728x90 AdSpace

Hot
Menu
Zon-ol na Donate

Latest News

Boyoke Aung San Leh Chin Hills Battalion-Anti-tank Regiment Officers Te (1946 kum October kha ni 10). Agelh - Pau Mung


Boyoke Aung San Leh Chin Hills Battalion-Anti-tank Regiment Officers Te (1946 kum October kha ni 10)
Agelh - Pau Mung


Amai gual tutna aa atu (Right) taklam pan in anihna ah atu pa pen Boyoke Aung San tawh anih un thu kikup khopna aneikhawm Subedar Captain Ngin Zam (O.B, B.G.M) ahi hi. Amah pen British gamkekte hongtun lai in sih le nan aa, a nado Zomi galhang Pu Khai Kam tapa neihsun ahi hi.

Boyoke Aung San pen 1946, Oct. kha in Kawlgam te ii Deputy Chairman of the Executive Council dinmun ah azaa kikhan in (Defence and External Affairs) vaipuak hong lenkha hi. Tua panmun alet laitak in Kawlgam galkap sung pan in aupa penpen,apicing penpen leh amuan huai penpen ahi Chin Hills Battalion te phualsatna Myeiktila khua ah vahawh in thusit, thukan na te vanei hi.

1945 Kandy Thukimna tawh kizui in (Burma National Army) leh British khutnuai aa asem Mualmi galkapte kigawm in akilam thak Burma Army cih kipawlna phuan uh hi. Tua akilam thak Burma Army sung ah (officers) thunei makai mimal 200 leh nautang mimal 5200 om in Battalion pen 15 pha uh hi. Tua Battalion 15 teng lak ah Burma Rifles mintawh Battalion 6, Karen Rifles min tawh Battalion 3, Kachin Rifles min tawh Battalion 2, Chin Rifles min tawh Battalion 2, No.4 Burma Regiment cih min tawh Gurkha te Battalion 1 leh Chin Hills Battalion cih min tawh Battalion khat hi in, a kigawm in Battalion 15 pha uh hi.

Chin Hills Battalion leh Chin Rifles pen kibang lo hi.Chin Rifles Battalion 1 leh 2 pen 1945 Kandy Conference man khit ciang in Burma Army thak in akiphot khiatna pan in hongpiang khia ahi hi.Chin Hills Battalion ahih leh British ten Zogam alak khit uh 1894 kum in Military Police Battalion min tawh akipan uh ahi hi.1894 kum pan kipan in Chin Hills leh Naga Hills teng ah Security vaipuak sem uh hi.Galpi khatna hongpian tak ciang in hih Battalion pan in galkap 56 in British te galte vado pih ding in Indian Division tawh (France) Piantit gam ah vakuan in gal vado uh aa,galkap 56 apai lak pan in galkap 42 te in galsung ah anuntakna nabei lawh uh hi.

Hih Chin Hills Battalion sung ah British te tawh hong tomkhawm ahi Gurkha,Gahuali minam te leh Zomi te zong kihel uh hi.1942 kum Galpi nihna hun sung in Japan galdo na ah hih Battalion te in athupi penpen panmun ah pan nala uh hi.Hih Battalion sung pan in Company 2 in Shan gam Shwelay (Bridge) lei adalna vuah galten na umcih uh aa,amau ii siamna hang tawh galte umcih na pan in nasuakta thei kik uh hi.British te India gam ah anungkik uh ciang in Gangaw - Tamu leh Imphal lampi dung teng ah security vaipuak sem in tai 300 val asau gal lampi teng adal Battalion te ahi uh hi.

1945 kum tak ciang in Japan te Zogam pan in nopkhia in,Minbu gam leh Irrawaddy gun dung suk aa (Bridge) Lei te vala in,British galkapte leh akipawl pih te aa ding in galmai vanawk in galdo te ahi uh hi.Galpi nih na hong bei khit ciang in akilam thak Burma Army akiphot ciang in Battalion ii tangthu akizom in hoihtak in kemcing in Chin Hills Battalion min mah nazang suak uh hi.Tuahun laitak aa akilam thak Kawlgam galkap sung ah Chin Hills Battalion te pen aupa penpen,apicing penpen leh amuan huai penpen dinmun ah hong om uh hi.

1946 kum ciang in aBattalion min uh azaa kikhan in Chin Hills Battalion pan in (Chin Hills Battalion – Anti-Tank Regiment) ah amin uh hong kilaih sak in 3 inches mortars thaupi te leh 87 inches Anti Tanks thaupi te lenkha uh h.Galpi nihna ma in Chih Hills Battalion te phualpi pen Falam ah hi in,Galveng khit ciang in Kawlgam laizang Myeiktila khua pen phualpi in na nei uh hi.

Tuabang in Myeiktila khua ah phualsat in a om laitak un Kawlgam ii Deputy Chairman of the Executive Council leh Defence and External Affairs Minister ahi Boyoke Aung San in Chin Hills Battalion te kiang ah pai in thusitna te vanei ding ahi hi.Chin Hills Battalion pen mualmi galkap teng lak ah Boyoke Aung San ii amasa penpen asit ahihna tawh kizui in Battalion officers te leh Battalion nautangte in nakpi tak in alungsim uh lawpsuah sak mahmah uh hi.Battalion pan in nautangte in Boyoke Aung San dawm ding in training na tualpi ah apawl,pawl in kizom in dingin Boyoke Aung San nangak ngeingai uh hi.1946, Oct 10 zingsang nai 10 leh minutes 25 hun in Chin Hills Battalion te omna phualpi ah Boyoke Aung San hongtung taktak ta hi. Boyoke Aung San hongtung tak ciang in Chin Hills Battalion te officers ahi mikang galkapte in nadawm tuah pah in zahtakna napia uh hi.Tuakhit ciang in amah adawm aa akigual zihziah ahi Chin Hills Battalion galkapte tawh kimu in thusit,thudot,thukan na te vanei in tuakhit ciang in Pengkul te kimut in Boyoke Aung San zahtak piakna nanei uh hi.Tuakhit ciang in Boyoke Aung San leh Battalion officers te,Mikang
officers te apawl,pawl in maan kizaihna na neikhawm uh hi. Boyoke Aung San in Commander Major. Barnett Hutchinson leh adang mikang officers te kimuh pihlo in Zomi galkapbo Captain Ngin Zam tawh amau te gelbek kimu in thukikup khopna te hong nei uh hi.Tuakhit ban ah Captain Ngin Zam tawh amaute gel bek maan kizaih khopna te zong naneih pih hi. Subedar Captain Ngin Zam (O.B, B.G.M) pen mikang gamkekte hongtun lai
in sih le nan aa, a nado Zomi galhang Pu Khai Kam tapa neihsun ahi hi. Pu Ngin Zam pen Chih Hills Battalion ah lut in Japan te hangsan tak leh nasiatak in ado na hang in 1943,Dec 16 ni in (Burma Gallantry Medal) Kawlgam galhang hihna ciamtehna minphatna hong ngah
hi.Tuakhitban ah mikang te piak ahi Order of Burma (O.B) cih minphatna zong na ngah hi.Hih Order of Burma (O.B) pahtawi na pen Kawlgam sung ah angah kha amah tawh mi 33 bek pha uh hi.

Subadar Captain Ngin Zam (O.B, B.G.M) leh Pi Khai Cingh sung pan apiang ta te -
1. Bo Pum Za Kam (Thurah) – Karen Ngalsung ah si.
2. Pi Lian Za Vung
3. Sayagyi Pu Vum Khaw Cin
4. Pi Tual Dim cihte ahi hi. Pi Tual Dim ii pasal pen Major General Tuang Za Khai ahi hi.


Boyoke Aung San leh Subedar (Captain) Ngin Zam (OB, BGM) te anuai aa bang in thukikup khopna te nanei uh hi.

Boyoke Aung San : Bo Gyi Chin Hills Battalion sung ah minam bang zah om hiam?
Captain Ngin Zam : Battalion sung ah minam 8 ka om uh hi. Zahau, Sihzang, Hakha, Khawngsai(Thado-Kuki), Hualngo, Simthaang, Kumauni leh Kawlgam sung suak Gurkha te
cih dan teng ahi hi.

Boyoke Aung San : Ha! Battalion sung ah minam tampi tak napha uh ve...
maw. Bangcih dan in hopih in bangpau zang na hiam?
Captain Ngin Zam : Thupiakna kaneih ciang in mangpau kazang hi. Battalion sung ah ahih leh bel Urdu pau kizang hi. (Urdu pau icih pen Pakistan gam leh India gam mun pawlkhat ah akizang kampau ahi hi.
Boyoke Aung San : Galkapte in Kawlpau apau kimngai thei-tek uh hiam? Kawlpau e atelkim tek uh hiam?
Captain Ngin Zam : Battalion bup pi pen mimal 800 kapha uh hi. Tualak ah mimal 60 kim bek in Kawlpau pau thei uh hi.
Boyoke Aung San : Galkapte in e leh zaang gam khualum na athuakzo tek uh hiam?
Captain Ngin Zam : Tulaitak bek khuavot hun ahih tawh kituak in khuahun pen khamtung gam khuahun tawh kibang ahih man in galkapte in thuakzo mah uh hi.
Boyoke Aung San : Tulaitak galkap mi bangzah zato ah tung uh hiam?
Captain Ngin Zam : mi 12 om uh hi.Ahizong in lungpatauh huai dinmun ah omlo uh hi.
Boyoke Aung San : Galkap lam pan e leh (rations) an nek ,tuidawm akicing in na ngah uh hiam?
Captain Ngin Zam : Yes Sir! ka kisap bangbang uh (Supply Depot) pan in hongpia mah uh hi.
Boyoke Aung San : Bo Gyi hih ikawlgam pen asawtlo in mikangte khut sung pan in suahtakna ngah ta ding ahi hi.Mikang officers te pen asawtlo in kawlgam pan in paikhia ta ding uh ahi hi. Battalion sunga aom galkap teng khempeuh pen ei bek in ukta ding ihi hi. Tuni Chin Hills Battalion te kiang ah konghawh theih pen nakpi tak in lungdam in,ka kipak mahmah hi. A diakdiak in Battalion ii (discipline) sikan neihzia, Battalion ii tangthu akizom in akepcing na,Battalion ii vaipuak nasep atheihna, cihtakna leh thuman na cihte khempeuh akizom in kemcing ding ahi hi.

A suakta kawl gam khantohna ding in vaipuak nasep athei,thuman in cihtakna anei hidan Battalion pen a omkul ding ahi hi.Sikan leh cihtakna anei lo galkap pen ei kawlgam ading in kizang theilo ding ahi hi. Tuakhit ban ah galzong dozo kei inteh.Ei teng pen sikan neitak leh hanciam tak in na isep kul ding hi.Khat leh khat ikimuang tek ding kisam hi.Gam ading in eiteng khempeuh kigawm in mapang khawm in, etlawm tak in inuntak tek ding kisam hi. Hidan in kithutuakna nei lo in ei utdan tek in tuamtat in gamtang ngeingai in ah hileng suahtakna ii ngah pen eite in nuamtak in izang thei kei ding hi.

Eiteng in akibang in gelkhawm,semkhawm in Battalion ii galdo thahatna,siamna te leh hangsan,thahatna te pen atawp dong in kepcing kul ding hi.Hih Battalion pen tangthu kizom in kepcing suak kul ding hi. Nidang ciang hun kangah kik leh khatvei konghawh kik ding hi.Hih Battalion ii sikan neihzia leh galkap te ii lungsim puak kiciatzia te leh officers te tawh ka kimuh theih pen nakpitak in lungdam in ka kipak mahmah hi.Tuakhit ciang in Boyoke Aung San nitak nai 4 leh minutes 15 hun in hongciah kikta hi.

Anung ciang in Boyoke Aung San in Dr. Vum Khua Hau tawh akimuhna ah Bo Gyi Ngin Zam tawh ka kimu aa,amah pen kawlpau hoihtak in apau thei khat ahi hi. Ahizong in Battalion kampau zat ding in Urdu kampau azat na hang in kalungsim khat nuamlo hi,Chin Hills Battalion zong ka pimuh mahmah hi cih thu te na kikum khawm thei kik uh hi.Boyoke Aung San anih veina konghawh kik ding cih akam vaikhak pen hong tangtung lo kik mawk hi.1947,July 19 ni in Boyoke Aung San leh gam makai honpi khat hong kisuam lum ziau mawk hi.Chin Hills Battalion Anti-Tank Regiment pen Boyoke Aung San in galkap Battalion khat bek asit khak Battalion in tangthu ah kiciamteh hi.

Chin Hills Anti-Tank Regiment te in amau ii tangthu akizom in kemcing suak in gam sung gamdaihna ding leh (Union of Burma) Belpawl gampi akitam kham lohna ding in dal in,kiciantak leh hangsan tak in galdo na te zomto suak uh hi.1946 kum tak ciang in Minbu leh Magwe gam kimteng aa, mihoihlo Guta te leh migilo Damiah te man in na siansuah ngai uh hi. 1947 kum in Shan gam Kyaing Tong khua kimteng ah galdo uh hi.1948 kum tak ciang Burma Communist Party thautawi te ado na vuah nakpi tak in hong minthang uh hi. A diakdiak in Pagan leh Niang Oo kim teng kidona ahi ငါ႔သေရာက္တိုက္ပြဲ cih galkido na ah galte mi 60 that lum in, galte ahingtang in mi 80 manzo uh hi.

1948 kum tak ciang in (Union of Burma) Belpawl gam in suahtakna hong ngahta aa, British officers te zong agam vuah hong ciahta uh ahih man in aneihsa uh thaupi teng khempeuh (Chin Hills Battalion Anti-Tank Regiment) te tung ah ap in Commander ding in Lt.Col Lian Cin Zam azaa na khan uh hi. 1949 kum tak ciang in gamsung tualgal kidona ah hih Battalion sungpan in galkap tampi tak in anuntakna uh nabei lawh uh hi.

1949,January 15 ni in Kayah gam ah Padaung minam te buaina vai hang in tungsiahte thupiakna tawh kizui in Lt.Col Lian Cin Zam leh a Battalion bup phial uh Shan gam Taungyi khuapi pan in Kayah gam Loikaw khuapi ah kituah suk uh aa,a Battalion sung pan in Company 1 Kayah gam PHALAI khua ah kilemna vai tawh kisai kikum ding in vazin khia uh aa, lamkal ah KNDO te in napang sim uh ahih man in kikapna nasiatak in om aa Chin Hills Battalion te lam pan in officers mi nih tawh akigawm in mi 29 si in, mi 49 ahingtang in galten na man uh hi. Tua akiman kha mi 49 teng pen PM U Nu leh Karen galkap mang khat ii vaihawm sakna hang tawh suakta kik uh aa, ahizong in agalvante uh ngah kik nawmlo uh hi.

1949 Feb kha tak ciang in gamsung tualgal hong khauhpai tektek ta in Bo Naw Sai makaih kumpi langpang Kachin galkapte leh KNDO te in Feb 20 in Meiktila khuapi hongla in Lt.Col Lian Cin Zam ahingtang in na mankha uh hi. Tua hun-in Thaupi teng khempeuh Lt.Col Lian Cin Zam khut sungah aom hi aa,ama siamna hangin galte khutsung ah tunglo hi. Thaupi
teng galte khut sungah tung hi leh,Kawlgam tangthu atuam khat hi thei kha ding hi.

1949 April kha sung in (Mikang leh kawl sisan akihel) ahi Major L.W.C Hitch Cock makaih Chin Rifles Company 2,Chin Hills Battalion sung pan in Company 2, No.6 Burman Rifles pan Company 2 leh Gurkha galkapte (No.4 Burma Regiment) pan in Company khat cihdan teng leh KNDO galkap 3000 te Tashi khuapi sung ah nasiatak in kinawkna hong om uh hi. 1949 April 5 ni in Chin Rifles pan in Company 1 gal huh ding in hongtung ta hi. April 7 ni, atawtna ni ding in KNDO te in nakpi tak in dolai in tuakhit ciang in Tashi khuapi pan in KNDO te na nungkik ta uh hi. Tuakhit ciang in Lt. Col Lian Cin Zam kiang pan thupuak hong tung in Meiktila pan in KNDO te nungkikta uh cihthu kiza ahih man in Major L.W.C Hitch Cock makaih Chin Rifles Company te zong Meiktila khua ah hong kituahto uh hi. Hih Tashi khuapi sung kidona ah Chin Rifles Company pan in mi 39 in Belpawl gam hutkhiatna in anuntakna uh nabei lawh uh hi. Col Tin Muang ii gelh တိုင္ျပည္ကႏုႏု၊ မုန္တိုင္းကထန္ထန္ cih laibu sung ah Zomi galkapte leh Gurkha galkapte lungsim leh acihtakzia uh pen cikmah hun ciang in kamang gilh ngei kei ding aa,atawntung in kaphawk den ding hi ci-in na gelh hi. Kumpi langpang Major Naw Sai makaih Kachin galkapte leh KNDO galkapte Taunggo ah hong kituahkik in tuapan in Yangon khuapi la ding in Yangon lam ah hong manawh to uh hi. Pegu khuapi khanglam Daik-U kimteng hongla to pah uh hi.General Newin zong emergency in Meiktila khua ah hong paito pah in Lt.Col Tin Oo makaih No.6 Burma Rifles pan Company 2 te Lt.Col Lian Cin Zam makaih (Chin Hills Battalion – Anti-Tank Regiment) te tawh gawm in mapang khawm sak hi.

1949 kum June kha sung in (Chin Hills Battalion – Anti-Tank Regiment) Battalion te Meiktila pan in Mingladon ah vanleng tawh 30 vei bang kinawm to hi. Mingladon pan in galkap mawtaw tawh Daik-U ah pai in Kumpi langpang Major Naw Sai makaih Kachin galkapte leh KNDO galkap 1000 te tawh katohphazagyi leh Daik-U kikawm kal ah maitang kituah in nasiatak in hong kikap uh hi .Tua hang in (Chin Hills Battalion - Anti-Tank Regiment) te pen KNDO te Yangon khuapi apai theihlohna ding in akhaktan pipen Battalion te ahi uh hi.Hih kido na ah (Chin Hills Battallion leh Burma Rifles) pan in asi aliam mimal 225 pha uh hi. Lt.Col Hrang Thio makaih No.1 Chin Rifles te in zong Insein galmaitang ah tamvei pitak galte tawh nasiatak in kinawkna nanei uh aa,KNDO te Insein pan in nawhkhiatna ah athupi penpen panmun ah pan nala uh hi.Lt.Col Hrang Thio pen Mawbi kidona ah angah liamna tawh gam aa ding in anuntakna napia khia hi.Lt.Col Son Khua Pau makaih te in Mawlamyine,Thaton,Motama leh Tanintharyi gam kimteng ah kumpi langpang Mon galkap (MNDO) cihte leh KNDO te luangkhaam in nasiatak in ado te ahi uh hi.

Kawlgam hutkhiatna ah Zomi galkapte in anuntakna uh itsiit lo in hangsan tak leh citak tak in gal ado te ahi uh hi.Kawlgam galkap zumte ciamtehna ah1948 january kha pan 1950 kikal kum sung in Zomi galkapte in kawlgam hutkhiatna hang in mi 177 si in,156 in liamna ngah in,16 te atung na mun uh kitheilo in mang uh hi ci-in na ciamteh uh hi.

1949 kum beikuan lam ciangin Lt. Col Lian Cin Zam’ makaih Chin Hills Battalion (Chin Hills Battalion-Anti Tank Regiment) pen No.3 Chin Rifles Battlion in laih ding in tungsiah pan in thupiakna hong ngah hi. Tuavai Lt.Col Lian Cin Zam in azak ciang in heh mahmah aa, ko Battalion buppi in minlaih ding vai kathukim kei uh hi ci-in tungsiahte nanial ahih man in gam makai te tawh nasiatak in kitelkhialh na om in buaidek tak uh hi.

Battalion min laih ding vaihang in Lt.Col Lian Cin Zam in tungsiahte tung ah nialna No.381/0-1 August (4) 1949 kum in Galkap zumpi ah laikhiatna na nei hi.Tua alaikhiatna sung ah Battation minlaih vai hang in koih Battalion bup nautang galkapte leh officers galkapte aa kipan ka Battalion bup in kanial uh aa,koih Battalion pen Kawlgam galkap Battalion om teng khempeuh lak ah asawt penpen (aupa) penpen hi aa, Ka Battalion min uh British te hunlai Britishte hongpiak ahih hang in (Belpawl gam) Kawlgam kumpi tung ah thuman citak tak in vaipuak nasep sem in galdo te kahi uh aa,ka Battalion uh pen kum 55 asawt Battalion ahihna tangthu kizom in kencing nuam kahih man un ka Battalion min kalaih nuam kei uh hi cihdan in na nial aa, ahizong in Kumpi thunei te in zawhthawh thu tawh 3rd Chin Riles Battalion min in nalaih sak veve uh hi.

Boyoke Aung San ii akam vaikhak ahi hizah aa, athupi na Battalion uh pen tangthu kizom akhang akhang in nakem cing ding uh hi ci-in agen thu te pen hih Battalion pan officers te leh nautang galkapte in nakpitak in phawk kik in amitkha vuah naluai den hi.Boyoke Aung San omlai hileh maw ci-in na ngaih sunsun kha zel uh hi.Lt.Col Lian Cin Zam pen 1952 March 27 ni in No.15 Burma Rifles ah kituah in C.O sem hi.

1956 Kum in gilsung damlohna hawng tawh galkap zatopan in hong nusia hi. (Pawl khat ii genna ah asihna ahang pen Kawl kumpite bumlup ci-uh hi). Asih ciang in aluangpen Kawlkumpi in Kumpi neihsa Vanleng tawh Kalaymyo ah apuak ding uh phal lo uh aa,ahizong in a innkuan pihte leh Burmah Oil Company (BOC) te vaihawmna tawh aluang Kalaymyo ah Vanleng tawh kipuak hi.Hidan in gam ading in anuntakna itsit hetlo in hangsan
tak leh citak tak in na asem galhang,salpha khat pen asih ciang in Kawlkumpite in nathudon lo ziau mawk uh hi.

(Chin Hills Battalion Anti-Tank Regiment) Battalion pen hunkhat lai aa Boyoke Aungsan pahtak mahmah leh muanhuai asak mahmah khat hi aa, hidan Battalion pen gam khantohna ding in akisam mahmah khat ahihi ci-in Boyoke Aungsan in nagen ngei hi.Tuakhitban ah hih Battalion pen Kawlgam sung aa, aom galkap Battalion teng khempeuh lak ah aupa penpen,apicing penpen,amuan huai penpen leh kawlgam sung aa, aom galvan thupi thaupi teng alenkha Battalion na hi uha ahizong in anung ciang in Kawlgam kumpite in aBattalion min uh laihsak bekthan lo in Battalion Commander pa Lt.Col lian Cin Zam nagawm asih ciang in na thudon lo sawnsawn lai mawk uh hi.Hih zahtak in gam aa ding in asem leh athupi galkap Battalion pen tuhun ciang in atangthu bek na cianlai ta mawk hi.


Ref :
 ဗိုလ္ခ်ဳပ္ေအာင္ဆန္း ႏွင္႔ ခ်င္းေတာင္တပ္ရင္း (Chin Hills Battalion-Anti-tank Regiment) အရာရွိမ်ား (၁၉၄၆ ခုႏွစ္ ေအာက္တိုဘာလ ၁၀ ရက္ေန႔) by -Salai Van Cung lian (UK).

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Boyoke Aung San Leh Chin Hills Battalion-Anti-tank Regiment Officers Te (1946 kum October kha ni 10). Agelh - Pau Mung Description: Rating: 5 Reviewed By: Cinpu Zomi
Scroll to Top