728x90 AdSpace

Hot
Menu
Zon-ol na Donate

Latest News

BARCELONA 1992 OLYMPIC AH LEITUNG MITE’ ETTEH TAK DING THUPIANG. Agelh - Thang Khan Lian

BARCELONA 1992 OLYMPIC AH LEITUNG MITE’ ETTEH TAK DING THUPIANG
 Agelh - Thang Khan Lian


“Na hanciamna na khawlsan kei peuh leh na gualzo peelmawh ding hi”.
Aug. 20, 2016: Derek Anthony Redmond kici pen mivomte hi a, Sept. 30, 1965 in Bletchley, Buckingshire, England ah piang hi. Amah pen tai kidemna ah taihat mi (athlete) hi a, Men’s athletic record hi bangin na ngah hi:

WORLD CHAMPIONSHIP:

·         4x400 m relay, Tokyo 1991 ah gold medal
·         Rome 1987 in 4x400 m relay ah Silver medal

EUROPEAN CHAMPIONSHIP:

·         Stuggart 1986 in 4x400 m relay ah gold medal
·         Commonwealth Games, Edinburgh 1986 in  4x400 m relay ah gold medal na ngah hi.

1985 in 400 metres tai kidemna ah 44.82 seconds in a kung tung ahih manin British mi lak panin record break na ngah masa pen a, a sawt loin Roger Black in Derek’ record break sanga hataw in a zawh hangin 1987 in Derek in 44.50 seconds in record break kik a, 1992 ciang dong a record break kuamah in khup zo lo hi.


Tai kidemna tangthu ah Olympic gold medal ngah Carl Lewis leh Daley Thompson’ ten minthan’na leh pahtawina lianpi a ngah hangun Derek Redmond min pen Olympic tai kidemna tangthu ah tu dong kimangngilh thei nai lo hi. A hanciamna leh a tupna mun a tun’ dong haksatna leh gentheihna lianpi a tuak hangin tun’na dingin gi kikhun’na ciang (finishing line) a tun’ dong na hancian keeikaai ahih manin Olympics tai kidemna tangthu ah ama’ kung tun’ zia pen a tuampi hi a,  midangte tun’ zia tawh kibang lo ahih manin Olympic tai kidemna khangthu ah a min kimangngilh ngei lo ding hi.
1992 Olympic Summer Games, Barcelona, Spain ah 400 metres tai kidemna ah medal ngah ding lungulhna leh hanciamna tawh hong kihel dingin khentatna nei hi. Medal meel leh puam zong teel tuam nei se loin khat ngah teitei ding cih bek a lungsimah paai hi. Barcelona Olympics ma-in 1988 kumin Seoul Olympic 400 metres tai kidemna ah zong kihel dingin va kuan a, tai kidem kipat ma minute 10 in a khetul-a zagui natna (Achilles tendon injury) hangin kihel thei loin ciakkik hi. 1989 in a khe’ zagui natna hangin nga vei ki-at hi. Hong dam khit ciangin nakpi takin hanciam in, thathak la-in nakpi takin hong kisakhol a, Barcelona 1992 Olympics pen kei adingin medal ngah theihna dingin ka kaam leh hun hoih hi ding hi ci-in medal khat beek ngah ding lametna lianpi tawh tai kidemna-a kihel dingin hong kuan hi.
Barcelona Olympics ah  Derek' pa Jim in mun dangah a tapa a zuih den bangin zui hi. Amau pen pata ki-it mahmah uh ahih manin kimawlna-a a kihelna khempeuh ah kizui den uh a, lawm hoih mahmah ahi uh hi. Derek a tai ciangin a pa a nung lianah a tai bang hi.
Barcelona ah tai hat mi vive gamtuamtuam panin tampi tawh kitaiteh dingin hong tun’ khit ciangun a pata un mat (point) tam a ngah theih ding ziate uh kikum khawmin, abeisa hun-a a lawhsapnate uh kimangngilh bawlin vak khawm hialhial in holung kumkhawm masa uh hi. Kamsiatna khat a tuah kik vat uh leh zong tai kidemna-a zawhna gi kikhungna ciang tai dingin khentatna nei uh hi. Tai kidemna hong kipan ding hi ta a, a hat pen li ten semi-final ah lut ding cih thukhun om hi. Derek’ pa Jim zong tai kidemna a kipat ding ciangin Olympic kipat ma-in meisel kihalna mun panin a gam la lo khat-a om Olympic Stadium tutna tungah tu-in,  a puanak T-Shirt mai-ah, “Tu ni-in na khe na kawi hiam?” cih ki-at silhin a tapa bek a mit nauta tawh en in tu phieuphiau hi.
Olympic stadium ah mi  65,000 val tu phengphangin amau deihte ciat min loin awng ziahziah uh hi. Pistol hong gingin kidemna hong kipan a, Jim in, “Hanciam in, hanciam in, ka tapa aw,” ci-in a lungsim ah phun sieusiau hi.  Derek zong deih takin hong tai a, zawhna gi kikhungna metres 175 bekin a sap lai takin a khe taklam hong puak buat ging a za hi. Tua pen Seoul Olympic ah a tuah ngei mah ahi a taklam khetul zagui kitat na hi mawk hi. Derek in bai kawmin a khe en suk a, thau a kikap bangin hong na valval pan ta hi. A pa’n a muh phetin “Oh mawk peuhmah.. hi bang hi thei lo hi! ci-in a mai meivom pi’n a tuam bangin hong mial pah hi. A khe na sa-in Derek hong bai leklek ta a, tai zom ding a hanciam hangin a khe natna thuaklah lua ahih manin tai kidemna phual (track) ah a taklam khe hum sa-in hong tu suk hi. Siavuan ten zong huh dingin delh pah uh hi. Jim zong na om khong thei loin a tutna panin a tapa zuan dingin mihonte sik leh tot thuahin manlang takin a tapa kiang lam hong manawh sawm ta hi. Ahih hangin tai kidemna-a security ten tai kidemte taina phual sungah kuamah lut ding na phal lo uh hi. (Jim in hih thupiang teng a bei khit nungin “Kuamah in hong kham zo lo ding hi,” ci-in mediate kiangah gen hi).
Tai kidemna phual laizang ah Derek in a tuk suk kawmin, “Ka sunmang bei hi zen ta maw?” cih lim takin tel hi. A khituite kham zawh ding hi nawn lo a, a biangah hong tak keuhkeuh a, “Olympic ah kamsia kik hi ta’ng maw?” cih bek ngaihsun ngaungau hi. Siavuan ten liamna tuakte a zawn’khiatna uh (stretcher) tawh a zawn’ khiat sawm hangun na nolh a, “Hilo hi, tua tungah ka kah kei ding hi. Ka tun’na ding gi khun’na ka tun’ dong ka tai veve ding hi,” na cihsan hi. Tua khit nunga thupiang pen million tampite lungsim-a tham den ding tangthu hong suak hi.
Derek Redmond in na sa pipi kawmin a khete damdam in dom to-in bai lellek kawmin hong tai kik hi. Tawm vei sung sa khe kikap liamsak tai bangin a tai khit ciangin a khe natna hong na semsem ahih manin damdam in hong pai khiankhian ta hi.  A kitaitehpih ten khupsan kim uh a, Carl Lewis in zawhna ciamtehna gi khun’na mun 44.50 seconds in tung ahih manin khatna ngah hi. A dang tengin zong gi kikhungna dong tun’san tek uh hi. Tai kidem en ten bai leklek kawm-a pai Derek bek mit suanin hong nei ta uh a, kidemna man ta hi ci-in a khawlsan ding na ngak hieuhiau bek uh hi. Ahih hangin Derek in lungsi loin zawhna gi ciang dong a tun’ ding hanciam veve hi.  A hamciamna lungsim mei bangin mit lo hi cih mipi ten a muh uh ciangin hong awng ziahziah ta uh a, thapia ngeingai uh hi. Mipite awtna hu ging hong ngaih semsem a, Derek’ khe zong hong na semsem hi. (Derek Redmond in mipite awtna leh thapiakna ka zakna hang leh mipite lungkimna dinga hanciam ka hi kei a, ka tunna ding gi ciang dong ka tun’ nuam man hi a, ka hanciamna dong ka tun’ mateng kei tavuan a sem ka hi bek hi ci-in a tai kidemna man khitin mediate kiangah gen hi).
Kal khat khit kal khat mainawt in, a kal suanna hangin a natna hong kuangsak semsem a, bai liangliang kawm mahin a pai teiteina mipi ten a muh ciangun kham zawh loh ding khitui mi tampite biangah hong bua ziahziah ta hi. Derek khitui luang kawmin a bai leklek mah bangin mipi a tamzaw semte khitui zong hong luang beh a, mipi ten tha pia in, awtna hu ging zong hong ngaih semsem hi. Tua lai takin Jim Redmond thakhat in mipite dalna dinga kibawl daai tungah hong diang to a, security guardte peel in a tapa delh dingin hong kithawi hi. Security nih in delh in a kham hangun, “Huapa ka tapa hi.. Amah huh dinga pai ka hi hi,” ci-in awt khum baba hi. Derek in zawhna gi kikhun’na ciang a tun’ dong tawpsan sawm lo ahih manin a pa’n, “Ka tano aw, khawlsan lel in,” a cih hangin Derek in, “Hilo h paw aw, ka tun’na ding ciang ka tun’ dong ka pai ding hi,” ci-in dawng ahih manin Jim in, “Tua ahih leh I nihin I tun zong pai-in I zo ding hi,” ci-in a tapa’ khut leh a kawngah lenin paipih hi. Derek’ khe natna hong nasia semsem ahih manin a pa ngawng kawi in kap ngeungeu a, a pa’n a tapa’ khut a liangko tungah baatsat to hi. Derek in zong a pa ngawngkawi in metres 120 bek a cian lai tun’ ding manawhin hong ton khawm leklek uh hi. Jim in, “Hiah om ing ka tapa aw, I pata in I tun ma dong I pai dinga, I zo khawm ding hi,”  ci-in a aw neemno tawh a tapa tha pia kawm in paipih zom zel hi.  
A pata un a ciamsa bangun metres 120 kingawngkawi-in hong pai khawm uh a, kidemna en mi 65,000 val lak panin pawl khat ten thapia in awng uh a, pawl khat ten a khutte uh beng ziahziah in, pawl khatte khitui luang kawmin patate gel tun kal ngakin en uh a, zawhna gi ciamteh mun a tun dong uh tha pia uh hi. Zawhna ciamteh gi khun’na a tun dek lianun Jim in a tapa khut a liangko tung panin lak khiatsak a, a Derek bekin a hanciamna tawh zo hi cih lahna dingin paisak hi. Derek gi zawhna ciamtehna gi kikhun’na a pelh khit lianin a pa kawi kik a, a pata un lungdamna luankhi tawh kap ngeuhngeuh uh hi. Mipi tul 65,0000 ten zong lungdampihna leh zahtakna piakna lahna in ding to kim tek uh hi. TV cameramen ten delh ngeingai uh a, Jim in, “Ka tapa in a hanciamna a zawh theihna dingin hangsanna leh ngimna kician leh khauh mahmah nei a, kei pen pa ka hihna ka angtang pih theihna dingin ettehna lianpen hong pia a, ka tapa hangin pa khempeuh lak panin pa zaa ka hihna a angtang penpa ka suak hi. Gold medal a ngahzah in a hanciamna in lungdamna hong pia hi,” ci-in khitui luang kawmin TV cameramente kiangah gen hi.
Derek pen midang khat huhna tawh zawhna ciamtehna gi ciang tung zo bek hi a, ama’ hanciamna tawh tung zo lo hi ci-in a zawhna kisang lo a, Barcelona Olympic ulian ten “Redmond was disqualified and listed as "Did Not Finish" due to the outside assistance and finishing the race” ci-in a ciamteh hangun amah leh a pa’ hanciampih na leh a pata un a ki-itna uh mit a mute leh video a mu kha million tampite lungsim lawngkha in, khitui luam a tul a then om a, tu dong Youtube ah hih thupiang en tatsat loin om den lai hi. Hih thupiang pen Pate Ni a tun’ ciangin hih thupiang video leh Youtube video pen kinak share mahmah lai hi.  
“Na hanciamna na khawlsan kei peuh leh na gualzo peelmawh ding hi”.
Hih thupiangte Video.



(Rick Weinberg in a gelh “94: Derek and dad finish Olympic 400 together” - ESPN.com leh USA TODAY - FOR THE WIN “The most inspirational father-son moment in Olympics history will move you to tears” pan kong teisawn leh puahphat ahi hi). 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

  1. Ka khitui luangzo ei. Hih tangthu deih lua ing ei.

    ReplyDelete

Item Reviewed: BARCELONA 1992 OLYMPIC AH LEITUNG MITE’ ETTEH TAK DING THUPIANG. Agelh - Thang Khan Lian Description: Rating: 5 Reviewed By: Cinpu Zomi
Scroll to Top