728x90 AdSpace

Hot
Menu
Zon-ol na Donate

Latest News

NA LAWHCING NUAM HIAM? Agelh – Dong Za Mung

NA LAWHCING NUAM HIAM?
Agelh – Dong Za Mung


THU PATNA 
Joshua 1:9 “Thu hong pia khin hilo ka hi hiam? Thahat inla hang in. Lau kei inla, lung kia kei in; banghanghiam cih leh na  pai na peuhpeuh ah TOPA na Pasiannang tawh h ong om hi‟ a ci hi”.

                “Na lawhcing nuam hiam?”ci-in hong kidong leh “Lawhcing nuam tham ing ei,” kici sam ding hi. A lawhcing nuam khempeuh lum hithiat a lawhcinna a ngah uh hilo hi. Na lianpi i ngah nop leh lianpi mah a i kipiak khiat kul hi. Na khat peuhpeuh in dan nei hi. Sep ding zia, bawl ding zia na om hi. Tua ahih manin na lawhcin nop leh a dan, a ziate na tel, na theih ding kisam hi.

 Dr. Do Kham in seminar a piakna khat ah, "Nang sunga om hih theihnate bangci taangtun sakthei ding na hiam cih leh:  
1) Ngaihsutna hoih tawh nungta in!    
2) Na hihna aangtang in!     
3) Tupna kician nei in!      
4) Hangsanna, thuakzawhna leh ki-uk zawhna nei in!  
5) Khensatna kician leh dik nei in!    
6) Nisim in sin inla, a hoih in gamta in!   
7) Lawhsapna leh haksatnate a san dan siam sawm in!  
8) Pasian tawh a haksa khat beek omlo hi," ci-in a gen hi. (Rev.Dr.Chin Do Kham..Life Enrichment Seminar.. Bangalore, India..19/3/2011. (Sat). 

                Dr. Thar Tun Oo  in a laibu sungah, Bang dan ten milawhcing hong hisak hiam?, ci-in a gelhna ah hi bangin na gelh hi. 
1. Tupna nei in!     
2. Na vangneihna kem in!    
3. Paulap zong kei in!     
4. A tawntungin sinsawm in!    
5. Na hun leh na tha, na ngal mawk beisak kei in!   
6. Na khensat bangin sem in! ci-in gelh hi. 

                A lawhcing nuam mi khat na hih leh tupna na neih ding a kisam thupi pen ahi hi. Tupna omlo pi-in bangmah lawhcinna na ngah kei ding hi. Na lawhcing nuam hiam?

I.  LAWHCINNA LAMPI
                Joshua 1:8 “Hih thukham laibu na mangngilh ngei kei ding hi.  A sunga kigelh thute khempeuh tawh kisai-in na gamtat theihna dingin sun leh zanin na lung ngaingai ding hi. Tua hi leh na mavang ding a, na nasep tangtung ding hi”.

Mi lawhcingte in lampi nei tek uh a, tua a lampite uh kibang kim pian hi. Nang zong na lawhcin nading in lampi na neih ding ahi hi. Tua lampite pen midang a lawhcingsate aa tawh a kibang zong tampi om kha ding hi. Mi lawhcing i cihte‘n tupna kician nei-in, a tupna uh sepna tawh zom pah uh a tangtung uh hi. Tupna, ngimna, geelna na neih hangin sepkhiatna na neih kei leh zong na lawhcing ngei kei ding hi. 

 Lawhcin nading lampite:        
a. Topa muang ding!     
b. Tupna kician nei ding!     
c. Sangpi tum ding!      
d. Tupna mitsuan gige ding!     
e. Upna nei ding!      
f. Tu‘n kipan pah ding!     
g. Kimuangngam ding!     
h. Hanciam ngiat ding!     
i. Lungkia ngeilo ding!     
j. Kineusak lo ding!  

           1. TOPA MUANG IN
                Ps. 37:3-4 “TOPA muang inla gamtat hoih in. Gam nuam ah teng inla thumanin om in. TOPA sungah lungkim in; amah in na deihna hong pia ding hi”.

                Topa pen van-le-lei a bawlpa hi a, a vanglian pen Pasian ahi hi. Amah bang a dang omlo a, sihna panin a thokik a nungta Pasian ahi hi. Topa in na piankhiat mapek nangawn panin nang hong phawkin hong awlmawh hi. Na siatna dingin geelna nei hetlo a, na hoihna ding leh na lametna, na tupna tangtunsak ding geelna amah in nei hi (Jer.29:11). 

                Topa muang inla gamtat hoih lecin gam nuam ah nang hong teengsak ding hi. Topa sungah lungkim lecin amah in na deihna hong pia ding hi. Na khempeuh kipatna Topa hi a, a tawpna zong amah mah ahi hi (Rev.1:17). Topa muang lecin lawhcinna ah nang hong pi ding hi. A tapa khat bek a neihsun hong piak dongin nang hong it Topa muang in (John 3:16).

“A siangtho mahmah a vanglian Pasian in ei bang lel mawh nei mihing hong itna lamdang ka sa mah mah hi”.      
Rev. Chin Do Kham Ph.D

“Pasian in ei hoihna leh hoihlohna tawh nasem lo-in Pasian a hihna tawh na a sem Pasian ahi hi”.         Rev. Chin Do Kham Ph.D

 “Na hih zawh loh tungah ding kenla, Pasian‟ hih zawhna tungah ding zaw in”.       
Rev.Go Za Nang     
   
 2. TUPNA KICIAN NEI IN
                Prov. 20:18 “Hoih tak-a geelna tawh na sepna taangtung hi; geelna kician om lopi-in galsim dingin kipan kei in”.

Na khat peuhpeuh na sep ciangin tupna kician na neih ding ahi hi. Tupna om lopi-in na lawhcing kei ding hi. Tupna kician nei lecin tua na tupna in haksatna na tuah ciangin zong hong thakhauhsak ding hi. Thanemin na lungkiat hun ciang tua na tupna in hong thahatsak ding hi. Tuipi tungah gunkuang khat tupna nei loin khualzin leh tupna a om loh mahbangin tuipi tungah kiveivei lel ding a, a tawpna ah tuihual leh huihpite tuakin kisia pelmawh ding hi. Tupna kician nei in.

“Ngimna na neih kei leh a lawhsam ding ngimna nei na hih lam kiphawk in”. 
JM. Ngul Khan Pau

                Mi lawhcingte a kuamahpeuh pen tupna kician a neih manun a lawhcing, a gualzo, a minthangte hong hi uh hi. 

Alexandra the Great      
Leitung a ‗gal hang pen‘ cih minthanna a ngah Greekte galkap mangpipa hi a, kum 23 a phakin leitung bup simin a la zopa ahi hi. Ama tupna ngiat pen ―Leitung bup la ding,‖ cih ahi hi. Tua-a tupna sangpi mitsuan pah a hong kalsuan ciangin kum 23 hong phakin leitung bup (ama hun lai-a ki thei teng)  hong lazo hi. Leitung tangthu ah a mang ngeilo ding ―Gal hang” minthang khat hong suak hi. 

 Abraham Lincoln      
A pa sihsan, a nu bek tawh nungta tagah khat ahi hi. Zawnglua in singluang inn ah a teeng mi khat ahi hi. Ahi zongin “Khat vei ciang America President ka hi ding hi,” ci-in tupna nei ngiat hi. Tupna a neih mahbangin  Americate‘ President 16 na hong hi takpi hi.

Tupna kician nei in.
“Na tup ngam leh na sem zo ding hi”.     
Walt Disney

“Tupna khat bek nei in. Na khuak, na sisan, na taksa, na pumpi nate khempeuh tua na tupna ah nga inla a dang ngaihsun kei in. Tua in lawhcin nading ahi hi”.
Swami Vivekananda

“Kigin kholhna in lawhcinna ding thusim hi”.       
Henry Ford

“Lametna lian a neite adingin hamphatna lianpi om hi”.          
Jack Kinder
“Na khat peuhpeuh tupna a om nak leh a piang theilo khat beek om lo hi”.       
Hellen Keller   

3. SANGPI TUM IN
 Col.3:2  “Vantung ah a om thute ngaihsutin nei unla leitung ah a om thute ngaih  sutin nei kei un”.

                Tupna na neih ciangin zong a sangpi na tup ding ahi hi. Sangpi na tup leh sangpi na tung ding hi. Mi pawlkhatte genna ah, ―I lu tan tupna i neih leh i dip tan bek kitung zo hi,‖ na ci uh hi. Tua ahih manin sangpi tupna nei in. Leitung bup a mi lawhcingte pen sangpitak mah a tumte ahi uh hi. Na tupna leitung bup levelin koih in. Na khua ciang, na gam sung ciang bek ah hi loin leitung bup ah koih in. Tua hi leh na lawhcinna zong leitung bup level hong hi ding hi.  

Abraham Lincoln – “Khat vei ciang America Presi-dent ka hi dinga, Negrote sila pan ka suaktasak ding hi”. 
Chandra Shekhar – “Khat vei ciang Indian Prime Minister hih ding ka tup ahihi”.
Adoniram Judson – “Kawlgam ah Singlamteh a kiphuhkip taktak masiah ka paikhiat san kei ding hi”.
John Knox – “Scotland hong pia in; nong piak kei leh ka si zaw ding hi”.  

                Na din mun a niam kha phial zongin na tupna sangsak in.

“I khe te‟n lei siikkha mah ding hi; ahi zongin i lungsim in van dawn a khoihkhak ding ahi hi".      
Joyce Meyer

“Ken bel mi khat ciat in na khat lian bekmah mitsuan tentan huai sa ing”.      
Norman Jewison  


          4. NA TUPNA MITSUAN GIGE IN      
Phil.3:14b “…hamphatna ka ngah theihna dingin a kung lam zuanin tangtakin ka tai hi”. 

Topa muangin tupna kician na neih khit ciangin tua na tupna mitsuan gige pah a na kalsuan ding ahi hi. Tupna kician neite peuhmah in a tun nading mun thei uh ahih manin lawhcing uh hi. Tupna nei napi-in na mitsuan gige kei a na koih hithiat leh na lawhcing zo kei kha ding hi. Haksatna bangzahtak thuakin na tuakkha phial zongin na tupna na mitsuan gige ding ahi hi. Tuukpeng (football) kimawlte in bangzah takin haksatna thuak taseleh kunglam zuanin tuukpeng (ball) taipih teitei uh a, kung (goal) sung ah a thun zawh uh ciangin lawhcinna, gualzawhna ngah pan uh hi.

 Na lampi ah ling tampi omin na lampi a haksat hang in na tupna mitsuan gige-in kalsuan teitei lecin na lawhcing ding hi.  

Na tupna bangci tangtunsak ding? Mattheus van der Steen in a gelhna ah:
o “Na tupna lai ah gelh khia inla, midangte kiangah gen in. Tua panin na tangtun theih nading lampi na thei zaw kha ding hi.      
o Na kiim-le-pam a te hong it theih dingin om in. Tua hi leh na thanem ciang tha hong pia thei ding uh hi.   o Khat khit khat kahto in. Na tupna na tangtun theih nading lampi hong hilh thei mi thupite kiang panin deihsakna ngen in.       
o Na tupna a tangtun theih nadingin a kisam sum le paite vai hawm in.  
o Hangsan takin om inla, Pasian khut sungah aap  in.    
o Lungduaina leh cihtakna tawh kalsuan in.   
o Bangbang na hi zongin lungkia ngei kei-in‖ ci-in a gelh hi.

“Hell khuk manawh a pai na hih leh zong pai suak lel in”.         
Winston Churchill

“Ka mai a om tona  khat pen cikmah hunin ka nial ngei kei hi”.        
John Cena

“Bangbang ka sem zongin ka semsuak nuam hi. Bang hanghiam cih leh hih in lawhcin nading thusim ahi hi”.       
Kim Woo Choong
         5. UPNA NEI IN
      Heb.11:1 “Upna nei i cih ciangin i muh theih nai loh i lamette ngah takpi ding, ci-in muanna neihna ahi hi”.

       Mi lawhcingte in a upna hang mah uh tawh lawhcin na a ngah uh ahi hi. Upna in hong thakauhsak ding hi.     Hebrews 11   
 
o A upna hangin Abel in mihoih hi, ci-in Pasian pahtakna ngah hi.   
o A upna hangin Enok pen sihna tawh kipelh hi. A upna hangin Enok in Pasian lungkimna ngah hi.  
o A upna hangin Noah leh a innkuanpihte suakta uh hi. A upna hangin Pasian in mihoih hihna a pia hi.  
o A upna hangin Abraham in Pasian lawm hihna a tang hi.
o A upna hangin Moses in Faro tanu‘ ii tapa hih ding sangin  Pasian mite tawh bawlsiat na thuak ding a tel zaw hi.
o A upna hangin Joshua leh a pawlte in Jericho kulhpi zo uh hi.   
o A upna hangin numei paktat Rahab in a inn kuanpihte huzo hi. 

      Heb.11:6 “Upna lo tawh kuamah in Pasian lungkimsak zolo hi. Pasian kiang a zuan mi peuhmah in Pasian a om takpi a hihna thu leh amah a zongte Pasian in thaman pia hi, ci-in a up ding kisam hi”.

“A lawhcing dingte kalsuan bangin kalsuan in”.              
Koneru Humpy

“A hoih thei penin sem lecin a dang teng Pasian in hong sem ding hi. Upna tawh kalsuan ngam peuh leng a piang lah na omlo hi”.   
David Suum

“Pasian deihna om loin a piang theilo ahih hangin ei geel zek, ngaihsut zek, kiginkholh zek, hanciam zek mah kisam veve dingin ka tuat hi”.         
Prof.C. Thang Za Tuan Ph.D
       6. TU‟N KIPAN IN
       Ezra 10:4 “Kipanin, nangma na sep ding ahi  hi; kote in kong huh ding uh hi. Hang  inla sem in,‟ a ci hi”.

                Tuni pen hun hoih na neih lai tak ahih manin kipan pah in. Zingciang thai ciang ci-in na zekaikai leh hunsia in hong lap kha ding hi.  

Bill Gates        
Leitung a mihau minthang Bill Gates pen a company a kipat ma in Harvard University ah kum nihna a sin laitak ahi hi. Inn kim ah ama bawlsa software om ding cih ngiim kholhna tawh a sangkahna nusia-in ama tupna lamah nasep hong kipan pah hi. Tua danin a sang a taisan ciangin a nu-le-pa, a kim leh a pam in haisa in tai gawp uh hi. Banghanghiam cih leh Harvard University panin sang man leh khasum hoih leh nasep kician mahmah neisa hi ding a hihman ahi hi. Ahi zongin ama‘n tuate nusia in a tupna a tangtun nadingin nasep kipan pah a lawhcinna lianpi hong ngah hi.

 Philip Mohabir in a laigelhna khat ah hi bangin na gelh a:     
v  Na hihna bang tawh kipan in. 
v  Na neih zahzah tawh kipan in.    
v  Na kisap dingte kaikhawm in. 
v  Nang mahmah kiging khol in.   
v  Na sep ding pen theihtel mahmah sawm in. 

                Tu-in na hihna bang leh na neih zahzah tawh kipan pah in. Tawm khat sung mengme lai ning na cih kikalin hunte‘n hong khengkheng hi (Prov.6:9-11). 

Tu‘n kipan in.
“A kizawh theih ding hun lai mah-in zawh sawm in”.            
Mc Gavran

“A kipan nailo nasep pen a kizo hak ding ahi hi”.           
J.R.R. Tolkein

“Na lawhcin nop leh nangmah ngiat in hun hoih na bawl tawm ding ahi hi”.        
John B. Gough

“Kipatna tawh kipan in”.    
Meryl Streep


7. KIMUANGNGAM IN 
 Joshua 1:9 “Thu hong pia khin hi lo ka hi hiam? Thahat inla hang in. Lau kei inla, lungkia kei in: banghanghiam cih leh na paina peuhpeuh ah TOPA na Pasian nang tawh hong om hi‟ a ci hi”.

                Zomi paunak ah “Gual bawlin kiphung mang lo, ei-le-ei kibawlin kiphungmang bek!,” na ci hi. Ei-le-ei i kimuan‘ ngam ding leh ei mahmah i kikhual ding hong gen ahi hi. Pasian in amah muang kawma i din khiat ngam ding hong deih hi. “Kua khutin gul mat sawm na hiam?”, cih zong Zomite‘n paunak i nei hi. Ei mahmah kimuangngam masa photphot ni.

David (I Samuel 17,18)     
David pen Bethlehem a teeng Jesse tapate lakpan a nautum pen hi a, bangmah dinga kimang phalo hi-in; tuucing beka a kizang thei tangvalno khat ahi hi. A pa‘ tuute cingin gam sungah a omom leltak khat ahi hi. A ute ahih leh Israel galkap sem ahi uh hi. Khatvei a ute bangci hiam cih a thei dingin a pa‘n a ute omna ah a paisak hi. Amah zong a pa sawlna bangin a ute om na Elah kuam ah va pai hi. A galte uh ahi Philistine galhang Goliath kikonate va za kha hi. Goliath in Israel mite a tona awte a zak ciangin David heh mahmah a, Goliath do dingin a kithawi hi. A ute, Saul kumpipa leh galkap dangte in muanglo uh hi. Ahi zongin amah kimuangngam a, saili (suang lotna) khat leh suangtang pawlkhat tawh Goliath do dingin hong kuan khia hi.
                Hangsantak leh kimuangng
am takin Goliath do a va zo hi.         
Ø  Na lawhcin nadingin nang mahmah kimuang ngam in!  
Ø  Pasian hong bawl mihing khat na hih manin kimuang ngam in!    
Ø  A lawhcingsate mahbangin mihing khat na hih manin kimuangngam in!  
Ø  Midangte mahbangin ngaihsut theihna lungtang nei na hih manin kimuangngam in! 
Ø  Midangte mahbangin a siam thei lua mi khat na hih manin kimuangngam in!  
Ø  Midangte mahbangin a pil thei, a hau thei lua mi khat na hih manin kimuangngam in!

“Mite in nang hong thupi ngaihsut theih nadingin nang mahmah thupi kisa masa in”.
Daw Aung San Suu Kyi
“Mihingte lungsim hong buaisak pen in ei-le-ei ki hawm thawh nilohna hi”.
William James
“Na hihtheihna um inla kimuang ngam in”.
Norman Vincent Peale
“A kimuangngamte mah lawhcing uh hi”.
John Dryden      
8. HANCIAM IN
                Phil.3:16b “Bangbang hi tale hang i tun‟na  ciang ciang panin mai nawt ciat ni”.
                Paunak khat in “Kaam muangin linglak sik ken!”, a ci hi. Hanciamna om loin kaam muanna tawh lawhcinna omlo hi. Hanciamna in 99% hi a, kaam in 1% hi, ci-in mipilte‘n na gen uh hi. A hanciamte adingin kaam tampi om hi. Hanciamna om lopi-in bangmah na ngahzo taktak kei ding hi. Na hanciam leh lawhcinna na ngah ding hi.

           Theodore Roosevelt      
A neu lai-in a dam thei hetlo, awm natna nei-in a mittha zong a hat hetlo leh a gawng lua mahmah khat hi a, a pate in a lungkhampih mahmah khat ahi hi. Kum 12 a phakin a pa in, ―Lungsim na nei a, pumpi taksa gina na nei kei hi. Pumpi taksa gina nei loin lungsimin a sep zawh ding zah sem zolo ahih manin na pumpi ading hanciam in‖, ci-in a gen ngei hi. Tua-a kipanin nisimin a pumpi taksa a khan theih nadingin hong hanciam a, exercise khawng hong bawlin boxing khawng hong sin to a, hong hanciam leh kumpi ciang dong hong tung hi. Tuapa pen kua dang hilo in Theodore Roosevelt ahi hi. Hanciamna gah khum a ne kha hi.  

Dr. Condo Leesa Rice      
Amah pen Africa gam pan America gam ah a lal/pem mivom innkuan khat sungpan-a piang khia numei khat ahi hi. A sangkahna ah mivom khat ahih ban ah lai pil lua lo ahih manin a lawmte simmawhnate thuak hi. Taan 7 (class VII) a sin lai-in monthly test-te ah a mark niam den lua ahih manin a siate in, "Hi bang tawh taan 10 (class X) tungzo lo ding hi," ci-in a na lungkhampih mahmah khat uh ahi hi.

                Ahi zongin ama‘n a siate‘ hawmthawhna leh a lawm te simmawh bawlnate awlmawh selo a, lungkiat nadingin zong nei tuan selo hi. Amah hanciamin a hun neih khempeuh thungetna leh laisimna in nei hi. Hi dan teng tawh hong hanciam leh kum 15 a phakin taan 10 (class X) hong zo a, kum 19 a phak ciangin B.Sc hong zo leuleu hi. Hanciam beh lai-in a sinbeh leh Ph.D dong hong zoto hi. Tua ciangin kum 30 a phakin Standford University ah siapi hong sem a, University siapite sungpanin a moipen leh Standford University ah numei siapi a sem masa pen, mivomte sungpan zong siapi a sem masa penin kiciamteh hi.

 George W. Bush in US President a sep masak kum 4 sungin Dr. Rice pen thudotpi (adviser) khatin hong zangin, a term nihna Bush in President hong sep ciang zong gamdangthu lam vaipuapi (Foreign Secretary) in koih hi. Hi ciang a tun theih nadingin mi simmawhnate leh a haksatnate panin tha la-in a hanciamna hang ahi hi.

                Ken Gnanakan in a laibu gelhna sungah: ―Ka tuuk kha zel hi; ahi zongin ka tho teitei a Topa hong piak thathak hatna tawh ka kung dong tung dingin ka tai teitei hi. Tua ahih manin ka kung tungin lawhcinna ka ngah theih nading in a taitai, a hanciamciam, a sinsin lai ka hi hi‖, ci-in a gelh hi.

“Na khat peuhpeuh ah na gualzawh nop leh lei nam liang in hanciam inla, siamtawp tawh hanciam in”.       Alex Garden

“Na pumpi, na lungsimte nang leh nangin tawsawn ngiat in. Kitawsawn phapha den in”. 
David Gallo

 “Lungduaina leh hanciamna in haksatna khempeuh kantan zo ding hi”.        
Russian Proverb

“Hanciam leng pasian nangawn kisuak thei hi”.      
Burmese Proverb

9. LUNGKIA NGEI KEI IN
                Gal. 6:9 “Tua ahihmanin na hoih sep ding cimtak kei ni. Lungkia loin i sep nak leh a hun ciangin thaman i ngah ding hi”.

                Lungkia pahpah in a tawpsan pahpahte‘n lawhcinna ngah zo ngeilo uh hi. “Sagih vei na tuuk leh giat vei tho in‖, ci-in paunak a om mahbangin na taina lampi ah na tuuk khak leh lungkia loin tho teitei lecin na lawhcing ding hi.   

Winston Churchill      
Leitung ah thugenna tompen leh a muibun mahmah “Lungkia ngei kei in! Lungkia ngei kei in! Lungkia ngei kei in!” (Never give up! Never give up! Never give up!) cih thum vei gena a tutna ah a tukik ziaupa Winston Churchill pen pi 5 leh letma 5 (5‘5") khawng bek a sang mi khat ahi hi.

                Amah pen a neu lai-in a pau awk khat ahih manin hoih takin thugen theilo a, lai zong hai lai hi. Harrow Public School a a sangkah lai-in a lai hai luat genna in ‗bilvuh lohpa‟, ci-in min a ngah zawzenpa ahi hi. Ahih hangin lungkia het loin hong hanciam a ama kum 24 ahih ciangin leitung ah thugen siam khatin hong minthang ta hi. England galkap mang khat hong suaka, ama ngaihsutna a kizuihloh manin Dardenelles gal kisimna ah gal hong lel kha uh hi. England galkap 205,000 si ahih manin hong minsia gawp hi. Kum 30 sung tawntung mite neumuhna thuaka laigelh siamte in zong ―mihaipa‖ ci-in ko gawpgawp uh hi. Ahi zongin amah pen na lungkia deksuai lo hi. 

                Galpi masa thu laibu 4 kizom (The World Crisis –Volume 1-4) a cih leh laibu dang tuamtuam hong gelh khiatna panin mite‘n simmawh ngam nawnlo uh hi. Ama kum 65 a phak 1940 kum ciangin England Prime Minister hong suak hi. Amah a kihawlkhiatna sangpi in kum 75 cinna Diamond Jubilee pawi bawla tua hun ah thugen dingin sam uh hi. Amah zong pulpit tungah hong kahtoh khitciangin “Lungkia ngei kei in! Lung kia ngei kei in! Lungkia ngei kei in!” (Never give up! Never give up! Never give up!) thum vei a cih khit ciangin a tutna mun ah pai-in tukik ziau hi. Tua thugen na tompen minthang mahmah-in vang nei mahmah hi.   

Daw Aung San Suu Kyi     
Amah pen 19 June, 1945 in Kawlgam khuapi Yangon ah piang a, Kawlgam suahtakna makai General Aung San‘ tanu ahi hi. Kawlgam galkap ukna nuai ah a om ciangin nasa in 27 September, 1988 in National League For Democracy (NLD) Party hong pan khianu ahi hi. Tua panin 20 July 1989 in Kawlgam kumpi in “House Arrest” in man uh hi. Gam leh minam a it, a vei ngiat hi a, haksatna tampi thuak lawh tase mahleh lungkia loin lungtang khauhtak tawh hong kalsuan hi. 13 November, 2010 ciangin ―House Arrest‖ pan suahtakna ngahin suakta takin hong kalsuan thei hi. “House Arrest” a a om sungin a it mahmah a pasal in sihsanin, a tate tawh zong kimu kha lo hi. Numei khat hi lel a, haksatna leh lungkiat huai tampi thuak tase leh ni khat ni ciang ka lawhcing ding hi, ciin lametna tawh lungkia loin hanciam hi. A lungkiat loh mahbangin Kawlgam zong ama lunggulh dan, gim hong namin leitung bup ah hong minthang mahmah hi.

Neva Coyle ii laibu sungah, ―Na tai kidemna lampi ah bangbang haksatna thuakin, bang tengin na ma hong dal kha phiala, na tuuk kha phial zongin tho teitei in; na lawhcin nadingin na mai ah hong ngak hi. Lawhcinna in a masa pen hihna hi loin a hun lap a kung tunna ahi hi‖, ci-in gelh hi.

 Lungkia ngei kei in!

“A lungkiate gualzo ngeilo a, a gualzote lungkia ngeilo hi”.           
Rev. Hau Lian Kham

10. KINEUSAK KE‟N
 Jer. 1:7a “…, „Naupang khat ka hi lel hi‟ ci kei in;...”.

 Mihing pen thanemna khat ciat kinei hi, cih na phawk ding ahi hi. Kuamah a kicing leitung ah omlo hi. Na dinmun bang zahtakin a niam kha phial zongin kineusak kei in. Na zawn hang leh na neihloh hang, na siamloh hang, na minam hang khawng peuh tawh kineusak kei in. 

 Naupang lua ing; teek lua ta ing; hai lua ing; zawng lua ing; minam neu lua ing, ci kha kei in. Mi lawhcingte zong nang sangin a dinmun uh a niamzawte vive mah ahi uh hi.

1) Naupang lua ing na cih leh
 i. Kaitlyn Maher       
Amah pen numeino khat hi a January 10, 2004 in Reuben Edward Maher leh Alison Victoria Maherte sungpan piang hi. Amah pen America naupang lasa siam leh kineih siam (actress) khat ahi hi. Kum 4 a phak 2008 kum in ‗American Got Talent‘ cih lasak kidemna ah a kihel numeino ahi hi. A pat panin a tawp (final) dong a kah tozo kidem khempeuh lakah a naupangpen ahi hi. Tua bek thamloin America a om kumpi inn (White House) sung nangawn ah la a sa kha kum 4 numeino khat ahi hi. Lasak bek hi loin, la zong phuak thei lai hi. Naupangno khat ahih hangin mi lawhcing mahmah khat hong suak hi.

 ii. Justin Bieber       
A minpi pen Justin Drew Bieber ahi hi. March 1, 1994 kum in St. Joseph‘s Hospital ah hong piang khia hi. Apa pen Jeremy Jack Bieber hi-in a nu pen Patricia ‗Pattie‘ Malellette ahi hi. A nu in amah a paai lai-in kum 17 bek pha pan ahih manin a pa tawh kiteeng lo uh hi. A pi leh a pakik kepna tawh hong khangkhia naupang khat ahi hi. Ahi zongin kum 2008 kum ciangin la khumna (album) hong bawlkhia a ‗Baby‘ cih la tawh leitung bup ah hong minthang mah mah hi. Kum 14 a phakin Justin Bieber pen leitung bup ah hong minthang mahmah ta hi. Minthang mah mah leh lawhcing mahmah a, kumpi in a ma lim Museum ah koih ding nangawnin na ngen liang uh hi.

iii. Judah kumpi Josiah (2Kgs. 22 )    
Josiah pen Judah kumpi 16 na ahi hi. Ama‘n kumpi a sepin kum 8 bek pha pan a, Jerusalem ah kum 31 sung Judah mite uk hi.

Naupang lua ing ci kei in.

2) Upa lua ing na cih leh
 i. Fauja Singh—The Oldest Marathon Runner-102 years    Amah pen kum tam pen Marathon tai kidemna ah a kihelpa ahi hi. April 1, 1911 kum in Beas Pind, Jalandhar, Punjab, India/British ah piang hi. A suah cil lam kum 5 a phak ciang dong lam hoihtakin pai theilo    a, a khete neu-in gina lo hi. Lam gamla zong pai zolo hi. Ahi zongin damdamin hong hoih toto sam hi. Hanciam toto-in kum tampi ahih khit nungin Marathon tai kidemna ah hong kihel hi.
 1. London Flora Marathon—2000—6:54—89 yrs  
2. London Flora Marathon——2001—6:54   
3. London Flora Marathon—2002—6:45   
4. Bupa Great North Run (Half Marathon)—2002—2:39   
5. London Flora Marathon—2003—6:02   
6. Toronto Waterfront Marathon—2003—5:40  
7. New York City Marathon—2003—7:35   
8. London Flora Marathon——2004-6:07   
9. Glasgow City Half Marathon—2004—2:33 
10. Capital Radio Help a London Child 10‘000m—2004—1:08    
11. Toronto Waterfront Half Marathon—2004—2;29:59  
12.Toronto Marathon——20011—8:11:06  
13.Hong Kong Marathon (10km)—2012—1:34 
14.Hong Kong Marathon (10km) ——2013—1:32:28— 102 yrs. 
Upa lua ing ci kei in, hun tampi om lai hi.
3) Hai lua ing na cih leh!

 i. Thomas Edison       
Thomas Edison pen lai hai lua mahmah ahih manin a sang siate‘n a nu muh dingin a puan ah lai them khat belhsakin a ciahsak khat uh ahi hi. A laikhak uh, “Na ta laisin dingin hai lua; sang tawp mai hen” cih ahi hi. Hih laikhak a muh ciangin a nu in, “Ka ta lai theilo dingin a hai lua hi kei; kei man ka hilh ding hi” ci-in inn ah a nu in lai sinsaka hong pantah to hi. Amah hong khang khiat ciangin inventor minthang khat hong suak hi. Ama‘n sangah kha thum khawng bek lai sin kha hi. Ahi zongin inventor khat bek tham loin leitung ah na nam tampen a bawlkhia pa (the greatest inventor) hong suak hi. 

 ii. Albert Einstein      
“Nang mihing na suak kei ding hi”, ci-in a sang kah lai-in a sang siate khat in a cihsan, laihat hetlo mi khat ahi hi. Amah pen mi maizum thei mahmah, kam tawm, lawmte cihcih nial ngeilo mi khat ahi hi. Laihai lua ahih manin a pa in lunghimawhpih mahmah hi. Ahih hangin hong kalsuan toto a, Zurich University pan in Ph.D hong ngah-in scien- tist minthang mahmah khat hong suak hi. 20th Century ading in “Man of the Century” cih minpha a kipia liangpa ahi hi.

iii. Nepoleon Bonaparte     
Nepoleon pen Corsica tuikhulh, France gam pan a hong khang khia mi khat ahi hi. Amah zong a neulai-in laihai mahmah a, laivuanna ah mi 42 lakah a 41 na ah om zel hi. Ahi zongin Army College pan gal kap pilna hong sin a, galhang minthang khat hong suak hi. Ama hun lai-in “Napoleon in a khe langkhat lik leh Europe gam bup kiliing hi”, a kici zah dongin galkap hang khat hong suak hi.

Hai lua ing ci kei in.

4)  Zawng lua ing na cih leh
 i. Abraham Lincoln      
Americate President 16 na ahi hi. Zawng lua-in singluang inn ah a nu tawh a khuasa mi khat ahi hi. Ahi zongin ”ingluang inn pan Innkangpi‟ hong tung hi. 

 ii. Sir Isaac Newton      
Amah Scientist minthangpen  khat ahi hi. Tagah hi a, a pian ma kha thum a hih-in a pa‘n sihsan hi. Kum 2 a phakin a nu‘n pasal dang neihsan hi. Tagah genthei pente lakpan khat ahi hi. Genthei mahmah kawmin lai hong sin toto a, Trinity College, Cambridge panin B.A hong zo hi. Kum 1669 in Cambridge University ah “Lucasian Professor of Mathematics” sepna a len hi. Ama na muh khiat te, “Law of Motion; Theory of Gravitation” leh a dangdangte ahi hi.

Zawng lua ing ci kei in!

5) Tagah lua ing na cih leh!
 i. Muhammad        
Muhammad pen Islam biakna makai pipa ahi hi. Kum 570 A.D in Arabia khuapi Mecca ah hong piang hi. A suah ma-in a pa in sihsan a, kum guk mi a hih-in a nu in sihsan leuleu hi. A pu in kem a, a pu zong si leuleu ahih manin a pano Abu Talib kiangpanin hong khang khia hi. A pano nasepnate a huh theih zahzah tawh huh-in panpih hi. Tuu khawng, Kalaoh (sa nungkul) khawng cingin nungta a, kum 25 hong phak ciangin Khadijah numei sum bawl mihaunu nasepna ah na hong sem hi. Tua panin Khadijah tawh hong kiteeng uh hi. Tagahte lakah tagah pen khat ahi hi. Ahi zongin Islam/Muslim biakna makaipi hong suak hi.

Tagah lua ing ci kei in!

6) Nam neu lua ing na cih leh!
 i. Luke         
Dr. Luke pen Lai Siangtho bu gelh mihing 40 te lakah a kihelkha Jew mi a hilo Gentail mi khat ahi hi. Topa Zeisu hunlai ahi, Lai Siangtho hun lai-in Gentail minamte pen bangmah a kisim lo, ui tawh ki zakimin Jew minamte in ngaihsun uh hi. Mihing in ngaihsun lo uh hi. Ahi zongin Luke pen a nungta Pasian kammal Lai Siangtho gelhpa khat ahi hi. Lai Siangtho a gelh mihing 40 lakah amah bek Gentail mi ahi hi. Ama‘n bu nih gelh a Lungdamna thu Luka (The Gospel According to Luke) leh Sawltakte Laibu (The Book of Acts) te ahi hi. Hih bu nih tegel om kei leh i Lai Siangtho bucing lo kha ding hi. Gentail mi khat pen a nungta Pasian thubu gelhpa Dr.Luke hong suak hi.

 ii. Daniel leh a lawmte      
Daniel leh a lawmte Shadark, Meshak leh Abene-gote pen Nebuchadnezzar kumpipa in sal ding in a mat Babylon gam ah a paipih Israel tangvalno ahi uh hi. Galte‘n a mat, sal a om uh hileltak hi. Ahi zongin sal dinmun panin Kumpi gam sungah za lianpipi hong ngah uh a, kumpi thu vaihawmna ah a thupi pen thuvanpite hong suak uh hi. Sal leltak ahi, Danielte lawmta Babylon gam ah thuvanpi kumpipa thudot, thuvaihawmte hong suak uh hi. 

 iii. Mivomte       
Kum 1960 masangsiah lamin mivomte pen mikangte khutnuai ah omin sila nasep bek a semte ahi uh hi. Ahi zongin 1960 nungsiah lam ciangin hong ki puahpha thak uh a, sila lungsim pai khia-in, nampi lungsim hong nei uh hi. Na khat peuhpeuh ah hong   hanciam uh a, leitungah mivomte kihel loin vai ki hawm thei nawnlo ding dinmun hong tung uh hi. Sport hong hanciam uh a, Music lam hong hanciam- in hong lawhcing mahmah uh hi. Tu hun ciangin sport hita leh music lam hita leh politics lam hita leh mivomte in mun hong luah mang khin uh hi.

 Nam neu lua ing, ci kha kei in; Topa in Zomi-in hong piansak pen ama geelna a om ahi hi. 

Israelte in : “Ko pen Pasian‘ teeltuam minam hi ung‖, ci uh hi. 
Japante in : “Ko pen Ni pasian pan khanggui a kizom suk, Ni namte hi ung‖, ci uh hi. 
Germanyte in : “Ko pen minam lian, mipil nam,  leitungbup a ukding kumpi nam hi ung‖, ci ngiat uh hi. 
Mizo (Lushei)te in: “Mizo ka ni; ka hmel a tha; ka tum a  sang bawk‖, ci uh hi. 
Zomite in : “Zo voksa mah lim pen”; “Zo aktui mah ah tha om pen”, “Zomi ka hih hampha ing; Abraham thupha ngah  Zomi ka hi hi”, ci ngiat ni.

II. PHAWK HUAI THU PAWLKHAT
Eccl. 3:1-8….
 v—1—Hih leitung ah a piang thu khempeuh, Pasian in ama pian‘ hun dinga a sehsa hunin a piansak ahi hi.   
v—2— Suah hun om a, sih hun om hi. Suan hun om a, bawhkhiat hun om hi.  
v—3—Gawh hun om a, khoi hun om hi. Phel hun om a, lam hun om hi.  
 v—4— Kah hun om a, nuih hun om hi. Dah hun om a, laam hun om hi.   
v—5—Lupkhop hun om a, tuam lup hun om hi. Kikawi hun om a, kikhah hun om hi. 
 v—6— Zo‘n hun om a, mansuah hun om hi. Kep hun om a, paih khiat hun om hi.  
V—7— Balkeek hun om a, phop hun om hi. Daih hun om a, pau hun om hi.  
v—8—It hun om a, muhdah hun om hi. Kido hun om a, kilem hun om hi. 

A . LAWHCINNA NI KHAT, ZAN KHAT THU HILO

 Eccl. 3:1-8 “Na Khempeuh in Amau‟ Hun Ciat Nei.”

 “Rome khuapi ni khat a, kilam zo hi lo”, cih paunak a om mahbangin lawhcinna pen ni khat zan khat thu hilo hi. Mi pawlkhatte in pasan sialnek nuam mawk uh hi. Tua dan ziau tawh lawhcinna picing na ngah kei ding hi. Lokhopa in a lo ah khaici hong tuh pen a zingciangin a gah at pah hetlo hi. Hun tawlpi khat guahzu, daikai, nisa, khasa thuak photin hun hong kivei khit ciangin a gah hong la thei pan hi.

 Noah Webster in “Webster Dictionary” minthang mahmah a zawh nadingin kum 36 sung sawt hi.    
Michael Angelo in “The Last Judgment” kici lim minthang mahmah khat kum 8 sung a sun a zanin buaipih hi. 
Leonardo Da Vinci in Santamari delle Grazie, Milan a om a dung pi 29 (feet 29)  a sau, a vang pi 15 (feet 15)in a zai “The Last Supper” limpi pen 1495 kum in kipan a 1498 kum ciangin zo pan hi.

 A muibun pen leh mihingte nuntakna a khel thei a nungta Lai Siangtho bu pen kum 1600 sung a kigelh ahi hi.    

“Still Water Deep Water” cih laibu gelh pa‘n; “Khaici i tuh hun leh a gah i lak kikal ah hun sau pi khat om a, tua pen ―ngak” ahi hi. A gah i at theih nadingin hun saupi i ngak kul hi. I theihsa ahih hangin haksa mahmah hi. A haksa phial zongin ngak teta in; na ngak zawhna in na nuntakna hong picing sak ding hi‖, ci-in gelh hi.  

 Lawhcinna ni khat zan khat thu hilo cih phawk in. Ngak in; thuak in; thum loin ngak in! Na lawhcing ding hi.

B. A BEISA THUTE PHAWK PAWL NEI INLA, MANGNGILH PAWL NEI IN
 Lam. 3:40-41 “I gamtatna sate ki-en pha kikin, TOPA lamah kihei kik ni. Vantunga a om Pasian tungah i lungsim pia-in  thungen ni”. 

 Rom. 8:18  “Tu hun-a i thuaknate pen Pasian in a hong piak ding minthanna  tawh ka ngaihsut khawm ciangin, tu huna i thuaknate gen tham ka sa het kei hi”.

 1). Phawk dingte
 Isa.46:9  “Hun lui thute phawk un; banghang hiam cih leh keimah in Pasian ka hi a, a dang om lo hi. Keimah in Pasian ka hi a, kei tawh a kibang a dang om lo hi”.

§  A beisa hun a Pasian hong gualzawh pih ziate!   
§  A beisa hun a na thahat ziate!     
§  A beisa hun a na hangsan ziate!     
§  A beisa hun a na sep theih, na bawl theih ziate!   
§  A beisa hun a na daupai ziate!     
§  A beisa hun a na cidam ziate!     
§  A beisa hun a mite hong it ziate!    
§  A beisa hun a mite hong pahtak ziate!    
§  A beisa hun a mite na panpih zawh ziate!   
§  A beisa hun a mite na huh zawh ziate! 

 2). Mangngilh dingte
 Phil.3:13b “…Tua ahih manin a beisa thute mangngilh bawlin mainawt-in ka hanciam a…”.
o A beisa hun a na gamtat khialh  khak nate!    
o A beisa hun a na guallelhnate!      
o A beisa hun a na lawhcin zawh lohnate!     
o A beisa hun a na daupai lohnate!      
o A beisa hun a na cidam lohnate!      
o A beisa hun a na ginat zawhlohnate!      
o A beisa hun a na thadahnate!      
o A beisa hun a na maizum thuaknate!    
 o A beisa hun a na sepkhialh khakte!      
o A beisa hun a na mawhnate!       
o A beisa hun a mi hong simmawhnate!  
            
C. MITE ZONG A BEISA HUN TAWH HONG KHANG KHIATE AHI UH HI
 Col.1:21-22 “A beisa hun ah note‟ lungsim gitloh na leh gamtat siatna hangin Pasian tawh kigamla-in Pasian‟ gal na hi uh hi. Ahi zongin, a Tapa a pumpi mahmah in a hong sihna hangin note, a cidam, a siangtho, paubanna om het loin, ama kiangah hong laak theih nadingin Pasian in note ama lawm-in hong bawl khin ta ahi hi”.

Mi lawhcing gual tungtuangte pen thakhat thu-in a lawhcing hihet loin, a beisa hun pan mah a hong kipantote vive ahi uh hi. Mihing khat-a na pian limin a beisa hun tawh khangkhia khawm na hi hi. Mi lawhcingte pen mi lawhcinglo a na hi masate ahi uh hi. Mi dik leh mi hoih pen teng zong na hi khin khollo uh hi. Nangmah bangin a thanem, a khialkha thei vive mah ahi uh hi. Ahih hangin amaute‘n a beisa a a lawhsapna uh leh a lawhcin zawhloh nate pan in thasan uh a, hanciamin gualzo uh hi. Tua ban ah a khialh khakna uh leh a ginatlohnate uh mang ngilh-in thathak sanin a kalsuante ahi uh hi. Mailam ah a lawhcing theih nadingun hanciam uh a, hong lawhcing uh hi.

a. Jacob———zuaugenpa ahi hi.   
b. Moses——mithatpa ahi hi.     
c. Rahab——numei kizuak/ paktat khat ahi hi.  
d. Jepthah——numei paktat nu‘ tapa ahi hi.  
e. Ruth——Moab (nam neu, nam ginalo) numei khat ahi hi.    
f. David——mi zi suhsakpa ahi hi.    
g. Matthew——siahdongpa ahi hi.    
h. Peter——Zeisu thum vei tak a nialpa ahi hi. 
i. Luke——Gentail minam khat ahi hi.   
j. Samaria numei——Numei paktat khat ahi hi.   
k. Paul———Thu-um mite a bawlsiapa ahi hi. 

 A tunga i pulak mite pen mi dikte leh mi hoih pente hi hetlo uh hi. A na khial kha lua leh a ginalote ahi uh hi. Ahi zongin amaute tangthu om kei leh Lai Siangtho bu bucing zolo ding hi. A khial ngei, a pukkha ngeite mah na hi uh a, ahih hangin a puk na vuah lum suak loin, a zak nop tangthu hong gelh uh hi.

 i. Jacob---zuaugenpa/ mi khempa hihna panin Israel minamte pa hong suak hi.      ii. Moses---mi thatpa din mun panin Israel mite  makaipi pa hong suak hi.  

iii. Rahab---a paktat numei khat hihna pan a innkuan pihte honkhia nu hong suak hi.   
iv. Jepthah---numei paktatnu‘ tapa hihna panin  Israel minamte thukhenpi kum 6 sung hong sem pa ahi hi.        

v. Ruth ---Moab (nam neu,nam ginalo) numei khat hihna pan Hondampa Zeisu pianna guipi te lakah khat hong hi hi.     
  
vi. David---mi zi suhsakpa hihna pan Pasian lungtuak mipa hong suak hi.     

vii. Matthew---siahdongpa hihna pan Zeisu nungzuipa leh Lai Siangtho gelhpa hong suak hi.   
  viii. Peter---a Topa thum vei nialpa a hihna pan Jew mite tung leh Gentailte tungah gupna thu a puak masapenpa‘ hong suak hi.    
   
ix. Luke---Gentail mi khat hihna pan Lai Siangtho gelhpa khat hong suak hi. 

 x. Samaria numei---a paktat numei hihna pan Samaria ah gupna thupuaknu hong suak hi.   

 xi. Paul---thu um mite bawlsiapa hihna pan Gentail mi namte gupna thupuakpa‘ hong suak hi. 

Rick Warren in a laibu sungah, “Mi tampite pen a beisa hun lai a, a khialhnate uh ngaihsunsunin tua a beisa hun ki-uksak uh a, tua ii thaang sungah ki-awksak den uh hi‖, a ci hi. Bang na cih beh lai hiam cih leh, ―Eite pen a beisa tawh khangkhia ihi hi. Ahi zongin tua ii sila ding ihi kei hi”, a ci hi. 

 A beisa hunin bangzah takin gamtat na khialkha a, na mawhna a lianlua kha phial zongin kineusak kei in. Mi zong a beisa hunin nangmah bang ahi hi. A beisa sila hi nawn kei inla, lametna thak tawh kalsuan in; tua hi leh na lawhcing ding hi.
 
  D. A NENGNOTE THUPI NGAIHSUN IN
 Ex. 4:2 “TOPA in ama kiangah „Na khut sungah bang om ahi hiam? ci hi. Amah  in, „Ciangkhut,‟ ci hi” 

 Mi lawhcingte in amaute sunga Pasian guansak a neihsa uh ahi, hihtheihna nengno khat siksanin na lianpi a semte ahi uh hi. A nengnote thupi simin, na thahatna nengno, na septheihna nengno, na kivakna nengnote na lawhcin nadingin thupi taka zatkhiat ding ngaihsun in.   

·         Zarefath meigongnu in a neihsun an huan khat Elijah a piak leh aman tampi ngah lawh hi. (I Kgs.17:8-16).          
·         Pasal naupangno khat sun-an ding an lum 5 leh ngasa tawn 2 in mipi gilkial tul nga (5000) val vak zo hi. (Mtt. 14:13-21).        
·         David khut sunga a neih saili tawh Goliath that a gualzawhna ngah hi. (I Sam.17:40, 49).      
·         Moses in a tawi lai ciangkhut tawh suangpi pan tui phulsak, San tuipi luang lai khawlsak thei hi. (Ex.4-17).         
·         Naaman sila numeino kam khat pauna in Naaman damna ngahsak hi. (I Kgs.5:1-3).

 Lawhcinna lianpipite pen hun hoih neucikcik pan hong kipan thei hi. A nengnote thupi sim in.

“Tui mal taktak tampi in tui khangsak zo hi”.      
Tamil Proverb

“Tuni-a na zawh ding nasep khat pen zingciang ci-a, a zing ciang a zah nih na zawh kei leh ni khat ai a sumh na hi hi”.    
 Bishop Felix Lian Khen Thang 
 
E. NA KHENSATNA THUPI HI

 Josh. 24:15b “… Ahih hangin kei leh ka innkuan pihte in ahih leh TOPA‟ na ka sem ding uh hi‟, a ci hi”.

Tupna, geelna, ngimna, sawmna lianpipi na nei a, a lungdam huai ahi hi. Ahi zongin na sepkhiatna a om kei leh na lawhcing zo kei ding hi. Na sep khiat nadingin na khensat na thupi mahmah hi. Mihingte in a sia, a pha sep theih bawl theih nadingin thuneihna i nei hi. A sia sem ding maw? A pha sem ding? Na khensatna kisam hi. A sia sem dingin na khensat leh a sia mah na sem ding a, na siatlawh ding hi. A pha/a hoih sem dingin na khensat leh a hoih/a pha na sem takpi dinga na lawhcing ding hi. Na khensatna thupi hi. 

 “Discover Your Destiny‟ laibu sungah, ―Mihingte in i deih pen teel theih nadingin vangliatna i nei hi. Mi khem peuh in a sia maw? a pha maw? khat teitei kiteel hi. Mi pawlkhat a lawhcingte a innkuan sung a nopna phadeuhte leh a lungnophuai phadeuhte pen ama thu a thupha sang uh ahi kei hi. Amaute in tul vei, za vei bangmah teelna, khensatna na nei uh a, tua panin hi bangin a lawhcing mi hi thei pan uh hi; na khensatna thupi hi‖, ci-in a gelh hi. 

1.       Gautama Buddha      
Buddhism biakna makaipi Gautama Buddha ci-a i theih Siddhartha Gautama pen Himalayan mual bul Terai khua, India leilu lam (tu-in Nepal gam) ah hong piang ahi hi. A pu a pate pen mi nuamsa nam hi-in a khuavuah a pa in ukpi a sem ahi hi. Kisapna leh lunghimawhna bangmah omlo, nei loin a nungta mi khat ahi hi. Cinatna, gilkialna, sihna, lungkhamna cihte bangmah thei kha vet loin a pa inn sungah nuam a sa lua mahmah khat hi a, leitung mihingte nuntak haksat ziate bangmah a theih khak omlo hi. A pa in amah bangin ukpi a sem dingin a deihsak mahmah khat ahi hi.

 Ahi zongin ni khat a pa‘ kiangah, ―Khua sung vak nuam ing; leitung mu nuam ing‖, ci-in a ngen hi. A tapa ngetna bangin a pa‘n a vaksak hi. Khua sungah a vak laitak in leitung nuntak haksat zia va mu kha a, tua a muh khakte in a ngaihsutna kikhelsakin khensatna lianpi khat a pia hi.

Ama muh khakte in:        
A khatna ah—Puteek khat a mu hi. “Hih mipa a bangci hiam”, ci-in a nungzuipa a dot ciangin a nungzuipa in, “Hihpa pen a teek ta ahi hi; ni khat ni ciang mihing khempeuh hih mipa bangin i teek ding uh hi”, ci-in a dawng hi.  
A nihna ah—Dam lo/cina mi khat a mu hi. “Hih mipa a bangci hiam?”, ci-in dong leuleu a, “Hih mipa pen a damlo/a cina ahi hi. Hih mipa mahbangin mi khempeuh kidamlo thei; kicina thei hi”, ci-in a dawng hi.    
 A thumna ah  - Misi kivui dinga kipaipih khat a mu hi. “Hihte in bang hih ding ahi hiam?”, ci-in a dot leh, ― Amaute pen si vui ding ahi uh hi. Kumpi pa hi taleh mi maimai khat hi taleh hun khat teitei ciang kisi ding hi‖, ci-in a dawng uh hi. 
A lina ah—Khutdawh ngen khat a mu hi. “Hih mipa in bang hih hiam?”, ci-in a dot leh, ―Amah pen a nek ding nei lo ahih manin a gilkial a, a nek ding a ngen ahi hi‖, ciin a dawng uh hi.

 A tunga li teng a muh ciangin Siddharta Gautama in ―Banghangin hi bangin mihing in thuak ahi hiam‖, ci-in a lungngai dingin a nuam mahmah, lungkhamna omlo a pa inn sungpanin paikhia-in thu ngaihsun-in gamlak ah a pai hi.

Hi bangin a khensatna lianpi tawh a inn sung panin hong paikhiat ciangin lawhcinna hong ngah a, Buddhism biakna makaipi hong suak hi.  

·         Moses         
Moses pen Faro kumpipa tanu‘ ii tapa ahi thei hi a, Egypt gam ah kumpi a sem thei lua ahi hi. Ahi zongin tua sangin Israel minamte tawh haksatna thuak dingin khensat zaw hi. A khensatna bangin hong kalsuan a tuni dongin leh a tawntungin Moses min pen a mangngei nawnlo ding mi khat hong suak hi.  
·         Bill Gates        

Harvard University ah kum 2 na pan khensatna lianpi tawh sang tawpin hong kalsuan manin ama bawlsa software in leitung mun khempeuh hong zel a, mi haupi penpa khat, mi lawhcingpenpa khat hong suak hi.  

Sangpi (laphuak leh lasa siam)    
Laphuak siam leh lasa siam Sangpi pen Kawlgam mi bek hilo mi namdangte in zong hong theihpih khat ahi hi. Ama khensatna lianpi pen Dr. Do Kham in interview a bawlna ah kithei thei hi. USA ah Dr. Do Kham in interview a bawlna ah ama‘n bangci gen hiam cih leh, ―A masa in Yangon pai in Love Song la khum na (album) bawl ding ka ngaihsun hi. Ahi zongin ka pawlpi vua om mi pawlkhat a nungtolhte ka pa‟n hanthotna a piak ka za kha hi. Ka pa in amaute kiangah; „Zeisu gumpa leh Topa a sang i cih ciangin i kampi bek hilo a, i nuntakna, i gamtatna mahmah ah i kilatsak ding ahi hi,‟ ci-in a thapiakna ka zak ciangin kei hong gen tawh kibang danin ka ngaihsun a, tua a kipanin Love Song sa loin Gospel Song bek sa dingin ka khensat hi,”ci-in a gen hi. (Sangpi tawh holimna…youtube.com). Sangpi in a khensat mah bangin Love Song sa loin Gospel Song bek sa a, Pasian in zang mahmah hi. Lawhcing mahmah a Gospel Album thak a om ciangin Sangpi in a sa kha hiam? Gospel Stage Show khat a om ciangin Sangpi a kihel hiam? ci-in kidong tangtanga, a kihel kei leh tha kingah zolo, cih khawpkhatin Pasian in thupha a pia hi. Tua bek hi loin gam tuamtuam ah zin kawikawi-in Pasian hoihna teci pang kawikawi a Topa hoihna phat kha kawikawi hi.

 Sangpi mahbangin Saw Win Lwin zong Love Song sa lo dingin khensatna nei ahih manin, Gospel Song bek sa a Pasian in thupha pia in a aw zang hi. Kawlgam ah Sangpi leh Saw Win Lwin pen Pasian in la lam ah zang mahmah hi. 

 Na khensatna thupi mahmah hi.

“Na lawhcin nadingin khensatna in a dang teng sangin thupi pen hi cih phawk in”.              
Abraham Lincoln

  F. HAKSATNA A THUAK SIAM DINGIN KIGING KHOL IN

 Prov. 24:10 “Haksatna na tuah ciangin na lung a kiat leh, a gina lo mi na hi hi”. 

Leitung ah nungta lai na hih manin leitunga piang haksatna kici khempeuh na tuah khak, na thuak khak ding pen ngeina ahi hi. Haksatna na tuah khak leh mihing khat hi‟ng ci-a na theih ding ahi hi. Haksatna tawh kipelh thei ding kuamah omlo hi. Haksatna pen a lungdampih i hih samloh hangin haksatna om loin nopna taktak, nopna bucing om thei lo hi. Haksatna teng a ven khit ciangin nopna ki ngah hi.

                Bob Tuangpee laigelhna khat ah, ―Ei-le-ei i kipuahphat ding; ei thadah lehang kuan ei hong puah peuhmah ding hiam? Tu laitak na enn‘ mahmah ahi mihaute, mi minthangte, mi gualzote leh leitung makai minthangte zong eite mahbangin a gualzawh ma lai-un haksatna leh buaina tuamtuam mah na phuto uh hi. Haksatna pen i gualzawh nading kahleite hi. Haksatna om kei leh gualzawhna omlo dinga, hih i leitung pen cimtaak huai ding hi,‖ ci-in a gelh hi. (Bob Tuangpee—Eimau Hun—Mauvom Khua Tangthu leh BAG Silver Jubilee Magazine (BAG Mauvom: Myanmar, 2012,p.54). 

                Na nuntakna ah haksatna leh buainate in nang adingin hoihna a nei ciat uh hi.   
Haksatna na tuah ciang in:      
o Topa aap in!       
o Lungduai takin thuak in!     
o Ka hoih zawk nang ahi hi, ci-in pom thei in!   
o Tomkal sungbek hi, cih phawk in!     
o Midangte‘n zong a tuah/a thuak uh ahi hi, cih phawk in!    
o Haksatna sungah thupha tampi om hi, cih phawk in!    
o Haksatna a om leh a vensak nading dan zong om hi, cih phawk in! 

                Charles R. Swindoll in a gelhna khat ah, “Na nuntakna bang danin na om a, na kiim na pam bang dan hi-in haksatna bangzah tuakkha na hiam? Tu laitak na nuntakna lamet bei kha phial na hiam? Na phawk ding thu pawlkhat hong gen ning—Huihpi a hat semsem leh singzung kip tektek a, huihpi a sawt nun semsem leh singkung etlawmsak semsem hi,” ci-in a gelh hi. Haksatnate in na nuntakna hong kipsak tektek leh hong etlawmsak tektek ding ahi hi.  

i.                    Haksatna in thupha san nading na hizaw thei hi
                Viv Thomas in, “Khat veivei, i khituite in thupha i ngah nading a kipatna na hizaw thei hi. Khat veivei, i lungkham dahnate in lungdam a lamna kipat nading na hizaw thei hi. Khat veivei, i lawhsapnate in a zaknop phatna late hong pian khiat nading na hizaw thei hi,” ci-in a gelh hi.

                William Agenda in a genna ah, “Ka nuntakna pen tukpeng (football) tawh kibang hi a, Satan in lei hong nak denna semsem leh vantung lam ah ka sang tun toh semsem hi. Ni khat ni ciang Satan-in lei hong nak denna lua ding a vantung ka tungta ding hi. Tua ciangin Satan in hong zongzong dinga hong mu nawnlo ding hi. Tua ciang “William koi ah om mawk hiam” ci-in lungkham mahmah ding hi”, ci-in gen hi. 

Haksatna na tuahte in nang adingin a hoihzaw lam leh thupha san nading na hizaw thei hi.
“Na khempeuh a beina hi ta ei, na cih laitak pen a thak khat a kipatna ahi hi”.
Anonymous  

ii. Haksatna pen na a neuno khat liim a lianpi khat-a hong kilang na hi thei hi
 Kenneth Hagin Jr in, “Lung himawhna in a neuno haksatna khat a lianpi in hong musak thei hi. Ahih kei leh a neuno haksatna khat liim lianpi tawh hong kilang thei hi. Nitum kuan ciangin i liim en leng eima pumpi taktak sangin lian zaw thei hi. Tua mahbangin i haksatna pen a neuno khat hi a, ahi zongin liim lianpi-in hong kilang thei hi”, ci-in a gelh hi.

                Haksatna i cih pen na neuno khat liim lianpi a hong kilang hi thei hi. 

iii . Haksatnate hih veng theih ahi hi
 Joyce Meyer in, “Mihing nuntakna pen haksatna, lauhuainate tawh kidim hi. Tua bang haksatnate na tungah hong tun ciangin bang na cih hiam? Hangsan takin na do hiam? A hihkeh na taisan kha hiam? Na pumpi pen tua bang haksatnate a thuakzo ding leh a do zo dinga hong kibawl na hi hi. Tua ahih manin haksatna na tuah ciangin do in!”, a ci hi.         
Haksatnate a do zo dingin hatna nei na hih manin do in; hong veng lel ding hi.

“Dotna a om leh dawnna zong om hi”.             
Burmese Proverb

“Siatna in hong paisan kei leh nang paisan in”.      
Bosnian Proverb

“Dahna leh nopna i cih in a kipei kawikawi leengpei khat ahi hi”.         
Tamil Proverb

              G. NA DINMUN EN KENLA, NA TUPNA EN ZAW IN 
                Mic. 7:8  “Ka galte aw, kei tungtang ah lung dam kei un. Ka puk hangin ka tho kik ding hi. Khuamial sungah ka om hangin TOPA in khuavak hong pia ding hi”.

                Khat veivei i dinmun ki-enin kilungkia, kithanem thei hi. Na dinmun en kenla, na tupna en zaw in. Na dinmun in hong lawhcingsak ding hilo a, na tupna in hong lawhcing sak ding hi zaw hi. Na din mun lei ah a om hangin na tupna van ah koih inla, tua na tupna en-in kalsuan in; na lawhcing ding hi.

       Nick Vujicic       
Nick pen December 4, 1982 in Melbourne, Australia ah hong piang hi. Nick pen a nu sungpan a piankhiat in khut le khe nei loin hong piang khia hi. Pasian hehpihna tawh a veilam ah khe mengneu khat nei sam hi. Hi bangin khut le khe gina nei loin hong piang khia hi a, lungkiat huai mahmah hi. Nu-le-pa‘ thupi nei kha ahih manin a hampha hi. A dinmun a et ciangin lungkia lua ahih manin, kum 8 leh kum 10 a phak lai-in kithah sawm ngei hi. Ahi zongin amah itna tawh a kem, a khoi a nu-le-pa a khualna-in kithat ngam sam lo hi.

                Tua khitlam ciangin a dinmun en nawn loin, tupna thak hong nei a, tha hong sanin hong hanciam hi. Pilna hong sin a Double Bachelor‟s Degree in Accounting and Financial Planning hong ngah hi. Ama‘n a khe neih sunsun tawh minute khat sungin laimal 45 computer tawh khen thei, Drum tum thei, hai tawh tui dawn thei, a sam hiat thei, a hate hong nawt thei, phone tawh kiho thei, a mukmul, a kha multe kiat thei, Tennis kimawl thei, Golf kimawl thei, tuipek thei cih bangin hong khangto mahmah hi.

                A tupna hong mitsuan a hong hahkatin mite tha pia a, Pasian‘ thu genin teci pang kawikawi hi. Khangnote thapia-in hanthawn a, khangnote lungsim zo mahmah hi. Khangno tampi takin ama hangin thathak hong nei thei uh hi. Amah pen gam 24 leh gam khenpi 5(5 Continents) sungah zin kawikawi-in mi 3,000,000 (three millions) valte kiangah thugen hi. Mun tuamtuam ah thugen-in lawhcing mahmah hi. Amah pen Preacher; Motivator Speaker leh Director of ―Life Without Limbs‖ zong ahi hi.

                Ama‘n laibu zong gelh a mite deih mahmah vive ahi hi.  
A laibute:          
·         Life Without Limbs     
·         No Limbs, No Limits      
·         No Arms, No Legs, No Worries 

 Khut-le-khe neilo himah taseleh a dinmun en loin a tupna enin hong hanciam manin a lawhcing mi hong suak hi. 

Jessica Cox-Touching the Sky Without Arms    
Jessica Cox pen February 2, 1983 in Sierra Vista, Arizona, USA ah hong piang khia hi. A piancil phetin khut neilo sa-in hong suak khia hi. Ahi zongin amah pen leitung ah khut neilo a Pilot a sem masa pen ahi hi. Khut a neih loh hangin kithanemsak het loin pilna hong sin a, Bachelor of Sciene (B.Sc)-in Psychology Degree ngah hi.

                Tua bek thamloin kidalna siamna lam zong sin a, khut kihel lo, khe bek tawh Taekwondo Black Belt a ngah masa pen ahi hi. The Black Belt in the America Taekwondo Association panin a ngah ahi hi. Lam dan, lasak dan, mipi mai-a thugen dan, Computer laigelh dan khawng hong kisin to a, a khe bek tawh minute khat sungin laimal 25 ciang gelh thei hi.  
                A dinmun en loin a tupna sangsak a Pilot lam ah hong hanciam leh leitung ah khut tawh loin Pilot (Vanleng hawl) a sem masa pen hong hi hi. 

             Hellen Keller       
Amah pen a suah tungin a cidam sitset khat hi napi, kum 2 a phak ciangin khuasik natna nei a, a khuak sung thaguite kisia ahih manin tua hun a kipan a mit in khua hong mu nawn loin a bil in zong khua hong za nawn lo hi. Tua bek thamlo in hong pau theilo lailai hi. A nu-le-pate in mittaw sangah kahsak uh a, a khutme dawn bek tawh lai hong sin hi. Ama‘n, “Mi cidam khat hi-in ka pianpih mit tawh ni 3 sung beek khua mu thei leng ut mah sing maw,” na ci ngeungau sam hi.  

 Tua bang teng tawh kum 16 a phak ciangin hong pau thei a, kum 24 a phak ciangin mittaw lai tawh B.A degree hong ngah hi. Lai hong gelh a leitung ah laigelh siam khatin hong minthang hi. Greek lai, Latin lai, France lai leh German laite tawh laibu hoih nono tampi hong gelh khia a, ama gelh laibute pau nam 50 val bang tawh kitei sawn hi.

 A dinmun en loin a tupna a ente lawhcing uh hi. Khut-le-khe nei lote, mittaw, bengngongte in thasan in leitung lumlet uh hi. Na dinmun sangin na tupna thupi zaw hi. Na dinmun en kenla, na tupna mitsuan in. Na lawhcing ding hi.

“Genthei a na pian leh nang hihkhialh a hi kei a, genthei a na sih leh bel na khialhna ngiat ahi hi”.  
Bill Gates
“I hihna banga lungkim hithiatna in lungnopna lian penpen ahi hi”.            
Jamaican Proverb

  H. NA KINGAIHSUTNA SANGIN NA THUPI ZAW HI

 Phil. 4:13 “Khrih in a hong piak vangliatna tawh hihte khempeuh nawk zawhna ding thahatna a nei ka hi hi”.

 ‘Kei zaw dam kei lua ing; kei zaw hai lua ing; kei zaw zawng lua ing; kei zaw minam neu khat hi lel ing; kei zaw mi‟n hong it kei lua; kei zaw gina kei lua ing‘, ci-in na kingaihsun kha thei hi. Ahih hangin ngaih sun taktak lecin nang kingaihsutna sang mi thupi mahmah khat leh na lianpi a sem thei lua khat na hi gige hi.

o Na kingaihsutna sang Pasian in hong it zaw hi. 
o Na kingaihsutna sang Pasian in hong lainat zaw hi. 
o Na kingaihsutna sang Pasian in hong kem zaw hi. 
o Na kingaihsutna sang na cidam zaw hi.  
o Na kingaihsutna sang na khansau zaw hi.  
o Na kingaihsutna sang na pil zaw hi.   
o Na kingaihsutna sang na melhoih zaw hi.  
o Na kingaihsutna sang na daupai zaw hi.  
o Na kingaihsutna sang na thahat zaw hi.  
o Na kingaihsutna sang na sem, na bawl thei zaw hi. 
o Na kingaihsutna sang na siam thei zaw hi.  
o Na kingaihsutna sang mite‘n hong it zaw hi.  
o Na kingaihsutna sang mite‘n hong ngai zaw hi. 
o Na kingaihsutna sang mite‘n thupi hongsa zaw hi. 
o Na kingaihsutna sang mite‘n hong paakta zaw hi. 
o Na kingaihsutna sang mite‘n hong panpih nuam zaw uh hi.

Na kingaihsutna sangin mi thupi zaw leh mi manpha zaw  mahmah khat na hih manin mi lawhcing ding na hi hi.   

THU KHUPNA 
Ex. 14:13 “Moses in mite tungah, „Kihta kei un, kip takin om un. Amah in note adingin tuni-a hong sep ding TOPA  hotkhiatna mu un; bang hang hiam cih leh tu ni-a na muh uh Egypt mite, note in na mu kik nawn kei ding uh hi”.

 Na lawhcin nadingin Topa muang-in; kineusak kei inla, tupna kician nei in. Lokhopa in a khaici tuh a gah at dingin hun saupi a ngak bangin lungduai-in hanciam in. Na dinmun bangci bangin a om kha phial zongin na tupna sangsak in. Na dinmun sangin na tupna thupi zaw hi. 

 John C. Maxwell ii laibu khat ah: A lawhcing mi na hih nop leh:   
·         Na sep nading zia lungngai khol in!    
·         Na tupna en gige in!      
·         Na thupisakte kaikhawm in!     
·         Na thahatna lam theician in!     
·         Na hunte a manpha lamin zang in!    
·         Na geelnate sep khiatna tawh kipan pah in!   
·         Haksatna a tuak dingin kilamen in!    
·         A lawhcing dingin kilamen in!     
·         Nisim-in na tupna leh na ngimna   ngaihsun kikkik in!  

 A lawhcing ding mi na hih manin hanciam inla, ngak in…nang adingin ni thak hong suak ding hi. Sem in…sepna lo tawh gualzawhna om theilo hi.

“A hoih pen hong piang dingin ka lamen a, a sia pen ading zong ka kiging khol hi”.      
Boyoke Aung Saan

Source : 
LAWHCINNA LAMPI (Laibu)
Agelh - DONG ZA MUNG
KHEN NIHNA
NA LAWHCING NUAM HIAM?
 Laimai 32 - 55. 

Laigelhpa Dong Za Mung in Zomi eLibrary / Laibusaal ading in phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: NA LAWHCING NUAM HIAM? Agelh – Dong Za Mung Description: Rating: 5 Reviewed By: Cinpu Zomi
Scroll to Top