728x90 AdSpace

Hot
Menu
Zon-ol na Donate

Latest News

A KHUANGAIH-HUAI MIDDLE EAST VAIBUAINA. Agelh - Rev. Kham Lian Suum

A KHUANGAIH-HUAI MIDDLE EAST VAIBUAINA
Agelh - Rev. Kham Lian Suum

Abeisa kum tampi leitung gambup thupiangte i et ciangin bang thuthak thulu (new headlines) suak mun pen hiam? Ahuampi-in a kitamzak pen thute a nuai aa bang ahi hi.  
(1) Tuma kumli lai aa kipanin Middle East aa Arab gamte kipuahphatna lianpi khat hong kipan hi. Democracy ading lungphona leh nasepna nasiatakin hong omin kum sawtpi a kipsa Arab gam ki-uknate kiphukpai-in hong kilumlet hi. Ahih hangin tua nungsang aa thu-nungpiangte i et ciangin ngongtatna, sisan naisan luanna leh tua gamte huam sung tenga kizeel kibawlsiatna tuamtuamte tawh hihbang sepna in a mawkna, a tup a ngiimna tawh a kigamla tektek nasep hong suak hi. 
(2) Hih thupiang meizom mahin Syria gamsung gal hong suakkhia a, mi 200000 valte nuntakna beilawh taleh, Syria mi thahatpa Bashar al-Assad tuanpai zo tuanlo hi. Hih gamsung galpianna in gammi nautang atul-athente galbu-a tai (refugees) suaksak a, inn-le-lo nusia-in, innveng-gam Lebanon, Jordan, Turkey leh Iraq gamte ah galtai uh hi. 
(3) A beisa kum 2 lai pawl aa kipan Iran gam in a neih uh a lipkhap huai nuclear thautang hong nak hanciam tektek ciangin Nitumna Gamte linglawngsak a, maitang kituahin ngaihtuahkhopna (rounds of negotiation) tamveipi bawlnate’n a khamuan huai tawpkhakna taktak neisak zo lo hi. 
(4) Hih teng kawmkal lakah hong kilaithun thu poi khat pen leitung tangthu-ah gam thak khat-a dinnopna ahi Islamic State (ISIS leh ISIL zong a kici) hong laan’siatna ahi hi. Hih IS te in tuma-lai aa Syria leh Iraq gam gawm sehthum suah sehkhat laksak ahih manin hih gam nihte a ngei bang zo ngei nawnlo ding zahkhopin kitamzan hi. IS te’ thupuankhiat khat in muslim khempeuh Koran hilhna siksanin Islam thukham siangtho tawh makaipi khat (caliphate)’ ukna nuai-ah Islam biakna tawh ki-ukna empire lianpi phuatkhiat kikna ding ahi hi. IS nasepna in Nitumna lam thupuak nasemte, amau’ upna tawh kituak lote kiphasak takin ngawngtanin, videos tawh kithehzaal sak uh a, a galmatte uh a tulin thatlum khit bek thamlo, numeite pen pasalte nopsakna aa zat dingin salin zuak uh ahih manin tua kiim aa om mi tul-then tampite lauthawng sak mahmah uh hi.  
(5) Israel leh Palestine kilangneihna zong a dam theilo natna bang hi. Nung kum (2004) khal lai (summer) hun lai-in Gaza aa om Hamas-te leh misuam honkhat in kigi-khen neilopi-in Israel khuapite leh khua neute tungah rocket leh mortar thautangpite va lawn uh ahih manin Isreal in a nasia mahmah leinuai lam pan lehdona tawh na thukkik hi. 


Banghangin Middle East ah hibang buaina leh ngongtatnate om sese hiam? Tua thupiangte nungah bang thu om a, koi lamah nawtsuak ding ahi hiam? Hih thudotnate thupi hi. Ahang pen Middle East aa thupiangte i tel kei leh, leitung aa thupiang a dangte tampi-in kitel theilo ding ahih man ahi hi. Banghang in piang cih zong thupi kaan lai hi. Hih bang ziate in Middle East bek sukha hilo-in, leitung bup hong zaap kha ta ahi hi. Hih thupiangte’n bang neikhawm uh hiam? Leitung thupiang a phawk kha den (astute follower of world news) na hih leh, hih thupiang tengin a kibanga a neihkhop uh thukho khat na om a, tua in- Islam ahi hi. Amaute ahih leh a kamsang uh Muhammad’ ngeina ahi Islam’ lai siangtho Quran leh Hadith sung aa kigelhte upna in a tawsawn ahi hi.

Pianzia Kidangte leh Kilangneihna Ding Genkholhna
            Hih bang i gen ciangin hih tangthu in tuhun-a piang tawm thuthak ahi kei hi. Tuma kum 4000 lai pek, Lai Siangtho bu masapen Piancial sungah na kipan khin hi. Abraham kici mipa khat, a zi Sarah in ta a neih theih loh ciangin, Sarah’ salnu Izipt mi Hagar tawh ta neih ding cih, a haivai mahmah lungsim khensatna aneihna tawh hong kipankhia ahi hi. Tua khensatna in tuhun dongin khap hong tawnsukin, nungzuih hong nei suak ahi hi. Tuin Sarah in nau apai Hagar haza kik mawkin, a thuakzawh loh zah dongin gawtbawl ahih manin gamlakah Hagar galtai hi. Tui duh dangtakin si dingin a om lai takin Pasian’ vantungmi khat hong kilangh in, amah leh a suak ding a tapa a sih lohna ding thu tawh khamuangsak hi. Tua khit ciangin Pasian’ vansawltak in a tapa mailam thu ding na kamciam hi: Na suanlekhakte nakpi takin tamsak ding ka hih manin amaute kisim zo lo ding hi. En in, nau paii a, tapa khat na nei ding hi. Ama min Ishmael na phuak ding hi. Banghang hiam cih leh, TOPA in nangma thuakna hong mu khin hi. Amah pen la a zual nailo bang ding a, amah in mi khempeuh langpangin mi khempeuh in amah langpang ding hi. Ama behte khempeuh a langpangin om ding hi, a ci hi. (Pian. 16:10-12). Gamthu (politics) pan en lehang amaan khit lo tawh a kibang taleh, Arab mite in tuni dongin Ishmael’ suanlekhakte ahihna uh ang’tan pih mahmah uh hi. Tangthu i et ciangin Middle East sungah a kikualzop ngongtatnate leh gal kidonate a omden mah bangin a kipawlkhop theih ding uh haksa mahmah hi. A kipumkhat sunsun uh hun pen aana nei kumpite ukna nuai ah aana tawh daitak omloh phamawh in a kibawl hun, ahih kei leh, kipawlkhawmin adang khat a do khawp uh ciang ahi hi.  Arab paunak khatah: Kei in ka sanggampa ka langpan hi. Kei leh ka sanggampa in ka tanaute ka langpan hi. Kei ka sanggampa leh ka tanau teng in ka vengte uh ka langpan uh hi. Eiteng i vekin khualmi i langpan hi, ci-in kigelh hi. A tawpna kammal ahih leh, “Kei, ka sanggampa, ka tanau teng in leitung ka langpan uh hi,” cih tawh na khum hi.

            Piancil Lai Siangtho sungah a genkholh bangin Ishmael’ suante tangthu in kithutuah lohna leh kidona vive hi. A tamzaw Arabia pan hi a, September 11, 2001 kum ni-in khualzinmi tuanna jet vanlengte tawh World Trade Center leh Pentagon a dona uh tawh leitung vai a kikhel suaksakte ahi uh hi. Arab galdo (fighter) te mah in Afgnistan gam bulphuhin misuamte busakna mun suaksak uh hi. Arab galdote in a thak aa kitangko IS kilamna nungzang-guhpi ahihna pen a piangtawm thu ahi kei hi. Arab-ah gam ki-ukna a kip ngiimngiam aa om gamte tua banga a om theihna pen ama deih banga a uk zo ukpite (dictator) a neihna hang uh ahi hi. Iraq gamah Saddam Hussein, Libya-ah Muammar Gaddafi bangin mi thahatte in zawhthawhthu tawh daihna sungah lutpih kei leh a mipite hun sawt kipumkhat zo lo, kilemna in sawt khom thei lo hi. Hih bang makai thahatte a kipaikhiat pih teh tua bang gamte bangma lo-in vaibuaina sungah niamkiatsuk, cih pen i mu khin zo hi.

Galzo-in Gam Lianpi Hih Ding Genkholhna leh Gamkeekna
            Arab mite ading genkholhna Piancil 16 sung bek hilo-in, alian 17 na sungah Ishmael tungtawnin Abraham’ suanlekhakte thu genkholhna na om beh lai hi. Hih takah Pasian in Abraham tungah thugenin hibang ci hi: “Ishmael a’ding na ngetna ahih leh ka za khin hi. En in, amah thupha pia-in ka pungsak ding a, tampi tak ka phasak ding hi… minam lian khat in ka bawl ding hi (Pian. 17:20). Arab mite minam lian hiding cih, kamciam tangtung khin takpi-in, tuma kum zalom 13 lai pek ahi hi. AD 600 huam sungin Arabia tuikulh pan Islam biakna hong suakkhia hi. Arab mite in hih biakna thak pen Middle East sung teng mun citengah galvanzat zanghin zawhthawhthu tawh kizeelsak uh hi. North Africa, Europe ah kizeel to-in, Spain leh Portugal gam honkhop khat zong a lak khit uh ciangin Paris khuapi a tun uh teh, tua pan kilehkik uh hi.  

            Hih amasa kizelhna khit ciangin Islam khanna in thahatna nei nawnlo-in kum zalom pawlkhat sung khawl hi. Hih hun a beina pen Muslim gamkeekna lehdo kikna ahi Crusade galkidona ahi hi. Muslim ten A.D 635-638 sung Jerusalem kihel Lai Siangtho Gam (Holy Land) a lak hunin Islam leh Europe gam-a Catholic-te kidodo khin zo uh hi. Muslimte’n Spain leh Portugal la zo-in, France zong ladingin a hanciam lai takin, Paris ah 732 AD in gal lel uh hi. Tua hun laitakin Pope in thapia-in panpih ahih manin Europe’ kumpite leh mihau miliante’n Khristian biakna adingin Holy Land (Lai Siangtho gamteng) na la kik zo uh ahi hi.  A tawpna-ah Crusader-te in 1099 in Jerusalem lakikin, kum zalom khat sung a letcip khit uh teh, Saladin galkapte’n 1187 in nawtkhia kik leuleu uh hi. A nungsang teh Crusader-ten hun tawmvei sung lakik zo leuleu uh a, tua pen 1229-1239 leh 1243-1244 hun sung teng bek hi. Tua khit aa kipan Jerusalem khuapi pen Muslim te’n uk suaksuak a, Leitung Galpi Khatna dong ahi hi. British Galkapte’n 1917 in Ottoman Empire khut sung panin Jerusalem lakik leuleu uh hi.

            Hih a tunga i gen 12th Century lai-a Islam gamkeekna pen anih veina gamkeekna tuihualpi (the second wave of expansion) kici hi. Angahsa gam siksan kawm-a gamkeekna hi a, a ngahsa gam zahnih in zai zaw lai hi. North Africa pan a khanglam sub-Saharan Africa ban-ah Africa nisuahna gamgi dung teng, Middle East panin Asia Gam khanglam India dong  tung banah, South East Asia tuikulhte dong ban phei suak hi. Nitumna lam-ah Asia Minor teng, Black Sea (Tuipivom) leh Caspian Seas kiim teng, leh Muslim galkapte a kikhaktan kik madeuh, Europe nisuahna khanglam ahi Vienna dong ahi hi. Kum tul val sung Europe Gam Khuamial Hun (Dark Ages) sunga a omna pen a gilo Muslimte’n gamgi a khak kawikawina hang hiphadeuh hi. Hih hun sung tengin Arab mite makaih Islam Empire pen leitungah a khangto penpen gam leh minamte lakah khat hong suak hi. A diakdiakin Arab mite in Gamthu sinna (geography), ganan (mathematics), zatui lam pilna (medicine), bangteng a kigawm teh bang na piang cih suutna leh sinna (chemistry), innlam dan siamna (architecture) leh ni, kha, aksi leh leitung dangte thu sinna (astronomy) cihte-ah a khantohna uh kilangh mahmah hi. Hihte khempeuh pen tua ma kumza tampi lai-a amaute minam lian hiding cih Pasian’ kamciam a tangtunna ahi hi.

Nitumna Gamte, Adiakin America tung Lungtang Natna
            Arab gamte leh Nitumna gamte tuhun aa kilangneihna ahang bulpi ahih leh, Arab mite in hunkhat lai-a empire gam lianpi hingei napi, tuin sawtpek lai-a kipan tua gam kipukin a om nawnlohna thu phawk vilvel lai uh hi. A lai siangtho uh Quran sungah Muslimte in gam dang khempeuh a uk dinga kiciamteh sa hi, ci’n a genna in a upna uh nasia takin limpuak neisak hi. “Ama sawltak (Muhammad) lamlahna leh upna maan (Islam) tawh a hong sawlkhia pen Amah (Allah) ahi hi. Tua in biakna dangte tungah a lapsang theih nading ahi hi,” (Surah 61:9). Quran kamciamte nasia mahmah a, ahi zongin tua kamciam leh tuhun Muslim gamte dinmun hong kilehngat luatna hangin maizumna leh thangpaihna lianpi hong om hi. Arab gamte dinmun a dawldawlin a niamkiat lai takin, Nitumna gam lamte’n leitung lawhcin nopsaknate tawh kidimin a omna hang uh ahi hi. Tua hi a, Islam biakna kimaansakin Muslimte in leitung uk dinmun a ngah theih nadingun, Muslim tampite’ lungsim sungah  America banga Nitumna lam gam cihte peuhmah susiatmai ding ahi hi.  Tua ahih manin Sept 11, 2001 ni-in United States tungah theihkholh loh kidona hong om ciangin Arab khuapite’ lamdung tengah mi tampitak lungdam kipak in, America in hibangin vuakgawp satgawp a thuakna lungdamna pawi na kham uh hi.

            Tua hi a, Islam makai pawlkhatte in America pen “Satanpi” (the Great Satan), ci-in, Britain leh Israel pen “Satan neute” (little satans) ci’n na gen uh hi. Amau ngaihsutna ah hih gamte pen Islam in leitung bup ukna angah nading a khaktan Dawimangpa’ vanzat bangin a mu uh ahi hi. 

 Islam Gamkeek-Tuihualpi Athumna
            Tuhun ciangin a hang omlopi-a buaisak, kisuamna kipawlna (terrorist groups) te hong saankhah mahmah hi. 2013 kumin sazian kaihkhopna-ah tua bang misuamna hanga nuntakna bei lawh percent 80 pen a nasia deuh gam nga pan hi a, Iraq, Afghanistan, Pakistan, Nigeria leh Syria gamte ahi hi. A dang gam 55 te ah, percent khat leh, khat sangin a tamzaw misuamna panin sihna om, ci’n kiciamteh hi. Tua bang a semkhia kipawlnate pen ISIL, Boko Haram, Taliban leh al-Qa’ida-te leh amaute kizoppihte ahi uh hi. Leitungah terrorism panin sihna sehthum-suah-sehnih pen hih kipawlna li-te sung pan hi a, a vek un Islam vive ahi uh hi. Hih gam nga-te sungah Nigeria sim loh Muslim gam vive hi a, Nigeria ahih leh Muslim percent 50 ahi hi. Terrorism hanga sihna percent 80 pen hih gam nga-te sung pan hi, acih ciangin tuatak-a om Muslimte mah in adang Muslimte that cihna ahi hi. Nigeria ah 40 percent pen Khristian ahih manin bawlsiatna pen Khristiante tungah tudeuh hi.

            Hih bang Muslim-le-muslim kithahna a bangci thu hiam? A ngaihsun thei zawdeuh Muslimte nawlkhin nopna, aih kei leh, amau sanzia tawh kituaklo Muslimte amau sanzia sungah kikhelsak a kul, upna manlote ci uh a, Islam maan taktak a om nangin a kikhel kei uh leh namsau-mai muh ding ahi hi. Hih bang sanzia a vom’ pawlkhat mah in hibang zia tawh aom Muslim gamte leh Nitumna gam ziate a pakta Muslim gamte a gambupun Islam suahsak nading ngiimna tawh a kumpite uh phukpai ding geel uh hi. Syria ah Bashar al-Assad, Saudi Arabia, Jordan leh Kuwait te bangin a khangkhang-a uk kumpite sukpai ding cihnopna ahi hi. Nigeria ah zong biakinn-ah mihon thahna, numei naupangte manin bawlsiatna tawh a minthang Boko Haram misuamte’n Islam a kizelh nading nidanglai-a sepziate mah zangh uh hi. Bang a cihnopna hiam? A dawnna pen tel haklo hi.  Islam in kum sawtpi a ihmutna panin hong khanglo kikin, a gamkeekna tuihualpi thumna hong kipanta ahi hi. A khatveina leh a nihveina (600s leh 1200s) mah bangin Muslim gamte leh a gamgi-mong tengah ngongtatna, linglawngna leh launa piangsak hi. Ahang pen Quran sungah Muslim in leitung bup Islam ah kikhelsak dingin kisehsa cih upna hang ahi hi. Mi tampi in na nialin, langpa’n ding cih na gen lai ahih manin Jihad te sum tawh cialin na sem uh hi. 

            Muslim tampite in Islam phuankhiapa Muhammad leh nungzuite’ hunlai mah bangin makaipi (caliphate) khat’ makaihna nuai-ah Islam Gam (Islamic empire) a lunggulhna uh sawtpi hizo hi. IS te’n Iraq leh Syria gam pawlkhat hong lak zawh ciangin hih gam a phut kikin amau mahmah kitaangko pah uh hi. Ottoman empire ciang a kip, Leitung Galpi khatna tawh a mangthang Islam gamkekna pen tua hun lai aa kipan mahin Islam kipawlna a lauhuaite ahi Muslim Brotherhood, Taliban, al-Qaeda, Islamic Jihad leh Hamas teteng in a vekun hih upna masuanin na asem uh hi. Ahi zongin IS ahih leh Taliban, Boko Haram, leh Libya, Egypt, Algeria, Yemen leh Philippines gam-a om Muslim migilote’n a panpihna uh taangkokhia phial taleh, amau ngongtat luatna, sisan daangtak’ luatna hangin Muslim-bup a kaikhia zo takpi ding hiam cih lunghiang neih huai phot hi. Ahih hangin Muslim gamteng pan misuam galkapte (fighters) tampi kai zo ban-ah, Nitumna gamte ahi Britain, France, Belgium, Italy, Germany, United State leh Canada gam panin jihadist te tampi kai zo lai veve uh hi.

Lai Siangtho Genkholh Buaina Omlai Dingte
            Hih bang thuluanziate in leitung koitakah hong tunpih ding hiam? Mailam-ah bang piang ding cih a hong genkhol a muantaak zungpi khat om a, tua in Lai Siangtho, Pasian’ Kammal ahi hi. Lai Siangtho in a neng a tawng, ahi linlianin hong gen lo napi, a Kumpi Gam hong phut dingin Khazih hong paikik nading a hong lak thute a huampi hong mukholsak khin ahi hi. Daniel 11 na sung i sim ciangin Lai Siangtho ii a kizomsuaksuak genkholhna na om a, tua in Daniel hun-a pat Zeisu Khazih hong kumsuk kik dong Middle East sung teng a sukha thupiang a huampi etsakna ahi hi. Tua in Muslim gamte kipawlna makaipa hileh a upmawh huai “Khanglam Kumpi,” ahih kei leh Islam empire in a thahat Saklam Gam (Europe hipelmawh ding) tawh galkidona hong kipatkhiat ciang ahi hi. Hih kipatna in a kigenkhol theilo siatcipna a piangsak galdona sung alutpih, a kikualzop thupiangte hi a, atawpna-ah mongbeina a piangsak thei thu ahi hi.  Tua bang mongbeina pan a hunlapin mihing tate a honkhia dingin Zeisu Khazih hong pai kei leh, mihing nam a cimang ding zahkhopin lauhuai hi.

Thukhupna
Topa Zeisu in a Mate 24 na sunga a genkholh galkidona ban-ah, khuahun paizia kilumletna ahi zinlinna, tuihual leh huihpi laang’siatna, leitolhkhiatna banah nidang sangin i nisim nuntakna lauhuaina tampi tawh kidim hi. Hih Middle East thu i ngaihsut ciangin tangthu thupiangte mah hong piang kikkikin, Islam gamkeekna tuihual thumna hong kipan kik khin hi, cih hong phawksak hi. Lai Siangtho sunga thupiangte piankhiatna mun teng mahah hih thute kipan khin hi. Hunkhat lai-in Honpa Zeisu mi bang hong suah hunin, vantungmite’n “Van a sangbelna-ah Pasian’ Min thang tahen, leitung’ a deih mite tungah nopna om tahen,” (Luka 2:13-14), ci’n a tangko ziahziahna munah ngongtatna, kithahna, kidona leh kihuatna lipkhaphuai takin omta mawk hi. Hih in leitung daihna, nopna tawh a kidimsak ding Khazih kongpiang dongin a hong naina hong lak a, eite hong khual laina hangin a lungduaina hong phawksaksak ahi hi. Tuma kum tulnih lai-a Pasian’ Tuuno tawh hong kilangh pen a kihtaakhuai Judah Humpi (Lion of Judah, Mang. 5:5) in hong kilat hun hong tung ding hi. Hih hun nunung i nuntakna sung hunte i teltheihna ding Pasian’ Kammal sungah thuklutin i om theihna cih loh a thupi zaw om lo hi. Hih hun haksa sungah hong tonpih suak dingin hong Piangsak Pa tawh naitakin kizopna simloh a thupi zaw a om kei hi. I nuntakna a hong honkhia ding Khazih khephung nisim zuanin mi tampi zong zuatpih zawh nading ki-ap-in, thungen den ding pen hong Siam i Topa’ deihna ahi hi.  

Theihsaknop: Hih article pen Good News magazine, January-February, 2015 sunga Scott Ashley gelh Middle East Chaos: What’s Happening and Why, sungah a hoih leh a telnop dingin kong lekkhiat ahi hi. A nunung lam-a thukhupna pen keima lungsuak hi. Leitung thupiang leh Lai Siangtho etkakna, Tuhun Israel dinmun cihte na kannop leh internet panin na hawh lecin: GNmagazine.org; Israel My Glory: www.foi.org. November 2015.
                       
Agelh - Rev. Kham Lian Suum

Laigelhpa in Zomi eLibrary / Laibusaal ading in phalna hong piak ahi hi.
from:Kham Lian Suum 
to:cinpuzomi@gmail.com
date:Sat, Apr 9, 2016 at 12:10 PM
subject:Article khat hong khak ingh.
mailed-by:gmail.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

2 comments:

  1. This comment has been removed by the author.

    ReplyDelete
  2. Hih thu bel leitung buaina hong kipatna bang hang hiam? Bang hanga leitungah buaina om den hiam? Bang tan vei buai ding hiam? Christian ten lametna i nei hiam? cih a thei nuamte adingin simhuai hi. #US a kisuam pen 2011 hilo-in Sept. 11, 20001 hi a, Nigeria ah Muslim milim pen 50% bek hilo-in 56% hi lai hi. Sim nuam ei hong teisakpa leh hong hawmkhiapa Cinpu tungah lungdam ko ing.

    ReplyDelete

Item Reviewed: A KHUANGAIH-HUAI MIDDLE EAST VAIBUAINA. Agelh - Rev. Kham Lian Suum Description: Rating: 5 Reviewed By: Cinpu Zomi
Scroll to Top