728x90 AdSpace

Hot
Menu
Zon-ol na Donate

Latest News

Miriam Tangthu: (Pasian Sathau nilhte Sukhaken). Agelh - Rev. Pau D. Lian D.MIN [Ph.D. student]

Miriam Tangthu: (Pasian Sathau nilhte Sukhaken) 
[Sermon series Rev. Pau D. Lian D.MIN [Ph.D. student] 
Laibu etkak: by Martha Tyler

Pai 1:1-2:10

Unau sanggam khatsung ahzong agilodeuh, aphengphideuh leh a-ukhakdeuh omthei hi. Kawlten Saturday asuakte ukhakdeuh leh alungsim uhkhuah ci-a, zong man mahmah hi. Keizong Saturday asuak kahihman hiam, kadeihkhat, katupkhat kangahmasang kuama thumanglo pawlkana hikha hi. Tuabang ih omkhakleh, nangbek hilohiteh, Pasian kamsang, Miriam zong tuabangin na-omkha ngeihi. Ahizongin Pasianin Israelte’ makai khatin nazang veve hi. Amasa in apanmun hoihtakin lenzoleh semzo mahmah napin, anungciangin buaina tuamtuam tawhhaksatna thuak hi. Asanggamte mahmah langpan in hongpiang khia a, hazatna tehangin mipi mai ah Miriam in asanggamte’ hehna kilangh sakhi. Pasianin atungah thukhen ahihmanin phaaknatna ngah hi. Ahizong hongdam a, tuaciangin [anau] Moses thuneihna langpan leuleu in tuathu pen kilangpha deuh hi. Miriam nuntakna, khatvei mawhkhakna in nahoih khempeuh asusia thei ahihna hong hilhkhol hi. Abeisa khialhna hangin athuaknate hangin eite sinna [lesson] tampi hongpia hi.

Miriam nuleh pate mithupi mahmah hihamtang dinghi, ahangpen amau sungpan in makai lian thum hongpiangkhia hi. Moses, Aaron, leh Miriam hi-a Israel mikhempeuh Canaan gamzuan in Egypt panin makaih uhhi. Ahizongin athum un khatzong Canaan gam lutkha lo uhhi. Miriam in Israelte adingin asepnate tungpan, ahoih lehasia sinna tampi om hi. Tua ahihman in amahpen, na’ akilamdang sak numei telak ahkhat ahi hi.
Laisiangtho sung tawh kituak in ensuk ni:
Miriam nuntakna amasalam
Miriam banghun sungteng ah nungta hiam cih enpakni. Tua ihgenkawm in akizom in Israel mite banghangin Egpyt gamtung uh hiam cih enpakzalni. Ahangpen Miriam tungah Pasian thuhilhna tepen Israel te makaihna tawhkisai vive hi a, tuamun ah amanbang panmun lenkha hiamcih ih etnoppen thu ahi hi.

Banghangin Israelte Eygpt ahom ahi uhhiam cih ihetciangin Laisiangtho in hibang in (Piancil 45:8-11) sungah nagen hi. Joseph sanggamte lehapa, Canaan ah kialpi atunciangin Israel mite Eygpt ahpuuk tawdingin hongtung uha, tuapan in aomsuakte leh Joseph suanleh khakte ahi uh hi. Ahizongin Joseph thuneihna hun abeikhit, amasih zawhciang Laisiangthosungah Joseph atheilo kumpi thak hongkhanciang (Paikhiatna 1:8-14) Israel tetungah dantatin pasalnaupang khempeuh zongthat in gawtbawl taleh khangsemsem hi (Paikhiatna 1:15-22). Joseph atheilo kumpikhat acihnopna in Joseph tawh akibanglo, cihna zong hidingin ka ummawh hi. Ahangpen, kumpi khatin amamai a, kumpisem kua hiam cihbel theilua ding hi.

Hih hunhaksa, hunhoihlo sungin Amram leh Jochebed tenupa-in Miriam, a-upen, aneihlaitak uh ahi hi. Upen ahih mahbangin gamtatzia omsiam hi. Tuaciangin Aaron hongnei leuleu uh a, tuazawh kum3 ciang Moses hongnei uh hi. Pai 7:7
Pasian thulam nuntakna
Miriam ii pate omzia en nicileng, Hebrew 11:23 “Moses asuah ciangin anule pa in hoihsa mahmahin, kumpipa thupiakna kihtatuan loin khathum sung a seelcip ngamna uhzong a upna hang mah uh ahi hi. Miriam in apate upna etteh thei ta ahih man in nauluai khatbawl in Moses Pumpeng gun ah vasel ngam hi. [Ihnu ihpa te upna in honglawhzo hiam?] Miriam inzong upna tawh sepkhiatna tampi nei hi. Tua-in, Moses guntung ah akikoih khitciang Miriam hibangin semhi. Pai 2:1-4 “Tu-in Levi suante khat in Levi numei khat mah zi-in la hi. Tua numei gai-in tapa khat nei a, nau hoih khathi, ci-in amuhciangin, khathum sung aseel hi. Amah in naungek a seel zawhnawn loh ciangin ama adingin pumping tawh kibawl lawhkhat phansak a, tua lawhpen buanleh kultal tuitawh azut hi. Amah [Moses] bang a kicih hiam cih athei nadingin a gamla panin Miriam munkhatpan dingin a-en hi. Miriam in ataavuan [mawhpuak] zoleh hangsan mahmah kasa hi. Pai 2:5-9 “7 Tuaciangin asanggamnu in faro tanu kiangah, “Keimah pai-in Hebru numeite lakpanin nang adingin naupang hong khoisak dingin naucing khat kava sapsak ding hiam? aci hi. Anu lehpan asawllam LST in agen lohhang asanggam Moses adingin ahangsan mahmahna honglak hi. Moses ahotkhiat khitciangin Miriam nuntakna Israelten Eygpt gam anutsiat masang uh kiza nawnlo hi. Hih hun, Miriam thu akizaklohsung, in Pasian in Miriam nuntakna sikbangin seksak hi. Numei khatin hizah in asanggam Moses leh Aaron temakaih zo ahih manin Pasian in tampitak sinna pia hi hamtang dinghi. Pasal te-ukna sung himah leh Egypt ah aom sungin miten zahtak mahmah hi.
Miriam in Pasian Khalam ah makaih
1.     Pasian in Miriam bang nasem ding in sam hiam? Pai 15:20 “Tua ahih manin Aaron sanggam nu Miriam in a khutah khuang khat tawihi. Ama nungah numeite khempeuh laamin khuangtawh azui uh hi.”

2.     Miriam in bangsem ahia? Pai 15:21, “Miriam in amaute lasak hi: Topa lasak un amah in minthangin zokhin a, amah in sakol le atung tuangte, tuipi sungah a lawn hi,” aci hi. LST sungah numei prophet masa hikha ding hi. Moses in pasalte makaihin Miriam in numeiteng makaih hi. Pasian in Miriam asapna pen adiakin numeite makaih dingin sam ahilam kitheipha diakhi.

3.    Pasian in Isreal mite Eygpt pan ahotkhiatciang amakai dingun kuasawl ahi hiam? Micah 6:4 “Banghang hiam cihleh Eygpt gam panin note kongpai khiat pih a, salsuahna panin ka honghon khia hi. Note ahong makai dingin Moses Aaron leh Miriam ka hongsawl hi.”  Pasian in Israelte makaipi dingin Moses tel a, Aaron leh Miriam pen makai huhdingin sam hi.
Miriam Sepkhialnate
Miriam in khalam amakaihna pan alawhcin lohna namnih tebang hiam? Paunak 16:18 “Kisaktheihna in siatna hong tuaksak a, kiphatsakna in pukna hongpiangsak hi.” Miriam numei thupikhat ahih hangin, “kisaktheihna leh kiphatsakna” thang’ sungah awk hi. Tuate in gimna leh mipi mai-ah zumna hongpiang sak hi. Miriam leh Aaron in Moses thunih tawh gensia uh hi. Gamlak 12:1-3, “Moses in Kush numei khat tenpih ahih manin, ama tenpih Kush numei’ hangin Miriam le Aaron in amah gensia in, Topa in Moses’ tungbek tawnin thu gen ahi hiam? Ete’ tungah zong tawnin hong gen hi lo ahi hiam? Aci uh hi. Moses alungnem mahmah hi a, leitung aom mi khempeuh sangin a lungnemzaw hi.”  Upen leh makai ahihmah bangin gensiatna ahzong Miriam hongmakai ta hi. Banghang Miriam in Moses gensiatna ah makai hi cithei ihiam cihleh Pasian dan [punishment] pia hi. Nangsangin na pianpih sanggam ahizongin Pasian in azatzawkleh nahaza hiam? Napawlpi sungah nasangin apilzaw, asiamzaw aom ciang bangna cihngaih sut hiam?

Paunak 18:12-sunga omthu Miriam in asinding kisam khadinghi. “Akiniamkhiatte in zahtakna ngah uh a, akihisakte pen siatding a manawh hita hi.” Unau cihhang hazatna pen ahitheilua hi. Eitung mahmah ahzong unauki haza tampi om hi. Hih mun ah Miriam in Moses langpangbek hilo in Pasian langpan hi zawhi. Pai 3 ih etciang Moses tungah Pasian sawlkuangpi sungpan in hongki langh hi. Pasian in Moses tungtawn bekah hopih ahihna ki telmahmah hi.

Pasian leh Miriam kimu-uh Gamlak 12:4-5 “Topa in thakhatthu in Moses le Aaron le Miriam kiangah, “kikhopna bukah no mihing thumte hong pai-un,” aci hi. Amauthumte apai uhhi. Meii khuam sungah Topa hongkum sukin kikhopna bukkongah dinga, Aaron le Miriam a sam hi. Amau tegel mailam nehin hongpai uh hi. Banghang Moses a mailam ah nehsak lo ahi tam?

Pasian in Moses tungah banggen hiam? Gamlak 12: 6-8 Topa in kathu za un, kana sem Moses ka inn sung thukhempeuh amah ki-ap hi. 8 Amah tawh kamle kam kiho in akitel lo kampaute tawh hiloin, akitel takin thuka gen uh a amah in Topa mel a mu hi. 9 Amaute tungah TOPA heh mahmah a, a hehsapi-in apaikhia hi. 10 Puanbuktung sanpanin meiipi a kilakkhiat ciangin Miriam phak a, vukbangin apak hi.” [Pasian sathua nilh mite khoihkha ken]

Miriam ii Khalam ah apa, Moses adociangin buaina lianpi, apumpi phaknat na ngah hi. Banghangin aneupen, Moses tungpanbek in Pasian in thugen hiam? Nule pa khatsungpan apiang veve hina pin Moses pen a aw awk in Pasian mite makai dingin kicing kisa lo hi. Ahizong Pasian sam veve hi. Miriam in Pasian hong sapna sangin agamla zaw ah semning ci hi. Min leh zadeih luatna, mite mai-ah Pasian hongsap lohpi makaih nopluatpen Miriam tawh kibang hi.

Moses amahle amah bangci kigen hiam? Pasianin Moses bangci gen hiam? Pai 4:10 “Ahihangin Moses in Topa kiangah, “Oh, ka Topa aw, tuma siahhitaleh na nasempa tungah thunagen akipan hitaleh, keithugen a siamka hi kei hi. Ka kampau ol-in kakam pau awk hi” aci hi.”

Gamlak 11:16, “Topa in Moses kiangah Israel telak ah misawm sagih hongpai pih inla nang hongpuak pih dinghi ci hi. Pasian in Moses khengin kuamah zanglo hi. Miriam in hihthu, mi 70 telna, deihlo aitam, thuneih na [power] hongdeih ciangin Moses buaina hongtuak hi. Mi 70 hongteelciang Miriam in ama pan mun mangkha dinghi cih launa hongnei hi. Moses in tuathu theilo hi ahangpen amau view kibanglo hi. Moses atheih thukhat ah Israel pen Pasian mite hi a, thuneihna zong Pasian a amah hici hi. Pawlpi pen Pasian a hi-a, thu sungah thunei penzong Pasian mah hipah hi. Pawlpi upaten thuneih luatna in bang piangsak theihiam? Cih hihpan in kimu sitset hi.  

Hihthu in tulai Pawlpi buainate hongphawksak mahmah hi. Pasian in adeih loh list te-enpak lehang. Paunak 6:16-19, kihihsakna,zuauthu gennamawh neilo mithahnathusia bawlding ngaihsutnagamtatsiat ding aman langte le kitotna apiangsak te.

Pawlpi sungah nangsangin asiamzaw, Pasian zatzawk honglutciang bang naci bawl a? Christian ihih mahbangin Christ adingin ahoihpen adeih vive hi hang tua ahihciang nangsang asiamzaw, Pasian zatzawk hongpai/lutciang bangci bawlna hiam? Miriam pen mawhsak nuamleng olmahmah hi. Banghang? Aman thuneihna [power] deih ahihman hi. Amahsangin anauzaw Moses Pasian in zangzaw ahihman in tuathu tello maw ahih keileh hazamaw hiding hi.

Mawhna hatsatna in sulzuih hi. Hebrews 12:14-16 Mikhempeuh tawh naki lemtheih nading uh hanciam un. Nuntak singtho lo tawh kuamah in Topa muzolo ding ahih manin nuntak singtho na nungta un… 16 Esau bangin annek khat tawh innluah za asuak mi nasuah loh nadingun kidawm un… 17 banghang hiam cihleh, Esau in apakiang panin thupha ngahkik nuamin khitui naptui tawh anget hangin a gamtatnasa a bawlkik theih nading lampi omnawn lo hi…

Miriam tungah Pasian Dantat: Gamlak 12:10 “Phaknatna ngah hi. Tua Aaron in amuhciangin alungsim manlangtak in kheela, Moses tawh zakikim ding peuhmah cihmah hun in lunggulh nawnlo hi. Moses thumang in acihbang bangin gamta hi.

Moses in Miriam it: Gamlak 12:13-15 Moses Topa aw “amah damask in, Pasian aw kongthumhi ci-in akiko hi. Ahih hangin Topa in Moses kiangah, Tua numei’ maitang, apa in cilphih leh tua numei ni sagih sung maizum ding hilo ahi hiam? Giahphual pualamah nisagih sung kikhumcipsak in; tua khit ciangin amah hong kipaipih kikthei ding hi, aci hi.” Pasian zatmahmah Miriam ahih hangin asih zawhpen LST sungah kigen nawnvet lo mawk hi.
Thukhupna
Miriam, Aaron, leh Moses kuamah Canaan lutlo uhi. Pasian ading nalianpi abeisa in ihsep zenzen hang, ihmai lampen kigenthei tuanlo hi.

Source :
from:jeffrey Pau Do Lian
to:Cinpu Zomi <cinpuzomi@gmail.com>
date:Mon, Aug 1, 2016 at 10:54 AM
subject:Sermon series: Miriam
mailed-by:gmail.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Miriam Tangthu: (Pasian Sathau nilhte Sukhaken). Agelh - Rev. Pau D. Lian D.MIN [Ph.D. student] Description: Rating: 5 Reviewed By: Cinpu Zomi
Scroll to Top