thu lamdang muhthakna cih khat om thei hi. Mikang lai-in beautiful surprise ci-in min na phuah uh a, thu-le-late sakhi tuineek a kipan kankik ci ding i hiam, a dawn dong kan kikkik, kan phapha, kan behbeh, telkheh kikkik, sit niloh lehang upmawh loh, lamet loh, ngaihsut hetloh, phawkkhak ngiatloh lamdang i sak thusim, thuthak honkhat muhkhiatna om thei hi. Tuate pen mipilte’n hoihsa ngiat, ithuai nasa ngiungeu ngiat uh ahih manin a ithuai lamdang muhthakna (beautiful surprise) ci-in na ciamteh uh hi.

     Gentehna pawlkhat en pak dih ni. 1990 kim pawlin US ah Immigration zumte’n Mexico gam pan a lutsim gammi lo pemta, a guklutte khauhtakin bengin, man uh hi. Tua bang mite nasep a guan sumbawlte, setzung neite nangawn kumpi-in thubawl-in, thusit thuak lawh uh hi. Tua bek thamlo gamhuang cing ding galkap tampi panmun piak behin, a gamgi uh lim cin mahmah uh hi. Ahi zongin thugil kantel Douglas S. Massey in hih gamdang mite’ lutsimna tawh kisai ciantakin a kantel leh, US kumpi in tua bangin policy khauhtak bawlin a gam uh a kepcing a kipan gamdang pan a lutsimte milip in khang hanhan zaw dan hihtuak hi. A diakdiak in Mexico gammi a lutsimte’n hihbang kiben kimatna a uat tektek teh kimatding lau-in, a gam uh ciahkik ngam nawnlo zaw uh hi. A tungin nitawm, kha tawmno sung hawh pak, na sem pak dingin a lutsim, pusuak sim ziauziaute ciah kik ngam nawn lo-in, US ah teng suak uh na himawk hi.


     Philippines gam Baguio khua ah sang ka kah laitak-in thugil kantelna hong kibawl sak-in, ko veng hausa pa tawh ka kimu hi. Hausa pa’ hong genna-ah, i veng ah ninte pen thukhun kizui lo-in, kibua zelzul lua hi, hong ci hi. Baguio ah nin a muatthei le a muatthei lo cih bangin khen khitteh kibuasak hi. Tua ahih manin kei zong inn 50 val bangah ninbuakna tawh kisai thudotna lai hawm kawikawi-in ka kankan leh, ka vengpihte pen nin a thanghuai buak zeelzul na hilo zaw-in, ninkhawm mawtaw hun manin pai meello ahih manin a thanghuai na hizaw hi. Tua bek thamlo singhiang, singkang, sik themneng pawlkhat cih a kipan nin pawlkhatte ninpua mawtaw in sanglo ahih man-in paih, buak nang theilo in buai zawlai uh hi.

     Hihte pen a ithuai lamdang muhthakte cih theih hi. Kuamah upmawh, lamet lohte na hi hi. Ka thesis gelh khat ahi, ‘Tedim Numeite Kim lepam Khantohna Nasepnate-ah Kihelna’ cih ka gelh lai-in Tedim ah ciahin thu ka kan a, hih thutawh kimeizom in Zogam, Zomite bang hang zawng cih khawng zong ka kanbeh pian leh lamet loh honkhat ka tuakkha hi. Lam gei-ah kimuhpih ziaupak, hih vaitawh kisai kin dingin ka upmawh masakloh pawlkhat geel khollo-in thu ka dong a, amau hong dawnnate na thuk mahmah ziau mawk hi. Zogam’ hihna taktak teng hong genkhia ziahziah uh hi. Ei mite dinmun tawh kisai i makaite’ gen zeel khat ahi, ei-le-ei sungah zong i kicih zeuhzeuh theihkhat lah ahi, i tha nemnate lakah a hidiak pawl cihtheih lah ahi, “ theihtam, teltawm”i kicihcih pen hih thuthuk, thugil kantelna tawh a hiciang khat kipuahkik, bawlkik, zunkik thei dingin ka lamen hi. Kei mahmah zong ka tel tawm lua a hih manin thugil kantel in, telkheh tangtang ding ka vei mahmah khat hi.

     Hih zo lehang Zomi Thugil Kantel Pawl (Zomi Research Institute) cih bangkhat nei-in, i gam ki-ukna vai, minam vai, mailam phutkhaktheih ding vaite, a sia a pha i tuatkholh, theihkholh, leh kigin kholh zawh nading kantelna neihhuai kasa hi. Tua khitteh kum khat khatvei/nih vei ahi phial zongin, i thugil kantel sate simkik, hopsawn kikna (research paper reading/presentation) te neizo zeel lehang ei mite ading a ithuai mahmah lamdang muhthakna tampi omkha-in ka um hi. A diakdiak-in sang pilna lamah bang cile hang hih thugil kantelna a omlo sang leh kipawlna pen mannei lo-in kiciamteh phialmawk hi. Khangthak naupangte’n hih thugil kantelna a dan, a zia-le-tongte lungsim ah vom thei-in, a maingap theih nading uh le thu khentel theihna (critical thinking) a hiam semsem na dingin thu kinialna (debate) pawi khauhpai mawhlo khawngzong bawlsak-in, kidemsak huai kasa hi.

Source :
 “Bucing Khantohna le Picing Ki-ukna” Laibu
Agelh - Pau Sian Lian

Leigelh Pau Sian Lian in Zomi eLibrary / Laibusaal ading in Phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A Ithuai Thu Lamdang Muhthakna (Beautiful Surprise). Agelh - Pau Sian Lian Description: Rating: 5 Reviewed By: Cinpu Zomi
Scroll to Top